أحسن شارع تتمشى فيه في وسط البلد هو شارع طلعت حرب، من الصبح بدري لحد بعد نص الليل، المحلات فاتحة ومنورة الشارع طول الوقت. محلات الأكل والمشروبات كتير طبعاً في المنطقة دى بس مافيش مانع نحدد لك أماكن معينة للأكل والشرب عشان ماتتوهش وسط كل المحلات اللي هناك.

محل عصير «سليمان باشا» جنب محل تيك آواي «فلفلة» المشهور في الشارع ده، يعني صعب ماتخدش بالك منه. المحل بسيط وصغير حاطط ترابيزات وكراسي بلاستيك عشان تشرب وانت قاعد، ومفيش تيك آواي، هـ تشرب قدام المحل بس.

الديكور عبارة عن رسوم على الحيطان وأكتر من 30 فانوس متعلقين في السقف عشان تقعد تتفرج عليهم ويزغللوا عينيك على ما العصير بتاعك يجهز. بس اللي لفت نظرنا بجد كانت اليفطة اللي محطوطة على ستاند برة المحل مكتوب عليها أنهم بـ يعملوا عصير رمان، وللأسف كل ما نروح هناك ونسأل على الرمان مش بـ نلاقيه.

غير كده كل العصاير اللي ممكن تطلبها موجودة، من أول الجوافة باللبن لحد عصير الفراولة والبرتقال العادي. بـ5 جنيه بس ممكن تاخد "شوب" عظيم موز باللبن، كله فايدة وهـ تحس فيه بطعم القشطة والدسم، ده لو مش عايز العصاير التانية.

بأكتر من الـ5 جنيه بحاجة بسيطة ممكن تجيب كوكتيل فواكه وبـ يبقى دسم جداً عشان عليه لبن بالإضافة للفراولة والموز والبرتقال، وعلى الكاس من فوق بولة آيس كريم. الكوكتيل أو "الفخفخينة" ينفع يبقى وجبة في حد ذاته، وطريقة كويسة تهرب بيها من حر الصيف وسخونة الرصيف.

وعلى فكرة يفطة الأسعار اللي بره المحل قديمة والأسعار اللي عليها مش هي الأسعار الفعلية اللي هـ تدفعها، فممكن تحب تسأل على سعر الحاجة الأول قبل ما تطلبها.

مكان مريح ونضيف تشرب فيه عصير فريش متلج في عز الحر أو في تمشية "وسط بلدية" بالليل. «سليمان باشا» ضروري تجربه وانت معدي من هناك.