10 حاجات هتخلي تجربتك في دهب ماتتنسيش - معالم وسياحة Feature - كايرو 360
 







10 حاجات هتخلي تجربتك في دهب ماتتنسيش
10 حاجات هتخلي تجربتك في دهب ماتتنسيش
اصدرت في: 17/07/2016

بيقول لك اللي يروح دهب عقله ذهب، من كتر الجمال اللي بيشوفه، دهب بالنسبة لنا مش مجرد منطقة سياحية جميلة، لأ دي من أحسن الأماكن اللي تخطفك من الدنيا فتعيش مع جمال البحر والجبال والسما، وفي نفس الوقت فيها كل حاجة حضارية تحتاجها. يعني من الآخر هتقضي أجمل أيام حياتك هناك بس لازم تستغلها صح وتعمل كل النشاطات اللي ما ينفعش تروح دهب وما تعملهاش.

 

الغطس وبالذات البلو هول

دهب من أجمل الأماكن اللي ممكن تغطس فيها في العالم، مش بس علشان جمال الشعب المرجانية والمياه الفاتحة، لأ ده كمان فيها البلو هول اللي ما فيش منه غير عدد قليل جدًا في العالم كله، وبييجوا السياح من آخر الدنيا علشان يغطسوا فيه، غير طبعًا مسابقات الغطس "بالعمق" اللي بتتعمل هناك.

تسلق الجبال

الجبال في سيناء قصة حب ما بتنتهيش، فيه جبال تطلعها على رجليك، وفيه جبال بتطلعها بأدوات التسلق زي ما تحب، المهم أنك تكون عارف أنت بتعمل أيه أو معاك حد متخصص.

سنوركلينج

السنروكلينج مختلف عن الغطس لأنك مش بتنزل لأعماق كبيرة تحت المية ومش بتحتاج أدوات الغطس أو أن يكون معاك حد محترف يدربك، مجرد نضارة بأنبوبة مفتوحة علشان تنتفس وتتفرج بمزاج من غير ما تتفصل.

 

رؤية الشروق أو الغروب من الجبل

من اجمل التجارب اللي ممكن تخوضها في حياتك، هي أنك تستنى الشروق على قمة جبل أو الغروب، على عكس الساحل الشروق في دهب بيكون من البحر والغروب من الناحية التانية، فما يفوتكش المنظر المذهل.

 

ليلة بدوية

لو حظك حلو ممكن تتفق مع أصحاب الكامب اللي أنت قاعد فيه وتروح ليلة بدوية في الصحراء، ودي بيكون فيها أكل بدوي مالوش حل وموسيقى وأغاني سيناوية مالهاش مثيل.

البيتش باجي

طبعًا وجود صحراء، مغري جدًا أنك تركب البيتش باجي واللي بيكون مجهز للرملة، وتطير، ماتنساش تبقى تربط حاجة على وشك وتلبس نضارة علشان التراب مع السرعة هيتعبوك.

 

التسوق

كمية البازرات اللي في دهب هتخليك مش عارف تجيب إيه ولا إيه، خاصة أن فيه بازارات بتعرض نفس الشغل اليدوي اللي موجود في شارع المعز لدين الله في القاهرة واللي بيكون لقطة بالنسبة للأجانب وللقاهريين اللي مش بيرحوا المناطق السياحية دي.

 

التأمل مع اليوجا

اصحى الصبح بدري في الشتاء أو على الغروب في الصيف، وابدأ تأمل في منظر البحر والجبال ويا سلام لو بتعرف يوجا، مش محتاج نوصيك تعمل إيه!

الأكل البدوي بالذات العيش

وأوعى يفوتك الأكل البدوي هناك واللي في الأغلب بيتقدم في السهرة البدوية أو لو حظكم حلو وبيطبخ في الكامب، نوصيكم بالفراشيح، والمقلوبة، حاجة كده تتجرب هناك بس.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
نجلاء أشرف
حرر بواسطة:
نجلاء أشرف
تاريخ النشر:
17/07/2016
محرر مساعد بالموقع العربي، حالمة جدًا وعايشة في كوكب ثاني وبـ تحب تكتب عن كل حاجة بـ تحصل لها، دائمًا بـ تضحك حتى في أصعب المواقف وبـ تحب البلالين والتيوليب والصحبة الحلوة.