ألبان وآيس كريم كافيهات in الزمالك Cairo, Egypt

كافيهات

ماماز تراميسو: ركن خاص بالتحلية الإيطالية الشهيرة في الزمالك
اصدرت في: 31/12/2014

أي شخص بـ يحب القهوة أكيد هـ يكون بـ يحب الحلو الإيطالي المشهور التراميسو، وهو عبارة عن طبقات مختلفة من بسكويت السافوايار المشبع بالقهوة، والجبنة الماسكربوني مع مكونات ثانية. ونعتقد أن حتى لو ما لكش في القهوة، حلو خفيف زي التراميسو أكيد هـ يعجبك. وبما أننا من عشاق القهوة والتراميسو، قررنا أننا نجرب ماماز تراميسو – Mama's Tiramisu في الزمالك. المحل ديكوراته غلبت عليها الوردي بدرجاته والأبيض، أما الحائط المواجه للكاونتر الرئيسي والثلاجات فعليه ورق حائط مخطط بالأسود والأبيض والوردي زي ألوان اللوجو وعلب التغليف، ما تتوقعش أنك تقعد هناك لأن حجم المحل صغير جدًا. ماماز تراميسو عندهم مجموعة مختلفة من الأحجام، أصغر حجم وهو يكفي شخص واحد (10 جنيه)، الأكبر منه (25 جنيه)، أما الحجم اللي يناسب حوالي 4 أشخاص (85 جنيه)، 12 شخص (175 جنيه)، 16 شخص (200 جنيه)، أما لو العزومة كلها قائمة على التراميسو –حوالي 22 شخص- فسعر أكبر حجم 300 جنيه. بما أننا هـ نجرب أكثر من نوع، قررنا نأخذ الحجم الأصغر (10 جنيه)؛ أول نوع طلبناه كان التراميسو التقليدي، واللي للأسف ما كانش فيها أي طعم للقهوة، وكمان السكر كان فيها قليل. أما النوع الثاني ببسكويت أوريوز، واللي استبدلوا البسكويت التقليدي للوصفة فيه بالأوريو. بالرغم من أن طعمه مقبول أكثر من النوع التقليدي، إلا أننا توقعنا أننا نحس بأي طعم للقهوة بجانب الأوريو ولكن للأسف كل اللي عملوه أنهم غيروا الوصفة تمامًا. الكراميل كان الأسوأ؛ طبقة الجبنة عليها بقعة صفراء في المنتصف توقعنا أنها كانت في يوم من الأيام كراميل، أما البسكويت فهو المفروض أنه هو كمان متشرب بالكراميل ولكن للأسف كان بالنسبة لنا بسكويت مرطب بحاجة مالهاش طعم. على العكس تمامًا كان التراميسو بالنوتيلا (15 جنيه)، لأن طعم النوتيلا الأصلي كان واضح تمامًا وكمية النوتيلا نفسها كانت وفيرة، نقدر نعتبر أن تراميسو النوتيلا كان أفضل حتى من التراميسو التقليدي. بغض النظر عن الأنواع الكثيرة الموجودة، فكرة أن مكان متخصص بس في التراميسو مش قادر يقدم تراميسو تقليدي جيد دي في حد ذاتها مشكلة، وخصوصًا أن الأنواع المبتكرة اللي بـ يقدمها مستغنية عن المكونات الرئيسية للنوع التقليدي، فبدل ما يضيف عليها، حذفها بالكامل، للأسف التجربة كانت غير موفقة بالمرة بالنسبة لنا.

...

جيلاتو ميو: آيس كريم رائع في الزمالك
اصدرت في: 31/08/2014

بمجرد ما نكتشف أن فيه مكان جديد فتح في الزمالك بـ ننبسط، واللي بـ يبسطنا أكثر لما نروح نستكشف المكان ونلاقيه يستاهل أننا نروحه مرة ثانية. الكلام ده بـ ينطبق على تجربتنا في جيلاتو ميو أو Gelato Mio. محلات كثيرة في القاهرة بـ تقدم منتجات الألبان عمومًا والآيس كريم خصوصًا، بس حقيقي عدد قريب من الرقم صفر اللي بـ يقدم آيس كريم بجودة جيدة، وثابتة. معظمها بـ تبدأ بجودة عالية، بعد كده نسبة اللبن في الآيس كريم تقل، وتزيد نسبة الثلج، غير أن النكهة والطعم تدريجيًا يبدأوا يختفوا، لغاية ما تفقد ثقتك في المكان ككل وتدوّر على مكان ثاني... وهكذا. بس في حالة جيلاتو ميو نعتقد أن الموضوع ده صعب، لأن إدارته هي نفس إدارة بيتزا ميا، واللي محافظ على جودته حتى يومنا هذا. المحل صغير نسبيًا، ديكوراته بلونها الأبيض بسيطة جدًا لكن مرحبة ودافئة. بداخل المحل ثلاث ترابيزات صغيرة تتسع لفردين، أمامهم ثلاجة مليئة بكل ما هو جميل! الأنواع كثيرة وتختلف عن أي مكان إحنا جربناه. جربنا أصغر حجم (12 جنيه) وهي عبارة عن كوب يتسع لنكهتين... هي مش كبيرة بالنسبة لنا، ولا بالنسبة لأي شخص بـ يعشق الآيس كريم. اختيارنا الأول آيس كريم جبنة الريكوتا بالتين، والشوكولاتة. لازم نوضح هنا أننا مش من محبي التين نهائيًا، بس نعترف أن نظرتنا اختلفت تمامًا بعد تجربتنا... قطع التين صغيرة جدًا ووفيرة جدًا فبالتالي في كل معلقة هـ تلاقي تين يوازن طعم الريكوتا الرائع من الأساس. كمحبي الآيس كريم، الشوكولاتة مش أول اختياراتنا، بس إحنا كفريق كايرو 360 عارفين أن إدمان الشوكولاتة عند البعض بـ يوصل لحد أن الآيس كريم عندهم يعني بالشوكولاتة وبس؛ علشان كده جربناها، ونحب نطمن كل المدمنين أن جيلاتو ميو بـ يقدم أعظم آيس كريم شوكولاتة في القاهرة بلا منازع! الشوكولاتة مركزة وطعمها غني لدرجة أنك تنسى أنك بـ تأكل آيس كريم أصلًا... نعتقد مافيش حاجة تُقال بعد كده. الرائع في الموضوع بقى أن الكوب فيه نكهتين مختلفتين تمامًا إلا أن كل نوع محتفظ بطعمه حتى لو في معلقة واحدة... ده كان إعجاز بالنسبة لنا! من الأنواع الثانية اللي جربناها كانت الكراميل، والمارون جلاسيه باللبن واللي نكهة اللبن كانت قوية وواضحة فيه ولكن بشكل إيجابي. النوع الوحيد اللي ما عجبناش كان تشيز كيك الفراولة: فبالإضافة لأن نكهة الفراولة كانت طاغية جدًا، النوع ككل كان ليه نكهة مش لطيفة ما قدرناش نحدد إيه هي أو إيه سببها. الأنواع اللي أساسها الفواكة زي المانجو والليمون مثلًا، بلا أي مبالغة معمولة من فاكهة طازجة، انسى تمامًا المنكهات الصناعية؛ دي مش في قاموسهم. وبما أننا من عشاق آيس كريم الليمون... نقدر نقول أنهم قدروا يأخذوه لمستوى أعلى من أي مكان ثاني... مضبوط ومنعش لأن درجة لذوعته أعلى من المعتاد بس من غير ما يكون مرّ. آخر حاجة جربناها كان الأفوكادو (19 جنيه)، وهو عبارة عن بولة آيس كريم عليها Shot قهوة، تقدر تختار أي نكهة –ننصحك بالريكوتا مع التين- مزيج من القهوة المركزة الساخنة والآيس كريم الكريمي الرائع... ما صدقناش أن أكثر حاجتين بـ نحبهم في العالم ممكن يكونوا في كوب واحد. المكان رائع والتجربة في الواقع كررناها ثاني يوم على طول. مستني إيه؟ لازم تجربه أنت كمان!

...

ماسة: حلويات سورية رمضانية وأكثر في الزمالك
اصدرت في: 03/07/2014

من ساعة ما بدأ الربيع العربي يقلب نكد في سوريا، ومصر بـ تستقبل وفود كبيرة من السوريين. مين مننا ما لاحظش أن عدد كبير من أكشاك الحلويات السورية انتشر في مولات مصر في خلال السنتين اللي فاتوا، ده غير غزو الشاورما السوري، والأكلات النصف جاهزة اللي بـ تباع في ثلاجات السوبر ماركت في كل مكان. قليل جدًا من المأكولات دي يستحق التجربة. من سنين وماندرين قويدر مسيطر في الزمالك على قسم الحلويات الشرقية سيطرة تامة، وحتى لما فتح منافس بشهرة الصمدي، استمر الأول بقوة. وبالتالي لما عرفنا أن فيه محل حلويات سورية اسمه ماسة فتح في الزمالك، قلنا ده أكيد جامد بقى، وتحمسنا جدًا للتجربة، وخصوصًا أن رمضان شهر الحلويات الشرقية. المحل حجمه صغير والواجهة الزجاجية مش ظاهر منها غير ثلاجة آيس كريم فيها حوالي 6 أنواع مختلفة شكلهم الحقيقة شهي جدًا ويغريك بالدخول. أول ما دخلنا استقبلنا المسئول عن الخدمة بترحاب وذوق، فعرفنا أنه سوري... طبعًا من لكنته. لازم نقول هنا أن مسالة أننا نكتب مقال نقدي عن محل حلويات مسألة معقدة... فلو علينا كنا نتذوق المحل كله، بس اللي بـ يحصل عادة أننا بـ نتقيد بالوزن والكمية والقوانين الغريبة اللي وضعتها المحلات علشان تجبرك على أنك تأخذ أكبر كمية من منتجاتها حتى لو الكمية دي بـ تمثل ضعف استهلاكك. من غير من نقول له أننا من كايرو 360، طلبنا يوزن لنا من كل بستان زهرة، وعلى عكس توقعاتنا تمامًا، رحب جدًا وبدأ يوزن لنا بقلاوة بالفستق (110 جنيه للكيلو) لونها ذهبي ومقرمشة وغرقانة عسل... الشيء الغريب أن بالرغم من وفرة العسل إلا أننا توقعنا أنها تكون حلوة أكثر من كده. الفستق كميته وفيرة وطعمه محمص كأنها خارجة حالاً من الفرن. جربنا الهريسة بالفستق (55 جنيه للكيلو) قوامها متماسك وطعمها شهي وكمية الفستق متناسبة مع بقية العجينة اللي نكهة جوز الهند كانت واضحة فيها. جربنا بسبوسة باللوز، الحقيقة أنها كانت غريبة جدًا، كانت مفتقرة للسكر ده غير أن طبقتها الخارجية كانت متماسكة وقشرية بعكس الملمس الرملي لدقيق السميد اللي هو المكوّن الأساسي للبسبوسة: ما ننصحش بها. عش البلبل (110 جنيه للكيلو) كانت رائعة، صحيح صغيرة بس التسوية مضبوطة والفستق كالعادة... محمص ووفير. ماسة بـ يبيع الملبن و النوجات ومشتقاتهم بالواحدة، الملبن بالفستق –واللي غالبًا ما عندهمش غيره- الكيلو منها بـ (120 جنيه) طعمها عادي جدًا، إلا أن طعم الملبن نفسه مختلف جدًا ومميز بصورة إيجابية بالرغم من أنه برضه مش مسكر. كان لازم ننهي رحلتنا إلى أراضي الشام بالآيس كريم (60 – 90 جنيه للكيلو)، الأنواع شكلها مغري وبعيدة تمامًا عن الأنواع المعتادة اللي عادة بـ تلاقيها عند محلات الحلويات كنوع من أداء الواجب مش أكثر. قررنا أننا نختار البوظة الدمشقية بالمستكة والفستق والقشطة، نقدر نقول أنها أحلى حاجة طلعنا بها من التجربة، نكهة المستكة اللي بـ تشد مع الفستق وقوام الآيس كريم عالمي. لازم نقول أن ماسة مش بس بـ يبيع حلويات سورية، ده كمان بـ يقدم مجموعة من المنتجات السورية زي المكدوس وأشهر الأجبان السورية، ده غير المأكولات النصف جاهزة زي الكبيبة وورق العنب وصفايح اللحم. ماسة ممكن يكون من نوع المحلات اللي ينجدك في زنقة بس مش هـ يعلق معاك لدرجة أنك ترجع له ثاني... إلا لو عاوز آيس كريم.

...

آيس: ميلك شيك وآيس كريم حكاية فى الزمالك
اصدرت في: 25/08/2013

بداية من الكب كيكس ومرورًا بالزبادى المثلج، شهدت كافيهات ومطاعم القاهرة أشكال وألوان من الأكلات. لاحظنا مؤخرًا ظهور عدد متزايد من محلات الآيس كريم تساعد الناس على مقاومة حرارة الصيف. "آيس - Ice" فى الزمالك فعلاً اسم على مسمى، بـ يقدم تشكيلة من نكهات الآيس كريم المنعشة، بجانب مجموعة من السموزى، الميلك شيك وحلويات ثانية. المكان فى الحقيقة أقل من الوصف لحد كبير، ورغم أن الحوائط ألوانها مبهجة، مافيش قعدة داخل المحل، وده قدر يخلق مساحة واسعة فاضية بين الواجهة المفتوحة وكاونتر الطلبات. رحبوا بنا على الباب وسلمونا واحدة من المنيوهات الورقية. مع المجموعة المتنوعة من العصائر الفريش، الكوكتيلات، الميلك شيك، الآيس كريم والتارت، احتاجنا وقت علشان نأخذ قرار؛ واللى ساعدنا فى عملية اتخاذ القرار هو تقديمهم لعينات تذوق مجانية من كل أصناف الآيس كريم. من بين اختيارات الشوكولاتة، الفواكة والمكسرات الرائعة، طلبنا نتذوق شربات المانجو اللذيذ، الزبادى بالتوت ونكهات اللوز بالقشطة. ما قدرناش نشوف أى كونو بسكويت، كل الموجود كان أكواب آيس كريم. الأسعار عندهم محددة بالبولة، وفورًا وقعنا فى عشق الآيس كريم باللوز (8 جنيه)، ومعاه بولة من آيس كريم شوكولاتة جالاكسى العظيمة، اللى فيها قطع شوكولاتة مخفية. ما قدرناش كمان نقاوم سحر بولتين من آيس كريم الزبادى بالتوت. بسبب وجود خلاط واحد فقط، المشروبات احتاجت شوية وقت فى التحضير ونظرًا لأن الحجم الوسط كان صغير شوية، طلبنا كل مشروباتنا بالحجم الكبير. أولاً طلبنا واحد ميلك شيك فانيليا غنى بالكريمة، ومن الطعم قدرنا نعرف أنهم استخدموا الآيس كريم الفانيليا الممتاز بتاعهم فى تحضيره. بعدها، افترضنا أن كوكتيل بنانا ماما Banana Mama اللي بـ 12 جنيه أكيد هـ يبقى عبارة عن عصير موز وفراولة من نفس القوام، لكن نصف الكوب كان مليان عصير فراولة لذيذ أما الباقى كان أقرب لحليب مخلوط مع كمية بسيطة جدًا من الموز، والنتيجة كانت مزيج مش مضبوط. عصير البطيخ الطبيعى (9 جنيه) كان مثلج لكن فى نفس الوقت غير مكتمل النضج، وده كان سبب أن طعمه يكون مائع. أخيرًا، ميلك شيك أوريو (17 جنيه) كان أفضل كثير وظاهر فيه طعم الشوكولاتة القوى زى ما توقعنا. معروض كمان عدد من كيكات الآيس كريم فى فريزر كبير من الزجاج. بجانب كيكة فروتوبيا بألوانها المبهجة، واسمها مشتق من مجموعة بولات الآيس كريم المختلفة الموجودة على الكيكة، لاحظنا وجود الحلويات الشرقية، mastic cassata بـ 85 جنيه. الحلويات المخبوزة فى نفس المكان بواسطة الشيف السورى بـ تعبر عن أقصى درجات الطعم الأصلى، مع طعم مسكر زيادة شوية علشان يتوافق مع الذوق المصرى. على الناحية الثانية، المشروبات مش أجمد حاجة نجربها، لكن أكيد كانت منعشة وسعرها معقول، وصعب تعترض على حاجة. صحيح الديكورات فى آيس عادية، بس يفضل الآيس كريم هو محور الاهتمام، وغالبًا هـ نرجع فى زيارة جديدة.

...

ماروني كوستا: كافيه هادئ فى مكان استراتيجي فى الزمالك
اصدرت في: 31/03/2013

مش عارفين ده نحس، ولا فيه حاجة غلط دائمًا فى تأسيس المكان ده! مكان الكافيه ده فى شارع إسماعيل محمد فى الزمالك وفى مكان استراتيجي جدًا أمام كليتي فنون جميلة وتربية فنية كان الأول اسمه "كافيه نوار - Café Noire"، وبعد كده بفترة مش طويلة بقى "سينزيو – Cinnzeo" ومؤخرًا بقى "ماروني كوستا – Marrone Costa" بشعار Caffee & Italian food وعرفنا بعد كده أنهم تابعين لنفس الشركة اللى مسؤولة عن سلسلة مطاعم "سينزيو" فى مصر. بديكور وزينة من على المحل بره هـ يشدك زي ما شدنا هـ تدخل هـ تلاقى حاجات من الديكور القديم ما تغيرتش منها السلم الحلزونى اللى موجود على يمينك أول ما تدخل وبـ يؤدي للدور اللى فوق، فيه بنوتة لطيفة استقبلتنا وكانت معانا وقت ما اختارنا هـ نأخذ إيه وشرحت لنا حاجات ما كانتش إجاباتها حاضرة لكن استفسرت لنا عليها. المنيو مكونة من قائمة للإفطار، والساندويتشات، والسلاطات، والبيتزا والباستا والحلويات والعصائر الفريش والساخنة والباردة. بدأنا قعدتنا باختيار ماروني بيتزا (44.90 جنيه) بـ تتعمل عندهم بطريقة جديدة لأنها عبارة عن طبقتين من عجينة البيتزا اللذيذة والموتزاريلا مع شرائح الدجاج والمشروم والتركي المدخن مع الزيتون والفلفل الألاون وصوص البيستو، وكمان طلبنا ماروني سلاد (37.90 جنيه) وهي سلاطة مكوناتها برضه جديدة من خس الكابوتشا مع شرائح الدجاج المشوي وشرائح التفاح الأخضر وطماطم الشيري مع الزيتون الأسود والجبن الريكفورد وعين الجمل وصوص الجبنة الريكفورد، وكل السلاطات بـ تقدم داخل طبق من عيش التورتيلا الكريسبي. الطلب بتاعنا أخذ وقت شوية لكن جاء لنا شكله يفتح النفس، السلاطة كانت عالمية، بس ما كانش فيها زيتون أسود وتم استبداله بزبيب (كمية كبيرة منه)، مزيج الطعم فى النهاية كان رائع لأن ملح الجبن الريكفورد كان بـ يعادله السكر الموجود فى التفاح، بس كان محتاج كمية الزبيب والجبن تخف شوية. البيتزا كانت جديدة علينا لأن من بره ما كانش عليها المكونات زي ما إحنا متعودين، المكونات كانت محشوة من الداخل فى الطبقتين وده خلى عندنا حب المغامرة والبحث فى اللى داخل البيتزا، الطعم رائع والكمية كبيرة واستمتعنا بها جدًا. كانز البيبسي بـ (10.90 جنيه)، و زجاجة المياه الصغيرة بـ (5.90 جنيه)، ومن الحلويات لقينا الاختيارات اللى فى المنيو كلها فيها آيس كريم فى مكوناتها، بينما لو رحت اتفرجت على اللى موجود فى ثلاجة العرض هـ تلاقى أصناف ثانية، عجبنا شكل الأبل تارت (19.90 جنيه) رغم انهم كانوا مقطعينها بطريقة غريبة وكان حجم الـ Slice صغير جدًا بالمقارنة بأماكن ثانية، لكن الطعم والعجين والسكر كان مضبوط فيها وكانت نهاية خفيفة لقعدتنا هناك. المكان لطيف نتمنى أنه يكمل وما يكونش مصيره زي اللى سبقوه.

...

تي سي بي واي: زبادي مجمد لذيذ في الزمالك
اصدرت في: 21/03/2013

الزبادي المثلج بدأ يأخذ مكانه على ساحة كافيهات القاهرة بقوة وأصبح شيء لطيف وجديد في اليوم. أفضل مكان للزبادي المثلج –"تي سي بي واي - TCBY" من الآخر- فتح فرع جديد في الزمالك في كلوب 33 علشان ينضم لمجموعة أماكن تقديم الزبادي المثلج، مش اليافطة البمبي بالزجاج الخارجي اللامع بالتحديد اللي لفتت نظرنا لكنها حسستنا بنوع من التحدي كأنها بـ تقول إحنا أحسن ناس في المجال."تي سي بي واي" سلسلة محلات عالمية تفتخر بمنتجات الألبان الصحية والعضوية الطازجة. مافيش ترابيزات بالداخل، فقط ترابيزتين في الخارج للتشجيع على أنكم تأخذوا نقنقة سريعة.التقديم الجميل للزبادي بـ يأتي في طبقات متعددة من الشوكولاتة والفانيليا الذهبية والفراولة والكيوي وموس الشوكولاتة البيضاء والتارت التقليدي والبسكويت والكريمة، هـ تلاحظوا وجود ثلاجة عرض زجاجية كبيرة عليها اختيارات كثيرة من الفواكة والإضافات، في الوقت اللي فيه ثلاجة عرض ثانية فيها أشكال وألوان من الزبادي المثلج بقوام ثقيل، قبل ما نختار، طاقم العمل عرضوا علينا كميات صغيرة من الزبادي المثلج للتجربة، كل واحدة كان قوامها زي الكريمة وطازجة وطعمها زي ما اسمها بـ يقول، اللي خلانا محتارين نقرر.للأسف في وقت زيارتنا ما كانش فيه منيو ورقية علشان نختار لكن النكهات كانت واضحة وكان فيه منيو مُثبتة على الحائط بالأسعار، الأواني كان حجمها كبير بأكثر من مقاس الصغير (20 جنيه) والمتوسط (30 جنيه) والكبير (40 جنيه) وكأس كبير (55 جنيه) والحجم العملاق (105 جنيه)، كمان تقدروا تختاروا ما بين 3: 5 إضافات (30: 50 جنيه)، البولة العادية بسعر البولة الكبيرة (18 جنيه) وتُقدم مع نفس التشكيلة من الإضافات.التزمنا بالأساسيات واختارنا واحدة زبادي مثلج بالفانيليا الذهبية مع ثلاث إضافات (30 جنيه)، احتارنا ما بين المجموعة المتنوعة من الفواكة الطازجة اللي بـ تضم الفراولة والكيوي وقطع الأناناس والتوت الأسود والراسبيري، كمان كان فيه وفرة من الحلويات زي قطع الشوكولاتة بالحليب والـ M&M’s وجيلي الدببة والأوريو والحبوب الملونة وعين الجمل والجرانولا، اختارنا قطع الأوريو ورقائق الشوكولاتة على شرائح الفراولة، قطع الأوريو كانت مقرمشة ورقائق الشوكولاتة كانت مجمدة وطعم الشوكولاتة فيها رائع في الوقت اللي كانت الفراولة طازجة مع زبادي الفانيليا الهائل والطازج الخفيف.كمان جربنا ملاعق صغيرة من كل زبادي البولات، نقترح الشوكولاتة بالنعناع اللي طعمه هائل مع زبدة البيقان اللذيذة، اختيار الزبادي بألوانه الأصفر والأحمر والأزرق كان طعمه لطيف لكن شبه شوية الأيس كريم بالفانيليا.طاقم عمل ودود ونشيط، ومكونات طازجة وجودتها جيدة وتقدروا تتذوقوها بنفسكم هـ يكون ما بين أيديكم زبادي مثلج لذيذ، "تي سي بي واي" يحتل مكانة متقدمة ما بين الأماكن اللي بـ تقدم أكلات خفيفة مجمدة في القاهرة.

...

أنطي لولو: سلسلة محلات الوافل والكريب البيتي وصلت الزمالك
اصدرت في: 17/02/2013

من الصور اللي ما نقدرش ننساها من فترة الطفولة مطبخ والدتنا أو جدتنا النظيف جدًا والمنظم والأهم من كده الحلويات الأسطورية اللي بـ تحمسنا لما بـ نشم رائحتها اللي بـ تقلب البيت، مين يكره قطعة بسكويت بالشوكولاتة في البيت مع كوب من الحليب البارد؟ بالنسبة لنا ما كناش محظوظين قوي في وجود أمهات وجدات من النوع ده لما كنا أطفال، "أنطي لولو - Auntie LouLou" في المعادي بـ يوفر الإمكانية دي علشان نعيش الحكاية الخيالية لكن تجربتنا كانت في فرع الزمالك. بمجرد اقترابنا من الباب في "أنطي لولو" فرع الزمالك رحبت بنا رائحة جميلة كانت واضحة قوي كمان الديكور كأنه خارج من حدوتة خيالية، المكان عبارة عن مظهر أنيق في بلد على عكس كده، بألوان الأحمر والأصفر الكاروهات في الأباجورات وفي الخشب والطوب اللي مسيطرين على الديكور الداخلي مع وجود مجسمات لأواني ملونة وأكواخ ريفية صغيرة مع منظر للحديقة الخارجية الموجودة بالقرب من الترابيزات، كنا حاسين وكأننا داخل كتاب ملون للقصص الخيالية. تمنينا الرقة والانتباه للتفاصيل ده يكون له أثره على الأكل، بسعادة تجولنا في المنيو وقررنا نطلب كريب الفراخ البيستو (25 جنيه) ووافل مُغطى نصفه شوكولاتة غامقة والنصف الآخر بالكراميل زي ما اقترح علينا الجرسون بسبب أننا ما قدرناش نقرر بين قائمة الاختيارات اللي بـ تضم النوتيلا والشوكولاتة البيضاء وشربات المابل كمان طلبنا عصير فواكه استوائية (23 جنيه) وكابوتشينو(17 جنيه) لمرافقنا.قلقنا شوية من شكل كريب الفراخ البيستو لأنه جاء لنا بشكل شبه الشاورما، ومع أول قطمة زادت توقعاتنا، الفراخ كان طعمها لذيذ والكمية كانت كثيرة ومغموسة في البيستو وقدرت تحقق التوزان بين كمية الفراخ والبيستو اللي كان طعمه حلو بنكهات الجبنة والجوز والريحان، نقطة ضعف الكريب هي للأسف الكريب نفسه القشرة الخارجية كانت ناشفة وسميكة جدًا وأقرب للبان كيك من الكريب وده أثر على تجربتنا مع الكريب اللي كانت جيدة مع الحشو ولكن أقل مما كنا بـ نتوقع وتقدروا تقولوا أن الكريب ما كانش طازج.اعتقدنا أن فيه شئ غلط في العجين بتاعة الوافل وبصراحة كان محبط لنا، الوافل نفسه كان طازج ولسه معمول على نصفه شوكولاتة غامقة والنصف الآخر كراميل زي ما طلبناه لكن طعمه للأسف زي ما يكون قديم، كمان القوام بتاعه كان أقرب ما يكون للفطير عن وافل.المشروبات كانت القشة اللي قصمت ظهر البعير، الكابوتشينو كان زي المياه والعصير كان فيه طعم أناناس قوي عن أي فاكهة ثانية وثقيل ومسكر زيادة عن اللزوم.كل شئ في خيالنا بـ يكون أفضل ومليان بالسحر، "أنطي لولو" هـ يحسسكم كأنكم في المدينة الحلوة وأسلوب الحياة البسيط والطعام البيتي الملئ بالزبدة وحب الأم لكن ملحوظاتنا على الأكل بوظت التخيلات دي، لو عاوزين تعيشوا في خيالات الطفولة في ديكور المحل الداخلي ممكن تتطلبوا شئ أقل فشلًا زي البنانا سبليت (25 جنيه) وعليه أيس كريم موفنبيك.

...

سينزيو: مشروبات وحلوى قرفة محبوبة فى الزمالك
اصدرت في: 31/10/2012

المكان ده إحنا بـ نحبه جدًا مش علشان إحنا جربناه قبل كده، لكن علشان بـ يقدم حلوى القرفة اللى بـ نحبها وكنا معتادين نأكلها من «سينابون - Cinnabon» بس، لكن دلوقت فيه كمان مكان ثاني بـ يقدمها اسمه «سينزيو - Cinnzeo».له فروع كثيرة جدًا فى تيفولى دوم فى مارينا الساحل، وسيتي ستارز، ومول العرب، والمعادي الجديدة، وروكسي، الفرع اللى رحناه أمام كلية الفنون الجميلة فى الزمالك، المكان كله زجاج من دورين فمافيش مفر أنك هـ تتشد من منظر الناس وهى مستمتعة بأكل حلوى القرفة اللذيذة، الألوان هادئة ودافئة، زرناه فى عيد الأضحى المبارك وكان هادي وشبه فاضي (جاء بعدنا ناس ثانية بس مش كثير)، استقبلنا الجرسون بشكل مهذب، المنيوهات على الترابيزات الصغيرة، فيه واحدة كبيرة لحلوى القرفة بأنواعها والمشروبات والثانية عبارة عن ورقة وجه وظهر خاصة بالساندويتشات والسلاطات.أول قائمة اسمها "ساخن من الفرن إليك" فيها اختيارات متعددة من أنواع حلوى القرفة منها سينارول (17 جنيه)، ومينى رول (14 جنيه)، وشوكورول (20 جنيه)، وبيكارول "بالمكسرات" (24 جنيه) وميني بيكارول (16 جنيه)، وسينافروت (23 جنيه)، أما القائمة الثانية اسمها "كنوز سينزيو" شكلها كان مغري كثير جدًا عن الأولى، وبالفعل اختارنا منها أصناف، لكن خمنوا؟ لما جئنا اختارنا منها أصناف صدمنا أنهم علشان فى العيد مش بـ يعملوا غير أصناف القائمة الأولى بس!! من الأصناف اللى مش موجودة التويست بالشوكولاتة (15 جنيه) عبارة عن عجين بالقرفة وعليه شوكولاتة ومعاه آيس كريم شكله فى الصورة كان مغري جدًا، الجرسون قال لنا أنه موجود فى فرع سيتي ستارز، وبعد شوية جاء وقال لنا أنه مش بـ يتعمل فى فرع الزمالك أصلاً ومش موجود غير في سيتي ستارز لأن الناس هناك أكثر والفرع ده أهدأ، ففيه أصناف مش بـ يعملوها! زعلنا قوي.مافيش 5 دقائق بعد ما طلبنا واحدة سينارول، وشوكورول جاءت لنا ونسيتنا شوية الزعل ده بطعمها القوي وسكرها المضبوط، العجين كان طري وكانت تحفة وسخنة، خاصة لو بدأت أكلها من المنتصف لأنها أطرى جزء وأفضله.فى قائمة المشروبات فيه بارد وساخن وكوكتيلات وعصائر فريش، جربنا كيوي شيك (حجم كبير بـ 26 جنيه)، وكافيه فرابيه (حجم كبير بـ 22 جنيه)، الكيوي شيك كان حلو جدًا وقوامه ممتاز، الملاحظة الوحيدة كانت أنه مسكر قوي لدرجة أنه ضيع مزازة الكيوي اللى بـ نحبها لكن كان طعمه حلو، على عكس الفرابيه اللى لقيناه بدون سكر خالص وكان خفيف أقرب للمياه، بصراحة فيه أماكن بـ تعمله بشكل أفضل. بعد أكل حلوى القرفة هـ تحتاج زجاجة مياه صغيرة (4 جنيه) لأن كمية الشوكولاتة والقرفة كثيرة، والمكان بـ يضيف على الحساب 10% ضريبة، إحنا مشينا من المكان مبسوطين وللأسف ما كانش فيه مكان فى بطننا نجرب الساندويتشات، بس أكيد لنا زيارة للمكان ثاني خاصة أن المعاملة هناك مهذبة تحببك فى المكان.

...

هاجن داز: آيس كريم فاخر فى الزمالك
اصدرت في: 09/08/2012

«هاجن داز» يعتبر واحد من أشهر الأسماء فى عالم الآيس كريم على الإطلاق. بعيدًا عن أمريكا وعبر المحيط الأطلنطى، أخيرًا جاءت لنا حاجة مميزة علشان تساعدنا نقاوم الحر. بعد افتتاح أول فروعه فى سيتى ستارز دلوقتى آيس كريم «هاجن داز» فتح فرعه الجديد فى الزمالك. مكانه موجود فى آخر رصيف عمارة رقم 33 فى شارع أبو الفدا، عند آخر بوابة دخول هـ تقابلك ثلاجة مليانة أشكال وألوان من الآيس كريم موجودة على شمالك. المكان بـ يوفر مكان واسع للقعدة قريب من الثلاجة. مكان القعدة بسيط وبـ يؤدى الغرض، بس المشكلة أن المكان كله مفتوح وده ممكن يكون مش أحسن اختيار فى أيام الصيف الحر قوى. اختيارات الآيس كريم عندهم فيها تنوع لطيف، زى نكهات مختلفة من الآيس كريم مع الكوكيز وآيس كريم مع كراميل بالمكسرات، ده بالإضافة لنكهة توفى بندق الماكاديميا، كمان فيه آيس كريم بطعم شربات التوت المثلج، وكوكيز ميد نايت بالشوكولاتة، كريم بروليه وآيس كريم كراميل مع البسكويت. فى حين أن الكريم بروليه والآيس كريم بالكراميل طعمهم تحس أنك بـ تأكل قطمة كراميل، وتحس فعلاً بنفس قوام الكراميل، بس طعم شربات التوت المثلج كان خفيف، لاذع ومسكّر، كله فى بولة واحدة. كوكيز ميد نايت بالشوكولاتة برضه كانت لذيذة وبـ ننصح بها كل محبى الشوكولاتة. سعر البولة الواحدة 18 جنيه. هاجن داز كمان بـ يقدم آيس كريم فى أكواب للناس اللى بـ تدور على حاجة حلوة متكاملة. بولتين من أى نكهة وعليهم كريمة، ومكسرات مطحونة مع اختيارك من صوص الشوكولاتة أو الطوفى هـ تكلفك حوالى 35 جنيه. ممكن تختار إضافات ثانية تحطها غير البندق زى كون كرانش cone crunch و كريسبى ميكس crispy mix. إحنا جربنا كوب فيه بولة شربات توت مثلج مع بولة آيس كريم فانيليا، وعليهم من فوق كون كرانش وطوفى (37.40 جنيه) والمجموعة دى كانت فعلاً خرافية. كمية الكريمة الموجودة فى الآيس كريم كانت هائلة مع الشربات المثلج. الكون كرانش كان بديل ممتاز للبسكويت اللى قوامه مش متماسك. كمان بـ يعرضوا مشروبات بـ يدخل فيها الآيس كريم سعرها حوالى35 جنيه. تقدر تختار بين الفرابيه المثلج أو حاجة غريبة ومختلفة شوية زى ريد دريم Red Dream اللى بـ يتكون من نكهات مختلفة من الشربات مخلوطة مع بعض علشان يعملوا سموثى. الاثنين الموظفين اللى وراء الكاونتر لطاف قوى، وصبروا علينا لحد ما نقرر هـ نختار إيه. وكمان سمحوا لنا أننا نجرب أى نكهة تيجى على مزاجنا. مافيش شك أن جودة آيس كريم هاجن داز ثابتة فى أى مكان فى العالم، بس أكيد بـ تبقى حاجة حلوة أنك تشوف فى القاهرة تشكيلة مغرية من النكهات وكمان اختيارات مثيرة من الإضافات على الآيس كريم لأن زى ما كلنا عارفين عادة حظنا بـ يبقى وحش في الموضوع ده.

...

تريتس: كريب ووافلز طعمهم إدمان في الزمالك
اصدرت في: 03/01/2012

"هو مش قد كده.. بس جباااار".. الجملة دي كنا متعودين نسمعها في مسلسل الفنان محمد صبحي "يوميات ونيس" لما كان بـ يوصف جاره "خليل أو خِلة"، لكن الوصف ده المرة دي هـ نستعمله علشان نوصف به واحد من أفضل الأماكن اللي ممكن تأكل فيها حلوى الوافلز –من بعد «وافل هاوس – Waffle House»- في رأينا. ليه بـ نقول "قد كده"؟ لأن محل "تريتس - Treats" الموجود في شارع البرازيل في الزمالك حجمه ومساحته صغيرة جدًا لكن على الرغم من كده بـ يعمل وافلز وكريب مش طبيعية.. إدمان، الحقيقة أن من بعد ما رحنا أول مرة وإحنا بقينا زبائن دائمين، ورجلنا بـ تأخذنا على هناك من غير ما نقولها. المحل عبارة عن "طُرقة" جنب مطعم الأكلات السريعة "بركة"، أول ما تدخل هـ تلاقى في وشك الكاشير والمطبخ سوا، وتحت الكاشير فيه ثلاجة آيس كريم موفنبيك، وبالداخل الماكينة بتاعة الوافلز وأرفف في صندوق شفاف فيه الإضافات اللي ممكن تحطها على الوافل أو الكريب بتاعك، على الجنب الشمال فيه كام كرسي عاليين وجنبهم جهاز فيه سائل علشان تنظف به يديك، والناحية اللي أمامها فيه سبورة خشب حاطيين فيها المنيو وحاجات ثانية والمنيو كمان وصور كبيرة موجودة في أعلى المحل. الوافل العادية سعرها (20 جنيه) وبـ يضاف عليها 5 جنيه لو عليها آيس كريم، الإضافات اللي ممكن تحطها فواكة زي الموز والتفاح والكيوي والفراولة، وأنواع شيكولاتة كثير زي فريرو روشيه والأوريو وكندر بوينو وإم أند إمز.. إلخ، وفيه اختيار لك إما تحط صوص "هيرشيز" (شيكولاتة أو فراولة) أو شيكولاتة نوتيلا. الأنواع كلها مافيش كلام عليها، العجينة طازجة وبـ تشم رائحتها من قبل ما تدخل، الفواكه طازجة والمكسرات والشيكولاتة، أفضل مزيج عملناه كان لشيكولاتة فريرو روشيه مع آيس كريم فانيليا بقطع الكوكيز وصوص شيكولاتة هيرشيز (25 جنيه) كان مش طبيعي.. حلو جدًا. وخليك مستعد واهجم على الوافل أول ما تخلص لأن لو انتظرت شوية كل الحشو هـ "يبُظ" من كل حتة وأنت بـ تأكل، لكن ده ما يمنعش أن الموضوع فيه لغوصة شوية.. لكن لغوصة حلوة. الكريب فيه منه الحادق والحلو، الحادق ممكن فيه إضافات زي التركي والسوسيس، لما طلبنا نجرب الكريب بالتركي للأسف ما نعرفش الولد في المطبخ شكله سمعه غلط لأن لما روحنا في مرة ثانية وجينا نأكل لقيناه سوسيس! بس ده ما يمنعش أن كان طعمه حلو قوي وحجم الكريب كبير وسُمكه معقول ومحشو خضار مع السوسيس وجبنة فكان عامل مزيج رائع وطعم أحلى. "تريتس" كمان عنده مشروبات، إلى جانب أنك مش لازم تتقيد بالمنيو عندهم لأن ممكن تعمل الاختيارات اللي أنت عاوزها للحلوى بتاعتك، فريق العمل في المحل ودود جدًا وروحهم حلوة وقعدنا نشاكسهم علشان نعرف سر الصنعة، من الآخر خلى بالك من مغناطيس اسمه "تريتس" ممكن يجذبك كل ما تطأ قدمك منطقة الزمالك.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن