دليل كايرو 360 لسيتى سنتر المعادى في القاهرة - تسوق Feature - كايرو 360
 







دليل كايرو 360 لسيتى سنتر المعادى في القاهرة
دليل كايرو 360 لسيتى سنتر المعادى في القاهرة
اصدرت في: 29/04/2013

كان يا ما كان، يحكى أنه كان في زمن مش من بعيد قوى، كانت مولات تسوق القاهرة لسه ما فرضتش سيطرتها على جزء كبير من المدينة. ساعتها، كانت لسه منطقتى القطامية والتجمع الخامس مش موجودين على الخريطة أصلاً. امتداد منطقة المعادى كان شارع اللاسلكى وأى منطقة ثانية بعده كانت مجرد صحراء واسعة غير مأهولة. بعد كده فى أواخر 2002 مع تمركزه على الطريق الدائرى بعد المعادى مباشرة، سيتى سنتر المعادى قدم لنا الاسم الفرنسى الشهير كارفور اللى فتح أبوابه لكل المصريين اللى كان عمرهم ما شافوا حاجة زى كده.

من هنا بدأت مرحلة توسع سيتى سنتر المعادى. وقتها كان يعتبر المول الأول من نوعه فى القاهرة، وبدأ بداية بسيطة لحد كبير؛ محلات تسوق رئيسية، وكارفور اللى بـ يوفر كل احتياجات البيت، مع عدد قليل من المطاعم. خلال آخر عشر سنين حصل نمو كبير فى المول ودلوقتي بـ يقدم لكل عملائه مجموعة من الأسماء المحلية والعالمية مع عدد كبير من المطاعم وخدمات ثانية.

ركنة العربيات فى سيتى سنتر المعادى تعتبر حاجة سهلة، مع جراج مجانى من دورين تركن فيه في أى وقت تحبه، بس خلى بالك من يوم الجمعة بعد الظهر ده وقت الزحام الشديد. المبنى على شكل صف طويل مكون من دور واحد على شكل مستطيل. عندك ثلاثة مداخل تقدر تدخل من أى واحد فيهم، رغم أنك صعب تفرق بينهم. التمشية من أول المول لآخره مش محتاجة وقت، وعلشان تصميمه مباشر، صعب تتوه أو تتلخبط.

تخيل سيتى سنتر المعادى على شكل صفين متوازيين. أول صف بجانب المداخل فيه محلات تقدر تنعش دولابك. من الماركات العالمية الموجودة مونسون، ماذر كير، H&M، زارا، إيسبرى، وألدو، أما الماركات المحلية منها وايلد، كونكريت وموباكو كوتونز. ومحلات مستلزمات الرياضة الموجودة بـ تلبى كل احتياجاتك زى ريبوك، أديداس وكويك سيلفر.

لو عاوز حاجة غير الملابس، معادى سيتى سنتر كمان فيه ذا بودى شوب، والمحل الجديد المدهش باث & بودى ووركس اللى بـ يلبى كل احتياجات جسمك، ده غير صيدلية مليانة بكل حاجة تحت. أماكن زى أكسسورايز، جليتر ومحلات هدايا رخيصة بـ تقدم لك الإكسسوارات اللى بـ تحتاجيها.

الصف الداخلى من المول مكان كارفور وده هو أساس المول فى بدايته. زى ما كل الناس عارفة، كارفور عنده كل وأى حاجة ممكن تحتاجها فى بيتك. من البقالة للشرابات، ومن الأوعية والحلل لفرش شقق المصايف والأجهزة الإلكترونية، وكل ده بـ يُباع بأسعار معقولة.

يعتبر سنتر بوينت مول مستقل داخل سيتى سنتر، مكانه بجانب كارفور. المحل ده أكبر من معظم المحلات التقليدية وبـ يقدم مجموعة من الماركات والمنتجات. ملابس الأطفال بـ تحتل جزء كبير من المكان، ونفس الكلام بالنسبة لمجموعة من الملابس الكاجوال وشنط السفر اللطيفة.

وسط ممرات المول اللى لسه هـ نتكلم عنهم، فيه أكشاك كثير بـ تبيع أشكال وألوان من المنتجات المختلفة. تقدر تلاقى منتجات صحية عند أكشاك إمتنان ونفرتارى، أما تي شيرت فاكتورى فبـ يساعدك أنك تصنع تي شيرتك على مزاجك، وكاندى ستاند بـ يقدم عدد كبير من أنواع الحلويات المختلفة.

آخر المول على الشمال مكان الفود كورت، مع العلم أن فيه شوية كافيهات موزعين فى المول زى سينابون، وبينك بيرى، وAuntie Anne's، وستاربكس. بعد بدايته بـ تشيلليز كمطعم وحيد، حصل توسع كبير للفود كورت وبقى فيها مجموعة من محلات الفاست فود زى بيتزا هت، كنتاكى، كووك دوور وباسكين روبينز.

جنب الفود كورت مباشرة الحل السحرى لكل أم محتاجة حل لأولادها: قسم مخصوص للألعاب. خلى أولادك يلعبوا وابدأى رحلة التسوق فورًا وهناك هـ يستمتعوا بمجموعة كبيرة من الألعاب الإلكترونية وأنشطة ثانية وممكن حتى يتعرفوا على أصدقاء جدد.

سيتى سنتر المعادى فيه عدد كبير من ماكينات السحب الآلى من كل البنوك تقريبًا، فمافيش سبب تقلق أن الكارت يرفض يدفع فاتورتك أو أن محفظتك تكون فاضية؛ كل اللى عليك تروح على آخر مدخل على الشمال واسحب فلوس من حسابك.

رغم أنه مش أوسع مول، أو الأكبر، بس بـ يتميز بين كل المولات الثانية بالراحة والعملية، خصوصًا لو كنت ساكن فى المعادى أو القاهرة الجديدة. مع المجموعة اللطيفة من الماركات المحلية والعالمية والمحلات الجديدة فى المستقبل سيتى سنتر المعادى يعتبر اختيار مناسب جدًا ليوم تسوق مريح بعيد عن الإزعاج.

مزيد من الصور
  • دليل كايرو 360 لسيتى سنتر المعادى في القاهرة
  • دليل كايرو 360 لسيتى سنتر المعادى في القاهرة
  • دليل كايرو 360 لسيتى سنتر المعادى في القاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
29/04/2013
-