قهوة كافيهات in القاهرة الجديدة Cairo, Egypt

كافيهات

بوتري كافيه: شيشة وبيتزا ومشروبات فريش في التجمع الخامس
اصدرت في: 29/01/2012

من الأسماء المألوفة جدًا في عالم الكافيهات، يعني لما تعد أهم 10 كافيهات في كايرو لازم «بوتري كافيه – Pottery café» يكون واحد منهم، ومن وقت للثاني محررين كايرو 360 بـ يكون لهم تجربة هناك في واحد من فروعهم المنتشرة في كل المناطق، وبـ ننقل لكم تجربتنا وملاحظتنا عن الفروق بين كل فرع والثاني، وكل مرة بـ نسجل إعجابنا بتفصيلة معينة خاصة بالمكان، اللي اتعودنا منه على مستوى جيد وموود معين. المرة دي كانت تجربتنا في فرع «بوتري كافيه» في التجمع الخامس، داخل مجمع الـ Meeting Point اللي في نهاية شارع التسعين أمام جامعة المستقبل. الكافيه داخل المبنى نفسه في الدور الأرضي، المدخل عبارة عن ممر طويل ضيق فيه ترابيزات تكفي لفردين على الناحية الشمال، وعلى اليمين الكاونتر الخاص بتحضير الطلبات. في نهاية الممر بـ تلاقي باب كأنه بـ يدخلك لعالم ثاني، مساحة مفتوحة كبيرة ومغطاة بالمشمع علشان الأمطار والرياح، ودي طبعًا غير مكيفة لأنها مخصصة للشيشة، وفيها 3 شاشات تليفزيون كبيرة والإضاءة قليلة والترابيزات بأحجام مختلفة وهـ تحس بصخب وزحام غريب وغير معتاد عمومًا في التجمع الخامس المشهور بالهدوء والروقان. يمكن دي تكون حاجة مميزة للمكان وبـ تخلي الناس تيجي هنا مخصوص علشان تستمتع بالدفء البشري ويغيروا الموود الهادئ للمنطقة المحيطة. ده طبعًا بفرض أن كل رواد المكان من سكان التجمع والقاهرة الجديدة. الديكور بسيط وألوانه غامقة لكن مريح نفسيًا، بس مش هـ تستحمل تقعد في الساحة الداخلية دي كثير لو كنت غير مدخن، غير كده الجو ظريف والقعدة حلوة والكراسي مريحة. المنيو تقليدي زي أي كافيه فيما يخص المشروبات: ساخنة وباردة وفرابيه وسموزي، الأسعار معقولة، الشوكولاتة الساخنة بـ 15 جنيه وبـ تبقى حجم واحد كبير، والكابوتشينو بالحجم العادي بـ 12 جنيه، الموكا بـ 20 جنيه، وجربنا كل المشروبات دي وكانت ممتازة والكميات مناسبة للأسعار، ومن المشروبات الباردة جربنا كوكتيل فواكة "بوتري" (17 جنيه) بالكيوي والموز والتفاح وكان غالب عليه طعم ولون الكيوي لكن كان منعش ولذيذ. أسعار باقي الكوكتيلات والفرابية والسموزي من 17 لـ 25 جنيه. في منيو المأكولات فيه مقبلات وشوربات وأطباق رئيسية زي الفاهيتا والسكالوب بأسعار من 45 لـ 60 جنيه، وفيه بيتزا ومعجنات وساندويتشات وبانيني، لكن عرفنا أن الباستا والبيتزا من أحسن الحاجات هناك، وحبينا نتأكد بنفسنا، وطلبنا بيتزا بيبروني (28 جنيه) تكفي لفرد واحد أو اثنين علشان مش جعانين قوي، وكانت حلوة ومليانة جبنة موتزاريلا ورقيقة جدًا. جربنا مكرونة بِنَا بالمشروم والدجاج والصوص الأبيض (31 جنيه) اللي تم تقديمها في طبق كبير فيه كمية قليلة لكن الطعم كان حلو والتوابل والأعشاب اللي عليها كانوا جامدين، والدجاج كان طازج ودي أهم حاجة. بعد الأكل حلينا بواحد براوني بالآيس كريم، وأحلى حاجة فيه أنه فريش برضه والكيك تحس أنه لسه مخبوز حالًا. الشيشة قوية جدًا في «بوتري كافيه» وأي حد غاوي هـ يبقى عارف الموضوع ده لأننا مش مدخنين بصراحة لكن عجب أصدقائنا جدًا، نكهات كثير وخدمة سريعة، جربنا شيشة بنكهة الجوافة (15 جنيه) معاها لي بلاستيكي (4 جنيه). وغير أن طعمها حلو، شكل الشيشة نفسها حلو. الخدمة فيها بعض العيوب، يعني هـ تحتاج تنادي على الجرسون أكثر من مرة وتفكره بطلبك، وبعد كده هـ يتأخر لحد ما يجيب المطلوب. واستغربنا لما النور انطفأ فجأة وإحنا قاعدين ولما سألناه عن السبب ما حدش رد علينا بإجابة محددة! وبعد 15 دقيقة رجع النور. «بوتري» له فروع في الزمالك ومصر الجديدة والمعادي ووسط البلد، عجبتنا التجربة في فرع التجمع الخامس (التجمد الخامس أحيانًا) ومستنيين نشوف «بوتري كافيه» في أماكن أكثر في كايرو.

