دليل كايرو 360 لأحسن أماكن سحور فى الحسين - مطاعم Feature - كايرو 360
 







دليل كايرو 360 لأحسن أماكن سحور فى الحسين
دليل كايرو 360 لأحسن أماكن سحور فى الحسين
اصدرت في: 13/07/2015

مافيش أجمل من أنك تروح مكان جميل مع ناس أنت بـ تحبهم، تقعد قعدة ممتعة وتاكل أكل مختلف، وكل ده وأكثر متوفر عند سيدنا الحسين، ممكن ناس تسمي المنطقة دي خان الخليلي، ناس تبعد شوية في الشارع يقولوا عليها الغورية أو شارع المعز اللي جنبه جدًا، بس إحنا بالنسبة لنا المنطقة كلها عند سيدنا الحسين، لأن ما ينفعش نروح هناك من غير ما نروح ونصلي ركعتين ونسلم على بنت سيدنا النبي (صل الله عليه وعلى آله وصحبه وسلم)، كل الناس لما تحب تروح مكان يحسسها بجو رمضان وصفاءه لازم تروح هناك، ويا سلام بقى لما يبقى سحور وبعدين نصلى صلاة الفجر ونروح، هناك بالذات في رمضان تقريبًا مش بـ يناموا، لحد الفجر متواصل زحمة وصحبة وبركة غريبة، ما بـ تفرقش بقى المستوى الاجتماعي من السياح من المصريين اللي جايين من قرى بعيدة، كل الطوائف والمستويات بـ تتجمع هناك وتنبسط وتروح فرحانة.

نبدأ بحاجة خفيفة "فطاطري الحسين" بـ يعمل فطير سخن وجميل مافيش بعد كده، ولو عاوز تاكل فول وبيض وتتسحر حاجات عادية الاختيار ده موجود برضه، ده غير أنه كمان بقى بـ يعمل فطير بالنوتيلا، يعنى مش بس حادق لأ في حلو ممتع كمان.

أما بقى لو عاوز تأكل أكل متين وتشبع لحد ما تبقاش قادر تتنفس، مافيش أحسن من "الدهان" يعنى كباب وكفتة وطرب وأرز وكل اللي قلبك يحبه، ولو حبيت تحلي بقى، هـ تلاقي لازق فيه محل "المالكي" يعنى أجمل أرز باللبن بالآيس كريم وأم على بالمكسرات.

كمان على الجانب الآخر فيه "جاد" قريب من مسجد الأزهر لو عاوز تاكل ساندويتشات خفيفة أو حتى أكلات عادية، لأن جاد مؤخرًا بقى بـ يقدم أكلات شرقية زي الشيش طاووق والفراخ المشوية والوجبات العادية بجانب الساندويتشات.

أما لو مش بـ تحب تتقل في السحور وعاوز قعدة كويسة ومشروبات ممتازة، مافيش أحسن من "قهوة الفيشاوي" اللي مافيش أشهر منها هناك، كمان "قهوة سعد زغلول" كويسة، المهم وأنت ماشي في الشارع رايح لها ما تبقاش تنسى تشتري سبحة تذكار من هناك، مش هـ تلاقي نوع السبح ده إلا هناك بس، وما تنساش أن القاعدة الأساسية الفصال ثم الفصال لحد ما توصل لسعر معقول، ما تزودهاش برضه إحنا في أيام مفترجة.

والمكان اللي كل الناس بـ تروحه السنة دى تقريبًا هو "زينب خاتون" والحقيقة أننا زمان كنا فاكرين أنه مركز لتعليم فنون الموسيقى بس، لكنه بـ يقدم سحور وقعدة مميزة جدًا.

لكن لو عاوز تأكل أكلة مختلفة تمامًا ومواكبة لجو القاهرة القديمة يبقى لازم نروح ناحية شارع المعز، واللي عنده أحسن محل بـ يعمل كبدة ومخ بالسمسم خرافة واسمه "الضامن"، كمان فيه محل عصير "الكيلاني" واللي بـ يعمل ساندويتشات كمان، بس الاختراع اللي بجد اللي لازم تجربوه السوبيا المزة اللي بـ تتاكل مش بـ تتشرب وبـ يترش عليها قرفة من فوق علشان تكمل أسطورة المأكولات الشرقية.

وما نقدرش ما نحكيش عن ساندويتشات زيزو "زيزو نتانة" اللي معروف جدًا، بساندويشات الكبدة والسجق والحلو معروف، ساندويتش السكلانص.

ده بالنسبة للأكل هناك أما لو عاوز تستمتع بعروض مختلفة أو موسيقى راقية ممتعة، فمركز إبداع وكالة الغوري (الغورية) بـ يعمل حفلات يومية غير "الربع" وحفلاته الأسبوعية واللي تقدروا تتابعوا جدولهم من خلال أجندتنا.

مزيد من الصور
  • دليل كايرو 360 لأحسن أماكن سحور فى الحسين
  • دليل كايرو 360 لأحسن أماكن سحور فى الحسين
  • دليل كايرو 360 لأحسن أماكن سحور فى الحسين
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
نجلاء أشرف
حرر بواسطة:
نجلاء أشرف
تاريخ النشر:
13/07/2015
محرر مساعد بالموقع العربي، حالمة جدًا وعايشة في كوكب ثاني وبـ تحب تكتب عن كل حاجة بـ تحصل لها، دائمًا بـ تضحك حتى في أصعب المواقف وبـ تحب البلالين والتيوليب والصحبة الحلوة.