جوائز اختيارات المحررين لأفضل أماكن اللاونج لعام 2016 - كافيهات Feature - كايرو 360
 







جوائز اختيارات المحررين لأفضل أماكن اللاونج لعام 2016
جوائز اختيارات المحررين لأفضل أماكن اللاونج لعام 2016
اصدرت في: 18/05/2016

كتير بنبقى زهقانين من المطاعم التقليدية ونفسنا نقعد في مكان بيقدم أكل كويس وفي نفس الوقت القعدة فيه مريحة وزيها زي قعدة الكافيه، علشان كده عملنا القسم ده في جوائز محرري كايرو 360، علشان نعرفكم أفضل أماكن اللاونج في عاصمتنا المجنونة والمتغيرة كل يوم.

الفائزين في جوائز اختيارات محرري كايرو 360 لأفضل أماكن اللاونج لعام 2016:

 

بيترووت - Beetroot

قعدة حلوة على النيل، أكل مميز جدًا.. عايزين إيه تاني علشان نبقى مبسوطين؟! بيترووت بيقدم مجموعة مهمة من الأطباق العالمية، اللي هتحس بسعادة كبيرة وأنت بتأكلها في قعدة مريحة جدًا مناسبة لخروجة حلوة مع العيلة أو مع أصحابك.

 

ليفت بانك – Left Bank

إحنا لسه في الزمالك، وماينفعش نكون فيها ومانعديش على ليفت بانك.. المكان بيتميز بديكورات البسيطة، بيغلب عليها اللون الرمادي والمنتشر على حوائط المكان، القعدات بتتنوع ما بين كنب وترابيزات مربعة بكراسي خشب، أما المنطقة الخارجية ففيها ترابيزات مربعة بتطل على النيل بكراسي منخفضة مبطنة ومريحة. سواء كنت جعان أو عاوز تشرب مشروبك المفضل.. ليفت بانك هو مكانك!

 

لوفت21 - Loft21

مشروبات هايلة، وأكل مميز معمول بحرفية، ده غير القعدة المريحة في جاردن سيتي اللي هتخليك مبسوط، لوفت21 نجح يحقق المعادلة الصعبة علشان كده قررنا يكون معانا في المقال ده.. لو كنت تحت 25 سنة فالمكان مش هيرحب بيك قوي.. غير كده هتنبسط!

 

سيكويا – Sequoia

من الأماكن القليلة اللي محافظة على مستواها من اليوم اللي فتحت فيه ولحد النهارده، وبموقعه المميز اللي حاجز لنفسه أجمل جزء على النيل، مع ديكوراته المبتكرة كان لازم يكون موجود معانا هنا! أكل حلو ومميز، ومشروبات هايلة ومبتكرة.

ناي لاونج – Ney Lounge

الزمالك حظها حلو في وجود أماكن جميلة، حقيقة بيثبتها ناي لاونج اللي قدر يثبت نفسه بمنيو مميزة جدًا، المكان بيتميز بالبساطة والأناقة وهتحس فيه براحة نفسية كبيرة! ناي لاونج استغل مبنى كان بتاع مدرسة قديمة وحوله لتحفة فنية لقضاء وقت ممتع فى أحد شوارع الزمالك.

هوكة لاونج – Hookah Lounge

عشاق الشيشة ليهم نصيب من ترشيحاتنا، وهوكة لاونج مكان مريح وعظيم الحقيقة، خصوصًا للأوقات اللي بنكون عاوزين نروح فيها مكان نأكل فيه أكلة خفيفة وشيشة، في الحالة دي مافيش أجمل من هوكة لاونج.. علشان كده هو يستحق جايزتنا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
18/05/2016
-