...

لو كافيه: مطبخ عالمي وديكور شيك في التجمع الخامس
اصدرت في: 26/10/2011

في مركز الميتنج بوينت Meeting Point التجاري في نهاية شارع التسعين في التجمع الخامس عدد كبير من المطاعم والكافيهات منها المعروف والسلاسل العالمية زي «تشيليز - Chili’s» وغيره ومنها سلاسل محلية مميزة قدرت أنها تتوسع وتفتح فروع في مناطق كثير في وقت قياسي زي سلسلة «لو كافيه – Le Café». في الدور الأرضي وفي واجهة المركز التجاري وعلى مساحة كبيرة ومفتوحة موجود «لو كافيه»، فيه جزء صغير داخل المبنى لكن الجزء الأكبر هو الجزء الخارجي بديكور أنيق وجدران بالطوب الحراري الضخم ورسومات باللون البرتقالي وهو اللون الرئيسي للديكور، مع ترابيزات خشبية مغطاة بالوبر الكاروهات باللون البيج، وفيه أكثر من نافورة وزي بحيرات صناعية صغيرة بـ تحيط بالمكان، وشاشات LCD بـ تعرض مباريات الدوري الأسباني، والأهم من ده كله أن لما الدنيا بدأت تبرد حطوا دفايات بالقرب من كل الترابيزات، وعرفنا أنهم هـ يغطوا المساحة المفتوحة دي في فصل الشتاء بطريقة تحافظ على الطابع "المفتوح" للقعدة هناك، ده على حسب كلام أحد العاملين في المكان. أخذنا ركن هادئ لفردين واستعرضنا صفحات المنيو الضخم اللي فيه كل حاجة تقريبًا، كل أنواع المأكولات من أطباق رئيسية لحوم ودجاج وأسماك، ساندويتشات وباستا وبيتزا، مقبلات وكريب وسلاطات وشوربات، وكوكتيلات وعصائر وسموزي وحلويات، وفيه كمان شيشة بنكهات مختلفة. الأسعار معقولة ومناسبة للقعدة الحلوة ومستوى الأكل اللي كان مفاجأة بالنسبة لنا. بدأنا بطبق مقبلات اسمه Four way sampler فيه 4 أنواع من المقبلات المقلية والمقرمشة هي الكاليماري والجمبري وصوابع الموتزاريلا والسبرنج رولز بالدجاج، ومعاه 3 صوصات هي عسل المسطردة وصوص المارينار (طماطم حارة) ودريسنج فرنسي خفيف سعره 32 جنيه، والطعم كان أكثر من رائع والكمية وفيرة جدًا. من منيو الأطباق الرئيسية طلبنا ستيك فيليه الإنتركوت على الجريل (75 جنيه) وبـ يُقدم معاه صنفين من اختيارنا من 4 أصناف وهم الأرز والبطاطس المحمرة والبطاطس البيوريه والسوتيه مع صوص الركفورد والمسطردة وصوص الكبدة. وطلبنا طبق "تشيكن لوزان" مع باستا بصوص الطماطم –الباستا في الحالة دي بـ تبقى بديل عن الصنفين من الأربعة اللي ذكرناهم– وكان سعره (45 جنيه). الطبقين دول كانوا بناء على ترشيحات الجرسون المهذب جدًا اللي شرح لنا بالضبط كل المكونات في الأكل وقال لنا أن دي الأطباق المميزة في المطبخ؛ وقد كان. فيليه الإنتركوت كان مستواه كويس قوي وصوص الريكفورد أو الـ Blue Cheese مع الأرز الأبيض بالروزماري والريحان كان تحفة، واللحم نفسه كان فريش وطعمه غير عادي. الـ "تشيكن لوزان" عبارة عن قطعة صدور دجاج كبيرة مغلفة بخلطة مقرمشة وقطع الروست بيف والموتزاريلا وأعشاب وتوابل حريفة، كانت لذيذة لكن كانت مالحة أكثر من اللازم بسبب التوابل الكثير والمسطردة، وحجمها كان كبير وما قدرناش نخلص نصفها وأخذناها تيك آواي. والباستا اللي كانت معاها كانت مثالية وطعمها مضبوط. من منيو الحلويات جربنا التشيز كيك بصوص الفراولة (21 جنيه) الكيك والجبنة كانوا حلوين لكن الصوص كان مجرد مربى فراولة عادية، لكن في الآخر كانت لذيذة وأثبتت أن «لو كافيه» كمان متميز في الحلويات. الخدمة أكثر من ممتازة وودودة جدًا، والمكان هادئ ومريح للأعصاب، والمنيو غني جدًا وكان نفسنا نجرب كل حاجة فيه، زي الشوربات والسلاطات اللي أسعارها من 18 لـ 35 جنيه، ومنيو المشروبات كان فيه حاجات مغرية كثير زي البينا كولادا والفيرجن ماري وكوكتيلات مبتكرة كثير بأسعار من 18 لـ 22 جنيه، والشيشة طبعًا بما أن المكان مفتوح. حبينا «لو كافيه» وحسينا أننا اكتشفنا مكان جديد يصلح لكل الأغراض، أكل وشرب وشيشة ودردشة، وفيه ألعاب القهوة العادية زي الطاولة والدومينو، ينفع رومانسي وينفع لخروجات الأصحاب والقعدات العائلية. سكان التجمع والقاهرة الجديدة أكيد محظوظين علشان عندهم المكان ده.

