إيطالي مطاعم in Cairo, Egypt

مطاعم

لا سكالا: المطعم الإيطالي المعروف في الجونة وصل أركان مول القاهرة
اصدرت في: 11/08/2016

تشكيلة متنوعة رائعة من المطابخ العالمية تشمل اليوناني والمكسيكي والسويسري والإيطالي شوفناهم وأكلناهم وحبيناهم في الجونة اللي تعتبر من أهم الأماكن عند الأكيلة المحترفين. طبعًا لما سمعنا إن المطعم الإيطالي وخبير البيتزا "لا سكالا-La Scala" قرر يفتح فرع جديد بعد فرع الجونة وتحديدًا في أركان مول الشيخ زايد، كان لازم نزوره فورًا. نتكلم الأول عن المكان نفسه، الديكورات بسيطة مسيطر عليها اللون الأسود والأبيض والأحمر، مع كراسي وترابيزات ومكانين لتحضير الأكل، وصور بالأبيض والأسود مع أجواء المكان الهادئة. صحيح الجو جوه المطعم كان حر نار والتكييف ماكانش شغال، الجو في الآوت دور كان تحفة – يمكن المشكلة الوحيدة كانت في جيش الناموس المزعج. بدأنا طلعتنا الجوية مع إنسالتا تروبيكال Insalata Tropicale (40 جنيه)، عبارة عن مكعبات جبنة جودة وفراخ وأناناس وخوخ وبرتقال وموز وكوكتيل صوص، وطعم الأخير تحديدًا كان يشبه الزبادي. المكونات لما تشوفها أكيد هتقول يا سلام على الجمال، لكن الطعم ماكانش ماشي مع بعضه وكأنك حطيت الجبنة الجودة والفراخ بالغلط في طبق فروت سلاط. بعدها دخلنا على طبق إيطالي صرف وهو سباجيتي كون فيتيلّو Spaghetti Con Vitello (195 جنيه) مع طبق لا كاربونارا La Carbonara (89 جنيه) والاثنين كانوا هايلين. الطبق الأول كان خمس قطع لحم بتلو مدورين محطوطين على السباجيتي المستوي كويس ومعاهم كمية مشروم سوتيه طازة كبيرة. طعم صوص المشروم الجميل أضاف قوة للأكل، وكان ممكن الطبق يستاهل الدرجة النهائية لو كانوا ضبطوا تتبيلة اللحمة. سيبك من طعم حلقات الفلفل الأحمر وطعمها السيئ والبيكون المتقطع شرائح كبيرة جدًا، السباجيتي في لا كاربونارا كان مستوي صح على بعضه طعمه هايل، وقوام الصوص كان هايل. خلصت تجربتنا في لا سكالا بواحدة نوتيلا بيتزا بالموز (27 جنيه). الطبق ده لو بيثبت حاجة فهي إن الشوكولاتة والموز ثنائي مهدور حقه في المطبخ المصري، وده كان واضح في عجينة البيتزا الطرية الرفيعة الغرقانة نوتيلا وقطع الموز اللذيذة. على العموم، قضينا وقت ممتع في لا سكالا واستمتعنا بالأكل اللذيذ والخدمة الممتازة. أكيد دي بداية مبشرة للمطعم في القاهرة، ونتمنى إنهم يستمروا على مستواهم لأن هو ده التحدي الأصعب.

...

إل لوفت: مطعم إيطالي بسيط هايل في أركان مول
اصدرت في: 17/05/2016

أعتقد كلنا متفقين أن المطبخ الإيطالي هو صانع السعادة لكل عشاقه؛ بيتزا، باستا، ريزوتو وأصناف عيش مميزة، ما طبيعي الناس تقع في غرامه؟ المطاعم الإيطالي في القاهرة بتزيد يوم بعد يوم، ومعانا النهارده واحد من المنافسين الجدد على الساحة وهو "إل لوفت-Il Loft"، المطعم المشهور باستخدامه لمكونات أكل مستوردة. ديكورات إل لوفت في أركان مول الشيخ زايد واخدة الستايل الصناعي مع تصميمات ريفية أكيد هتشد انتباهك. الأجواء هناك روعة في كل حاجة من الإضاءة المعلقة لفرن البيتزا والحيطان المكونة من قوالب الطوب، لحاجات صغيرة زي النشابات وقوالب الجبنة. نبعد بس شوية عن الكراسي الغير جذابة ونركز مع الأجواء الإيطالية اللي تجمع بين الفخامة والبساطة. أما القعدة الآوت دوور فأكيد مكان هايل لأكلة صباحية خصوصًا وإحنا داخلين على فصل الصيف. وسط جولتنا الاستكشافية مع المنيو وصل الجرسون ومعاه عيش إيطالي وطبق صغير فيه جبنة بارميزان مبشورة وعليها رشة زيت زيتون وخل بلسمي ترحيب من المكان. طبعًا الكلام ده مياكلش مع كل الناس، خصوصًا اللي ملهمش في الحاجات اللي تجمع بين الطعم المسكر واللاذع والمملح في نفس الوقت، بس عمومًا طعمه كان لطيف جدًا. نروح للمقبلات اللي طلبنا منها Parmigiana Di Melanzane (59 جنيه) – وهو طبق يجمع بين طبقات الباذنجان اللذيذ مع جبنة بارميزان وبافالو موتزاريلا سايحين، وعليهم صلصة طماطم جميلة وريحان طازة. الباذنجان قدر يمتص كل النكهات الجميلة دي، بس المشكلة إن الطبقة الأخيرة كانت محروقة شوية وطعمها مُر. نسيب المقبلات ونطلع على أول أطباقنا وهو Costoletta Di Vitello Alla Milanese (95 جنيه) – عبارة عن شريحة لحم بتلو على الطريقة الميلانية، ومعاها مكعبات بطاطس بالثوم مقلية روعة، أما قطعة اللحم فعليها جرجير طازج وطماطم وشرائح جبنة. طبعًا الأصول بتقول إننا مايصحش نروح مطعم إيطالي ومانطلبش بيتزا، وعلشان كده طلبنا بيتزا فونجي (55 جنيه). لازم نقوم احترامًا للعجينة الرائعة، خصوصًا مع الأطراف المنفوخة وقلب البيتزا اللذيذ. الإضافات كمان كانت هايلة، خصوصًا أن تتبيلة الصلصة كانت ممتازة مع كمية كبيرة من المشروم الطازة والموتزاريلا الإيطالي fior di latte mozzarella. خلصت الحكاية مع طبق إيطالي أصيل وهو التيراميسو (42 جنيه). التيراميسو بيتقدم في كأس على شكل حرف V وهو عبارة عن جبنة الماسكربوني الدسمة جدًا، مع كمية سكر مناسبة وبسكويتladyfinger منقوع في القهوة. النتيجة للأسف كانت طبق متواضع جدًا، ومفيش توازن بين كمية الماسكربوني والبسكويت. الأكيد في الموضوع أن طعم المكونات لوحدها كان خرافي بعيدًا عن التركيبة نفسها. على العموم، زيارتنا لمطعم إل لوفت كانت هايلة لحد كبير. الأجواء كانت مميزة والخدمة رائعة مفيش كلام، بس في أخطاء بسيطة لا تغتفر في طريقة تحضير الأكل أثرت على تقييمنا للمكان.

...

كورتيجيانو: هل لسه من أجمد المطاعم الإيطالية في القاهرة؟
اصدرت في: 27/04/2016

يعتبر "كورتيجيانو Cortigiano" اللي تأسس سنة 1993 واحد من رواد المطبخ الإيطالي في القاهرة. صحيح في أماكن ثانية بتقدم أكلات إيطالي أصلية، لكنهم قدروا بالمنيو المتنوعة والأطباق الإيطالي الهايلة يحافظوا على مكانتهم عند الناس ويوفروا مكان لخروجة رومانسية أو عائلية أو لأصحاب عايزين يتجمعوا. كورتيجيانو قدر يحافظ على أجواءه الإيطالي البسيطة خلال السنين اللي فاتت في كل فروعه، من الحوائط المعمولة بقوالب الطوب وأدوات الأكل المعدنية والإضاءة الخافتة والأجواء المريحة – وفرع هليوبوليس هو أكبر شاهد على كلامنا. بعد ما اتفرجنا على المنيو، طلبنا من قسم المقبلات طبق سالمون أفوميكاتو إي جامبيري Salmone Affumicato E Gamberi (83.93 جنيه) – وهو عبارة عن سالمون مدخن مع قطع خس وشرائح طماطم وجمبري مسلوق وعليهم صوص شريمب كوكتيل. التركيبة على بعضها كانت مبهرة وطعمها هايل، بس كمية الصوص كانت طاغية على طعم كل حاجة حتى الجمبري. بعدها وصلت الأطباق الرئيسية وهي سكالوبيني كوردون بلو (89.95 جنيه) وكاسارولا كورتيجيانو (95.95 جنيه). الكوردون بلو عبارة عن قطعتين ستيك متغطيين بجبنة موتزاريلا وطماطم، ومحشيين جبنة ومشروم وروست بيف، والحقيقة أنهم كانوا مقليين كويس والجبن والمشروم كانوا هايلين. الطبق بشكل عام كان لطيف، بس محتاج تتبيلة تعمل نكهة مختلفة، والروست بيف ماكانش له وجود والخضار السوتيه متقطع وحش وكمان مش مستوي كويس. الطبق الثاني للأسف كان أسوأ. المفروض أن كاسارولا كورتيجيانو عبارة عن مكعبات من اللحم البتلو والضاني في المرقة وعليهم جبنة موتزاريلا. طبعًا الكلام جميل على الورق، بس المشكلة إن رغم كمية الأكل الكبيرة وتسوية الأكل الهايلة، بس الطعم ماكانش مميز خالص والأكل في الأخر أصبح ممل جدًا. اخترنا للتحلية آبل تارت (41.95 جنيه)، وهي عبارة عن فطيرة محشية قطع تفاح بالقرفة ومعاها بولة آيس كريم فانيليا. كنا متوقعين إن التارت يكون ساخن، بس للأسف طلع بارد وواضح من طعمه أنه مش طازة. روحنا كورتيجيانو كثير قبل كده، وكان بيعجبنا، المفروض أنك بتروح هناك وأنت مطمئن، بس هل نقدر نقول أن كورتيجيانو لسه واحد من أجمد المطاعم الإيطالي في القاهرة؟ لو الإجابة هتكون بناءً على الزيارة دي، أكيد هنقول لأ.

...

باستا سيتا: مطعم إيطالي قدر يدهشنا في الشيخ زايد
اصدرت في: 27/03/2016

ويست تاون هب من ساعة ما ظهر على الساحة وأصبح من أهم الأماكن اللي بتقدم تنوع مطاعم كبير في منطقة الشيخ زايد و6 أكتوبر عمومًا، بس ويست تاون أكيد مش المكان الوحيد في بيفرلي هيلز اللي بيقدم مطاعم حلوة، قدر باستا سيتا - Pasta Città الموجود في قلب The Walk في بيفرلي هيلز أنه يعمل شعبية كبيرة والسبب مكونات أكلهم اللي بيعملوها بنفسهم. باستا سيتا مطعم بسيط عنده قعدة أوت دوور فيها كراسي وترابيزات معدن، أما المطعم نفسه فتصميمه بسيط بنشوف فيه المواسير ظاهرة على الحوائط والإضاءة متعلقة على ارتفاع قريب. صحيح باستا سيتا بيقولوا أنهم مطعم إيطالي، لكن المنيو الكبيرة لها رأي ثاني، وهتلاقي فيها أطباق كثيرة مش إيطالي، عندك مثلاً أطباق سويسري منها كوردون بلو فراخ، وبيف ستروجانوف صاحب الأصول الروسية، وكمان كانتري فرايد تشيكن من أمريكا، وأخيرًا قسم خاص للفطائر، عمومًا المنيو فيها أصناف إيطالي زي الباستا والبيتزا والريزوتو وغيرهم. من بين مجموعة كبيرة من الأطباق قررنا نمشي على كلامهم ونطلب أكلات إيطالي منها بيتزا فراخ (45 جنيه) وباستا بنّا ألفريدو (55 جنيه)، ومعاهم طبق مقبلّات تشكين كريسبرز (35 جنيه). نتكلم الأول عن طبق المقبلات المكون من خمس قطع صدور فراخ مقرمشة طرية طعمها لذيذ، والطعم كان أحلى وأحلى لما غمسناه في صوص المسطردة بالعسل بطعمه الحلو واللاذع في نفس الوقت. أول حاجة وصلت كانت البيتزا بالفراخ –اللي طلبناها بجبنة زيادة وعجينة سميكة– وطعم الإضافات اللي عليها كان ماشي مع بعضه ومتوازن، طعم الفراخ المشوية كان روعة، أما الإضافات الثانية زي الطماطم ومعاها المشروم والزيتون فقدروا يسيبوا نكهة رائعة حتى بعد الأكل. نتكلم بعدها عن الألفريدو باستا بطعمها اللذيذ والمكرونة الفريش وخلطة الفراخ والمشروم بتتبيلتها الروعة وكمان صوص الألفريدو الأبيض المميز، والحقيقة أننا عمرنا ما نشبع منها. كان لازم نشرب حاجة نبلّع بها الأكل، فطلبنا What a Beautiful Dayبـ (25 جنيه) عبارة عن كوكتيل برتقال وليمون وجوافة وعسل معLife is Beautiful بـ (28 جنيه) عبارة عن كوكتيل فواكة من التفاح والخوخ والمانجو والفراولة. لما وصلنا للحلو، الجرسون طلب يختار طبق على ذوقه وإحنا وافقنا بدون تردد، الجرسون بعدها طلع على المطبخ، وبعد دقائق قليلة رجع ومعاه أطباقنا. نبدأ مع أول طبق وهو وافل بالشوكولاتة البلجيكي وعليه صوص شوكولاتة (35 جنيه)، وفعلاً الوافل كانت بيتي ومعمولة فريش وصوص الشوكولاتة الخفيف أضاف نكهة رائعة. طبقنا الثاني كان أوريو مادنيس (30 جنيه) عبارة عن قطع أوريو مطحونة عاملة ساندويتش ووسطه آيس كريم فانيليا وصوص توت أحمر لاذع، والحقيقة أنه كان مزيج هايل بين الطعم المسكّر واللاذع. آخر حاجة قبل ما نودعهم كانت من قسم المشروبات الساخنة وهي هوت شوكليت (25 جنيه)، طعم الهوت شوكليت كان حلو والشوكولاتة الذايبة كانت لذيذة وطعمه المسكّر الجميل بيفضل موجود حتى بعد ما خلصناه؛ نهاية ولا أروع ليوم لطيف. صحيح في الأول كنا خايفين شوية من المنيو الملخبطة، لكن الخدمة مع جودة الأكل كانوا روعة وباستا سيتا أكيد يستحق يكون منافس قوي للمطاعم المعروفة، أكيد هـ نرجع لهم في زيارة ثانية قريب.

...

بيبنيرو: مطعم إيطالي رائع في الكوربة
اصدرت في: 20/03/2016

المطبخ الإيطالي من المطابخ اللي إحنا مستعدين ناكل منها كل يوم من غير ما نزهق، ونعتقد أن فيه ناس كثير ممكن تتفق معانا في الرأي ده؛ لأنها من المطابخ المحببة لنا كمصريين بشكل عام، واللي أشهر أطباقها –الباستا- تسللت لقائمة الأكل في أي بيت، ولكن بالرغم من أن المطاعم الإيطالية منتشرة في القاهرة، إلا أن قليل ما بنخرج منها وإحنا حاسين برضا كامل عن التجربة، مطعم بيبينيرو – Pepenero في شارع بغداد في الكوربة أثبت أن لسه فيه مطاعم تخرج منها وأنت مقرر أنك لازم ترجع ثاني. في عمارة مخبز فينوس في شارع بغداد، بيبينيرو واخذ شقة في الدور الأول، المكان ديكوراته بتتميز بالبساطة ولكن من غير إهمال للتفاصيل؛ حوائط بيضاء وترابيزات خشبية كراسيها مبطنة بقماش منقوش أحمر وأبيض، إضاءة هادئة من مجموعة وحدات إضاءة جانبية مبتكرة، مواسير معدنية بطول الحائط خارج منها لمبات محفوظة في برطمانات، أما المنطقة الخارجية فكانت أحلى منطقة خارجية ممكن يتقعد فيها؛ لأنها بلكونة بتطل على شوارع الكوربة. وقت زيارتنا المطعم كان شبه خالي إلا من ترابيزة عليها فردين، قعدنا وأخذنا جولة في المنيو اللي مكتوب باللغتين الإيطالية والإنجليزية، كنا محتارين نختار إيه لأن المنيو فيه مجموعة كبيرة من الاختيارات؛ من أول الباستا والبيتزا والريزوتو وأطباق اللحوم والفراخ، في النهاية طلبنا ريزوتو دي ماري – Risotto Di Mare بـ (120 جنيه)، وطبق كوتوليتا آلا ميلانيزي Cotoletta Alla Milanese بـ (125 جنيه). بعد ما طلبنا نزل على الترابيزة سلة عيش مقطع شرائح وطبق جبنة نعتقد أنها كانت بارميزان وطبق فيه قطعتين بروشيتا (طماطم فريش مقطعة مكعبات صغيرة على شرائح عيش محمص) واللي كانوا أحلى بداية للوجبة، الأكل ما أخذش وقت وحالاً الأطباق الرئيسية كانت على الترابيزة؛ الريزوتو اللي فيه مجموعة كبيرة من فواكة البحر (كاليماري – جمبري – بلح البحر – قطع سمك قاروص) كان معمول بالصوص الأحمر، بالرغم من أن الريزوتو من الاختيارات الخطر في مطاعم كثير –وخصوصًا لو بالمأكولات البحرية- لأن مش أي حد بيضبط قوامه ومش دائمًا بتكون فواكة البحر طازجة، إلا أننا نقدر نقول أن بيبينيرو بيقدم ريزوتو مضبوط، الأرز متماسك من غير ما يفقد طراوته، ده غير أن مجموعة فواكة البحر كانت طازجة ووفيرة ومناسبة لحجم الطبق اللي كان كبير. الطبق الأخير كان عبارة عن قطعتين سكالوب متوسطين مقليين مع باستا بيني بالصوص الأبيض، السكالوب كان تسويته من بره وجوه مضبوطة وطبقة الـ breading (الطبقة المقرمشة) كان لونها ذهبي ومقرمشة وغير دهنية، اللي كان جديد بالنسبة لنا هو نكهة الليمون اللي مضافة للسكالوب ونعترف أن الإضافة المنعشة دي جددت من طبق معتاد بالنسبة لنا، الباستا كانت ممتازة كطبق جانبي مع السكالوب والصوص الأبيض كان كريمي. بالرغم من أن كمية الأكل كانت ممتازة، إلا أننا قررنا نأخذ واحد كابتشينو (28 جنيه) وطبق بانا كوتا Panna Cotta بالتوت البري (60 جنيه)، صحيح بنحب فوم الكابتشينو متماسك أكثر من كده، إلا أن القهوة كان طعمها رائع، مافيهاش مرارة ونسبتها مضبوطة مع كمية اللبن لدرجة أننا استمتعنا به بنسبة سكر قليلة جدًا، البانا كوتا كانت حلو خفيف بعد الوليمة، ولكن تمنينا أن نسبة الصوص والتوت تكون أكبر من كده لأن كان فيه مرحلة كنا بناكل البانا كوتا سادة. إجمالًا، التجربة أكثر من رائعة، من أول الأكل وحتى الخدمة السريعة والممتازة، القائمين على الخدمة منتبهين ومش هتضطر أنك تقعد تدور عليهم لأنهم عارفين هم بيعملوا إيه.. لازم تروحوه.

...

بيلا: المطبخ الإيطالي في أبهى صوره في فور سيزونز نايل بلازا
اصدرت في: 18/01/2016

نتكلم عن المكرونات الإيطالي الأصلي؟ ولا نحكي لكم عن الاختيارات المغرية المخصوصة من أطباق الأسماك واللحوم؟ خلينا نتكلم شوية عن المطعم الإيطالي الشيك "بيلا - Bella" في فور سيزونز نايل بلازا اللي بـ يقدم لكم فرصة الاستمتاع بنكهات مميزة من إقليم توسكان. المطعم نفسه يتميز بشكل راقي وديكورات في منتهى الشياكة بمجموعة من اللوحات الجميلة، وطبعًا لازم نذكر المطبخ المفتوح هناك. بدأنا اليوم مع المقبلات الرائعة واختارنا طبق سلامون كارباتشيو Salmon Carpaccio بـ (140 جنيه)، مع الأطباق الرئيسية ثعبان بحر فرنBaked Sea Bass بـ (240 جنيه) وجمبري مشوي جامبو Roasted Jumbo Prawns بـ (400 جنيه) ومعاهم ريزوتو بالكُرات. نقدر نحكم على نجاح طبق الكارباتشيو الإيطالي من حاجتين بصفته طبق معتمد على لحم نيء؛ هل المكونات طازجة ولا لأ ومهارة الشيف في التقطيع، السلامون كان مقطع شرائح رفيعة وعليه فلفل حلو، ويتميز بنكهة الثوم القوية اللي تفاعلت بشكل ممتاز مع الطعم المزز للبرتقال والدريسنج، نقدر نقول بكل ثقة أنه كان طبق مقبلات هايل بـ يوعدنا بأطباق رئيسية شديدة. ثعبان البحر ومعاه جمبري وبطاطس وشمر وفلفل حلو وزيتون ومخلل كلهم مستويين تمام كان طري جدًا، وصحيح قوامه كان هش بس قدر يحافظ على تماسكه وكمان الجلد عمل نكهة مميزة من التتبيلة، خليط مكعبات البطاطس والشمر مع الطعم المسكّر للفلفل الحلو وطعم المخلل والزيتون الحراق عملوا طبق خارق للطبيعة كل مكوناته روعة، بس فيه حاجة واحدة مالهاش لزوم شوية وهي الجمبري. ما حسيناش بتأنيب ضمير من الطبق الثاني وهو الجمبري المشوي الجامبو بالرغم من طريقة تقديم الطبق، الحقيقة أن الطبق كان هو نجم اليوم والفضل يرجع للنكهات الخرافية، صوص البيسك الدسم مع طعم الجمبري كانوا هايلين، بس الريزوتو بالكُرات سرق الأضواء منهم بقوامه الدسم الممتاز وطعمه اللذيذ، فعلًا طبق صعب ننساه. خلصّنا أكلتنا بكاسّاتا آيس كريم وبسكويت جراتانCassata Ice Cream with Savoiardi Meringue Gratin بـ (80 جنيه) وده عبارة عن كيك آيس كريم إيطالي، طبق الحلو بـ يتكون من طبقة من البسكويت الإيطالي وعليها ثلاث طبقات من آيس كريم الفستق والفانيليا والشوكولاتة متغطيين بميرينجي ساخن، ونقدر نقول عنه أن شكله روعة وطعمه ممتاز خصوصًا مع إضافة التوت ومربى البرتقال المرة اللي أضافوا نكهة قوية. عمومًا، صعب نشتكي من حاجة في زيارتنا لبيلّا، الأجواء كانت متوازنة بين الفخامة والراحة، والأكل كان من عالم ثاني، وطبعًا لازم في النهاية نشكر فريق العمل المحترف اللطيف.

...

فرناندوز: المطبخ الإيطالي دايمًا يكسب في إسكندرية
اصدرت في: 14/01/2016

لاشك أن معظم الشعب المصري بـ يتفق على حاجة وهو حبه للمطبخ الإيطالي، فتقريبًا معظمنا إن ما كانش كلنا بـ نحب البيتزا بأنواعها المختلفة والمكرونة وغيرها من الأكل الإيطالي المعروف، وده أكيد اللي بـ يشجع معظم أصحاب المطاعم الجديدة أنهم يتجهوا للأكل الإيطالي علشان يجذبوا أكبر عدد من الزوار. مع افتتاح مطعم إيطالي جديد اسمه "فرناندوز – Fernandos" في شارع فؤاد في إسكندرية مع بداية 2016 -تحديدًا يوم 7 يناير- قررنا أننا نجربه، بالذات لما لقينا إقبال كبير من السكندريين عليه. كان أول سؤال اتسألناه لما رحنا إذا كانت دي أول زيارة لنا ونحب نقعد في مكان المدخنين ولا غير المدخنين، اختارنا الأخير اللى مكانه في الدور العلوى، انطباعنا الأول عن المكان أنه مختلف في تصميمه، كل الحوائط محطوط عليها رسومات لأشهر الأماكن في إيطاليا زي برج بيزا المائل والمدرج الروماني (الكولوسيوم) وغيرها، وأكيد ده علشان يعيش زوار الكافيه في الجو الإيطالي، بـ يغلب الخشب على الديكورات في الترابيزات والكراسي، والأعمدة معمولة على شكل الطوب الأحمر. في الدور اللي تحت موجود في النصف مجموعة من الترابيزات الصغيرة والكراسي الخشب وعلى الجوانب الكنب الجلد اللي ظهره معمول بالخشب وفوقهم الإضاءات اللي نازلة من السقف، بس إحنا كنا شايفين أنها قريبة زيادة عن اللزوم من اللي قاعدين، وفيه ركن عاملينه لجوه شوية في الدور اللي تحت فيه ترابيزات وكراسي فرفورجيه أبيض وزجاج ملون على حائط من الركن، نعتقد أنها مخصصة للعائلات أو للمجموعات الكبيرة. الدور العلوى بـ تطلعه عن طريق سلم خشب معمول من الجوانب بالزجاج، فوق بقى عاملين ستايل مختلف، حاطين ترابيزات من البلاستيك الجامد على شكل مرجيحة، وبرضه فيه مجموعة ترابيزات صغيرة من الخشب، ده بجانب أنهم عاملين فوق ركن للأطفال علشان يلعبوا فيه، بالإضافة لزرع أخضر صناعي معلق على معظم حوائط الكافيه. طبعًا إحنا قعدنا على الكراسي المرجيحة وجابوا لنا المنيو على طول.. أسماء الأطباق مكتوبة بالإيطالي مع الإنجليزي بس وصف الأكلات نفسها كاتبينه بالإنجليزي والعربي، عندهم المقبلات مختلفة زي شرايح السلامون المدخن، الجمبري مع كاليماري، بروسكيتا الطماطم، بلح البحر بالتوابل الإيطالية، وحاجات ثانية بـ تبدأ أسعارهم من 15: 78 جنيه، وجزء الشوربات زي شوربة الفراخ، الصياد، مينسترون بـ تتراوح أسعارها من 14: 37 جنيه. في السلاطات موجود سيزر بالجمبري أو بالفراخ، سلاطة المشروم، تفاح مع الكرفس ودي أسعارها من 25: 48 جنيه، أما الأطباق الرئيسية زي أطباق الباستا منها اللازانيا وفيتوتشيني وسباجيتي اللي معمولين بطرق مختلفة وأسعارهم بـ تبدأ من 30: 58 جنيه، وأطباق البيتزا اللي بالجمبري والفراج واللحوم والسلامون والخضار والجبن أسعارها من 27: 60 جنيه، بالإضافة لأطباق الأرز واللحوم والفراخ والأسماك والساندويتشات اللي بـ تتراوح أسعارها من 29: 85 جنيه، وطبعًا ما نسيوش في المنيو أنهم يعملوا جزء لوجبات الأطفال اللي فيها وجبات زي الهوت دوج والبرجر والناجتس والباستا والبيتزا أسعارها من 20: 28 جنيه. ولأننا كنا محتارين فساعدتنا واحدة من الجرسونات واقترحت أننا ناخد باستا بالجمبري أو بالفراخ، فأخذنا طبق فيتوتشيني بالجمبري (58 جنيه) وهو عبارة عن كمية معقولة من الباستا الفيتوتشيني معمولة بالصوص الأبيض ومعاها جمبري، على الرغم من أننا طلبنا الجمبري مع الجرجير لكن جابوه بقطع الخرشوف اللي ما كانتش كثيرة بالنسبة لكمية الباستا، وطلبنا كمان طبق فيتوتشيني بقطع الفراخ (37 جنيه) برضه بالصوص الأبيض وكانت كمية قطع الفراخ كويسة معاه، لكن المشكلة أن الملح كان قليل في الباستا واضطرينا نزود شوية ملح، لكن الأكل ما اتأخرش خالص علينا يعني أقل من ربع ساعة بعد ما طلبنا. طبعًا ما كانش ينفع نفوت أطباق الحلويات من غير ما نذوقها، ولقينا في المنيو تارت وبراونيز وأوريو وكريب وتيرامسيو اللي بـ تتراوح أسعارهم من 20: 31 جنيه، فـ طلبنا أوريو مادنيس (29 جنيه) اللي كان معمول بشكل مختلف، كانوا حاطين جنب الأوريو والآيس كريم وحدات أوريو تحتها كريمة بندق ومعاها صوص شوكولاتة سايحة، كمان منيو المشروبات عندهم كبير، سواء مشروبات سخنة أو ساقعة واللي أسعارها بـ تبدأ من 9: 29 جنيه، فاقترحت البنت علينا أننا نجرب عصير الرمان (17 جنيه) اللي جابوه في شفشق صغير ومعاه كوباية فاضية فـ كانت كميته كبيرة وطعمه مضبوط. على الرغم أن أسعار "فرناندوز" أغلى من مطاعم ثانية في نفس المستوى، إلا أننا أكيد هـ نروح ثاني علشان نذوق أطباق ثانية، خاصة مع الخدمة اللطيفة والديكور الجميل.

...

باستا كورنر: مكان لعشاق المكرونة وبس في شيراتون مدينة نصر
اصدرت في: 24/12/2015

عشق المكرونة مالوش زي في كل مكان في الدنيا، صحيح الأكلة دي إيطالية وطبعًا طعمها في إيطاليا أحلى من مصر مليون مرة، لكن في الجو ده بالذات مافيش أجمل من طبق مكرونة سخن البخار طالع منه وريحته تدخل البهجة عليك وتدفيك وتبهجك، وده اللي لاقيناه في "باستا كورنر - Pasta corner". باستا كورنر واخد جزء من محل الساندويتشات المعروف "ميجا – Mega"، وبـ يقدم مكرونة بس، أيوة زي ما قلنا مكرونة فقط، المنيو عبارة عن ورقة صغيرة فيها ثلاث خطوات: أول خطوة تختار نوع المكرونة: سباجتي، فيتوتشيني، بنا، ريجاتا، وثاني خطوة تختار نوع الصوص: أحمر ولا أبيض ولا حراق، وثالث خطوة هي الإضافات: ما بين جمبري وتونة ودجاج ولحم سواء مفروم أو قطع صغيرة، أو خضروات، أو جبنة بأنواعها كل حاجة لها سعرها. طلبنا مكرونة سباجيتي بكرات اللحم الصغيرة مع صوص أحمر وجبنة فلامنك (30 جنيه)، وطعمها كان حلو جدًا، خاصة أن الصوص اللي معمول به مش بس بالطماطم، هو كان بالطماطم والكريمة، فكان غني وسخن، كمان طلبنا مكرونة بالجمبري والمشروم والبروكلي والصوص الأبيض (34 جنيه)، صحيح الصوص كان خفيف شوية، والبروكلي كان نيء، بس كانت معقولة، مش تحفة بس مش سيئة، لكن أكثر حاجة لفتت نظرنا أنها بـ تتطلب كثير هناك، ومن شكلها واضح أن طعمها يجنن هي باستا تشيكن ألفريدو واللي بـ تتعمل بمكرونة فيتوتشيني وصوص أبيض مع قطع فراخ، ننصحكم تجربوها أكيد. كان نفسنا المنيو يبقى أكبر من كده ويبقى فيه أصناف ثانية ممتعة أو حلويات، بس للأسف هم متخصصين في المكرونة بس، ولو حبيتم تشربوا حاجة مع الأكل بـ تطلبوه من ميجا الشركة الشريكة لهم وبـ تضاف كأنها من عندهم. بصفة عامة باستا كورنر مكان لطيف لأكلة سريعة غنية وسخنة وكبيرة، من باب التغير.

