The Definitive Guide to Living in the Capital , Cairo , Egypt

كونديتي – Condetti

كونديتي: بيتزا وأطباق إيطالية وعالمية في قلب المعادي

reviewed by
Waleed Abuarab
rate it
review it
كونديتي: بيتزا وأطباق إيطالية وعالمية في قلب المعادي
فيه مقولة بـ تقول “كل سكان المعادي قاعدين في بيوتهم، وكل اللي ماشيين في الشوارع تايهين” إحنا مؤمنين بالموضوع ده جدًا لأن كل مرة ننزل في قلب المعادي وشوارعها المرقمة وميادينها المدورة اللي متفرع منها 10 شوارع كل شارع برقم مالوش أي علاقة بالشارع اللي جنبه، 12 جنب 78 و6 جنب 82 ولما تدخل في 100 و200 بقى ربنا يعينك. الفكرة أننا توهنا حبة حلوين وإحنا بـ ندور على مطعم «كونديتي» اللي زرناه النهارده، هو في النهاية طلع موجود في شارع 82 المتفرع من شارع 7 (واخدين بالكم؟) اللي فيه مترو الأنفاق بين محطتي المعادي وثكنات المعادي، وأمام فندق اسمه لؤلؤة المعادي مباشرة أو Maadi Pearl، اسأل على الفندق هـ توصل أسرع.
المطعم أنيق جدًا من الخارج ومن الداخل، فيه 4 ترابيزات بشمسيات ممكن تقعد عليهم خارج المحل، وتتفرج على الشارع الهادئ ومدخل الفندق اللي هـ يبقى أمامك. وممكن تقعد في الداخل في التكييف اللي بالمناسبة ممكن تضبطه حسب رغبتك لو حبيت. المكان مش كبير من الداخل بس محبب للنفس جدًا وحسينا بالخصوصية والدفء لو جاز لنا التعبير، ديكورات باللون البني والبيج وترابيزات عليها بلورات زجاجية بـ تكشف اللى تحتها من نباتات زينة وإكسسوارات، ستاندات عليها كتب ومجلات وخرائط لحي المعادي اللي دوَّخنا، وبورد كبير على الحائط عليه بعض قصاصات المجلات والأخبار اللي نُشرت بخصوص المكان. وفيه شاشات تليفزيون لكن الصوت المسموع كان لأغاني بوب جميلة بـ يتم تشغيلها طوال الوقت في المكان. مش هـ نقول لكم قد إيه المكان رومانسي ورقيق، وفي نفس الوقت يصلح جدًا لقهوة الصبح بدري قبل الشغل أو لعشاء عمل فيه بيتزا وكوكتيلات فريش، وينفع يبقى ملجأ دائم لهواة القراءة وتصفح المجلات مع أسبريسو وسناكس خفيفة.
منيو إيطالي جدًا فيه بيتزا وباستا بكل أشكالها بأسعار من 30 لـ 45 جنيه، وفيه مقبلات ساخنة وباردة بأسعار من 20 لـ 50 جنيه، والأطباق الرئيسية من الأسماك والدجاج واللحوم من 60 لـ 120 جنيه وفيه كمان أطباق للدايت بمكونات صحية أكثر زي المشروم وزيت الزيتون بأسعار من 60 لـ 75 جنيه. والساندويتشات من 30 لـ 40 جنيه.

سيزر سالاد وبدل قطع الدجاج طلبنا جمبري (44 جنيه) ، مليانة جبن بارميزان وقطع الجمبري المسلوق وكانت فريش، بس كان ناقصها وحدات الطماطم الصغيرة Cherry Tomatoes وفيه طعم زي الرنجة أو السلامون في الطبق مش عارفين ليه! بس المهم أننا خلصنا كله وفتح نفسنا فعلاً أننا نجرب حاجة ثانية من الأطباق الرئيسية، وقع اختيارنا على الستيك فيليه بصوص البلو تشيز أو الريكفورد (76 جنيه)، ممكن تختار من صوصات ثانية زي المشروم أو الديجون ماسترد أو صوص الفلفل الأسود. ومع الطبق بطاطس محمرة وخضار سوتيه، أكلتنا المفضلة اللي بـ نقيس بها مستوى الجودة في المطاعم اللي بـ تقدم أطباق عالمية. الستيك رغم أنه جاء لنا بعد أقل من 10 دقائق وإحنا طالبينه Well Done إلا إنه جاء لنا مستوي بشكل مثالي وسُمكه ممتاز وواخد وقته تمام على الجريل، والتفسير الوحيد لده أن الجريل عند «كونديتي» ممتاز لأنه السرعة اللي جاء لنا بها كانت مفاجأة. السوتيه حلو والبطاطس خفيفة وصوص البلو تشيز طعمه مضبوط مش لاذع قوي زي ما أماكن ثانية بـ تعمله.
البيتزا من الحاجات المشهور بها «كونديتي» رغم كده بيتزا بادرينو (46 جنيه) بالدجاج اللي طلبناها كانت عادية جدًا وناقصة بعض الإضافات، لكن حجمها كويس ومشبعة لو أخذت معاها واحد بيبسي وأي طبق مقبلات صغير.
طلبنا عصير بينا كولادا (24 جنيه) بعد الأكل وأخذناه تيك آواي علشان كنا مستعجلين، بعد ما مشينا خطوتين اكتشفنا أنه ميلك شيك فانيليا ومافيهوش طعم الأناناس وجوز الهند خالص، رجعنا بسرعة وطلبنا تصحيح الطلب وكان رد العاملين أن هو ده البينا كولادا عندهم وأنهم ممكن يزودوا لنا قطع الأناناس شوية! وفعلًا حصل لكن ما كانش عندنا وقت كفاية لشرح الفرق الجوهري بين الميلك شيك والبينا كولادا فأخذناه ومشينا بس اتضايقنا من الحركة بصراحة ونتمنى أن دي تبقى غلطة عامل مش مقصودة مش سياسة المكان. غير كده الخدمة سريعة ومنتبهة والأكل لذيذ والمشروبات كثيرة ومتنوعة وحبينا القعدة في المكان رغم التوهان اللي حصل لنا قبل ما نروح هناك.

Write your review

Leave a Reply

You must be logged in to post a comment.

recommended