...

إل كافيه دي روما: مذاق إيطالي جديد في مول داون تاون
اصدرت في: 23/10/2011

لو كنت سافرت روما قبل كده يبقى أكيد شربت هناك أحسن قهوة ممكن تشربها في حياتك. الإيطاليين بـ يعرفوا إزاي يعملوا قهوة، وبعد ما بـ تروح بـ تحس أن القهوة ما ينفعش تبقى غير كده. وللأسف الأماكن اللي بـ تعمل قهوة بالمستوى ده في كايرو لسه قليلة، لكن حظنا كان كويس لما وقعنا في «إل كافيه دي روما» اللي فتح في مارس اللي فات في التجمع الخامس في مول داون تاون اللي اعتبرناه من أحسن الأماكن اللي بـ تعمل قهوة في القاهرة. طبعًا المنظر من هناك مش خرافي لأنه لا يقارن بأنك تكون قاعد أمام الكولسيوم في روما، لكن ده ما يمنعش أن الكافيه فيه تراس هائل وقعدة حلوة. الكراسي والكنبات مريحة، والديكور من الداخل باللون البرتقالي الفاتح وجو المكان يوحي بالتفاؤل والاسترخاء. بـ يتم إدارة الكافيه من خلال كوفي هاوس إيطالي اسمه "لافاتزو" ونظرة واحدة على المنيو هـ تعرف أن المكان ده مش بـ يهزر في موضوع القهوة. بعد ما تفرجنا على المنيو شوية طلبنا الدوبل أسبريسو الحجم العادي (14.5 جنيه) والـCioccolata Italiana (26.50 جنيه) وكوكتيل الكيوي والتفاح (33.50 جنيه). طعم الاسبريسو كان كما يجب، سميك بطبقة كريمة غنية على الوجه وجرعة قوية من البن ومرارة لذيذة بعد كل رشفة. ومع ذلك الحاجة المميزة أكثر كانت الشوكولاتة الإيطالية الساخنة مصنوعة على طريقة مدينة تورينو الإيطالية من الشوكولاتة الخالصة وكان لها قوام سميك ومذاق خاص جدًا، الحقيقة كانت أحسن شوكولاتة ساخنة شربناها في مصر ويمكن أحسن من بلاد كثير ثانية كمان، مشكلته أن الكمية كبيرة ودسم جدًا وتقريبًا مستحيل تخلصه. عصير الكيوي والتفاح كان فريش وطعم الفاكهة طازجة ولذيذة وشكل الكأس كان يفتح النفس بقطع الكيوي اللي مزيناه من بره. سكان القاهرة الجديدة محظوظين أنهم عندهم كافيه زي «إل كافيه دي روما»، ولباقي سكان كايرو بـ نقول لكم المكان بجد يستحق الرحلة الطويلة للتجمع الخامس. طبعًا الجودة والمذاق الرائع مش ببلاش لأننا دفعنا 92 جنيه للـ 3 مشروبات بس فعلًا كل حاجة تستاهل واستمتعنا بكل جنيه دفعناه! ومستنيين فروع ثانية تفتح في كل حتة في مصر.

...

مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح