دليل كايرو 360 لمطاعم الأكلات الشعبية والمصرية في القاهرة - مطاعم Feature - كايرو 360
 







دليل كايرو 360 لمطاعم الأكلات الشعبية والمصرية في القاهرة
دليل كايرو 360 لمطاعم الأكلات الشعبية والمصرية في القاهرة
اصدرت في: 18/04/2013

مهما نقول أكل سوري ولا إيطالي ولا أسيوي ولا الكلام المستورد ده مافيش أحسن من الأكل المصري الحرش، وعلى رأي المثل "البلدي يوكل"، النهارده حضرنا لكم موضوع جمعنا فيه عدد من الأماكن اللي بـ تقدم الأكل المصري، أهم حاجة حافظوا على صحتكم وعيشوا في هناء وسعادة.

 

أم حسن

فاكرين الأفلام بتاعة زمان لما تيجي الممثلة تقول للبطل: "حضرت لك المحمر والمشمر"؟.. مطعم "أم حسن" هـ تلاقوا فيه المحمر (مش عارفين يعنى إيه المشمر!)، الحكاية بدأت مع إعلانات مطعم أم حسن على أنغام أغنية عمهم محمد عدوية "سلامتها أم حسن" قولنا نروح ونشوف إذا كانت فعلًا الإعلانات بجد ولا مقلب لكن الصراحة استمتعنا جدًا بمطبخ أم حسن اللي بـ يقدم حاجات كثيرة من المشاوي والأطباق المصرية زي الكباب والكفتة والشيش طاووق والطواجن المصرية العريقة زي الفريك والأرز المعمر الحادق والحلو، وأطباق الحلو زي فروتس أم حسن اللي كان فاكهة مقطعة في عصير مانجو، جربوا أكل أم حسن في شارع عباس العقاد بمدينة نصر، وما تتقلوش.

 

البرنس

بمكانه في شارع طلعت حرب على الكورنيش بالقرب من منطقة إمبابة هـ تلاقوا واحد من أهم محلات الأكل الشعبي في القاهرة وهو "البرنس" أو "كبدة البرنس" على اسم صاحبه "ناصر البرنس"، مشهور بأطباق الكبدة بجميع تسوياتها (محمر، مشوي) وأنواعها (جملي، كندوز) وكمان أنواع السجق واللحمة والمقبلات والسلاطات وحاجات كده زي ما بـ يقولوا تجري الريق وترم العظام، زورنا البرنس في رمضان وكان له جو مختلف عن باقى الأيام، ابقوا زوروه وقولوا لنا رأيكم.

 

بحة

لما محل أو شخصية بـ تشتهر المنافسين بـ يحاولوا يأخذوا اسمه ويقلدوه وأي ابتذال وخلاص، "بحة" من الأماكن دي لكن على مين إحنا برضه ناصحين وقاهريين أصلي، قدرنا نوصل لبحة الأصلي اللي موجود في آخر شارع محمد فريد المتقاطع مع شارع مجلس الأمة، وهو من الأماكن الي بـ تقدم لحمة رأس وحلويات اللحوم زي الممبار والكلاوي والممبار والفشة والطحال سواء كانت متشوحة أو مقلية في الزيت وبسعر لطيف، روحوا على بحة الأصلي وما تصدقوش أي مكان ثاني يقول لكم أنا الأصلي لأن فيه واحد بس في مثلث بحة.

 

كبابجي الرفاعي

"يا عم اسمه الطاهرة.. يا عم لأ اسمه الرفاعي.. طب اقعد بقى شكلك مش عارف حاجة".. دي خناقة بين اثنين صحابنا كل واحد فيهم مقتنع أن كبابجي الرفاعي اسمه الطاهرة أو العكس، ببساطة أن كبابجي الطاهرة صاحبه الحاج محمد رفاعي ومنها جاءت شهرة الاسم واللخبطة والخناقة اللي شغالة دي، الرفاعي مشهور من زمان بأنه أحسن كباب في مصر وبالرغم أن عوامل النظافة والتسويق مش زي أوربا والدول المتقدمة إلا أن الناس ممكن تقف طوابير وتنتظر زحمة قد كده علشان تأكل وجبة حلوة في الرفاعي، وبسعر معقول بالنسبة للكباب والنيفة والكفتة وغيره من المشاوي، جربوا الرفاعي أو كبابجي الطاهرة ويا سلام لو في رمضان بس روحوا بدري شوية.

 

عمو حسني

المطبخ المصري واحد من أحسن المطابخ في العالم من وجهة نظرنا وده مش في أنه بـ يخترع أكلات جديدة وبس لكن كمان بـ يضيف تعديلات بسيطة على أكلات تقليدية تخلي الطعم شكل ثاني، "عمو حسني" في مدينة نصر واحد من المحلات اللي بـ تعمل برجر شعبي بالبيض أو الجبنة مع تحابيش خاصة به هو بس، وكمان ساندويتشات الكبدة الإسكندراني والسجق والفاهيتا والهوت دوج والشاورما وساندويتشات الحلو زي الحلاوة والقشطة.

 

أم محمد

بـ يقولوا أن أي حد بـ يطبخ لازم يكون عنده نفس وروح كويسة علشان الأكل يطلع حلو، تجربتنا في مطعم "أم محمد" في مول الموناليزا في القاهرة الجديدة حاجة شبه كده أكل بيتي مصري مضبوط وتقدروا تقولوا عليه أكل شبه اللي بـ نأكله في البيت، لأن لأول مرة وأخيرًا قدرنا نأكل ملوخية زي بتاعة الست الوالدة وحاجات كده صعب تتعمل إلا في البيت، لما تروحوا مطعم أم محمد ما تنسوش تقولوا لنا لسه نفسها حلو في الأكل ولا لأ؟

 

بابا عبده

محل ساندويتشات ظريف قوي في باب الفتوح في القاهرة الإسلامية وكمان أسعار الساندويتشات لطيفة ومناسبة، كل ده هـ تلاقوه في محل "بابا عبده" في القاهرة الإسلامية بالقرب من شارع المعز لدين الله الفاطمي وباب الفتوح، فرصة تتمتعوا بالأكل الشعبي اللذيذ في قلب القاهرة الإسلامية ويا سلام عى شوية مشي في شارع المعز لدين الله الفاطمي.

 

الفقير

محل مشهور في شارع فيصل بالنسبة لرواد الكباب والكفتة في مصر، تجربتنا معاه كانت في البيت وما نقدرش نحدد من خلالها أن المطعم وحش لأن في تجربة ثانية في المطعم كانت كويسة، جربوا "الفقير" وقولوا لنا تجربتكم عاملة إزاي مع واحد من أشهر محلات الكباب والكفتة في القاهرة والجيزة وهل فعلًا يستحق الشهرة ولا "صيت من غير غنى".

 

كمان مش هـ ننسى أماكن بـ تقدم الأكل الشعبي زي "أصلي" اللي بـ يقدم أكلات مصرية زي مكرونة بالبشاميل وساندويتشات كبدة وسجق بجودة كويسة وبسعر أعلى شوية من العادي، وكمان "زوبا" و"كايرو كيتشن" اللي بـ يقدموا أكلات زي الحواوشي والفول والفلافل والكشري والطواجن بأغلب أنواعها لكن بجودة تستحق سعر أعلى شوية، وعلى رأي المثل "الغالي ثمنه فيه".

 

المطبخ المصري من المطابخ المميزة في الشرق الأوسط وبـ يعتمد بصورة رئيسية على السمن والزبدة والأكل المسبك وده ممكن يرفع من معدل الدهون والكوليسترول في الدم لو ما أخذتوش بالكم، استمتعوا بالأكلات وحافظوا على صحتكم وكلوا علشان تعيشوا حياة هادئة بعيد عن الدكاترة والأدوية.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
محمد نصر
حرر بواسطة:
محمد نصر
تاريخ النشر:
18/04/2013
منسق تحريري بالموقع العربي، دماغه مطرقعة وخيالية، بـ يحب القراءة والسفر، مدمن شوكولاتة، بـ يحب سبونج بوب وأيرون مان.