جوائز اختيارات محرري كايرو 360 لعام 2015 لأفضل المطابخ الآسيوية - مطاعم Feature - كايرو 360
 







جوائز اختيارات محرري كايرو 360 لعام 2015 لأفضل المطابخ الآسيوية
جوائز اختيارات محرري كايرو 360 لعام 2015 لأفضل المطابخ الآسيوية
اصدرت في: 26/05/2015

المطبخ الآسيوي المبهر والمعروف بألوانه وبهاراته وتنوعه بـ يكمل ازدهاره في القاهرة، الموضوع ما بقاش مقتصر بس على الأكل الصيني والسوشي، لأ كمان بدأت المطابخ الكورية والتايلاندية واليابانية تنتشر فيها، ولأن قارة آسيا كبيرة، من الطبيعي جدًا أنها تقدم لنا ثقافات مختلفة فى مطابخها المتنوعة.

وبالرغم من حبنا الشديد لمطابخ الشرق الأوسط إلا أن مش كل المطابخ تقدر تتمكن وتهتم بالتفاصيل الصغيرة جدًا والمهمة للحصول على طبق مثالي، بس إحنا لقينا بعضها.

الفائزين بجوائز اختيارات المحررين لعام 2015 لأفضل المطابخ الآسيوية:

 

سايجون ريستوران & لاونج - Saigon Restaurant & Lounge

فرع سايجون ريستوران & لاونج اللي في فيرمونت نايل سيتي، ممكن يبقى معروف أكثر بحفلاته لكن لو جربت تتغدى أو تتعشى هناك هـ تكتشف أنه بـ يقدم لك منيو آسيوي من الدرجة الأولى مليان نكهات قوية وعشاء راقي.

 

إيت - 8

لكل الأصوليين والكماليين لو بـ تدوروا على مطبخ يحقق لكم كل أحلامكم بأصالته وذوقه، مافيش مكان أحسن من مطعم "8"، مش بس علشان فندق الفورسيزون نايل بلازا بـ يقدم أكل مالوش حل، لكن المنظر على النيل وجودة الخدمة هناك مافيش زيها في القاهرة.

 

بيرد كيجBird Cage

مع انتشار المطاعم التايلاندية في القاهرة شوية بشوية، بيرد كيج الأشهر من نار على علم في سميراميس إنتركونتيننتال يعتبر حاجة مختلفة تمامًا عن أي مكان ثاني، لأنه بـ يمزج ما بين المتعة اللي بـ يقدمها الأكل التايلاندي والأجواء الأنيقة المريحة.

 

آسيا بارAsia Bar

قليل جدًا من مطاعم القاهرة اللي بـ تبقى في مراكب على النيل بـ تقابل توقعاتنا، لكن آسيا بار في الزمالك كان على قدر توقعاتنا، أكيد بفضل المنيو المتنوع بتاعه والتجربة الممتعة وغير التقليدية اللي بـ يقدمها لك سواء أكلت أو شربت هناك.

 

ميراي - Mirai

ما بين ليفت بانك وسكويا في الزمالك، ميراي بـ يقدم لك مجموعة متنوعة من أكلات المطبخ الآسيوي في جو هادئ على النيل، وزي جيرانها.. ميراي أصبح مكان مهم جدًا من لحظة افتتاحه ولحد دلوقت.

 

موري سوشيMori Sushi

من أكثر المطاعم شهرة في القاهرة وغنى عن التعريف لسكانها، قدرت سلسلة المطاعم موري سوشي أنها تقدم أكل شهي بطريقة كلاسيكية معاصرة آسيوية وخدمة هائلة تخليهم دائمًا الأفضل.

 

بوب سوشيBob Sushi

وسط المنافسة مع المطاعم المحترفة بوب سوشي قدر يثبت نفسه ويعمل اسم يميزه، وسط النكهات الأصلية والغربية المميزة اللي بـ يقدمها، بوب سوشي عنده فرعين في الدقي وهليوبوليس، هو يمكن ما يكونش أكبر اسم في القاهرة بس أكله مافيهوش غلطة.

 

شوجن - Shogun

الاستمتاع اللي ما بـ ينتهيش مع أطباق التبانياكي بالذات لما يكون رولز السوشي أصلية مع لمسة غربية، شوجن فى أنتركونتننتال سيتي ستارز ممكن يكون مجهول بالنسبة لكم بس قدر مؤخرًا يثبت أنه يستاهل انتباه محبي الأكل الآسيوي.

مزيد من الصور
  • جوائز اختيارات محرري كايرو 360 لعام 2015 لأفضل المطابخ الآسيوية
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
26/05/2015
-