دروفي: أول جهاز سيلفي طائر للجيب من تطوير رائد أعمال مصري - الحياة في كايرو Feature - كايرو 360
 







دروفي: أول جهاز سيلفي طائر للجيب من تطوير رائد أعمال مصري
دروفي: أول جهاز سيلفي طائر للجيب من تطوير رائد أعمال مصري
اصدرت في: 31/08/2016

العالم كله بيتكلم عن أول جهاز سيلفي مصري طائر أو المعروف باسم "دروفي Drofie". الموضوع فعلًا مهم ودخل دائرة اهتمام بلاد كثيرة زي الصين والهند وهولندا وإيطاليا وسويسرا، بجانب مستثمرين عالميين من أماكن ثانية، وكل ده ولسه الجهاز ما نزلش السوق بشكل رسمي.

محمد غيث من الناس اللي بيؤكدوا إن مصر يوم بعد يوم بتثبت نفسها في عالم ريادة الأعمال، وأكبر دليل هو تقديمها لجهاز كاميرا سيلفي محمولة بحجم الجيب عنده قدرة على الطيران.

وقال محمد "كل اللي هتعمله أنك ترمي الجهاز في الهواء وهو بيثبت فوق لوحده بشكل آلي أو ممكن تسيبه في مكان معين وهو هيطير فوق نفس المكان".

دلوقتي وصلنا لمرحلة تحميل تطبيق دروفي على أي جهاز سمارت فون علشان نتصل بالجهاز، وهنا مستخدم الجهاز بيكون عنده 3 خصائص تشغيل.

وشرح لنا محمد الكلام ده وقال "طبعًا الخاصية الأولانية أنك بتأخذ سيلفي من الهواء، بس غير كده في خاصية 'Follow Me' ودي بتختارها لو عايز تتمشى براحتك والدروفي يمشي معاك ويصورك، ولو عايز صورة جوية ماحصلتش ممكن تختار خاصية "بانوراما 360" اللي بتخلي الجهاز يطير بسرعة ويصورك صورة بانورامية 360 درجة".

الاستخدام الأساسي للدروفي فعلًا قريب من السيلفي ستيك العادية، بس الجديد في الموضوع أنك بتتصور عن طريق جهاز طائر صغير جدًا عن طريق تطبيق موبايل وطبعًا ما ننساش تصميمه المميز.

 في الوقت الحالي محمد وشركته مستقرين في مدينة ريجا اللاتفية وبيعملوا شغلهم وأبحاثهم في معامل لاتفياLabs of Latvia ، ودي شركة إلكترونية لاتفية ناشئة بتساعد محمد وشركته بكل الإمكانيات الممكنة.

 

وقال محمد "أكيد أي مشروع فيه مراحل تصنيع بيحتاج شركة تكنولوجية قوية وخبراء في التصنيع ومعامل اختبار، وللأسف مصر عندها نقص في الكلام ده حاليًا".

الطلبات دي ماكانتش العقبة الوحيدة قصاد محمد وفريقه وهم بيطوروا الدروفي.

وكمل محمد كلامه وقال "لما بدأنا في الأول كان عندنا نقص في التمويل والخبرات، وعلشان نعين مهندسين هاردوير محترفين الموضوع كان هيتكلف جامد. لكن مع الوقت قدرنا نعيّن فريق محترف ومؤهل، والأهم من كل ده إن عنده طموح".

بعد ما وصلت الموافقات على الفكرة والنموذج الأولي في مايو 2016، فريق الدروفي اشتغلوا بكل قوة وسرعة، وفي يونيو 2016 تم اختيار الدروفي ضمن أهم 20 مشروع ناشئ برعاية برنامج Startup Scaleup لتدعيم المشروعات ومدته 6 شهور.

برنامج Startup Scaleup كمان بعد ما قبل الدروفي قدمه لأعضاء مشروع internet of things في منطقة البلطيق، واللي ناقشوا إمكانية عمل شراكة مع الشركة علشان ينزلوا الدروفي في أكثر من 50000 ألف منفذ بيع في دول البلطيق.

وأضاف محمد " استلمنا بالفعل جواب موافقة لتنفيذ دروفي في واحد من أكبر منافذ البيع في دول البلطيق اللي بتشتغل في مجال الاتصالات".

الشيئ المهم كمان إن شركة معروفة زي ETH Zurich بترعي أول نسخة تجارية نازلة للسوق من دروفي، وهناك هيشتغل الفريق مباشرة مع خبراء في مجال الروبوتات.

فريق دروفي بيطمحوا يدخلوا في برامج دعم أكبر، وقدروا يحصلوا على مكان في برنامج Kickstart في سويسرا بعد ما كسبوا 865 شركة ناشئة، وبكده هيحصلوا على تدريب مكثف وكمان فرصة لتصنيع أول نموذج تجاري من جهازهم.

من المتوقع إن دروفي يكون في الأسواق سنة 2017، بس في احتمال إن نزوله يتأخر شوية في مصر علشان التصاريح والموافقات الأمنية.

وختم محمد كلامه وقال "نتمني نوصل لاتفاق مع الحكومة المصرية يسمح لنا ببيع دروفي في مصر وإحنا على استعداد لمناقشة أي أفكار بناءة".

لمعلومات أكثر عن دروفي اضغط هنا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
هند صلاح الدين
حرر بواسطة:
هند صلاح الدين
تاريخ النشر:
31/08/2016
كاتبة