رمضان فى مصر موسم مهم جدًا بالنسبة للأعمال التليفزيونية، بـ تكثر فيه البرامج والمسلسلات وبـ تتسابق فى الحصول على نسبة المشاهدة الأعلى بين الجمهور.

والسنة دى مسلسلات رمضان شملت حضور مهم لعدد من الممثلين العرب منهم المطربة "ميريام فارس" اللى بـ تقدم لأول مرة عمل مهم كممثلة فى مسلسل "اتهام" من إنتاج شركة ميديا ريفوليوشن سفن من إخراج المخرج فيليب الأسمر وتأليف الكاتبة كولوديا مارشيليان وتقوم بالبطولة مع حسن الرداد وعزت أبو عوف وعدد من الممثلين اللبنانيين مزى نيكولا مزهر وجو سلامة و سارة أبى كنعان.

تدور قصة المسلسل حول "ريم" الفتاة البسيطة المنحدرة من ضيعة لبنانية جميلة، تشبه كثير من الفتيات اللى وقعوا في شباك عصابات مجرمة وما قدرش حد يساعدهم... "ريم، سهى ومي" ثلاث فتيات من أصل العشرات اللى سافروا إلى القاهرة للعمل في معمل للقطن هناك،ده اللى قاله لهم إحسان المندوب من قبل رئيس العصابة "الرجل المستتر خلف ثروته وبعض القشور المزيفة".

واقع مخيف هـ يوقع بسهى اللي هـ تستسلم وهـ يقتل ويدمر آخريات.. وحدها "ريم" (ميريام فارس) هـ تقف في وجه الظلم وتحاول الانتقام لنفسها ولشرفها ولوالدتها ولصديقات عمرها.

الدور بالنسبة لميريام فارس تحدى كبير فالكل منتظر المطربة الاستعراضية وأداءها للدور خصوصًا أن مثيلاتها اللبنانيات زي سيرين عبد النور وهيفاء حققوا نجاح كبير فى التمثيل، وطبيعة الدور اللى بـ تؤديه ميريام فارس بـ يتطلب فى بعض الأحيان كثير من القسوة وأحيانًا الخوف ومن المفترض أن وجهها الطفولى يقدر يقنعنا بكل الانفعالات دى وكمان بتطور الأحداث الدور بـ يحتاج طاقة تمثيلية أعلى، يعنى ببساطة الدور كله يعتبر انقلاب على طبيعة ميريام فارس اللى تعودنا عليها وده هـ يؤدى لأحد الأمرين إما أنها هـ تكمل تمثيل بعد كده أو هـ يكون العمل بالنسبة لها عمل عابر وخلاص.

لما شوفنا المسلسل الحقيقة تفاجئنا بأداء ميريام فارس وإحساسها واندماجها فى الشخصية اللى بـ تؤديها خصوصًا أمام ممثل كبير زي الفنان عزت أبو عوف و ممثل شاب متمكن زي الفنان حسن الرداد، وفى الحلقات القليلة اللى شوفناها نقدر نقول أن المسلسل بـ يطرح فكر اجتماعى مشترك بين الشعب المصرى واللبنانى بالإضافة إلى قصة الحب الرومانسية اللى بـ تنشأ بين "خالد" (حسن الرداد) وبين "ريم" وبـ تتطور بتطور الأحداث.

المسلسل بـ يقدم دراما رومانسية هادئة بعيدًا عن الضرب والقتل اللى بقى شائع فى المسلسلات و الأفلام دلوقت، إلى جانب المتعة التمثيلية هـ نستمتع بمتعة المناظر الطبيعية اللبنانية وده لأن المسلسل تم تصويره ما بين مصر ولبنان.

 

علشان تعرف مواعيد وقنوات عرض "اتهام" زور "دليل كايرو 360 للتليفزيون فى رمضان".