دليل كتب القاهرة - أحدث المقالات عن الكتاب العرب ومؤلفاتهم

كتب

رواية كتاب الشمس: حكايات رعب من شمس المعارف
اصدرت في: 24/11/2016

بيقول محمود علام مؤلف الكتاب: " أعرف أن الأمر أقوى منكم .. هذا طبيعي ومفهوم .. في داخل كل إنسان فضول قط كبير يرغب في عبور الشارع.. بعضهم ينجح في العبور فعلًا، والبعض الأخر تدهسه السيارة.. فأيهم أنتم ؟؟ فقط تذكروا.. المعرفة المحرمة لا تقود إلى التنوير ، ولا تؤدي لشيء إلا لفتح باب إلى الجحيم". لكن يا ترى إيه الجحيم اللي بيتكلم عنه، قبل ما تعرفوا أي حاجة عن الكتاب، لازم تعرفوا عن الكتاب.. مش لغز ولا حاجة، خليني أقول لكم، قبل ما تعرفوا حاجة عن الرواية اللي بتحكي رعب، لازم تعرفوا إيه حكاية الكتاب الأصلي اللي بيتكلم عنه علام، وهو كتاب شمس المعارف الكبرى، واحد من أشهر كتب السحر. بتقول الأسطورة إن فيه واحد باع النسخة الأصلية لكتاب شمس المعارف زماااان بآلاف الجنيهات، وده كله بس علشان اللي اشتراه كان عايز يفهم التعاويذ اللي فيه، وفيه اللي بيقول أن أي حد بيجيب الكتاب ويقرأ فيه وهو مش فاهم يعني إيه تعاويذ وسحر، هيطلع له مش عفريت، لا أنسى، قبائل من العفاريت والجن، وينططوه، وفيهم اللي قراه ومات، أو تعب أو أو، حكايات كتير عن كتاب شمس المعارف ده، مافيش فيها حد يقدر يقول إيه الحقيقي أو إيه الأسطورة، لكن في النهاية فيه ظاهرة في السحر اسمها كتاب شمس المعارف، نفس الظاهرة دي هي الصدفة اللي خلت محمود علام يكتب كتابه ده، بعد ما كتب مقالة عن شمس المعارف، واقترح عليه واحد من أصحابه أنه يحول المقالة والفكرة لرواية. الكتاب أخد نفس فكرة الأفكار اللي فوق، ولعب عليها وقدر أنه يلعبها بشكل حلو، نقدر نقول عليها الكتابة الخضرا، اللي لسه طازة يعني، زي ما بيقول درويش أحبك خضراء، علام مش مجرد بذرة كاتب شاطر، لا هو كاتب فاهم بيعمل إيه، وقدر يمسك كنز اسمه "شمس المعارف" ويلعب عليه بالراحة، بمجموعة صور هايلة وقفلات رعب بجد، لو اتحولت لفيلم أنتجه وأخرجه محترفين، هيبقى فيلم رعب بجد، علشان هو بيوهمك فعلًا إنها قصة حقيقية حصلت لشخص اسمه جمال فرج عبد الناصر، هو البطل اللي قرر يجرب هل فعلًا التعاويذ اللي في شمس المعارف شغالة ولا لأ. بلغة سهلة ومتماسكة، وجمل مكتوبة بحرفية، وقدرة على دخول الرعب في الوقت المناسب بالضبط، زي أى واحد فينا بيحب يعذب نفسه، ويتفرج على أفلام الرعب، قدر علام يكتشف فكرة الألم النفسي ده ويكتب رواية رعب بجدارة.

...

شيكولاتة بيضاء: قصص قصيرة تلعب على أوتار الواقع لتامر عبده أمين
اصدرت في: 22/11/2016