...

كورتيجيانو: مطعم مش إيطالي أصلي في سيتي ستارز
اصدرت في: 16/12/2015

مهما تعدي السنين هـ يفضل سيتي ستارز من الأماكن المفضلة بالنسبة لنا، بسبب أنه بـ يضم كل حاجة في أي حاجة من أول التسوق "سواء كان ملابس، إلكترونيات أو كتب" للسينما، وأهم حاجة موجودة هناك هي طبعًا الأكل ثم الأكل ثم الأكل، اللي كان موجود في اثنين فود كورت وأخيرًا وصل في الدور الرابع مع أكثر من مكان. بعد حيرة كبيرة وشوية نقاشات جربنا الديموقراطية ما نفعتش قولنا نجرب الحظ، والحظ اختار لنا "كورتيجيانو -Cortigiano " اللي ما كناش جربناه قبل كده في سيتي ستارز. هـ يلفت نظركم من بعيد مكان أغلب الديكور بتاعه خشبي ويافطة كبيرة عليها لوجو وكلمة Cortigiano، الانطباع العام عنه أنه مطبخ إيطالي، وده اللي كان منعكس على الترابيزات والكراسي والمنيو البسيطة المنسقة اللي بالإيطالي والعربي بس، أول ما قعدنا قدموا لنا الخبز بالثوم والزعتر المشهور لكن لوحده كده من غير الـdipping المشهور بتاعه، الطعم كان ظريف وكويس. بعد شوية بحث وتفصيص وأسئلة في المنيو الظريفة، اختارنا من المقبلاتCocktail Di Gamberi كوكتيل جمبري (76.95 جنيه) المفروض أن الطبق مكونه الرئيسي الجمبري لكنه جاء لنا "سبحان الله" حاجة غريبة شبه الجمبري وصغيرة و"سبحان الله ثاني" قريبة من طعم الجمبري، الصوص اللي بـ ييجي مع الكوكتيل بـ يكون صوص كوكتيل، لكن الصدمة أنه كان كاتشب ومايونيز ولما سألناهم قالوا لنا: "أيوة إيه المشكلة يعني"، جاء لنا مدير الفرع وحاول يعتذر ويجيب طبق ثاني مختلف لكن إحنا رفضنا. من السلاطات اختارنا Insalata Santa Maria حجم صغير (30.95 جنيه) لكن طلع حجمها كبير عبارة عن كمية كبيرة من الجبنة الجودة والخس و6 قطع خيار و5 قطع طماطم وجمبرياية يتيمة ومعاها صوص طعمه في الغالب مايونيز، كانت عادية مافيش تميز ولا شامين ريحة الإيطالي في أي حاجة. طلبنا من قسم الشوربات شوربة الفراخ بالكريمة (15.95 جنيه) كانت ظريفة، قوام مضبوط وطعم كويس ولغاية دلوقت دي أفضل حاجة، أما من الباستا اختارنا نجرسكو (47.95 جنيه) وكانت عبارة عن مكرونةPenna بالصوص الأبيض اللي كان مالح وقوامه سايب (تقدروا تقولوا معمول بسرعة وبكروتة) وقطع الفراخ والمشروم قليلة لدرجة أنها بـ تقابلكم كل فين وفين زي رادار الصحراوي مع كمية جبنة موتزاريلا على الوش لكن مش مفهومة هي محروقة ولا إيه نظامها، الكمية كانت كبيرة تكفي شخصين. كمان طلبنا 2 بيتزا: واحدة فونجي (47.95 جنيه) وبيتزا سوسيس (47.95 جنيه) الاثنين اشتركوا في مكونات مجمدة وعجينة رفيعة لما بردت شوية بقيت عبارة عن بقسماط ناشف مع جبنة موتزاريلا عادية وطعم زعتر خفيف كده. للأسف كانت تجربة قفيلة، اتقفلنا من المكان ومن جودة الأكل والسمعة اللي واخدها المكان والأسعار المبالغ فيها اللي تقدر بنصفها تعمل أكثر من صنف في البيت وبجودة أحسن بكثير، خلينا نتفق أن المكان ممكن يكون فيه أصناف كويسة لكنه أبعد ما يكون عن الإيطالي بالمقارنة مع أماكن ثانية، حد من أصدقائنا قال لنا أن في الغالب المطاعم بداخل المولات بـ تبقى أقل جودة من اللى بره (نظرية تستحق الدراسة). بعد ما مرينا باليوم الظريف ده اللي أهم حاجة فيه كانت اللمة والصحبة الحلوة، حد من أصدقائنا بعت لصفحة المطعم على الفيسبوك شكوى باللي شوفناه هناك، على غير المعتاد من أغلب المطاعم تواصلوا معاه بسرعة وعرضوا يعوضونا بعزومة ثانية في الفرع اللي نختاره، بصراحة الكاتب مش ناوي يروح وعاوز يضرب سوشي، مين جاي؟

...

باني فينو: المطبخ الإيطالي الأنيق في مطعم إنتركونتيننتال سميراميس
اصدرت في: 08/12/2015

من أهم الأماكن عند أكيلة القاهرة الراقيين هو فندق إنتركونتيننتال سميراميس في جاردن سيتي، وبعد تفكير في مطعم يجمع بين إطلالة حلوة على العاصمة مع أطباق لذيذة، قررنا نطلع على المطعم الإيطالي "باني فينو - Pane Vino" الموجود في الفندق. الدور الموجود فيه باني فينو هـ تلاقي فيه مطعمين ثانيين، واحد منهم هو بيرد كيدج – Bird Cage الحاصل على جائزة اختيارات محرري كايرو 360 لسنة 2015، وباني فينو (ترجمته الحرفية الخبز والنبيذ) أكيد هـ يلفت انتباهك بشكله المودرن الأنيق وإطلالته الرائعة على النيل وبرج القاهرة ودار الأوبرا المصرية ومعالم ثانية مميزة. بعد ما وصل واجب الترحيب اللذيذ من المطعم المكوّن من معجون زيتون وباتون ساليه وميني بيتزا –معمولة من عجينة رفيعة ومقرمشة– بدأنا المغامرة مع عصير رمّان فريش منعش ومميز بطعمه المسكّر الطبيعي. منيو باني فينو عامرة بالأطباق الإيطالي المتنوعة، من أول البيتزا (65: 125 جنيه) واللازانيا (90 جنيه) لغاية أطباق إيطالي أصلية زي الكاتوليتا آلّا ميلانيز Catoletta alla Milanese بـ (160 جنيه) –وهو طبق شهير في ميلان عبارة عن لحم بقري مقلي– وطبق أوسّو بوكو Osso Buco بـ (200 جنيه) وده عبارة عن قطع لحم بقري مع أرز ريزوتو بالزعفران. في النهاية استقرينا على تارتار دي سلامون Tartare di Salmone بـ (85 جنيه) مع فيتوتشيني ألفريدو كون بولّو إي فونجي Fettucine Alfredo Con Pollo e Funghi بـ (90 جنيه) وتالياتا دي مانزو كون ريكولا إي جرانا Tagliata di manzo con ruccola e grana بـ (180 جنيه)، أطباق باني فينو المميزة من اللحم البقري ومعاها بطاطس فرن. طبق التارتار دي سلامون كان معمول بشكل ستيك سلامون حقيقي وعليه تفاح وشبت وبصل أخضر وأبيض، والحقيقة أن الاختلاف بين الطعم الحادق والمسكّر للتفاح والليمون كان ممتع، وكمان قطع السلامون كانت طازجة بس البصل كان طاغي شوية على الطعم. أما التالياتا فكانت على فرش من الجرجير ومرشوش عليها خل بلسمي، وتتميز بنكهتها اللذيذة وقوامها الطري، بس الحقيقة أن معظم الفضل يرجع لشرائح الجبن الرفيعة جرانا بادانو Grana Padano بملحها الوسط، وهي واحدة من أحلى الجبن في إيطاليا. الطبق الأقوى بدون منازع هو الفيتوتشيني ألفريدو اللي كان خفيف وغني بالصوص الأبيض والمشروم الطازج والفراخ الطرية بتتبيلتها الرائعة، وأكيد طبعًا الباستا اللذيذة المطبوخة زي الكتاب ما بـ يقول. لما وصلنا لوقت الحلو، انتقلنا لترابيزة أصغر في تراس باني فينو الكبير، بحيث نستمتع بالنسمات المنعشة وإحنا بـ نتفرج على منظر النيل الرائع. اختارنا من بين عدد من الحلويات اللذيذة كاسّاتا Cassataبـ (65 جنيه) وهو آيس كريم من نابولي ومعاه فواكة مجففة من جنوب إيطاليا وتارت باللوز (65 جنيه) وهو برضه واحد من أطباق باني فينو المخصوصة. الكاساتا ومعاها صوص فاكهة أحمر كانت غنية بطعم الفاكهة المميز وفيها نكهة الفانيليا المميزة، وفعلاً طعمها كان تحفة، أما تارت اللوز فكان ضعيف لو قارناه مع الكاسّاتا، وكان عبارة عن طبقة من الشوكولاتة واضح أنها مش فريش، وده كان سبب إضافي في مستوى الطبق المتواضع. ياما اشتكينا من مطاعم القاهرة اللي مش فاهمة يعني إيه أكل إيطالي بجد، وصحيح مش هـ تقدر تروح باني فينو باستمرار، أصل خلينا نتكلم بصراحة، الأسعار مولّعة وده شيء طبيعي، بس لما يكون عندك مناسبة خاصة، باني فينو بدون تفكير أكيد اختيار مثالي.

...

شاهد المزيد
مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح