أخبار كثير جدًا عن الأكل اللي مش ولابد، بقيت توجع بطننا وتحسسنا بخوف من أكل الشارع، لذلك المكان النضيف بقى عملة نادرة، والموضوع وصل أننا ممكن نستحمل عيوب ما كناش بـ نستحملها قبل كده، بس لمجرد أننا نوصل لحاجة نضيفة وموثوقة، من الأماكن دي أرابياتا - Arabiata فرع الدقي اللي بـ يرفع شعار "شرقي من الزمن الجميل".

الريحة هـ تجيبك ولو على بُعد، خصوصًا الصبح على الساعة 10 كده، مبدئيًا المطعم مافيهوش مكان للقعود، يعني كله تيك آواي وبـ نعتبره حل للناس اللي شغلها قريب وعاوزة حاجة نضيفة وسريعة تفطر بها بدون قلق من النضافة ووجع البطن، جربناه في أكثر من حاجة، خصوصًا الفول والطعمية، نقدر نوصفها بكلمة "غنية"، مليانة سلاطة نضيفة ومتنوعة، الطعمية حلوة، والفول فعلاً رائع، لكن مع تجربة أصناف تانية اكتشفنا أن الموضوع متعلق بالفول والطعمية بس، يعني الإتقان أكثر مع الصنفين دول، جربنا أصناف تانية من عندهم لكن ما كناش راضيين بنفس الدرجة.

خلينا نفرق بين نوعين من التعامل فى المحل، النوع الأول في الطلب المباشر وده الأفضل في رأينا، لأنه بـ يضمن أن الساندويتشات تكون سخنة بنسبة 70%، والنوع الثاني الدليفري وده بـ نحذركم منه، لأنه الساندويتشات دايمًا باردة، والطلب كان ناقص في أكثر من مرة.

ده ما كانش العيب الوحيد في أرابياتا الدقي، طلبنا من عندهم أكثر من طلب وفعليًا الطعم ما كانش قد كده، يعني مثلاً جربنا البطاطس الرول (6 جنيه) ودي كان طعمها صعب حرفيًا، ما كناش قادرين نحدد الطعم عبارة عن إيه أو إيه المحتوى، مش بـ نتكلم عن النضافة ولكن بـ نتكلم عن الطعم، فقررنا ما نجيبهاش ثاني، كمان الطعم ما شجعناش أننا نجرب البطاطس العادية، جربنا كمان من عندهم الفلافل بالبيض المسلوق (3.50 جنيه) بناء على ترشيحات المحل شخصيًا، لكن البيض كان ساقع، والفلافل كمان، صحيح الطعم حلو لكن السقعة ضيعت كل حاجة، جربنا كمان من عندهم الشاورما وما اتبسطناش منها، سواء اللحمة (.5017 جنيه) أو الفراخ (16.50 جنيه)، الاثنين كان طعمهم مش قوي.

نظام البيع في المحل محترم، بـ تدفع، وتاخد رقم، ويندهوا رقمك ويعطوك الطلب بدون كلام كثير، بس بـ ننصحكم تتأكدوا من الطلب قبل ما تمشوا لأنهم أحيانًا بـ يتلخبطوا، بصراحة جربنا حاجات كثير لكن النتيجة الوحيدة والمضمونة كانت مع الفول والطعمية اللي بـ نشتريهم وإحنا واقفين، السعر معقول 2 جنيه للساندويتش، والطعم حكاية.