دليل أحداث نهاية الأسبوع: لايك جيلي وعلي الهلباوي وندوات ومعارض فنية - الحياة في كايرو Feature - كايرو 360
 







دليل أحداث نهاية الأسبوع: لايك جيلي وعلي الهلباوي وندوات ومعارض فنية
دليل أحداث نهاية الأسبوع: لايك جيلي وعلي الهلباوي وندوات ومعارض فنية
اصدرت في: 05/09/2013

صباح الخير يا أهل القاهرة، فات حوالي أسبوعين من غير ما نكتب لكم دليلنا الأسبوعي اللي إحنا شخصيًا بـ نحبه جدًا، وبـ نعتبره الكبسولة اللي لازم تضربها قبل الويك إند علشان تحدد أولوياتك في خروجاتك وتحقق أقصى استفادة من أجازتك الأسبوعية. طبعًا مش محتاجين نقول إيه سبب الغياب، لأن كلمة "حظر" بـ تلخص كل شيء، لكن لما بدأ حظر التجول يخف تدريجيًا بدأت المراكز الثقافية تشد حيلها وبدأت الفعاليات تعود شوية شوية، وإن كان لسه مش بكامل طاقتها بس إحنا راضيين بقليلنا وهـ نقول لكم حالًا عن الحاجات اللي ممكن تعملوها النهارده وبكرة وبعده.

الليلة دي فرصة علشان تفك وتنسى العك والقلق اللي في كل مكان وتعيش ساعتين من الروقان والضحك والمزيكا مع فريق لايك جيلي على مسرح الجنينة في حديقة الأزهر، الدخول من الساعة 8 مساءً والتذاكر بـ 10 جنيه بخلاف تذكرة دخول الحديقة نفسها. 

وعلشان النهارده أول خميس في الشهر وعلشان إحنا مبسوطين من عودة العروض في ساقية الصاوي في الزمالك بـ ندعوكم لحضور مسرح الساقية للعرائس ضمن عروضه الشهرية وحفل أم كلثوم تعود من جديد، علشان نسمع ونشوف سومة (العروسة) في قاعة النهر، وسعر التذكرة 5 جنيه لأعضاء الساقية و10 جنيه لغير الأعضاء.

وعلشان السعادة بقيت عملة نادرة دلوقت وما حدش عارف طريقها منين، بقى فيه ندوات مخصوص علشان تدلك على طريق السعادة. الدكتورة إيمان البطران هـ تقدم ندوة بعنوان "كيف تكون سعيدًا" في قاعة الكلمة بساقية الصاوي، الندوة بـ تتناول موضوع الزواج وأهميته للفرد والمجتمع ومواصفات شريك الحياة، الدعوة عامة.

يوم الجمعة هـ يكون فيه ندوة مهمة بعنوان "سيرة النبي" في ساقية الصاوي في قاعة الكلمة مع أ. أحمد عبد الجواد، تتناول الندوة فهم وتطبيق السيرة النبوية بشكل عملي في حياتنا اليومية، الدعوة عامة.

وكل يوم جمعة الساعة 4 العصر ولمدة شهر هـ تعرض سينما آرت اللوا مجموعة من الأفلام المتحدثة باللغة الأسبانية، تبدأ بكرة مع فيلم "Amores Perros" للمخرج أليخاندرو جونزاليز، اللي بـ تدور أحداثه حول حياة ثلاثة أفراد في حادث سيارة، الفيلم بـ يتناول الكفاح والخسارة والندم والواقع.

وعلى مسرح الجنينة في حديقة الأزهر يقدم المبتهل والمنشد علي الهلباوي حفل إنشاد ديني، علي هو ابن الشيخ المبتهل محمد الهلباوي وقدم مشروع مع ماهر فايز لمزج الترانيم مع الابتهال، بالإضافة لتقديمه أغاني وأناشيد وطنية مع الإنشاد الديني، سعر التذكرة 10 جنيه.

يوم السبت وبعد فترة كآبة وحزن لا بأس بها على القاهرة وباقي محافظات مصر، جاء الوقت علشان نضحك شوية ونتبسط، وده هـ يكون في بيت الرصيف في المعادي في حفل ستاند أب كوميدي بعنوان "حظر حبنا"، الدخول الساعة 5 مساءً وسعر التذكرة 20 جنيه.

نتمنى الأسبوع الجاي الحفلات والفعاليات تكثر شوية مع تحسن الحالة الأمنية والموود العام للمواطن المصري، تابعوا أجندة الموقع وهـ تلاقوا عليها كل الأحداث الثقافية اللي بـ تحصل في القاهرة، هـ نكتبها أول بأول، نشوفكم على خير وسلامة كمان أسبوع إن شاء الله.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
05/09/2013
-