دليل كايرو 360 لأماكن تقديم المنح الفنية والمادية في القاهرة لأصحاب الأفكار والمشاريع المميزة - الحياة في كايرو Feature - كايرو 360
 







دليل كايرو 360 لأماكن تقديم المنح الفنية والمادية في القاهرة لأصحاب الأفكار والمشاريع المميزة
دليل كايرو 360 لأماكن تقديم المنح الفنية والمادية في القاهرة لأصحاب الأفكار والمشاريع المميزة
اصدرت في: 23/09/2013

ناس كثير بـ يكون عندهم أفكار حلوة أوي، ورغبة شديدة في تنفيذها، ناس كارهة القعدة العقيمة وراء المكاتب في وظائف مش شايفين أنها هـ تلبي طموحاتهم، علشان الناس دول بالذات ظهرت مجموعة من البرامج والجمعيات الأهلية والشركات، والمبادرات اللي تخصصت في أنها تقدم منح لأصحاب الأفكار المميزة، والإرادة المصممة على تنفيذ الأفكار دي، والمنح مش شرط تكون فلوس بس، المنح أحيانًا بـ تكون في شكل تدريب، ومساعدة علمية في التعرف أكثر على السوق، وإدارة الأعمال، والتعرف على التجارب الأخرى، والتطور في تنفيذ المشروع.

في موضوعنا هـ نقدم مجموعة من الجهات المانحة اللي بـ تساعد أصحاب المشروعات المختلفة على تطوير شغلهم، بعض الجهات بـ تستقبل المشروعات اللي بدأت بالفعل وشدت حيلها علشان تقويها وتكبرها، وبعض الجهات بـ تأخذ الأفكار علشان تحولها إلى مشروعات حقيقية على أرض الواقع، وتبدأ مع أصحابها من الصفر، كل مكان وله سياسته وشروطه، هـ نعرض بعض الأماكن دي، والفئات اللي ممكن يحصلوا على مساعدتها وإزاي ممكن التواصل معاهم.

 

نهضة المحروسة  

لو كنت لسه بـ تبدأ مشوارك، وعاوز مكان يستقبلك ويستقبل أفكارك ويدعمك علشان تنفذها يبقى أنت محتاج تروح لنهضة المحروسة، وهي جمعية أهلية، غير حكومية، بـ تقدم حاجة اسمها "حضانة الأفكار"، ودي وظيفتها أنها تحول الأفكار لمشروعات قائمة بذاتها على أرض الواقع.

حضانة الأفكار بـ تستقبل نوعين من رواد الأعمال: النوع الأول الناس اللي لسه في مرحلة الفكرة، وما بدأوش أي حاجة، والنوع الثاني الناس اللي بدأوا لكن لسه في بداية التنفيذ، شرطهم الأساسي أن الأفكار يكون لها القدرة على مواجهة مشاكل اجتماعية رئيسية وتحقيق تأثير قومى.

الدعم اللي بـ تقدمه الجمعية بـ يكون من خلال مجموعة بنود بـ توفرها للمتقدمين لها، أولها بناء الكفاءة وده من خلال تدريب متخصص يشمل 18 دورة تدريبية في مجالات التسويق، وجمع التبرعات، ووسائل الإعلام الاجتماعية، وإدارة المتطوعين، والاستثمار، وتوفير مستشار يمد رواد الأعمال بالخبرة ويرشدهم على المستوى الفردي، أما البند الثاني فهو الدعم الفني، وهو عبارة عن استشارات وإدارة لأداء رائد الأعمال، وإرشاد طويل المدى، كمان فيه دعم ومساندة بـ يقدمه فريق عمل نهضة المحروسة اللي بقى عنده خبرة كبيرة في مجال إدارة المشاريع المبتدئة، فريق عمل "حضانة الأفكار" بـ يقدم استشارات مالية وقانونية واستشارات خاصة بإدرار الدخل، وتقنيات الإدارة، ده غير استشاريين بـ يتم الاستعانة بهم لإنجاز المشروعات زي مصممي الجرافيك، ومصممي المواقع، والمحامين والاستشاريين في مجال المراقبة والتقييم والاكتساب.

البند الثالث اللي بـ تقدمه جمعية نهضة المحروسة هو دعم البنية التحتية، من خلال مظلة قانونية بـ توفرها الجمعية، لأنها مقيدة في وزارة الشئون الاجتماعية، كمان بـ توفر مكان للاجتماعات، وخدمات خاصة بتكنولوجيا المعلومات زي بريد إلكتروني، واستضافة مواقع، كل ده بالإضافة إلى قاعدة من الكفاءات والرواد الاجتماعيين اللي بـ يوصل عددهم لعشرة آلاف شخص، ده غير سلسلة من المنافع الثانية، المهم أن المشروع يكون ريادي اجتماعيًا، وله تأثير ملموس مع تطبيقه.

لو مهتم بالخدمات اللي بـ تقدمها نهضة المحروسة ممكن تقرأ الشروط بتدقيق أكثر، وتملأ طلب الالتحاق بهم، آخر ميعاد لتقديم الطلبات 30 سبتمبر 2013 على عنوان البريد الإلكتروني التالي: incubator@nahdetmasr.org، وممكن تعرفوا أكثر عن نهضة المحروسة من موقعهم الإلكتروني، أو صفحتهم على الفيسبوك.

 

مركز الإبداع التكنولوجي وريادة الأعمال TIEC

لو كنت طالب جامعي، وفكرتك لها علاقة بمجال تكنولوجيا المعلومات والاتصالات، فأنسب مكان ممكن يساعدك هو مركز الإبداع التكنولوجي وريادة الأعمال، اللي بـ يقوم بتدريب الطلبة وبناء قدراتهم من خلال التدريب والتوعية في مجال الابتكار وريادة الأعمال، وده من خلال مجموعة من البرامج التدريبية اللي بـ تنسق بين القطاعين العام والخاص، وبـ تدعم جهود الإبداع في مجال تكنولوجيا المعلومات في الجامعات والمعاهد البحثية والأكاديمية.

مركز الإبداع التكنولوجي مكان حكومي، مقره في القرية الذكية، وفيه مشروعات بـ تساند الأفكار اللي بدأت بالفعل زي "بيقولك" الموقع القائم على تقديم معلومات عن النشرة المرورية، ومبادرات زي "حي"، و"فكر"، و"ابتكار".

المركز بـ يدعم الأفكار المبتكرة، سواء كان الدعم في صورة تمويل، أو تسهيل العمل، أو دورات توعية، أو جوائز أو محاضرات، وغيرها من سبل الدعم، الشرط الأساسي أن الفكرة تكون مميزة، ومبتكرة وفيها إبداع، وهم دورهم تسهيل كل حاجة بعد كده، والأهم أن يكون لها علاقة بالاتصالات وتكنولوجيا المعلومات.

تقدروا تعرفوا أكثر من المركز من خلال الموقع الإلكتروني، وكمان صفحتهم على الفيسبوك.

 

إندفور مصر EgyptEndeavor 

لو كنت بدأت مشروعك بالفعل، وشايف أنه واعد، وعاوز تتنقل للخطوة التالية، يبقى إندفور مصر هي الاختيار الأمثل لك، إندفور مصر Egypt Endeavor منظمة غير ربحية، بـ تدعم رواد الأعمال، اللي بدأوا شغلهم بالفعل وأحرزوا مراحل متقدمة، مش الصغيرين اللي لسه بـ يبدأوا، المنظمة مش بـ تشترط التخصص في مجال بعينه، كل المجالات متاح العمل فيها، إندفور بـ تساند مشاريع زي مكتبات ديوان، وتي بي إس، وامتنان اللي بـ يبيع عسل وأعشاب وحاجات صحية، وموقع "بيقولك".

هبة جمال المديرة التنفيذية لإندفور مصر تكلمت مع كايرو 360 عن شغل إندفور مصر، وقالت أنهم كمنظمة بـ يساعدوا الاقتصاد المصري بدعم رواد الأعمال علشان يساهموا في توفير فرص عمل، ويرجع الاقتصاد المصري أقوى.

عن أشكال الدعم، قالت لنا أنه بـ يكون في صورة خدمات متعددة، وأن رائد الأعمال اللي بـ يروح لهم وعنده فكرة وشغل عاوز يكبره، بـ يدخل في الأول عملية اختيار للمفاضلة بينه وبين باقي المشاريع المتقدمة، وفيه كذا وسيلة للاختيار من خلال مقابلات مع رواد أعمال زيهم وأكاديميين، يسألوهم أسئلة صعبة عن الشغل بتاعهم، هبة بـ تقول أن المرحلة الاختيارية صعبة جدًا، لكن بـ تعود على رائد الأعمال بفايدة كبيرة، أنها بـ تخليه يفكر في البيزنس بطريقة جديدة، وإزاي يتقدم في مسيرة شغله ويوصل للهدف اللي هو عاوزه. وبعد الاختيار تبدأ مرحلة تقديم الخدمات زي توفير مجلس استشاري لكل مشروع، علشان أصحابه يفكروا جديًا في الأهداف اللي عاوزين يحققوها.

إندفور عبارة عن شبكة حول العالم بـ تقوم بالدور ده في أكثر من بلد، لذلك واحدة من الخدمات اللي بـ تقدمها أنها تربط بين رواد الأعمال اللي لسه في بداية مشوارهم واللي مجالاتهم متشابهة حول العالم، يعني على سبيل المثال واحد مصري البيزنس بتاعه في مجال الأدوات الصحية، توصله مع رائد أعمال شبيه له في البرازيل، أو إندونيسيا فـ يتعلموا من بعض، وهكذا، ده المنظمة بـ تسميه "تعليم من صديق لصديق"، كمان المنظمة بـ تنظم وتقدم بالتعاون مع شركائها كثير من الخدمات من خلال فعاليات تعلمهم مجالات معينة مهتمين بها زي الإدارة والحصول على التمويل، وإزاي يكبروا البيزنس بتاعهم، لو مهتم باللي بـ تقدمه منظمة إندفور ممكن تزور موقعهم الإلكتروني.

 

كايرو أنجلز Cairo Angels 

"كايرو أنجلز" مجموعة من الرياديين الأثرياء في القاهرة عاوزين يستثمروا في شركات ناشئة في مراحلها الأولى شايفين أن مصر محتاجة لناس مستعدين يستغلوا أموالهم في سد نقص التمويل، ومساعدة الشركات الناشئة المثيرة للاهتمام، واللي بـ يتمتعوا بإمكانيات كبيرة، والمسألة مش بـ تقف عند حدود التمويل، لكن كمان بـ تتضمن إرشادات من رواد أعمال محترفين، خلفياتهم الاستثمارية متنوعة شاملة الصناعة والتجارة والزراعة والتكنولوجيا والبناء والماليّة، ده غير أن 20% من المستثمرين المشاركين في التمويل تقريبًا سيدات، ده غير المساعدات اللي بـ يقدمها ضيوف أعضاء في كايرو أنجلز في مجالات العلاقات العامة والمحاسبة والقانون.

التعاون مع كايرو أنجلز زي باقي الجهات المانحة، بـ يبدأ باستعراض الفكرة والخطة التجارية، إذا كان مثيرة للاهتمام بـ تبدأ الاجتماعات لاختبار رائد الأعمال بـ يتم إدراج اسمه على لائحة جلسة عرض الأفكار، اللي بـ تتعمل كل كام شهر من 3 إلى 4 ساعات في فندق من الفنادق، لعرض الأفكار وتلقي الأسئلة.

"كايرو أنجلز" مش بـ تشترط أن المشاريع تكون في مجال معين، لكن هم بـ يقولوا أن أكثر الطلبات اللي بـ تتقدم لهم بـ تكون في مجال التكنولوجيا، لذلك عندهم رغبة أنهم يتلقوا مزيد من المشاريع والأفكار في قطاعات الزراعة والصناعة، ويتقدم لهم رائدات أعمال ستات.

لو مهتمين بالتعاون معاهم، تقدروا تراسلوا إيفانا ضاهر مديرة كايرو إنجلز على إيميل: ivana@thecairoangels.com أو زيارة صفحتهم على الفيسبوك.

 

يُمكن 

"يُمكن" شبكة اجتماعية على الإنترنت لتمويل المنتجات المبتكرة ودعم المشروعات الصناعية والحرفية الصغيرة في مصر والعالم العربي، وإكساب رواد الأعمال الخبرة، بـ يقوم بنشر التحديات أو المشكلات الخاصة بالإنتاج في الورش المحلية بالتعاون مع الجمعيات الأهلية اللي بـ تشتغل معاهم، ومن هنا يقدر الطلبة، والمخترعين، والباحثين أنهم يأخذوا خبرة عن طريق زيادة حجم الإنتاج أو تحسين جودة المنتجات أو استخدام مواد خام جديدة، طبعًا الحلول المبتكرة بـ تأخذ جوايز.

"يُمكن" منصة لحل المشاكل، وتمويل المشاريع الصغيرة المبدعة، لو كنت مهتم بـ اللي بـ يقدموه، تقدر تبعت لهم فكرتك من خلال الإيميل info@yomken.com أو زيارة موقعهم على الإنترنت

مزيد من الصور
  • دليل كايرو 360 لأماكن تقديم المنح الفنية والمادية في القاهرة لأصحاب الأفكار والمشاريع المميزة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
23/09/2013
-