في شارع جامعة الدول العربية بجانب مطعم «أبو شقرة» موجود كافيه «كوك روك»، لافتة كبيرة مميزة وأضوائها شديدة هـ يلفت نظرك أول ما تدخل الطريق البطئ الموازي لشارع جامعة الدول، لو معاك عربية ومش لاقي مكان تركن ممكن تسيب المفتاح للسائس التابع للكافيه –بعد ما تتأكد من هويته– وهو بـ يتصرف ويشوف لك ركنة.

المكان كبير من الداخل رغم أن بوابته ما توحيش بكده، وهو على شكل حرف L والديكور مودرن وألوانه هادئة وكل عمود عليه شاشة بلازما كبيرة، والكنبات مريحة أكثر من الكراسي، يعنى حظك هـ يبقى كويس لو لقيت كنبات فاضية، بس حاول ما تبقاش قريب قوي من التكييف علشان ممكن تبرد، المكان كله مقفول أو indoor بس لو كنت غير مدخن؛ دخان الشيشة مش هـ يضايقك قوي لأن المساحة واسعة والمسافات بين الترابيزات معقولة.

أخذنا ركن لطيف بعيد عن الدوشة وطلبنا بلاي ستيشن 3 علشان هو مش بـ يكون في مكان ثابت في الكافيه، هو بـ يكون على ستاند متحرك بالشاشة الخاصة به وبـ ييجي أمامك مكان ما تقعد. فيه بلاي ستيشن 2 و3 لكن السعر واحد وهو 30 جنيه للساعة، بس فيه عيب أن شاشات اللعب صغيرة شوية لو كنت قاعد على مسافة بعيدة مش هـ تشوف كويس.

المنيو غني جدًا، أطباق رئيسية لحوم ودجاج وأسماك، ساندويتشات، بيتزا، باستا، مقبلات وسلاطات، كل أنواع الأكل تقريبًا موجودة في «كوك روك»، من أول طبق فوكاشيا الجبنة (20 جنيه) والمزات البسيطة (26 جنيه) لحد أطباق السي فوود (90 جنيه) وورقة اللحمة (65 جنيه)، مطعم شامل يعني ومطبخ متنوع، بس بما أننا في الأصل كنا رايحين نلعب ونأخذ مشروب وأكلة خفيفة، فقررنا ما نخوضش قوي في الوجبات الكاملة اللي المنيو عامر بها، وطلبنا بيتزا بافلو تشيكن (32 جنيه) وكانت معقولة بس ناقصة شوية جبنة ودجاج على الوش، وجربنا بيتزا السي فوود (39 جنيه) اللي المطبخ هناك مميز بها، بس خذلتنا وقت الزيارة دي وكان واضح أن المكونات مش طازجة. طبعًا البيتزا تكفي فرد واحد بس.

منيو الحلويات نفس الحكاية، كبير جدًا ومتنوع وفيه أشكال من الآيس كريم والبراونيز وكيكة الشوكولاتة، بس حبينا نجرب أم على (16 جنيه) وأضافنا عليها بولة آيس كريم (5 جنيه) ومش عايزين نقول لك قد إيه كانت تجربة ناجحة! اطلبها على ضمانتنا.

المشروبات كالعادة لا نهائية، ساخنة وباردة، كوكتيلات فريش أسعارها من 16 لـ 20 جنيه، وميلك شيك بنكهات مختلفة بـ 18 جنيه، وسموزي الفواكة بنفس السعر، طلبنا ميلك شيك بطعم الشوكولاتة السنيكرز وكان حلو بس كان طعمه أوريو قوي، أو جايز كان فيه قطع أوريو فعلًا! وكل المشروبات الساخنة موجودة والكابوتشينو كان طعمه مثالي.

كل نكهات الشيشة موجودة، وبما أن الناقد كاتب المقال ده مالوش في الشيشة فاستعان بصديق محترف شيشة، وبعد ما جرب نكهة العنب (20 جنيه) قال لنا أنها مضبوطة تمام والنكهة خطيرة وإحنا بما أننا ما عملناش غير أننا شمينا الدخان بتاعها، نقدر نقول أنها كانت فعلًا حلوة.

موظفين المحل كثير جدًا وهـ تلاقيهم دائمًا قريبين منك لو احتجت حاجة، والخدمة عمومًا سريعة ومش هـ تنتظر أكثر من دقائق علشان يجي لك أي مشروب، وحتى البيتزا بـ تيجي بعد 15 دقيقة بالكثير. الحاجة الوحيدة اللي ممكن تتأخر عليك هي البلاي ستيشن، لأن بـ يكون عليه طلب كثير أحيانًا وعدد الأجهزة محدود، والحد الأدنى للطلبات بـ يكون 40 جنيه طول الأسبوع.