جوائز محرري كايرو 360 لأفضل أماكن الطعام المتخصص لعام 2016‏ - تسوق Feature - كايرو 360
 







جوائز محرري كايرو 360 لأفضل أماكن الطعام المتخصص لعام 2016‏
جوائز محرري كايرو 360 لأفضل أماكن الطعام المتخصص لعام 2016‏
اصدرت في: 24/05/2016

الأماكن اللي موجودة في القائمة دي بتتميز عن بقية تصنيفات الجوائز الثانية بتميز المنتجات اللي هما بيقدموها عن أي مكان ثاني؛ يعني مثلًا فيه مكان زي مزارع دينا ممكن تعتبره محل بقالة، ولكن في نفس الوقت منتجاته تخليك ما تقدرش تقارنه بأي محل بقالة عادية لأنه مسئول عن عملية الإنتاج من الألف للياء لأغلبية المعروضات اللي بيقدمها... وهكذا.

اللطيف بقى أن كل مكان فائز مختلف بمنتجاته وفكرته عن المكان اللي معاه في القائمة. بس حتى لو اختلفوا، فجودة المنتجات والنجاح بيجمعهم، ودول الفائزين:

 

امتنان – Imtenan:

امتنان من الأسماء اللي قدرت أنها تبني ثقة مع الناس بأول منتج ظهر لهم في الأسواق وهو العسل... وبقى طبيعي أنك تفتح أي ثلاجة في أي بيت تلاقي برطمان عسل امتنان. منتجات امتنان تطورت مع الوقت، وما بقتش تقتصر على العسل بأنواعه بس؛ دي امتدت كمان للمنتجات الغذائية الصحية المختلفة بسعر مناسب، ده غير منتجاتهم للعناية بالجمال وكله طبيعي مية في المية.

 

أبو عوف – Abu Auf :

منتجات أبو عوف بتتميز بجودتها أيًا كانت. وغير مجموعة المحمصات المتنوعة اللي متفوق بيها على أي مكان ثاني، أبو عوف عنده مجموعة كبيرة من المنتجات الغذائية المتنوعة؛ زي الحلويات الشامية، الفواكه المجففة، المقرمشات وحتى البن بأنواعه المختلفة. وأهم حاجة أن كل المنتجات دي معروضة ومعبأة بشكل عملي يحافظ على جودتها لأطول وقت ممكن.

 

بوتشرز هاوس – Butcher's House :

بالنسبة لنا الجزار يعني الفنان محمد رضا –الله يرحمه- قاعد على باب المحل وجنبه الخشبة والساطور والشرار بيطق من عينيه، ولكن الحمد الله الموضوع مختلف عند بوتشرز هاوس اللي بيقدم مجموعة من أجود اللحوم والقطعيات المميزة للناس اللي بتحب تطبخ بمكونات مميزة. بوتشرز هاوس بدأ بفرع في المعادي وامتد النجاح بفرع جديد في أكتوبر في فريش فوود ماركت.

 

مزارع دينا – Dina Farms :

مزارع دينا نجاحه ثابت من أيام ما كان محله الوحيد مكانه في طريق مصر-إسكندرية الصحراوي، وامتد نجاحه لمدينة القاهرة بمجموعة من المحلات اللي بتقدم مجموعة من المنتجات الفريش اللي المزارع بتنتجها، ده غير المنتجات الغذائية الثانية المحلية والمستوردة. ولأن مزارع دينا جودتها ثابتة، استحقوا الجائزة عن جدارة.

 

جورميه إيجيبت – Gourmet Egypt :

أي حد غاوي طبخ وخصوصًا بيحب يحضر الستيك بتاعه بنفسه هيعرف إحنا ليه اختارنا جورميه إيجيبت في قائمة الفائزين بجوائز أفضل محلات الطعام المتخصص. الموضوع مش واقف عند قطعيتهم الممتازة للحوم، منتجات جورميه كلها بتتميز بجودتها، ده غير أنك لو بتدوّر على منتج معين مش لاقيه في الأسواق العادية، غالبًا هتلاقيه في جورميه إيجيبت.

 

هاوس أوف كوكو – House of Cocoa :

ما فيش تقريبًا مدمن شوكولاتة ما يعرفش هاوس أوف كوكو؛ صحيح محلات الشوكولاتة كثيرة ومنتشرة على خريطة القاهرة، ولكن هاوس أوف كوكو بيتميز بأنه بيبيع ماركات شوكولاتة مش موجودة في أي مكان ثاني في مصر. واللي بيحبوا يعملوا الفوندو هيلاقوا أدوات عمله، ونفس الحكاية للي بيدوّر على نافورة الشوكولاتة.

 

محلي - Ma7ali:

مش بس مكان تجيب منه بقاله ومنتجات غذائية أورجانيك وفريش؛ محلي من الأماكن اللي ممكن تستمتع فيها بالأكل الفريش وأنت قاعد هناك، وخصوصًا أن المكان فيه حديقة خارجية تأكل فيها. كل ده معاه الفرن البلدي بتاعهم –يعني كل اللي هتحتاجه علشان تأكل أكلة حلوة هتلاقيه هناك.

 

وادي فوود – Wadi Food :

وادي فوود برضه من الأسماء الموجودة على رف أي ثلاجة مصرية، وغالبًا هيبقى برطمان زيتون كالاماتا. منتجات وادي فوود قدرت أنها تكون قد المسئولية وترضي الأذواق المختلفة لأي مستهلك. ولو أنت معتقد أن وادي فوود منتجاته متوقفة عند الزيتون ومنتجاته، محلاته هتغيّر لك فكرتك تمامًا، لأنه عنده كمان خضراوات أورجانيك، عسل وتوابل.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
24/05/2016
-