عصائر كافيهات in الزمالك Cairo, Egypt

كافيهات

بريد باسكيت: مخبوزات وحلويات فريش في الزمالك
اصدرت في: 03/03/2015

المخبوزات بأنواعها –الحلو والحادق- من الحاجات اللي مش ممكن أي حد يقاومها؛ وخصوصًا في أول النهار لما تكون طازة ولسه خارجة من الفرن، بـ تبقى بديل ممتاز ومختلف عن الإفطار المصري التقليدي، أو حتى عن الساندويتشات اللي بـ نحضرها في البيت. وبالرغم من أن أماكن تقديم المخبوزات والحلويات كثيرة في القاهرة، إلا أن كثير منها بدأ يقلل من مستوى جودة المكونات، أو يقلل حجم منتجاته بشكل مضحك أو حتى يبالغ في الأسعار. أما الأسوأ من كده أن بعض الأماكن مخبوزاتها ما بـ تبقاش طازجة في أول النهار لأنها بـ تبقى مخبوزة الليلة اللي قبلها. لما عرفنا أن ذا بريد باسكت – The Bread Basket فتح ثاني في الزمالك بعد طول فترة تصليحات قررنا أننا نعمل له زيارة ونكتب عنه مقال نقدي؛ مبدأيًا مساحة المحل صغيرة، وبالتالي كل اللي هـ تعمله أنك تطلب وتأخذ الأكل تيك أواي. الديكور بسيط جدًا بمجموعته اللونية المكونة بشكل أساسي من الأبيض والبيج. أول ما تدخل هـ تلاقي الكاشير وثلاجة عرض موجود فيها مجموعة كبيرة من المخبوزات، أما وراء الثلاجة مجموعة من السلال فيها أنواع مختلفة من العيش وجنبهم كاونتر تحضير القهوة وثلاجة العصائر. أما الساندويتشات فبـ يتم تحضيرها في المطبخ. المنتجات المعروضة في الثلاجة الرئيسية كثيرة، زي الكرواسون بأنواع كثيرة (لوز – شوكولاتة – زعتر – قرفة – جبنة – فيلادلفيا) ومتوفر من بعض الأنواع حجمين زي الشوكولاتة مثًلا الصغير (4.50 جنيه) والكبير (8.50 جنيه). ده غير طبعًا الباتيه (7.50 جنيه) والكرواسون السادة (7 جنيه) واللي ممكن تضيف عليه مجموعة من الاختيارات، منها السلامون بالجبنة (31 جنيه) أو الجبنة الأمنتال بالديك المدخن (23 جنيه). من المخبوزات الثانية المعروضة المافين (الصغير 4 جنيه - الكبير 8 جنيه) بأنواعه، منه بالشوكولاتة، التوت الأزرق والتفاح بالقرفة، وكمان فيه أنواع من غير سكر زي الجزر والموز بالشوفان. بالإضافة لمجموعة من الحلويات الثانية زي التشيز كيك (22 : 24 جنيه)، الدانيش (9 جنيه) والدونتس بأنواعه بحجمين (5 جنيه للصغير – 8 جنيه للكبير). بعض فترة حيرة، قررنا أننا نجرب كرواسون الزعتر (7.50 جنيه) ولاتيه (14.50 جنيه) كافتتاحية للتجربة؛ الكرواسون كان حجمه كويس وفريش. وبعكس أماكن ثانية بـ تعمل كرواسون الزعتر عليه جبنة، بريد باسكت معتمد بشكل أساسي على خلطة الزعتر بالزيت بدون أي مكون مساعد. وبالتالي الكرواسون كان مميز جدًا وحدة طعم الزعتر كانت منعشة جدًا من غير ما تبقى لاذعة. أما اللاتيه، فبالرغم من أننا لاحظنا أنه بارد نوعًا ما، إلا أن نسبة القهوة واللبن فيه كانوا مضبوطين، ونوع القهوة أكثر من ممتاز، قوية من غير ما تكون مُرة. الجولة الثانية كانت مع الساندويتش، وزي أي مكان ثاني اختارنا مكوناته من أول نوع العيش حتى الحشو؛ اختارنا عيش كيتكا (6 جنيه)، وهو عبارة عن عيش على شكل ضفيرة، أما الحشو فاختارنا الروست بيف (26.95 جنيه)، العيش كان فريش جدًا وكان طري، وبالرغم من أن حجمه ممتاز بالنسبة لنا، فهو ممكن للأكيلة يكون صغير نسبيًا، أما المكونات فكانت فريش وكثيرة وقطع الروست بيف كانت عبارة عن شرائح لحمة باردة سميكة تسويتها ممتازة بعكس أماكن ثانية بـ تقدمها لحمة مُصنعة، من المكونات الثانية للساندويتش خس وطماطم وطبقة من المسطردة. للتحلية طلبنا دونات بالقهوة (12 جنيه) وعصير برتقال (12 جنيه)؛ واضح أن القائم على الخدمة ما سمعناش كويس فكان من نصيبنا أننا نجرب دونات بالطوفي، واللي كان فريش... العجينة هشة وخفيفة. أما أيسينج السكر اللي عليه قطع الطوفي وصوص الكراميل فكان كثير وكريمي وطعمه مضبوط مع نسبه العجينة وحجمها. عصير البرتقال كان للأسف أسوأ نهاية للتجربة الرائعة، لأنه كان بايظ! لما قرأنا على الزجاجة البلاستيكية تاريخ الصلاحية اكتشفنا أنه صلاحيته انتهيت في نفس يوم تجربتنا، بالرغم من أنه كان محفوظ في ثلاجة مقفولة. الغلطة الأخيرة كانت شنيعة صحيح بس ما نقدرش ننكر أن كل حاجة ثانية كانت ممتازة، سواء جودة الأكل أو سرعة الخدمة ومستواها، نصيحة لأي حد يشتري عصير هناك أنه يركز في صلاحية العصير قبل ما يشرب.

...

