من القاع إلى القمة: 8 مطاعم مصرية بدأت رحلتها من عربية أكل صغيرة - مطاعم Feature - كايرو 360
 







من القاع إلى القمة: 8 مطاعم مصرية بدأت رحلتها من عربية أكل صغيرة
من القاع إلى القمة: 8 مطاعم مصرية بدأت رحلتها من عربية أكل صغيرة
اصدرت في: 04/02/2016

مافيش أحلى ولا أجمل ولا أروع من الأكل المصري الموجود في كل ركن من شوارع القاهرة، سواء كان ساندويتش فول سخن أو طبق كشري خلطبيطة، أو لو كانت معدتك على قد المسئولية وتقدر تطلب ساندويتش كبدة إسكندراني مشطشط.

طول عمر أكل الشارع لاعب محوري في المطبخ المصري، وسواء كنت بـ تحبه أو لأ فالأكيد أن النوع ده من الأكل دائمًا خفيف على محفظتك، وطبعًا القاهرة عودتنا دائمًا أن كثير من مطاعمها الناجحة كانت بدايتها متواضعة جدًا، وإحنا جمعنا لكم 8 مطاعم بدأت من عربية صغيرة في الشارع:

 

حمادة شيراتون

بداية حمادة شيراتون كانت عربية فول صغيرة في مساكن شيراتون، ودلوقت أصبح واحد من أهم محلات الفول والطعمية في هليوبوليس، وكل الفضل في النجاح ده يرجع لواحد اسمه "حمادة"، نجاح حمادة الكبير وصله أنه يفتح محل عصائر وفواكة حمادة جنب مطعم الفول، ومين عارف حمادة هـ يفتح إيه بعد كده!

 

كشري أبو طارق

كشري أبو طارق اتكلمت عنه CNN بصفته أرخص وأشهر مطعم للكشري في مصر، وبداية أبو طارق ترجع للخمسينيات بعربية كشري صغيرة في شارع شمبليون في وسط البلد، بعد سنين من نجاح عربية أبو طارق الملونة وشهرتها بين أهل القاهرة –واللي عائلة أبو طارق لسه محافظين عليها– تحول أبو طارق لمطعم من أربعة أدوار بـ يبيع أحلى كشري فيكي يا مصر!

 

كبدة البرنس

كبدة البرنس وعدوا جمهورهم الكبير يعيدوا افتتاح مطعمهم السنة دي بعد تجديده، والحقيقة أن كبدة البرنس يعتبر من آثار إمبابة الخالدة وواحد من أشهر المطاعم المصرية اللي بـ تقدم كبدة ما حصلتش، المطعم كانت بدايته عربية كبدة في منطقة إمبابة الزحمة جدًا، وبعدها تحول لمطعم كبير لازم تكتب اسمك في قائمة الانتظار قبل ما تدخله، أيوه زي ما سمعت، قائمة انتظار!

 

كبابجي الرفاعي

الرفاعي معروف من زمان بأنه ملتقى المشاهير –ممثلين ولاعبي كرة معروفين دائمًا بـ تشوفهم هناك– وبداية كبابجي الرفاعي كانت عربية بـ تبيع لحم مشوي في ركن من أركان السيدة زينب وبعدها أصبح واحد من أشهر مطاعم الكباب والكفتة في مصر.

 

عبده تلوث

الموضوع بدأ بنكتة بين عبده صاحب المكان مع صديقه، والمضحك أن عبده تلوث تحول لعلامة تجارية مشهورة بدايتها كانت عربية كبدة وسجق صغيرة في مدينة نصر، عبده تلوث دلوقت واحد من أشهر مطاعم التيك آواي اللي بـ تقدم ساندويتشات ووجبات لحوم وفراخ وأطباق حلو.

 

عمو حسني

بدأ عمو حسني سنة 1996 بعربية صغيرة معروفة بساندويتش البرجر بالبيض المميز في ميدان تريومف في هليوبوليس، ومن ساعتها وقدر عمو حسني يفتح فروع كثيرة في هليوبوليس بـ تقدم أكلات شعبية محبوبة زي الشاورما والكبدة والسجق وغيرهم.

 

الجحش

مكان ثاني من العلامات المميزة للسيدة زينب وهو الجحش، مطعم الفول والطعمية المشهور اللي كان في يوم من الأيام عربية فول عليها طابور بالمئات، الجحش شغال 24 ساعة طوال الأسبوع، وعنده أشكال وألوان من أطباق الفول المتنوعة، وكمان ساندويتشات فلافل وبطاطس وباذنجان مقلي، والناس بـ تيجي له من آخر الدنيا.

 

زيزو

زيزو بدأ بعربية صغيرة –كانت بـ تبيع الساندويتش أيامها بخمسة قروش– ودلوقت تحول لمطعم يحتل دور كامل في منطقة الجمالية، وزيزو بـ يقدم أكلات شعبية محبوبة ومنها ساندويتشات كبدة وسجق، نقدر نقول أن الحظ ابتسم لزيزو لما الفنان عادل إمام جاب سيرة "زيزو نتانة" في فيلم من أفلامه.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
هند صلاح الدين
حرر بواسطة:
هند صلاح الدين
تاريخ النشر:
04/02/2016
كاتبة