10 أماكن مناسبة لاستضافة أعياد ميلاد للأطفال في القاهرة - الحياة في كايرو Feature - كايرو 360
 







10 أماكن مناسبة لاستضافة أعياد ميلاد للأطفال في القاهرة
10 أماكن مناسبة لاستضافة أعياد ميلاد للأطفال في القاهرة
اصدرت في: 14/11/2016

أيام زمان كانت فكرة العيد ميلاد الأسطورية في القاهرة تتلخص في زيارة لماكدونالدز، وبكده تكون حققت كل أحلام أطفالك، الكلام ده اتغير اليومين دول، طلبات وأحلام الأطفال في 2016 أكثر من مجرد وجبة هابي ميل واللعب مع عروسة رونالد ماكدونالد المخيفة.

القاهرة كمان تغيرت كثير عن زمان، وفيه أماكن بدأت تنتبه لاحتياجات أطفال اليومين دول اللي عارفين كل حاجة، وعلشان كده بـ يقدموا أفكار مبتكرة لحفلات عيد الميلاد، من دروس الطبخ والرسم وتعليم حرف مختلفة، لغاية الاستمتاع بعيد ميلاد على حمام السباحة وأماكن آوت دور مفتوحة؛ إحنا دورنا نجمع لكم أجمد الأماكن في مقال واحد.

 

أدرينالين بارك – Adrenalin Park

أدرينالين بارك بـ تقدم أنشطة متنوعة منها ليزر تاج وبينت بول واللعب على الترامبولين، وتعتبر واحدة من أجمد الأماكن الترفيهية في القاهرة، أدرينالين بارك موجودة في 6 أكتوبر وتعتبر مكان ممتاز للأطفال اللي بـ تحب تضرب أصحابها بالألوان أو يتسابقوا للوصول للكنز. أما بالنسبة لأعياد الميلاد، البارك بـ توفر التورتة والأكل والمشروبات، ده غير الألعاب الممتعة زي لعب الكرة على ملعب صابون والمصارعة في المياه وأولمبياد مصغر، لمعلومات أكثر كلمهم على 01225001008 أو ابعت على بريدهم الإلكتروني info@adrenalinegypt.com.

 

كيدزانيا - Kidzania

فكرتها هي مساعدة طفلك يتعرف على هوايته في الحياة ويحددها بأمتع الطرق الممكنة، وكيدزانيا في القاهرة الجديدة تعتبر واحدة من أمتع التجارب في مصر، وعلشان كده اهتموا بكل تفاصيلها علشان تناسب كل مواهب الأطفال مهما كانت، كيدزانيا بـ تقدم 5 أفكار لأعياد الميلاد وفيها هـ يستمتع الأطفال بممارسة أنشطة مسلية، وأكيد كلنا متفقين أن الأطفال لما يلبسوا ملابس الكبار شكلهم بـ يكون تحفة، علشان تعرف أكثر عن باقات أعياد الميلاد من كيدزانيا، ابعت لهم على Birthdays@kidzania.com.eg .

 

كلوب هاوس كمبوند الجزيرة – Gezira Compound Club House

مين يقدر يقول لأ لحفلة على حمام السباحة مع العائلة والأصحاب والأحباب؟ كلوب هاوس الجزيرة في الشيخ زايد يعتبر مكان ممتاز لحفلات عيد الميلاد ويتميز بمنظر الخضرة الجميل وحمام السباحة، ممكن تحجز الكلوب هاوس كله لحفلة عيد الميلاد، وكمان تقدر تأجر ترامبولين ضخمة قابلة للنفخ وزحليقة على حمام السباحة للترفيه عن أطفالك بطريقة رائعة، كلوب هاوس الجزيرة كمان بـ يقدم بوفيه صغير ضمن باقة أعياد الميلاد.

 

فجنون - Fagnoon

على مدار 15 سنة احتفظت ملاهي فجنون بمكانتها كحديقة ترفيهية بـ يزورها كثير من الأطفال والبالغين المحبين للتلوين والحرف، وفجنون تعتبر مكان أكثر من ممتاز يقدر فيه أطفالك يجربوا حاجة مبتكرة في عيد ميلادهم زي تشكيل الفخار والصلصال والرسم والتصميم على التي شيرتات وكمان ممكن يستمتعوا بالمصارعة في بركة الطمي ومعركة البالونات وركوب الحصان، أسعار فجنون تبدأ من 50 جنيه للطفل، لمعلومات أكثر اتصل بـ 01006818790.

 

بيلي بييز - Billy Beez

يعتبر "بيلي بييز - Billy Beez" في مول العرب من الأماكن اللي هـ تخليك تتمنى ترجع طفل مرة ثانية، أكيد الأطفال هـ يقضوا وقت رائع مع الكم المهول من الأنشطة المسلية هناك؛ تخيل معايا رد فعلهم لما تفاجئهم بحفل عيد ميلاد هناك، باقات أعياد الميلاد في بيلي بييز تبدأ من 130 جنيه للطفل، علشان تعرف أكثر عن باقات بيلي بييز اتصل بـ 01099135570.

 

شوجار سبيل - Sugar Spell

أكيد شوجار سبيل باعتباره محل حلويات ومطعم عائلي يمتلك صالة مكشوفة وواحدة ثانية مقفولة اختيار ممتاز للاستمتاع بحفلة عيد ميلاد آوت دور مع عائلتك وأصدقائك، المكان بـ يقدم أنشطة ممتعة للأطفال منها الخبز ورسم الوشوش بالإضافة لمنيو أكل بأسعار متنوعة، أسعار حفلات عيد الميلاد في شوجار سبيل تتراوح بين 50: 90 جنيه للطفل على حسب الباقة المطلوبة.

 

ليجو مانيا - Lego Mania

"ليجو مانيا - Lego Mania" هي ملاهي معمولة على شكل الليجو داخل كومبوند الباتيو في القاهرة الجديدة، وبـ يقدم عدد كبير من الأنشطة الترفيهية للأطفال تشمل الرسم وألعاب الفيديو والليجو وحاجات ثانية، ممكن تأجر الدور الثاني من ليجو مانيا لحفلة عيد ميلاد خاصة بأسعار تبدأ من 3250 جنيه (بحد أقصى 25 طفل و15 بالغ)، مع إضافة 150 جنيه لخدمة تقديم تورتة عيد الميلاد، المكان كمان بـ يوفر خدمة المربية والجرسونات مجانًا، لمعلومات أكثر اتصل بـ 01066751144.

 

إيتري - Eatery

صحيح افتتاحه كان قريب، لكن إيتري أثبت نفسه كواحد من أقوى المطاعم الجديدة في القاهرة ومكان مميز لتعليم الطبخ، وبدأ يقدم دروس تعليم الطبخ وتحديدًا في الأكل الإيطالي، قدم لأطفالك تجربة تعليم الطبخ صعب تتنسي هدية لعيد ميلادهم واحجز محطة طبخ في إيتري يتعلموا عن طريقها مبادئ الطبخ، سعر حجز محطة الطبخ 600 جنيه في الساعة زائد مصاريف مكونات الأكل والشيف، علشان تعرف أكثر عن تجربة الطبخ في إيتري، اتصل بـ 01225522300 أو 01225522155.

 

Fun Kingdom

هو مجمع ترفيهي ومنطقة ألعاب رائعة في مول صن سيتي بـ يوفر أماكن لحفلات أعياد الميلاد الخاصة، أكيد أطفالك هـ يستمتعوا بيوم ما يتنسيش مع ألعاب الفيديو والبولينج والتزلج على الجليد، الألعاب زي التزلج والبولينج تبدأ من 50 جنيه ولو هـ تلعب أكثر السعر بـ يتغير على حسب اللعبة، لمعلومات أكثر اتصل بـ 01015151382.

 

أوسكار لاونج أند ريستوران

صحيح من الوهلة الأولى هـ تفتكر أن أوسكار لاونج في المهندسين مطعم وكافيه، لكنهم مخصصين دور كامل للأطفال مليان ألعاب زي كرة الطاولة والبين باجز المريحة علشان يتفرجوا على الأفلام، وملابس تنكرية ومحطة أكل يعملوا فيها بيتزاتهم المفضلة وحاجات ثانية، لمعلومات أكثر عن أعياد الميلاد في أوسكار لاونج اتصل بـ 01155559239.

عيد ميلاد سعيد!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
رامى سليمان
حرر بواسطة:
رامى سليمان
تاريخ النشر:
14/11/2016
كاتب - عامل دكتوراه فى البرجر - الأكل وتايلور سويفت ومورتال كومبات هما أولوياته فى الحياة.