لقمة عيش: محل المخبوزات الأشهر في الإسكندرية وصل الزمالك
اصدرت في: 13/10/2014

من غير ما نقعد نتكلم كثير عن مشكلة المركزية في مصر، وأن كل حاجة ممكن تحتاجها هـ تلاقيها في القاهرة قبل ما توصل للمحافظات الثانية، مش من المعتاد بالنسبة لنا أننا نلاقي أماكن بدأت أول فروعها في محافظة ثانية قبل القاهرة، لقمة عيش – Lo2met 3eish في الزمالك، هو واحد من الأماكن دي؛ قبل ما نعمل زيارتنا الميدانية المعتادة اكتشفنا أنه من الأماكن المشهورة والمحبوبة جدًا في منطقة كفر عبده في الإسكندرية. بما أن الفرع الثاني في الزمالك، فتوقعنا أن مساحته هـ تبقى محدودة كعادة أي محل في الزمالك، وده بالفعل اللي لاقيناه، المحل من دورين الأول فيه كل المخبوزات: من أول الساندويتشات الخفيفة، والمخبوزات الفرنسية المعتادة وحتى الدوناتس اللي موجود منه أنواع مختلفة وممكن تعمله بالطعم اللي على مزاجك لأن عندهم إضافات كثيرة. الدور الثاني مخصص للجلوس ومكوّن من بار بـ يطل على الشارع من خلال الواجهة الزجاجية، وترابيزة خشبية بكراسي جلد من اللون الأبيض والبني على الشمال تكفي لأربعة أشخاص، أما لو عددكم كبير هـ تلاقي ترابيزة سطحها من البلاط الملوّن مُعلقة من السقف بأعمدة من المعدن لها كنبة بعرض الحائط وأربع كراسي على اليمين. الألوان كلها ما تختلفش عن ألوان اللوجو: الأزرق الفاتح والبني. الحاجة اللي أبهرتنا وخوفتنا كانت أرضية الدور الثاني بالسلالم... شفافة... فبالتالي أنت تقدر تشوف الدور الأول بـ يحصل فيه إيه، ناهيك عن أن كل العاملين بالمحل ممكن يعرفوا أنت لابسة إيه تحت الفستان. الموضوع مضحك ومقلق في الوقت نفسه. المهم، بما أنهم لسه فاتحين فما كنش فيه منيو ورقي نختار منه، على وعد من القائمين على الخدمة في المحل أنهم هـ يطبعوا المنيو قريب، اكتفينا في الوقت الحالي بمساعدتهم واللي كانت مهمة ومفيدة جدًا، بس بما أن طلباتنا بـ تكثر علشان نلاقي حاجة نكتب عنها في المقال النقدي، عدم وجود منيو ده كان له معنى واحد بس، أننا هـ نفضل طالعين نازلين على السلالم الشفافة دي كثير... وده اللي حصل فعلًا. الميزة الوحيدة أن الطلبات كانت بـ تطلع لحد عندنا، مش ناقص كمان غير أننا نشيل الصينية على السلالم المرعبة. الدفعة الأولى من طلباتنا تأخرت نسبيًا، ولكن القائمين على المكان قدموا لنا مشروب نوتيلا روشيه كنوع من الترحيب الظريف، اللفتة في حد ذاتها تشجعك أنك ترجع للمكان ثاني حتى لو كان المشروب مش كريمي كفاية كعادة المشروبات المثلجة من النوع ده. أول حاجة اختارناها كانت ساندويتش فراخ مشوية (28 جنيه)، كعادة محلات كثيرة أنت بـ تختار مكونات الساندويتشات بنفسك، من أول اللقمة (العيش يعني) وحتى الصوص، اختارنا بانيني أبيض فيه جرجير وخس ومايونيز وجبنة موتزاريلا بالإضافة طبعًا للمكوّن الأساسي وهو الفراخ المشوية، الساندويتش كان ممتاز: المكونات كانت طازجة ومتجانسة من حيث الطعم والفراخ كانت تتبيلتها ممتازة ونفس الشيء ينطبق على درجة الطهي، تمنينا لو كان الساندويتش أكبر شوية، لأن خسارة حاجة بالجمال ده تكون صغيرة كده. من المخبوزات اختارنا بانوراما بالهوت دوج والموتزاريلا (14 جنيه) وهو عبارة عن عجينة بيتزا عادية جدًا ملفوفة على هوت دوج عليهم صلصة طماطم وموتزاريلا، للأسف العجينة كانت طاغية على طعم الهوت دوج بالرغم من وفرته... ويا ريتها كان لها طعم، كانت مفتقرة للتبيل، صلصة الطماطم كانت مُرة ده غير أن ما كانش فيه جبنة موتزاريلا من الأساس. الدوناتس يعتبر ماركة مسجلة للقمة عيش، فقررنا أننا نختار اثنين ميني دونت بالفراولة، والثانية بالسكر والقرفة (5 جنيه للقطعة). توقعنا أن العجينة تكون أخف من كده، إلا أن ده ما يمنعش أنها كانت شهية، حشوة الكاسترد بالفراولة كانت ممتازة إلا أن طبقة الآيسينج الوردية على الدوناتس من فوق كان طعمها الإصطناعي أشبه بدواء كحة. أما اللي بالسكر والقرفة فكانت رائعة طبقة الجليز متوازنة مع السكر وقرفة وكذلك حشوة الكاسترد من الداخل. من المشروبات جربنا m&m's Coffee بـ (16 جنيه)، وهي عبارة عن Shot إسبريسو ساخنة عليها كريمة وحبات m&m's، المشروب كان ممتاز سواء من أول نوع القهوة حتى التركيبة كلها على بعضها، جربنا الفرابيه بطعم الكراميل (26 جنيه) واللي توقعنا أنه هـ يكون شبيه بالنوتيلا روشيه من حيث الطعم المائي، إلا أنه فاق كل توقعاتنا، المشروب كان متجانس من حيث كمية الثلج واللبن والنكهة المضافة. المكان ممتاز، ونتوقع أنه هـ يكون من أول الأماكن اللي ممكن تتجه إليها لو نفسك هفتك على دوناتس وأنت بـ تتمشى في الزمالك، ولكن فيه للأسف عيبين أخذنا بالنا منهم: الأول الذباب واللي كان واصل للمعروضات والدور الثاني، أما العيب الثاني فهو عدم وجود مكان مخصص للمدخنين.

...

إن سيزون: كوكتيلات وأكلات صحية جدًا في الزمالك
اصدرت في: 24/07/2014

"العقل السليم في الجسم السليم"... افتتاحية لزجة ومكررة جدًا لمقال نقدي لمكان بـ يقدم أكلات صحية. وبما أننا بدأنا الفقرة دي بكليشيه قديم... خلينا نختمها بكليشيه ثاني، وهو أن الأكل الصحي أساسه الخضروات والفاكهة، ومجموعة من العناصر الغذائية المختلفة، بنسب معتدلة.. خلصت الفقرة. بـ نقول الكلام ده ليه؟ لأن "إن سيزون - InSeason" في الزمالك يعتبر من الأماكن القليلة جدًا اللي أخذت موضوع الأكل الصحي والخفيف بشكل جدي، ومش بس كده، ده كمان بـ يقدمها بفن لكسر قاعدة مترسخة عندنا كلنا بـ تقول "الأكل الصحي طعمه مش حلو". أول حاجة لفتت نظرنا هو بار السلاطات واللي بـ يبدأ سعره من 38 جنيه، وزي أي مكان بـ يقدم سلاطات، لك عدد معيّن من المكونات المجانية واللي ممكن تزود عليها. الاختيارات كثيرة ومبتكرة وصحية، من الإضافات اللي مش موجودة في المحلات الثانية: الهليون، وحب الرمان وحبوب الكينوا. ده غير البطاطا المخبوزة في الفرن (25 جنيه) –رقم مبالغ فيه جدًا- واللي ممكن تضيف عليها إضافات مجانية من ضمنها الزبادي اليوناني، المشروم أو اللحم المقدد. وطبعًا الأكل الصحي لازم يبقي معاه مشروب مفيد، زي مثلًا عصير فاكهة –وشد خط تحت كلمة فاكهة- يكون فريش وبدون سكر أو أي إضافات صناعية... ده مفهومنا عن المشروب المفيد، "إن سيزون" الموضوع مختلف عندهم تمامًا. لو أنت من المستنيرين في مجال الريجيم هـ تبقى عارف أن "الديتوكس" هو نظام غذائي يعتمد على شرب السوائل فقط –عصير فاكهة خفيفة مثلًا- لمدة يوم أو ثلاثة على الأكثر، والغرض منه هو طرد السموم من الجسم. إلا أننا لما وقفنا أمام الثلاجة هناك اكتشفنا أن الدنيا تغيرت وأن مهاويس الصحة أخذوا الموضوع لمستوى أعلى؛ العصائر ما بقيتش كوكتيلات فاكهة بس... ده الخضروات نزلت الملعب كمان. علشان كده "إن سيزون" بـ يقدم حوالي 6 كوكتيلات من النوعية دي، وكل واحد فيهم متخصص في فائدة معينة؛ يعني مثلًا: جربنا عصير Lean Mean & Green بـ 25 جنيه ومكوناته كالآتي: تفاح، وليمون، وجنزبيل... حتى الآن المكونات عادية... مع: خيار، جرجير، كرفس، لفت أفرنجي وبقدونس... دي مش سلاطة، ده كوكتيل، مكتوب في المنيو أنه بـ يساعد على إزالة السموم من الجسم وإنقاص الوزن. دي الفوائد، أما الطعم... بصراحة عجبنا، مش علشان هو رائع، عشان إحنا بـ نحب المكونات دي كلها. بس من غير ما نحاول نجمّل الصورة طعمه كأنك بـ تشرب دريسينج خفيف للسلاطة... وما تسألناش ده مدح أو ذم لأننا مش عارفين! الكوكتيل الثاني كان Metabolism Mega-Drive بـ 25 جنيه والمفروض أنه بـ يزيد نسبة الحرق في الجسم وبـ يقوي المناعة لأن غالبية مكوناته غنية بفيتامين سي، وهي عبارة عن جزر وبرتقال، وأناناس، وليمون وجنزبيل... مبلوع ده شوية؟ طعم البرتقال كان غالب جدًا مع لسعة جنزبيل في الآخر. دي أغلبية العصائر الموجودة، فيه كمان عصائر فريش زي الأناناس والعنب... وممكن برضه تروح فرغلي جامعة الدول تشرب "فخفخينا" لو الكلام ده ما عجبكش. بعد كوكتيلات الأبطال دي قررنا نجرب حاجة مسكرة وخفيفة، فجربنا Crunch Zone بـ 35 جنيه وهو عبارة عن كوب فيه طبقة عسل في القاع، زبادي يوناني، كريز وحبوب الجرانولا بقطع اللوز المحمص... ده كان أعظم أكلة صحية ذقناها! الزبادي طعمه مختلف تمامًا عن اللي موجود بالسوبر ماركت، أولًا لأنه منكّه بحبوب الفانيليا، ثانيًا لأن دسمه قليل ومع ذلك محتفظ بقوام وطعم غني. الكريز كان طازج وبـ يقرمش، أما حبوب الجرانولا بقرمشتها وطعمها المسكر عادلت طراوة الزبادي... كل مكوّن كان عظيم لوحده، فتخيل لما ملعقة واحدة فيها كل ده؟! جربنا The Original Greek بـ 8 جنيه هو عبارة عن زبادي بالعسل. بالرغم من أن المسئول عن البيع أكد لنا أن المنتج طازج، إلا أن طعم الزبادي ما كانش بنفس الجودة اللي ذقناها في اختيارنا الأول، وأغلب الظن أنه كان للأسف قديم. "إن سيزون" كمان بـ يقدم منتجات غذائية متنوعة، منها زيت الزيتون البكر بأحجام مختلفة، وأنواع غريبة من المربى زي مربى الحرنكش (48 جنيه) والكيوي وقرع العسل. ده غير أنه بـ يبيع فاكهة وخضروات عضوية. بالرغم من غرابة التجربة، إلا أنها كانت مفيدة جدًا. الأسعار مبالغ فيها مقارنة بالأحجام، والسبب أن فيه مكونات مستوردة كثير. إن سيزون مش بالضرورة يكون بـ يرضي جميع الأذواق، وخصوصًا الكوكتيلات العجيبة... سباحة ضد التيار؟ أبدًا، هو بـ يخاطب فئة معينة من الناس عندها هوّس بكل ما يتعلق بالرشاقة والصحة بغض النظر عن الطعم.

...

ناي لاونج: خذ راحتك بشياكة في الزمالك
اصدرت في: 04/05/2014

طبعًا مافيش داعي أننا نتكلم عن زحمة الزمالك، وخصوصًا في وسط الأسبوع، ونعتقد أن الزمالكوية القدام (قصدنا أهل منطقة الزمالك) عارفين حجم المد الترفيهي والتغيير الكبير اللي حصل للزمالك في السنوات الأخيرة، وبالذات في المطاعم والكافيهات... غالبًا كل يوم بـ يفتح مكان جديد. بس الجديد فى الأمر أن أصحاب المطاعم أصبحوا على دراية أن النجاح مش مجرد جذب الزبون بفكرة جديدة مجنونة، بل بالمحافظة على الزبون بالجودة والخدمة المتميزة. صحيح "ناي لاونج – Ney Lounge" بموقعه الرائع، ومساحته الواسعة (مقارنة بالأماكن الأخرى في الزمالك) لسه في مرحلة الـ Soft opening (يعني لسه بـ يسخّنوا، وما نزلوش الملعب بافتتاح رسمي) إلا أنه واضح أن القائمين عليه مش بـ يهزروا. عمرك شفت مدرسة تقفل، ويفتح مكانها كافيه؟ هو ده بالضبط اللي حصل مع ناي، فالنتيجة أن المساحة المهولة للمبنى -اللي أكيد كان فيلا أيام الزمن الجميل وقبل ما يبقى مدرسة- مستخدمة استخدام هايل في استعراض الديكور الحديث واستخدام اللوجو كموتيفة (وحدة فنية يعني) للنافورة الجميلة اللي في المدخل، واللي تعتبر علامة مميزة للمكان، الأضواء هادئة، مع السلالم اللي بـ تطلعك للجزء الداخلي للمطعم بـ تحسسك أنك داخل اليوتوبيا مش مجرد مطعم أو كافيه عادي، المطعم من الداخل تصميمه بسيط وأنيق في الوقت نفسه، كنب مريح ومناسب للمّة كبيرة أمام شاشة LCD مهولة، ده غير قاعة الـ VIP اللي بـ يفصلها باب زجاجي عن بقية المكان كغرفة معيشة مستقلة، علشان تأخذ راحتك على الآخر، وكأنك قاعد في بيتك. الجزء الخارجي ديكوراته أكثر من رائعة؛ ترابيزات على إيدك الشمال، وأمامك مجموعة من القعدات للمجموعات الكبيرة، منفصلة بخضرة عن بعضها علشان كله يبقى على راحته. الاستقبال كان دافىء ولطيف، أول ما قعدنا نزل المنيو، نعتقد أن المنيو محتاج ريفيو لوحده، لأن فيه كل ما تتمناه من أول وجبة الإفطار، مرورًا بأنواع التورتيا المختلفة، وحتى المخبوزات والحلويات، واللي بـ تُباع بالقطعة أو كتورتة كاملة (140 جنيه). ده غير الشيشة بنكهاتها (10.30 جنيه) ووجبات الأطفال. وأكيد هـ تلاقي أي حاجة تناسبك من ساندويتشات، ولحوم، وفراخ وحتى السمك. أول ما قعدنا نزل سبت عيش فيه أنواع مختلفة منها الفوكاتشيا والبيتي بان والأسمر، الجدير بالذكر أنهم عندهم قسم خاص للمخبوزات ممكن تشتري منه بالقطعة. العيش كان طازة، والأجمل كمان أقراص الزبد المخلوطة بالروزماري والثوم... كان لازم الجرسون يأخذهم من أمامنا لأننا من حلاوتهم كنا هـ ننهيهم ونشبع. طلبنا من المقبلات مشروم مقلي (25 جنيه) كان رائع؛ مقرمش من الخارج وفي نفس الوقت المشروم طري ومحتفظ بنكهته، تحمسنا لطلب ستيك ناي (110 جنيه) بصوص المشروم، واللي كان مضبوط جدًا من حيث التسوية، الأطباق الجانبية كانت أرز أبيض وخضار سوتيه، بالرغم من عدم وجود أي ابتكار فيهم إلا أنهم كانوا ممتازين. جربنا Chicken Flute بـ 60 جنيه وهو عبارة عن صدور فراخ مشوية، الطبق كان جيد في مجمله، بس للأسف بعض قطع الفراخ كانت جافة من الخارج. الطبق الجانبي كان بطاطس بيوريه وكان طعمها مميز لأنها ممزوجة بكمية محترمة جدًا من الجبنة وبالتالي ده انعكس على قوامها اللي كان كثيف أكثر من اللازم. نضيف هنا أننا جربنا الطبق ده بالصدفة البحتة، نتيجة أن الجرسون سمع تشيكن فلوت بدل ساندويتش تشيكن فيوليت، بس ما علينا كل واحد ورزقه! مع الأكل طلبنا عصير ليمون بالنعناع، مضبوط ومنعش. الحلو بقى كان مسك الختام (واللي للأسف جاء بعد طول انتظار بالمعنى الحرفي)، طلبنا Gianduja portion بـ 13 جنيه، ومن الآخر الكلمة الملعبكة دي معناها كريمة الشوكولاتة بالبندق، بس الحقيقة أن الشيف كان شرحه للشيء اللي أكلناه كان أبسط من كده بكثير ألا وهو: موس شوكولاتة ببشر البرتقال، على الرغم من أننا مش من هواة الموس (لأن عادة بـ يببع لنا شيفات مصر الموس في صورة مهلبية بالشوكولاتة) إلا أن ده كان أجمل موس أكلناه في حياتنا... انفجار منعش من طعم البرتقال ممزوج بأمواج ناعمة وكريمي من موس الشوكولاتة... حاجة مفتخرة لكل محبي الشوكولاتة. إجمالًا: المكان أكثر من رائع، سواء من حيث النظافة، الموقع أو المأكولات. النقطة السلبية الوحيدة كانت البطء الشديد في الخدمة، وأكيد أن الجرسون ينزل طبق غير اللي طلبناه من الأساس. نتمنى أن اللخبطة دي ما تبقاش موجودة بعد الافتتاح الرسمي، لأن خسارة مكان بالجمال ده يقع في خطأ بطء الخدمة.

...

كيان: كافيه ومحل مخبوزات مريح للأعصاب فى الزمالك
اصدرت في: 23/02/2014

الزمالك كانت ومازالت محل دهشة وإعجاب بالنسبة لنا، بالمطاعم والكافيهات اللى كل شوية وفى لمح البصر بـ تفتح، المكان اللى رحناه المرة دي لسه افتتاحه كان من 5 أيام، فى شارع العادل أبو بكر فى الزمالك، "كيان بيكري – Kayan Bakery" هـ يشدك بلونه الأخضر الفاتح المريح للأعصاب واللون الأبيض اللى هـ يعمل لك تنويم مغناطيسي ويشدك له علشان تقعد وتجربه خاصة لو أنت بـ تمر فى وقت الإفطار. المكان صغير نوعًا ما، فيه 3 ترابيزات تقريبًا فى المنطقة اللى على الرصيف، وترابيزتين أو ثلاثة برضه فى الداخل، كاونتر زجاجى فى المدخل فيه أنواع كب كيك ومافن وبريوش ومخبوزات بالجبنة وأنواع ثانية، وجنبها ماكينات أسبريسو وكابتشينو وعلى الحائط أرفف فيها أنواع مختلفة من العيش مغطاة بقماش لطيف: باجيت وفوكاتشيا وشيباتا وتوست وبانيني وباتون ساليه، وعلى الشمال الكاشير وجنبه فتحة بسلالم لتحت بـ تودي على المطبخ، فيه منيو صغيرة فيها جميع أنواع العيش والمخبوزات، ماعدا المشروبات والعصائر اللى لازم تسأل عليها بنفسك لأنها مش مكتوب تفاصيلها، ومن كلامنا معاهم عرفنا كمان أنهم بـ يعملوا ساندويتشات وسلاطات بس لسه المنية بتاعتها بـ تتطبع. طريقة العرض تفتح النفس، واهتمامهم بتفاصيل الترابيزة من جراب عليه لوجو المكان فيه شوكة وسكينة ومنديل بشكل لطيف، والمناديل الخضراء اللى على الترابيزة اللى بـ ترد على لون الديكور عرفتنا أننا فى مكان بـ يهتم بالتفاصيل، وده حقيقى، صاحب المكان كمان لطيف جدًا ورحب بنا، وما بخلش علينا بالاقتراحات واهتم بطلباتنا وعرفنا أكثر بالاختيارات اللى متاحة أمامنا. طلبنا شاي باللبن، الشاي (8.50 جنيه)، واللبن (5.95 جنيه)، أول حاجة أن ده كثير أوى أننا نشرب شاي باللبن بـ 14.45 جنيه!!، وأخذنا كمان عصير يوسفى (15 جنيه)، ومن المخبوزات اختارنا باتيه بجبن الفيلادلفيا (9 جنيه)، ومن أرفف العيش اختارنا عيش فوكاتشيا وطلبنا أننا نضيف إليه مكونات أو حشو، واقترح علينا صاحب المكان فوكاتشيا كابريس (26 جنيه) ودي فيها جبن موتزاريلا وشرائح طماطم وبصل وفلفل ألوان مع صوص لطيف ومعاها سلاطة كول سلو عليها زبيب من فوق. الشاي باللبن كان لطيف وكميته كمان، عصير اليوسفى كان رائع بلونه وطعمه الغني، فريش على الآخر، فى حين أن باتيه الفيلادلفيا كان طعمه حلو أوى ومش مزيت ويذوب فى فمك لكن حجمه صغير جدًا، لسه بـ نبدأ نأكله ونستمتع لقيناه خلص! الفوكاتشيا كابريس بقى اللى كانت حكاية، طعم العيش الفريش مع المكونات والجبن الموتزاريلا السايحة كان وهمي لدرجة أن صديقنا اللى طلبه ما لحقش يتهنى به لأننا شاركناه وخلصنا الطبق كله. من الحلويات جربنا كمان بريوش بالكريمة والسكر Cream & Sugar سعره 8 جنيه، ومافين بالشوكولاتة Choco Muffin بـ 7 جنيه، البريوش كان حلو قوى بس كان نفسنا السكر المرشوش على الوش يقل شوية علشان نستمتع بالكريمة اللى فى الحشو، بس كان طعمها حلو قوى، والمافين كانت رائعة لأن مش بس طعم الكيك بالشوكولاتة لأ كمان كانوا حاطين عليها من فوق قطع كبيرة شوكولاتة بـ تسيح فى فمك لما تأكلها وأضافت لطعمها الإجمالى كثير. "كيان" بـ يضيفوا على حسابك خدمة وضريبة، الأسعار هنا عامة عالية شوية، لأن فى الآخر دفعنا فى وجبة إفطار لشخصين أكتر من 100 جنيه، وده كثير شوية، صاحب المكان اهتم برأينا بعد ما خلصنا ولما عرف أننا متضايقين من حجم الباتيه الفيلادلفيا أهدانا حاجة زي الكرواسون صغيرة خالص محشية عجينة الفستق كانت وهمية جدًا وفرحنا جدًا من تعامله الرائع معانا وكمان وعدنا أنه هـ يوصي الشيف يكبر حجمها شوية.. وأكيد دى من الحاجات اللى تخلى أى حد ييجي ثانى المكان.

...

الحارة: قهوة نشيطة على حارة فى الزمالك
اصدرت في: 29/01/2014

بالنسبة لكثير من أهل القاهرة، الخروج فى كافيهات القاهرة المتعددة يعتبر خروجة كلاسيكية. ومع تشبع العاصمة بعدد كبير من الأماكن اللى بـ تحاول تقدم نفس الكلام بطريقة مختلفة، بعضهم قدر يكون مثير كفاية بحيث يضمن لنفسه زيارة؛ كافيه الحارة على شارع شجرة الدر فى الزمالك نفذ الكلام حرفيًا. الكافيه مكانه على حارة مفتوحة -وده سبب تسميته- بين عمارتين. بجانب الإضاءة الضعيفة من لمبات أرضية والمطاعم المجاورة، الحارة مظلم بالكامل، لكن مش لدرجة إحساسك بعدم الراحة. رغم فرضنا أن مع الأجواء المزدحمة الخدمة هـ تكون صعبة، كانت مفاجأة لطيفة أن الجرسون الخاص بنا كان منتبه وبـ يظهر أول ما نحتاجه. مع وجود المنيوهات على الترابيزة، طلبنا واحد أمريكان كوفى (16 جنيه)، كوكتيل الحارة (20 جنيه)، سموزى بلوبيرى بالكركديه (25 جنيه) وبنانا سبليت (25 جنيه). منيو الحارة متنوعة، بأقسام كاملة مخصصة للمشروبات الباردة، هوت شوكليت، سموزى، فرابيه، كوكتيل، عصائر، حلويات وشيشة. السموزي كان بلا طعم ورغوة، مع عدم وجود لأى نكهة بلوبيرى أو كركديه. فى نفس الوقت، البنانا سبليت كان طبق لطيف، عبارة عن ثلاث بولات آيس كريم فانيليا وشوكولاتة وسط نصفي موزة. الطبق اللذيذ المرشوش عليه صوص شوكولاتة وكراميل كان فعلاً تحفة وعوض السموزى الضعيف. الدور بعد كده كان على كوكتيل الحارة والأمريكان كوفى. الكوكتيل المكون من برتقال، موز، فراولة وفواكه ثانية مش معروفة كان مشروب استوائى غنى بالنكهة الحمضية اللاذعة. المشروب الأمريكى كان من كل النواحى قهوة فاترة عادية، كل إحباطنا منها كان بسبب سعرها المبالغ فيه. بعد رفعهم للمشروبات من الترابيزة، الجرسون قال لنا بشكل جاد أن الحارة بـ يفرض حد أدنى للطلبات 50 جنيه للفرد. ومن بين اختيار صنف حلو أو مشروب من منيو الحارة المحدودة أو من عند عم حواوشى جاره، قررنا نطلب ثلاثة حواوشى باربيكيو (23.50 جنيه) تيك أواى. يمكن الحارة يعتبر مكان لطيف لخروجة مع أصحابك، لكنه مش بـ يقدم أى أفكار جديدة أو نكهات مميزة تناسب الأسعار الغالية أو الحد الأدنى الغريب للطلبات.

...

آيس: ميلك شيك وآيس كريم حكاية فى الزمالك
اصدرت في: 25/08/2013

بداية من الكب كيكس ومرورًا بالزبادى المثلج، شهدت كافيهات ومطاعم القاهرة أشكال وألوان من الأكلات. لاحظنا مؤخرًا ظهور عدد متزايد من محلات الآيس كريم تساعد الناس على مقاومة حرارة الصيف. "آيس - Ice" فى الزمالك فعلاً اسم على مسمى، بـ يقدم تشكيلة من نكهات الآيس كريم المنعشة، بجانب مجموعة من السموزى، الميلك شيك وحلويات ثانية. المكان فى الحقيقة أقل من الوصف لحد كبير، ورغم أن الحوائط ألوانها مبهجة، مافيش قعدة داخل المحل، وده قدر يخلق مساحة واسعة فاضية بين الواجهة المفتوحة وكاونتر الطلبات. رحبوا بنا على الباب وسلمونا واحدة من المنيوهات الورقية. مع المجموعة المتنوعة من العصائر الفريش، الكوكتيلات، الميلك شيك، الآيس كريم والتارت، احتاجنا وقت علشان نأخذ قرار؛ واللى ساعدنا فى عملية اتخاذ القرار هو تقديمهم لعينات تذوق مجانية من كل أصناف الآيس كريم. من بين اختيارات الشوكولاتة، الفواكة والمكسرات الرائعة، طلبنا نتذوق شربات المانجو اللذيذ، الزبادى بالتوت ونكهات اللوز بالقشطة. ما قدرناش نشوف أى كونو بسكويت، كل الموجود كان أكواب آيس كريم. الأسعار عندهم محددة بالبولة، وفورًا وقعنا فى عشق الآيس كريم باللوز (8 جنيه)، ومعاه بولة من آيس كريم شوكولاتة جالاكسى العظيمة، اللى فيها قطع شوكولاتة مخفية. ما قدرناش كمان نقاوم سحر بولتين من آيس كريم الزبادى بالتوت. بسبب وجود خلاط واحد فقط، المشروبات احتاجت شوية وقت فى التحضير ونظرًا لأن الحجم الوسط كان صغير شوية، طلبنا كل مشروباتنا بالحجم الكبير. أولاً طلبنا واحد ميلك شيك فانيليا غنى بالكريمة، ومن الطعم قدرنا نعرف أنهم استخدموا الآيس كريم الفانيليا الممتاز بتاعهم فى تحضيره. بعدها، افترضنا أن كوكتيل بنانا ماما Banana Mama اللي بـ 12 جنيه أكيد هـ يبقى عبارة عن عصير موز وفراولة من نفس القوام، لكن نصف الكوب كان مليان عصير فراولة لذيذ أما الباقى كان أقرب لحليب مخلوط مع كمية بسيطة جدًا من الموز، والنتيجة كانت مزيج مش مضبوط. عصير البطيخ الطبيعى (9 جنيه) كان مثلج لكن فى نفس الوقت غير مكتمل النضج، وده كان سبب أن طعمه يكون مائع. أخيرًا، ميلك شيك أوريو (17 جنيه) كان أفضل كثير وظاهر فيه طعم الشوكولاتة القوى زى ما توقعنا. معروض كمان عدد من كيكات الآيس كريم فى فريزر كبير من الزجاج. بجانب كيكة فروتوبيا بألوانها المبهجة، واسمها مشتق من مجموعة بولات الآيس كريم المختلفة الموجودة على الكيكة، لاحظنا وجود الحلويات الشرقية، mastic cassata بـ 85 جنيه. الحلويات المخبوزة فى نفس المكان بواسطة الشيف السورى بـ تعبر عن أقصى درجات الطعم الأصلى، مع طعم مسكر زيادة شوية علشان يتوافق مع الذوق المصرى. على الناحية الثانية، المشروبات مش أجمد حاجة نجربها، لكن أكيد كانت منعشة وسعرها معقول، وصعب تعترض على حاجة. صحيح الديكورات فى آيس عادية، بس يفضل الآيس كريم هو محور الاهتمام، وغالبًا هـ نرجع فى زيارة جديدة.

...

ديشز: منيو متنوعة فى الزمالك
اصدرت في: 15/04/2013

"ديشز- Dishes" كافية جديد فى الزمالك واحد من أحدث إضافات قائمة كافيهات القاهرة. مكانه بعيد خالص عن شارع 26 يوليو المزدحم، ناحية شارع الجزيرة الهادئ المناسب للتمشية وبـ يثبت أنه مكان لطيف ومريح للاستمتاع بالشيشة، جو المكان العام مريح، وغالبًا بـ يكون هادئ، ماعدا الويك إند بـ يكون زحمة شديدة. وصلنا ديشز جعانين على الآخر، وردود الأفعال بالنسبة للأكل فى المجمل كانت مختلفة لحد كبير. عمومًا كان فيه إجماع أن الكتابة والترجمة الموجودة فى المنيو قمة فى الابتكار؛ أكثر كلمة شدتنا كانت'grape paper' أو "ورق العنب" وده كان بديل مختلف لكلمة 'vine leaves'. فى البداية طلبنا عصير مانجو (18 جنيه) وسموزى موز (24 جنيه)، مع شوية فواتح شهية منها سبرينج رولز (30 جنيه)، ناتشوز (26 جنيه)، بابا غنوج (15 جنيه) وسلاطة فتوش (16 جنيه). المفاجأة بالنسبة لنا أنهم ما قدموش حمص، والأغرب من كده أننا عرفنا أن 'grape paper' اللى كلنا كنا متشوقين نجربها كانت خلصت. المشروبات كانت ممتازة، بطعمها الطازج اللذيذ، ومجموعة السموزى الكبيرة الموجودة خلتنا نفكر فى الفروقات ما بينها. كل المقبلات كان شكلها أنيق خصوصًا السبرينج رولز الطعمة، رغم أننا أُحبطنا شوية من جودة العيش السيئة اللى بـ يقدم كمجاملة، اللى كان واضح أنه قديم شوية. الناتشوز كمان كان ينقصها شوية مكونات أساسية، ونزلت من غير الأصناف الجانبية المعتادة زى guacamole –أفوكادو مهروس بالفلفل والطماطم- والقشطة والصلصة. نروح للأطباق الرئيسية اللى اختياراتنا فيها كانت متنوعة بشكل كبير، وده بـ يعكس تنوع الأطباق الموجودة داخل المنيو. الكاساديا بالفراخ وكمان اللحم (37 جنيه، 51 جنيه على الترتيب) كانوا روعة، ونفس الكلام بالنسبة للفراخ بالمانجو (55 جنيه)، رغم أن صوص المانجو كان طاغى شوية على طعم الفراخ. بالنظر لكميات الأكل الكبيرة، قدرنا بالعافية نطلب حاجة واحدة من الحلويات الكثير الموجودة. فى الأول طلبنا وافلز، لكن بعدها عرفنا أنها خلصت فـ قررنا نبدلها ببلو بيرى تشيز كيك (26 جنيه). وكالعادة حجم القطعة كان كبير، بس الكيك نفسه كان مسكر بزيادة. لازم نقول أن الكيك كانت مزيج مضبوط بين الطبقة الخارجية، والكيكة نفسها والتوت البرى، وقوامها نفسه كان مميز. أكيد ديشز يستحق يدخل فى قائمة كافيهات المنطقة، مش بسبب أكله ولكن السبب الأهم كان جمال جو الزمالك اللى ما يتنسيش.

...

ماروني كوستا: كافيه هادئ فى مكان استراتيجي فى الزمالك
اصدرت في: 31/03/2013

مش عارفين ده نحس، ولا فيه حاجة غلط دائمًا فى تأسيس المكان ده! مكان الكافيه ده فى شارع إسماعيل محمد فى الزمالك وفى مكان استراتيجي جدًا أمام كليتي فنون جميلة وتربية فنية كان الأول اسمه "كافيه نوار - Café Noire"، وبعد كده بفترة مش طويلة بقى "سينزيو – Cinnzeo" ومؤخرًا بقى "ماروني كوستا – Marrone Costa" بشعار Caffee & Italian food وعرفنا بعد كده أنهم تابعين لنفس الشركة اللى مسؤولة عن سلسلة مطاعم "سينزيو" فى مصر. بديكور وزينة من على المحل بره هـ يشدك زي ما شدنا هـ تدخل هـ تلاقى حاجات من الديكور القديم ما تغيرتش منها السلم الحلزونى اللى موجود على يمينك أول ما تدخل وبـ يؤدي للدور اللى فوق، فيه بنوتة لطيفة استقبلتنا وكانت معانا وقت ما اختارنا هـ نأخذ إيه وشرحت لنا حاجات ما كانتش إجاباتها حاضرة لكن استفسرت لنا عليها. المنيو مكونة من قائمة للإفطار، والساندويتشات، والسلاطات، والبيتزا والباستا والحلويات والعصائر الفريش والساخنة والباردة. بدأنا قعدتنا باختيار ماروني بيتزا (44.90 جنيه) بـ تتعمل عندهم بطريقة جديدة لأنها عبارة عن طبقتين من عجينة البيتزا اللذيذة والموتزاريلا مع شرائح الدجاج والمشروم والتركي المدخن مع الزيتون والفلفل الألاون وصوص البيستو، وكمان طلبنا ماروني سلاد (37.90 جنيه) وهي سلاطة مكوناتها برضه جديدة من خس الكابوتشا مع شرائح الدجاج المشوي وشرائح التفاح الأخضر وطماطم الشيري مع الزيتون الأسود والجبن الريكفورد وعين الجمل وصوص الجبنة الريكفورد، وكل السلاطات بـ تقدم داخل طبق من عيش التورتيلا الكريسبي. الطلب بتاعنا أخذ وقت شوية لكن جاء لنا شكله يفتح النفس، السلاطة كانت عالمية، بس ما كانش فيها زيتون أسود وتم استبداله بزبيب (كمية كبيرة منه)، مزيج الطعم فى النهاية كان رائع لأن ملح الجبن الريكفورد كان بـ يعادله السكر الموجود فى التفاح، بس كان محتاج كمية الزبيب والجبن تخف شوية. البيتزا كانت جديدة علينا لأن من بره ما كانش عليها المكونات زي ما إحنا متعودين، المكونات كانت محشوة من الداخل فى الطبقتين وده خلى عندنا حب المغامرة والبحث فى اللى داخل البيتزا، الطعم رائع والكمية كبيرة واستمتعنا بها جدًا. كانز البيبسي بـ (10.90 جنيه)، و زجاجة المياه الصغيرة بـ (5.90 جنيه)، ومن الحلويات لقينا الاختيارات اللى فى المنيو كلها فيها آيس كريم فى مكوناتها، بينما لو رحت اتفرجت على اللى موجود فى ثلاجة العرض هـ تلاقى أصناف ثانية، عجبنا شكل الأبل تارت (19.90 جنيه) رغم انهم كانوا مقطعينها بطريقة غريبة وكان حجم الـ Slice صغير جدًا بالمقارنة بأماكن ثانية، لكن الطعم والعجين والسكر كان مضبوط فيها وكانت نهاية خفيفة لقعدتنا هناك. المكان لطيف نتمنى أنه يكمل وما يكونش مصيره زي اللى سبقوه.

...

بوليفارد: كافيه جديد صاخب في الزمالك
اصدرت في: 28/02/2013

المصمم المعماري لودفيج ميس فان دير روه قال في مرة: "Less is more"، أغلب الأوقات في القاهرة بـ نجد أنفسنا بـ نفكر في نفس الشيء في الوقت اللي أغلب الأماكن المصرية بـ تنجح في مقولة "More is more"، مازلنا بـ نتمنى وجود أي حد أو أي مكان يقدر يحقق المقولة دي، قليلين قوي اللي بـ يحققوها، للأسف بوليفارد في الزمالك مش منهم. في شارع البرازيل على اليمين أمام سفارة الجزائر هـ تلاقوا بوليفارد عبارة عن كافيه شيشة ثاني، لكن المنيو شاملة بـ تضم كل أنواع السلاطات والشوربات والسندويتشات والمكرونات والبيتزا والأطباق الرئيسية من الأسماك والدجاج واللحوم مع مجموعة من الحلويات، اختارنا من المقبلات كرات الجبنة (25 جنيه) وساندويتش فراخ بانيه (31 جنيه) مع مكرونة بصوص الأرابياتا (27 جنيه)، كمان قررنا نجرب عصير الجوافة الطازج (13.95 جنيه) واللي كان فعلًا طازج لكن قوامه ثقيل شوية لدرجة أنه ما كانش بـ يطلع في الشفاطة. الطبق الرئيسي وصل من غير أي إشارة لطبق المقبلات اللي يا إما اتنسى أو ما اتكتبش، ما كناش متأكدين من ده، الساندويتش وصل مكون من طبقتين ومعاه بطاطس مقلية وكان أفضل شئ في كل اللي طلبناه وبكل المقاييس كان رائع، البطاطس المقلية كانت مليانة زيت ومش مقرمشة زي ما تعودنا، المكرونة كانت أقل اندهاش وكانت باردة والصوص مالوش طعم ومافيهوش أي نكهة. وأخيرًا وصل طبق المقبلات اللي كان برضه مُخيب، شوية مطاطي زي كرة الضغط، ومكعبات الجبنة المقلية كانت موجودة على كمية من الخس وده مش حاجة ذكية للأكلات المقلية. كان لسه عندنا أمل في الحلويات واختارنا على حسب ترشيح بوليفارد "Deep Dish Fudge " (23 جنيه) اسمه حلو؟ توقعنا طبق اسمه على مسمى من شوكولاتة الفادج الدافئة اللذيذة ولكن بدلاً منها جاء لنا شريحة من كيكة شوكولاتة مش طازجة. الخدمة كانت مش مستقرة بـ تأخذ كثير من الوقت في الطلبات لكن سريعة مع الآخرين، الزبائن في بوليفارد صغار في السن وأقرب للمراهقين، لكن لاقينا نفسنا محبطين شوية من مستوى الأكل، بـ يقدموا شيشة (10: 25 جنيه) من الحاجات اللي ممكن تدعم نجاحه. الكافيه من الداخل مدهون وشبه شوية أماكن زي ولعة و كافيه ميكس من ناحية الديكور والجماليات لكن في المجمل وجدنا أننا نحاول بجدية أكثر ندور وكنا هـ نجد شئ أفضل من كده بالنسبة للأساسيات.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن