كنا في جولتنا الشهرية في كارفور المعادي أو المعادي سيتي سنتر وبعد حملة التسوق المعتادة لفت نظرنا في واحد من ممرات المول محل فيه ملابس أطفال في منتهى الأناقة، غير اللي بـ نشوفها في أي حتة، والأحجام والمقاسات كانت بـ تضحك بجد، كأنها بتاعة عرائس لعبة. الفضول بس هو اللي خلانا ندخل نتفرج على المحل ده.

محل «دو باريل أو ميم – Du Pareil au meme» مساحته متوسطة وكل جدار عليه معروضات من نوع محدد، على اليمين للبنات (Fille) وعلى الشمال الأولاد (Garcon) وإحنا كتبنا الكلام ده باللغة الفرنسية لأن هم كاتبين كده على الحوائط، والملابس هناك من سن شهور لـ 14 سنة، ومعروض على الحائط اللي في الوسط ملابس خروج للأطفال وحديثي الولادة. فيه ستاندات في كل أركان المحل عليها إكسسوارات للبيبي زي النظارات الشمسية وتوك الشعر والجوارب وحاجات حجمها فظيع مش هـ تتخيل أن فيه بني آدم بالحجم ده! بس دمها خفيف قوي، بس كمان مش هـ تصدق أن الأحجام دي بالأسعار اللي مكتوبة عليها.

الملابس هنا في منتهى الأناقة، خطوط أزياء عالمية لملابس الأطفال، خاصة في السن من 3 لـ 14 سنة، الشورتات الأولادي ملفتة جدًا بقصاتها وألوانها، تقريبًا كل موديل بـ يعجبك في ملابس الكبار والنقشات والقصات المستخدمة فيه هـ تلاقي منه في ملابس الأطفال عند «دو باريل أو ميم» وبنفس أسعار ملابس الكبار كمان!

ملابس البنات البيبي تحفة، فساتين بأحجام مذهلة وألوان رقيقة، سعر الفستان 180 و200 جنيه، ملابس البيت والبيجامات بـ 150 و 200 جنيه، التوكة السورتيت بـ 60 جنيه، والنظارات الشمسية الملونة بـ 50 جنيه. في ملابس الأولاد هـ تلاقي قمصان وتي شيرت بولو وملابس كاجوال –مافيش ملابس كلاسيك أطفال هنا- والأسعار بـ تتراوح ما بين 150 لـ 300 جنيه لأي بنطلون أو قميص. الشياكة هنا مافيش كلام عليها، وتحفظنا على الأسعار بس لأن الملابس دي استخدامها بـ يكون بشكل مؤقت جدًا لأن المرحلة العمرية دي ممكن تستمر شهور وبعدها حجم الجسم يتغير. يعني علشان تعمل شوبنج في المحل ده لطفلك وتجيب طقمين أو ثلاثة بـ 1500 أو 2000 جنيه مثلًا، بعد 6 شهور أو سنة بالكثير الطفل مش هـ ينفع يلبس الملابس دي ثاني. ونفس الكلام على الأحذية والكوتشي والشباشب، أحجامها كوميدية وتقفيلها خطير وشيك جدًا وأسعارها من 100 لـ 300 جنيه برضه.

هـ تحب تعمل زيارة للمحل ده وتجيب لأبنك أو بنتك منه حاجة او اثنين على سبيل الفانتازيا، وتقول له لما يكبر "أنا كنت بـ أشتري لك كل هدومك من فرنسا". أصل كل المعروضات داخل المحل عليها تيكيت «دو باريل أو ميم». الخدمة هنا ظريفة وبسيطة، ما حدش بـ يلاحقك وأنت بـ تتفرج، والأسعار موجودة على المعروضات وكمان الخامة والسن والمقاس ومش هـ تحتاج الموظفين إلا وأنت عند الكاشير بـ تدفع الفلوس.