دليلك لويك إند سعيد في القاهرة: حفلات وأنشطة وندوات - الحياة في كايرو Feature - كايرو 360
 







دليلك لويك إند سعيد في القاهرة: حفلات وأنشطة وندوات
دليلك لويك إند سعيد في القاهرة: حفلات وأنشطة وندوات
اصدرت في: 01/09/2016

تنهيدة كبيرة مع نهاية الأسبوع، وآمال كبيرة في الراحة والاسترخاء واستعادة الطاقة وتجديد النشاط معقودة على الفعاليات المتاحة في الكام يوم دول، وفي انتظار أنه القاهرة تكون على المستوى المأمول كالعادة وماتخذلناش.

نحب نقول لأنصار خروجات يوم الخميس يجهزوا نفسهم لسهرة فنية خالصة، الفنان علي الحجار هيقف يغني على محكى القلعة الساعة 10:00 مساءً ضمن فعاليات مهرجان القلعة للموسيقى والغناء في يومه قبل الأخير، وسعر تذكرة دخول الحفل 5 جنيهات. ومسرح قاعة النهر بساقية الصاوي هيستضيف حفل روك عربي علشان الدنيا تتوزن بين الشرقي والغربي، الحفلة هتكون عرض مشترك بين فرقة "ملاذ" وفرقة "خيال"، وسعر تذكرة حضورها 35 جنيه..ومن الساقية برضه لكن من على مسرح قاعة الحكمة هتحيا الست أم كلثوم من جديد من خلال مسرح الساقية للعرائس وهتقف تغني على المسرح "سيرة الحب" و"أنت عمري"، العرض هيتقدم مرتين، الأولى الساعة 6:00 مساءً والثانية الساعة 8:00 مساءً، وسعر تذكرة حضور الحفل 15 جنيه.

وبالنسبة لأهل الجمعة فالوضع مش هيختلف كتير من حيث الطابع الفني الغالب، وإن كانت الفعاليات نفسها مختلفة. مهرجان القلعة هيختتم فعالياته بحفلتين من العيار الثقيل، الأولى للفنانة نسمة عبدالعزيز الساعة 8:00 مساءً، والثانية للفنان إيمان البحر درويش الساعة 10:00 مساءً، وسعر تذكرة حضور الحفلات في المهرجان 5 جنيهات. وفي نفس الوقت هينافس فعاليات المهرجان حفل إنشاد صوفي للإخوة أبو شعر في ساقية الصاوي، الحفل هيبدأ الساعة 7:30 مساءً بسعر تذكرة حضور 40 جنيه. بالإضافة لآخر أيام عرض مسرحية "البروفة" في أسبوعها الخامس، العرض بتقدمه الفرقة الشبابية الشهيرة "1980 وأنت طالع"، البداية هتكون الساعة 5:00 مساءً، وسعر تذكرة الحضور 25 جنيه.

أما عن السبت فالوضع هيختلف نسبيًا علشان هنلاقي الفعاليات الفنية بتزاحمها فعاليات تانية ذات طابع مختلف، حفلة "أسياد الزار" لفن الزار الشعبي القديم على مسرح الضمة الساعة 9:00 مساءً بسعر تذكرة حضور 30 جنيه، مع العرض المسرحي "هبط الملاك في بابل" على مسرح الروابط الساعة 6:30 بسعر تذكرة حضور 15 جنيه، دول هيرفعوا راية الفعاليات الفنية يومها. وراية الفعاليات التثقيفية هيرفعها معرض كتاب مركز الربع الثقافي اللي بيفتح أبوابه يوميًا من الساعة 10:00 صباحًا لـ 10:00 مساءً، وندوة "الأماكن حواديت" اللي هيتكلم فيها أتنين من الرحالة المصريين عن السفر وفوائده وهتستضيفها مكتبة "أ" فرع الميرغني الساعة 7:00 مساءً والدعوة فيها عامة، وجولة فريق مشربية الثانية في شارع المعز بغرض زيادة الوعي الأثري والتاريخي اللي هتبدأ الساعة 10:00 صباحًا والدعوة فيها عامة.
نتمنى تكون القائمة اللي قدمتها القاهرة الأسبوع ده على مستوى التطلعات، والأهم أن الفعاليات نفسها تحقق الانبساط المطلوب.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
01/09/2016
-