مكتبات تسوق in Cairo, Egypt

تسوق

سمير وعلي: أكبر سلسلة مكتبات في مصر
اصدرت في: 21/06/2015

مافيش أكثر من المكتبات في مصر، في كل شارع وحارة هـ تلاقي المكتبات التقليدية فاتحة أبوابها، بس أول ما تيجي سيرة الجودة، والمنتجات المتنوعة وتحتاج لحاجات مش عند أي حد، فجأة تلاقي الاختيارات محدودة، نقدر نقول أن أشهر مكتبة في مصر هي "سمير وعلي – Samir & Ali". مكان الفرع على شارع شريف في وسط البلد، ومقسوم لدورين مساحتهم كبيرة ده غير مكانين على جانبي مكتبة "ألوان"، سمير وعلي بعرض أكبر بكثير من أي مكتبة ثانية في مصر بـ يوفر كل المطلوب من أول مستلزمات المدارس لغاية المكاتب وقسم فني كبير هـ تلاقي فيه أنواع مختلفة من أقلام التلوين، لوحات رسم، سكيتشات، أقلام وحتى حوامل اللوحات هـ تشوف عندهم مجموعة منهم، السكيتشات متوفرة بأحجام مختلفة منها A4، A3 وA5. لما تمسك الورق هـ تحس أنه فعلاً غني جدًا، فيه حائط كامل هناك مخصص لعلب الألوان، منها علبة فيها 12 لون سعرها 53.55 جنيه. طقم ألوان جواش 18 لون سعرها 46 جنيه ومعاها زجاجة مثبّت تمسح بها على اللوحة بعد ما تخلصها كان سعرها 14.95 جنيه. لو حصل وخلص منك لون معين، سمير وعلي عنده أنابيب ألوان أكريليك 200 ملل سعرها 23.90 جنيه، فيه كمان أحجام ثانية متوفرة. في شباك العرض كان معروض مجموعة أدوات مكتب هدية شكلها شيك تشمل حامل أقلام خشبي جميل لمكتبك؛ كمان حامل الأوراق والمفكرات معمولين من نفس الخشب المهوجني مع مجموعة كبيرة من الأباجورات، أرخص واحدة فيهم كان سعرها 50.89 جنيه، لغاية واحدة محمولة أشيك سعرها 159 جنيه. الأسعار هنا في سمير وعلي غالية شوية، بس الموضوع بـ ينعكس على الجودة وشهرة المنتج، زي فيبر كاسل، يوني بول، باركر فابريانو وأوفيس. افتتح أول فروع سمير وعلي سنة 1969 عن طريق سمير المعايرجي وعلي شحاتة، وبسرعة وصلوا لأربعة فروع في أوائل الثمانينات بفضل فكرهم التجاري القوي اللي وصلهم أنهم يكونوا من المكتبات الرائدة في مصر.

...

الكتب خان: لسه أجمل مكتبة في المعادي
اصدرت في: 18/04/2015

بعد ما فاتت 8 سنين قدرت تحافظ فيها على مكانتها كأجمد مكتبة في المعادي من حيث الأجواء الدافئة والمكان المريح، دلوقت "الكتب خان Al Kotob Khan -" عملت شغل هائل بعد ما راحت لمكان أكبر في فرع دجلة الجديد، على عكس فرعها القديم في شارع اللاسلكي، الفرع الجديد للكتب الخاب بـ يوفر مساحة كبيرة للكتب والقراء. المكان عبارة عن فيلا دورين ببلكونة مساحتها معقولة فيها عدد من الترابيزات والكراسي. الدورين معروض فيهم كتب واصلة من الأرض لغاية السقف، مع قعدات جنب أرفف الكتب، وقت ما كنا هناك، أغلب القعدات كان عليها طلبة شافوا في الكتب خان مكان مثالي للمذاكرة. نكرر من ثاني، الفرع ده أكبر من القديم بكثير، ومن هنا ظهرت ميزة كبيرة وهي وجود عدد أكبر ومتنوع من الكتب؛ كل حاجة من الروايات الكلاسيكية والمعاصرة، لغاية الكتب التاريخية والتعليمية، تقدر كمان تلاقي كتب بلغات مختلفة لو حبيت تطور من لغاتك. التنوع ده يعتبر جنّة لعشاق القراءة؛ الفكرة أنك لو أول مرة تروح هناك، كمية الكتب الكبيرة دي ممكن تعمل لك شوية ارتباك. في الدور الأول جنب مكتب الكاشير هـ تلاقي بار للفاست فوود بمنيو تشمل كل أنواع السناكس والمشروبات من القهوة، والمشروبات الغازية، والمافينز والشوكليت كيك، لغاية ساندويتشات بانيني ومقرمشات. وزي ما بـ نشوف في كل المكتبات الحديثة، بـ يعرضوا كمان هناك أدوات مكتبية للبيع؛ حائط كامل في الدور الثاني عليه مفكرات مطبوعة ويدوية بألوان ومقاسات مختلفة. من السهل تفهم ليه الكتب خان تعتبر مأوى عشاق الكتب؛ الأجواء المريحة والمجموعة الضخمة من الكتب المعروضة بـ تضيف لها مزايا زيادة عن باقي المكتبات الشهيرة في مصر، بس تحذير هام، هام جدًا جدًا، بعد زيارة واحدة للكتب خان، الموضوع بقى إدمان خلاص ومالكش علاج، سواء كنت عاوز تشتري كتب، تذاكر أو حتى تضرب قهوة سريعة مع أصحابك.

...

لينرت & لاندروك: مكتبة، وجاليري، ودار نشر وكنز مستخبي في وسط البلد
اصدرت في: 14/04/2015

الحقيقة أن "لينرت & لاندروك - Lehnert & Landrock" يعتبر كنز ثمين مستخبي كويس وسط محلات شارع شريف باشا في وسط البلد، بتاريخه العريق من وقت افتتاحه سنة 1936، اسم المحل جاء من أسماء أصحابه، وهم اثنين أصدقاء من مواليد بوهيميا وساكسون، واللي نجاحهم الحقيقي بدأ في تونس سنة 1904. رودولف فرانز لينرت وإرنست هينريك لاندروك كانوا في الأصل مصورين فوتوغرافيا، كٌتَّاب ومسافرين، وبعد سنين من السفر، وصلوا القاهرة وفيها فتحوا محل بـ يعبر عن كل هواياتهم: التصوير، والفن وكتب عن السفر والثقافة. على مدار السنين، المحل قدر يحافظ على شكله تقريبًا، يمكن مع شوية بضاعة وقطع فنية زيادة، وتحديدًا مصنوعات يدوية في صورة منسوجات ممكن تشوفها على الأرض. متوسط تكلفة الشنط هناك 110 جنيه، مع أساور خياطة بسيطة سعرها يبدأ من 10 جنيه. عندك كمان لوحات متعلقة على الحوائط بـ توضح قدر كبير من الصبر والشغل، معروضات ثانية من الخزف موجودة في الدور الثاني على شكل كوبايات، وزجاجات، وأطباق وسلطانيات، ومعظمهم عليه أشكال أو لمسات مصرية. أغلب الكتب الموجودة هناك إنجليزي، وفيه شوية منهم ألماني، وفرنساوي وعربي ممكن تلاقيهم تحت عناوين تخص السفر والثقافة، الأسعار هناك عالية شوية، تبدأ من حوالي 100 جنيه للكتاب، بس كلها عناوين لسه جديدة طازة. ده مش مجرد محل تشتري منه حاجات، يعتبر كمان جاليري نوعًا ما، وفيه قطع يدوية تاريخية من صنع الأستاذين، الفنانين والكتَّاب أصحاب المكان، منها كاميرا من صندوق خشب ومجموعة من الصور القديمة، وكلهم معروضين في كابينة زجاجية كبيرة. دول يعتبروا معرض في حد ذاتهم. معروضات ملونة مبتكرة بـ تملأ الأرفف، وتقريبًا معظم الحاجات بـ تدور حول الثقافة المصرية من الكتب على الأرفف للوحات المتعلقة على الحوائط. أسعار كثير من المعروضات عند لينرت & لاندروك تبان غالية شوية، لكن في نفس الوقت تعتبر مناسبة جدًا لو عملت حسابك أنك مش بـ تشتري حاجة عادية، أنت بـ تشتري قطعة فنية. أكيد المكتبة تعتبر مكان مثالي للهدايا الصغيرة والكبيرة، خصوصًا أنها مليانة إكسسوارات زي قواعد كوبايات، هدايا للكريسماس منحوتة من الخشب، علامات كتب، بطاقات تهنئة، مفكرات، مغناطيس للثلاجات ونتائج، لينرت & لاندروك من المحلات اللي ممكن تلف فيها شوية حلوين.

...

دار الشروق: سلسلة المكتبات المحبوبة وصلت كايرو فيستيفال سيتي مول
اصدرت في: 10/04/2015

أعتقد أن رأي الناس في عدد مولات القاهرة المتزايدة يوم بعد يوم بـ يختلف، والسبب أن المحلات والكافيهات بـ يسيطروا عليهم، لكن الأكيد من الصعب أنك تلاقي مكتبة منظمة وسط المولات الزحمة، ومن هنا كانت مفاجئة هائلة أننا نلاقي أجدد فروع دار الشروق في المول المتوسِّع بـ شكل مستمر كايرو فيستيفال سيتي. مع شعارهم الشهير باللون الأخضر الغامق، سهل تلاقي مكان الدار. المكان إضائته قوية بأرفف مرتبة كويس بـ تسهّل الفرجة على الكتب المعروضة. على اليمين، شوفنا عرض "أكثر الكتب مبيعًا" وفيه عناوين كتب شبابية معروفة منها If I Stay بـ (88 جنيه)، مع كتب من الكلاسيكيات المحبوبة زي Animal Farm بـ (80 جنيه) وكمان كتب تنمية بشرية منها كتب شهيرة زي الرجال من المريخ، النساء من الزهرة Men Are from Mars, Women Are from Venus بـ (105 جنيه). جنبهم على طول معروض أكثر الكتب العربية مبيعًا بأعمال حديثة زي يوتوبيا (25 جنيه) مع أعمال نجيب محفوظ الرائعة منوّرة العرض. كل أرفف العرض مترتبة بوضوح وكل قسم فيهم بـ يضم نوع معين من الكتب ومكتوب عليه التصنيف: أدب، أدب مترجم، سياسة، تاريخ، أطفال، شباب، كتابات إسلامية، مصريات، تجارة وتنمية بشرية كانت أبرز الأقسام هناك، وكمان - وقت زيارتنا - قسم "أحدث الإصدارات" كان بـ يقدم عدد من الإصدارات الصحفية الجديدة، منها أجدد كتب أحمد العسيلي "نص كتاب" بسعر 28 جنيه. جنب الكاشير على طول معروض 'Thinking Gift' ملفتة للانتباه، وتنفع كهدية مبتكرة لمحبي الكتب. مفكرات وستيكي نوتس على شكل دوناتس، ساندويتشات وقواعد تواليت (48 جنيه)، حامل كتب قوي (234 جنيه)، أباجورات قراءة (130 جنيه) وعلامات كتب معدنية بأشكال قطط وكلاب (60 جنيه) كانت من ضمن الحاجات اللي لفتت انتباهنا. الموظفين سابونا نتفرج براحتنا من غير مقاطعة، لكن أول ما كنا بـ نستفسر عن سعر أو وجود حاجة معينة، بـ يجاوبوا بكل تعاون. تلخيص الحكاية، أحدث فروع دار الشروق يعتبر إضافة ممتازة لمشهد التسوق في القاهرة الجديدة، واللي بـ يغلب عليه ماركات الملابس العالمية والمطاعم الكبيرة. مساحة المحل الصغيرة وتنظيم المعروضات الهائل قدر يقدم تجربة تسوق سريعة ومريحة من غير تضييع ساعات وسط الأرفف. طبعًا مش معنى كلامي أنك مش ممكن تقعد بالساعات هناك تائه وسط الكتب ورائحتها الأخاذة، ده لو كان لك في النوع ده من التسوق طبعًا.

...

