دليل أحداث نهاية الأسبوع: نغم مصري وجلاس أونيون وماسكارا وعمرو صلاح ومعارض فنية - الحياة في كايرو Feature - كايرو 360
 







دليل أحداث نهاية الأسبوع: نغم مصري وجلاس أونيون وماسكارا وعمرو صلاح ومعارض فنية
دليل أحداث نهاية الأسبوع: نغم مصري وجلاس أونيون وماسكارا وعمرو صلاح ومعارض فنية
اصدرت في: 04/07/2013

في ويك إند مش عادي مصر كلها هـ تبقى في الشارع، بـ تحتفل أو بـ تتظاهر، مش مهم؛ كلنا مصريين، المهم نمشي على الطريق الصح وما نقعش في غلطات وقعنا فيها من سنتين، عاوزين نشوف البلد دي أحسن علشان والله هي تستاهل تكون في مكانة أحسن من كده. بـ نقول لكم في الأجازة اللي جاية انزلوا واحتفلوا واحكوا عن مغامراتكم وطرائفكم في الميادين، بس كونوا حذرين واعرفوا أن فيه ناس هـ تحاول تفسد فرحتنا، في التحرير وعند الاتحادية وفي كل مكان، نشرنا لكم من يومين دليل للحماية وكيفية التعامل مع حالات التحرش، وإزاي تتعامل في حالات الطوارئ في التجمعات والمظاهرات، راجعوا اللي كتبناه وخلي الأرقام المهمة دائمًا على تليفونك، ده غير أن تحرير بودي جارد محتاجينكم، اعرفوا إزاى من هنا.

النهارده ولمدة كام يوم جايين بعض المراكز الثقافية زي ساقية الصاوي ودار الأوبرا المصرية قامت بإلغاء كل العروض أو تجميد النشاط بشكل مؤقت، لكن قريب قوي راجعين وببرنامج فني وثقافي متميز، هـ تعرفوه من خلال أجندة موقعنا. ودلوقت هـ نقول لكم ممكن تعملوا إيه في الويك إند العظيم ده.

النهارده فيه حفلة لفرقة "سيمبليكستي" لموسيقى الروك على مسرح الجنينة بحديقة الأزهر ويليهم فرقة "ماسكارا" اللي حققت نجاحات كبيرة وعملت جولات فنية في أوربا، وهم بـ يعزفوا موسيقى متأثرة بالشرقية والكلاسيكية، سعر التذكرة 10 جنيه.

كريم الغليض هـ يقدم عرض لأول مرة على مسرح كايرو جاز كلوب بـ يضم أغاني لـ cat Stevens ومن بعده فرقة Glass Onion اللي هو المغني الأساسي بتاعها وعازف الجيتار فيها برضه وهـ يقدموا أحلى أغاني فرقة الـ Beatles في سهرة جامدة جدًا، ما تفوتكوش، الحجز ضروري في كايرو جاز.

يوم الجمعة تقدم فرقة كريم حسام لموسيقى الجاز عرض افتتاحي على مسرح الجنينة تعزف خلاله مزيج الجاز وموسيقى من مدارس موسيقية مختلفة ويليه فرقة "Amro Salah Trio" أو ثلاثي عمرو صلاح بمشاركة الصوت الجميل نهى فكري اللي هـ يقدموا كلاسيكيات الجاز، سعر التذكرة 10 جنيه.

ويوم السبت ينظم بيت الرصيف حفل لفرقة نغم مصري اللي ظهرت مؤخرًا في أحد حلقات باسم يوسف وبـ نتوقع أنها تكون من أجمل حفلات الفريق وأقوى حفلات الويك إند ومتوقعين حماس وتفاعل غير عادي مع أغاني الفريق الوطنية الرائعة. الفرقة مكونة من miro على الجيتار، عمرو خيرى "درامز" وسامر جور "باص" وفيصل " كيبورد"، هانى بدير"بيركشن"، شادى شرف "عود"، شريف كامل «قانون»، سعر التذكرة 30 جنيه.

والساعة 6 مساءً يوم السبت بيكيا المعادي هـ يستضيف "مشروع المريخ" وهي مبادرة الميكروفون المفتوح، تقدروا تقولوا فيه اللي أنتم عاوزينه، والحضور مجانًا.

ومن المعارض الفنية اللي بـ نرشحها لكم للزيارة يستضيف مطعم إستوريل في وسط البلد معرض "دوائر" للفنانة فدوى رمضان، الأعمال بـ تركز على الظاهرة الهندسية الدائرة واللي بـ تلعب دور في الحياة والطبيعة وكشف الحركة الموجودة بداخلها مع أنها دائرة مغلقة، لمزيد من المعلومات اتصلوا بـ 0225743102.

ويستضيف معرض أوان للفنون المعاصرة المعرض السنوي الأول للشباب، اللي بـ يضم أعمال عدد من الفنانين والفنانات الشباب، الفنانين هم: نسرين محمد إبراهيم وحسام الدين هشام وأمل جمال فتحي وسامح سنوسي وماريان فرج إبراهيم وغيرهم كثير، والجاليري مفتوح يوميًا ماعدا الجمعة.

نشوفكم على خير كمان أسبوع وتبقى مصر تعافت أكثر وأكثر، ولأننا متفائلون حبينا ننقل لكم طاقتنا الإيجابية قدر الإمكان، ما تنسوش تتابعوا أجندة موقعنا علشان تعرفوا الأحداث الثقافية في العاصمة أول بأول.. عاشت مصر عظيمة بشعبها.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
04/07/2013
-