دليل كايرو 360 لأهم المكتبات العامة في القاهرة - كتب Feature - كايرو 360
 







دليل كايرو 360 لأهم المكتبات العامة في القاهرة
دليل كايرو 360 لأهم المكتبات العامة في القاهرة
اصدرت في: 24/04/2016

مش هنبدأ مقالنا بمجموعة مواعظ عن أهمية القراءة لأن بما أنك بتقرأ المقال ده يبقى غالبًا القراءة من ضمن هواياتك. بالرغم من أن نسبة الناس اللي بتقرأ في مصر مش كبيرة، إلا أن انتشار المكتبات الخاصة ودور النشر –خاصة اللي بتقدم عدد كبير من شباب الكتاب- حاجة تخلي الواحد متفائل. ده بالنسبة للقراءة كهواية، أمال بقى لو باحث، أو حتى عايز تقرأ كتاب في تخصص معين من غير ما تقتنيه، الواحد يعمل إيه؟

طرحنا السؤال ده على نفسنا وكانت إجابته البديهية أن الواحد يروح مكتبة عامة، بس السؤال الأهم بقى كان "هو لسه فيه مكتبات عامة في مصر؟"، ومنها قررنا أننا ندوّر على مجموعة المكتبات العامة الموجودة في القاهرة، وبالمرة نكتب مقال لكل اللي ممكن يستفيد من المعلومات اللي وصلنا لها.

 

مكتبة مصر الجديدة:

تابعة لجمعية مصر الجديدة، وهي من المكتبات اللي بتقدم خدمات كثيرة بأسعار رمزية –ورش فنية في مختلف المجالات، كورسات إنجليزي وبرامج الكومبيوتر وحتى الفعاليات الثقافية المختلفة، بجانب خدمة الاستعارة والبحث، كل ده تقدر تعرفه من هنا.

أنواع الكتب المتوفرة متنوعة سواء للكبار أو الأطفال، وهي متوفرة بلغات كثيرة زي الإنجليزي، الفرنساوي والألماني وطبعًا العربي. 

سعر الزيارة 5 جنيه للكبار، أما الاستعارة فمسموح لك تأخد 3 كتب لمدة أسبوعين، وتقدر تجدد الاستعارة مرة واحدة لأسبوعين كمان عن طريق صفحة الفيسبوك الخاصة بالمكتبة، التليفون أو حتى رسالة إلكترونية. لو سعر الكتاب اللي هتستعيره أكثر من 100 جنيه، بتدفع قيمته وتستردها لما ترجع الكتاب.

المكتبة فيها خدمة إنترنت سعرها 2 جنيه في الساعة، أما الـ Wi-Fi فببلاش. و فيه برضه خدمة تصوير مستندات بأجر رمزي لو عايز تحتفظ بنسخة من المعلومات اللي بتدوّر عليها.

مش ناقص غير أننا نقول لك أن مواعيد العمل فيها من الساعة 9 صباحًا لـ 8 مساءً كل يوم ما عدا الجمعة من 1 لـ 8 مساءً، وبتقفل في الإجازات الرسمية.

 

مكتبة مصر العامة:

وللي ما يعرفش، مكتبة مصر العامة هي مكتبة مبارك سابقًا. المكتبة موجود فيها مجموعة كبيرة من الأنشطة لجميع الأعمار زي الدورات التدريبية والندوات. اللي بيميز المكتبة دي عن أي مكتبة ثانية أن لها فرع ثاني في الزاوية الحمراء، ده غير أن موقع الفرع الرئيسي متميز؛ فيه قاعة للمعارض الفنية ومساحة ممكن تأجرها بأجر رمزي لعمل فعاليات.

الكتب المتوفرة فيها كثيرة ومتعددة اللغات، وهي مناسبة لجميع الأعمار.

الزيارة مجانية لغير الأعضاء، ولكن في أيام الاثنين والجمعة بس من الساعة 9 لحد 11:30 صباحًا. أما اشتراك العضوية فهو بأي حال من الأحوال مش هيزيد عن 40 جنيه للفرد، وسعره بيتحدد عن طريق المرحلة السنية.

الاستعارة متاحة بواقع 5 كتب لمدة 14 يوم، وممكن تجددهم مرة واحدة لـ 14 يوم ثانيين عن طريق التليفون، أو الحضور.

خدمة الانترنت متاحة –آخر مرة زرنا فيها المكتبة ما كانش فيه Wi-Fi - وفيه برضه خدمه التصوير (عدد محدد من الصفحات من كل كتاب) بسعر 25 قرش للورقة، ده غير أنك ممكن تعمل CD بـ 5 جنيه لأي ملفات أنت عايزها من على الإنترنت.

أجازتهم يوم الثلاثاء، والمكتبة فاتحة من 10 صباحًا لـ 7 مساءً.

 

مكتبة حلوان العامة:

تابعة لدار الكتب والوثائق القومية، وفيها مجموعة كبيرة من الكتب والقاعات المختلفة (قاعة للغات، الديانات وقاعة للفلسفة). المكتبة مشهورة بالأنشطة المختلفة المخصصة للأطفال، ده غير الأنشطة المخصصة للكبار زي الندوات الثقافية المختلفة والدورات التدريبية المتنوعة.

الكتب متنوعة ومتوفرة بلغات كثيرة زي الإنجليزي، الألماني والفرنساوي والعربي.

زي باقي المكتبات التابعة لدار الكتب والوثائق القومية، ممكن تستعير من المكتبة، ده غير أن فيه خدمات الإتنرنت والتصوير والنسخ على CDs. أما أسعار الاشتراك فهي كالآتي: للمؤسسات 100 جنيه للفرد، أما للاشتراك السنوي للأفراد 300 جنيه و50 جنيه للاشتراك الشهري.

المكتبة شغالة من 8 صباحًا لـ 7:30 مساءً في الشتاء، وفي الصيف من 8 صباحًا لـ 8:30 مساءً.

 

مكتبة القاهرة الكبرى:

تابعة لوزارة الثقافة، وهي من أجمل المكتبات اللي ممكن تدخلها في القاهرة، سواء من حيث الشكل أو المضمون. وزي بقية المكتبات الموجودة في المقال ده؛ مكتبة القاهرة الكبرى بيقام فيها فعاليات فنية وثقافية متنوعة، ده غير أنها فيها أقسام كثيرة وبتغطي مجالات مختلفة للكبار. وللأطفال من 6 – 15 سنة قاعة فيها كتب باللغة العربية واللغات الأجنبية، ولهم أنشطة مختلفة زي الرسم والتمثيل وعرض أفلام.

الكتب متوفرة بلغات كثيرة بجانب العربي، زي الألماني والإنجليزي والفرنساوي.

سعر الاشتراك السنوي 30 جنيه، وهي مجهزة بالإنترنت وآلات التصوير.

مواعيد المكتبة من 9 صباحًا لـ 4 مساءً كل يوم ما عدا الجمعة والأجازات الرسمية.

 

مكتبة مركز المعلومات ودعم اتخاذ القرار:

وأغلب كتبها عن الاقتصاد والقانون وتكنولوجيا المعلومات، بجانب عدد من دوائر المعارف والقواميس. طبعًا زي ما هو واضح من مجالات الكتب أن المكتبة لها طابع جدي وعلمي بحت، يعني هنا لا هتلاقي قسم للأطفال أو فعاليات ثقافية.

المكتبة فيها نظام استعارة داخلي -يعني الكتاب يتحجز لك للاطلاع عليه في المكتبة بس– لكن ما ينفعش تستعير أي كتاب خارج المكتبة. مدة الاستعارة الداخلية أسبوعين ما بيتجددوش، وعدد الكتب اللي تقدر تستعيرها 10 كتب.

خدمة التصوير مجانية لعدد محدد من الصفحات (30 صفحة)، ولكن ما فيش خدمة النسخ على CDs.

مواعيدها كالآتي: من 8:30 صباحًا لـ 4:00 مساءًا وشغالة كل أيام الأسبوع.

 

اختار اقرب مكتبة لبيتك وروح لها.. واستمتع بكتبك المفضلة 

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
دينا مختار
حرر بواسطة:
دينا مختار
تاريخ النشر:
24/04/2016
منسق تحريري.. الشخص اللى تلاقيه قاعد لوحده على القهوة الصبح بدري بـ يتفرج على الخلق، سيب لها قلم وورقة فاضية هـ ترجع تلاقيها إما كاتبة قصة قصيرة أو راسمة باب شعبي قديم، تطلعها من وسط مليون بلبسها المنقوش فى منقوش.