«سمير وليام» من الحاجات اللي كل أم بـ تعلمها لبنتها بعد الطبيخ وتنضيف البيت. محل فيه من الإبرة للصاروخ في كل ما يتعلق بالتجميل وعناية الست بجمالها.

شعارهم " We take care of you from head to toe " واللي معناه "احنا هـ نهتم بيك من ساسك لراسك!" وفعلاً مافيش حاجة تمت بصلة للتجميل، العناية بالبشرة، الشعر...مش موجودة عند «سمير وليام». البيوتي سنتر، زي ما بـ يطلق على نفسه منصفاً، متخصص في الأدوات والمستحضرات اللي بـ تستخدمها الكوافيرات ومراكز التجميل، فبالتالي فيه 3 صفات بتميزه: أولاً، تخصصه مخليه الملاذ لكل اللي عاوز حاجة مش عادية ومش موجودة في كل حتة. ثانياً، عنده المستحضرات بـ تتباع في كميات كبيرة (تعليب للإستخدام المهني)، ثالثاً، هو جملة فبالتالي أرخص.

المحل في شارع القبة، قريب جداً من روكسي، لو جاي من الميدان خلي عبودي عل ى شمالك وأكنك متجه ناحية جسر السويس وامشي حوالي 7 دقايق هـ تلاقية مش باين خالص على اليمين؛ وده لان ديكوره البني القديم بتاع أوائل التسعينات وشكله الخارجي مش هـ يشدك أبداً. وبـ يضيف على ده ان المدخل الضيق نسبياً ما بـ يدلش على مساحة المكان الكبيرة.

المحل متقسم أقسام: مكياﭺ، مستحضرات شعر، مستحضرات بشرة، أدوات تصفيف الشعر، الصبغات، البوستيـﭺ، العناية بالأظافر.

مستلزمات تصفيف الشعر هو تخصص «سمير وليام» الأول. جنب الشامبوهات والكريمات والصبغات العادية اللي ممكن نلاقيها في أي حتة، عنده كمان بوسيتج او اللي بـ نسمية النهاردة « extensions » وبـ يبيعها بأسعار ممتازة بالنسبة للكوافيرات اللي بـ تغلي في سعرها جداً. عنده كمان أزايز أوكسـﭽـين لتفتيح الشعر في عملية الصبغ، بـ تركيزاته المختلفة ڤوليوم 10، 20، 30 و40% ودي حاجة نادراً ما بـ تلاقيها في أي حتة. ده غير الـ«كيرياتين - Keratin » ودي أشهر وسيلة لفرد الشعر حالياً والكوافيرات بـ تعملها بالألوفات. أنواع الصبغات اللي عنده في منها تشكيلة ألون كبيرة وعنده «لوريل – جارنييه – كوليستون - كولوري» والأخير ده بالأنابيب مش في علب زي المتداول للإستخدام المنزلي. عنده كمان أنواع شامبو مش في كل حتة (عنده شامبو خاص للشعر المعالج بالكيرياتين). ده طبعاً غير الأجهزة زي الـ«بابي ليس» (تبدأ من 125 جنيه) والسيشورات وماكينات حلاقة (حتى الماكينات اللي بـ تحلق شعر الأنف الزيادة!) وأجهزو ماساﭺ يدوية. والكريمات زي «كيراستاس، أملا، زيرو فريز» وده بكميات كبيرة وجنب ده أنواع تانية محلية و مستوردة مش معروفة.

أما للعناية بالبشرة ففي ماسكات للوش، وكريمات وغسول للبشرة ومقشر للبشرة و«سكرب - scrub » (لدعك البشرة وتنضيفها) من ماركات مختلفة ولأغراض مختلفة وبالتالي في أسعار هـ تناسب كل الميزانيات. في «ڤيكتوريا سيكريت» و«أولاي» و«فروتيني» و«سانت أيڤز» وغيرهم كتير. وعنده مجموعة من منتجات عضوية رائعة ماركات «فرييمان» و«بايوز» بس غاليين شوية وماركات تانية رخيصة ومستوردة عمرنا ما شوفناها قبل كده، وحاجات كلها صناعة أوروبية. في كمان قسم متكامل لإزالة الشعر فيه أجهزة «السيك أپيل – Silk Epil »، والشمع بإكسسواراته اللي برضه مش موجودة في كل حته.

المكياﭺ أصغر قسم، وللأسف مهمل لحد كبير، والأسعار مش واضحة والتستر ( tester العينات اللي بـ تسمح للمشتري انه يجرب الحاجة قبل ما يشتريها) مش موجودة خالص، وبـ يبيع منتجات شركات زي «نيڤيا - Nivea »، «بور ﭽو اه - Bourjois »، «پوپا - Pupa »، «فلوريل - Florelle » و«سارا - Sara » وبالرغم من حالة القسم ده إلا انه مش في صميم تخصص «سمير وليام» اللي هو مستلزمات الشعر فبالتالي ماكناش منزعجين قوي انه مش متكامل.

دايماً في حاجات صغيرة مهمة جداً، وبسيطة جداً وصعب تلاقيها جداً جداً، «سمير وليام» بـ يحل المشكلة دي، فتلاقي عنده المكعب المبرد لتلميع الأظافر، رموش صناعية، قطع الفويل عشان الصبغة متقطعة جاهز، فٌرش الصبغة وغيرها كتير جداً.

الجميل في «سمير وليام» ان الواحد بـ يحس انه دخل مغارة علي بابا اللي مليانة بأسرار الكوافيرات اللي بـ تديك الأدوات اللي تجملي نفسك وتدلليها بيها. وده بـ يحصل في ظل خدمة ودودة جداً، متدربة كويس. وبالتالي سنتر «سمير وليام» أساسي جداً لكل بنت قاهرية بـ تهتم بنفسها وجمالها.