دليل البرامج والمسلسلات - مقالات عن برامج ومسلسلات العالم العربي

تليفزيون

ثلاثي أضواء الحياة: مقارنة الضحك الظالمة
اصدرت في: 14/11/2016

بدأت قناة الحياة الفكرة من زمان، في الأول عملت أول برنامج مسابقات على التلفزيون تعرض فيه شباب موهوب "ستاند اب كوميدي" ومع إن البرنامج ماحققش صدى كبير زي برامج الغنا مثلًا وغيرها، لكن الفكرة كانت حلوة ومحتاجة علشان تتنفذ أحسن نعلى بيها ونجيب لها شباب متميز، ومن خلال البرنامج ده طلع مجموعة من الكوميديانات المتميزين، شباب بجد يموتوا من الضحك، ربنا مديهم قدرة على الضحك مش عند حد، يمكن هما معروفين شوية من خلال عروضهم على المسارح وفي العروض اللي بتتم في الأماكن المختلفة خاصة الأماكن الثقافية اللي بدأوا منها مشوارهم زي الجريك كامبس والساقية، لكن على التلفزيون حاجة تانية. الاستغلال استغلت قناة الحياة فوز تلاتة من الشباب، وعملت لهم برنامج جديد، بدأ العرض بتاعه من خلال مجموعة من بروموهات شالت عنوان البرنامج الكوميدى الجديد "ثلاثي ضوضاء الحياة"، وطبعًا كان من تقديم الثلاثي تركي ومينا وميزو أبطال برنامج "نجم الكوميديا" The Comedyواللي كان في لجنة تحكيمه "حسن حسني، ومحمد هنيدى، وسيرين عبد النور"، وحصل على المراكز الأولى في البرنامج تركي ومينا وميزو. البرومو بيعتمد البرنامج على مجموعة من المواقف الكوميدية، وكوميديا الموقف زي ما إحنا عارفين محتاجة حالة خاصة جدًا من التعب والشغل الكتير، على مستوى الكتابة والتمثيل والضحكة كمان، ظهر في البرومو الأول عريس مش عارف يعمل إيه في يوم زفافه، وفي البرومو التاني بيطلع واحد فيهم بدور شحات، والتالت بيعمل في قهوة ومش فاهم الزباين عايزة إيه. التقليد تلات شباب نفسهم يقلدوا ثلاثي أضواء المسرح زمان، فيهم الرفيع والطويل والمليان، عايزين يعملوا جو زي جورج سيدهم وسمير غانم والضيف أحمد، وهنا نقف شوية نبص على الموضوع، إحنا مش من أنصار فين أيام الفن الجميل اللي راح ومش عايز يرجع، بس مش هينفع أي مقارنة ما بين تركي ومينا وميزو، وجورج وسمير والضيف، لأن الثلاثي القديم كان له روح مختلفة وساب بصمة في تاريخ السينما، وكل واحد فيهم كان مميز في مجالات مش مجال واحد. إحنا شايفين إن اختيار الاسم عمل مشكلة أكتر ما خلى لناس تركز معاهم وتركز على المحتوى اللي هيقدموه، علشان ببساطة لما ربطوا اسمهم بالثلاثي اللي فات بدأت الناس تقارن ما بين الموضوعين، مع إننا في عصرين مختلفين لكن برضه الضحك واحد، والقديم يكسب برصيده الكبير والذاكرة اللي اتحفرت في ذهننا عن الناس الجميلة دي. البرنامج حلو وروحه حلوة وبيضحك في كتير من مواقفه، وكمان بيخليك تستعيد ذكريات حلوة ساعات، وبيحاول يتريق على حاجات في مجتمعنا محتاجين نقف عليها ونتكلم عنها شوية، عمومًا شوفوه واحكموا.

...

