صابر صادق: مكتبة بـ تبيع وتشتري في التاريخ - تسوق Feature - كايرو 360
 







صابر صادق: مكتبة بـ تبيع وتشتري في التاريخ
صابر صادق: مكتبة بـ تبيع وتشتري في التاريخ
اصدرت في: 04/10/2012
إذا كنت من مُحبي البحث في التاريخ وقراءة المجلات والكتب القديمة، زور سور الأزبكية واسأل عن مكتبة "صابر صادق" أقدم مكتبة متخصصة في بيع وشراء الوثائق، والجرائد، والمجلات، والكتب القديمة.
هـ تلاقي هناك مُعظم المجلات المصرية والعربية اللي صدرت في الـ100 سنة الأخيرة بأعدادها المختلفة زي آخر ساعة، والمصوّر، وروزاليوسف، ومجلات ثانية ما بقتش بـ تصدر أصلاً لكنها موجودة في المكتبة، وأعداد مهمة للأهرام (منها العدد الأول)، والأخبار والجمهورية خاصة بأحداث زي اغتيال السادات ويوسف السباعي ووفاة عبد الناصر وأم كلثوم وأخبار حرب أكتوبر والوحدة بين مصر وسوريا.. وجرائد رياضية وفنية متنوعة.
المكتبة ممكن تشتري منك الصحف والكتب القديمة، وسعر الشراء بـ يختلف حسب قِدم الحاجة اللي عاوز تبيعها، كمان كل ما كانت الجريدة أو المجلة بـ تتكلم عن أحداث مهمة تتعلق بمشاهير أو رؤساء وملوك كل ما سعرها وقيمتها زادت.
معظم الحاجات الموجودة في المكتبة كانت في مزادات كبيرة بـ يُباع فيها تراث فنان أو أديب أو باشا من باشاوات عصر الملكية، لكن طبعًا مش كل حاجة معروضة في المكتبة لأن مساحة المكان ضيقة، وعلشان كده لو حبيت تتعامل معاها ممكن تزور المخزن الرئيسي التابع لها في الجيزة من خلال التنسيق مع صاحبها صابر صادق.
أما لو كنت حابب تشتري وتقتني، مش محتاج غير فلوس كويسة وفضول يشدك لقراءة ومشاهدة تراث مالوش حدود، وزي ما قلنا قبل كده، كل ما زاد قِدم الحاجة كل ما زاد سعرها، يعني مثلاً المجلة اللي عمرها 50 أو 60 سنة ممكن تكون بـ 20 أو 15 جنيه، واللي عمرها 80 أو 100 ممكن تبقى بـ 40 أو أكثر، والجرائد بـ تكون أرخص شوية.. أما كتب الأدب الإنجليزي أو الغربي القديمة فهي ممكن توصل لـ 50 أو أكثر شوية، زي روايات "شكسبير" و"ديكنز"، بالإضافة لعدد غير محدود من الكتب العربية والعبرية وبلغات ومن بلاد مختلفة.
وإحنا في المكتبة شوفنا براويز أصلية للملك فؤاد الأول اللي كان بـ يحكم مصر في العشرينات وابنه فاروق، وبراويز ثانية لملوك ورؤساء عرب، وأسعارها تبدأ من 50 لـ 200 جنيه.. شوفنا كمان أفيشات لأفلام سينما قديمة كان منها أفيش فيلم "صاحب الجلالة" لفريد شوقي.. وشوفنا وثائق عمرها 100 سنة وأكثر زي وثائق زواج وتسنين وشهادات ميلاد لمصريين بلغات مختلفة، وعقد مكتوب بخط اليد من العصر العثماني.
مشاهير كثير بـ يشتروا كتبهم من المكتبة زي يحيى الفخراني اللي تكلم عن المكتبة وذكرها بالاسم في مسلسله "عباس الأبيض"، وكمان الفنانة يسرا وسهير المرشدي والكاتب يوسف معاطي والفنان نبيل الحلفاوي ورامز جلال.
علشان توصل للمكتبة من غير ما تزهق من زحمة المكان، اسأل على مكتبة رقم 8 أو مكتبة صابر، وأحسن حاجة تستخدم المترو وتنزل محطة العتبة وتخرج على الميدان اللي هـ يطلعك على سور الأزبكية، وتعد 4 مكتبات على إيدك اليمين من لحظة خروجك من المحطة، وضروري تتصل بالمكتبة قبل ما تروح لأن مالهاش مواعيد مُحددة، وممكن تتواصل مع صابر على تليفون 01118488221.

مزيد من الصور
  • صابر صادق: مكتبة بـ تبيع وتشتري في التاريخ
  • صابر صادق: مكتبة بـ تبيع وتشتري في التاريخ
  • صابر صادق: مكتبة بـ تبيع وتشتري في التاريخ
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
مصطفى ماهر
حرر بواسطة:
مصطفى ماهر
تاريخ النشر:
04/10/2012
تورط ودخل مهنة الصحافة من 5 سنين.. حاول يخرج من الورطة، لكن الورطة كبرت وبدأ يكتب سيناريوهات ويعمل أفلام قصيرة تقريبًا هو بس اللي بـ يشوفها.