دليل أحداث نهاية الأسبوع: علي الهلباوي ومريم صالح وعرض ريا وسكينة ومسابقة شعر - الحياة في كايرو Feature - كايرو 360
 







دليل أحداث نهاية الأسبوع: علي الهلباوي ومريم صالح وعرض ريا وسكينة ومسابقة شعر
دليل أحداث نهاية الأسبوع: علي الهلباوي ومريم صالح وعرض ريا وسكينة ومسابقة شعر
اصدرت في: 05/06/2014

أخبار الموجة الحارة إيه؟ بـ يضحكوا علينا بموضوع الموجة ده! هو الصيف بـ يبقى إيه غير شوية موجات حارة لازقة في بعض أو يفصل بينها يوم أو اثنين؟ الصيف في مصر طول عمره حر ورطوبة ورياح ساخنة، بـ نهرب منها كام يوم على الساحل الشمالي أو البحر الأحمر، لكن ما حدش يقول أنها موجة وبـ تعدي! أنه صيف مصر يا سادة. بالليل الدنيا بـ تبقى ألطف والخروجات بـ تبقى حتمية علشان البيت لا يطاق من غير مروحة أو تكييف "مع الانقطاع المتكرر للكهرباء" ولازم تدور على تلك البقعة السحرية اللي بـ تقدم لك الـ 3 حاجات دول: هواء ومياه ومزيكا، وما أكثرها الويك إند ده، عندنا عدد كبير من الحفلات المميزة في أسبوع موسيقي جدًا.

نبدأ بالنهارده الخميس وحفلات دار الأوبرا والصاوي ومسرح الجنينة وكايرو جاز كلوب. المنشد الفنان علي الهلباوي هـ يغني النهارده على مسرح الجنينة في حديقة الأزهر، علي الهلباوي هو ابن الشاعر والمنشد الديني المعروف الشيخ محمد الهلباوي. وهو بـ يقدم إنشاد ديني مع موسيقى غربية. قدم مشروع مع المرنم ماهر فايز تحت عنوان "صوت واحد في حب مصر". سعر التذكرة 10 جنيه، وغير شاملة سعر تذكرة دخول حديقة الأزهر. 

في كايرو جاز كلوب حفل للموسيقى الشرقية الحديثة مع "طرب باند" بعدهم موسيقى مصرية معاصرة وايقاعات أفريقية ولاتينية مع هاني عادل وفرقة "وسط البلد". يرجى الحجز مسبقًا، الدخول للـ Couples فقط، وغير مسموح بالدخول لأقل من 25 سنة، وتغلق الأبواب باكتمال العدد. 

في قاعة النهر بساقية الصاوي هـ يبقى فيه حفل للمولوية المصرية بقيادة الفنان عامر التوني، قليل لما بـ نشوف حفلات للمولوية في الساقية، ودي فرصة للي ما شافهمش قبل كده أنه يروح مكان سهل الوصول له زي الساقية ويشوفهم هناك، وسعر التذكرة 30 جنيه للأعضاء وغير الأعضاء. 

فرقة عبدالحليم نويرة الموسيقية العريقة هـ تحيي حفل مميز على المسرح الكبير بدار الأوبرا المصرية، يذكر أن فرقة "نويرة" بـ تقدم أشكال موسيقية من التراث، وقوالب غنائية وموسيقية مختلفة لجمهور الموسيقى العربية، التذاكر متاحة بشباك الحجز، للاستعلام اتصل بـ 27390132 - 27390188. 

ومزيج ظريف من الموسيقى والمسرح وعرض على مسرح الجمهورية تحت رعاية دار الأوبرا المصرية بعنوان "ريا وسكينة" وهو عرض استعراضي من تصميم وإخراج طارق حسن. التذاكر متاحة بشباك الحجز. 

وبعيد عن المزيكا لكن مش بعيد عن الأغاني مكن تشارك في أمسية شعرية، لو لك في كتابة الشعر سواء بالإنجليزية أو العربية، انضم لأقرانك الليلة دي في مكتبة بيكيا. تفاصيل أكثر وطريقة الاشتراك من هنا.

بكرة الجمعة على مسرح الجنينة هـ يبقى فيه حفل غنائي لمريم صالح، وهي فنانة مصرية مستقلة تربت فنيًا علي يد والدها المخرج والمؤلف المسرحي صالح سعد، بدأت مريم الغناء والتمثيل من سن 7 سنوات وأسست وشاركت بعدها في العديد من الفرق الموسيقية زي "سادة ومظبوط"، و"جواز سفر"، "فرقة الشيخ زين ورفاقه"، "حبايبنا"، "الورشة"، "فرقة الطمي المسرحية"، وأخيرًا فرقة "بركة". شاركت في عدد من الأفلام بالتمثيل والغناء وبـ تشتغل حاليًا على مشاريع موسيقية مستقلة مختلفة. سعر التذكرة 10 جنيه غير شاملة سعر تذكرة دخول حديقة الأزهر. 

وفي نفس التوقيت في قاعة الحكمة في ساقية الصاوي هـ يبقى فيه حفل غنائي لفرقة المصريين بقيادة الفنان هاني شنودة، سعر التذكرة 25 جنيه للأعضاء وغير أعضاء الساقية. 

يوم السبت هـ يكون في مؤسسة دوم ورشة لفن الـ "زنتانجل"، وهو نوع من الفن العلاجي اللي بـ يساعد على الاسترخاء من خلال تكرار أنماط من الخطوط المتداخلة والمتناغمة. الفئة العمرية للورشة: 18+ سنة، ولا يشترط إجادة الرسم. الورشة مكونة من 5 محاضرات على مدار شهر. سعر الورشة 300 جنيه. 

وزي كل سبت في الموسم الصيفي، هـ يكون فيه على المسرح الكبير حفل لأوركسترا القاهرة السيمفوني بدار الأوبرا المصرية، التذاكر متاحة بشباك الحجز والدخول بالملابس الرسمية. 

فيه عدد كبير من الورش الفنية والثقافية في أماكن زي "ميزان" و"شبابيك"، كل تفاصيلها موجودة على أجندة موقعنا، بالإضافة لندوات ومعارض فنية متنوعة في جاليريهات الزمالك ووسط البلد، القاهرة عامرة بالفعاليات، وبـ تعيش حالة من الانتعاش الموسيقي والثقافي، شارك واتفرج واستمتع وتابع أجندتنا علشان تعرف الجديد أول بأول. 

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
05/06/2014
-