دليل معالم وسياحة القاهرة، أحدث المقالات عن معالم وسياحة مصر

معالم وسياحة

بالفيديو: دليلك لأجمل رحلة في شارع المعز لدين الله الفاطمي
اصدرت في: 27/11/2016

جمال شارع المعز حير كتير من الناس مش بس علشان الأثار القديمة اللي فيه، لأ كمان علشان كل تفصيلة فيه لها طعم مختلف عن باقي القاهرة، الأكل والمحلات والروح الحلوة. كايرو 360 حبت تعيشك جوه شارع المعز بفيديو صغير بس فيه معاني كتير. يرجع تاريخ شارع المعز لسنة 358 هـ – 969 م، لما دخلت مصر تحت الحكم الفاطمي بقيادة "جوهر الصقلي" وسمي شارع المعز نسبةً للخليفة الفاطمي "المعز لدين الله". شارع المعز ده كبير جدًا، بيبدأ من باب الفتوح ويكمل لمنطقة النحاسين، وخان الخليلي، وبعدين بيقطعه شارعين رايح جاي، شارع جوهر القائد (الموسكي) وشارع الأزهر، عند منطقة الغورية والفحامين، وبيكمل تاني عند منطقة الصاغة وبعدين زقاق المدق والسكرية لحد باب زويلة، ويوصل طوله لأكثر من ألف متر.. تخيلوا! لو أنت جاي بعربية يستحسن تركنها أمام "باب الفتوح" في منطقة الجمالية جنب شارع صلاح سالم. بداية شارع المعز، "باب الفتوح" كان واحد من بوابات القاهرة الفاطمية، وجدده الوزير "بدر الجمالي"، وبيتكون من برجين؛ كل واحد فيهم بواجهة مستديرة وفي النص الباب اللي هتلاقيه مزين بزخاريف نباتية وهندسية. أول ما تدخل من الباب، هتلاقي مسجد "الحاكم بأمر الله"، واللي تم بناؤه سنة (380-403هـ/990-1013م)، رغم أن المسجد ده بناه الشيعة، وأن "عهد الحاكم بأمر الله" ما كانش أفضل العصور على مصر تمامًا، حتى اتهمه البعض بالجنون من أفعاله العنيفة الدموية، إلا أنك هتحس براحة غريبة جدًا جواه، يمكن علشان فيه صحن مفتوح جوه جامع مربع كبير، وفي النصف فيه دائرة بيضاوية علشان الوضوء. أكتر وقت ممكن تستمتع فيه بمسجد الحاكم بأمر الله قبل المغرب لأن الجو بـ يبقى حلو وهـ تلاقي العصافير بـ تطير فوقك، مع رؤية الشمس وهي بـ تغرب، مشهد بـ يخلي روحك تطير، بالذات محبي التصوير هـ يستمتعوا. بعد الجامع بكام خطوة هـ تلاقي "منزل مصطفى جعفر"، اللي بناه الحاج مصطفى جعفر السلحدار سنة 1713م، تاجر كبير من تجار البن في الوقت ده، وملاصق ليه في حارة الدرب الأصفر "بيت السحيمي"، واللي هو عبارة عن قسم جنوبي بناه الشيخ عبد الوهاب الطبلاوي سنة 1648م، وقسم شمالي بناه الحاج إسماعيل شلبي سنة 1796م، وضمهم على بعض ليكون "بيت السحيمي" نسبة للشيخ أمين السحيمي شيخ رواق الأتراك بالأزهر وآخر واحد سكن فيه. بيت السحيمي من أجمل الأماكن اللي ممكن تزورها بالذات لو محتاج مكان جديد تخرج فيه مع صحابك (ممكن تعمل جواه لعبة البحث عن الكنز). يعتبر بيت السحيمي تابع لصندوق التنمية الثقافية بعد ترميمه سنة 2000م، وبـ يعمل فيه الكثير من الأنشطة الثقافية والفنية. كمل في حارة الدرب الأصفر على طول هـ تلاقي أمامك "مسجد الظاهر بيبرس الجاشنكير"، اللي بُني في العصر المملوكي سنة 709هـ - 1304م. والمسجد ده كان وقف للصوفية زمان، بس أجمل حاجة فيه، السكينة اللي بـ تشعر بها والحمام اللي بـ يبقى على أرض وأعلى سور المسجد (ده علشان سقفه مفتوح)، لأن المهتمين به دائمًا بـ يحطوا لهم حبوب يأكلوها. لو رحت المسجد ده هـ تنسى أي جمال شوفته قبل كده وتتمنى تفضل قاعد جنب العصافير تأَكلهم بس. هـ تخرج من حارة الدرب الأصفر تلاقي "جامع الأقمر" على أيدك الشمال بـ تنزل له سلمتين صغيرين، وبـ يتميز بالكتابة الكوفية المزخرفة على الأعمدة الرخامية واللي بـ تميز العمارة المملوكية، أمر ببناء الجامع ده الخليفة "أبو على المنصور بن المستعلي بالله" سنة 1125م، واللي بنوه مكان دير قديم اسمه "دير العظام"، واللي سمي بالاسم ده نظرًا للون حجارته اللي شبه لون القمر. وأخيرًا "جامع السلطان برقوق" هـ تلاقيه أمام سبيل المياه بعد ما تمشي شوية من جامع الأقمر، واللي بناه السلطان الظاهر أبو سعيد برقوق أول حاكم لمصر من المماليك الجراكسة 1286م– 788 هـ، هـ تستمتع في الجامع ده جدًا بالزخرفة والفنون الهندسية بالذات لو زرته بالليل. الأكل والشرب أما لو عاوز تعرف تأكل وتشرب إيه هناك، نحب نقولك أن كل حاجة رخيصة جدًا، ده غير أن طعمها حلو ولذيذ وبـ يدخلك في جو القاهرة الفاطمية. تخرج من جامع الأقمر وتمشي على طول هـ تلاقي محل "الكيلاني" على يمينك، واللي بـ يقدم كل العصائر المعروفة من تمر وخروب ومانجو وسوبيا وبرتقال، وأسعارهم من (1 جنيه لـ 1.50 جنيه) بس. وعنده ساندويتشات كمان بس إحنا بـ ننصحك لو معدتك بـ تتعب من أكل عربيات الشارع بلاش أحسن، فيه بعديه محل فطير حلو ونضيف اسمه "الشيف" بـ يعمل الفطيرة السادة (بـ 1 جنيه) وبالخضروات (بـ 1.50 جنيه). وبعده بحبة حلوين محل تاني عنده فطير وبيتزا اسمه "شيخ العرب" الأسعار فيه من أول (1 جنيه لحد 25 جنيه). كمان هـ تلاقي محل "أسماك" اللي بـ يبيع ساندويتش الجمبري (بـ 7 جنيه) وساندويتش السمك (نفس السعر) وساندويش السبيط (كاليماري) (بـ 10 جنيه). بعد محل "أسماك" هـ تلاقي التجربة اللي بجد مختلفة عند "الضامن" على أيدك اليمين، بـ يعمل كبده ومخ بالسمسم بس خرافة، وكيلو الكبدة والمخ بالسلاطات والعيش وكله (بـ 68 جنيه)، أما لو عاوز كيلو كبده بس (بـ 48 جنيه) وبرضوا بالسلاطات والعيش، وممكن تأخد أقل من كيلو لو عاوز. المحلات نيجي لو عاوز تشتري حاجة تفكرك بشارع المعز هـ تلاقي نوعين محلات، محلات فعلية وفيه منها من غير اسم، وعربيات في الشارع على جنب بـ تبيع كل ما يخطر على بالك. نبدأ بالمحلات، أكتر محل حبيناه "مكتبة حسام عبد الظاهر" واللي بـ تقدم نوع فريد من رسم اللوح بالخط العربي لكلمات عربية أو بيوت شعر جميلة، وكمان دفاتر كتابة عليها نفس الكلمات وبيوت الشعر، زي حب، سعادة، علم، وحلم. الأسعار بـ تبدأ فيه (من 35 جنيه لـ 105 جنيه) للدفاتر. (ومن 60 جنيه لـ 290 جنيه) للوحات الفنية. كمان "محل أ. عاطف عيد" اللي عنده لوحات نحاس (شغل يدوي) رائعة الجمال لشارع المعز وغيره من المناطق الأثرية، واللي بـ تبدأ أسعاره (من 35 جنيه لـ 175 جنيه). والمحل اللي جنبه "محل أ. هشام دردير" اللي بـ يتميز محله بالنجف المعدن وبرسومه الهندسية الجميلة والأنيقة، وبـ تتراوح أسعاره (من 60 جنيه لـ 550 جنيه). وفيه بازار "السلطان برقوق" اللي عنده أنتيكات من كل العصور بأسعار معقولة، كل قطعة فيه تأخدك لعصر مختلف عن التاني مش بس القاهرة الفاطمية، لأ هـ تلاقي عنده تحف فرنسية ويابانية كمان. كمان بازار "جوهرة المعز" عنده علب صدف بأحجام مختلفة وأذواق عديدة، وبـ يكون سعرها (من 20 جنيه لـ 150 جنيه). أما المفاجأت كلها في "بازار شعبان" اللي عنده لمض معمولة بالخزف ونجف صعب تلاقيه في أي مكان تاني. نيجي للمحلات اللي من غير اسم، فيه محل جنب بازار السلطان برقوق بـ يبيع كل الحاجات القديمة زي الجرامافون والراديو بتاع زمان وأسعاره معقولة لمحبي التحف. وفيه كمان عربيات لكل الاكسسوارات اللي تتخيلها بالأحجار الكريمة وبأحجار عادية وبأسعار أقل كتير من أي مكان تاني. بعد كده هـ تلاقي أمامك "حي الصاغة" المعروف بمحلات الذهب والفضة اللي فيه، وكمان محلات عطارة كبيرة هـ تلاقي فيها أي حاجة أنت كنت بـ تدور عليها في محلات العطارة العادية ومش لاقيها، وبـ تخرج على شارع الأزهر اللي بـ يقطع شارع المعز لدين الله، وفي الناحية التانية هـ تلاقي الغورية (منطقة معروفة ببيع الأقمشة)، ووكالة الغوري، وجامع المؤيد، وباب زويلة. ولأن شارع المعز كبير جدًا فإحنا مش هـ نقدر نتكلم بالتفصيل عن كل الأماكن الأثرية، ولو عاوزين تعرفوا معلومات أكثر شوفوها هنا. وبكده تبقى انتهيت رحلتنا في شارع المعز، أحسن وقت تعمل فيه الجولة دي في الصيف، الصبح بدري جدًا أو قبل المغرب بساعة، استمتع بالتصوير، وكرر الزيارة علشان فيه أماكن أكثر هـ تستمتع بها، وتشتاق لها.

...

غاوي سفر؟ شوف 10 قواعد مهمة للتعامل مع الطريق
اصدرت في: 20/11/2016

هواة السفر الداخلي والتجوال والترحال.. اجمع هنا، عندنا كلام يخصكم أوي. طريق السفر طويل، ولو التعب ما أخدش نصيبه منك، الملل هيزعلك.. طيب والعمل؟ بص يا سيدي، دي القواعد العشر اللي تقدر تعتبرهم دليلك للراحة واستغلال الوقت وقتل الملل وتحصيل المتعة: 1- الكتاب اللي هتقراه في السفر هتستمتع بيه لدرجة أكتر بكتير جدًا من أي وقت تاني واسأل مجرب، خد معاك كتب.. ضروري. 2- اعمل حساب أن السفر لو بالليل أنوار الباص بتبقى مطفية طول الطريق، وبالتالي ففكرة القراءة مش هتكون مناسبة إلا لو جبت معاك كشاف قراءة صغير من أي مكتبة بتبيع إكسسوارات كتب زي "ديوان" أو "ألف" علشان تعرف تقرأ بالليل. 3- خلي الكتب اللي تجيبها معاك تكون خفيفة نسبيًا، روايات أو كتب موضوعية، بلاش الكتب اللي هتحتاج تركيز ذهني كبير أو مذاكرة وكده لأنك غالبًا مش هتعرف تديها حقها وهتتشتت كتير. 4- خد معاك على الموبايل كام فيلم كده لزوم الأزأزة وقت الليل اللي مش هتعرف تقرأ فيه، ويفضل الأفلام تبقى خفيفة برضه.. الأفلام العربي الكلاسيكية الكوميدية أو المسرحيات بتكون اقتراح جيد، هتنبسط يعني وهتذاكر مخزون إيفيهات تروش بيه على زمايلك في الرحلة للصبح! 5- المزيكا يا معلم، التراك ليست المتينة، وتاخدلك كرسي جنب الشباك وهاتك يا سرحان في الملكوت! 6- يفضل أنك تخلي التراك ليست كلها مزيكا هادية أو أغاني طرب، حاجات كده من بتاعت المزاج والروقان، علشان تعيش تجربة الهدوء بالكامل من جوة ومن برة وتتهيأ نفسيًا كويس علشان تندمج وتذوب في جمال الطبيعة وتتخلص تمامًا من تأثير دوشة القاهرة عليك. 7- طرق السفر في أماكن كتيرة بتبقى الشبكات فيها ضعيفة أو مش موجودة فماتعتمدش أوي على فكرة الموبايل إنترنت، بس حتى لو يعني الشبكة موجودة وسهل تفتح موبايل داتا وتستخدم إنترنت، البطارية مش هتسعفك علشان مدة السفر غالبًا بتبقى طويلة، فأنت تعمل حسابك في حاجتين: الباور بانك لو متاح، وتتأكد من أن التراك ليست بتاعت المزيكا معاك أوفلاين وماتعتمدش على ساوند كلاود علشان توفر بطارية، وتوفر في الـ Package كمان. 8- حمامات الاستراحات اللي هتقف فيها في طرق السفر في الغالب مش بتكون على المستوى المطلوب، وبالتالي فخلي أكلك وشربك في طريق السفر خفيف جدًا وعلى أد الحاجة العاجلة يعني علشان ماتحتاجش تدخل الحمام كتير، اشرب المياه على فترات وجرعات صغيرة، وخلي الأكل كله تسالي ورفيعات. 9- فين فقرة النوم؟ .. كلنا مستنيينها دي أكيد، بس خلينا نقول أن نوم الباصات متعب، غير أنه فرصة لاصحابك علشان يقفشوا عليك ملفات وصور أد كده، فأنت بقى تخليك واعي، وإن كنت لابد هتنام يعني فماتنساش مخدة الرقبة علشان رقبتك ماتتلوحش وتتكدر طول الرحلة، وماتنساش عصابة العين علشان الضوء مايضايقكش، وأي فوطة خفيفة تغطي بيها وشك علشان تستر نفسك وتفوت على أصحابك فرصة الغدر. وبالنسبة للبس، خلي لبسك خفيف وعملي، بلاش جينز، بناطيل الترينينج أو السويت بانتس أفضل كتير، بلاش تلبس كوتشي أو جزمة في طريق السفر، الكروكس اختراع جميل.. بلاش قميص، التيشرتات والسويت شيرتات أحسن. 10- الحقيقة إحنا خلصنا وماكانش في داعي لرقم عشرة، بس القواعد لازم تقفل على رقم غلاف كده ياخد العين، معروفة!

...

إزاي تسافر؟ الإجابة عند الرحالة المصريون
اصدرت في: 15/11/2016

ضروريات الحياة بتختلف من حد للتاني، واللي جرب متعة السفر للسفر لازم تلاقيه مع الوقت بيحطه في خانة الضروريات، ومايقدرش يستغنى عن سفرية دورية منتظمة حسب ظروفه، وبعد الظروف الاقتصادية الأخيرة الأوضاع بالنسبة لهواة السفر ازدادت صعوبة، سواء على مستوى الإجراءت أو على مستوى الاستعداد المادي، وبقينا محتاجين حد يقول لنا نعمل إيه. رابطة الرحالة المصريون رابطة نشأت حديثًا على يد مجموعة من عشاق السفر المصريين، وأول ما بدأ جرس الإنذار يدق قرروا أنهم ينظموا فعالية يلحقوا بيها زمايلهم في الهم، ويقولولهم يتعاملوا إزاي مع الوضع الجديد. يوم السبت 19 نوفمبر الجاري، من الساعة 5:00 للساعة 10:00 مساءً، في الحرم اليوناني –The Greek Campus- في التحرير، سعر تذكرة الحضور 35 جنيه، الحدث الأول اللي هتنظمه الرابطة، الحدث اللي هيكون عنوانه "تحدي السفر"، وهتكون كل الفقرات هي وصفة مختصرة لتخطي العقبات، والفوز في التحدي. الفقرات هتكون عبارة عن مجموعة كلمات مختصرة لبعض أفراد الرابطة أو كُتَّاب أدب الرحلات أو خبراء السفر، كل كلمة فيهم هتتناول مشكلة ما من مشاكل السفر وحلها البسيط، أو هتطرح مجموعة من النصائح المركزة لتحقيق أكبر استفادة ممكنة من السفر، أو هتقدم عصارة خبرة البعض في توفير التكاليف والمجهود وتخفيف الأعباء في التنقل. على هامش الفعالية هتقام مسابقة لأكثر قصة ملهمة في السفر، وصاحب أفضل قصة هيحصل على جائزة، القصص بيتم إرسالها على الصفحة الرسمية للرحالة المصريون. تقدروا تعرفوا أكتر عن الرابطة وأعضائها من خلال صفحتهم على فيسبوك من هنا.

...

جامع السلطان حسن: العبقرية مش فى المكان بس
اصدرت في: 23/10/2016

من أكثر أماكن القاهرة فى المهابة والتناسق والجمال والروعة والهدوء وراحة البال، تعالوا النهارده نبقى فى حضرة السلطان حسن والجامع الخاص به، السلطان الناصر حسن بن السلطان الملك الناصر حفيد السلطان قلاوون كان ملك حازم قوى بـ يحب الناس وبـ يعطف على الفقراء، ومتدين، قرر أنه يبنى مسجد يخلد اسمه فى التاريخ، فكان مسجد السلطان حسن. بدأ فى بناء الجامع سنة 757 هـ الموافق 1356م واستمر العمل فيه من غير توقف 3 سنين، تخيلوا بقى من غير توقف، وكان السلطان بـ يدفع في كل يوم 20 ألف درهم وألف وزنة ذهب، وكان من الطبيعى أن كل ده يرهق ميزانية الدولة، والسلطان حسن اعترف بده فقال: "لولا أن يقال: إن ملك مصر عجز عن إتمام بناءٍ بناه، لتركت بناء هذا الجامع". شارك فى عملية البناء من المعماريِّين والصنَّاع الكثير، لدرجة أن مافيش عامل أو صانع أو مهندس في القاهرة له علاقة بالبناء إلا واشتغل فيه، ومات السلطان حسن قبل أن ما يخلص الجامع، فقام الأمير بشير أغا الجمدار بإتمام البناء. شوفتوا بقى الموضوع كبير إزاى؟ ده عن فكرة البناء أما الجامع من الداخل فموضوع ثانى خالص، الجامع تحفة فنية بجد، هو عبارة عن صحن كبير فيه أربعة أماكن غير الجامع ودول عبارة عن أربع مدارس فقهية مختلفة كان الطلبة بـ يتعلموا فيها أمور الدين واللغة، وبـ تظهر براعة صناعة الرخام فى القبة والقبلة والمحرابين وهى حاجات كلها مصنوعة من الرخام وعليها زخارف معمولة بعناية، وتقدر تتعرف على الصانع المصرى الأصيل لما تشوف دقة النجارة العربية والتطعيمات المجسمة في الآيات المنحوتة على جدران القبة. أما باب المسجد النحاسي فهو مثال رائع لأجمل الأبواب المكسوة بالنحاس وهو معمول على هيئة أشكال هندسية، ما بينها محفور زخارف دقيقة متداخلة فيها المربع مع المثلث مع الدوائر وكأن هناك عالم هندسة اشتغل مصمم أبواب فى العصر ده. ومن كثر روائع الفن اللى موجودة فى المسجد مش هـ تعرف تفرق بين الأكواب النحاسية اللى بـ تنور وجنبها التشكيلات الزجاجية اللى بـ تكتشف أنها معمولة للإضاءة برضه، هـ تفضل عينك تروح يمين وشمال وفوق وتحت لا ترى إلا بديع الفنان المصرى الأصيل، لدرجة أن دار الآثار العربية بالقاهرة احتفظت عندها بتحف نادرة كثير وكلها كانت فى الجامع. مساحة الجامع تقريبًا 8 آلاف متر مربع فى مكان مرتفع جنب قلعة الجبل (يووووووه معلش شكلنا دخلنا فى العصر قوى وعيشنا فيه) قصدى قلعة صلاح الدين، وكأن السلطان حسن كان مُصر أن الجامع يكون في أعلى مكان في القاهرة وبالضبط جنب قلعة صلاح الدين الأيوبي، الرجل ده كان عاوز يوصل رسالة بـ تقول أن مصر فيها الحراسة والقوة اللى بـ تمثلهم القلعة وكمان فيها العلم والتدين اللى بـ يمثلهم الجامع. ويضم الجامع أربع مدارس، كل مدرسة لتدريس مذهب من مذاهب الفقه الأربعة، وهي: الحنفي، والمالكي، والشافعي، والحنبلي، وداخل كل مدرسة هـ تلاقى مجموعة كبيرة من الغرف علشان سكن الطلاب والمدرسين المغتربين، شوفتوا بقى التخطيط عامل إزاى. وما قصدش التقسيم والعمارة وبس، لأ تعالوا نقول لكم فى خطفة كده التعليم كان إزاى ساعتها وركزوا معانا، كان لكل مذهب شيخ و100 طالب و3 معيدين، وراتب لكل شيخ 300 درهم في الشهر، ولكل معيد 100 درهم، ولطلبة كل مذهب 4250 درهم فى الشهر، تخيلوا كان بـ يصرف قد إيه على التعليم؟، لأ مش كده وبس ده كمان كان بـ يصرف لكل طالب وجبة يومية وهدوم تكفيه طوال السنة وكان عامل نظام الرعاية الصحية للطلاب والمدرسين، وفيه طبيب مقيم معاهم علشان لو دارس أو شيخ تعب يعنى ما يلاقيش حد يعالجه ولا إيه، قد إيه الناس دى كانت عبقرية، العبقرية مش فى المكان بس صدقونا العبقرية كمان فى اللى بـ يصنع المكان. الجامع فى السيدة عائشة بجوار قلعة صلاح الدين الأيوبى.

...

راس شيطان: إسترخاء على الطريقة البدوية
اصدرت في: 23/10/2016

على أرض سيناء وبالتحديد في الشمال الشرقي، على بُعد ساعة سواقة من «نويبع». مجموعة من الخيم منصوبة على شط البحر الأحمر وكلها على الطراز البدوي البسيط، وعشان الإسم يخوِّف شوية بلاش تقول لأهلك إنك رايح «راس شيطان»، ممكن تقول إنك رايح «بساطة» اللي هو إسم المنطقة كلها. وبالرغم من الإسم المرعب، إلا ان «راس شيطان» تعتبر من أجمل الأماكن في مصر وفي منتهى الأمان، صحيح المشوار من القاهرة لهناك طويل، حوالي 6 ساعات بالعربية بس يستاهل وكفاية إنك هتنسى هناك زحمة العاصمة وجنانها. هتهرب لمكان بطبيعة بِكر وبدائي نسبيا وأسعاره رخيصة! إزاي تروح لو عندك عربية متينة هتكون أحسن من إنك تبقى تحت رحمة سواق أتوبيس، هلكان من السواقة ليل ونهار. ولو مسافر مع مجموعة كبيرة، ممكن تأجروا ميني باص وغالبًا ده بيكلف حوالي 1000 جنيه للمشوار رايح جاي، مبلغ معقول لأنه هيتقسم على مجموعة كبيرة من الأفراد، ممكن كمان تركب أوتوبيس شركة «شرق الدلتا» من موقف «ألماظة» بيروح «نويبع»، بس تكون عارف بالظبط هـ تنزل فين على الطريق وتخلي شنطتك معاك لأن «راس شيطان» مالهاش محطة رسمية ولازم تقول للسواق عشان يُقفلك على جنب مكان ما انت عايز. إتأكد أن معاك إثبات شخصية بطاقة أو جواز سفر وﭭيزا سارية المفعول لو كنت مش مصري عشان نقط التفتيش كتير على الطريق جوة سيناء وممكن يعطلوك لحد ما يتأكدوا من سلامة أوراقك، ممكن توصل إنهم يرَجّْعوك مكان ما جيت! ممكن تركب طيارة لمطار شرم الشيخ وتنزل تركب أوتوبيس لمدة 3 ساعات بس كده إحنا مش موفّرين وقت قوي فـ مش مستاهلة تكاليف. تقعد فين الفكرة كلها في موضوع الخيم المنصوبة على الرمل، يا إما كوخ على تل أو كشك على البحر على طول، الإختيارين مريحين والأماكن كلها نضيفة، الأكشاك اللي على البحر أرضيتها رمل ناعم بس الأكواخ فيها خصوصية أكتر وأماكن للنوم عالية عن الأرض وليها شبابيك خاصة بيها. الحمامات مشتركة بس نضيفة وفيها مية جارية. ورق الحمام هناك برة الفاتورة لو حابب تاخد معاك من هنا وإنت رايح. الكهرباء هناك بمولدات وده معناه أن النور هيتقطع على نص الليل فخد معاك شمع وكشافات وبطاريات كفاية، وتبقى فكرة كويسة لو خدت مبيد حشري وملايات ومخدات صغيرة أو " Sleeping Bag " أو أي حاجة ما تقدرش تعيش من غيرها. بنرشحلك مخيم «عياش كامب» عشان المكان مميز والعاملين فيه متعاونيين ، ده غير أن في صخرة ضخمة على البحر مثالية إنك تقعد عليها وتِعد النجوم، لو حابب. في خيارات تانية للأماكن زي «كاسل بيتش كامب - Castle Beach Camp » أو «بيترا كامب- Petra Camp » ودول مشهورين بالأكل اللي بيقدموه. تاكل إيه الأكل من أمتع الحاجات في الرحلة، الفطار بيكون وليمة من البيض والعيش البدوى والفول أو البطاطس والمربى والزبدة وسلطة الفواكه مع شاي أو قهوة، وطول اليوم ممكن تطلب حاجات، بطاطس محمرة، بيتزا وسندوتشات وعصاير وصودا. بالليل المنيو بيكون بدوي برضُه وفي رز وخضار ولحمة أو سمك وفي نظام دفع شبه متفق عليه هناك هو أنه بيجمع الفاتورة وتدفع مرة واحدة وأنت ماشي من المكان، فياريت تكون عارف وحاسب انت خدت أيه طول فترة إقامتك. أنشطة أحلى نشاط تعمله هو الإسترخااااء، الخيم والكراسي اللي على البحر إتعملت عشان كده. خد معاك كتب ومجلات وكوتشينة وطاولة أو أي آلة موسيقية، وخد شيشتك معاك لو عايز تشيش على البحر. لو بـ تزهق من القعدة ممكن تتمشى أو تتسلق التلال الصخرية اللي برة المُخيم، وممكن تاخد مركب وتعمل رحلة بحرية وتستكشف المكان، معظم الناس بيناموا بدري وبـ يصحوا بدري عشان يستفيدوا بأطول وقت ممكن في النهار. تروح إمتى المُخيمات هناك بتفتح عادةً من أول فترة الربيع لحد آخر الخريف والجو بيكون رائع في الفترة دي، لو حابب الشط والمية أكتر من أي حاجة تانية روح في شهر يونيو أو يوليو، بس خليك فاكر أن مفيش تكييف وشهور الصيف عمومًا حر جدًا هناك. زيارة الخريف أحسن كتير بس ياسلام لو مافيش ناموس تبقي مالهاش مثيل. الناس هناك من ثقافات وجنسيات مختلفة. لِمْ مجموعة ظريفة من أصحابك وروحوا قضوا أجازة في الشمس هناك، ممكن «راس شيطان» تخطف قلبك وتبقى مكانك المفضل للأجازات بعد كده.

...

5 أماكن في مصر لازم تجربهم في الشتاء
اصدرت في: 17/10/2016

السفر تجربة فريدة بتخلي روحك خفيفة، ومزاجك مضبوط. مش بس علشان القاهرة زحمة وضغط الشغل والحياة الروتينية، لكن كمان من حق نفسك عليك أنك كل فترة تخليها تكتشف مكان جديد يبسطها ويخليها تشعر بالحرية والجمال. ولأن الشتاء قرب فقولنا نختار لكم أفضل 5 أماكن ممكن تسافروا فيها في الشتاء وتستمتعوا بجمالها. الأقصر وأسوان المشتى الرئيسي لأبناء القاهرة المحروسة من زمان، مين يقدر يقاوم سحر الأثار هناك ولا جمال النيل، بالذات منطقة غرب سهيل اللي جمالها من جمال أهل النوبة وحلاوة تفاصيلهم وكرمهم، وكنا كتبنا موضوع كامل عنهم ممكن تشوفوه هنا. يا ريت تجربوا تركبوا Air Ballon في الأقصر واللي بتوريكم كل الآثار تقريبًا بس من الجو، وأكيد تستمتعوا بفلوكة في النيل. دهب ونويبع من الأماكن الجميلة جدًا صيف وشتاء، ننصحكم تروحوهم لحد شهر يناير بس بعد كده ممكن تتلجوا بليل، لو بتحبوا تجربوا أنشطة كتيرة زي الغطس والسنروكلينج وتسلق الجبال يبقى مكانكم دهب أكثر، بس لو أنتم من محبي الطبيعة والهدوء والعشاء البدوي والتأمل واليوجا نويبع هتكون مناسبة أكثر، بس الأكيد أن منظر الجبال هناك مع البحر بيخلي روح تدوب من الجمال. المنيا إيه رأيك تجرب حاجة جديدة وتروح المنيا؟ المنيا من الأماكن المجهولة لناس كتير أنهم ممكن يقضوا وقت لطيف ويتفرجوا على الأثار الفرعونية اللي هناك، ده غير جمال النيل هناك وهدوء البلد وممكن تحجزوا من على booking.com بمنتهى السهولة. الفيوم بنحسها مظلومة برحلات اليوم الواحد، لأنها منطقة جميلة وهادية، خاصة قرية تونس، اللي فيها أكثر من فندق يعيشك في رفاهية مع الأكل المصري الأصيل وبحيرة قارون، ممكن تتفرج على أنواع الطيور المختلفة هناك، أو تروح وادي النطرون أو تتزحلق على الرمال، وكنا كتبنا عنهم موضوع كامل بالفنادق وأسعارها من هنا. الإسكندرية "شط إسكندرية يا شط الهوا" صيف شتاء عروس البحر المتوسط ليها عشق خاص، مالوش زي. بس جمال إسكندرية في الشتاء ما يعروفش إلا واحد واقع في حبها من زمان زينا كده، البحر بليل في البرد مع آيس كريم عزة، ولا زيارة لألبان سويسرة... مافيش كده... ك ده غير طبعًا كوبري ستانلي والمنتزه وجمال مكتبة الإسكندرية وحفلاتها. مصر مليانة أماكن جميلة مستنيانا نكتشفها، بس أنت دور وخد قرار أنك تشوف الحاجة الحلوة وسط الضباب.

...

كايرو في التوفير: 9 حاجات تعملها في القاهرة ببلاش!
اصدرت في: 13/10/2016

مفيش أحلى من الخروج والفسح، غير الخروج والفسح من غير ما تدفع مليم! لو عاوز تقضي وقت حلو بس مفلس ولا في آخر الشهر٬ ما تتضايقش لأن القاهرة فيها فرص خروجات ممتعة جدًا ومن غير ما تدفع حاجة . اختارنالك 9 من الخروجات اللي بنحكيلك عنها٬ وأكيد في غيرها كتير . 1. حفلات موسيقية وعروض : منجم دهب لمحبي المسرح والموسيقى٬ القاهرة فيها أماكن كتير بتقدم حفلات وعروض أغلبها مجاني تقدروا تعرفوها كلها من أجندتنا على الرابط ده. 2. معارض فنية : فيه أماكن كتير ممكن تتمتع فيها بمعارض فنية في القاهر. زي «درب 1718 » اللي عندهم معارض دورية والدخول مجاني. هتلاقوا كل التفاصيل في الرابط ده. 3. جاليريهات الزمالك : الزمالك مشهورة بعدد كبير من المعارض الفنية. حوالين شارع البرازيل لوحده في عدد كافي من الجاليريهات ممكن تقضي يوم بحاله تتفرج عليها. ابدأ من شارع البرازيل من عند تقاطعه مع 26 يوليو، هناك هتلاقي جاليري «سفر خان»، ولو مشيت في الشارع في اتجاه «سيكويا - Sequoia » هـ تعدي على «زمالك آرت جاليري - Zamalek Art Gallery » امشي عشر دقايق كده واستمتع بمعمار المنطقة الجميل، المعارض دي متخصصة في الفن المعاصر المصري. 4. محاضرات وأفلام : من الكنوز الحقيقية في القاهرة، المحاضرات وعروض الأفلام اللي بـ تكون متاحة لكل الناس ببلاش وتقريباً كل يوم في القاهرة . دايماً هـ تلاقي حاجة بـ تتعرض في واحد من المراكز الثقافية المستقلة دي: المركز الثقافي الفرنسي (وده ليه فرعين، واحد في المنيرة، والتاني في أرض الجولف)، المركز الثقافي الإيطالي، ودرب 1718. 5. متاحف : مش كل الناس بتنبسط بالفرجة على معروضات في متحف ... لكن اللي بيحب الحاجات دي في القاهرة شخص محظوظ، لتلات أسباب، الأول ان في متاحف كتير غنية جدًا في القاهرة، والسبب التاني ان احياناً كتير بيكونوا قريبين من بعض في نفس المنطقة، والسبب التالت ان رسم دخول المتاحف رخيص جدًا وغالبًا ما بيكون 2 جنيه بس . ومن المتاحف اللي ممكن تكون مازورتهاش وبـ نرشحهالك: » متحف جاير أندرسون « ، متحف النسيج المصري والإتنين في القاهرة الفاطمية، ومتحف الخزف الإسلامي في الزمالك. 6. سياحة دينية : عاصمة شعب، من أكثر الشعوب تدينًا في العالم، فيها من دور العبادة الأثرية والمحورية في الأديان السمواية كتير، وزيارتهم بتكون مثرية وممتعة. من أول الكنيسة المعلقة لمسجد ابن طولون، لمعبد بن عزرا . تفاصيل وتاريخ دور العبادة دي هيسحرك ويزودك بمعلومات قيمة ماكنتش تعرفها. 7. التمشية في وسط البلد : مش هتكلفك حاجة وهتستمتع جدًا. 8. أسواق القاهرة العريقة : كل مصري يعرفله سوق ولا اتنين بس كتير من المش محتكين بالجانب التراثي والتاريخي من المدينة ما يعرفوش أسواق زي سوق السجاد في القاهرة الفاطمية . وحتى لو شارع محمد علي وصناع الآلات الموسيقية اللي فيه معروفين لكل قاهري، إلا ان اللي راحوا هناك مش كتير، ولأي سايح أو مصري ماشافهوش ده بيكون متعة كبيرة . ده غير سور الأزبكية، وسوق خان الخليلي. 9. التمشية على كورنيش النيل: جرب تعمل كدة وهتحس بسعادة كبيرة.

...

قرية تونس: بتوفر لك أجمل ويك إند ممكن تقضيه في الفيوم
اصدرت في: 11/10/2016

كل فترة بنحب نروح مكان جديد نهدى فيه أعصابنا ونستريح علشان نشحن ونقدر نرجع شغلنا ثاني، علشان نقدر على الإبداع.. قرية تونس فى الفيوم مش بس بتوفر لك ده، لأ دي تعتبر من أكثر الأماكن اللي بتلهم المبدعين والفنانين في جميع مجالات الفن برغم بساطتها إلا أنها آيه في الجمال. القرية بسيطة جدًا البيوت الأساسية للسكان المحليين مبنية بالطوب وفي الطريق لها من عند البحيرة فيلات وأماكن خاصة مبدعة وفارهة لأعلام كثيرة في المجتمع منهم الفنانين والسياسيين، وفيه في القرية ثلاثة فنادق: "سوبيك" و"زاد المسافر" و"كوم الدكة". تعتبر قرية تونس من أكثر الأماكن الجميلة اللي مش واخدة حقها زي ذهب أو نويبع، صحيح ما عندهمش بحر بس عندهم بحيرة قارون الساحرة واللي طلع اسمها مش على اسم الفرعون قارون زي ما كنا فاكرين، طلع أنه علشان البحيرة فيها ألسنة كثيرة كانوا بيسموها زمان قرن محمد أو قرن أحمد على حسب مالك الأرض في الحتة دي، وبعدين بقى اسمها قرون وبالزمن بقى قارون، زي ما حكى لنا أحد أبناء قرية تونس، كمان شلالات وادي الريان اللي في قلب الصحراء، وأنشطة مختلفة وممتعة هـ نكلمك عنها بالتفصيل. مبدأيًا كده، قرية تونس مكان تتأمل فيه براحتك وتفصل فيه عن العالم الخارجي، وتراقب الطيور على بحيرة قارون، وبالنسبة للفنانين قرية تونس تعتبر حاضنة لكل أنواع الفنون وبالأخص فن الخزف، وده لوجود ART Center الخاص بالفنان محمد عبلة واللي بـ يتعمل كل سنة في الشتاء، وبـ يبقى فيه دورات تعليمية لفنون الخزف والتصميم والتصوير والكتابة، وبـ ييجي له فنانين من كل أنحاء العالم علشان يتعلموا ويعلموا، وبـ يكون على الفنانين أنهم يباتوا في خيم أو فندق من الفنادق دي. نبدأ بفندق زاد المسافر اللي في أول طريقك للقرية، واللي له مدخل خاص به على الطريق، ومدخل داخلي من جوه القرية بس بـ تدخله وأنت ماشي على رجلك مش بالعربية، أول ما بـ توصل بـ تلاقي أمامك حقل مليان ورود برتقالي جميلة والنوع ده ما بـ يتزرعش في مصر عادة بس سبحان اللي خلاه يتكيف في أرضنا. الفندق ديكوراته كلها على الطراز البدوي، اسم على مسمى فعلًا، المكان كبير وفيه مكان خاص بإشعال النار لو حابين تعيشوا جو البدو بكل تفاصيله، وحوله مجموعة خيم جواها قاعدة عربي أو بدوية بقى، وأمام الخيم دي قاعة مقفولة كبيرة احتارنا كثير هي إيه لحد ما تفاجأنا أنها مكتبة.. تخيلوا؟ وكل يوم جمعة زاد المسافر عامل Book Club بـ يناقشوا فيه كتاب مختلف. الغرف على شكل بيوت بيضاوية لونها بني، بدائية الصنع، ما أنت في تجربة روح المسافر بقى، والشبابيك بتاعتها عليها قماش ألوان قوس القزح، بس أجمل حاجة صوت العصافير اللي بـ تصحى عليه، والهدوء النفسي اللي في المكان، ده غير أن الأشجار هناك مبهجة مع المدخل اللي مليان طوب صغير وترابيزات لو حابب تقعد، غير الفرن البلدي اللي بـ تخبز فيه العيش ست فلاحة أمام عينيك وريحته تهبل من جماله، وكان فيه حمام سباحة بس مش مجهز للشتاء، في الصيف وعليكم خير بقى، كمان الأكل هناك مميز جدًا، بالذات الفطير بالعسل والجبنة لازم تجربوه. أما بالنسبة للأسعار فده بـ يختلف من حيث الوقت والغرفة اللي هـ تحتاجها وتقدروا تعرفوا التفاصيل دي كلها من على صفحتهم على الفيسبوك. أما المكان الثاني واللي أسعاره مشابهة لأسعار زاد المسافر بس بـ يتميز أنه أكله أحلى وبيتي أكثر بكثير هو سوبيك – Sobek برضه البيوت واخدة الطراز البسيط اللي أشبه بالنوبي، وبرضه عندهم قعدة نوبي، صحيح فيه حمام سباحة مجهز ومكان مرتفع تشوف منه الحقول الخضراء، بس المكان صغير نسبيًا مقارنة بزاد المسافر، غير أن المكان مليان كلاب، فالناس اللي مش بـ تحب الكلاب الكثيرة أكيد ده مش مكانهم لأنهم كلاب أصحاب المكان. الغرف مجهزة بكل وسائل الراحة اللي تحتاجوها ولو أن ساعات بـ تبقى فيه أساسيات ناقصة في الحمام، لا يمكن الاستغناء عنها. والأسعار برضه بـ تختلف على حسب وقتكم وعددكم وتقدروا تعرفوا التفاصيل ونمرهم من هنا. أما الفندق الثالث كوم الدكة فده يعتبر حكاية ثانية خالص لوحده، لأنه على البحيرة على طول وأسعاره غالية جدًا للأسف. وبرضه المكان البيوت فيه بسيطة وحولها مساحات خضراء وورود وكمان كل الأنشطة اللي ممكن تعملوها في الفيوم مجانية بفلوسكم بقى، وتقدروا تشوفوا صور المكان الجميلة جدًا، وكل المعلومات اللي تحتاجوها من صفحتهم على الفيسبوك. أما عن الأنشطة اللي ممكن تعملوها هناك فهي حاجات كثيرة قوي: أولًا: أكثر حاجة متميزة فيها قرية تونس تعليم فنون الخزف والرسم عليه بكل أنواعه لدرجة أن ما بين كل بيت تلاقي ورشة لتعليم وبيع الخزف ودي حاجة مبهجة في حد ذاتها، أنك ممكن تتعلم الفن ده باحترافية هناك. ثانيًا بقى: مراقبة الطيور، فيه هناك شخص بـ ياخدك تتفرج على كل أنواع الطيور اللي تعرفها واللي ما تعرفهاش، في الوقت اللي يناسبك الصبح عند وادي الريان والمجموعة ما بـ تزيدش عن سبعة أشخاص، وبـ يوفر لكم كل الأدوات اللي تحتاجوها والمعلومات عن الطيور بـ 500 جنيه بس. أجمل حاجة في قرية تونس أنها على بُعد نصف ساعة من وادي الريان يعنى حوالي 30 كيلو، ودي ميزة جميلة جدًا، لأنك لو رحت وادي الريان هـ تستمتع بالشلالات هناك، والتزحلق على الرمال وكمان Parasailing (نط بالبراشوت من على هضبة)، كمان أنت قريب جدًا من وادي الحيتان المتخصص في التزحلق على الرملة بس، وقصر هارون ومتحف الفيوم. بس الحقيقة أن الفيوم مكان ملهم لأى فنان بسبب جمال الطبيعة، أو حد عاوز يريح أعصابه من دوشة القاهرة وتعبها في الويك إند، بس خلي بالك أن في الشتاء الجو حار الصبح وبرد بالليل، لكن في الصيف بـ يبقى حر جدًا الصبح وبليل. لازم تجربوا يومين في قرية تونس الممتعة مع أحبابكم وأصحابكم، وتعيشوا بروح المسافر اللي بـ يعشق يشوف الجمال ولو ليومين بس.

...

5 حاجات مفيدة ما كنتش تعرف أنها موجودة في الأزهر والحسين
اصدرت في: 10/10/2016

مين فينا ما راحش شارع المعز ومنطقة الأزهر والحسين ولف فيهم مع أصحابه واتصور في الجامع الأزهر وجامع الحاكم بأمر الله وبيت السحيمي و.. و .. لكن بيفوت علينا أننا ناخد بالنا من أماكن هناك فيها خدمات أو منتجات مفيدة ومطلوبة جدًا وممكن يصادف أننا نكون في حاجة ماسّة ليها كمان .. تعرف ليه مش بناخد بالنا؟ شوف يا سيدي.. "اللي يخاف من العفريت يطلع له" ! المثل الشعبي الدارج اللي كلنا عارفينه واستخدمناه في مواقف قبل كده .. لكن قليل مننا اللي ممكن يكون فكر أن المثل ده ليه بعد علمي، بمعنى أن فيه أصل علمي ما بيوافقه ويدعمه.. إزاي الكلام ده؟ ببساطة شديدة لو قلبنا كده تقليب سريع في أي كتاب بيتناول بعض المبادئ المستقرة في علم النفس هنلاقيه بيجيب سيرة حاجة اسمها: "مبدأ الاستعداد والإهمال".. المبدأ ده باختصار شديد -وبنوع من التعديل علشان نبسطه- بيقول أنك لما تكون مستعد ومركز بتنتبه لتفاصيل أكتر بكتير من لو أنت مش مركز.. يعني مثلًا.. لو احتجت مرة وأنت في الشغل تنزل تصور ورق وأنت ما تعرفش مكتبات تصوير في المنطقة اللي حوالين مكان الشغل.. و هتبدأ تدور.. وأنت بتدور وعمال تبص على المحلات على يمينك وشمالك.. هتلاقي نفسك بـ تكتشف محلات كتير جدًا وأماكن متنوعة بتقدم خدمات مختلفة أنت ماكنتش واخد بالك منها رغم أنها موجودة في مكانها من زمان وأنت بتعدي عليها كل يوم.. كل الفرق بس أنك قبل كده ما كنتش منتبه.. يعني كنت في طور الـ "إهمال".. ودلوقتي أنت مركز.. يعني بقيت في طور الـ "استعداد"! وده تفسير اللي بيحصل لينا في زياراتنا الكتير لمنطقة الأزهر والحسين.. نظرًا لأننا دايمًا بنكون رايحين علشان نتفسح ونصور ونتصور وبس.. فمش بناخد بالنا غير من الأماكن اللي ليها شكل مميز وتصلح كمكان كويس للفسحة أو للتصوير.. غير كده غالبًا مش هناخد بالنا من أي حاجة تانية. يعني مثلًا.. كام مرة فكرت أنك تدرس فن الخط العربي وقعدت تدور على مكان يكون بيعمل دورات تدريبية في المجال ده من غير ما تكلف نفسك ماديًا كتير وفي نفس الوقت تبقى بتاخد محتوى قوي من متخصصين أصحاب كفاءة عالية؟ وما أخدتش بالك أنك لما بتروح الحسين بتكون قريب جدًا من مؤسسة من المؤسسات اللي ليها باع طويل في تدريس الفنون التراثية العربية زي الخط العربي والمقامات الصوتية للغناء الشرقي وغيرهم.. مؤسسة الحلقة لعلوم التراث.. تقدر تعرف عنها بشكل أكبر لما تشوف مقالنا السابق عنها. كمان من الحاجات اللي ممكن تشد جدًا هناك في المنطقة وممكن يكون ما حدش كتير يعرف عنها حاجة هي سوق بيع الجلود المدبوغة الموجودة في منطقة باب زويلة بالدرب الأحمر المجاورة لمنطقة الغورية.. الجلود دي بتبقى جلود طبيعية بتتباع بالمقاس وتقدر تستخدمها في حاجات كتير جدًا.. وكنا عرفناها -للطرافة الشديدة- عن طريق أحد أساتذة الأدب العربي الكبار اللي كان بيحب يجيبها ويكتب عليها قصائد الشعر ويزين بيها الأماكن اللي بيكون متواجد فيها علشان يحاكي اللي كان بيعمله الشعراء العرب زمان! بالإضافة لأن منطقة الحسين -التكامل مع منطقة شارع محمد علي في العتبة- تعتبر هي السوق الأكبر لبيع آلات الموسيقى الشرقية والشعبية في القاهرة.. يعني الآلات اللي زي العود أو الناي أو آلات الإيقاع الشرقي.. هتلاقي أماكن بيعها متوفرة هناك بكثرة. من الحاجات كمان اللي مش كلنا بناخد بالنا منها أن المنطقة اللي وراء الجامع الأزهر دي كنز كتب بالمعنى الحقيقي للكلمة.. عدد كبير جدًا من المكتبات اللي بيتباع فيها كل الكتب التراثية العربية في كل العلوم. والموضوع أكيد هيكون مفيد بشكل أكبر لأي باحث في علوم التراث العربي أو أي أديب حابب يستزيد معرفيًا علشان يقدر ينتج إنتاج أفضل. غير كده خليك متأكد أنك بيفوتك كتير جدًا جدًا لو ما تعرفش الأماكن اللي بيتعمل فيها عروض فنية هناك باستمرار .. زي مثلًا وكالة الغوري (الشارع بتاعها في نفس صف الجامع الأزهر وقبله شوية ناحية منطقة الغورية) اللي بيتعمل فيها عرض التنورة الرائع بشكل دوري ثابت غير فعاليات تانية بتتعمل على فترات مختلفة. وكمان مركز الربع الثقافي (في نص شارع المعز – جنب مسجد الأقمر) اللي كتير بيستضيف فرق بتقدم ألوان مختلفة من ألوان الفنون الشعبية أو بيعمل دورات تدريبية ومحاضرات في مجالات مختلفة على فترات. الحاجة الأخيرة اللي ممكن نشاور عليها ونقول لك أنك ممكن تستفيد منها خلال وجودك في منطقة الأزهر والحسين بالقاهرة هي الدروس اللي بتتعمل بشكل ثابت ومستمر في الجامع الأزهر وفي أماكن تانية حوله زي مضيفة الشيخ علي جمعة ومضيفة الشيخ إسماعيل صادق العدوي. بيتعمل في الأماكن دي دروس علمية باستمرار في كل علوم التراث العربي والإسلامي على إيد مشايخ وأساتذة متخصصين تقدر تستفيد من متابعتها وحضورها أو حتى من مقابلة الأساتذة اللي بيدرسوا المحتويات دي وتستفيد منهم في مجالات تخصصهم. وبس يا سيدي .. فسحة ممتعة، وجولة مفيدة.

...

دليلك لسفاري الصحراء في إجازة العيد
اصدرت في: 08/09/2016

كل سنة وأنتم طيبين، العيد على الأبواب و إجازته النوبة دي جاية على المزاج والهوى، فرصة حقيقية للفصلان التام من الالتزامات وأعبائها، والكل بدأت شاشات مخيلته تعرض له السيناريوهات الأنسب لاستغلال الفرصة دي. مؤخرًا بدأنا نشوف ثقافة "سفاري" جديدة بتنتشر بشكل ملفت في مصر، ثقافة بتختفي فيها الأغراض الترفيهية للسفر، وبتاخد مكانها الأغراض الاستكشافية، وده واضح جدًا في الطلب الكبير اللي بقى على رحلات الصحراء، ورحلات الرصد الفلكي، وغيرهم.. واليومين دول طرحت علينا الجهات اللي بتنظم سفريات من النوعية دي وللأغراض دي اختيارات كتيرة جدًا وبرامج مختلفة لقضاء إجازة عيد مميزة، وإحنا كالعادة ماينفعش حاجة زي دي تفوت علينا من غير ما نرصد لكم كل الموجود على الساحة ونقدم لكم التجميعة التمام علشان تبقى بمثابة قائمة اختيارات ليكم تشوفوا منها الأنسب لكم، وتدوسوا بنزين! هايكينج الناس اللي بتحب الحركة والتجوال هيعجبها النوع ده من الرحلات جدًا، صمت تام، سماء صافية، ضوء خافت للقمر، طريق رملي، براح مطلق، مشي هادئ.. تجربة من أعظم التجارب اللي ممكن تعيشها، وفي النوع ده من الرحلات عندنا في العيد رحلتين.. الأولى: من تنظيم مساحة العمل المشتركة "شفشاون" في الدقي، الرحلة عبارة عن سفر لليلة واحدة، التحرك هيكون الجمعة 16 سبتمبر، والوصول هيكون مع غروب الشمس، ويبدأ التحرك مشيًا بالليل في صحراء الفيوم لمدة 14 كم، وبدء التحرك للعودة هيكون فجر السبت 17 سبتمبر، وسعر تذكرة الرحلة 220 جنيه، تقدروا تعرفوا كل تفاصيلها من هنا. الثانية: هتكون من تنظيم "غامر" للرحلات، الرحلة هتكون عبارة عن مغامرة سيناوية بدرجة "ممتاز جدًا"، أربعة أيام في أحد أجمل الأماكن الطبيعية في مصر، كل مكونات الطبيعة تقريبًا موجودة في مساحة واحدة، برنامج الرحلة هيستمر في الفترة ما بين 13 و 16 سبتمبر، وبداية التحرك للسفر هتكون مساء الاثنين 12 سبتمبر، والعودة هتكون مساء الجمعة 16 سبتمبر، وسعر التذكرة 850 جنيه، والتفاصيل اعرفوها من هنا. رصد فلكي المميز في رحلات الرصد الفلكي أنها بجانب المتعة الكبيرة اللي بتبقى شايلاها، بتكون كمان شايلة قدر لا بأس به من المعرفة والاستفادة العلمية، في العيد هنكون على معاد مع تحفة جديدة من تحف "Astrotrips"، معسكر صحراوي للرصد الفلكي بصحبة ناس على علم ودراية بالمجال في أحد أجمل أماكن الفيوم وأصفاها سماءً وأعلاها قيمة سواء من الناحية السياحية أو العلمية، وادي الحيتان، الكامب هيكون يومي 9 و 10 سبتمبر، وهيبقى النشاط الرئيسي فيه هو رصد السماء وأجرامها وظواهرها بداية من غروب الشمس وحتى طلوع الفجر، التذكرة بـ 250 جنيه، وبقية التفاصيل ممكن تعرفوها من هنا. سفاري وتخييم رحلات السفر الحر في الصحراء بتبقى نوع من الانسجام التام مع الطبيعة الصحراوية، الواحد يسيب نفسه للصحراء، ويسلم روحه ليها، أكله ونومه وحياته كلها بتاخد طابع مختلف طوال فترة وجوده فيها.. في النوع ده من السفاري عندنا في العيد إيفينت من تنظيم الرحالة المصرية "ريهام أبوبكر" اللي حولت نظام حياتها بالكلية علشان تشبع شغفها بالصحراء وبراحها وبدأت تنظم رحلات مجمعة للصحاري المصرية المختلفة، الرحلة المرة دي هتكون لصحراء الواحات، الصحراء البيضاء والسوداء والفرافرة بأبرز معالمهم ومزاراتهم الطبيعية والسياحية، الرحلة هتبقى يومي 15 و 16 سبتمبر، وتذكرة حضورها 575 جنيه، وتفاصيلها تعرفوها من هنا. رحلات أخرى والناس اللي مش بتستهويهم رحلات الصحراء أوي لكن لازال شغفهك بالطبيعة ورحلات السفاري قائم نقدر نقول لهم على رحلات تانية هتطلع في العيد برضه لكن بطبيعة مختلفة وأنشطة أخرى قد تكون أنسب ليهم، زي الرحلة اللي هتنظمها "Chill Out" لمنطقة وادي الجمال في الفترة مابين 14 و 17 سبتمبر، وزي الرحلة اللي هتنظمها "Kites" لدهب في الفترة ما بين 23 و 26 سبتمبر. عيد سعيد عليكم جميعًا، وإجازة مفيدة ومريحة وممتعة إن شاء الله.

...

شاهد المزيد
مواضيع خاصة

النهارده في القاهرة: سهرة ميكس مع كل ألوان الفن

رغم البرد اللي مخلي كل الناس عايزة تفضل متدفية في السرير، بس برضه أجندتنا مابتخلاش من الحفلات اللي هتخليك تصحصح وتفرفش، علشان تخرج تقضي ليلة سعيدة بعد الشغل. تعالوا