برنامج وإن أفتوك: برنامج مثير للجدل على قناة On E
اصدرت في: 10/11/2016

في البداية بنوضح إن البرنامج أثار حالة جدل كبيرة، وفيه أكثر من متخصص اعترضوا على بعض الفتاوى اللي ظهرت في البرنامج، ومقالنا الجاي بيعرض وجهة نظر واحدة، وفي النهاية أنت اتفرج بنفسك وخد قرار هل البرنامج يستحق المشهدة ولا لأ. وإن أفتوك ليه القائمين على البرنامج اختاروا العنوان ده؟، أولًا علشان الدين بيأمرنا بكده، من أول حديث استفت قلبك وإن أفتاك الناس أو افتوك، لحد أهمية الفتوى، ولإن كل مهنة فيها تخصص وعلم زي الطب والهندسة، الدين برضه محتاج علم، ومحتاج تسأل فيه عالم بيتقي الله، لكن فيه نقطة مهمة كمان، إن الدين محتاج جنب العلم إيمان بالله، وإحساس وتقوى، علشان كده تقدر تستفتي قلبك، والدعوة لربنا ساعة الضيق مش محتاجه علماء، دي محتاجة إنك تعرف قد إيه ربنا قريب. ده ملخص المقدمة اللي قالها الشيخ الهلالي في أول حلقة من برنامجه وإن أفتوك، والبرنامج عبارة عن اختيار لقضية معينة بيتكلم فيها الشيخ طول الحلقة، وبيحاول يخلي الناس تسأل في نفس الموضوع، علشان يلم كل الجوانب بتاعته، ويوضحها للناس، فيفهموا الموضوع ويبقى قفله كده، بس طبعًا فيه حاجات بتبقى محتاجه أكتر من حلقة وبتهم الناس، كمان الناس مش بتعرف تقف عند موضوع معين، بتلاقيهم بيسألوا عن حاجات كتير بره الموضوع. هو سعد الدين مسعد أحمد حسن هلالي (مواليد 1954) منصبه دلوقتي إنه أستاذ الفقه المقارن في كلية الشريعة والقانون بجامعة الأزهر، حصل على درجة الأستاذية عام 1996- وأشرف وناقش العشرات من رسائل الماجستير والدكتوراه في جامعة الأزهر وكتير من الجامعات المصرية والعربية. هو أزهري من أول تعليمه، اتدرج في سلم التعليم الابتدائي العام من عام 1960 واتنقل للتعليم الأزهري الإعدادي، عام 1965، ثم الثانوي بالأزهر، وبعدين دخل كلية الشريعة والقانون بالقاهرة عام 1973، وتخرج منها 1978، وعين بها معيداً سنه 1979 واتدرج في سلم وظايفها لحد ما بقى استاذ في الفقه. البرنامج مع إنه ديني، لكنه بيعتبر من البرامج الهادية والخفيفة وده بيرجع للسهولة اللي بيقدم بيها الشيخ سعد برنامجه، واضح جدًا قد إيه هو بيحاول تبسيط الدنيا، ويبين إن الدين حاجة جميلة وبسيطة ومفيها شكلاكيع، يمكن ده اللي عمل شعبية للشيخ سعد ما بين فريقين "فريق ضد تسهيله الزيادة" و "فريق معاه قوي". ديكور البرنامج عادي مفيهوش جديد، زي أي برنامج ديني لازم يكون الديكور قريب من البساطة وواخد شكل الزخرفة الإسلامية في تفاصيله، وترابيزه، والتصوير كمان كاميرا بتحاول تجيب الشيخ من زوايا كتير علشان المشاهد ميحسش بالملل، وده طبعًا مبقاش لطيف في المرحلة الجديدة للميديا. برامج دينية شبابية حققت تطور ومشاهدة علشان حاجتين، التسويق الجيد، والشكل الجديد في التقديم والديكور، والخروج بره الصندوق، لكن يظهر إن الشيخ سعد لسه مرتبط بالشكل التقليدي للشيخ المفتي اللي لازم يكون قاعد قدام الكاميرا والناس بتكلمه، زي الشيخ اللي قاعد على كرسيه في الجامع والناس بتستفتيه.

...

الكبريت الأحمر: بتخاف؟
اصدرت في: 07/11/2016

مش أول مرة في مصر نعمل حاجة رعب، ومش أول مرة نعمل مسلسل يستحق أنك تتابعه وتشوف الناس دي بتعمل إيه، بس النصيحة بقى لوجه الله لو بتخاف ماتقراش اللي هنكتبه، ولا تتفرج على المسلسل. هو مختلف عن مسلسل ساحرة الجنوب اللي قايم على الخدع والرعب بتاع اللقطة، مسلسل الكبريت الأحمر قايم على رعب تاني، نقدر نقول عليه قايم على رعب السيناريو اللي مكتوب حلو، ورعب الممثلين اللي بجد شاطرين جدًا وبيخافوا من بعض كأنهم مرعوبين بجد مش تمثيل، فوصلوا إحساس الخوف للمشاهد، ورعب المخرج اللي بيتنقل بين الكادرات بسهولة وهدوء وبيصدمك فجأة من تحولها لمشهد يخضك. بتدور أحداث المسلسل حوالين ضابط شرطة اسمه معتز سليمان، بيقوم بدوره أحمد السعدني، وبيقوم بالتحقيق في قضية اشتعال بيوت من غير سبب واضح. أهل المنطقة اللي بيحصل فيها الكلام ده، بيجيبوا مشعوذ اسمه شمس، لأنهم فاكرين إن الجن هو اللي بيولع في بيوتهم، والمشعوذ بيعمل حاجات غريبة، كتابة كلام ورسم أشكال غريبة على بعض الورق ويرمي الورق في الماء فيتفاجئ معتز وأهل المنطقة بأشتعال الورق تحت المياه. فبيشك معتز في المشعوذ، ويجيب ورق تاني من عنده ويقوله ولع فيه لو تقدر لأنه معتقد إن المشعوذ بينقع الورق ده في مادة بتشتعل في المياه، وهي مادة الكبريت الأحمر، الغريب بقى إن المشعوذ بيولع في الورق فعلًا، بيقول المشعوذ "إذا اشتعل الورق تحت الماء لن يرحمه الجن وسيطارده وأنه لن يستطيع فعل شيء" بالفعل مع اشتعال الورق بتتحول حياة معتز لجحيم وتحصل له حاجات غريبة، وأنت بتتفرج مابتبقاش عارف ده جن ولا سحر ومشعوذ، ولا علم ولا إيه، هل فعلًا فيه جن وعفاريت وبيأثروا علينا، تابعوا المسلسل يمكن نوصل لإجابة عن السؤال المحير ده.

...

حقائق وأسرار: برنامج غير مهني لـ مصطفى بكري؟
اصدرت في: 31/10/2016

بغض النظر عن اتفاقنا أو اختلافنا معاه، أصبح مصطفى بكري صحفي معروف في المجتمع المصري، وإلى جانب عمله في بلاط صاحبة الجلالة هو اترشح كمان لمجلس الشعب، وبدأ نجمه يعلي في الميديا لدرجة إنه بقى يقدم برامج تلفزيونية مستمرة من وقت الثورة لحد دلوقتي. ده إلى جانب أنه ضيف مكرر على كتير من البرامج في القنوات المصرية. البرنامج: حقائق وأسرار بيعرض على قناة صدى البلد، وبيتبنى وجهة نظر واحدة في أي قضية، وهي وجهة نظر مقدم البرنامج، وده أمر كتير بيشوفه غير مهني، لأنه الطبيعي أنك لما تنوي تعمل برنامج فيه الحقيقة يبقى لازم تجيب كل الآراء في الموضوع اللي معاه واللي ضده واللى محايد، وده بالنسبة للميديا والقضايا المصرية سريعة التحرك بيبقى صعب شوية. الفكرة: البرنامج بيعتمد على فكرة البطل المذيع، وهو مصطفى بكري، اللي في البرنامج بعرض مجموعة كبيرة من التقارير واللي معناها إن فيه فريق عمل كبير وراه، وبيعمل مداخلات تليفونية كتيرة، وبيستضيف مجموعة من خبراء الاقتصاد والسياسة وعلم الاجتماع، والبرنامج نقدر نصنفه أكتر سياسي، وأغلب مواضيعه مرتبطة بالسياسة وحال البلد، سواء في الداخل أو الخارج. ملاحظات: في ملاحظات سريعة لازم نقولها، منها إن برامج السياسة كترت جدًا، وبالذات اللي بتعتمد على التحليل السياسي، وده موضوع مهم علشان الناس تفهم، لكن المهم طبعًا هو عدم التصنيف، البرنامج مدته طويلة شوية يعني بيوصل لساعتين، بيتخلله فقرة واحدة لضيف، والباقي مع الصحفى مصطفى بكري، البرنامج من وقت ما بدأ على وتيرة واحدة مفيهوش تغيير، والصورة بتاعته مش بتتنقل باستمرار، وإنما معتمدة على نظام التركيز بالبؤرة أو العين الواحدة على الشخص، وده ممكن يتعب المشاهد شوية. اتفرجوا على البرنامج بنفسكم علشان تحددوا هل فعلًا بيقدم أسرار وحقائق بجد.. ولا؟؟

