سبب شهرة أمريكانا بلازا فى الشيخ زايد كان سببها سينما IMAX أول ما فتحت، سينما ضخمة بشاشة 4 أضعاف حجم الشاشة العادية، وصوت وصورة أفخم بكثير.. عوامل جذب كثيرة خلت للمكان ده صيت فى وقت قليل جدًا، لكن أثبت المكان نفسه أكثر بالمطاعم والكافيهات الجامدة اللى أغلبها تابعة لشركة "أمريكانا - Americana" وكان أجمدها مطعم "فيش ماركت – Fish Market" اللى كان لنا تجربة فريدة فيه.   

بشعار "The Best Sea Food in Town" واللون الأزرق اللي سائد على الديكور انجذبنا ودخلنا المطعم، الديكور هـ يشدك بشكل غير طبيعي لأنه مميز وجميل، زي أي مكان بتاع سمك هـ تلاقي ثلاجة عرض مفتوحة معروض فيها أنواع سمك مختلفة: بلطي وبوري.. إلخ، وجمبري بأحجام "كبير" و"جامبو"، وأستاكوزا، وكاليماري، عندهم نظام فيه منيو جاهزة فيها وجبات بـ تختار منها كل يوم ماعدا فى الويك إند، بس الطبيعي عامة أنك بـ تختار أكلك وطريقة تحضيره.

طبعًا سعر السمك والجمبري مش ثابت، بـ تختار النوع وطريقة العمل وأنت واقف، وقت زيارتنا كان سعر كيلو السمك البلطي (49 جنيه) أخذنا 850 جرام وعملناه بطريقة السنجاري (عمل 41.65 جنيه)، وأرز صيادية (16 جنيه)، وجمبري مشوي كبير (سعر الكيلو 215 جنيه) أخذنا نصف كيلو بـ 107.50 جنيه (عمل تقريبًا 13 قطعة) وطلبنا يتعمل بطريقة الفاهيتا، وبالنسبة للسلاطات بـ تنزل على الترابيزة.

قعدنا فى المكان المفتوح علشان بـ يطل على مدخل أمركيانا بلازا وعلشان نتفرج على شو البلياتشو اللى كان شغال وقت زيارتنا، نزل لنا أول حاجة زجاجة مياه صغيرة (8 جنيه)، وجاء لنا سلة عيش كبيرة، طعمه كان طازة وتحفة، وبعدها جاءت لنا صينية كبيرة مليانة سلاطات أشكال وألوان، وسألنا الجرسون حابين نأخذ كام نوع سلاطة، اختارنا 4 أنواع: بابا غنوج، وطحينة، وبطاطس مكعبات، وسلاطة خضراء.

سرعة تجهيز الأكل كانت استثنائية، مافيش دقيقتين من بعد ما اختارنا السلاطة لقينا فاهيتا الجمبري جاية والبخار ورائحة وصوت الطشطشة بتاعة التسوية سامعينها من بعيد، شكل الفاهيتا بالفلفل والبصل والطماطم مع البهارات والتسوية بتاعتها كانت غير طبيعية، من أجمل الجمبري اللى ذقناه فى حياتنا وكمان أول مرة نجربه بطريقة الفاهيتا اللى عجبتنا جدًا وفكرنا نبقى نطبخها بالطريقة دي فى البيت بعد كده، بعد شوية حلوين جاءت لنا السمكتين بطريقة السنجاري ورائحتها شبعتنا من قبل ما نذوق أى حتة منها، مع الكمون والبصل والطماطم والفلفل الأخضر، اقطع حتة بس وتذوقها هـ تلاقي اللحم طري جدًا لدرجة أنه كان بـ يذوب فى فمنا، بجد كنا مستمتعين بالأكل جدًا، وحسينا إزاى أن ممكن أكلة تجلب لك إحساس بالسعادة الداخلية.

بعد ما خلصنا أكل وبطننا امتلأت على الآخر، طلبنا من المنيو حلو البروفيترول (19 جنيه)، ولأن "فيش ماركت" متخصص فى السي فوود بس فهو بـ يجيب الحلو بتاعه من مطعم "مايسترو" للحلويات، طعمه كان حلو لكن ضايقنا حاجتين أولها أن الشوكولاتة كانت دسمة جدًا وثقيلة وثاني حاجة أن كان فيه سكر محروق مع المكونات فكان بـ يخلى نفسنا تجذع وما قدرناش نكملها، ولما كتبنا رأينا عنها فى ورقة الاقتراحات قال لنا أنه مش هـ يقدر يغيرها لأنها بـ تيجي جاهزة من مايسترو ودي وصفته، كمان منيو المشروبات محدود عنده مقتصر على المشروبات الغازية والشاي والقهوة.

للأسف فرحتنا وسعدتنا بالأكل ما عكرهاش غير وإحنا بـ ندفع الفاتورة اكتشفنا أن الـ 4 سلاطات اللى أخذناهم ثمنهم 42 جنيه!! واكتشفنا أن ده نظام عندهم أن مجموعة السلاطة طبقين بس بـ 21 جنيه، تضايقنا طبعًا لأن ما حدش قال لنا كده وسابونا نختار عدد السلاطات اللى عاوزينه من غير ما نعرف المفاجأة دي، كمان حرام ليه 4 سلاطات بـ 42 جنيه!! اتكلمنا مع الجرسون وقدمنا شكوتنا ووعدنا بالتنبيه بعد كده للزبائن اللى بعدنا، كمان سلة العيش طلعوا حاسبين 6 خبز بـ 6 جنيه وإحنا فاكرينه تحية من المكان، وكوفر 2 جنيه، وبـ يضاف 12% خدمة من غير ضريبة.   

فيه حاجات ضايقتنا بس ما ننكرش أن التجربة عوضتنا شوية عن الضيق ده إلى جانب المعاملة الودودة والمحترفة من الجرسونات، وأكيد هـ نروحه ثاني بس هـ نخلى بالنا المرة الجاية وإحنا بـ نطلب السلاطات والحلو!