مكتبة بيتا: مكتبة رائعة لكتب الأطفال والفن والتاريخ في المعادي
اصدرت في: 31/03/2015

شارع 9 اللي معروف بمحلات الأكل الجميلة والكافيهات المبهجة، فرحنا لما شفنا فيه مكتبة تحت Lido, Antie Loulou واللي بقى لها سنين كثيرة بـ تمتعنا بكتبها. أول ما بـ تدخل المكتبة، بـ تجذبك ألوان كتب الأطفال، وتنوعها الشديد في مكتبة بيتا – Beta في المعادي، عندهم كل أنواع اللعب التعليمية سواء فى كتب التلوين أو بكروت التعليم اللي برضه ملونة وشكلها تحفة، أو بكتب تعليم الكتابة المبسطة. عجبنا كتاب تعليم الحروف والأرقام للأطفال، كان مبسط جدًا وكبير اسمه Lesson plan Book وكان بـ 80 جنيه، كمان كان فيه مجموعة كتب تلوين متنوعة جدًا، لشخصيات كرتونية جديدة ومختلفة، منها كتاب Angelina Ballerina بـ 50 جنيه. أسعار كتب التلوين عامة بـ تبدأ من 25 جنيه لـ 60 جنيه. كمان هـ تلاقوا مجموعة متميزة جدًا من كتب تعليم الطبخ، واللي تتميز بأن حجمها كبير جدًا، زي المجلدات بس أقل شوية حوالي 150 صفحة، وفي كل أنواع المطابخ الهندية والشرق الأوسط والأكل الصحي سواء للأطفال أو للكبار، والكتاب الواحد كان بـ 80 جنيه. كمان فيه قسم خاص بتعلم علوم الإدارة والتسويق والقيادة الفعالة للمؤسسات، عجبنا فيه كتاب اسمه Living the Brand, How to transform every member of your organization into a brand champion، وكان بـ 230 جنيه. لكن أكثر قسم عجبنا قسم كتب فنون الرسم والأنيميشن، برغم أن الفنون دي لازم تمارسها بأيديك إلا أن الكتب في الموضوع ده كانت مفيدة جدًا. شفنا كتاب كان شكله لذيذ جدًا، اسمه Art projects بـ 90 جنيه، وكان مليان رسومات لأقمشة وألوانها وإزاي نعمل بها مشروعنا الخاص بالأنسجة والألوان وكثير من التفاصيل الثانية. كمان كان فيه كتب متميزة زيPastel painting والـ Drawing الواحد بـ 160 جنيه، وهو يعتبر كدليل للرسم أو كمرجع أكثر من كتاب. ده غير أقسام الروايات العادية سواء للكبار أو مرحلة المراهقة، وكتب التاريخ والإسلام. مكتبة بيتا متميزة فعلًا مش بس لاهتمامها بعقل الطفل والشخص الناضج واهتماماته، أو لتوفيرها لعب أطفال بجانب الكتب، هي بـ تنمي الثقافة من خلال بناء طفل صغير سوي ومتميز.

...

إمبرينت: أدوات مكتبية على ذوقك وأكثر في الزمالك
اصدرت في: 17/01/2015

مع انتشار المكتبات المتخصصة في بيع الكتب في القاهرة، واللي بـ تخصص ركن لأدوات الكتابة، بقى سهل جدًا أنك تلاقي أنواع وأشكال مختلفة منها، ولكن في النهاية المكتبات دي كلها بـ تبيع تقريبًا نفس المجموعة اللي العين أخذت عليها وما بقاش فيها أي جديد. إمبرينت - Imprint في الزمالك موجود فيه مجموعة مختلفة من الأدوات المكتبية اللي مش موجودة في أي مكان ثاني، ومش بس كده أنت ممكن تعملها على ذوقك كمان. بما أن المعروضات كلها ألوان، المحل ديكوراته معتمدة الأبيض سواء في فرشه أو الحوائط اللي عليهم كتابات ورسومات بالأسود لشخصيات مشهورة زي مارلين مونرو. الواجهة الزجاجية فيها مجموعة من الصور المطبوعة على لوحات ممكن تعلق، وسبورة مكتوب عليها We Print Your Dreams (نطبع لك أحلامك)، لأن إمبرينت ممكن يطبع لك أي صورة أو رسمة أنت بـ تحبها على تقريبًا كل حاجة؛ سواء مج، تي شيرت أو حتى غلاف شوكولاتة هـ تقدمها في مناسبة مهمة. الظريف كمان أنهم ممكن كمان يعدّلوا على صورك الفوتوغرافية، وتبقى على هيئة Pop Art (مدرسة فنية الصور بـ تبقى كرتونية بألوان فاقعة عادة). وسواء أنت اللي جايب التصميم أو الصورة، سعر اللوحات موحد؛ مقاس حوالي 20X20 بـ (125 جنيه) أما المقاس الأكبر فهو حوالي 35X50 بـ (300 جنيه). المعروض منهم شكلهم النهائي ممتاز عجبنا منهم صورة لفرقة البيتلز. مجموعة الأدوات المكتبية الجاهزة للبيع كبيرة وتصميماتها مختلفة؛ معظمها لوجوهات فرق روك مشهورة زي The Rolling Stones والبيتلز، ده غير تصميمات ثانية منها تصميم لجماجم ملونة بألوان قوية. الكشاكيل لها ثلاث أحجام الأكبر والوسط بسلك (30 و20 جنيه)، أما الأصغر بدون سلك وغلافها أقوى وبالتالي سعرها (35 جنيه). بنفس التصميمات لاقينا مجموعة حوافظ الأقلام (50 جنيه)، و Coasters واللي منها نوعين، الأول من الخشب (10 جنيه) والثاني فهو من الأكريليك وسعره (15 جنيه). أمام الكاونتر مجموعة من الملفات الورقية (11 جنيه) تصميماتها أبسط ومعظمها هندسية. حسينا أن الشخص القائم على خدمة البيع بـ يتعامل معنا بحذر، وخصوصًا لما كنا بـ نسأل عن الحاجة اللي مش مكتوب عليها أسعار، بس إحنا تعودنا خلاص على ردود أفعال أصحاب المحلات لما بـ يعرفوا أننا بـ نتفرج بس ما بـ نشتريش!

...

مكتبة مكتوب: كنز الكتب المستعملة في أدغال الزمالك
اصدرت في: 04/01/2015

بالرغم من أننا كنا متجهين لمكان ثاني علشان نكتب مقال نقدي، بالصدفة البحتة دخلنا شارع يحيي إبراهيم المتفرع من شارع السيد البكري اختصارًا للوقت والمجهود، ولحسن حظنا لمحنا علامة مكتوب عليها مكتبة مكتوب - Maktoob Bookstore؛ بدون تفكير دخلنا المكتبة الموجودة في الدور الأرضي للعمارة، واللي بقالها حوالي شهر بس فاتحة. ديكورات المكتبة بسيطة جدًا وأحلى مافيها أنها بعيدة تمامًا عن جو المكتبات الثانية الكبيرة اللي بـ تحسسك أن فن الكتابة أصبح صناعة وهواية مصطنعة لناس كثير. الحوائط لونها لبني، وكم لوحات فنية كبيرة معلقة على الحوائط هي أول حاجتين لفتوا نظرنا. على يمين المدخل حائط إعلانات واستراحة، أما على الشمال مساحة لعرض الكتب العربية بأنواعها. أما في الطريق اللي بـ يوصلك لآخر حجرة في المكتبة -واللي فيها الكتب الإنجليزية- موجود مجموعة من كتب الأطفال والمراهقين. مجموعة الكتب مش كبيرة في أي قسم من الأقسام، ولكن فكرة أن الكتب معظمها مستعمل يخلي الكتب أيًا كان عددها بالنسبة لهواة القراءة لها قيمة خاصة. مجموعة الكتب الإنجليزية غلب عليها الروايات، منها الكلاسيكي لكتاب مشاهير زي "إيرنست هيمنجواي" واللي عجبنا من مجموعته "العجوز والبحر" وسعرها كان (25 جنيه)، أما كتبه اللي طبعتها أجدد فأسعارها وصلت لـ (80 جنيه). من الكلاسيكيات لاقينا مجموعة كبيرة من كتب أجاثا كريستي وأسعارها بـ توصل لـ (30 جنيه). من روايات الكتاب المعاصرين، لاحظنا مجموعة كبيرة جدًا من أعمال الكاتبة "دانيال ستييل" ومعظم أسعار أعمالها (30 جنيه). ده غير أن فيه كتب للتنمية الذاتية والتربية، وعدد معقول من كتب السير الذاتية منها My Life للرئيس الأمريكي الأسبق "بيل كلينتون" (119 جنيه). الكتب العربية بـ تنقسم لنفس الأقسام؛ الأعمال الأدبية منوعة لعدد كبير من الكتاب الكلاسيكيين زي يوسف إدريس ويوسف السباعي والمعاصرين زي أحمد مراد ويوسف زيدان. من ضمن الروايات العربية "العمامة والقبعة" لصنع الله إبراهيم (19 جنيه)، و"أولاد حارتنا" لنجيب محفوظ (45 جنيه). ده غير أن فيه مجموعة كبيرة من الروايات العالمية المترجمة، واللي عجبنا منهم "ثلاث أخوات" لأنطون تشيكوف، طبعتها قديمة جدًا ومترجمة في روسيا وبالتالي شكل الكتاب غير مألوف زي سعره بالضبط (2.5 جنيه). وزي أي مكتبة عادية فيه مجموعة من الأجندات والمذكرات، ولكنها مجموعة قليلة جدًا مقارنة بالأماكن الثانية. الاختلاف الوحيد بين مكتوب وأي مكتبة ثانية أنك ممكن تستعير منها الكتب باشتراك شهري شخصي (180 جنيه) تستعير 10 كتب بواقع كتابين في المرة زائد قسيمة شراء قيمتها (30 جنيه)، أو اشتراك عائلي (350 جنيه) تستعير 20 كتاب (5 في المرة الواحدة)، وقسيمة شراء قيمتها (75 جنيه) من موقعهم على الإنترنت. بالرغم من أن ناس كثير بـ تكره الكتب المستعملة لدواعى صحية، إلا أن اللي بـ يقدر قيمة الكتب فعلًا هـ يعتبر زيَنا أن مكتوب دي كنز ولاقيناه.

...

مكتبة الجامعة الأمريكية بالقاهرة: كل الغذاء اللي عقلك محتاجه في وسط البلد
اصدرت في: 25/10/2014

بدون أي تفكير، مكتبة الجامعة الأمريكية بالقاهرة – AUC Bookstore تعتبر من أرقى وأحسن المكتبات من حيث الشكل والمضمون؛ وبالرغم من أن موقعها داخل الحرم الجامعي، فهي مع ذلك متاحة للجميع، مش بس لطلبة الجامعة أو العاملين بها. كل اللي محتاجه علشان توصل لها هو بطاقتك الشخصية، وفرد الأمن هـ يدلك على مكانها بمنتهى البساطة. صحيح المكان يستاهل كل الاحتياط الأمني المفروض عليه؛ لأن المكان يختلف كثير عن الجو الخارجي المعروف لمنطقة وسط البلد، ففي الحرم نفسه المكان هاديء والخضرة في كل مكان مع وجود مقاعد خشبية للجلوس، أما في المبنى نفسه فالصمت هو سيد الموقف، وكل اللي في المبنى محترمين قعدة الصمت دي. مش هـ نكذب عليكم، أسعار الكتب تعتبر غالية، إلا أننا صادفنا كتاب "The Secret" لـ "روندا بايرن" (100 جنيه)، والنسخة الفاخرة من المصحف بالإنجليزية (330 جنيه). عدد الكتب كبير، ومعظمه مرتبط بالأقسام العلمية في الجامعة الأمريكية، ولكن ده ما يمنعش أنها منظمة ومرتبة بترتيب واضح وسهل في عملية البحث، من ضمن الأقسام دي: كتب تعليم اللغة العربية، والدراما والشعر، والكتب الكلاسيكية، والأخير لاقينا فيه مجموعة كبيرة لكتب شكسبير، وهيمنجواي وتشارلز ديكنز. قسم الأطفال مش كبير، ولكن ده ما يمنعش أن فيه عناية كبيرة به، وكعادة أي حاجة متعلقة بالطفولة لاقينا كتب مجسمة ألوانها مبهجة ومغرية جدًا حتى لمجرد الفرجة، بنفس حجم القسم اللي فات لاقينا مجموعة من الأدوات المكتبية زي المذكرات بحجم الـ A5 من الجلد (100 جنيه) وإسكتشات الرسم بحجم الـ A4 بـ 40 جنيه). أجمل حاجة أنك ممكن تأخذ وقتك في البحث على اللي أنت عاوزه في هدوء تام، أو أنك تسحب كتاب وتأخذ فكرة عامة عنه في منطقة مخصصة للجلوس في آخر المكتبة، ده غير أنك لو محتاج مساعدة أو عندك استفسار هـ تلاقي ألف من يدلك.

...

مكتبة آدم: أفضل مكتبة تلاقي فيها كتب أطفال بكل اللغات في المعادي
اصدرت في: 11/10/2014

طبعًا المكتبات حاليًا بقيت كثيرة جدًا، وبـ تتنافس في الأسعار والخدمات، بس الحقيقة في كل المكتبات اللي رحناها في القاهرة، ماشوفناش مكتبة بـ تهتم بكتب الأطفال وكل احتياجاتهم التعليمية، زي "مكتبة آدم-Adam Bookshop"في جراند مول المعادي. أول ما بـ تدخل المكتبة بـ تلاقي على أيدك اليمين كروت للتهنئة بأشكال مختلفة وجمل ظريفة، بعد كده هـ تلاقي على طول مجلدات عن مصر وتاريخها والعمارة لمحبي المجلدات والتاريخ وبالمناسبة كان عليها تخفيض 20%، كمان فيه مجلات خاصة بوصفات الطبخ وأسعارها معقولة تبدأ من 20 جنيه. وطبعًا بـ تشوف كل الروايات اللي متاحة حاليًا في الأسواق، بأسعارها المعتادة والـNotebooksاللي عليها أشكال هندسية مميزة وجمل بخط عربي أصيل، سواء لكلمة واحدة زي "حلم" أو "علم" أو "حياة" أو لبيت شعر زي "أحبك حبين حب الهوى وحبًا لأنك أهل لذاك"، وأبيات ثانية كثير بكل الألوان. كمان فيه براويز فيها صور فنانين الزمن الجميل زي فاتن حمامة وشادية وأحمد رمزي وعماد حمدي ونجوم ثانية. وبراويز مكتوب عليها بالخط العربي، كلمة واحدة زي "محبة" أو "حب" أو بيوت شعر برضه، والحقيقة أن أسعاره معقولة ومتناسبة. سعر البرواز على حسب حجمه ونوعه بـ يبدأ من 65 لـ125 جنيه. أما بقى الكنز الكبير، يكمن في كتب الأطفال.. عارف إحساس علي بابا وهو بـ يقول: "ذهب.. ياقوت.. ألماظ.. أحمدك يا رب"، إحنا بـ نبقى عاملين كده وسط كتب الأطفال هناك، مبدأيًا أنت عندك أربع لغات للكتب: إنجليزي وفرنساوي وألماني وطبعًا عربي. مما لا شك فيه أن قسم العربي عندهم أقل ما يقال عليه أنه متنوع، لأنه غني جدًا بكل أنواع القصص والكتب اللي بـ تنمي مهارات الطفل وأسعارهم بـ تبدأ من 10 لـ100 جنيه. مش بس كده عنده كمان كتب صغيرة جدًا لقصص ديزني وقصص ثانية مبتكرة الواحدة بـ 10 جنيه بس. نيجي بقى للأقسام اللي بلغات ثانية، غير طبعًا القواميس اللي لا غنى عنها في أي مكتبة شخصية، هـ تلاقي كتب صغيرة فيها الأرقام والحروف للأطفال وقصص بأحجام مختلفة وكتب للتلوين، كما فيه لعب بـ تحفز روح الإبداع للأطفال سواء في التلوين أو الإكسسوارات. الحقيقة أكثر حاجة لفتت نظرنا غير القصص وكتب التربية للأطفال اللي متنوعة برضه، الكتب الألمانية والفرنساوية طبعًا لندرة وجودهم وأسعارهم المعقولة، واللي بـ تبدأ من 15 لـ 150 جنيه. أما كتب اللغة الإنجليزية غير القصصوالروايات وكتب التربية، فيه كتب بـ تساعد الطفل في كل العلوم تقريبًا:حساب وعلوم طبيعية وكتب للمساعدة على القراءة والقواعد اللغوية Grammar، وأسعارها معقولة جدًا. لو عاوز تشتري كتب لأولادك أنسب مكان لك هو مكتبة آدم، وممكن تظبط نفسك أنت كمان بكام رواية وNotebook، علشان مكتبة آدم بـ تجمع لك كل اللي تحتاجه في مكان واحد.

...

كلمة عربي: مكتبة متخصصة بأركان مول الشيخ زايد
اصدرت في: 22/05/2014

بالرغم من ثراء مصر الأدبي والفكري، إلا أن عدد المكتبات اللي تقدر تعتمد عليهم فعلًا قليل جدًا. مكتبة زي ديوان قائمة بالواجب وزيادة، ده غير أن أحدث الإصدارات ممكن تجيبها من على شبكة الإنترنت من قبل ما تنزل السوق المصري. إنما بقى لو بـ تحاول تلاقي إصدار قديم لكتاب في طي النسيان، أو كتاب متخصص في مجال معين... فالله معك! من أحدث المكتبات الموجودة على الساحة حاليًا في 6 أكتوبر، وتحديدًا في أركان مول مكتبة "كلمة عربي - Kelma Araby". المكتبة موجودة في الدور الأرضي للمول، بجبانب السلم الكهربائي، وبـ تقدم لك مجموعة متكاملة من الكتب الفلسفية، السياسية والأدبية... ومجموعة محدودة من قصص الأطفال. المكتبة مساحتها محدودة جدًا، ديكوراتها خشبية سواء الأرفف أو الأرضية. الكتب مرصوصة بشكل عشوائي، وبالرغم من أن القائمين على المكان نيتهم سليمة في موضوع الرص العشوائي -قال يعني ديكور بوهيمي وكده- إلا أن الشكل النهائي أوحى لنا بعدم التنظيم. اللي أثبت لنا أن الموضوع خرج عن أيديهم أن الكتب مرصوصة على الرف بشكل عشوائي، بمعنى أن الكتب مش مرتبة بحسب موضوعاتها أو حتى بالترتيب الأبجدي. في منتصف المكان موجود ترابيزة عليها مجموعة من الروايات الأدبية المشهورة، من ضمنها سلسلة روايات رومانسية للكاتبة الجزائرية المشهورة أحلام مستغانمي زي: "فوضى الحواس"، "عابر سرير" و"ذاكرة الجسد" كلهم بسعر (89 جنيه). الرفين الوحيدين اللي خرجوا من دوامة عدم التنظيم بورقة عليها محتواهم كانوا: رف الأدب والسياسة... لكن حتى الرفين لم يسلموا من كونهم غير مرتبين. الأدب احتوى رواية "المحروم" لـ حسن كمال (55 جنيه) و"تراب الماس" لأحمد مراد (45 جنيه)، أما السياسة فمجموعة جلال أمين يصل سعرها لـ (89 جنيه). الركن الأيمن من المكتبة مخصص لكتب الأطفال بجميع أنواعها، كتب تلوين وكراسات، بالإضافة لمجموعة قصص باللغة الإنجليزية بأسعار تتراوح بين ( 50 - 20جنيه)، وجدنا كتاب "Diary of a Wimpy Kid" و سعره (89 جنيه)، "Heroes of Olympus" بسعر (109 جنيه)، ومجموعة محدودة من قصص قبل النوم، زي: "Finding Neverland" ، "Finding Nemo" و"Thumblina" وأسعارهم بين (39– 25 جنيه). عمومًا أن المكتبة تقدم كتب للمتخصصين مش موجودة في أي مكان ثاني ده شيء إيجابي، بالرغم من أي سلبيات أخرى لاحظناها.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن