دليل أحداث نهاية الأسبوع: حفل كايروكي وغالية بن علي وافتكاسات ومنال محيى الدين - الحياة في كايرو Feature - كايرو 360
 







دليل أحداث نهاية الأسبوع: حفل كايروكي وغالية بن علي وافتكاسات ومنال محيى الدين
دليل أحداث نهاية الأسبوع: حفل كايروكي وغالية بن علي وافتكاسات ومنال محيى الدين
اصدرت في: 07/04/2016

كل واحد فينا بيمر بضغوط في الحياة والشغل كفيلة أنها تخليه مرهق وتعبان، فبيحتاج يغير جو إما بسفر أو بخروجة مختلفة أو حفلة لمغني بيحبه، وده اللي بنحاول نقدمهولكم في دليل أحداثنا.

نبدأ بيوم الخميس، ولو أنتم من محبي الفلوكلور والموسيقى البورسعيدي يبقى لازم تروحوا مسرح الضمة اللي عاملة حفل لفرقة الطنبورة، وسعر التذكرة 30 جنيه. أما لو عاوزين تستمتعوا بصوت جميل مالوش زي بيجمع ما بين الرقة والقوة في نفس الوقت يبقى ما تفوتوش حفل الفنانة غالية بن علي في مركز الربع الثقافي، وسعر التذكرة 50 جنيه.

كمان على المسرح المكشوف بدار الأوبرا المصرية فيه حفل موسيقي لفرقة "عمدان النور"، والتذاكر متاحة بشباك الحجز. أما لو أنتم من عشاق الست فمسرح الساقية للعرائس بيقدم على مسرح قاعة الحكمة في ساقية الصاوي حفلتين لعرض "أم كلثوم تعود من جديد" على أنغام أغنيتي "حيرت قلبي - بعيد عنك"، وسعر التذكرة 15 جنيه لغير الأعضاء، ولأعضاء الساقية 10 جنيه.

وننتقل ليوم الجمعة، وحفل للفنان علي الهلباوي في ساقية الصاوي بقاعة النهر وسعر التذكرة: 40 جنيه لغير الأعضاء و35 جنيه للأعضاء بالساقية. كمان على المسرح المكشوف بدار الأوبرا المصرية فيه حفل لفرقة "افتكاسات"، وسعر التذكرة 35 جنيه.

ومفاجأة اليوم في حديقة الأزهر على مسرح الجنينة واللي هي حفل موسيقي للفنان عزيز سحماوي، واللي بيقدم أغاني بتمزج ما بين الروك والفلامنكو. وكمان عزيز بيكتب بنفسه أشعار أغانيه باللغة العربية، وسعر التذكرة 50 جنيه غير شاملة ثمن تذكرة دخول الحديقة. وكعادة كل يوم جمعة وعرض الأراجوز وخيال الظل، في مركز إبداع بيت السحيمي، والدعوة عامة.

ونختم بيوم السبت، وحفل لعازفة الهارب الفنانة منال محيي الدين على المسرح المكشوف بدار الأوبرا المصرية، وسعر التذكرة 50 جنيه. وفيه في دار الأوبرا المصرية على المسرح الكبير حفل موسيقى كلاسيكية هتقدمه فرقة أوركسترا القاهرة السيمفوني بقيادة المايسترو نادر عباسي، وهيقدموا مجموعة من أعمال بيتهوفن.

أما لو عاوزين تسمعوا حاجة شبابية مطرقعة وبتتكلم عن مشاكل الشباب، ففي قاعة النهر في ساقية الصاوي فيه حفلتين لفرقة "كايروكي"، وسعر التذكرة 50 جنيه. ونختم كالعادة بحفل التنورة في مركز إبداع وكالة الغوري وسعر التذكرة 5 جنيه.

لو عاوزين تعرفوا أكثر عن أحداثنا اللي بننشرها كل يوم على مدار الأسبوع، تابعوا أجندتنا.

ويك إند سعيد!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
07/04/2016
-