من النادر جدًا أننا نقرأ رواية أو قصص قصيرة مؤخرًا ونعجب بها بالقدر ده، وده مش لأننا صعب إرضائنا لكن لأن المحتوى اللي بقى يقدم في مجال الكتب مؤخرًا بقى استهلاكي أكثر منه مُلهم وغني. ودي أكثر حاجة عجبتنا في المجموعة القصصية "شيكولاتة بيضاء" لتامر عبده أمين. واللي كتب في مقدمتها أنه أختار الاسم ده لأن الواقع مليان قصص حلوة ومرة في نفس الوقت زي الشيكولاتة البيضاء. الكاتب استخدم لغة راقية وبسيطة أقرب للغة وصف الصحافة ويمكن ده ناتج لطبيعة عمله، ودي كانت كفيلة أنها تخلينا مستمتعين بكل لحظة في الكتاب ومش عاوزين نخلصه. ضحكنا مع أبطال القصص وعيطنا معاهم، والأكيد أن كل بطل في الـ 30 قصة قصيرة لمس جوانا معنى مختلف وخلانا نشوف مواقف كتير في حياتنا بطريقة مختلفة، وكل لما نشوف حد قدامنا في الشارع نتخيل أن وراه قصة كفاح وصبر ماحدش يعرفها غيره. الكتاب بيبدأ بقصة "عميل رقم 479" واللي بطلها بيسلمنا لبطل القصة اللي بعده وهكذا، كأنك ماشي في الشارع بتشوف ناس مختلفة كل حد بتشوفه بيسلمك للحد اللي بعده، بسلاسة وتلقائية جميلة برغم أننا فضلنا مكملين مع الأبطال شوية لدرجة أننا افتكرنا الأبطال مترابطين. وصحيح كان في كم قصة توقعنا اللي هيحصل فيها من بدايتها زي قصة "كشف طبي" بس برضه ما قدرناش نمسك نفسنا من الضحك فيها. وما ماقدرناش نمسك دموعنا في مشاهد الوداع والغربة عن أحبابنا اللي بيشاركونا حياتنا وعرض تامر قصصهم كأنهم جواه فبقوا جوانا إحنا كمان، كأن كل بطل وشوشه عن اللي بيوجع قلبه وباللي بيفرحه، فقدر يعبر عن ده في "لقطة" مشهد واحد من قصة البطل بتخلي القارئ يتخيل حياته اللي فاتت وحياته الجاية من غير ما يوصف بكلمات كتير كفايا أنه يقول لك رجل بكرش وزراير قميصه هتفرقع من كرشه علشان تتخيل رجل في أواخر التلاتينات شعره رمادي وقرفان من شغله وحياته وبيطلع همه في مراته من خيبته، وكفاية أنه يخلي شخصية مقهورة تطلع كبت سنين من المحايلة والصبر والمدادية في حركة واحدة تدافع بيها عن أخر ما تبقى من احترامها لنفسها وده اللي شوفناه في قصة "آيس كريم". وعشنا في عالم من الخيالات في قصة "في الدنيا الواسعة" كانت لمسة لطيفة بتخفف على القارئ زي البطل عبء الحياة. مهما نوصف في الجمال اللي شوفناه في "شيكولاتة بيضاء" مش هنوفيه حقه لأنه زي ما بيقولوا اللي من القلب بيوصل للقلب، جمال من الواقع بمره وحلاوته، هيسيب علامة في قلبك ويقول لك أنك مش لوحدك لسه قادر تقاوم وتقوم من تاني لشمس يوم جديد، وقلب جديد. وده اللي دائمًا بنقرأه بصورة أو بأخرى في كتابات تامر. نتمنى للكاتب التوفيق والأفضل دائمًا.

...

برج العذراء: الرواية الممنوعة
اصدرت في: 21/11/2016

الأبراج عالم كبير فيه ناس مقتنعة بيه جدًا، وناس شايفة إن الأبراج تخاريف، وناس بتقول حرام، بس رواية برج العذراء لعم إبراهيم عبد المجيد "الكاتب المخضرم" واخدة من البرج اسمه، أما اللي جوه حاجة تانية خالص، دنيا مختلفة، مش مجرد كلام عن برج، دي كلام عن حياة وبشر، بيقول: إنه فكر يسميها رواية سيريالية، وبعدين قال لأ هي رواية واقعية، بس فيها خيال جامح، فقال في النهاية إنها رواية وبس. برج العذراء بتحكي عن حانة بيتجمع فيها الرجال النساء، كله بيدور على الفطرة والبكارة في حياته، البكارة اللي ضاعت في تلوث الحياة، يا ترى هيلاقوها؟ الرواية تاخدك من أول كلمة فيها، عالم تاني واقعي جدًا عن شخص ماتت زوجته وبنته في حادثة، وكمية الألم والوجع اللي حاسس بيهم، ولما صلح عربيته، وساقها وهو راجع من الطريق الساحلي، قابل شرطي عجيب اتكلم معاه شوية واختفى بعدها مارجعش، وفضل ماشي على الطريق بسرعة كبيرة جدًا علشان يعمل حادثة تانية ويخبط شاب، يموت بعدها على طول، هنا تظهر العقدة من أول كام صفحة هتيصرف إزاي ويعمل ايه وايه اللي بيحصل؟ في قسم الشرطة بيلاقي مشاكل كتير وبيكتشف حاجات كتير، وبنقعد شوية مش فاهمين إيه اللي بيحصل، وهو مين الشخص ده، هل هو راشد، ولا سليم، وإيه حكاية الشخصيتين، وإزاي صوت سليم الأنثوي بيتنقل لراشد، وبيخليه شخص تاني، تتابعات كتيرة قوي بتحصل وأنت عايش معاهم في عالم تاني، بيختلط فيه الحقيقي مع الخيالي، لدرجة أنك مابتقاش عارف نفسك وصلت لفين. هي دي طريقة الروائي إبراهيم عبد المجيد مزج الخيال مع الواقع، وبيعتبر واحد من أهم كتاب الرواية الواقعية السحرية في مصر، طريقته بعيد عن طريقة ماركيز، يعني مش زي كتاب كتير لما كتبوا في الواقعية السحرية قلدوا ماركيز، عبد المجيد ليه حالة تانية وعالم تاني، دنيا مختلفة بجد، بيخليك مش قادر تستوعب تطور الأحداث وكمية العجايب اللي بتحصل وكأنك على بساط الريح، وعلشان تفهم لازم تكمل قراية، فيبدأ بعدها في تقنية سرد جميلة يتكلم بهدوء على لسان الرواي علشان يفهمك. الوقت اللي بتبدي تفهم فيه الرواية بتكون وصلت لقمتها للذروة يعني، وده بيخليك قاعد ومكمل معاها، عايز توصل للنهاية علشان تعرف إيه نهاية العالم العجيب ده. مشكلة برج العذراء واللي خلتها فترة ممنوعة من دخول مصر، إنها حاوية لمجموعة ألفاظ صادمة شوية زي مثلًا رسم صورة المريض اللي قبل ما يموت على طول "يعبث بمؤخرة الممرضة" وده خلي ناس تهاجم الرواية، وناس تقول إنها خادشة، وناس تالتة قالت أنها حرية في التعبير، هنسيبلكم أنتم القرار لما تقروها.

...

بيوت عارية: تحفة أدبية مميزة لـ مصطفى عبد ربه
اصدرت في: 20/11/2016

[سيمحو النسيم آثار أقدامنا على الرمال ترى من سوف يخبر الأبدية أننا مشينا مرة ههنا] [غنيتُ كي أزن المدى المهدور في وجع الحمامة، لا لأشرح ما يقول الله للإنسان] المقطعين السابقين افتتح بهم الروائي مصطفى عبد ربه روايته الأولى [بيوت عارية] الأول من أغاني قبائل البوشمان والثاني من قصيدة للشاعر الكبير محمود درويش. كأنه بيقول من البداية أنه مش مهتم بالأفكار ولا بالقضايا العظيمة، لكنه مهتم بحياة الناس البسيطة وتفاصيل حياتهم. تحكي الرواية قصة منطقة أو شارع في مدينة ما لم يذكر الكاتب اسمها. من البداية بنشوف نشأة المنطقة كلها. الحكومة قررت تبني مستشفى لأمراض الصدر والحميات في مكان بعيد عن التلوث والعوادم وبعيد عن عيون الناس. المحافظة عرضت الأراضي المحيطة كلها للبيع. وبعد فترة بسيطة انتشرت البيوت والناس، وتكوّن شارع مستشفى الصدر. في الفصل الثاني، وبعد ما شفنا الجيل الأول وبداية الشارع، الكاتب بيتخطى حوالي عشرين سنة علشان نشوف الجيل الثاني اللي هما أبطال الرواية الرئيسيين. وهي مجموعة من المراهقين يجمعهم شارع واحد. وهنشوف مغامراتهم ولعبهم وخلافاتهم. وبالتوازي هنشوف عدد كبير من الشخصيات برضه من سكان الشارع. واختار الروائي مصطفى عبد ربه أنه يكتب الرواية بطريقة (الراوي العليم) علشان يقدر ينقل للقارئ كل تحركات وتفاصيل هذا العدد الكبير من الشخصيات. وبعد منتصف الرواية هنلاقي الشخصيات الرئيسية بتظهر وبتاخد مساحة أكبر. وهم أهم 3 شخصيات في الرواية: أحمد يوسف عاشور – الإمام الفارسي – محمد حسين. كل واحد منهم له عالم مختلف وتفاصيل تبدو غريبة شوية. لكن الكاتب نجحأانه يضفرها بشكل كويس. وتتحط جنب بعضها من غير ما نحس بأي نفور. هنلاقي مثلًا الإمام الفارسي (مبيض محارة) يُصر على كتابة لفظ الجلالة على اسمنت السقف الطري بمسمار صغير، بعد كل جدار يخلصه. وهنشوف أحلام أحمد يوسف. وهذيان محمد حسين وعلاقته السيئة بزوجته. ومن خلال الأحداث السريعة، ومغامرات مجموعة المراهقين، وعلاقات سكان الشارع بحُكم الجيرة هنشوف أجواء المنطقة كلها. وأحداث ضخمة زي حرب الخليج وزلزال 92 رغم أنها مش واضحة قوي إلا أنها مؤثرة في حياة كل أبطال الرواية. اللغة بسيطة ومحايدة من غير أي زخارف، أشبه بلغة الجريدة. لكن الإصرار على كتابة جمل فعلية قصيرة عطل سلاسة الحدوتة. واللي وازن الإيقاع شوية وجود أحداث سريعة وانتقالات كثيرة من مكان للثاني. الرواية في المجمل جيدة جدًا بالنسبة لرواية أولى. ومصمم الغلاف كان موفق تمامًا في تصميمه.

...

رواية أماريتا: ثروتك هي ذكائك
اصدرت في: 17/11/2016

فكرة جديدة وعنوان يشد "أماريتا" يا ترى إيه الموضوع وإيه هي أماريتا؟ هل جرّبت تتعامل بعملة مختلفة عن العملات الورقية .. ليست معدنية وليست ذهبية …الثروة هنا من نوع آخر … لن تدفع مالاً لتأخذ ..بل ستدفع من ذكائك ..ستدفع من وحدات عقلك… ولكن انتبه فـ للثروة حدود …فهنا المفلس لا يعامل باحتقار أو يُهان كما يحدث في عالمك .. بل يتعرض للموت .. احذر .. فأنت .. في أرض زيكولا. ده جزء من الرواية اللي هي الجزء التاني من أرض زيكولا، رواية بتعيشنا في عالم من الخيال الحلو والممتع، بتحكي عن عالم التعامل فيه مش بالفلوس، ولا المبادلة، التعامل فيه بوحدات الذكاء، يعني كل ما يكون ذكاءك كبير تبقى غني، وكل ما تبقى أقل أنت فقير، فخلي بالك من نفسك، علشان هتعيش في عوالم داخلة في بعض، وحالات من الحب والتضحية الجميلة. الرواية مكتوبة بلغة حلوة وسهلة قريبة من الناس، مافيش أي تعقيد، هو حد قاعد وعمال يحكي، ودي طريقة عمرو عبد الحميد اللي متعودين عليها، بيشتغل على المواضيع بعد ما تخلص في دماغه، فتحس أن فيه حد حافظ حدوتة اتقالت له كتير قوي، وهو بيحكيها لك وبس. كمان شدنا للرواية لو نفع يعني نقول أسلوب الخطف، أنه بيخطفك من أول جملة لأرض تانية وعالم تاني، وشخصيات وناس وأسامي وتصميمات، وأسواق وحاجات كلها مختلفة ومبتكرة، والابتكار هو اللي بيخلي الكتابة تبقى حلوة وممتعة. لو بتدور على متعة ونوع مختلف من الكتابة يبقى لازم تقرأ لعمرو عبد الحميد علشان هو مختلف وعايش مع الشخصيات بتاعته، بيخليها هي اللي تسرد شوية، والراوي يسرد شوية، فمابتحسش بالملل، بالعكس بتبقى مبسوط وعايز تعرف ها هيحصل إيه تاني.

...

يوم انتحار عزرائيل: الحرب بين الدنكا والنوير!
اصدرت في: 13/11/2016

تحكي الرواية قصة الحرب الطويلة بين أكبر قبيلتين في جنوب السودان. قبيلة الدنكا وقبيلة النوير. وكثير من المعارك المذكورة في الرواية حدثت فعلًا. الجنرال فرانكو بطل الرواية شخص سادي وقاتل بالفطرة. يتلذذ بتعذيب الأسرى وقتلهم. قوات التحالف الشعبي لتحرير السودان استخدمت فرانكو في قتل المتمردين وبعدين ركنوه على الرف! ولسنوات طويلة سكن في منطقة نائية فقيرة. وبعيدًا عن المناصب والمكاسب اللي حصدها زملاء الكفاح المسلح! زي الكولونيل جرمايا اللي تحول لرجل أعمال في زيّ عسكري. تحول فرانكو بعد التهميش إلى أداة تدمير. وبطرق وحشية عذب وقتل الآلاف من أبناء قبيلة النوير. قتلهم من باب الانتقام ولأنه شخص سادي مجنون. بيتلذذ بتعذيب الغير. في الجزء الأخير من الرواية تصدر أوامر من القيادة العامة للجيش بالذهاب إلى مدينة (بور) للقضاء على جيوش المتمردين. تتحرك القوات تحت قيادة الكولونيل جرمايا. ومن وراه الكولونيل فرانكو بقوات دعم ومساعدة. جرمايا بيهرب في وسط المعركة، لكن فرانكو الشجاع المتعطش للدم بينتصر على جيوش المتمردين وبيكسب المعركة وبياخد ترقية وبيبقى جنرال (ما يعادل رتبة لواء). فرانكو بيفرح بالترقية والتقدير اللي جاله متأخر بعد فترة طويلة من التهميش في القرى النائية. وبتصدر أوامر لفرانكو المتعطش للدم علشان يروح مدينة (ملكال) للقضاء على جيوش المتمردين من قبيلة الدنكا. وفي نفس الوقت خال الجنرال فرانكو يبوح بسر غاية في الخطورة وهو على وشك الموت. بيقول لفرانكو إن أبوه مش أبوه الحقيقي ولا دي أمه. لكنه مجرد لقيط لاقاه الراجل اللي خد اسمه (ماجوك ماجاك) وهو رضيع تحت أنقاض قرية تسكنها قبائل الدنكا واتبناه بناء على رغبة زوجته. وفي النهاية فرانكو مش بيتحمل الصدمة. بيفتكر كل قرايبه اللي قتلهم وعذبهم بطريقة وحشية. ومطلوب منه يقتل متمردين من الدنكا في مدينة ملكال. وبينتحر ويضرب نفسه بالنار. الكاتب استخدم الفلاش باك علشان يورينا جزء من طفولة الجنرال (فرانكو ماجوك ماجاك) وإزاي أبوه -بالتبني- كان بيعذب أمه وبيضربها بالكرباج يوميًا. ومن هنا انتقلت اللعنة للولد الصغير. ومن الشخصيات المهمة في الرواية شخصية (وليام ويلسون) صديق البطل المقرب الوحيد. وليم ويلسون عكس صديقه تمامًا. صحيح هو رجل عسكري، وصديقه من الطفولة لكنه بيكره العنف وبيرفض تصرفات فرانكو. ودوره في الرواية أنه يبروز سادية البطل. ويورينا مدى بشاعة تصرفاته. نجح آرثر في نقل تفاصيل الصراع، بقدرته على كتابة مشاهد عالية الدقة. والاختبار الصعب فعلًا -تخطاه آرثر بنجاح- هو نقل تعقيدات الصراع في جنوب السودان. علشان القارئ يعيش داخل الأحداث، ويتفاعل مع الشخصيات. الكاتب كان عايز يوصل رسالتين في غاية الأهمية من خلال روايته. أولًا بيقول إن الحرب أسوأ حاجة بيعملها الإنسان. وده ظهر من خلال حرصه على وصف تفاصيل المعارك، ومشاهد القتل والتعذيب. وثانيًا عايز يقول إن الصراع يبان من الظاهر أنه صراع بين قبيلتين على مكاسب سياسية. لكنه في الحقيقة أكبر من كده. الصراع أصلًا بتغذيه قوى خارجية مستفيدة من حالة الحرب الدائمة، عشان تنهب كل خيرات أفريقيا. والجنرال فرانكو واللي زيه مجرد قطع شطرنج. يتم التخلص منهم بسهولة بعد إنتهاء مهمتهم، إما بالتهميش أو بالإغتيال.

...

أن تبقى: غريق بيواجه باريس
اصدرت في: 10/11/2016

كان كل شيء باردًا وخاليًا من الإثارة حتى تلك اللحظة التي قرّرت فيها التمرّد على مساري المحبط وصنع شيء خارق يحرّرني من جحيم الفراغ. منذ وضعت قدمي اليمنى في القارب الخشب المتراقص على الشاطئ في ليلية خريفيّة غاب قمرها، أصبحت حياتي تتابع مرتجلًا لحالات استثنائية، خضت المغامرة تلو الأخرى وعرّضت حياتي للخطر أكثر من مرّة. بكلمات بينساب منها رائحة العطر الباريسي الجميل، وشايلة هم ووجع وحياة مختلفة عننا، بتبدأ رواية أن تبقى، اللي بتعرفنا على أماكن جديدة. في شتاء باريس اللي ممكن نشوفه في فيلم، أو تقرأ عنه في رواية مترجمة، هتلاقوا الحياة بكل ما فيها من فطرة حلوة، هتلاقوا كمان امتحان للإنسان في الغربة، يا ترى هيساعد الغريب في بلاد غريبة ولا هيقف عند حدود المعرفة. رسمة الشخصيات هايلة، بتقدر د/ خولة حمدي في رواية "أن تبقى" تعملنا مجموعة شخصيات صعب تتعرف على كل حياتهم وقصتهم إلا لما تكمل الرواية لآخرها، وده منطقتها وأسلوبها، يعني لازم تشدك لحد آخر الرواية، وإن كان أول الرواية فيها شوية تعب وملل من كتر الوصف، وأنك تقريبًا مش فاهم حاجة، بس لما تصبر وتكمل هتفهم وتستمتع بالرواية. الرواية بتهدي سردها للفقرا في كل مكان، مش الفقراء اللي مش معاهم فلوس لكن للفقراء في الغربة اللي ماعندهمش أقارب وصحبة وحياة، الناس اللي قررت تروح لبلاد تانية وتشتكي من البعد، الرواية بتأثر في قلبك وتخليك تفكر في السفر والحياة من زاوية تانية، زاوية التوهان والاعتراف بالذنب لما تعمله، زاوية اللغة السهلة والرصينة والتشبيهات اللي متاخدة من الواقع، زاوية الحرب اللي قرر يشنها البطل على كل الناس علشان هدف واحد. الرواية تتقري وأنت مستجم في أجازة ومستمتع ببرج إيفل وبنايات باريس وبناتها الحلوة ولعبة السياسة اللي دايمًا متعبة.

...

فن التخلي: العالم بعيون مجنون!
اصدرت في: 08/11/2016

قال الإسكافي: [لابدّ من رتق الجورب والقدمين والخطى والطريق] استغل عبد الله ناصر –في كتابه الأول- خياله وقدرته على رصد التفاصيل، وبنى عالم مختلف تمامًا، فيه علاقات مختلفة عن علاقات العالم الحقيقي. عبد الله استغل لغته السلسة علشان يصوّر العالم الموازي. أو بمعنى أصحّ عشان يورينا رؤيته للعالم. قصة [قفزة الثعلب] بتعرض حياة شخص سيء الحظ. والتفسير لحظه السيء، أنه دايمًا بييجي متأخر، بييجي في الوقت غير المناسب. بيتحرك على إيقاع بطيء. براعة الكاتب فعلًا أنه اختار للبطل إيقاع الفوكس تروت أو قفزة الثعلب، واختار للحياة إيقاع الرومبا الراقص. كان ممكن يقول بكل بساطة إن البطل إيقاعه أبطأ من إيقاع الحياة. لكنه اختار إيقاعين مختلفين تمامًا. وحتى القارئ اللي ملوش في المزيكا يقدر بكل بساطة يتعرف على الإيقاعين. عشان يعرف قد ايه هما بعاد عن بعض. ويقدر يتخيل بطل القصة وهو واقف لوحده يرقص على الفوكس تروت والعالم كله بيتحرك على إيقاع سريع مرح. ويمكن هنا الكاتب عايز يقول أن المشكلة في بطل القصة نفسه مش في العالم. واختار لها إيقاع راقص وحيوي. قدرة الكاتب على التخيل بتظهر في قصة (تاريخ آخر). وبيلعب لعبة ماذا لو؟ بيتخيل لو الصخرة اللي قتل بيها قابيل أخوه كانت وقعت عليه وقتلته هو؟وإيه اللي كان هيحصل لو القنابل الذرية وقعت على واشنطن ونيويورك بدل هيروشيما وناجازاكي؟ الحس الإنساني واضح في أغلب قصص المجموعة. وفي قصة (خزي) الرجل العجوز المصاب بالزهايمر بيطرد زوجته اللي نايمة جنبه. افتكر أنها ست غريبة، وضميره أنبّه فطردها! القصص أغلبها لبطل واحد -رغم عدم ذكره صراحة- والعالم متشابه جدًا. عالم مليان بالهذيان والخوف من قوة مجهولة أكبر بكتير من قدرة الإنسان على تحملها. كأن القصص كلها بتدور في عقل بطل مشوش وغامض. كأن العالم الحقيقي كسر الإنسان، فبنى عالم مختلف في عقله. وكنوع من الهروب قرر يعيش فيه. لكن للأسف كان العالم الداخلي أشبه بالجحيم. وأسوء بكتير من العالم الحقيقي. زي ما حصل في قصة (موسيقى تصويرية) وبطل القصة بيدور في ذاكرته على موسيقى تصويرية لأحداث اليوم! وفي النهاية مالقاش موسيقى مناسبة لليوم. واكتشف في النهاية أن الموسيقى لما تختفي في الأفلام يبقى ده مؤشر إن في كارثة هتحصل! مجموعة مختلفة وجيدة بالنسبة لكتاب أوّل. نصوص مكثفة وبتقول حاجات كتير بأقل كلمات ممكنة.

...

مطلوب حبيب: كتاب عن الحب والحياة
اصدرت في: 06/11/2016

"أثناء قرائتي لكتاب "مطلوب حبيب" لم يفارقني إحساس قعدة الدردشة الرايقة مع صاحب ممتع في رحلة طويلة داخل قطار أو طائرة، الأمتع والألطف، مع انتهائي من الرحلة في سطور الكتاب الأخيرة، إني اكتشفت قد إيه الكتاب ده مرايا لكل واحد فينا". دي كانت مقدمة السينارست تامر حبيب لكتاب "مطلوب حبيب" للكاتب والشاعر محمد إبراهيم وإللي إحنا كمان حسينا بنفس المشاعر وإحنا بنقراه. .الكتاب بيتصنف تحت كتب "أدب الإعترافات" أو "السرد الذاتي الخواطر" ويعتبر الكتاب الأول لمحمد إبراهيم بخلاف دواوينه الشعرية إللي حققت نجاح كبير زي "فلوماستر أبيض"، "الحزن البعيد الهادي"، "زي الافلام". الكتاب سعره 34 جنيه وهو من إصدار داردوّن ومتوافر في المكتبات الكبرى زي "أ" و"ديوان" و"الشروق" و"فيرجن". محمد إبراهيم متأثر بكونه شاعر في الأساس علشان كدة عمل الإهداء في بداية الكتاب على هيئة قصيدة قصيرة بيقول في آخرها: إهداء لكل القلقانين من غير لزوم للهربانين بالنوم والفضفضة والقلش إهداء لكل اللي اتوجع وما قلش مقدمة الكتاب من أجمل الأجزاء اللي فيه وهي عبارة عن خواطر كلها بتوضح إزاي وجهة نظر الكاتب اتغيريت بمرور الوقت زي مثلًا الجزء ده: "كنت صغيرًا وكبرت، وأدركت أن العلاقات تتغذى على الاهتمام والود والاحترام، وأن العلاقات التي تتغذى على اللوم بدلًا من الاهتمام، والمزايدة بدلًا من الود، والمكابرة بدلًا من الاحترام، هي حتمًا علاقات مدمرة لا توصل إلي طريق الونس ولا طريق الحب الصافي النقي" محمد إبراهيم قدر يكتب بشكل سلس، بسيط، شديد العذوبة سهل ممتنع في نفس الوقت عن مشاعر كتير ليها علاقة بالحب زي النسيان، والحزن، والفقد، والافتقاد، ما نسيش كمان حب النفس.. فكرة أنك تحب نفسك زي ما بتحب الناس. في جزء في الكتاب مميز جدًا متقسم لفصلين متصلين منفصلين، إحنا سميناه "فصول المثلثات": "مثلث الحب" وده بيتكلم فيه الكاتب عن العطاء والتضحية والإحتياج، و"مثلث النهايات" وده بيحكي فيه عن الملل والخيانة والقدر... وأثناء قراءة الجزء ده حسينا فجأة إننا افتكرنا فيلم "هيبتا" وتخيلنا الكلام ده بيتقري بصوت ماجد كدواني.. مش لأنه نفس الكلام ولكن لأنه في نفس العمق البسيط وليه بعد فلسفي محبب. الكتاب حلو فعلًا.. مناسب جدًا للناس اللي بتحب تقرأ في العلاقات الإنسانية بوجه عام والعلاقة العاطفية بوجه خاص، مناسب للرومانسيين وللي بيدوروا على كتاب حلو هدية للي بيحبوهم.

...

فيه ما فيه: عن المعنى الحقيقي للتصوف
اصدرت في: 02/11/2016

كان جلال الدين الرومي شيخ وعالم فقه معروف في قونية بتركيا، عاش حياته مشهور معروف الأصل والنسب، وكانت الناس بتسأله وتستشيره في حياتها ومعاملاتها، وفضل بيه الحال كده لسنوات، لحد ما قابل الدرويش العالم الصوفي"شمس تبريزي"وبعدها انقلب حاله تمامًا من حال لحال تاني خالص، اتعلم منه معنى التصوف، وجوهر العشق الإلهي، وبدأت حياة مولانا الحقيقية اللي خلت أعماله لسه بتترجم لحد دلوقتي. أعماله: لمولانا أعمال كتيرة منها الكتابات زي المجالس السبعة وهو خطبه وكلام ليه، ومنها الشعر وأشهرهم كتاب مثنوي اللي فيه قصص وحكايات وأشعار عن كل معاني التصوف والتعلق بأنس ربنا، وكتابنا النهارده "فيه ما فيه". فيه ما فيه: كتاب فيه ما فيه، واحد من كتب مولانا جلال الدين الرومي، أكثر فصوله إجابات عن أسئلة مختلفة اتسألها، وفيها أحاديث لأشخاص محددة معروفة في التاريخ زي "معين الدين سليمان" وده واحد من السياسين في عصر اسمه عصر السلاجقة كان بيحب التصوف والصوفية، وبيطلب من مولانا حاجات فيرد عليه بالمكاتيب اللي اتعمل منها كتابنا. الكتاب فيه محاضرات وتعليقات ومناقشات لجلال الدين الرومي، هتحس فيه بحالة روحية مختلفة، ومسائل في الأخلاق والتصوف، وكمان مجموعة كبيرة من الحواديت والحكايات الصوفية اللي بيعلق عليها مولانا. المعنى: في الكتاب هتفهم معنى التصوف عنده وحالة العشق اللي كانت بتصيب قلبه بسهم المحبين، وخلت كل الناس تتعلق بيه وتحبه، العجيب بقى إن اسم الكتاب متاخد من شعر للشيخ الأكبر محي الدين بن عربي في كتابه الفتوحات المكية بيقول فيه: كتاب فيه ما فيه بديع في معانيه إذا عاينت ما فيه رأيت الدر يحويه مولانا عاش بحب ربنا ولربنا، جوهر العشق هتلاقيه في كتبه، واللي يعيش بالحب ينصفه الحب، فقد أوتي كتابًا ولسانًا مختلفًا عما نعرفه من كتب التصوف الأخرى.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن