دليل أحداث نهاية الأسبوع: محمد محسن وقص ولزق وعلي طالباب وفرقة نور عاشور - الحياة في كايرو Feature - كايرو 360
 







دليل أحداث نهاية الأسبوع: محمد محسن وقص ولزق وعلي طالباب وفرقة نور عاشور
دليل أحداث نهاية الأسبوع: محمد محسن وقص ولزق وعلي طالباب وفرقة نور عاشور
اصدرت في: 03/10/2013

شهر أكتوبر السنة دي رائع! أجازات كثير وبـ تلضم في الويك إند وحاجة تفرح، احتفالات 6 أكتوبر وعيد الأضحى وغيرها، أول أجازة بدأت بعد 3 أيام بس من بداية الشهر، من النهارده لحد يوم الأحد اللي جاي الموافق السادس من أكتوبر واحتفالات أعياد النصر ووعود القوات المسلحة بتنظيم احتفالات شعبية في كل المحافظات وعروض جوية وحركات، وجب التنويه برضه علشان لو حد حابب يقعد في البلكونة أو فوق السطوح اليوم ده، وبالنسبة للناس اللي هـ تسافر تقضي الويك إند الطويل بره القاهرة بـ نقول لهم تروحوا وتيجوا بألف سلامة، وطبعًا هـ يفوتكم كام عرض حلوين من اللي هـ نتكلم عنهم النهارده.

عدد من المعارض الفنية تم إطلاقها الأسبوع ده بـ نرشح بعضها للزيارة زي جاليري رواد الفن في مصر في جاليري سفرخان. هنا هـ تستمتعوا بالأعمال الفنية الجميلة لكل من: راغب عياد اللي لعب دور كبير في الفن المصري الحديث من بداية القرن العشرين وأعمال فنانين آخرين زي زينب عبد الفتاح وعفت ناجي وصلاح طاهر وفؤاد كامل وغيرهم من رواد الفن المصري. 

ودرب 17 18 بـ يستضيف معرض فني بعنوان "الفن للسلام والحرية" للتأكيد على قيمة السلام من إبداع فنانين مصريين ودانماركيين وهم: سيمون آبرج كايرن ومروة عادل وحسام درار وهادي برعي وهاني راشد، في معرض كرنفالي مليان بالألوان والتأثيرات الصوتية.

النهارده يبدأ مسرح الجنينة برنامجه الشهري لأكتوبر 2013 بتنظيم عدد من الحفلات لعدد كبير من الفرق الموسيقية والموسيقيين المصريين والعرب، يبدأ الموسم بحفلة لفرقتي "قص ولزق" و"عشرة غربي" في سهرة موسيقية رائعة بكلمات مصرية. الفرقتين فيه بينهم أوجه تشابه كثير من حيث نوع الموسيقى والكلمات والميل لتقديم الأنغام والأغاني النوبية أحيانًا. سعر التذكرة 10 جنيه والحفل يبدأ الساعة 7 مساءً. 

قصر الأمير طاز حاليًا بـ يستضيف النسخة الثانية من عرض "عَنِ العُشــَّـاق" المأخوذ عن كتاب "طوق الحمامة في الألفة والألاف لابن حزم الأندلسي"، مع مختارات من أغنية كوكب الشرق أم كلثوم وارتجالات حرة لعازفي فرقة بيت العود العربي، فكرة وإخراج هاني عفيفي وأداء رقص مسرحي مارتينا عادل وغناء نجوى حمدي. 

يوم السبت ممكن تحضروا حفلة على مسرح الجنينة بحديقة الأزهر للفنان علي طالباب. يتميز علي بتأديته أغاني الراب بكلمات مصرية وتعتبر أغنية "مشروع المنظومة" من أهم أعماله، سعر التذكرة 10 جنيه. 

وحفلة ثانية في ساقية الصاوي لفرقة "صوت الشارع" في قاعة الحكمة، والفرقة بـ تقدم أغاني مختلفة بكلمات مصرية مميزة، سعر التذكرة 10 جنيه للأعضاء و15 جنيه لغير الأعضاء.

يوم الأحد الموافق 6 أكتوبر تعالوا على "المقر" الموجود في مصر الجديدة وزوروا البازار المعمول هناك وهـ تلاقوا أنشطة ومنتجات وشركات كثيرة، للمزيد من المعلومات عن المشاركين زوروا رابط الحدث. 

وفي نفس اليوم على مسرح الجنينة بحديقة الأزهر هـ يكون فيه حفل للمغني الصاعد محمد محسن هـ يقدم من خلاله مجموعة من أجمل أغاني سيد درويش وأغانيه الخاصة اللي نزلت في ألبومه اللي أطلقه في نهاية 2011. سعر التذكرة 10 جنيه والدخول الساعة 7 مساءً. 

فرقة "نور عاشور" هـ تقدم لأول مرة عرض في بيت الرصيف بمناسبة الاحتفال بذكرى حرب أكتوبر، مش بس كده كمان هـ يكون فيه ممثلين Stand Up Comedy وهم: أمير عزت ومينا نادر ومصطفى السعيد، سعر التذكرة 20 جنيه.

تابعوا أجندة كايرو 360 وابعثوا لنا أي أحداث أو فعاليات خاصة بكم لو عاوزين أننا نكتب عنها، يلا أجازة طويلة سعيدة ونشوفكم الويك إند اللي جاي.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
03/10/2013
-