October Cyclers: اركب عجلة وشجع الفكرة فى مدينة 6 أكتوبر - صحة ولياقة Feature - كايرو 360
 







October Cyclers: اركب عجلة وشجع الفكرة فى مدينة 6 أكتوبر
October Cyclers: اركب عجلة وشجع الفكرة فى مدينة 6 أكتوبر
اصدرت في: 04/03/2015

October Cyclers بـ يرجعوا فكرة العجل بشكل مختلف جوه أكتوبر.. شغالين بقى لهم سنة على فكرة ركوب العجل.. علشان حاجات كثير.. الفكرة مش بس فى العجل، الفكرة أكثر فى الابتسامة اللى بـ يخلقها ركوب العجل، وكمان فى الأحداث اللى بـ يعملوها والعائد بتاعها يكون للخير.. تعالوا نتعرف أكثر عليهم:

 
الفكرة:
بدأت الفكرة مع مؤسس الفريق أو الفكرة أو المبادرة –يعنى قول عليها زى ما أنت عاوز-أحمد عبد القادر واللى قرر أنه يخلى الناس تركب عجل وتتبسط..

 

حوار تخيلى "بين أحمد عبد القادر ونفسه":

أحمد: عاوز الناس تركب عجل.

نفسه: تمام خليهم يركبوا عجل.

أحمد: لأ مش هى دى الفكرة، أنا عاوز موضوع مختلف فى ركوب العجل.

نفسه: أنت ليه دايمًا بـ تدور على الحاجات الصعبة.

أحمد: مش صعبة، هى بس محتاجة شوية مجهود.

نفسه: هو أنت فاكر أنك هـ تعمل فريق وتلفوا مصر والعالم وكده، أنت فى مصر مش أوربا.

أحمد: مصر حضارتها أقدم من أوربا.

نفسه: بس أوربا متطورة والناس فيها عندهم ثقافة ركوب العجل.. يعنى أنت عاوز تنشر ثقافة ولا عاوز الناس تركب عجل؟

أحمد: أنا عاوز الاثنين.

نفسه: ما هو ده صعب، هـ تجيب منين ناس وعجل وأماكن ومتطوعين ودنيا.

أحمد: معين يا رب.


الدوارات:
هى فكرة أنك تلف أكتوبر كلها بعجلة.. هى إيمانك بفكرة علشان تحققها.. الفكرة بدأت مع الطبيب النفسى أحمد عبد القادر مؤسس الموضوع وانتشرت لحد ما بقيت دلوقت مبادرة كبيرة لركوب العجل وكل جمعة بـ يبقوا فى مكان.. بـ يلفوه بالعجل وكمان بدأوا يزودوا على الموضوع يعنى مش مجرد فكرة ركوب العجل بس لكن الاهتمام باللياقة البدنية عن طريق التمارين وعن طريق تنظيم النفس ومساعدة الناس على عمل ده.

أحمد عبد القادر ما بقاش لوحده دلوقت، معاه منظمين للموضوع والفكرة بـ تكبر معاه من المنظمين: شريف مصطفى، نهى علاء، عبد الرحمن أشرف، أفنان يوسف، يحيى هشام.

الجميل فى الفكرة أنها مش واقفة بس عند مجموعة ناس بـ تركب عجل، لكن الموضوع وراه فلسفة.. وراه فكرة طموحة عاوزة أكتوبر كلها تستخدم العجل وتبقى مدينة عالمية ونموذج لكل الدول.. كمان هو عاوز يسافر علشان يشوف نماذج لدول عملت نفس الفكرة ويتعلم منها.. والجميل بقى فى الموضوع أنهم بـ يوفروا العجل للناس اللى ما عندهاش عجل علشان يتعلموا يركبوا صح ويقطعوا مسافات كبيرة، والتحديات مستمرة وناويين يلفوا مصر بالعجل وناويين يعملوا مشروع طموح بجد، وفى النهاية استنوهم قريب جدًا فى نادى كبير هـ يكون هو مركز تجمعهم فى أكتوبر.. واوعوا تنسوا تابعوهم كل يوم جمعة فى مكان مختلف وفعالية مختلفة.

زوروا صفحتهم على الفيسبوك علشان تتابعوا الفعاليات وكمان راسلوهم على إيميل october.cyclers@gmail.com

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
أحمد عبد الجواد
حرر بواسطة:
أحمد عبد الجواد
تاريخ النشر:
04/03/2015
شاعر عامية وصحفى ومنسق مشروعات أدبية فى الساقية، كائن بـ يحب الحياة، أحيانًا بـ يتحول لشخصية أسطورية وهو بـ يكتب بـ يظهر له جناحين، أو بـ يختفى ويظهر فى أماكن مختلفة، بـ يفضل أكل البيت مع أسرته عن الأكلات السريعة، بـ يلعب لعبة يابانية اسمها "آيكيدو" وحصل على الحزام الأسود فيها بعد معاناة.