...

رحلة جبل:  حوار طائر مع الجسمي
اصدرت في: 13/10/2016

أما براوة براوة.. أما براوة.. مقطع من أغنية تراثية معروفة، كلنا عارفينها، لكن لما غناها حسين الجسمي، انتشرت أكتر وعمل ليها توزيع جديد، هو فنان مشهور بجد، بيحبه كل الناس في الوطن العربي، صعب تلاقي عليه ناس مختلفة، يعني كل ما تجيب سيرته هتلاقي الكل متفق علىأ نه فنان جميل بيقدم فن جميل، غنى لمصر اللي قال عنها غنه بيحبها جدًا، وعلشان كده أهل مصر بيحبوه جدًا، وبيقبلوا منه كمان كل الأغاني الجميلة اللي عن مصر. برنامج رحلة جبل برنامج واقعي بيوثق مسيرة الفنان الإمارتي حسين الجسمي، وبيقدمه الإعلامي/ خالد الشاعر، البرنامج بياخد المشاهد لرحلة بجد واقعية جدًا بتبدأ من الكويت علشان يشوفوا حياة حسين الجسمي، عاملة إزاي وفيها إيه، وإيه هي أسراره. الجديد في البرنامج أنه معمول في طيارة حسين الجسمي الخاصة، في رحلة من دبي للكويت وهما رايحين لمهرجان (هلا فبراير) في الكويت، وبيتكلموا فيها عن كل حاجة تخصه، وطبعًا البرنامج متطعم بمونتاج عبقري بيفصل مراحل حياة الجسمي، وبدأ منين، وإيه أشهر أغانيه، وإزاي قدر يدخل قلب العرب من أوسع الأبواب. الجسمي في البرنامج ده بيقدم مجموعة من الصور النادرة ليه مع النجوم، وبيوثق كمان رحلته وتنقلاته وحفلاته والكواليس اللي ماحدش يعرف عنها حاجة، بعد ما وصلوا للكويت فريق العلم دخل الكواليس معاه وهو بيحضر لحفلته علشان ينقلنا الوجه التاني لحسين وهو بيتعامل مع فرقته وبيجهز لحفلته. رحلة بجد مثيرة وكلها أسرار وجمال عن مغني خطفنا بصوته اللي جاى من جبل، وبقى راسخ زي الجبل ففعلًا البرنامج رحلة جبل.

...

Project runway: مش أي حد يبقى ترزي
اصدرت في: 11/10/2016

مش كل حد عمل فستان نقول عليه ترزي، ومش كل حد ظبط قميص نقول عليه فنان في اللبس، ومش كل حد لبس هدوم لايقة على بعضها نقول عليه بيفهم في الموضة، لأن الموضوع طلع أصعب من كده بكتير، الموضوع مش مقص وإبرة وقماش، الموضوع فن. الفن برنامج Project Runway هو واحد من أشهر البرامج الأمريكية، واللي بينتمي لـ "تليفزيون الواقع" وفكرة تلفزيون الواقع بدأت من أواخر التسعينيات تقريبًا وكان هدفها نقل كل حاجة بتحصل في الشارع وفي البيوت بشكل حقيقي من غير "مونتاج" وساعد في انتشارها "السوشيال ميديا" ومع الوقت منتجو التلفزيون ماضيعوش الفرصة، وقرروا يعملوا برامج قريبة من الواقع بس ب "مونتاج"، وعلشان كده عملوا النسخة العربي من نفس البرنامج. المونتاج لما نتكلم عن برنامج بيهتم بالتفصيل والموضة، يبقى لازم نتكلم عن تيمتين أساسيتين، الأولى إننا نرفع القبعة للي عمل الفكرة دي، علشان جديدة وبتهم الناس، ومن أهم مميزات البرامج الناجحة إنها تكون بتسد نقص وتهم شريحة كبيرة من الجمهور، وده اللي حاصل في برنامجنا، إنه فعلًا سد نقص برنامج يتكلم عن التفصيل والموضة في شكل مسابقة، ومين مننا مابيحبهاش.. ومين مننا ماشافش برامج كتير حاولت تتكلم عن الموضة لكن أصحابها كانوا بيفتقروا للذوق، والبرامج مانجحتش. أما بقى الحاجة التانية فهي المونتاج، إحنا بنشوف المونتاج شبه التفصيل أنك تاخد حتة قماش من مكان وتزين بيها مكان تاني، أو تاخد من "التوب" القماش علشان تفصل وتعمل فستان أو جلابية أو بنطلون، ده فيه جزء فني كبير خاصة في تناسق الألوان والقدرة على عمل شكل جديد وجذاب و "شيك" يعجب الناس يعني، مش واخدين بالكم إن فن المونتاج كده برضه، يعني بياخد مشاهد ويركبها مع مشاهد بطريقة فنية علشان تطلع في النهاية حاجة تشد الناس، وصراحة من أكتر الحاجات اللي عاجبنا في البرنامج ده جنب فكرته طبعًا، هو الإخراج والمونتاج، لأن تقطيع المشاهد وتركيبات الصور ورا بعضها معمول حلو قوي، والمخرج كمان مركز على كل حاجة وكل مشهد مع إن ده صعب جدًا لأننا بنتكلم عن برنامج متعلق بمجال الأزياء والتصميم . عن البرنامج عن البرنامج الجميل ده، هنقول إن النسخة الأمريكية منه بتقدمه المذيعة الأمريكية هايدى كلوم، وهي عارضة أزياء وممثلة ومقدمة برامج موضة وسيدة أعمال ومنتجة فنية ألمانية. بس النسخة العربية أحلى وأمتع، بيتنافس المتسابقين على تصميم أفضل ملابس في وقت محدد، وبخامات محددة. ويحكم على التصاميم دي مجموعة من المتخصصين كل أسبوع وهم المصمم اللبناني"إيلي صعب"، مصممة الأزياء والإعلامية التونسية "عفاف جنيفان" وبعدين يعملوا التقييمات، اللي على أساسها بيتم استبعاد مصمم كل أسبوع. نسينا نقولكم إنتوا عارفين ليه البرنامج بيبقى شعلة نار، والمتسابقين بيقطعوا نفسهم علشان يطلعوا أحسن منتج، ببساطة علشان المصمم اللي هاياخد في النهاية لقب أفضل تصميم، هايفوز بجايزة قيمتها 100 ألف دولار.

...

Top Chef: مش أي شيف يعرف يعمل أكله حلوة
اصدرت في: 09/10/2016

برنامج top chef "مش أي شيف" من أصعب برامج الواقع، اللي بتعتمد على فكرة المسابقات لكن بفكر جديد شوية. في بيروت وبالتعاون مع mbc انطلقت النّسخة العربيّة من برنامج Top Chef على شاشة MBC1 و MBC Maser 2 ومعاها مغامرة صعبة جدًا، وجديدة من نوعها هيدخلها أشطر الطّهاة في العالم العربي. بداية الحلقة الأولى كانت بتعريف عام عن طبيعة البرنامج، أقسامه وحكايته، وكمان قالوا فيه كل التحدّيات اللي هيدخلها الطّهاة في كلّ حلقة. بعدها، اتعرّف الجمهور العربي على أعضاء لجنة تحكيم البرنامج وهم الشيف المصري – الصيني بوبي شين، الشيف اللّبناني مارون شديد والشيف السعوديّة مني موصلّي، كل واحد فيهم متميز في مجال وعنده خبرة في منطقة معينة، كل واحد فيهم ليه تقله في منطقته، وناوي يعلم باقي الشيفات يعني ايه أكل بحق وحقيق. بعدها الجمهور اتعرف على 15 طاهي بيتنافسوا في البرنامج على لقب "Top Chef" وعلى سبب اشتراكهم في البرنامج كمان، وليه كل واحد فيهم عايز يوصل للقلب ده ويحقق حلمه. المنافسة بين الشيفات انطلقت مع الاختبار الأوّلاني، اللي كان صعب صراحة، علشان كل واحد فيهم، اتطلب منه يحضر طبق من اختياره بمجموعة من المكوّنات اللي لاقوها في صندوق مقفول قدامهم، وكل ده لازم يحصل خلال ساعة واحدة بس. أعضاء لجنة التحكيم داقوا الأطباق وقيّموها، واختاروا طبق الشيف خالد كاهيا من المغرب باعتباره أحسن طبق، وبكده الشيف كاهيا حصل على حصانة من الطرد بره البرنامج في نهاية الحلقة الأولى. أمّا التحدّي اللي كان على الطّهاة عمله مع بعض، فكان إعداد طبق يختاروه بنفسهم لتقديمه على العشاء لـ 150 ضيفًا بحضور ضيف الحلقة الشيف ميشال ساران وهو شيف فرنسي حاصل على نجمتي Michelin للذوق الرفيع وحكم ثابت في نسخة Top Chef الفرنسيّة. صعوبات كتيرة واجهها الطّهاة في التحدّي ده، منها ضيق الوقت، لكنّ الشيف يُمنى خضر من مصر فازت في التحدي، أما صاحب الحظ السيء فهو الشيف رامي سلّوم من سوريا وده كان أول شيف يمشي من البرنامج في نهاية الحلقة.

...

برنامج العباقرة: رجعوا التلامذة للثقافة
اصدرت في: 07/10/2016

العباقرة برنامج فريد من نوعه، لا هو توك شو ولا عن أخبار النجوم، ولا حتى اللي بيقدمه نجم.. معلش آسفين.. هما نجوم بس من النوع اللي تحب تشوف ولادك زيه، هتتشد مع أول عرض وأول لقطة، علشان فكرة المنافسة في العلوم والأدب والثقافة وغيرهم. منافسة شريفة بين الطلاب، وأكتر حاجة هتشدك إنهم في مرحلة المراهقة اللي كل الناس بتقول خلوا بالكم دي مرحلة خطيرة، البرنامج ده بيثبت إنها مرحلة جميلة، هتخليك تقول لولادك تعالوا اتفرجوا، ويا رب تبقوا زيهم. هو برنامج صاحب رسالة مهمة في التعليم، مش علشان المسابقة والعلم وبس، لكن كمان البرنامج بالتعاون مع بنك مصر تحت شعار "التعليم في مصر أولوية أولى" وأرباح البرنامج هيتم بيها بنى مدارس جديدة، واللي بيقدم البرنامج هو الروائى المبدع عصام يوسف صاحب رواية ربع جرام، اللي عملت مليون نسخة من المبيعات. مدة البرنامج هتبقى 3 شهور من المنافسة المستمرة، كل حلقة متقسمة 4 فقرات أحلى من بعض الأولانية عن العلم وفيها أسئلة عن الأدب والعلوم والتاريخ والجغرافيا، والتانية عن المعلومات العامة وأسئلة الذكاء والرياضة، وكمان بيدخل فيها أسئلة عن المشاهير، والتالتة بقى بيتنافس فيها الطلبة في السينما والمسرح والمزيكا والأغاني والفن التشكيلي والنحت والآثار والسياحة، وآخر فقرة بتكون مدتها 30 ثانية عبارة عن عجلة الحظ وكل مرة باختبار مختلف. 128 طالب من أجدع الولاد والبنات، اتجمعوا من 16 مدرسة من أعرق المدارس المصرية على مستوى الجمهورية، هيخلوك تحس إن مصر ولادة وفيها خير مصر مليانة بالشباب اللي سنه صغير ومتفوق كمان مش في الدراسة وبس، لكن في الثقافة والعلم والأدب، هنعيش معاهم حالة من الخوف لما حد يجاوب على سؤال غلط، كأنه في امتحان الثانوية اللي ياما عملت للناس قلق في البيوت وخلتهم يعلنوا حالة الطوارئ، البرنامج إيقاعه سريع وده بيميزه جدًا، لأن أغلب برامج المسابقات لو مافيهاش حوار ونجوم بيضحكوا ويفتكروا مواقف، الناس بتحس إن البرنامج ممل، لكن هنا إحنا بنشوف برنامج مختلف في تصويره اللي معمول باحترافية وبياخد مشاهد من زوايا كتير، وكمان الديكور اللي بيديك إحساس بالراحة للعين، والمخرج تعب جدًا مع المونتاج علشان عملوا جو لا هو مدرسة ولا هو مسابقة عادية، وكمان علشان اهتموا بكل تفصيلة وفلاش باك وكل رد فعل ركزوا عليه، فبقينا في برنامج مش عادي بنعيش معاهم لحظات الفرحة لما يصعدوا لمركز أعلى أو يعدوا مرحلة، ونزعل لما حد يخسر، وبين الفرح والحزن احنا برضه مبسطوين إن مصر ولادة، ولسه فيها اللي يدينا الأمل في بكرة، بكرة اللي نفسنا يبقى أحلى وأحلى.

...

Saturday Night Live: أن تضحك بالعربي
اصدرت في: 05/10/2016

هذا برنامج هزلي ضاحك، لا يمت للواقع بصلة، هدفه الأول والأخير أن تضحك وكل الشخصيات والأفكار الواردة فيه، من خيال فريق الكتابة.. دي كانت مقدمة أول حلقة في البرنامج. الضحك فكرة الضحك قديمة ، من أيام حكايات جحا في الأدب العربي، وكتير من الكتب التراثية اتكلمت عن فن الضحك وأهميته، وكمان الضحك كان ليه تأثير كبير لما ارتبط بالسخرية عند المصريين، وسخروا من كل حاجة مش عاجباهم، في سلسلة تاريخية مينفش ننساها، ولما بدأنا الراديو كان فيه برامج عبقرية ضحكت الناس واستفادوا منها، وكفاية نفكركم ببرنامج الرائع فؤاد المهندس "كلمتين وبس" أو الأفلام بتاعة إسماعيل ياسين وعبد السلام النابلسي والقصري، وعدوا معانا كتير من الفنانين، ومع التطور الطبيعي للضحك ظهرت برامج كتير علمت مع الناس زي باسم يوسف كده، ومن فريق عمل باسم يوسف اتعمل برنامج جديد. فريق العمل الشباب اللي كانوا مع باسم يوسف عملوا حالة بجد جديدة، وأهمهم شادي ألفونس وخالد منصور، الاتنين بجد موهوبين، وفي الميديا من زمان، قدروا إنهم يعملوا كتابة جديدة، وسكتشات بجد تموت من الضحك، وهنا الجديد بقى إن كتابتهم فيها جديد، والبرنامج بيشدك طول الوقت، بيتريقوا على كل حاجة، والمشكلة الوحيدة بقى إنه فيه ألفاظ خارجة شوية، هي بتجيب ضحك ماشي، بس مش معنى كده إننا نضحك بألفاظ خارجة. أصله برنامج Saturday Night Live بالعربى بيقدمه، خالد منصور وشادى ألفونس، وهو النسخة العربية من البرنامج الشهير Saturday Night Live الكوميدى الأمريكى، واللى أنشأه لورن مايكلز، وعرض البرنامج لأول مرة على شبكة إن بى سى يوم 11 أكتوبر 1975، تحت عنوانه الأصلى "nbc Saturday Night Live". الفكرة فى كل حلقة هيبقى فيه ضيف بيقدم فقرة وبيتسأل مجموعة أسئلة كوميدية علشان الجمهور ينبسط، وبعد كده بيبقى فيه اسكتش كوميدي بيمثله الضيف برضه، ومع الاسكتشات المختلفة والضحك المستمر بنستمتع مع البرنامج.

...

صباح on: برنامج خفيف تبدأ به يومك
اصدرت في: 03/10/2016

مش أي صباح بيبقى حلو يعني لازم تجهز له علشان يبقى صباح حلو، وتستعد تجهز فطارك وتعمل العصير أو النسكافيه على حسب مزاجك، تاكل تفاحة أو تشرب لبن أو تفطر حسب نوع الدايت بتاعك، تدخل تبص على الأخبار أو تقرأ الجورنال حسب ما اتعودت، لكن في الغالب بتفتح التلفزيون وأنت على الصبح كده، ولما تقرر أنك تعمل كده الصبح لازم تاخد بالك جدًا أنت هتشوف إيه ومين وإزاي، علشان مودك كله ممكن يتغير لما تشوف حاجة مش لطيفة، ومودك ممكن يبقى زي الفل لما تشوف حاجة حلوة، ومن هنا لازم تتفرج على برنامج صباح on البرنامج هو برنامج صباحي سياسي إجتماعي بيتناول كل القضايا المطروحة على الساحة المصرية واللي بتهم جميع المواطنين زي الخبز والمياة والصحة ومصر واللي بيحصل فيها والدنيا شكلها بقى عامل إزاي. وكمان بيهتم بالتفاصيل الصغيرة زي ثغرة في قانون جديد مثلًا وبيجيب ناس كتير تتكلم عن الموضوع الواحد علشان يغطيه من جوانب كتير. بالإضافة للي فات هو كمان بيعمل متابعة لكل الأخبار السياسية وقراءة الصحف وبيوصل البرنامج لقطاع عريض من المشاهدين، ومعروف عنه إن نسبة مشاهدته عالية، وهو برنامج دمه خفيف وهادي في تناول القضايا، وده مهم إنك تحس إن مافيش تحيز فيه ولا ميل ناحية حد معين أو فئة واحدة بالعكس هو بيهتم بالمواطن وبيقدم اللى للمؤسسات واللي عليها، وبيحاول دايمًا يخلي فقراته مش طويلة وهادفة وبتقدم جديد وليها رونق خاص علشان الناس على الصبح تبقى مبسوطة. مقدمين البرنامج أي برنامج بيعتمد مش بس على فكرته لكن كمان على اللي بيقدموه وبرنامج صباحي بيهتم بكل ما هو سياسي اجتماعي وبيتناول كافة القضايا المطروحة على الساحة، لازم اللي يقدموه يتوافر فيهم صفتين مهمين جدًا الأولي هي الثقافة الواسعة، والتانية هي خفة الدم والظهور الجيد على الشاشة، يعني "القبول" والأتنين موجودين بشكل كبير في مقدمي البرنامج اللي بيهتموا فعلًا بظهورهم بشكل جيد وفيه حالة من التوافق ما بينهم وده بيخليهم عاملين حلقة حلوة وخفيفة على عقل المشاهد اللي بيشوفهم الصبح، ويقول صباح on

...

شاهد المزيد
مواضيع خاصة

النهارده في القاهرة: وجبة فنون كومبو.. إكسترا مسرح وأفلام

يوم جديد في كايرو. طبعًا فيه الروتين المعتاد من شغل ومشاوير وغيرهم. وحاجات ممكن تحسسك بشوية ملل. بس على مين؟ طول ما أجندتنا موجودة انسى إن الملل يعرف لك طريق. علشان ال