دليل موسيقى القاهرة - أحدث المقالات عن المطربين والنجوم العرب

مزيكا

ألبوم كتاب الحب: نغمات قديمة بتوزيع ألافرانكا!
اصدرت في: 16/10/2016

ألبوم كتاب الحب للموسيقار كاظم الساهر هو الألبوم رقم 25 في مسيرته الفنية الكبيرة. كل الأغاني من أشعار الراحل الراحل نزار قباني. التوزيع أغلبه لميشيل فاضل و3 أغاني بس لهشام نياز. وطبعًا الألحان لكاظم الساهر. نقطة القوة في الألبوم كله التوزيع الموسيقي. تحديدًا الأوركسترا اللي فيه أفضل عازفين أوروبا، واللي نفذ الجمل الموسيقية بحرفية واقتدار. التوزيع الخرافي والمقدمة الرائعة لأغنية كتاب الحب تُحسب للموزع ميشيل فاضل. واللحن من أجمل وأرق ألحان كاظم الساهر. في أغنية رسالة حب صغيرة الكلمات مابعدتش عن قاموس نزار قباني [سيدتي-حبيبتي-أنتِ اللي بتتكرر كل شوية] واللحن كالعادة على طريقة كاظم الساهر اللي بيتعب جدًا علشان يلاقي جملة صولو حلوة أو مقدمة موسيقية ممتازة وبيتعب أكثر علشان يضيع كل اللي عمله! هنلاحظ مثلًا انتقاله للنغمة الشرقي -الربع تون- عند (فلا تقولي يالهذا الفتى) الانتقالات دي معتادة عند كاظم الساهر. بيتعمد يعملها في أغلب الأغاني، حتى لو الأغنية مش محتاجة النقلة دي. وهنلاحظ إن مود الأغنية اتغير تمامًا. في أغنية كوني امرأة نزار بيطلب من حبيبته إنها تتحول لإعصار. دي مش أول مرة نزار يكتب الحالة دي وكاظم غناها قبل كده. لكن الجديد فعلًا الجملة اللحنية الممتازة اللي صاغها كاظم لكلمات صعبة إلى حد ما. وكالعادة التوزيع متفوق على كل عناصر الأغنية. دخول المزامير بعد كوني فرسًا لمحة جيدة. كأنه حبيبته -الفرس- بترقص. وجملة الفاصل بالناي والخلفية بخط وتريات بيقول جملة مختلفة تمامًا إضافة حقيقية للألبوم. مع بداية أغنية عيد العشاق بيظهر الموزع ميشيل فاضل في جمل الوتريات وصوت الكورس. صوت كاظم فرحان ومش مرهق على عكس باقي الأغاني. والتحويلات المقامية في مكانها مضبوط. عودة مرة أخرى لإيقاع الرومبا في أغنية لو لم تكوني أنتِ في حياتي . كلمات الأغنية بتجسد حالة الحب من منظور مختلف. وإن كانت الصياغة مش موفقة قوي. نزار بيقول أنه لو ماكنش لقى حبيبته كان هيخترع واحدة زيها بالضبط. لكن التعبير الغريب هنلاقيه (طويلة كالسيف) علشان تمشي مع (سحابة صيف) في السطر اللي بعدها. وطبعًا ماحدش هيشبه حبيبته بالسيف أبدًا في 2016. هنسمع كمان (وثغرها كأس عبق) كأس عبق إزاي طيب؟ هي المفروض (كأس عرق) لكن عشان العرق مشروب كحولي فكاظم غيرها منعًا للقيل والقال، وعلشان الرقابة! هنلاحظ نفس النقلات المقامية غير المبررة عند (كنت استعرت قطعة من القمر) و(كنت جعلت شعرها مزرعة من الحبق) والأغنية عامة فيها حالة من الفوضى والسمك لبن تمر هندي. كاظم بيبعد خالص عن الأغنية الكلاسيكية وبيقدم لحن سلس وهادي في أغنية زر مرة اللي قرب كتير جدًا وبالذات في البداية وصولو البيانو من أغنية قولي جاي لعاصي الحلاني وكارول صقر. ونقل الأغنية نص تون بالقرب من النهاية خلاها أحلى. أغنية شئون صغيرة المفروض أنها ببتقال على لسان سيدة. لكن كاظم عدلها بحيث تبقى مناسبة له. اللحن من أفضل ألحان الألبوم. الانتقال لمقام الصبا عند (أبكي أبكي) و(أظل مريضًا) موفق جدًا. على الرغم من البداية الجيدة وجملة الفلوت والناي في أغنية قصة خلافاتنا لكن الانتقال الغريب والمفاجئ إلى مقام الصبا عند (برغم خريف علاقاتنا) غيّر الحالة تمامًا وكأنه خلل في بناء الأغنية. بداية ممتازة بالهارب والآهات لأغنية تناقضات. والجملة غالبًا لكاظم الساهر. دخول الوتريات بنفس جملة الآهات اللي بتفكرنا بمقدمة أغنية صبري عليك طال للمغربية الراحلة رجاء بلمليح. وبيفضل التبادل بين الآهات والكمنجات على طول الأغنية بسلاسة لاستغلال جمال الجملة اللحنية. وطبعًا مش محتاجين نقول إن التوزيع الأوركسترالي تحفة حقيقية. لجسمك عطر خطير النوايا مثال ممتاز على الأغنية الرومانسية. التوزيع الأوركسترالي البديع أضاف للأغنية كثيرا. لحن كاظم جميل وحالم. مع ملاحظة إنه صوته مرهق في المناطق العالية. أغنية فاكهة الحب أغنية بسيطة وماكنتش محتاجة كل التوزيع الاوركسترالي الخرافي ده. وخاصة أنها حالة رقيقة. وكلام من حبيب لحبيبته. في المجمل الألبوم كويس. لكن كاظم الساهر للأسف مُصر على تقديم نفسه كل مرة بأنه الملحن العظيم الخرافي اللي بيعمل حاجات ماحدش يعرف يعملها غيره. لكن غالبًا الجمال في البساطة.

...

بالتفاصيل والعناوين: اعرف أهم الأماكن اللي بتعلم موسيقى في القاهرة
اصدرت في: 05/10/2016

ناس كتير مننا بيحبّوا المزيكا، بس قليّلين اللي بيعرفوا يلعبوا مزيكا والسبب لا هو قلّة موهبة، ولا جفاف في الإبداع! أمال إيه السبب؟ السبب الحقيقي اللي بيخلّي ناس كتير عاوزة تتعلم ومابتعرفش هو الأسئلة دي : اتعلم فين؟ وده مش أصعب سؤال، لأنك لما تعرف أماكن التعليم هتسأل سؤال أهم : أي مكان أفضل؟ وأفضل دي يعني خبرة، ومستوى تعليمي، طريقة تدريس، وكمان "فلوس!" طيب مش بعيد عن بيتنا ده؟ طيب سيبك من كتر الأسئلة اللي بتخلينا نكسل وتعالى نقول لك تعمل ايه؟ قبل ما تاخد أي خطوة لازم تسأل مجرّب، وعلشان ماتلفّش على كل المجرّبين في بلاد الله الواسعة، إحنا جمّعنا لك في سلسلة المقالات دي عصارة تجارب المزّيكاتيّة في مصر. في الغالب معظمنا في البداية بيتشد لحاجة من دول (العود، الكمان، الجيتار، والإيقاع بشكل عام..) العود لما تيجي تتعلم أي آلة عامةً، وعلى العود بشكل خاص هتقابل نوعين من المؤسسات اللي تقدر تعلّمك: النوع الأول - والأشهر- : المؤسسات الرسمية ذات العلاقة بالدولة، ودي غالب عليها الطابع الأكاديمي. زي ايه ؟ دار الأوبرا المصرية، وكلية التربية الموسيقية، والمعهد العالي للموسيقى العربية أو " الكونسرفاتوار". النوع التاني : وهي مراكز التعليم الخاصة، ومن أشهرها في تعليم العود: بيت العود العربي واللي قائم على إدارته ( نصير شمة )؛ أحد أتقل الأسماء في عزف العود، وده اللي عمل من بيت العود اسم مهم ومدرسة خاصة في العزف حتى بعد ما أصبح التعليم والإدارة مابتتمش بشكل مباشر من نصير شمة، ولكن كل شهرين تلاتة تقدر تلاقي في المكان ده ورش بيعملها أ/نصير بنفسه وكمان حفلات بيقيمها مع أتقل مزيكاتيّة من خريجي بيت العود. مشوار بيت العود هيكون سهل لسكان المناطق المحيطة بجامع الأزهر. طيب لو أنا مش ساكن جنب الأزهر، في مراكز تانية تقدر تعلمني؟ أكيد.. تاني مكان هو مركز "قيثارة" وده تقدر تروحه لو أنت ساكن في أيِ مكان من دول: ( مصر الجديدة–مدينة نصر–القاهرة الجديدة–شبرا–الهرم ) . في مراكز تانية لتعليم العود زي مثلًا: مركز "آرت مينيا –Art mania"، ومركز "سفن آرتس –7 Arts"، ومركز "إحياء". والمراكز دي هتكون الأقرب لك لو أنت ساكن في 6 أكتوبر، أو الشيخ زايد: طيب وسكان المعادي لازم يروحوا آخر الدنيا ؟ أكيد لأ، لأن في المعادي تحديداً فيه مكان اسمه "سوناتا" Sonata Music Center والمكان ده بيختلف عن الباقيين في إنه عامل لينك مع جامعة في لندن بتديك شهادة في الآخر اسمها "Trinty"، وبيمتحنك بعد كل مستوى مندوب عن الجامعة دي من لندن ودي بتفرق في كاريرك كعازف. طيب هتقول لنا "أنا سمعتك يعني أعمل ايه ؟!"، مش هنقول لك اعمل الصح! إحنا هنقول لك الخلاصة في مشوار العود. عاوز تبدأ روح في الأول جس نبضك في مركز خاص وشوف أنت عاوز تكمل ولا لأ، علشان غالبًا بتكون الفلوس أقل ومافيش شروط كتير للتقديم. والأرجح أنك هتروح على بيت العود أو مركز قيثارة علشان فروعه في كل حتة وفلوسه معقولة بالنسبة لعدد ساعات التدريب، بس مانوعدكش بعدد متدربين قليّل ولا اهتمام بشكليات المكان، بس نوعدك بخبرات هتفيدك في "البداية" . بعدها لوبقيت متوسط وناوي تكمّل، دار الأوبرا هيكون من أفضل الأماكن بالنسبة لك، هتكون أغلى شوية بس هتتعلم كتير، وهتستفيد من كل اللي هناك سواء المدربين أو المتدرّبين اللي الأوبرا هتخليك تقعد معاهم لأوقات طويلة بدون تعسف في مواعيد انتهاء الورش. الكمان في أماكن اتكلمنا عنها قبل كدا ممكن كمان تتدرب فيها على الكمانجة زي الأوبرا، وكلية التربية الموسيقية، وكمان مركز آرت مينا، و7 آرتس، وقيثارة، وسوناتا ميوزك سنتر لكن خلينا نكلمك عن أماكن تانية مهمة في تعليم الكمان، زي ايه؟ أكاديمية You Can ودي هتلاقيها في مدينة نصر، وفي الدقي . هناك هيكون لك في كل مستوى كتابين، على 6 مستويات، ولك ملف تدريبي خاص بك، وميزته أنك مابتحتجش تشتري الكمانجة لأنهم في الغالب هيدوهالك هدية في بداية التدريب. أما لو أنت من سكان التجمع، فالأقرب لك مكان اسمه " تانجو" Tango Music Center وده مستواه التعليمي عالي لكن لو أنت مبتدئ ممكن يكون غالي شوية، لأنك في البداية محتاج عدد ساعات تدريب أكتر . Cairo Music Center المكان ده في مصر الجديدة، التدريس فيه مستواه قريب من الممتاز، وميزته أنه متصل بجامعة في لندن بتديك شهادة اسمها ABRSM، ودي باختصار شديد شهادة عالمية لها Bonus في كارير العزف بتاعك، يعني تقدر تقول شبه TRINTY. أما لو ناوي على احتراف يبقى شوية حلوين وشد الرِحال على الأوبرا، مستوى تدريبي عالي وكمان هيعلموك إزاي تجتاز هيبة أنك تطلع على المسرح وتعزف. الجيتار في أماكن كتير بتعلم الجيتار في القاهرة، ومنهم مراكز اتكلمنا عنها بالفعل زي سوناتا سنتر في المعادي، وكايرو ميوزك سنتر في مصر الجديدة. طبيعة تعلّم الجيتار سهلة وعلشان كده أغلب الأماكن اللي بتعلم المزيكا أو كلهم تقريبًا تقدر تتعلم فيهم جيتار، ماعدا معهد الموسيقى العربية لأنه متخصص في الآلات الشرقية. إزاي تقدر توصل للأماكن دي، أو تتواصل معاها؟ كلية التربية الموسيقية 27 شارع إسماعيل محمد - جزيرة الزمالك 27353750 المعهد العالي للموسيقى حى الاهرام، شارع خاتم المرسلين خلف قاعة سيد درويش– الجيزة دار الأوبرا المصرية أرض الأوبرا - برج الجزيرة - الزمالك 27370602 مركز إحياء حي المتميز - 6 أكتوبر بيت العود العربي شارع محمد عبده خلف جامع الأزهر بجوار حارة الست وسيلة – منزل عبد الرحمن الهراوي 25104174 مركز قيثارة فرع مصر الجديدة - ميدان الجامع ٢٩ شارع إسماعيل رمزى 26325208 فرع مصر الجديدة - صلاح الدين ١٢ شارع 24188494 فرع مصر الجديدة -هليوبوليس ٤٦ شارع عبد الحميد بدوى 22410072 فرع مصر الجديدة - الحجاز ٩ شارع عبد الله بن الزبير 26244764 فرع مصر الجديدة - تريومف ٢٣ شارع محمد شفيق 26439255 فرع القاهرة الجديدة التجمع الاول البنفسج ٣ فيلا ١٦٢ امام بوابة ١٣ الرحاب 01000802022 فرع مدينة نصر الحى السابع ٨ شارع طة الدينارى 22723490 فرع شبرا دوران شبرا ١ مكرر شارع برسوم مطر 220008255 فرع الهرم ٤ شارع المهندس فتحى موازى لشارع العريش 37443320 Tango Music Center 258 شارع أنس ابن مالك - جنوب أكاديمية الشرطة - التجمع الخامس 0115 522 7888 Cairo Music Center طريق المطار - 14 ش الزهور – مصر الجديدة 22667544 YOU CAN فرع مدينة نصر ، 38 محمود خيري - عباس العقاد فرع الدقي ، 7 ش السد العالي عمارة ألفا ماركت – مدخل ب أما لو أنت من المهتمين بالإيقاع بأشكاله، أو صوتك حلو وحابب تتدرب عشان تطوّع صوتك للمقامات الموسيقة، أو حتى مش عارف فين أفضل مكان تجيب منه آلتك اللي بتحبها، فأكيد المقال اللي جاي دا بتاعك. استنى مقال CAIRO 360 الجاي عن دليل المزيكاتي المبتدئ!

...

سهرنا يا ليل: الحُب الحُب، الشوق الشوق!
اصدرت في: 27/09/2016

النجمة اللبنانية إليسا بتقدم تجربة جديدة متنوعة في ألبوم سهرنا يا ليل. إليسا المرة دي بتحاول ترضي كل الأذواق، وبتفتح سكك جديدة، من خلال 16 أغنية، وهو عدد كبير جدًا. إليسا معروفة بذكائها واختيارتها الجيدة. وفي كل خطوة بتكتسب أرض جديدة وجمهور جديد، وخاصة بعد النجاح المبهر لألبومها السابق حالة حب. الشاعر ملاك عادل أعاد كتابة أغنية كارم محمود المشهورة (أمانة عليك يا ليل طول) بشكل جديد يناسب 2016 في أغنية سهرنا يا ليل. التشابه بين الأغنيتين مش على مستوى الفكرة بس. لكن على مستوى الكلمات نفسها. ونقدر نقول ببساطة إن أغنية كارم محمود رغم إنها قديمة وكلاسيكية إلا إنها أحلى وأصدق كتير. أغنية ولا بعد سنين من نوعية الأغاني المناسبة جدًا لصوت إليسا. الأغنية مش محتاجة إمكانيات صوتية كبيرة، لكن محتاجة أداء صحيح 100% وإحساس عالي. وده اللي قدر يعمله الملحن نزيه اسلر. كلمات نادر عبد الله فيها حالة من اللخبطة وخاصة في مطلع الأغنية. كأنه اختار أصعب الطرق عشان يعبر عن فكرته. وتوزيع ناصر الأسعد أضعف عناصر الأغنية. الملحن الكبير وليد سعد قدم لحن متوسط وأقل من المتوقع في أغنية عكس اللي شايفنها. الشاعر أمير طعيمة عمل إعادة صياغة لفكرة مستهلكة. عن المرأة القوية الناجحة، لكنها حزينة ومجروحة من جواها وبتحاول تداري كل ده عن عيون الناس. يمكن تكون الأغنية دي لسان حال إليسا نفسها، وأمير طعيمة ترجم أفكارها عن نفسها وحياتها. الشاعر أسامة مصطفى خد لقب إليسا وعمل منه أغنية ملكة الإحساس. سامر أبو طالب قدم لحن من أفضل ألحان الألبوم. والموزع تميم وظف كل امكانياته عشان الأغنية تخرج في أفضل صورة. كلمات أغنية فَلّ الحكي للشاعر يوسف سليمان من أهم كلمات الألبوم. الذكريات والتفاصيل اللي كانت جميلة بين الحبيبين وهي بتتحول لتفاصيل مؤلمة بعد الفراق. حتى الكلام بيهرب مع الحبيب اللي راح. لحن صلاح الكردي من أجمل ألحان الألبوم، وتحسب له جملة الفاصل الرائعة. الموسيقار المتميز عمرو اسماعيل أضاف كتير لأغنية متمردة كموزع رغم تجاربه القليلة في التوزيع الموسيقي. أغلب أغاني الألبوم فيها دراما بنسب مختلفة. وهنا الدراما ناتجة من حوار مع الذات. وده خلى مهمة الملحن مدين أصعب في تلحين كلمات أحمد الجندي اللي جسدت حالة لوم الذات وعتابها بشكل جيد. كالعادة الموزع ناصر الأسعد بيبقى أضعف حلقة في العمل الفني. وفي أغنية متلك ما في بيستغل إيقاع المقسوم بشكل مبتذل ومستهلك. شجاعة حقيقية من الملحن المصري سامر أبو طالب إنه يصيغ نغمات لكلمات باللهجة اللبنانية. لكن المفاجأة الأكبر هي إن الكلمات للشاعر المصري أسامة مصطفى. ودي شجاعة يحسد عليها الشاعر والملحن. لأنهم دخلوا منطقة بعيدة عنهم تمامًا. الموزع تميم افتتح أغنية عمري ابتدا بموسيقى التكنو في إشارة واضحة إن الأغنية معمولة عشان الأفراح والحفلات. كلمات أحمد الجندي ولحن مدين أقل من العادي. بداية تميم بالأبوا في أغنية هتسيبني جيدة وملفتة. وبتمهد لجو الأغنية. واستمرار الأبوا والبيانو زاد لحن محمد رحيم رقة وجمال. كلمات أحمد مرزوق جسدت باقتدار احتياج الأنثى لحضن حبيبها. أغنية أغلى الحبايب مثال جيد على الأغنية الإيقاعية المتوازنة في كل عناصرها. وكل الفضل في تماسكها يحسب للموزع أحمد عبد السلام. محمد يحيي قدم لحن رائع في أغنية هخاف من إيه. الجملة اللحنية بتلمع وتبان عند (جوايا مش فاضل مكان لجراح ولا لحرمان كمان. دي حكاية خلصانة من زمان تفيد بإيه بعدين) الموزع أحمد إبراهيم قدر يحافظ على حالة الحزن الهادئ المسيطرة على كلمات الأغنية. لتاني مرة خاض الملحن سامر أبو طالب والشاعر أسامة مصطفى تجربة تقديم أغنية باللهجة اللبنانية في أغنية قلب وروح وإن كانت التجربة المرة دي أفضل من التجربة السابقة من ناحية الصياغة اللحنية والكتابة. ويُحسب للشاعر أسامة مصطفى جملة (في العتمة عيوني لعينك ضيّ) إليسا اكتشفت جانب مهم جدا من صوتها. اكتشفت إن صوتها بيلمع في الأغاني الإيقاعية، زي الأغاني الهادية بالظبط. ومع الشاعر الكبير بهاء الدين محمد بتغني فكرة جديدة عليها إلى حد ما في أغنية مش عارفه ليه. بتسأل نفسها ليه بتمثل قدام حبيبها إنها قوية مع إن نفسها تحضنه وتبوس إيديه أول ما تشوفه!. بهاء الدين محمد قدم حالة المكابرة والعناد بنعومة وسلاسة. المقدمة الموسيقية لأغنية مكتوبة ليك اللي كتبها وليد شراقي مستهلكة وسمعناها كتير قبل كده. بداية الأغنية الحقيقية من غناء إليسا. ولحن محمد يحيي المناسب تماما لصوتها. الشاعر نادر عبد الله للأسف لسه مخرجش من حالة الارتباك. ولتاني مرة بيستسهل وبيعتمد على قافية سهلة، وبيجيب كلمات ممكن أي حد يكتبها زي (تعيشلها- كلها- تتقالها- وقتها- دخلتها رسمتها) نفس القافية اللي اختارها في الأغنية اللي فاتت. بداية جيدة ورقيقة من مقام العجم لأغنية الحضن تحسب للموزع يحيي يوسف. كلمات سلامة علي تناولت العلاقات بين الناس من زاوية جديدة، من زاوية الحضن! وذكاء من الشاعر إنه يوسّع دائرة الكلام، وميختصرش الحالة في الأحضان اللي بين الحبايب بس. الملحن الموهوب صلاح الكردي اختار يبقى شاعر وكتب أغنية ياريت وصاغها لحنيا بشكل رائع. أداء إليسا كالعادة رائع ومظبوط بالمسطرة. لكن هنا كانت متألقة جدًا.

...

أوصل بالعربي: اتعلم مزيكا أونلاين مع محترفين
اصدرت في: 22/09/2016

إحنا عارفين أنك أول ما تلاقي حد عاوزك "توصل بالعربي !" فيه 3 أسئلة هيلفّوا حوالين دماغك بالشكل الكارتوني المعتاد! وده طبيعي أنك تسأل الأسئلة دي: إيه أوصل بالعربي ده!؟ وإزاي أوصل بالعربي ؟ وهوصل لإيه أصلًا !؟ إحنا يا سيدي دورنا نجاوب لك على الأسئلة دي بس اتقل علشان -فعليًا- هتاخد حاجة نضيفة! ناس كتير مننا فكرت تلعب مزيكا، أو نفسها تتدرب تعزف على الآلة اللي بتحبها، وطبعًا إحنا في الأجازة وده موسم التمَنّي! بس علشان "ما نَيل المطالب بالتمَنّي" زي ما أحمد شوقي قال، أول ما بنيجي نبدأ بتعطلنا حاجة من دول؛ إما إننا نكسل نروح مراكز تدريب بشكل منتظم، علشان ده بياخد مجهود كبير، وقت كتير، وفلوس أكتر! أو مش لاقيين مُدرّبين ثقة وناس " تُقال في المزيكا" زي ما بيقولوا، بس طبعًا مع الوقت الدنيا اتطوّرت وكل حاجة في الدنيا بقيت تقدر تتعلّمها (أونلاين-online)، بس فاضل "قَشَّة!". "اللغة".. بما إننا مصريين فأكيد مش كلنا بنعرف نتكلم لغات، فلو أنت جربت قبل كده تتعلم حاجة أونلاين وخاصةً في المزيكا أكيد هتكون عارف أن اللغة - كما قيل - هي "القشة التي قسمت ظهر البعير!". سيبك من البعير دلوقت وركّز معايا! كلنا عارفين أن أغلب التركيز في تعليم المزيكا دلوقت في القاهرة واسكندرية وده بيخلي موهوبين المحافظات مستخبيين، وده كان سبب من الأسباب الأساسية اللي قوّمت اوصل بالعربي، طيب لو أنت نفسك تتعلم أي آلة أو موهوب حتى في التطبيل على ضهر العود! إيه اللي ممكن يساعدك في ده كله ؟ "اوصل بالعربي" اوصل بالعربي هي فكرة جيتاريست مصري شاب اسمه "أوسو لطفي"، وهو founder ( SOS Music Fistival ) واللي الفكرة جاءت بعد كده كامتداد له، والفكرة ببساطة هي مشروع لتطوير المشهد الموسيقي في مصر، بكل ما يتعلق به، سواء تطوير في طريقة التعليم أو تطوير لنظرة المجتمع للفنان نفسه، وده عن طريق مشروع لأكبر مجتمع أونلاين للمزيكاتية في مصر وهو موقع ewsal bel3araby. إيه اللي بيميز الموقع ده عن غيره؟ ما أنا ممكن أتعلم أي حاجة من على يوتيوب! اللي بيميّز الموقع ده أنه هتقدر تتعلم أي آلة بتحبها من ناس شاطرة جدًا وأسماء تقيلة لموسيقيين يمكن مابنقدرش نشوفهم غير في حفلة لمطرب مشهور، من أي مكان في مصر مش بس القاهرة وده عن طريق فيديوهات للتعليم بمستويات مختلفة، بكواليتي عالية جدًا صوت وصورة، وده كله هيكون بالعربي لأن اللي هيعلمك موسيقيين مصريين، فاللغة عمرها ما هتكون عقبة بالنسبة لك. طيب، إيه عيب التعليم online؟ عيبه أنك مابتبقاش عارف اللي أنت بتعمله ده صح ولا غلط، ووضعك في المزيكا مابيبقاش فارق كتير عن "عم بَخ!"، طيب والحل؟ الموقع ده هيكون فيه طرق للتواصل بينك وبين اللي بيعلمك تخليه يتابعك ويتابع مستواك وده اللي هيخليك في الآخر "توصل"، لأنك ببساطة لو مستواك تقدم بشكل ملحوظ هيوفروا لك فرص أحسن للتعليم من ناس كبار كان نفسك تقابلهم وتتعلم منهم، بل أنهم ممكن يوفّروا لك فرص شغل مع فرق كبيرة لو أنت ناي على احتراف. إزاي هتتواصل معاهم؟ الموضوع بسيط، أنت كل اللي عليك تدخل على صفحتهم على فيس بوك (اوصل بالعربي - Ewsal Bel3araby) هتلاقي فيديوهات تعليم لآلات مختلفة، أو تدخل على الويب سايت بتاعهم www.bel3araby.net . اوصل بالعربي حلم اتشكّل بالمزيكا، هيدعم كل الموهوبين الظاهرين واللي مش باينين، موقع هيعمل من المزيكاتيّة عيلة كبيرةوشجرة أصلها في القاهرة وفروعها في المحافظات، وثمارها تحقيق حلم كل موهوب. اوصل بالعربي .. فكرة صغيرة بمستقبل كبير.

...

دليل كايرو 360 لتعليم العزف على البيانو في القاهرة
اصدرت في: 07/09/2016

كثير مننا وإحنا صغيرين كان عنده "أورج" لعبة وغالباً كان هدية عيد ميلاده، وعلشان كدة برضه ممكن كثير من قرّائنا يكون عندهم خلفية -ولو بسيطة- إزاي يعزفوا حاجات خفيفة على البيانو أو الأورج زي النشيد الوطني أو أغنية "اهواك" لعبدالحليم حافظ، وممكن جدًا يكون بعضهم كمل وأصبح بـ يعزف فى طابور الصباح تبع فرقة المدرسة الموسيقية. بس النهاردة فى موضوعنا هـ نتكلم بشكل اوسع شوية للي حابب يكمل أكثر ويحترف العزف على البيانو أو الكيبورد، بس في الأول نحب نوضح الفروق الأساسية بين البيانو والكيبورد أو "الأورج". بشكل عام البيانو هو الصورة الأصلية والكلاسيكية، وهو فى المقام الأول آله وترية وإن كان ده مش ظاهر، لأن الأوتار موجودة داخل الجسم الخشبي للبيانو والصوت بـ يخرج منها بعد الضرب على مفاتيح البيانو إللي بـ تكون واصلة برؤوس بـ تضرب بدورها على الأوتار من الداخل، البيانو بـ يتكون من 7 أوكتاف ونصف والأوكتاف هو السلم الموسيقي، و أسفل البيانو بـ يكون فيه دواسات تشبه دواسات العربية، ودي للتحكم فى امتداد الصوت وإستمراره لكن استخدامها بـ يكون فى مرحلة متقدمة شوية. بعيداً عن النمط الكلاسيكي للبيانو بـ نلاقي الكيبورد و ده بـ يكون الصورة الإلكترونية للبيانو بفروق كثيرة أولها انه بـ يتوصل بالكهرباء و أنه بـ يخرج أصوات مختلفة و ده لإحتوائه على مؤثرات بـ تتباين حسب نوعه، و أنه غالباً بـ يتكون من 5 أوكتافات بس مش 7 زي البيانو الخشبي "الأكوستك". الكيبورد يعتبر أكثر انتشاراً من البيانو لعدة أسباب اهمهم سهولة حمله و نقله و انخفاض متوسط اسعاره مقارنةً بالبيانو، إلا أننا ممكن نعتبرهم -تجاوزاً- آلة واحدة وليهم نفس الأساسيات و أساليب التمارين. فين ومع مين ممكن نتعلم بيانو أو كيبورد؟ من أنسب الأماكن لتعليم البيانو مركز تنمية المواهب بدار الأوبرا المصرية خصوصاً للبدء مع الأطفال من سن 6 سنوات خصوصاً للتأسيس الصحيح بـ تعلم قراءة النوتة الموسيقية وده بـ يكون مقابل 500 جنيه كل 3 شهور وده مكانه في دار الأوبرا بالجزيرة، للإستعلام و الحجز: 0111109457-01005200906 كمان في مركز فنون لسكان مصر الجديدة ومدينة نصر بسعر 200 جنيه للـ 4 حصص، و المركز مكانه 7 شارع يوسف عباس، الدور الأول، شقة 104، مدينة نصر امام نادي الزهور، للتفاصيل و الحجز ممكن تتصل على 22623993 او 01022630333 لو عايزين فرصة للتعليم مع حد محترف و صاحب خبرة واسعة يبقى مع أ/نادر سامي 01223806729 والتعليم معاه هـ يكون من خلال منهج احترافي سواء للبداية مع صغار السن أو الكبار، ومكان التعليم بـ يكون بالتنسيق مع الطرفين ودة بـ يتوقف عليه سعر الحصة، إلا أنها بـ تكون تقريباً فى حدود 75 جنيه ومدتها بـ تكون بين 40 دقيقة لساعة وده كمان يتوقف على سن و مستوى المتعلم. كمان ممكن تتواصل مع أ/كريم فاروق لو عايز دروس خاصة هـ يساعدك من الأول تبدأ من الأساسيات و رقمه 01143731684 و الحصة مكانها و سعرها بـ يكونوا حسب الاتفاق. أيضاً المركز الثقافي الروسي بـ يوفر فرصة هائلة للتعليم مع نخبة من المدرسين المحترفين و أحياناً جزء منهم بـ يكونوا أجانب من روسيا و ما حولها من دول و دي فرصة لتذوق الآلة و تعلمها بطريقة وحس مختلفين حبتين، ممكن التواصل مع المركز للتفاصيل على رقم0233370577 وعنوانه 127 شارع التحرير، الدقي. ممكن تتابعوا الورش الفنية اللي بـ نكتب عنها من وقت للثاني في أجندة كايرو 360 اللي بـ يبقى فيه كثير منها لتعليم العزف على الآلات المختلفة وخاصة البيانو والكيبورد.

...

مالناش إلا بعض: رامي جمال كلاكيت ثاني مرة!
اصدرت في: 12/08/2016

المطرب الشاب رامي جمال بدأ حياته الفنية كملحن. قدم أغاني كثيرة علمت مع الناس (خلص الكلام) و(بحبك كل يوم أكثر) لمحمد حماقي، (أنا مصمم) لبهاء سلطان، (بسهولة كده) لمحمد فؤاد. رامي اتجه للغناء وقدم ألبومه الأول (فترة مش سهلة) ونجح نجاح كبير. وفي 2016 بيقدم تجربته الثانية في ألبوم "ملناش إلا بعض". جملة الصولو في بداية أغنية "ملناش إلا بعض" ناعمة وشيك وتُحسب لرامي جمال كملحن. وتقديم الجملة مرتين، وخاصة المرة الثانية بالكمنجات خلى تأثيرها أعمق. الموزع نور أضاف حيوية للأغنية باستخدام الصقفة كإيقاع واستخدام البيتزكاتو (النقر بالأصابع على أوتار الكمان). لحن أغنية "اوعديني" من أجمل ألحان الألبوم، جملة لحنية رقيقة وهادية، زي أغلب ألحان رامي جمال سواء لنفسه أو لغيره. أمير طعيمة بيقول (لو نسيت يا حبيبتي نفسي تفوقيني) السطر ده مش مقبول في سياق أغنية بتعبر عن حوار هادئ ورقيق بين حبيبين. الشاعر جمال الخولي بيقدم صياغة جيدة لحالة الضياع بعد انتهاء العلاقة في أغنية "ما تنسيش". هنلاقيه بيقول (وشكلي بارتاح لما باتعذب وباخسر وعمري ما اتعودت ع المكسب). استخدام الكلارينيت في بداية الأغنية يُحسب للموزع أحمد إبراهيم، وكذلك جملة الفاصل. ومافيش أي فرق بالنسبة للوتريات اللي تخصص بكتابتها سعيد كمال. أغنية "تعالالي" مثال للأغنية الإيقاعية العادية الخالية من أي تجديد. وإن كان نجاحها مضمون وخاصة في موسم المصايف والأفراح. جملة الكمان في أغنية "خاصمنا بعض" جيدة. ولحن رامي جمال كويس، رغم إن اللحن والتوزيع على العكس من الكلمات الحزينة اللي بتجسد حالة الفراق والخصام. الموزع أحمد إبراهيم استغل مزيكا الكانتري في مقدمة أغنية "إزاي هنرجع". ولحن رامي جمال كالعادة هادي من غير أي تحويلات أو مفاجئات. سعيد كمال قدم صولو كمان راقي في الفواصل. والشاعر جمال الخولي بيثبت للمرة الثانية إنه شاعر مختلف. وبيقدم صياغة مختلفة لحالة الفراق والهجر. عودة مرة أخرى لأغاني الأفراح الإيقاعية في أغنية "هالله هالله". الشاعر أسامة مصطفى أعاد كتابة أغاني قديمة كتير. وأخد من كل أغنية كوبليه. ولحن سامح كريم أقل من العادي. في أغنية "يا قلبي" الملحن ياسر نور هو البطل. قدم جملة لحنية ممتازة. واستخدام آلات النفخ النحاسية أضاف لجملة الصولو – الجميلة أصلا- طعم جديد. وكل ده الفضل فيه يرجع للموزع الدؤوب نادر حمدي. استغلال الإيقاع بشكل جيد في أغنية "الندم" يحسب للموزع شريف مكاوي، وكذلك استخدام الساكسفون. كلمات أحمد المالكي من أفضل الكلمات في الألبوم. هنسمع مثلا (الندم مهما تداريه دمعة عينيك بتأكده. واللي جي تنده عليه ده اللي كنت بتبعده) والأغنية لو حذفنا منها المقدمة والفواصل وجمل الصولو والإعادات هيبقى طولها دقيقة ونص تقريبا!. مقام الكرد واضح جدا من بداية لحن أغنية "عرفتوا ليه" اللحن اللي اشترك فيه رامي جمال مع محمد وزيري. أمير طعيمة حاول يخرج من التعبيرات السائدة فقال (عرفتوا ليه كان نفسي فيه) التعبير غير مناسب لجو الأغنية. ويحمل معاني سيئة كثيرة. لحن مدين لأغنية "مات اللي فات" فرض نفسه بقوة على المستمعين، ونظن فرض نفسه كمان على رامي جمال عشان يختاره. كلمات هاني صارو عادية جدًا، وخاصة لما نسمع حاجة زي (الباب يفوّت 100 بجد مش هزار) في أغنية "حبيبي تعالى" توزيع شريف مكاوي أضاف كتير سواء من ناحية الإيقاع أو جمل الصولو في المقدمة والفواصل. جمل قوية ومتماسكة على عكس لحن محمد النادي وكلمات هشام صادق. أغنية "علامة استفهام" أجمل أغنية في الألبوم. أغنية متكاملة في كل عناصرها. الموزع أحمد إبراهيم بعد عن موسيقى التكنو والهاوس وبدأ بجملة إيقاعية بسيطة بالدفوف وظهر معاها العود والوتريات. ورغم بساطة الجمل إلا إنها دافئة ومعبرة. لحن رامي جمال وصل للقمة عند (هرجع تاني أمشي وحداني سكة الأيام) ورغم إن رامي جمال احتفظ بنصيب الأسد من ألحان الألبوم إلا إنه هنا كان في أفضل حالاته. وكذلك أمير طعيمة. الشاعر أسامة مصطفى هو بطل أغنية "فرق في حياتي". فكرة الأغنية وصياغتها جديدة ومحتلفة تماما عن كل اللي موجود على الساحة. حالة البحث عن الحبيب وهو قدامنا، والأهم فهم الحكمة من البحث في أماكن بعيدة، اللي بيخلينا نتعلم دروس مهمة. لكن للأسف الكلمات المختلفة الجيدة معاها لحن سيء، وهنلاحظ ده في البداية بالذات، من طريقة نطق رامي جمال، من خلال المطّ والتطويل في الحروف. الموزع محمد عاطف أجاد في الكتابة للوتريات على طول الأغنية. عادة آخر أغنية في الألبوم وأول أغنية بيبقوا من أفضل أغاني الألبوم. ولما شفنا اسم جمال الخولي على الأغنية توقعنا كلمات مختلفة. لكن للأسف خابت كل توقعاتنا. أغنية ضعفت مجرد أغنية حزينة تقليدية. سمعناها كتير قبل كده ولسه هنسمعها أكثر.

...

عمري ابتدا: بداية مرحلة جديدة
اصدرت في: 26/06/2016

بعد نجاحه الكبير مع شيرين في ألبوم مشترك سنة 2002 انطلق تامر حسني وأصبح ظاهرة لفتت أنظار جمهور كتير. نجح في جذب شريحة كبيرة من الشباب، بعد ألبومه المنفرد الأول (حبّ) سنة 2004. ونقدر نقول أن ألبوم (عمري ابتدا) ممكن يكون بداية مرحلة نضج فني، لأن اختياراته محسوبة بعناية، بعيدًا عن النمط اللي اختاره تامر من بداية مسيرته. الموزع جلال حمداوي اختار قالب التكنو لأغنية يا مالي عيني أول أغنية في الألبوم. مزيكا الفواصل والمقدمة أشبه بتراكات الـ Fitness Motivation تامر حسني لسه مصّر أنه يخوض تجربة كتابة كلمات الأغاني. لكن على كل حال، التجربة المرة دي أفضل من تجارب سابقة. للمرة التانية بنقابل مزيكا التكنو في أغنية عمري ابتدا والمرة دي مع الموزع تميم. لحن شريف بدر مناسب لقدرات تامر الصوتية، وأداءه جيد في المجمل، وإضافاته للحن بسيطة لكن ذكية. والأغنية دي من الأغاني المخصوصة لحفلات الزفاف. تامر استعار طريقة الغناء المغاربي في أغنية الحارس الله في بداية الأغنية. سلامة علي شاعر موهوب ومجتهد وله نَفَس مختلف عن السائد، وده واضح في صياغته، وفي اجتهاده علشان يلاقي صور شعرية جديدة. وكلماته من أجمل عناصر الألبوم. هنسمع حاجات زي (ده أنا قلبي أما لقاك فتح الباب والشباك) جملة الفاصل بالترومبيت أضافت حيوية وقوة، جملة مبهجة فيها كتير من روح المزيكا اللاتينية. الموزع الشاب يحيي يوسف هو بطل أغنية فاض بيا. البداية بالجيتارات مهدت للحن تامر علي الرقيق. الكمنجات في الخلفية -وبالذات في الكوبليه التاني- جسدت انفعالات اللحظة الصعبة، بضربات قوس قوية، وجمل قصيرة مبتورة كأنها بتقول اللي بين السطور، كأنها الكلام اللي ماكملش بين الحبيبين. التتابعات النغمية بالجيتارات في البداية وجملة الفاصل جديدة ورقيقة. وواضح أنها عجبت الموزع جدًا لأنه لعبها بالبيانو في النهاية وختم بيها. محمد يحيي من أهم الملحنين في جيله، ومن أكثرهم موهبة، وبيقدم ألحان حلوة وجديدة. لكن في أغنية نفس الحنين قدم لنا لحن أقل من العادي. الموزع تميم المسئول عن الميكساج خلى الإيقاع في الخلفية أعلى من صوت تامر أو مساوي له، وده خلى سماع الأغنية محتاج مجهود. رفع اللحن نص تون كسر حالة الملل وأضاف شيء من الحيوية. جملة الكمنجات في بداية أغنية يا عيون جميلة. توما اجتهد وأضاف للأغنية كتير، استغل الكمنجات لعمل حالة من الرقة على طول الأغنية. كلمات أحمد المالكي جيدة وخاصة في المذهب. في أغنية حبيبي خلاص الشاعر محمد مصطفى ملك بيعبر بخفة دم عن التضحيات علشان حبيبته وقال (صاحي لك كل يوم بدري ويومي معدول) لحن محمود أنور عادي، والطبلة أضافت حيوية لجو الأغنية. الموزع تميم استخدم نغمة الموبايل بذكاء في بداية أغنية بطلة العالم في النكد. عنوان الأغنية مبالغ فيه، لأن تامر حسني مصرّ يكتب أغانيه بنفسه. الملحن عبد الرحمن شوقي كان في امتحان صعب علشان يلحن كلام زي (بطلة العالم في النكد ونمرة واحد في العقد) كلمات وألحان تامر حسني في أغنية احساسي مبيكدبش موفقة إلى حد كبير. والأغنية دي مثال على إن تامر طاقة فنية كبيرة، وملحن موهوب، ويقدر يقدم ألحان مهمة. في أغنية كان في واحدة الشاعر سلامة علي أثبت أنه صاحب موهبة كبيرة. الأغنية بتحكي عن الحب المزيف. القصة اللي بتتكرر كل يوم ألف مرة. لكنه صاغها بطريقة أقرب لحكايات الأطفال، علشان يأكد أنها حكاية ساذجة وقديمة. لحن محمد يحيي، وتوزيع تميم أكدوا على نفس الفكرة ببساطة وذكاء. وكان من الأفضل تتغنى من وجهة نظر مطربة، لأن الحبيبة هي الطرف المهزوم في النهاية. الدخول بجملة الناي من مقام الكرد في أغنية يا بعيد يُحسب للموزع ياسر ماجد. نادر عبد الله وتامر علي اعتمدوا على روح الفولكلور الشعبي المصري، واستغلوا المنطقة دي بذكاء ومن غير مبالغة. كلمات أمير طعيمة في أغنية كداب وأناني فيها قدر كبير من المباشرة. وهي عبارة عن حوار أخير بين حبيبين. لحن تامر عاشور سلس وانسيابي، واتأخر في الوصول للذروة لغاية الكوبليه الثاني. لحن شريف بدر لأغنية شكرا إنك في حياتي أقل من ألحانه في باقي الألبوم. تآلفات الجيتار والوتريات أضافت للأغنية عمق جمال. أغنية رحلة الحياة من أهم وأجمل ألحان الألبوم. وليد سعد استخدم مقام الكرد في صناعة جملة عذبة وانسيابية، وعند (وقت اللقا قصير) بينتقل لمقام الصبا. وجملة الكمنجات في البداية رائعة من الموزع احمد إبراهيم. كلمات أيمن بهجت قمر ممتازة، وخاصة لما قال (ولا حد آمن للعتمة ولا حد ضامن ضيّ).

...

رمضان جانا: فريق Key66 قدر يحقق المعادلة الصعبة
اصدرت في: 19/06/2016

مش سهل على الودان أنها تسمع لحن قديم بتحبه متقدم في صورة جديدة إلا لو فعلًا الصورة الجديدة دي مميزة وقوية علشان تعرف تصدقها وتنبسط بيها.. ولا سهل على الأغاني اللي بقت جزء من الشخصية المصرية أنها تطلع في قالب غير اللي طلعت بيه أيام زمان والناس تتقبلها وتنبسط بيها. فريق "Key66" بدعم من مع ريد بُل واضح أنه قدر يحقق المعادلة الصعبة، أو خلونا نقول المعادلتين بقى! .. وقدم واحدة من أكتر الأغاني اللي فضلت محافظة على مكانتها عند الناس زي ما هي رغم عمرها الطويل واختلاف الأجيال اللي عدت عليها، أغنية "رمضان جانا" للفنان السهل البسيط "محمد عبدالمطلب" الله يرحمه.. قدمها الفريق في صورة وقالب مختلفين تمامًا مع الإبقاء على الهيكل الرئيسي للحنها.. ولما تخطي خطوة لقدام وأنت عارف تحدياتها بالشكل ده فده معناه أنك مش بس واثق في قدراتك، لأ كمان أنت جريء كفاية أنك توظف قدراتك دي في إنتاج شيء مميز، وتطلع بيه للناس تقولهم أنا آهو! الفكرة الرئيسية في المنتج الجديد ماكانتش في أنه مختلف وبس.. الفكرة كانت في أنه إعادة توزيع حقيقية مبنية على فلسفة ما، مش مجرد تغيير ساذج من بتوع اليومين دول، وفلسفة الموضوع كانت هي الـ"دمج".. دمج كل أنواع الموسيقى المعبرة عن كل شرايح المجتمع المصري الثقافية ووضعها في تراك موسيقي واحد! .. يعني كل واحد غاوي مزيكا هيلاقي حتة في التراك فيها نوع المزيكا المفضل بالنسباله، بداية من الموسيقى الشرقية الأصيلة ومرورًا ببعض ألوان الموسيقى الغربية لحد مانوصل للموسيقى الصاخبة المصاحبة للأغاني الشعبية! .. والعبقرية الأكبر في أنك وسط النقلات دي كلها ماتحسش أن الموضوع مكسر كده ولا تحس النقلات مزعجة أو صادمة، بالعكس.. النقلات كلها سلسة وتنقلك من دنيا لدنيا بمنتهى السهولة والبساطة من غير ماتحس بأي فصلان.. وعلشان مانطولش عليكم الكلام أكتر من كده عن منتج سماعي بالأساس.. فخلونا نروح على طول للمهم ونسمع التراك سوا: اسمعوه من هنا أو من هنا المجوعة اللي أشتغلت على الأغنية: أحمد الهادي، عمر الديب، هشام المناسترلي، عمرو خالد، أمير الشريعي.

...

بمناسبة رمضان: اسمعوا أغاني صوفية جديدة لفيروز كراوية
اصدرت في: 09/06/2016

واضح أنه الفن الصوفي فعلًا بيعيش أجمل أيامه.. تقريبًا بعد حالة الجفاف الفني الشديد اللي كان بيعاني منها أصحاب الأذواق الراقية وسط زحمة الفن المسف والركيك، قعد الجميع يدور على مصدر واسع ياخد منه كلمات قوية وعالية، مع ضرورة أنها تكون برضه بسيطة نسبيًا ومفهومة، وكمان رقيقة وتاخد العقل والقلب.. وواضح أنه الصفات التلاتة اجتمعوا في أدبيات الصوفية.. فلقينا حالة عامة من الإقبال الشديد على البحث في أشعارهم والانتقاء منها، ومن ثم البحث عن الطرق اللي المفروض تؤدى بيها.. ومن هنا بدأ اللون الصوفي في الفن ياخد وضعه ومع الوقت يبقى اللون الأكثر شيوعًا في بعض الأوساط! وبما أن الصوفية في الأصل هي طريقة تصفية دينية بالأساس، فالناس اللي بدءوا يقدموا الفن الصوفي فضلوا رابطين الربطة دي، قليل اللي قدر يجرد الموضوع ويقدمه كلون من الفنون الإنسانية.. أما الغالب ففضل يقدمه كفن ديني معبر عن حالة صفاء روحي معينة وصل لها أصحابها فقالوا فيها الكلام ده.. "فيروز كراوية".. الفنانة المصرية البورسعيدية الأصل خرجت برة محتوى فنها المعتاد، وقررت في رمضان السنادي تربط بين دخلة الشهر الكريم وبين نزول أول أعمالها بالنكهة والطابع الصوفي.. اللي هو في الواقع ماكانش عمل واحد، وإنما أربعة أعمال مختلفة كلها بتحمل نفس الطابع.. "عجبت منك ومني" و "كتبت ولم أكتب" من أشعار الحلاج، و "جنينة الإنسان" و "جمل الضل" من كتابات الشاعر المصري المعاصر إسلام حامد.. ولأن اللون ده أصبح شائع زي ما قلنا فكان واجب على "فيروز" أنها تحاول تلاقي شكل جديد تقدم بيه الأعمال دي علشان ماتتوهش وسط الأعمال التانية المشابهة.. وده اللي واضح أنها اشتغلت عليه بقوة وشفناه بوضوح في حاجتين الحاجة الأولى: أنها لم تكتفي بالتقليب في القديم والأخد من التراث زي ما المعظم بيعمل، وإنما سعت إلى إنشاء كلام جديد لحد معاصر بيحكي نفس الحالة لكن من منظوره هو.. وده خلاها تغني كلمات جديدة ماحدش غناها قبل كده، واداها نقطة تفوق وتفرد كويسة. الحاجة التانية: أنها وإن حاولت تجدد في اللي بتطرحه باتجاهها إلى اللون الصوفي، إلا أنها برضه فضلت محتفظة بطابعها الموسيقي اللي بيميزها وده خلى الخلطة غريبة شوية وجايز تكون كمان مش مستساغة على الودان اللي اتعودت تسمع الكلام ده على مزيكا تانية.. لكنه احتفظ لفيروز بالتميز والتفرد من تاني. الجدير بالذكر أن الأغنيتين الأولانيين اللي كاتبهم الشاعر إسلام حامد نقدر نعتبرهم المحاولة الأولى للتجديد في الكلمات الصوفية اللي بتتغنى، أو على الأقل المحاولة الأولى بالعامية المصرية في السكة دي.. تقدروا تسمعوا أغنية "عجبت منك ومني" من أشعار الحلاج على ساوند كلاود كنموذج، وتقولولنا رأيكم في تجربة فيروز الجديدة.. هل قدرت فعلًا تقدم شيء مبتكر وجودته عالية؟ وللا اهتمامها بالابتكار خلاها تيجي على حساب التركيز في أنه المزيكا تكون مناسبة للحالة اللي بتتحكي؟

...

اسم على الورق: عفوًا.. لقد نفذ الرصيد
اصدرت في: 02/06/2016

المغني المصري صاحب التاريخ الطويل هاني شاكر بيقدم ألبوم جديد، بيحاول يتماشى مع الجو الموسيقي العام، وفي نفس الوقت متمسك بطريقته القديمة، اللي احتفظ بها من غير أي تغيير على مدار أكتر من 30 سنة. ورايا إيه محاولة لتقديم أغنية إيقاعية سريعة في إطار جديد، ابتعد الموزع أحمد عبد السلام عن المقسوم أو الإيقاع الصعيدي، واختار موسيقى التكنو، لحن مدين أقرب للركاكة، هاني شاكر حاول يضيف من عنده للحن لكن مافرقتش كتير. حتى إضافاته وطريقة أداءه ماتغيرتش من فترة طويلة. أغنية ذكرياته من أفضل أغاني الألبوم. أغنية متكاملة في جميع عناصرها. جملة الحوار بين الجيتار والأبوا بداية ممتازة. اللحن جميل وحيوي من مقام الكرد – مقام هاني شاكر المفضل- كلمات بهاء الدين محمد جسدت حالة ما بين الأمل في بُكره، والرغبة في الانتقام، والجزء بتاع (سلام كبير) مش مفهوم ضمن سياق الأغنية، ولو اتحذف مش هنحس بأي تغيير ولا أي نقص. أداء هاني شاكر هادئ وجيد في المجمل. الأغاني الحزينة هي النوع المفضل عند الفنان هاني شاكر، وسبب نجاحه وشعبيته، وفي أغنية اسم على ورق بيقع في فخ المباشرة والتقليدية، كلمات أحمد شريف ما هي إلا سرد لمفردات الموت والضياع والحزن والفراق، من غير ما نعرف إيه سبب كل الحزن ده، وإيه اللي يستدعي الوصول للمرحلة دي، ومش مفهوم القصد من جملة (أنا زهرة اتخلقت للزينة) هل المفروض إن الزهرة تتعمل مربى مثلًا؟ وعلى الرغم من جودة جملة الفاصل، لكن تنفيذها ماكنش موفق أبدًا، استخدام الأكورديون الفرنساوي مش مناسب، لأنه أضاف جو من البهجة على عكس مود الأغنية. أغنية غلطة عمرك مثال آخر على الوقوع في السطحية، كلمات محمد البوغة بتجسد حالة الرغبة في التشفي والانتقام، لكن لحن محمد عبد المنعم على العكس تمامًا، ولحد دلوقتي مش مفهوم أبدًا إيه الغرض من لحن سريع على أغنية كلماتها مش مُبهجة. وجود الموسيقيين والشعراء الشباب في الألبوم مافرقش كتير، ومن الواضح تدخل هاني شاكر بقوة في تفاصيل العمل وبيفرض وجهة نظره، لأن ملامح التغيير مش واضحة، أو نقدر نقول باهتة، في أغنية رسالة حب (عنوان قديم ومستهلك جدًا) الجملة اللحنية عبارة عن نسخة مكررة من أغاني كتير لهاني شاكر، وكل ألبوم فيه أغنية واحدة على الأقل من النوعية دي. الشاعر أحمد شريف طلع علينا بفكرة غريبة على المستمع العربي في أغنية بره نفسي، عايز يشوف نفسه من بره، علشان يعرف مين بيحبه ومين بيكرهه. نفس الفكرة اللي تم تداولها قبل كده في أفلام كتير، البطل بيموت أو بيحلم إنه مات وبيشوف تعليقات الناس في العزاء، ولأول مرة بنسمع صوت الطورة (الصاجات الكبيرة) في الخلفية في أغنية مش شعبي. والسؤال هنا: إيه قصد الموزع حازم رأفت من استخدام الطورة في أغنية زي دي؟ الموسيقار الكبير محمد ضياء الدين عاد بعد فترة غياب طويلة، علشان يستعيد نجاحات الثمانينات والتسعينيات مع هاني شاكر، لحن وتوزيع أغنية يخونك إضافة للألبوم، فقط يعيبها أداء هاني شاكر نفسه، اللي كان محتاج قوة وحيوية أكتر، إلى جانب أن حرف التاء اتحول بطريقة غريبة وبقى حرف (تس) وهنسمع كلمات زي مشيتس، اتمنيتس، اتهديتس، اموتس، بيفوتس، وهكذا. أغنية شكرًا كلماتها اللي كتبها محمد البوغة ولحنها محمد عبد المنعم لم تحمل أي جديد، بالعكس هي عبارة عن أفكار لأغاني قديمة سواء في الكلمات أو في اللحن. في أغنية بحلم بنشوف جانب آخر من موهبة الملحن محمد عبد المنعم، اللي أثبت إنه يقدر يقدم ألحان متميزة بعيدًا عن الألحان الشعبية اللي اقتحم بيها الساحة الفترة الأخيرة. تعامل أحمد عادل مع الكمنجات والجيتار والإيقاع بوعي. الملحن حمدي صديق يعود بعد فترة غياب بأغنية وإيه يعني. وقدم جملة لحنية جديدة، بتتابع نغمي رائع، وتفوق على نفسه في تلحين كوبليه (ولا عمري يوم شفت كده) الموزع مجدي داوود عمل جملة فاصل عادية. لما بنشوف اسم الشاعر الكبير بهاء الدين محمد بنعرف إننا هنسمع كلمات حلوة، وفيها فكرة جديدة، لكن أغنية بعد حبك مخيبة للآمال، وأقل من العادية. لحن مدين جيد جدًا بالنسبة لأغنية Slow بسيطة، لكن فيها نَفَس ملحن موهوب. في أغنية جرح الماضي الملحن والموزع محمد ضياء استغل كل طاقات وإمكانيات الأوركسترا، وقدم جُمَل موسيقية – سواء في اللحن أو في موسيقى الفواصل – قمة في العذوبة والجمال والرقي. خطوط الوتريات المتعارضة في الخلفية أضافت للأغنية. جملة البداية في أغنية هتلاقيني تُحسب للموزع حازم رأفت، البيانو ونغبشات الجيتار والوتريات أكدت على حالة الهدوء المُصاحب للعتاب الأخير بين حبيبين. الملحن خالد جنيدي استخدم الكريشندو أو التصاعد اللحني لحد دخول الإيقاع. جملة الفاصل كانت تحتمل موسيقى أكثر قوة وتماسك، لكن الموزع اكتفى بالحلول السهلة. في أغنية برواز صورتك كلمات ناصر الجيل بتعبر عن حالة التعلق بتفاصيل الحبيبة الغائبة، وطول الوقت اللحن وموسيقى الفاصل وموسيقى الخلفية أفضل من أداء هاني شاكر الثابت طول الوقت.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن