دليل القاهرة بالليل القاهرة، أحدث المقالات عن القاهرة بالليل مصر

القاهرة بالليل

سى عمر: سحورك فى خيمة فيرمونت هليوبوليس الرمضانية
اصدرت في: 14/07/2014

المكان؟.. فندق فيرمونت هليوبوليس، وتحديدًا خيمة سى عمر، واحدة من أجمد خيام القاهرة الرمضانية السنين الأخيرة، واللى فتحت أبوابها بدرى شوية السنة دى بمناسبة كأس العالم. بتقديمها نكهات شيشة رائعة وسط شاشات عملاقة، الخيمة الرمضانية المحبوبة دخلت بكل ثقلها لخدمة مئات من عملائها، الجعانين منهم وكمان المحبين لكرة القدم. الشكل الجمالى للمكان لا يُعلى عليه، ما بين كنب وبين باجز ألوانهم رائعة، ومعاهم ترابيزات خشبية قصيرة وأجواء لطيفة على حمام السباحة. فيه حاجات ثانية ممكن نعلّق عليها، خصوصًا أن وقت ودقة تقديم الطلبات أصبحوا من العوامل المهمة وسط ضغط رمضان. طبعًا علشان زيارة أماكن من النوع ده لها تجمُّع خاص، مجموعتنا كانت من تسعة أفراد رايحين يشوفوا الماتش وبعدين يتسحّروا. حجزنا مسبقًا قبل ما نروح ووصلونا لترابيزتنا أول ما دخلنا. سى عمر بـ يقدم نوعين من منيو سحور ثابتة، وإحنا جربنا الاثنين. أول واحدة كانت فيها كل السلاطات، تشمل فتّوش، تبّولة، حمص، بابا غنوج وزبادى، مع طبق رئيسي من الشاورمة (165 جنيه). الثانية كانت بنفس السلاطات، لكن معاها ميكس جريل بدلاً من الشاورما (225 جنيه). وقت التقديم كان معقول بالنظر للعدد الهائل الموجود فى المكان. وصلت السلاطات ومعاها سلة عيش ساخن شكلها لطيفة قبل تقديم الطبق الرئيسى. المشكلة الوحيدة كانت حجم الترابيزات الصغير شوية على تسعة أفراد. المطاعم فى رمضان لها أسلوب معين يعتمد على تحضير كميات كبيرة من كل حاجة. أغلب الوقت هـ يوصل لك أكل قديم تحس أنه اتسخن من جديد. مش هى دى حالتنا مع سى عمر! الخضروات كانت طازجة والعيش كان لسه طالع من الفرن، وبعد الكلام ده انتظرنا الأطباق الرئيسية على نار. صحيح الشاورما مش استثنائية، لكن فى كل الأحوال الطبق كان لذيذ. نفس الكلام بالنسبة للميكس جريل، اللحم طرى لكن الطعم مش خرافى. الأكل حقيقى ما قدرش يبهرنا، لكننا قابلنا تجارب أسوأ بكثير فى رمضان وفهمنا أن القواعد والمعايير مختلفة فى الوقت ده. سى عمر كمان بـ يقدم شيشة هايلة –العنصر المهم فى تجربة الخيمة الرمضانية– سعرها (45 جنيه) للشيشة واللّى الطبى، خلّى بالك وأنت بـ تطلب السناكس والمشروبات، الشاى سعره 35 جنيه والعصير حوالى 30 جنيه، وفى ليلة منعشة والوقت متأخر، ممكن تشوف فاتورة تدمّر ميزانيتك طوال رمضان. صحيح الموضوع مكلّف شوية، لكن مستوى الأسعار تقريبًا هو نفسه الموجود فى أى خيمة رمضانية من خيام الفنادق الشهيرة. لو بـ تفكر تستمتع بسهرة لطيفة وسط أجواء رائعة مع أصحابك أو أسرتك، سى عمر هى اختيارك المضمون.

...

اكسب! سحور لفردين بخيمة باب النيل بفيرمونت نايل سيتي
اصدرت في: 17/06/2014

بما أن رمضان على الأبواب –كل سنة وأنتم طيبين كده- وفريق كايرو 360 بـ يستعد لأيام عامرة بالولائم، سواء إفطار أو سحور... أنتم عارفين بقى، الأكل لعبتنا! ناس فيرمونت الطيبين بـ يقدموا لواحد من قراء كايرو 360 فرصة تذوق طعم رمضان بشكل مختلف عندهم. إيه؟ سحور لفردين بخيمة باب النيل بفيرمونت نايل سيتي. فين؟ من سنين وسنين –مش كثير قوي يعني- وخيمة باب النيل الرمضانية بـ تجمعنا، أكل وترفيه وجو عالي... ده غير طبعًا منظر النيل التحفة المشهور به فيرمونت نايل سيتي. ليه؟ احنا لسه قايلين فوق: أكل وترفيه وجو عالي... ده غير طبعًا منظر النيل التحفة المشهور به فيرمونت نايل سيتي. إزاي؟ سهلة! جاوب على السؤال: مين مغني الجاز المشهور، أبو صوت حلو وحنين كده، اللي دائمًا بـ يغني في سايجون فيرمونت نايل سيتي؟! (ماتفكروش كثير... الإجابة هنا على فكرة). طب وبعدين؟ ارسل الإجابة لـ freestuff@cairo360.com مع اسمك وبياناتك، وما تنساش تكتب "مسابقة سحور باب النيل" في موضوع الرسالة. الحقوا لأن المسابقة هـ تنتهي في منتصف ليل الثلاثاء 15 يوليو 2014. تطبق الشروط والأحكام.

...

كايرو جاز كلوب: موسيقى حية ودي جي وأكلات خفيفة ومشروبات في المهندسين
اصدرت في: 20/03/2013

لما تتصفح أجندة كايرو 360 اليومية هـ تلاقي كل يوم أحداث موسيقية وفنية في مكان اسمه «كايرو جاز كلوب». المكان فعلًا يعتبر علم وسط أماكن السهر وسماع الموسيقى الحية والأكل والشرب، لكن رغم كده اكتشفنا أن فيه ناس كثير ما تعرفش حاجة عن المكان ولا عن موقعه ولا نظام الدخول ولا إيه المميز فيه، يمكن بس يعرفوا اسمه وأنه موجود ناحية المهندسين أو العجوزة. كايرو جاز كلوب «Cairo Jazz Club» هو بَب Pub أو نادي ليلي بالمفهوم المعتاد، هو واحد من الأفضل والأشهر على الساحة حاليًا في القاهرة، اشتهر بتقديم أحسن الفرق الموسيقية والعازفين اللي بـ يقدموا كل أنواع المزيكا مش بس جاز زي ما اسمه بـ يوحي، وفي أيام خاصة بـ يقدم فيها موسيقى الهاوس والتكنو والإلكترونيك مع أحسن DJs في مصر وأحيانًا في العالم، وتقريبًا مافيش فريق موسيقي أو عازف شهير أو دي جي عالمي بـ ييجي مصر من غير ما يقدم حفل في كايرو جاز كلوب. عملنا زيارة مخصوص لكايرو جاز مؤخرًا علشان ننقل أجواء المكان للناس اللي ما راحتش قبل كده، لازم تحجز بالتليفون قبل ما تروح، ويا ريت يكون قبلها بيومين أو ثلاثة، وتحدد الساعة اللي هـ تروح فيها كمان، علشان الحجز ممكن يسقط بعد 30 دقيقة لو المكان امتلأ على الآخر. والدخول بـ يكون Couples أو بنات فقط، ما ينفعش شباب لوحدهم يدخلوا إلا في أضيق الحدود وبحالات استثنائية، حسب رغبة إدارة المكان، ومافيش حد أدنى للطلبات وممنوع الدخول لأقل من 25 سنة. معظم العروض بـ تبدأ الساعة 9 مساءً والدخول ممكن يكون قبلها بساعة. موجود في بداية شارع عرابي في المهندسين من ناحية العجوزة. له مدخل جانبي مش على الشارع الرئيسي تطلع له بكام درجة سلم. إضاءة خافتة جدًا، وعلى غير المتوقع المكان صغير جدًا من الداخل، وفيه عدد محدود من الترابيزات، لكن فيه أكثر من بار للجلوس بشكل منفرد، لكن لو عاوز ترابيزة وعشاء لازم تأكد على ده في الحجز اللي بـ تعمله قبلها بالتليفون. المكان على شكل حرف L وفي الركن الوحيد فيه مسرح صغير بالكاد يتسع لفرقة مكونة من 4 أفراد، لكن الغريب أن فيه فرق مكونة من 7 أفراد أو أكثر بـ يلعبوا على المسرح ده، وبـ يضطر بعض أعضائها أنهم يقفوا خارج المسرح. ومش بسهولة هـ تعرف تشوف العازفين لأن المسرح بنفس مستوى الأرض، يعني اللي في الصفوف الخلفية مش هـ يشوفوا أي حاجة، بس هـ يسمعوا كويس لأن توزيع الصوت ممتاز في المكان وإن كانت جودة الصوت بـ تختلف من عرض للثاني حسب مهندسي الصوت المصاحبين للفرق، وحسب جودة العازفين نفسهم. لكن اتضح من زيارتنا الأخيرة أن المكان وجهة كثير من عشاق موسيقى الـ Underground في مصر وبـ يروحوا مخصوص علشان يشوفوا فرقهم المفضلة اللي كثير منها نادرًا لما بـ يلعب في أي مكان ثاني غير كايرو جاز وكمان علشان أجواء الخصوصية والتفرد اللي بـ يتمتع بها المكان. وقت زيارتنا كان فريق Glass Onion اللي بـ يقدم أغاني البيتلز وبس كان مولع المسرح بالمعنى الحرفي واندمجنا معاه جدًا والمكان كان مليان على الآخر وتقريبًا ما كانش فيه حد مش بـ يغني بصوت عالي مع الفرقة وهو ماسك مشروبه المفضل وبـ يتمشى في الطرقات الضيقة للمكان. والناس بـ تبقى عارفة بعضها بنسبة كبيرة خاصة اللي بـ يحبوا نوع معين من المزيكا وبـ يحضروا كل الحفلات الخاصة بالنوع ده في أيامه المخصصة. يوم الروك أند رول غير يوم الهاوس غير يوم الجاز غير يوم الموسيقى المصرية البديلة والفولكلور. فيه منيو للأكلات والمزات والمشروبات، ممكن تطلب أطباق رئيسية ساخنة بأسعار من 50 لـ 80 جنيه، إحنا جربنا مسخن الدجاج في العيش السوري بالبصل (58 جنيه) وكان لذيذ وبسيط في مكوناته وعجبنا شكل الطبق وطريقة التقديم، ومعاه بعض المقبلات زي العيش المحمص والزبدة (8 جنيه) وعصير برتقال فريش (22 جنيه) ومن الأكلات الحلوة هنا البيتزا والباستا والمزات الباردة زي الخضروات والسلاطات. وفي النهاية الفاتورة للفرد الواحد صعب تيجي أقل من 100 جنيه مع الخدمة والضريبة وخاصة أنك هـ تطلب أكثر من مرة لأن السهرات هناك بـ تبقى طويلة، ولو كنت عاوز تطلب أكل ومش حاجز مكان جلوس قول لأي حد من الجرسونات اليقظين جدًا وهو هـ يدبر لك مكان للجلوس والأكل. ممكن تيجي هنا لأسباب كثير لكن أهم سبب بالنسبة لنا كان العروض الموسيقية المميزة، اللي رغم ضيق المكان والزحمة اللي في الداخل إلا أن لها مذاق خاص مش شبه أي مكان ثاني في كايرو. كايرو جاز كلوب هو أيقونة سهرات المزيكا في القاهرة مافيش كلام.

...

After 8: الثقافة الشعبية كما ينبغى
اصدرت في: 04/02/2013

مشهد 1 (ليل خارجى)الليل وآخره والسهرة الجميلة والناس الحلوة.. واللمة والصحاب.. ضربة الدومينو.. واحد شاى خمسينة سكر بره الله يكرمك.. أصوات متداخلة.. همهمات كثير ما تقدرش تميز منها صوت محدد.. سحلب بالحليب.. واحد شاى بوسطة على مياه بيضا..مشهد 2 (ليل داخلى)لأ..لأ.. مش داخل بيت ولا حاجة.. زى معظم المشاهد الداخلية فى السينما، بس أنت ممكن تحس أنك بالفعل داخل بيت.. لكنه بيت مختلف مش زى أى بيت، أنت داخل After 8.. تعالوا نوصف لكم المشهد، أنت دلوقت ماشى فى وسط البلد بالضبط فى تقاطع قصر النيل من ناحية ميدان التحرير كده مع شارع شامبليون.. فى التقاطع ده هـ تلاقى ممر صغير.. عامل زى جحر أرنب أليس فى بلاد العجائب؛ وده لأن حضرتك أول ما هـ تدخل الممر هـ تلاقى حوائط قديمة جدًا وكراسى فى كل مكان وزحمة وناس قاعدة بـ تشرب شاى وقهوة ومحل ورد فى آخر القهوة وما تسألنيش ليه واشمعنى القهوة دى بالذات فيها محل ورد.. يمكن علشان ده واحد من ممرات وسط البلد الخفية اللى بـ تطلعك من مكان لمكان ثانى خالص واللى ما يعرفهوش إلا قدماء وسط البلد (زى ما بـ يقال عليهم المثقفين المخضرمين) أو يمكن دى تكملة أسطورة الثقافة الشعبية فى المقهى.مشهد 3 (نهار خارجى)لما تمشى قبل الساعة 8 مساءً ناحية After 8 أكيد مش هـ تشوف هناك أى حاجة غير شوية كراسى فوق بعضها.. عارف ليه؟ علشان هى دى فكرة المقهى أنه يبدأ يفتح الساعة 8 مساءً، أى نعم ساعات بـ يفتح قبل كده بساعة مثلًا يعنى على 7 مساءً لكن الأكيد أنه من الصعب جدًا تلاقيه فاتح الصبح.. وده راجع لفكرة السهرات اللى بـ يقدمها واللى هى أصل أسطورة الثقافة الشعبية فى After 8.مشهد أخير وطويل (يوم كامل)علشان تعيش يوم كامل فى After 8 فكده معناه أنك هـ تبدأ يومك تقريبًا من 8 مساءً زى ما عرفنا فى الأول هـ تقعد على قهوة عادية جدًا هـ تسمع فيها كل اللى قولناه قبل كده –راجع مشهد 1– ولكن مع الوقت هـ تبدأ تتسرسب لك بعض الكلمات زى السلطة.. الثقافة.. القراءة.. قرأت كتاب الواد الجديد اللى عامل نفسه شاعر.. أنا لسه مخلص النهارده الأعمال الكاملة لماركيز.. وساعتها هـ تعرف أن المثقفين بدأوا يأخذوا راحتهم فى المكان ويتكلموا. هناك مافيش مكان محدد للندوة.. هناك تقريبًا على كل ترابيزة ندوة مختلفة وشكل نقاشى مختلف.. هناك فيه ناس من كل صنف ولون يعنى هـ تلاقى العلمانى والمتطرف فى أفكاره واللادينى وشبيه المثقف (آه ده تعريف خاص للناس اللى حافظين شوية كلام وبـ يرددوه زى الببغاوات وهما مش فاهمين) عمومًا هـ تلاقى ناس كثير وأنواع مختلفة من البشر، أغلبهم بـ يقرأوا ويكتبوا وبـ يكونوا نواة مهمة لشباب كثير بـ يفضفضوا على القهوة وبـ يناقشوا مشاكلهم هناك.هناك مش قهوة عادية هناك بـ تلاقى برنامج غير معد من قبل كده.. يعنى ممكن تلاقى حد دخل بعود وبعد ما شرب الينسون قعد يغنى والناس من حوله بـ تسمعه.هناك ممكن تلاقى شاعر بـ يقول قصيدة لواحد صاحبه فـ ينفعل والناس تبدأ فى السكوت بالتتابع وكأن هناك عفريت مثقف بـ يلف عليهم واحد واحد يسكتهم.. علشان لما الشاعر ده يخلص قصيدته كلهم يصفقوا ويطلبوا منه ثانى فيقول بصدر منشرح لندوة لا كانت على البال ولا الخاطر.. وده طبعًا بـ يشجع جدًا حد ثانى بـ يكتب أنه يقول ويسمع الناس.. وثالث ورابع وتبقى سهرة لحد الفجر.. وده طبعًا شجع صاحب المقهى والفرق الجديدة أنها تقدم عروضها هناك.. خاصة الفرق اللى لها حاجة من رائحة التراث زى فرق النوبة مثلًا واللى بـ تقدم عروضها فى وقفة العيد هناك.. نصيحتنا جرب تقضى الوقفة هناك هـ تحس بشعور مختلف بجد.. وابقى قول لنا لما تزوره حسيت بإيه؟

...

الخيمة: استمتع برمضان فى الجيزة
اصدرت في: 07/08/2012

فى كل سنة بـ نشوف خيام رمضان بـ تزيد فى أنحاء المدينة علشان تحقق رغبة سكان القاهرة المستمرة أنهم يقضوا سهرة لطيفة. فجأة، بقت نكهات الشيشة المميزة، والموسيقى الشرقية الهادئة والوجبات الشرقية المعروفة اللى بـ تُقدم هي العلامات المميزة لأي مكان جديد، فكرة "مكان للخروج وخلاص place to be"" تحولت بسرعة إلى حاجة مختلفة خالص عن اللي نعرفه. وعلشان يتماشى مع العصر اختار منظم الحفلات "باى جانز" «واى لاونج –Y-Lounge » الموجود فى الجيزة علشان يقدم كل ده فى خيمة رمضانية اسمها "الخيمة". يمكن الموضوع له علاقة بالموقع (اللى دائمًا بـ يفكرنا أنه نادى ليلى موجود على مركب تريانون)، أو يمكن له علاقة بجو المكان اللى بـ يعمله باى جانز، لكن سهل قوى نقول أن الخيمة هى أقرب حاجة لنادى ليلى هـ تلاقيها فى رمضان، على الأقل قائمة الضيوف عند الباب وصلت لنا نفس الإحساس. الخيمة فيها قعدة فى الهواء الطلق وقعده داخل المكان. رغم أن القعدة فى الهواء الطلق بـ تطل على منظر تحفة على النيل، لكن صعب تقعد فيها علشان الجو بـ يبقى حر قوى. إحنا بـ نفضل نقعد جوه، المكان واسع والإضاءة مناسبة وكمان الأسقف عالية. ديكورات المكان بسيطة أغلبها مقاعد لونها أبيض ونجف مدور، والستائر شفافة مغطية الشبابيك، والحليات الأرابيسك ماشية مع الكنب بألوانها التركواز والبنفسجى. منيو الأكل لبنانى، بدأنا بجبنة بيضاء بالطماطم، وحمص، وجبن الحالومى وطعمية. سعر أى مقبلات باردة 18 جنيه، أما المقبلات الساخنة زى المقانق والعرايس فسعرها بين 30 و40 جنيه. قسم الرمضانيات فيه فول، وطعمية وبيض أسعاره تتراوح بين 10 و30 جنيه. كمان طلبنا عصير ليمون بالنعناع مع عصير كيوى، سعر المشروبات من 15 لـ 30 جنيه. إحنا جربنا جبنة بالطماطم أحلى مرات كثيرة، قوام الجبنة كان غير متماسك وده أثر على الطعم. طعم الحمص كان لذيذ مع ملمسه المتماسك، لكن كان يبقى أفضل لو فيه شوية ليمون أكثر عليه. جبن الحالومى كان طعمه حلو لكن الطعمية كان فيها بهارات زيادة شوية. على الناحية الثانية، طعم المقانق كان لذيذ فعلاً. وبـ يُقدم فى طبق صغير، قطع السجق الصغيرة كانت تحفة بطعمها المشطشط. وعرايس اللحم كمان كانت حلوة جدًا بسطحها المقرمش والحشو الطرى. كمان من الحاجات البارزة فى الوجبة عصير الكيوى الطازج، اللى فعلاً يروى العطش بطعمه المسكّر. الليمون بالنعناع برضه كان لذيذ، لكن محتاج كمية سكر أقل شوية علشان تحس بالطعم اللاذع. يوجد أيضًا اختيارات من مشروبات رمضانية سعرها 18 جنيه فـ قررنا نشرب سحلب، لكن للأسف جاء لنا إحباط أن السحلب كان خلص. الخيمة بـ تقدم اختيارات ثانية كثيرة فى المنيو زى طواجن الفتة أسعارها بين 30 و40 جنيه ومجموعة من الأطباق الرئيسية سعرها بين 50 و120 جنيه زى أطباق الميكس جريل وأطباق السى فوود. كمان الحلويات التقليدية زى أم على والأرز باللبن، والأسعار بـ تتراوح بين 20 و40 جنيه. المنيو كمان فيها اختيارات خفيفة، وصحية أكثر علشان تقدر تأكل وجبة خفيفة بالليل زى زبادى بالعسل وطبق فواكة. الخدمة المقدمة فى الخيمة بـ تتميز بالكفاءة واليقظة، وكمان المعاملة لطيفة واحترافية. بوجه عام التجربة كانت ممتعة، وعلشان كده المرة الجاية لو فكرنا فى مكان نشرب فيه شيشة (20: 25 جنيه) ونلعب طاولة، وكمان نستمتع بجو لطيف له إطلاله على النيل، يبقى أكيد هـ نروح على "الخيمة".

...

دليل كايرو 360 لخيام رمضان 2012
اصدرت في: 22/07/2012

فى وقت رمضان، القاهرة بـ تودع مؤقتًا شكل الحياة اللى إحنا متعودين عليها، علشان نستقبل سحر أجواء الأفطار والسحور. علشان كده، وزى كل سنة، كايرو 360 عملت لفة فى المدينة علشان تجيب لك أجمد الخيام الرمضانية اللى تقدر تستمتع فيها بسهرة حلوة وسط الناس مع أكلات شهية. باب النيل: فندق فيرمونت فى نايل سيتى جايب لك "باب النيل" فى التراس علشان تقضى رمضان جديد وممتع في الهواء الطلق. الخيمة بـ تقدم اختيارات متنوعة للأفطار والسحور، ومع الموقع المنعش والمنظر التحفة اللى بـ يطل عليه المكان، الخيمة دى أكيد على رأس قوائم الخيام اللى لازم تزورها. منيو الأفطار مقسم لأربع مجموعات أسعارهم بين 165-240 جنيه، و أربعة كمان للسحور أسعارهم بين 155-200 جنيه. للحجز اتصل بـ .02 2461 9494 رمضانا: لو حسّيت أن نفسك تطلع على خيمة في السريع، تقدر بمنتهى السهولة تروح على رمضانا، لأن فى "تماراى - Tamarai" قرروا أنهم يتخلوا عن سمعتهم كواحد من أشهر البارات فى القاهرة علشان ليالى رمضان. الخيمة موجودة فى التراس فى الهواء الطلق، المنظر وجو الليل المنعش حاجة تستحق أنك تجربها بنفسك. للحجز اتصل بـ 012 2456 6666. ع النيل: على النيل، وتحديدًا على مركب أمبريال الموجودة فى الزمالك، موجودة واحدة من أكثر الخيام المحبوبة على مدار السنين، ع النيل رجعت لنا من ثانى، وسمعنا أنها السنة دى عملت تجديدات. تقدر كمان تستمتع بمشاهدة أولمبياد لندن اللى هـ تُذاع فى رمضان. للحجز اتصل بـ 02 273 65796. تفاحة: خيمة فتحت جديد على مركب "بلو نايل" اسمها "تفاحة" بعد ما نقلوا من مكانهم القديم فى 33 شارع أبو الفدا السنة اللى فاتت، بـ يقدموا منيو السنه دى مليانة إضافات صيفية مدهشة على الأكلات الرمضانية المعتادة. وكمان تقدر تستمتع باختيارات كثير من بين نكهات الشيشة المختلفة. الحد الأدنى للطلبات فى أيام الأسبوع 75 جنيه، ماعدا أيام الويك إند بـ 150 جنيه. للحجز اتصل بـ 02 735 3114/2. رمضان فى سيكويا: بالاشتراك مع "إكليجو – Eklego" للتصميم، سيكويا بـ يرحب بشهر رمضان بتصميم للمكان مستوحى من شكل التنّورة. كمان لازم تشوف لبس الموظفين اللى صممته مصممة الأزياء المصرية أمينة خليل "Amina K". سعر بوفيه الأفطار للفرد الواحد 245 جنيه وكمان تقدر تطلب سحورك من منيو السحور بحد أدنى 150 جنيه. للحجز اتصل بـ 02 2735 0014. لو كابيتول: باب القاهرة الخيمة دى مكانها فى فندق نوفوتيل البرج، خيمة لو كابيتول: باب القاهرة كل هدفها أنها ترجّع تقاليدنا القديمة وتعرفّنا من جديد على روح رمضان الحقيقية. توّقع أنك تقعد فى جو القهوة المصرية مع الاستمتاع بأكلات مميزة وأنت بـ تتفرج على منظر تحفة للقاهرة. للحجز اتصل بـ 010 0010 4646. الخيمة: "باى جانز" بـ يشارك فى احتفالات رمضان السنه دى وجايب لنا خيمة على كورنيش الجيزة وتحديدًا فى واى لاونج. وباستعداد هائل فى المناسبات دى، المنيو بـ تقدم أطباق لبنانى حقيقية وعروض ترفيهية متميزة كل يوم جمعة. تقدر تختار من خمس مجموعات مختلفة فى منيو الأفطار أسعارهم بين 150 و250 جنيه. للحجز اتصل بـ 02 3659 2911. طاجين: للسنة السابعة رجعت لنا علشان تبهرنا أكثر وأكثر، خيمة طاجين الموجودة فى فيرست مول بـ تجمع بين الشكل الحديث والشكل التقليدي، وفى نفس الوقت بـ توفر جو مريح بـ يكمله منيو أكلات شرقى مع عروض ترفيهية حية. للحجز اتصل بـ 02 3569 2557. مشمشية: بعد النجاح الكبير اللى حققته السنة اللى فاتت، فندق فيرمونت هليوبوليس بـ يقدم لك خيمة مشمشية علشان تقدر تستمتع برمضان. الخيمة دى مختلفة شوية فى أنها فى مكان مقفول، ومكانها موجود فى قاعة الياسمين. لو تكلمنا عن التكييف، والأثاث الأنيق اللى على الموضة وكمان أنهم بـ يقدموا أكثر من عشرين نوع من نكهات الشيشة المختلفة، نقدر نقول أن دى من أكثر الخيام اللى منتظرينها فى رمضان 2012. للحجز اتصل بـ 02 267 7730/40. ذا تيراس: على مدخل القاهرة، ذا تيراس فى ديزاينوبوليس بـ يحتفل بشهر رمضان بشكل متميز، المطعم الأنيق بـ يقدم أكلاته الراقية فى صورة أكلات رمضانية تقليدية. للحجز اتصل بـ 02 38571935/02, 38571934/02, 3857 ,1936.

...

دليل القاهرة للسحور في رمضان 2011
اصدرت في: 08/08/2011

سواء لو كنت عايز تتسحر بدري أو متأخر، سواء لو كنت عايز جو احتفالي ولا هادئ، أو لو مش عارف تقرر أنت عايز تتفرج على مسلسلك المفضل لرمضان ولا تسمع أداء عزف عود حي في مكانٍ ما في القاهرة، هـ تلاقى حاجة بـ تقدم لك اللي أنت محتاجه. بُص على دليلنا لأماكن السحور وشوف هـ تروح فين النهارده. ماسبيرو خيمة باب النيل في فيرمونت نايل سيتي السنة دي بـ تقدم المطبخ السوري اللذيذ، «باب النيل» هي خيمة سحور لذيذة في فيرمونت نايل سيتي. الحد الأدنى للطلبات 130 جنيه طوال أيام الأسبوع، متوفر هناك الشيشة وألعاب القهوة زي الطاولة والدومينو والشطرنج. احجز من هنا. خيمة كشمير في تراس مركز التجارة العالمي مركز التجارة العالمي السنة دي أخذ إلهامه من الحكايات الخيالية العربية وبـ يقدم منيو خاص للسحور مليان بأكلات لذيذة. تقدر تقعد تأكل وأنت بـ تتفرج على مسلسلات وبرامج رمضان لغاية الساعة 2 صباحًا. الحد الأدنى للطلبات في وسط الأسبوع 75 جنيه للفرد، وفي أيام الويك إند بـ يزيد ويبقى 100 جنيه للفرد، خيمة «كشمير» بـ تقدم برضه منيو ثابت للأفطار في مطعم قريب بـ 135 جنيه/ 155 جنيه/ 175 جنيه. احجز من هنا. وسط البلد أرابيسك «أرابيسك» بـ يقدم منيو ثابت لذيذة جدًا للسحور بـ 100 جنيه للفرد. المكان ممكن يبقى زحمة هناك في أوقات مش متوقعة خالص؛ فالأحسن أنك تحجز من خلال تليفون 0225747898 علشان تبقى في السليم. الزمالك خيمة تفاحة الرمضانية جنب كوفي شوب كومباني بالضبط وعلى نسيم النيل، الخيمة الملهمة من الفواكة تعتبر مكان ممتاز للتمتع بسحور بدري أو متأخر. والقعدة تكمل بالشيشة الجاية من بيروت مع الحلويات من Home in Vienna اللي جنبهم وكوفي شوب كومباني، «تفاحة» بـ تفتح لغاية الساعة 3 صباحًا وممكن بعدها. الحد الأدنى للطلبات للسحور 75 جنيه في وسط الأسبوع، و150 جنيه في أيام الويك إند. احجز من هنا. خيمة ع النيل الرمضانية الخيمة الرمضانية المشهورة رجعت للسنة الثامنة على مركب إمبريال مع المأكولات اللبنانية، والشيشة المقدمة من كافيه ولعة، وعدد لا متناهي من الألعاب ووسائل الترفيه، من أول شاشات الـ LCD والبلاي ستيشن لغاية الدي جي. ع النيل بـ يفضل مفتوح لغاية ما أخر شخص يمشي، وبـ يقدم 2 منيو ثابت للسحور واحد بـ 100 جنيه والثاني بـ 130 جنيه، غير كمان عدد من اختيارات المنيو العادي. احجز هنا. كافيه مكس الكافيه اللي على الشارع بـ يزدحم من الساعة 8 مساءً بسكان الحي اللي عايزين الشيشية، العصائر، والمهلبية من المالكي. روح هناك بدري وإلا هـ تستنى ترابيزة بره لمدة ممكن توصل لنصف ساعة، واعمل حسابك دائمًا أنها هـ تبقى ليلة دوشة؛ خصوصًا وأنك قاعد في شارع 26 يوليو الزحمة والحيوي. لكن برضه، شيشة نكهة البطيخ، الألبان والميكسات الثانية اللذيذة بـ تخلّي المكان يستاهل أنك تروحه. للحجز اتصل بـ 0185362780. أجنحة بالنكهات - WIF by EE بعيد عن منيو الأفطار بتاعهم، «WIF» يـ يقدم اختيارات للسحور منها الثومية (14 جنيه)، الطحينة (14 جنيه)، والسمبوسك (25 جنيه)، غير كمان الفول بالطحينة بـ 18 جنيه، فلافل بـ 17 جنيه، والأومليت بـ 30 جنيه. عندهم كمان أم علي (25 جنيه)، وأرز باللبن (17 جنيه). للحجز اتصل على 0227365160. جاردن سيتي شيشاوي في فندق النيل كيمبينسكي لجو خاص وبجودة خدمة عالية وكمان أكل أحلى، جرب «شيشاوي» بيت شيشة الميدوسا. فيه بروجيكتور على الحائط وكمان عازف عود موجود هناك دائمًا وهـ يقدم لك أي حاجة أنت عايزها، أي حاجة ترفيهية أو ليلة من الموسيقى الشرقية التقليدية. منيو السحور الثابت سعره 130 جنيه. للحجز اتصلوا على 0227945834 المطبخ بـ يقفل الساعة 2 صباحًا. سي عمر في جراند نايل تاور استمتعوا بأكلات الشيف اللبناني في «سي عمر» مع منيو الطعام المبهر وأنتم بـ تسمعوا نغمات التخت الشرقي اليومي والدي جي. متوفر هناك اختيارات المنيو العادي للسحور بحد أدنى للطلبات 135 جنيه. ممكن تطلب رزمة كوتشينة أو لعبة طاولة وأنت بـ تستمتع برؤية ساحرة للنيل. للحجز اتصلوا على:0223651234 أو 0117707060. الدقي/المهندسين P75 وجه جديد في زحمة مطاعم القاهرة، «P75» بـ يتحول من مطعم إيطالي ومعرض بورش ويبقى نقطة تجمع أنيقة للسحور الساعة 10:30 مساءً كل ليلة، لمّا الشيشة بـ تنزل جواه والمنيو الثابت يبقى متوفر. استمتعوا بالمسلسلات الرمضانية طول الليل في المطعم المصمم من بورش. للحجز اتصلوا بـ 0120700075. الجيزة خيمة طاجن الرمضانية في فيرست مول في رمضان السنة دي، مطعم «لا جورمانديز» حول نفسه لـ خيمة السحور الشيك في نصف الدور الأرضي من فيرست مول. خيمة «طاجن» المعروفة بقعدتها المبهجة بـ تقدم منيو فاخر للسحور لغاية الساعة 3 صباحًا. الحد الأدنى للطلبات 75 جنيه، احجز من هنا. أورا في الفور سيزونز «أورا» بـ يقدم المأكولات اللبنانية اللذيذة في قعدات داخلية وخارجية بـ تطل على النيل. استمع للترفيه الحي وأنت بـ تستمتع بالمنيو الثابت بتاعهم بـ 180جنيه++ (غير شاملة الخدمة والضريبة) للفرد. للحجز اتصل على 0235671600. المنيل سكاي لاونج لرؤية ما تنسهاش أبدًا للنيل وقعدة أكثر من مريحة، استرخى في «سكاي لاونج» وأنت بـ تجرب الأطباق الموجودة في منيو السحور الثابت بتاعهم بـ 100 جنيه. في أيام الويك إند هـ تلاقي فرقة شرقية بـ تلعب هناك. للحجز اتصل على الخط الساخن لمطاعم نايل ليلي: 19412. المعادي كوبا كابانا «كوبا كابانا» المستخبي في منطقة هادئة وحولها أشجار في المعادي، بـ يقدم أفطار وسحور رمضان السنة دي، بوفيه الأفطار بـ 175 جنيه، والمنيو العادي للسحور. للحجز اتصل على: 0223783300. الشادر بالإضافة إلى أنه مفتوح طوال اليوم في رمضان (أو من أول الظهر علشان نبقى محددين)، الشادر بـ يقدم أفطار وسحور. تقدر تتوقع وقت جميل ومريح للأعصاب مع الفطير المعتاد، الميلك شيك، والشيشة، وبعض ألعاب القهوة والطاولة. توقع أنك ما تلاقيش مكان فيه واتصل بـ 0101210302 للحجز. مصر الجديدة فندق وأبراج فيرمونت هليوبوليس الفندق السنة دي عامل «الخيمة الرمضانية مشمشية» وبـ يقدم 3 منيو ثابتين للسحور بـ 140 جنيه/ 180 جنيه/ 210 جنيه. أغلى واحد فيهم بـ يقدم ميكس جريل وكمان شاورمة، والأرخص فيهم عبارة عن تشكيلة من المَزة الباردة والساخنة. من ضمن أماكن الأكل المتعددة في الفندق: بيتزا بار وليالي مصرية هما بس المفتوحين لغاية السحور؛ توقع أنهم يقفلوا في حدود الساعة 2:30 صباحًا. "أكوا أي لوس" و"الدبكة" بـ يقفلوا في منتصف الليل. للحجز في أي مكان للأكل في فيرمونت اتصل على 16989.

...

موون ديك: سهرة نيلية حزينة
اصدرت في: 20/05/2011

موجود على ظهر واحدة من أشهر مراكب الزمالك وهي « Blue Nile Boat »، ومن هناك كمان هـ تقدر تشوف منظر أفقي رائع لمباني وسط البلد وأنوارها، والأهم هو نسيم النيل العليل اللي هـ تشمه طول ما انت قاعد، والمكان كله منوَّر كويس قوي. كل دي عوامل جذب لمكان زي «موون ديك – Moon Deck »، بس إحنا هـ نتكلم عن ملاحظتنا اللي ممكن تكون مش في صالح المكان ده. في وقت زيارتنا للمكان إتقال لنا ان ماينفعش نقعد على ترابيزات معينة مميزة أو نقعد على أطراف المركب في ترابيزات كبيرة عشان كنا رايحين مجموعة صغيرة، فـ قعدنا على ترابيزة صغيرة جداً في وسط المكان، وإعتقدنا أن ده هـ يكون سبب في أن طلباتنا تيجي أسرع، بس اللي حصل إننا طلبنا المنيو أكتر من مرة وفي الآخر جالنا نسخة واحدة من منيو الأكلات بس، وإستنينا شوية كتير تاني عشان يجيلنا منيو المشروبات اللي كان الكلام ممسوح منه في خانات كتير وبقينا مش عارفين نقراه. مشكلة تانية أن مش كل اللي مكتوب في المنيو موجود فعلاً، وبعد ما إتأكدنا من الويتر أيه اللي موجود بالظبط، طلبنا ميكس جريل (99 جنيه) كان فيه كفتة وكباب وفراخ وحمام وقطع لحم بتلو. طلبنا كمان وحدات من "سوشي نيجيري" بالسلمون والتونة" سعر القطعة 10 جنيه، ومنقوشة بالجبنة الحلوم بـ 30 جنيه. المشويات على الجريل كانت ظريفة بس ناقصة شوية تتبيلة، وبردت قدامنا على طول عشان المكان مفتوح والهواء شديد. النيجيري كان كويس بس كان محتاج نكهة الزنجبيل تكتر شوية عشان تغطي نكهة سمك السلمون الشديدة، وصوص الواسابي (صوص ياباني حار من الفجل والكابوتشا والمسطردة) كان قليل برضه. المنقوشة كانت أحلى حاجة ومليانة جبنة مبشورة ومقرمشة من الأطراف ومتقطعة زي البيتزا شرايح سهلة للنقنقة مع المشروبات.

...

بانوراما القاهرة الليلية
اصدرت في: 12/05/2011

جربت قبل كدة تطلع هضبة المقطم؟ وتقف على الكورنيش بتاعه اللي بـ يبص على القاهرة من فوق؟ لو جربت يبقى أي حاجة هـ نقولها هنا ممكن ما تبقاش جديدة عليك، بس ممكن تلاقي حاجات ماخطرش في بالك تعملها هناك. اللي ماراحش قبل كده هـ نوضحله أكتر من طريقة يروح بيها، المقطم له أكتر من طلعة لو معاك عربية، أشهرها من طريق صلاح سالم من قدام القلعة ومسجد محمد علي، تاني أشهر طلعة اللي من على كوبري الأتوستراد اللي رايح من المعادي لمدينة نصر، وممكن من محور الشهيد اللي تحت الطريق الدائري بتاع القطامية وده بـ يطلعك على آخر شارع 9 الشارع الرئيسي في حي المقطم عند مساكن الزلزال، وممكن من الطريق الدائري نفسه اللي في المعادي وتنزل بعد محطة بنزين «وطنية» يمين هـ تلاقي طريق حلزوني يطلعك فوق هضبة المقطم على طول. لو هـ تروح بمواصلات ممكن تركب ميكروباص من موقف السيدة عائشة القريب من منطقة القلعة والخليفة، وده بـ ينزلك عند مساكن الزلزال برضه ومن هناك ممكن تتمشى للكورنيش أو تركب حاجة لمسافة قصيرة. فيه مواصلات كمان من موقف الحي السابع في مدينة نصر وده بـ ينزلك في ميدان اسمه المفارق في وسط شارع 9، وأقرب شوية للكورنيش. كلمة "طالعين المقطم" مرتبطة في دماغ الناس بحاجات للأسف مش ظريفة، بس اللي ناس كتير ما تعرفوش ان المكان ممكن يبقى مكان سهرة عائلية أو شبابية ظريفة و"محترمة" والأهم من ده كله أنها مش مكلفة. هـ توصل للكورنيش هـ تلاقي الدنيا ضلمة شوية عشان الإعتماد كله على عواميد النور اللي في الشوارع والفيلات المحيطة ولو القمر طالع الليلة دي النور هـ يكون أحسن، الكورنيش عبارة عن منحدر جبلي متدرج ممكن تقف على حافته بالعربية أو على رجليك وتشوف أروع منظر للقاهرة بالليل! الأضواء مبهرة ومن فوق وهـ تقدر تميز الشوارع والطرق العملاقة زي طريق صلاح سالم والأتوستراد والطريق الدائري، وعلى اليمين هـ تشوف القلعة وآثار إسلامية كتيروفي الوسط هـ تشوف برج القاهرة ومباني ميدان التحرير، وعلى الشمال المعادي وأبراجها، وبالنهار ممكن تشوف أهرامات الجيزة كمان. فيه أماكن ممكن توصلها بالعربية وتقعد ببلاش وفيه أماكن بـ يبقى ليها مستأجرين بـ يسمحولك تدخل مقابل أنك تطلب مشاريب أو شيشة، وممكن تدفع أي مبلغ رمزي مقابل أنك تقعد ربع ساعة وتمشي لو مش عايز تطلب حاجة، بس كدة كدة الأسعار بسيطة جداً، يعني الفرد مش هـ يدفع أكتر من 5 لـ 10 جنيه لو طلب مشروب وشيشة مثلاً. وميزة الأماكن اللي بـ فلوس دي أنها بـ تبقى منورة شوية وأمان أكتر، عشان المكان كله هادي بزيادة وممكن الواحد يحس بالخطر لو لقى نفسه في حتة ضلمة لواحده. أجمل حاجة عربيات حمص الشام اللي بـ تلاقيها كل نا تمشي مسافة 50 متر على الكورنيش، الجو طبعاً بـ يبقى برد فوق حتى لو معتدل في وسط المدينة، وممكن تقعد جوة كافية من المنتشرين بطول الكورنيش زي «السندباد» و«مكسيم» و«بانوراما العمدة» اللي بـ يعملوا ساندوتشات وبيتزا ووجبات خفيفة ومشروبات سخنة وباردة، وفيه أكشاك كتير ممكن تجيب منها حاجة ساقعة أو مقرمشات، المهم أنك ماتنساش تتحرك شمال شوية بطول الكورنيش بعيد عن منطقة الجلوس دي وتتفرج على القصور والفيلات اللي في الشوارع الجانبية، وتشوف قد أيه معمارها عبقري والإضاءة المسلطة عليها جميلة، ده غير أن القصور مالهاش شبه في أي مكان تاني في مصر، وإحنا مش عارفين مين أصحابها طبعاً، بس الأمن هناك مش هـ يمنعك من الفرجة يعني. بالمناسبة فيه كورنيش تاني للمقطم بـ يسموه الكورنيش الجديد وده عشان توصله لازم تخرج تاني لشارع 9 وتدخل يمين من بعد محطة بنزين «التعاون» اللي لونها أزرق هـ تلاقي الكورنيش ده وهو فاضي أكتر من الكورنيش الأولاني والمنظر من فوق مش حلو أو البانوراما مش كبيرة زي الكورنيش الأصلي، بس بـ ننصحك تلقي نظرة برضه على القصور والمشاتل اللي هناك. إنك تشوف القاهرة من مكان بالإرتفاع ده وبالهدوء ده وبالفلوس القليلة دي، نفتكر أن الموضوع يستاهل، ورغم الظلام المريب، لكن هـ تحس بالأمان لما تلاقي ناس كتير حواليك بـ يتعاملوا بـ تلقائية وبـ يجروا ورا بعض في الجبل وبـ يشيشوا وبـ يضحكوا بصوت عالي، بس مفيش مانع تبقى واخد إحتياطاتك الأمنية أو تروح مع شلة كبيرة "فيها رجالة"، ونوعدك أنك هـ تقضي سهرة سعيدة.

...

جونيز: صالة كاريوكي في القاهرة
اصدرت في: 20/04/2011

مطعم وصالة «ﭼـونيز» في الزمالك مش محتاجة خطط ولا لبس معين عشان تقرر تروحها، بسيطة وظريفة وجوها حلو. موجودة في مدخل مركب «لو باشا 1901»، المكان عبارة عن المساحة المحيطة بالبار المدوَّر اللي في وسط القاعة وفيه ترابيزات في الأطراف تكفي مجموعات كبيرة أوصغيرة من الناس، والإضاءة ملونة ودافية وفيها حيوية. «ﭼـونيز» يعتبر المكان المفضل لقاهريين كتير من اللي بـ يحبوا السهر، خصوصاً مع مشروباته المميزة والأكلات والمزَّات اللي شبه الموجودة في المطاعم اللي في «لو باشا»، والمنيو المليان بمشروبات كتيرة فخمة ومستوردة وبأسعار معقولة. المزَّات معظمها واخد الطابع الشرقي بس فيه كمان أطباق عالمية، بس إحنا بـ نرشحلك الأطباق الشرقية أكتر زي الحمص والتبولة والسلاطات الشرقية مع العيش البلدي. المكان مشهور بليلة الأحد أو ليلة الكاريوكي، مسموح لأي حد أنه يشارك بالغناء، أو ياخد الميكروفون ويغلِّس على صاحبه اللي بـ يغني بالعربي أو بالإنجليزي، حتى لو ماعندكش الشجاعة أنك تقف على المسرح وتغني قدام الناس، هـ تنبسط من الجو كله وهـ تضحك من قلبك. جو المكان بسيط وغير رسمي ودافي، وواخد من جو المنطقة اللي هو فيها، وهو بـ يفتح الساعة 1 الظهر لو حابب تروح بدري قبل الزحمة. معظم رواد المكان أعمارهم من 20 لـ30 سنة، والمزيكا اللي بـ تتلعب في الكاريوكي دايماً متنوعة ومش شبه بعضها، ودي إحنا شايفنه حاجة كويسة. ممكن الناس تتجمع على ترابيزة صغيرة أو ممكن يفضلوا أنهم يقفوا في وسط الـ«Dance Floor» أو ساحة الرقص. الترابيزات اللي ورا واطية شوية وكراسيها ليها مساند مريحة بس بـ تديك منظر بانورامي للمكان. «ﭼـونيز» مثالي لخروجة في وسط الأسبوع خاصة مع موضوع الكاريوكي يوم الأحد، وممكن تاخد فيه وجبة خفيفة انت أو أصحابك، ومنيو المشروبات هايل. الدخان ممكن يبقى كتير شوية جوة، فـ تقدر تطلع تشم هواء نقي برة على سطح المركب وأنت بـ تتفرج على منظر النيل. الدنيا جوة بـ تبقى دوشة ومزيكا عالية ومليان حيوية بس مش الزحمة الفظيعة اللي تخليك مش قادر تتحرك، بس ساعات بـ يتزحم قوي يوم الخميس بالليل او في الويك إند عموماً، اللي الحد الأدنى للطلبات فيها الـ«Minimum Charge» بـ يكون 150 جنيه.

...

شاهد المزيد
مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول