شوف بقلبك: درس لكل الجمعيات الخيرية - تليفزيون Feature - كايرو 360
 







شوف بقلبك: درس لكل الجمعيات الخيرية
شوف بقلبك: درس لكل الجمعيات الخيرية
اصدرت في: 28/06/2016

في وسط زحمة الدعاية للجمعيات الخيرية، واستغلال الأطفال المرضى والفقراء لجمع التبرعات، ووقت ما كان رامز بيلعب بالنار في برنامج اتكلف ملايين، كان في أغنية ماحدش شافها كتير عن مستشفى لعلاج الحروق.

جمعية أهل مصر عملت أغنية رائعة للمساهمة في بناء المستشفى، شارك فيها عدد كبير من النجوم (آسر ياسين – هنا شيحة – بشرى – ماجدة زكي – أحمد فهمي – اللاعب محمد زيدان – أمينة خليل) كتبت كلماتها الرائعة نسمة الشاذلي، ولحنها هشام خرما.

الحروق من أكثر الإصابات شيوعًا في مصر، وبالذات في الأطفال، في الشريحة العمرية بين سنتين لغاية 12 سنة. وللأسف كتير من الحروق البسيطة ممكن تتحول لكوارث بسبب الجهل بالإسعافات الأولية، وعدم وجود مستشفيات مؤهلة لعلاج الحروق.

غير أن الحروق بتسبب آلام جسدية رهيبة، فلها آلام معنوية لا تقل شدة ولا أهمية. لنا أن نتخيل نظرة الناس للشخص اللي عنده حرق، وبالذات لو في الوجه أو في مكان ظاهر، وما بالنا بالأطفال. حرق زي كده ممكن يأثر على نفسيتهم لسنين طويلة، ويتحول لعقدة تفضل معاه طول العمر.

جمعية أهل مصر عملت حملة راقية ومؤثرة للمساهمة في بناء مستشفى أهل مصر لعلاج الحروق. والأهم من المساهمة وجمع التبرعات، هي الرسالة اللي بتوصلها الأغنية. يعني هي حملة مساهمة وتوعية في نفس الوقت.

(قل لهم ما يخافوش مني

اللي فيا ده غصب عني

فهمهم أنه مش اختيار

دي حالة طارئة بدون إنذار)

 

أغنية (شوف بقلبك) هي دعوة لينا علشان مانحولش الشخص المصاب بحروق لشخص منبوذ، بسبب شكله، ودي حاجة مالوش ذنب فيها، وممكن أي حد يتعرض لها.

(مع إن أهم حاجة الروح

الجوهر زي كتاب مفتوح

أنا إنسان مش بس جروح

عندي أمل عندي طموح)

الشخص المُصاب بحروق هو بني آدم عنده أحلام وطموحات. حياة كاملة مدفونة وراء الجلد المجعد المحروق. المساهمة في علاجها هي إعادة للحياة والأمل. والأهم أن الحالة النفسية للشخص المُصاب هتتحسن، والألوان هترجع لحياته مرة تانية. واللي يحيي نفس واحدة، كأنه أحيا الناس كلهم.

هشام خرما اختار مقام العجم (Major) علشان يعمل عليه اللحن الجميل المليان حيوية. وده اختيار ذكي، علشان اللحن يليق على صوت كل اللي هيغنوا، لأن طبقاتهم الصوتية مختلفة. وبشياكة اترفع اللحن نص تون، كتعبير عن الفرحة والأمل.

حملة جمعية أهل مصر عبارة عن درس ممتاز لكل الجمعيات الخيرية. وأثبتت أن استغلال الأطفال في استجداء تعاطف المشاهدين مش صح. ممكن أغنية بسيطة تعمل تأثير كبير، لكن الأهم الصدق في الرسالة والمحتوى.

مزيد من الصور
  • شوف بقلبك: درس لكل الجمعيات الخيرية
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
مصطفى  عبد ربه
حرر بواسطة:
مصطفى عبد ربه
تاريخ النشر:
28/06/2016
برج العذراء.. ما عرفش يطلع مزيكاتي فطلع شاعر.. بـ يحب الكتب، والشاي بالنعناع، والعيون الحلوة، وأغلب الوقت بـ يحب حاجات ما بـ يحبهاش غيره.