صباح الخير.. كام واحد فينا بـ يصحى من النوم وبـ يكون عاوز يفوق نفسه بسرعة من غير ما يمسك أقرب حاجة يخبط بها نفسه علشان يصحى؟ بس مش ده الحل الطبيعي دائمًا.. الحل المثالى فى الحالات دي إما أنك تلعب شوية رياضة (سويدي) علشان تتنشط أو أنك تشرب كوب قهوة أو حاجة فيها كافيين.. وده اللى إحنا بـ نعمله وعرفنا كمان مكان مناسب له.
للناس اللى شغالة قريب من داندي مول فى طريق مصر إسكندرية الصحراوي زي فى القرية الذكية أو غيرها «بريوش دوريه - Brioche Dorée» حل مثالى لموضوع الصحصحة.. على الرغم أننا جربناه فى وقت متأخر بالليل بس بقى فى دماغنا كـ Option للحصول على قهوة كويسة الصبح، ودي كانت تجربتنا هناك:
الكافيه موجود قريب من محل ملابس «ماكس - Max» فى الدور الثاني من داندي مول، واخد زاوية والقعدة فيه شكلها حلو شدتنا زي ما شدنا اللوجو الأحمر للمكان، الجرسونات هناك لابسين لبس موحد واخد طابع فرنسي بطاقية الشيف المنفوشة اللى معووجة على جنب، شكلهم حلو جدًا، المنيو فيها أقسام كثيرة جدًا ومتنوعة زي: "الإفطار، والسلاطات، والشوربة، والكيش، والبيتزا، والأطباق التقليدية والباستا، والساندويتشات، وركن الأطفال، والباتسري، والتحلية والكريب، والآيس كريم، والمشروبات الباردة، والساخنة، والفرابيه، والكوكتيلات، والعصائر الفريش وغيرها".. تعبت من التفاصيل؟ إحنا قعدنا فترة عقبال ما عرفنا نذاكر المنيو بس كانت تجربة التعرف على الأصناف لطيفة لأن المنيو الفرنسية جديدة علينا.
نزل لنا زجاجة مياه معدنية (6.95 جنيه)، ومن قسم السلاطات جربنا سلاد جورموند (48.95 جنيه) وهى عبارة عن قطع بطاطس وذرة حلوة وتشيكن مايو ميكس وخس أخضر وطماطم شيري وبصل معاها ستيكس عيش بالثوم، كانت شهية جدًا وخفيفة ومكوناتها فريش، فى الحلويات جربنا كريب النوتيلا (28.95 جنيه) اللى جاء لنا فى طبق بيضاوي طويل وفيه كريم شانتيه من فوق وصوص شوكولاتة، كان طعمه حلو والكمية معقولة، على عكس تارت الفواكة (24.95 جنيه) اللى كان شكله حلو بالفواكة المرصوصة من كيوي وعنب وأناناس وتوت لكن العجين كان ناشف قوي لدرجة كان بـ ينط لما نقطعه بالسكين، كان محبط جدًا.
سيبنا جزء الأكل وقلنا نجرب تخصصهم وهو المشروبات: جربنا ميلك شيك بالشوكولاتة (28.95 جنيه) كان لطيف زي الكراميل ماكياتو (23.95 جنيه) بس ذقنا أفضل منه فى أماكن ثانية، العصائر الفريش (عصير فراولة 17.95) كمان كويسة عندهم، وللتنشيط زي ما كنا بـ نقول في بداية المقال النقدي جربنا الأكسبريسو (10.95 جنيه) ولو عاوزها "دوبل" بـ يضاف 7.95 جنيه، كانت قوية واستمتعنا بها جدًا.
المكان بـ يضيف خدمة 12% وضريبة 10%، والجرسونات هناك روحهم حلوة والخدمة سريعة، فلو حابب تعدي عليهم تجيب قهوة فى السريع ما تترددش، أو تأخذ سناك فى بريك الشغل أو فى زيارة سريعة للمول.