دليلك لأحسن الأماكن اللي ممكن تفطر فيها مع أصحابك أول يوم في العيد - الحياة في كايرو Feature - كايرو 360
 







دليلك لأحسن الأماكن اللي ممكن تفطر فيها مع أصحابك أول يوم في العيد
دليلك لأحسن الأماكن اللي ممكن تفطر فيها مع أصحابك أول يوم في العيد
اصدرت في: 05/07/2016

انتشرت على مواقع التواصل الاجتماعي بوستات كثيرة بتحلف بجمال أول كوباية (قهوة/ شاي/ شاي بلبن) مع أول بسكويتة تأكلها أول ما تصحى في أول يوم العيد.

ولأن كثير مننا بيبقى أساسًا في الشارع علشان يلحق صلاة العيد، جمعنا لكم أماكن ممكن تروحوا تفطروا فيها بعد الصلاة.

 

برو & تشو – Brew & Chew :

بدأ مشواره في إسكندرية، وبعدها وصل للقاهرة في كورت يارد المعادي علشان يحقق نجاح كبير ضمن له مكان في قائمة الفائزين بجوائز محرري كايرو 360 السنة دي. برو & تشو عنده اختيارات كثيرة للفطار من أول المخبوزات الفرنسية بأنواعها المختلفة وبينزل معاهم سلاطة فواكه، ده غير مجموعة الساندويتشات واللي بيتقدم معاها سلاطة صغيرة.

فيه كمان كريب وبان كيكس للناس اللي بتحب الحلو على الفطار. وتقدر تستمتع بمجموعة من المشروبات الكثيرة الموجودة –سواء الساخنة أو الباردة- والميلك شيكس.

ليفت بانك – Left Bank:  

مكان واسع ولطيف في ضوء النهار... بداية حلوة بعد أيام طويلة من الصيام. بجانب العصائر الفريش المتنوعة والمشروبات المختلفة، ليفت بانك عنده مجموعة كبيرة من الاختيارات؛ سواء الأطباق المنوعة أو المخبوزات والحلويات –الفطار عندهم بيتقدم من الساعة 8 لحد الساعة واحدة.

ننصحكم أنكم تحاولوا تروحوا بدري -بيفتح من الساعة 8 صباحًا- علشان أكيد هتلاقوا كل اللي في منطقة الزمالك بيفطروا هناك. جربوا هناك الكريب بالشوكولاتة.

قهوة – Qahwa:

من الأماكن اللي قدر أنه يحقق نجاح كبير أول ما فتح في أركان مول في الشيخ زايد، بعدها امتد نجاحه لحد القاهرة الجديدة بفرع ووتر واي. ومش بس قهوة بيقدم مجموعة كبيرة من المشروبات والقهوة والعصائر، منيو قهوة كبير ومليان اختيارات كثيرة وخصوصًا للفطار. إحنا شخصيًا جربنا التريبل تشيز أومليت واللي بيتقدم معاه مجموعة من الخضروات المشوية.

ده برضه من الأماكن اللي لازم تروحوها بدري وإلا تجربتكم ممكن ما تكونش لطيفة في الزحمة.

بول - Paul:

بول مشهور بحلوياته ومخبوزاته الفرنسية المتنوعة واللي مش ممكن تلاقيها في مكان ثاني، ولكن بول برضه عنده مجموعة كبيرة من الأطباق الشهية للفطار، واللي بيتقدم من 9 لحد واحدة.

بالرغم من أننا روحنا فروع كثيرة، إلا أن أحلى الفروع من حيث القعدة هو بول الكوربة، وننصحكم تجربوا مجموعة الإكلير الموجودة عند بول لأنها متميزة وخصوصًا إكلير القهوة.

كاسبر & جامبينيز – Casper & Gambini's :

لو أنت من الناس اللي بتحب تاكل فطار مكون من طبق واحد متنوع وكميته مناسبة ننصحك تجرب كاسبر & جامبينيز لأن المكان بيمتاز بمكونات الطبق الكثيرة ما بين حلو وحادق واللي هتكون مناسبة لأول يوم فطار بعد رمضان.

ده غير أنه كمان عنده مجموعة من الاختيارات الشرقية –لو ما لكش في الفطار العالمي- زي اللبنة وزيت الزيتون والخيار مع العيش. ممكن برضه تجربوا الفطار الإنجليزي لو غاويين أطباق عالمية على الفطار وهو مكون من أومليت، سجق، طماطم مشوية ومشروم مع العيش.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
دينا مختار
حرر بواسطة:
دينا مختار
تاريخ النشر:
05/07/2016
منسق تحريري.. الشخص اللى تلاقيه قاعد لوحده على القهوة الصبح بدري بـ يتفرج على الخلق، سيب لها قلم وورقة فاضية هـ ترجع تلاقيها إما كاتبة قصة قصيرة أو راسمة باب شعبي قديم، تطلعها من وسط مليون بلبسها المنقوش فى منقوش.