البطولات النسائيّة في رمضان: برعاية جمعية المرأة المتوحشة ! - تليفزيون Feature - كايرو 360
 







البطولات النسائيّة في رمضان: برعاية جمعية المرأة المتوحشة !
البطولات النسائيّة في رمضان: برعاية جمعية المرأة المتوحشة !
اصدرت في: 26/06/2016

من فترة قريبة بدأنا نشوف أعمال تليفزيونية و سينمائية جيدة و على مستوى عالي من الاحترافية معتمدة بالكامل على البطلات.. الممثلات أخدوا فرصتهم في أدوار البطولة، بعد ما احتكر أغلبها الممثلين الرجالة لفترة طويلة.. و في رمضان السنة دي في عدد كبير من المسلسلات القائم ببطولاتها ممثلات، قدموا أعمال متميزة في السنين اللي فاتت.. والمُلفت أن أغلب البطلات طالعين في أدوار "شريرة" شويتين.. أغلبهم ارتكبوا جرائم قتل، أو تعدي بالضرب في أفضل الأحوال!


الخانكة:
غادة عبد الرازق من أوائل الفنانات في اقتحام البطولات النسائية، وخاصة في الدراما.. واتعودنا كل سنة أنها بتقدم مسلسل متميز ومتكامل إلى حد كبير، على مستوى الصورة والكتابة، وعلى مستوى التمثيل طبعا.. وفي مسلسل الخانكة غادة بتلعب دور "أميرة" مُدرسة التربية الرياضية في مدرسة International.. أحد الطلاب (عاصم) بيحاول يعتدي عليها، لكنها بتدافع عن نفسها بقوة، والولد بيدخل المستشفى متأثرًا بجراحه، اللي كانت هتتحول لعاهة مستديمة، وتفقده رجولته.. الرأي العام بيقف مع الطالب ضد أميرة، كعادتهم في الوقوف مع الجاني.. وأميرة في خلال سعيها لإثبات براءتها بتتحول من ضحية الى جاني.. وبما أن المسلسل مكتوب مخصوص لغادة عبد الرازق، فلازم تظهر بدور السيدة القوية، بأنوثتها المبهرة.. الرجالة بيموتوا فيها وزميلاتها بيكرهوها.. ولو عرفنا كمان أنها بتروح الشغل على سكوتر، هنفهم إيه اللي يخلى علاقتها متوترة باللي حواليها طول الوقت.
الحبكة الدرامية مكررة، وشفناها كتير قبل كده.. وكالعادة الحوارات لا تخلو من ألفاظ خارجة إلى حدٍ ما.. لكن الصورة والكادرات راقية وشيك، والموسيقى التصويرية ممتازة على طول الخط وأضافت كتير للمشاهد.
أداء ماجد المصري مفرقش كتير عن أدوار كتير عملها قبل كده.. رجل الأعمال القوي، زير النساء، إلخ.. وجوده فعلا كان نقطة ضعف في المسلسل.. وخاصةً أنه وقع بين غادة عبد الرازق وفتحي عبد الوهاب، صاحب الموهبة الكبيرة، واللي لسه مش واخد حقه.. فتحي قام بدور (نادر) محامي البطلة، ودوره محوري ومهم، ويكاد يكون أهم دور في المسلسل.
المسلسل من تأليف محمود دسوقي وإخراج محمد جمعة.

 

يوميات زوجة مفروسة 2
بذكاء استغلت داليا البحيري النجاح الكبير للجزء الأول من يوميات زوجة مفروسة وقدمت الجزء الثاني.. من البداية هنعرف أن إنجي (داليا البحيري) وعلي (خالد سرحان) انفصلوا بسبب ماتش كورة! إنجي بتخرج نفسها من حالة الاكتئاب بعد الطلاق وبترجع شغلها في المجلة.. ومن هنا بتبدأ المواقف الكوميدية، لأنها طول الوقت قصاد طليقها علي، لأنهم زملاء في مكان واحد!
إيقاع الحلقات مظبوط نسبيًا.. والمسلسل مكتوب حلو.. الكوميديا فيه من غير افتعال أو ابتذال.. مساحة دور داليا البحيري مش مبالغ فيها –على اعتبار انها البطلة- والجميل أن داليا البحيري أعادت اكتشاف نفسها، لما خرجت من أدوار البنت الأرستقراطية وقدمت كوميديا راقية، وعملت دور زوجة و أم، واكتشفت الجانب الكوميدي فيها ونجحت في تقديمه.
الممثل القدير محمد أبو داوود عامل دور ممتاز.. وكمان مروة عبد المنعم، وشيماء سيف، وطبعًا خالد سرحان.. لكن سمير غانم ورجاء الجداوي أداءهم نمطي إلى حد كبير، وقدرتهم على الإضحاك أقل من المنتظر.

 

كلمة سر
المطربة التونسية لطيفة تخوض لأول مرة تجربة التمثيل للتليفزيون بعد تجربة فيلم سكوت هنصور مع الراحل يوسف شاهين.. هنا لطيفة اسمها "رحمة" و بتشتغل مدرسة لغة فرنسية.. جوزها هشام سليم (آدم) شكاك لأقصى درجة، وبيراقبها.. رحمة بتطلب الطلاق بسبب حصار آدم ليها، وشكه فيها طول الوقت.
الديالوجات بين رحمة وآدم مفتعلة، وواضح فعلا أن لطيفة مش مرتاحه قدام الكاميرا، وأداءها محتاج صدق وحرارة أكتر من كده.. الإيقاع بطيء جدا، والتركيز كله تقريبا على الحوار.. للأسف المسلسل فيه أخطاء كتير، ويعتبر ككل تجربة غير جيدة إطلاقا.

 

فوق مستوى الشبهات
رحمة حليم (يسرا) دكتورة جامعية متخصصة في التنمية البشرية –رغم أنه مش تخصص أكاديمي أصلا- الناس تعرفها كسيدة ناجحة ومشهورة.. لكنها قدرت تخفي الجانب القبيح في شخصيتها، وهي في الحقيقة قاتلة.. رحمة من نوعية المجرم السيكوباتي الذكي، اللي بيقدر يضحك على المجتمع كله، ويظهر بشكل مختلف عن حقيقته.. رحمة بتقتل الدكتور جلال العوضي، الطبيب النفسي جارها في الكومباوند، وبتسرق التسجيلات بتاعته مع مرضاه، اللي كلهم من صفوة المجتمع، وبالتالي بتتحول لقضية رأي عام.. وبنعرف أن سبب أزمة رحمة النفسية هي أمها، اللي كانت بتعاملها بشكل سيء وهي صغيرة.
الجميل في المسلسل -و الجديد برضه- أن يسرا لأول مرة بيطلع ليها جانب مظلم، وهي مش طول الوقت مثالية وبتعمل أعمال خير، والناس بتحبها وبتسمع كلامها وبيتعلموا منها.. لكن للأسف يسرا ماكانتش موفقة أبدا في أداء الدور.. الشخصية صعبة ومركبة، ويسرا اتعاملت معاها بسطحية شديدة، واكتفت بتعبيرات وانفعالات عادية ومش مفهومة! واكتفى صناع المسلسل بالمطاردات والتحقيقات على حساب العالم الداخلي لشخصية البطلة.
الموسيقى التصويرية ممتازة رغم بساطتها -اعتمدت على البيانو و التشيللو أغلب الوقت- وكل تراك في مكانه.

 

هبة رجل الغراب 3
بعد النجاح الكبير لمسلسل هبة رجل الغراب في الموسمين اللي فاتوا، تم استكمال الجزء الثالث بعد تغيير إيمي سمير غانم (هبة) وحازم سمير (أدهم) وريم مصطفى (بيري)..
من الواضح أن المشاهدين اتعودوا على إيمي وحازم سمير، واندمجوا معاهم في مشاكلهم، وفي الحوارات اللي بينهم، وحصل نوع من الألفة، علشان كده ظهرت تعليقات سلبية كتير على الجزء الثالث.. أحمد فريد و ناهد السباعي ماكانوش موفقين أبدا في أداء أدوارهم، وحضورهم أقل كتير.. ناهد السباعي أداءها زاعق ومفتعل.. والمفروض أن هبة هادية وخجولة.. ناهد أضافت لـ "هبة" مخالب وأنياب من غير مبرر، والشخصية فقدت كتير من جمالها وتوهجها.
فكرة المسلسل مأخوذة من المسلسل الكولومبي "Yo Soy Betty, La Fea" واتعمل منه نسخة أمريكاني بطولة أميركا فيريرا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
مصطفى  عبد ربه
حرر بواسطة:
مصطفى عبد ربه
تاريخ النشر:
26/06/2016
برج العذراء.. ما عرفش يطلع مزيكاتي فطلع شاعر.. بـ يحب الكتب، والشاي بالنعناع، والعيون الحلوة، وأغلب الوقت بـ يحب حاجات ما بـ يحبهاش غيره.