الدقي, Cairo_360_cairo_by_area - كايرو 360
القاهرة بالمناطق

الدقي

الدقي

الدقى حدود المنطقة الرسمية مراوغة إلى حد ما، غير محددة، الدقى منطقة بـ تقع على الضفة الغربية لنهر النيل، فى الجهة المقابلة لوسط البلد.

صمم منطقة الدقى خلال فترة العشرينيات والثلاثينيات "أوسوالد فيني" وهو عضو بارز فى عائلة بريطانية استقرت فى الإسكندرية. وفيه ميدان فى الدقى مازال بـ يحمل اسمه "ميدان فيني" وبـ يعتبر من العلامات المميزة للمنطقة، فى عام 1964 بعد ما حصل تغيرات وتنمية حضرية كبيرة هناك فيه مصريين كثار من الطبقة الراقية انتقلوا للعيش فيها وامتلكوا كمان قصور وأراضى، فيه مقولات بـ تقول أن تم تسميتها بالاسم ده نسبة لعائلة استقرت فيها من الصعيد وبعدين تركوها وانتقلوا للريف بكام سنة بعدها.

المنطقة دي متمركزة إلى حد ما بخلاف وسط البلد والزمالك، فيها شوارع رئيسية كثيرة بـ تتصل بها زي شارع النيل، وشارع التحرير ومحيي الدين أبو العز، بـ يحد المنطقة النيل فى الشرق، وشارع السودان فى الغرب، وشارع عبد السلام عارف فى الجنوب، فى حين أن العجوزة والمهندسين موجودين فى شمالها، ممكن تروح للدقى عن طريق المترو بعد ما تعدي على 4 محطات هما: الجزيرة، وبعدها الدقى، يليها البحوث، والرابعة عند جامعة القاهرة.

المناطق الرئيسية فى الدقى هم: بين السرايات، الدقى القديمة والجديدة، المساحة، والبحوث. منطقة "بين السرايات" مقسمة لثلاث مناطق رئيسية: "الدوار" (وهى أقدم منطقة)، و"الخريطة" (الأحدث)، أما أرقاهم هى "الطوبانجة". جامعة القاهرة موجودة فى منطقة بين السرايات، وللسبب ده فيه كثير من محلات الكتب والأدوات المكتبية والمطاعم هـ تلاقيها هناك، وكمان هناك هـ تلاقى حديقة الحيوان وجنينة الأورمان.

أما "الدقى القديمة والجديدة" فهما منطقة واحدة بـ يفصلها كوبري الدقى اللى صُمم من أجل راحة وتسهيل المرور، أما المساحة تعتبر من الأماكن الراقية فى منطقة الدقى وفيها فنادق كثيرة وسفارات زي الشيراتون، وفندق بيراميزا والسفارات هـ تلاقى الباكستانية واليمنية وسفارة المغرب، وبصفة عامة الدقى فيها أكثر من 40 سفارة منها الفرنسية والروسية، وبالتالى بـ تحتل المرتبة الثانية بعد منطقة الزمالك فى عدد السفارات، وهناك كمان ميدان المساحة اللى فيه فندق الشاهر والمدرسة الألمانية و Deutsche Evangelische Oberschule Kairo (DEO، فيه كمان هناك مركز "المساحة" للفنون والثقافة وجامعة العلوم الحديثة والآداب، ومنطقة "البحوث" تم تسميتها بالاسم ده بسبب وجود "المركز القومي للبحوث" فى المنطقة دي.

من العلامات المميزة برضه فى الدقى "نادي الصيد" واسمه المعروف به من أيام الملك فاروق الأول كان "نادى الصيد المصري الملكى"، تم تأسيسه عام 1939 بهدف توفير مساحة للمصريين للتعبير عن مواهبهم واهتمامتهم، النادي مشهور جدًا فى الوقت الحالى بين العائلات والشباب والرياضيين لأنه بـ يوفر مساحات عريضة من الحدائق، وتسهيلات رياضية ومتنفس من زحمة القاهرة، جنب النادي موجود وزارة الزراعة وداخلها المتحف الزراعى وزيارته ممتعة جدًا.

وموازي للنادي هـ تلاقى شارع رئيسي وهو "محيي الدين أبو العز"، الشارع ده مشهور جدًا ومركز للتسوق وفيه مطاعم كثيرة برضه، وقبل نهاية الشارع ده متفرع منه شارع "مصدق" واللى بـ يمثل إضافة للمنطقة برضه ومنه ممكن تروح على شارع التحرير وبالتالى بـ يعتبر الرابط الرئيسى بين المنطقتين.

ساكنى الدقى ممكن تصنفهم بأنهم من الطبقة فوق المتوسطة، المنطقة مش الأهدأ ولا الأنظف بين المناطق ومافيش حاجات كثيرة ممكن تعملها فيها.

شارع التحرير مشهور بأن فيه سينما التحرير، والمركز الثقافى الروسي، و"كشري التحرير" أفضل محل كشري فى كايرو، فى الجزء الجنوبى من شارع الكافور وقريب من الكورنيش هـ تلاقى "متحف محمد محمود خليل" اللى فيه تشكيلة مبهرة من الفن الأوربى وبشكل أخص الفرنسي.

"الدقى" ما تعتبرش من أفضل الأماكن اللى ممكن تعيش فيها فى كايرو، لكن بالنسبة للناس اللى شايلة هم إيجار البيوت الغالى والمعيشة السكن هناك كويس لأن الإيجار مش غالى ومساحة الشقق معقولة، وغير كده موقعها كويس تقدر تروح من خلالها لأى مكان مشهور من خلال الكباري المحيطة بها سواء كان المكان بعيد أو قريب.

الخريطه
الأبرز
مطاعم
أرجيلا لاونج: مطعم كلاسيكي في الدقي

أرجيلا لاونج: مطعم كلاسيكي في الدقي

لاحظنا خلال الفترة اللي فاتت إن مع زيادة عدد المطاعم الفخمة في القاهرة من الصعب تلاقي مكان هادئ تستمع فيه بالأكل من غير دوشة. من الكنوز المدفونة في الدقي أرجيلا لاونج اللي يعتبر واحد من الأماكن اللي بنتكلم عليها واللي بتقدم الهدوء اللي نفسنا فيه مع أكل ومشروبات ندلع بيهم نفسنا. أرجيلا لاونج موجود في ميدان فيني، وبيتكون من منطقة إن دوور مقسمة ثلاثة أجزاء بديكورات مودرن بسيطة وحوائط على شكل حجر، أما القعدة فبتكون كراسي وكنب. المنيو فيها كل الأطباق المعروفة من مقبلات سخنة وباردة، وباستا وبيتزا وأطباق مشويات وفراخ ولحوم. بدأنا بموتزاريلا ستيكس (28 جنيه) ومعاها ساندويتش تشيكن ميكسيكان (30 جنيه) وباستا ألفريدو (35 جنيه)، وبصراحة الأكل نزل بسرعة رغم أنهم في الأول احتاجوا وقت طويل لاستلام الأوردر. يمكن الموتزاريلا ستيكس كانت عبارة عن خمس أو ست قطع رفيعين والجبنة طرية جدًا من جوه، بس كانوا محروقين من بره. بصراحة الطبق اللي معاه صوص مارينارا حسينا قوامه مش ماسك نفسه،ومكانش على المستوى المطلوب. ننسى الموتزاريلا شوية ونروح للأطباق الرئيسية اللي كانت أحسن كتير. التشيكن ميكسيكان كان عبارة عن عيش بانيني طازة محشي فلفل أخضر وبصل وصوص أرجيلا المخصوص– اللي طلع شيلي صوص –مع شرائح فراخ طرية وتتبيلتها حلوة. العيب الوحيد في الساندويتش كان البطاطس المحمرة المحروقة والمخلل السبايسي جدًا جدًا. وممكن يكون ناقصها تتبيلة كويسة. أما الفراخ فكانت طرية وطعمها هايل. نيجي للمكرونة ألفريدو واللي كانت مستوية تمام ألادنتي، برغم أن قوام الصوص كان مضبوط إلا أن التتبيل ماكنش مناسب إطلاقًا. أما قطع الدجاج فكانت رطبة وعصارية زي ما المفروض تكون. أرجيلا كمان عندهم تشكيلة متنوعة من الحلويات تشمل تشيز كيك وفروت سالاد وتارت وآيس كريم، وإحنا طلبنا براونيز بالآيس كريم (20 جنيه). رجعنا مرة تانية لمشكلة الانتظار الطويل، وكمان بعد ما استنينا الحلو ينزل لفترة طويلة، اكتشفنا أنهم نسيوا يبلغوا المطبخ أصلًا! شكل البراونيز كان يفتح النفس وطعمها هايل، ونزلت سخنة وبتدوب من كتر حلاوتها، وكل ده كوم ولما تأكلها مع بولة الآيس كريم فانيليا الكبيرة اللي عليها صوص شوكولاتة كوم تاني خالص. يمكن قابلتنا شوية مشاكل مع الجرسون والأكل محتاج تضبيط شوية، بس أرجيلا قدر يوفي بوعده؛ هدوء ومنيو كبيرة فيها أكل لطيف.
كافيهات
تيمبو كافيه: أكل ممتاز وخدمة عالية في الدقي

تيمبو كافيه: أكل ممتاز وخدمة عالية في الدقي

ناس كتير مؤمنة أنك علشان تلاقي مطعم أو كافيه كويس لازم تهرب من مطاعم وسط القاهرة وتروح الشيخ زايد أو التجمع، وأنك كا ما بتبعد عن قلب القاهرة كل ما بتلاقي مطاعم أفضل، لكن تيمبو كافيه الموجود في الدقي بالقرب من المركز الثقافي الروسي نجح يغير المقولة دي، الحقيقة أنه مش مجرد كافيه، هو كمان مطعم مميز بيقدم أكلات شهية. مدخل المكان مبهج، وده بيديك مؤشر على أنك هتمر بتجربة حلوة، بمجرد دخولك هتلاحظ أن المكان مستواه مميز، بنتكلم عن النظافة تحديدًا، كمان المكان واسع وفيه مساحات بين كل ترابيزة والثانية وده بيدي خصوصية بيبحث عنها ناس كتير بتكره الأماكن الضيقة. مستوى الخدمة في المكان يستحق نتكلم عنه، الموظفين كلهم مبتسمين ابتسامة حقيقية، بيقابلوك مقابلة كويسة، وبيهتموا بك، في تجربتنا الموظف طلبنا من الموظف يساعدنا ويقول لنا أفضل الأطباق والشروبات في المكان علشان أول مرة نزوره، والحقيقة أنه كان متعاون جدًا، شرح لنا مكونات كل طبق ومشروب. رغم أن المكان كان فيه عدد كبير لكن بسبب المساحة الواسعة لتيمبو ماكوناش حاسين بالزحمة، واختارنا ترابيزة هادية، في البداية طلبنا من منيو الأكل ساندوتشات تملى التانك، طلبنا ساندوتش فراخ بانيه، (27 جنيه) وده بيتكون من قطع بانيه وخس ومايونيز، كان الطعم رائع، وتتبيلة الفراخ كانت مميزة، مش سهل أننا نلاقي بانيه مضبوط في مطاعم القاهرة، لكن الحقيقة أن تيمبو عرف يضبط الموضوع كويس. كمان حجم الساندوتش كان معقول ومناسب لشخص جعان. طلبنا كمان ساندوتش تيمبو برجر جامبو، وده أجمل ساندوتش ممكن تأكله هناك، كل المكونات مضبوطة، ومحتوياته من خيار وكابوتشة وطماطم خلت الساندوتش أقرب لوجبة متكاملة، كل حاجة محطوطة بضمير فيه. بعد الأكل قولنا لازم نجرب المشروبات اللي بيتميز بها الكافيه، اختارنا مشروب فلوريدا (23 جنيه) وده عبارة عن خليط من مانجو، فراولة، وجوافة، كانت تجربة أكثر من رائعة، المكونات كلها طازجة، ومتقسمة صح، ونسبة السكر مضبوطة، جربنا كمان تيمبو كوكتيل (28 جنيه) وده كان خليط من أكثر من عصير منهم مانجو وكيوي، طعمه كان رائع. انتهت تجربتنا في المكان، لكننا واثقين أننا هنرجع ثاني، نجرب حاجات أكثر.
فن وثقافة
شفشاون: مساحة إبداع وعمل مشترك في الدقي

شفشاون: مساحة إبداع وعمل مشترك في الدقي

يعني إيه "شفشاون – Chefchaoun"؟.. دواء ده حضرتك يعنى ولا نجيبه منين؟ ولا أنتم بـ تشتغلونا وجايبين اسم غريب والسلام؟ هو من ناحية الاشتغالة هو فيه اشتغالة بس مش من الاسم، منكم أنتم لأنكم اللي هـ تشتغلوا هناك. "شفشاون" دي اسم مدينة في المغرب، طيب يعنى إشمعنى الاسم ده؟ ما الأسماء كثير، لأ بص حضرتك وركز معانا كده، شوف سبحان الله المدينة دي في المغرب بـ تتميز بنفس طبيعة المكان والعمل المشترك فيه، خاصة أن السكان هناك طباعهم مختلفة وبـ يمارسوا أنشطة مش مترابطة في نفس المكان -من غير ما يختلفوا أو يموتوا بعض جدال- متقبلين بعض عادي لأ وبـ يساعدوا بعض كمان. أما معنى الاسم نفسه بقى، فـ "شف" دي كلمة عربية من أصل فعل "شوف"، و"شاون" كلمة أصلها غير عربي ودي يعنى قمم الجبال، وبالتالى شفشاون معناها "شوف قمم الجبال"، وده لأن كل اللي هـ يروح هناك في الأغلب بـ يبص للعالم من فوق ويشوف إيه اللي ناقصه وهو يعرف يعمله فبـ يعمله. يعنى من الآخر ما حدش بـ يروح هناك ويرجع زي ما جاء، لازم بـ يكسب حاجة جديدة حتى لو أنه بس يستمتع بالمنظر من الدور الخامس في الشمس الجميلة، أو أنه يقابل حد جديد ما يعرفوش. ده غير أن فعلًا الدنيا صغيرة قوي، لازم هـ تلاقي حد تعرفه أو يعرف حد أنت تعرفه، بالذات لما يبقى سنك بداية من 18: 20 سنة لحد الثلاثين وأنت طالع بس ما تطلعش قوي يعنى، ولك أنشطة كثيرة. أول ما بـ تدخل من الباب بـ تلاقي صورة لقمم الجبال فعلًا باللون الأزرق الجميل، وعلى أيدك اليمين هـ تلاقي الحائط مرسوم عليه مربعات بكل الألوان علشان تسيب تعليقك في شفشاون وحاطين يافطة كاتبين عليها "اكتبوا حاجة تخلي الناس تبتسم في المربعات"، وكل مرة تروح تفتكر أنك سيبت جزء من روحك هناك. أما عن أصحاب فكرة شفشاون فهم مجموعة شباب جرئ وواقعي وهم رضوى محسن وأحمد رأفت ومحمد رشاد ومصطفى أبو سيف وأحمد كمال وأحمد نجيب، حبوا أنهم يبنوا لنفسهم مساحتهم الخاصة اللي بـ يبدعوا فيها ويساعدوا غيرهم أنهم يبدعوا ويشتغلوا براحتهم، بمنتهى البساطة شفشاون دي مساحة عمل مشترك، يعنى لو عاوز تذاكر في مكان هادئ وتلاقي اللي يشجعك على المذاكرة، لو عاوز تعمل اجتماع سواء في شغلك أو لعملك الأهلي، أو لو عاوز تتعلم أي نوع من أنواع العلوم، هـ تلاقي كورسات في اللي أنت عاوز تتعلمه، وناس تتواصل معاهم في مجالات مختلفة ودي ميزة مساحات العمل المشتركة. في الفترة الأخيرة انتشرت الفكرة دي وسط الشباب وبقى فيه أكثر من مكان للعمل المشترك في مدينة نصر والدقي وأماكن ثانية كثير، بـ يدعموا فكرة أنك تنزل تشتغل في مكان هادئ فيه ناس بـ تشتغل زيك أو بـ تذاكر، لأنك بـ تتعرف كمان على ناس ممكن تنفعك في شغلك أو في حياتك عامة، من مبدأ أن معرفة الناس كنوز. نيجي للجد بقى أسعارهم مناسبة جدًا لو قارنت أنك ممكن تقعد اليوم كله بره البيت بالمبلغ البسيط ده في مكان محترم، غير أنك لما بـ تقعد اليوم كله كل مشروباتك ببلاش على حساب صاحب المحل زي ما بـ يقولوا. بالنسبة للأسعار الطالب المجتهد يبدأ بالساعة بـ 5 جنيه والحسابة بـ تحسب زي أي سنتر بس الفكرة بقى أن العداد بـ يقف عند 15 جنيه بعد ثالث ساعة، وطبعًا مشروباتك في اليوم عليهم من شاي وقهوة وهوت شوكليت والذي منه، لكن لو حضرتك عضو في مؤسسة غير حكومية أو نشاط طلابي فرق السعر هـ يبدأ من 3 ساعات هـ يبقوا بـ 25 جنيه لحد آخر اليوم. أما لو حضرتك في شركة محترمة فلأنك يا سيدي العامل قدوة لأخواتك الطلبة وبـ تساهم في المجتمع وكده الثلاث ساعات بـ 35 جنيه برضه لآخر اليوم. وفي حالة أن حضراتكم عاوزين تعملوا اجتماع وعاوزين قاعة خاصة بكم، بـ يكون بداية من 5 أفراد والساعة بـ 25 جنيه، والساعتين بـ 50 جنيه، وبعد الساعة الثالثة كل ساعة بـ 3 جنيه. ولو عددكم أكثر من 10 أفراد بـ نزود من ثالث ساعة 2 جنيه بس، أما لو عاوز قاعة كبيرة ممكن تستوعب لحد 100 شخص وربنا بـ يبارك ما تقلقش. كمان شفشاون كل فترة بـ تعمل دورة تعليمية في مختلف المجالات، زي دورة التعليم المرن اللي عملوها الشهر اللي فات، ودورة الدفاع عن النفس للسيدات فقط we-do Training والأماكن محدودة للأسف، ودورات مختلفة ثانية كثيرة ممكن تشوفها على صفحتهم على الفيسبوك. ولأنهم فعلًا بـ يختلفوا عن الآخرين، مكتبة شفشاون مفتوحة لكل اللي حابب يقرأ ويشارك بكتبه، بالتعاون مع جروب رشح لي كتاب على الفيسبوك وTrustious. أخيرًا شفشاون مش مجرد مكان بـ تذاكر فيه أو بـ تجتمع فيه مع صحابك، ده مساحة بـ تساعد الناس أنها تبدع وتشتغل من قلبها.
تسوق
غزل البنات: محل أونلاين لمستلزمات الأشغال اليدوية وأكثر

غزل البنات: محل أونلاين لمستلزمات الأشغال اليدوية وأكثر

 الهوايات من ضمن الحاجات اللي قربت تنقرض بسبب ظروف الحياة والوقت اللي بيمر بسرعة من غير ما نلحق نعمل حاجة فيه. من ضمن الهوايات اللي قربت أنها تتلاشى تمامًا من على كوكبنا هي الأشغال اليدوية، وخصوصًا التريكو وأعمال الغزل اللي للأسف سمعتها مش قد كده بين ناس كثير، واللي بيشوفوا أن الواحد يقعد يعمله كوفية تريكو أو كروشيه حاجة ما تعملهاش إلا تيتة الحاجة علشان تقضي وقت فراغها في حاجة مفيدة، وقيس على كدة كل حاجة. المجموعة اللي وراء مدونة ومحل غزل البنات قرروا أنهم يتحدوا الأحكام المسبقة اللي بتطلق على الناس اللي ما زالت الأشغال اليدوية من ضمن دايرة اهتماماتهم، وقرروا أنهم يشاركوا الناس حبهم لأي حاجة الواحد بيعملها بنفسه عن طريق مدونتهم غزل البنات. المدونة مش بس فيها فيديوهات ومقالات ممكن تفيد أي حد غاوي أعمال يدوية، دي كمان متقسمة بحسب نوع الهواية اللي أنت بتحبها (قص ولزق، صلصال، خياطة وتطريز على سبيل المثال)، وفيها كمان دليل للأماكن اللي بتبيع مستلزمات الأشغال اليدوية في القاهرة والإسكندرية. وبجانب المدونة وصفحة المدونة على الفيسبوك، غزل البنات عند صفحة ثانية باسم غزل البنات شوب، وهو مش بس بيبيع أدوات التريكو والكروشيه، ده كمان بيقدم مجموعة كبيرة من الخامات المتنوعة اللي ممكن تستخدم في أي تفانين تسليك كهواية، ده غير مجموعة الأدوات المتخصصة اللي ممكن تسهل شغلك؛ زي مثلًا مقص التنضيف (10 جنيه) واللي مناسب جدًا لأي حد غاوي خياطة. أما مجموعة الإبر، فعندهم مجموعة كبيرة؛ إبر الخياطة ذاتية اللضم (علبة 12 قطعة سعرها 6.5 جنيه) واللي بتسهل عملية اللضم (خرم الإبرة مفتوح من فوق بيدخل منه الخيط)، ده غير مجموعة الإبر الكروشيه البلاستيك (11 جنيه). غزل البنات برضه عنده مجموعة كبيرة من الخامات الفنية الثانية، زي أقلام البورسلين بألوان متنوعة (35 جنيه) وورق ملون 150 جرام (باكيت من 10 أوراقA4 سعره 5 جنيه)، وفوم جليترستيكر بنفس الحجم (باكيت مكون من 10 قطع سعره 20 جنيه). من الاختراعات اللي عاجبتنا كانت مجموعة من الخرامات اللي لها أشكال حجمها (1 سم) سعر الواحدة (7 جنيه). من ضمن الحاجات الكثير اللي متوفرة على الصفحة هي مجموعة شرائط الأقمشة الملونة والزجزاج اللي من خامات أحجام متنوعة، وهي بتتباع بالمتر مش بالبكرة. يعني مثلًا متر الشريط القطن المضلع بـ 7 جنيه، ساتان منقط عرض 4 سم 2.5 للمتر الواحد، أما المشجر فهو 5 جنيه. لو قعدنا نحكي كثير عن الصفحة مش هنخلص كلام عنها، ننصحكم أنكم تدخلوا تشوفوا المنتجات عندهم، ولو عندكم أي استفسارات، تقدروا تسألوا لأنهم بيردوا بسرعة.
صحة ولياقة
فيلا رقم 36: صالون تجميل ممتاز ومريح فى الدقى

فيلا رقم 36: صالون تجميل ممتاز ومريح فى الدقى

إيه حكاية قص الشعر اللى مجرد التفكير فيه بـ يفكرنا بالمشوار المتعب اللي هـ نعمله فى زحمة القاهرة؟ الموضوع بالنسبة لنا عمره ما كان سهل، واضح أن القلق والتردد بتاعنا بقى عامل زى المرض. الخبر الكويس أن أخيرًا نقدر نقول أننا لاقينا المكان اللى مش بس بـ يخلى الموضوع سهل، ده كمان بـ يخلى التجربة ممتعة ومرضية كل مرة نروح هناك.أمامه فيه صف من الأشجار وحجر مستخبى مكتوب عليه اسم المحل، علشان كده ممكن ما تشوفش "فيلا رقم 36" وأنت ماشى. رغم كده، لو بصيت فوق هـ تلاحظ فيلا دورين كبيرة ولونها وردى ظاهرة من وراء الشجر. ادخل من البوابة، وامشى مع الممر، هـ تلاقى نفسك فى واحة من الهدوء فى لحظات قليلة.الموظفين فى «لا فيلا» ودودين ومحترفين. بعد ما تسجل اسمك، هـ تروح علشان تلبس روب أبيض نظيف ويقدموا لك مجموعة من المشروبات زى الشاى والعصير.تصميم "لا فيلا" يستحق الإشادة؛ مجموعة من الألوان معمولة بأدق التفاصيل، ومطبوعات بأشكال من الستينيات معلقة على الحائط، وأخيرًا وليس آخرًا، غرف العمل هادئة وواسعة. المكان بألوانه المشرقة بـ يكمله كنبة واسعة مدورة لونها وردى فاقع للى هـ يستنوا دورهم. حاجة ثانية، ممكن تقعد فى واحدة من البلكونات المخفية وسط الأشجار. رغم كده، لازم تخلى بالك أن الكراسى المريحة بمخداتها العميقة ممكن تشفطك داخلها.من ناحية الخدمة والأسعار، قائمة "لا فيلا" قريبة من الأماكن الثانية فى المدينة، رغم أن عندهم نقص فى خدمات المساج. مدلكة تايلاندية بـ تيجى مرة أو اثنين فى الأسبوع، على حسب جدول المواعيد. أسعار المساج بـ تبدأ من 250 جنيه وللأسف متاحة للسيدات فقط. رغم كده، أحسن حاجة عند "لا فيلا" هى اهتمامهم. من الأسماء المعروفة لناس كثير الثنائى الفرنسى بول وكريستوف دائمًا بـ يشتغلوا على الشعر بعناية ودقة مالهمش مثيل، بس للأسف كريستوف مشى من المكان. طاقم العمل بـ يستمع لرغبات زبائنهم بس برضه بـ يقولوا إيه أحسن حاجة مناسبة من وجهة نظرهم، مع الانتباه لتركيبة الوجه والجسم.فيه كمان مصففين للشعر موجودين زى الموهوب إيهاب. مع حس الدعابة عنده وحركات الرقص على أطراف أصابعه، دائمًا التسلية بـ تكون محل ترحيب. قصات الشعر بـ تبدأ من 150 جنيه شاملة غسيل بالشامبو، مع تدليك الرأس اللى بـ يخليك عاوز تنام، وتجفيف الشعر.إزالة الشعر، والمانيكير والباديكير برضه موجودين. بـ 30 و40 جنيه، تقدرى تحصلى على عملية معالجة خبيرة للأظافر، والعناية بالجلد عند آخر الظفر، والجلد الخشن وأى مشكلة مزعجة للأظافر ممكن نقابلها. بـ يستخدموا طلاء للأظافر بجودة عالية من ماركة OPI وبـ يقترحوا كمان طبقة طلاء نهائية علشان تضمن أن اللون يفضل موجود على طول. بعد ما خلصنا كلامنا، ناقص تروح "لا فيلا" وتجرب بنفسك. من الخدمة الممتازة لزبائنهم للجو المرح والأسعار المعقولة مش غريبة أنهم يبقوا مشغولين وساعات كمان محجوزين لمدة أسبوع مقدمًا. ممكن تروحى من غير حجز بس بـ ننصح أنك تكلميهم قبلها.
مناطق اخرى
الدقي
الدقي
الزمالك
الزمالك
السادس من أكتوبر
السادس من أكتوبر
القاهرة الجديدة
القاهرة الجديدة
المعادي
المعادي
المهندسين
المهندسين
جيزة
جيزة
مدينة نصر
مدينة نصر
مصر الجديدة
مصر الجديدة
وسط البلد
وسط البلد
مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح