مخبوزات وحلويات كافيهات in المهندسين Cairo, Egypt

كافيهات

ديفور: لما عشق الشوكولاتة يتحول لتحفة فنية مغرية في المهندسين
اصدرت في: 09/09/2014

أغلب الناس من كثر حبها للشوكولاتة ممكن تتمنى أنها تعيش في بيت من الشوكولاتة سواء في القاهرة أو براها، وكل يوم الصبح تلاقي أنواع كثير في البيت عملت نفسها أو حدتفنن في عملها، حاجة أشبه بفيلم Charlie's Chocolate Factory، أما إحنا فـ أخدنا كفايتنا تمامًا من كمية الشوكولاتة المبهرة اللي في محل "ديفور-Devour " عملت لنا حاجة كدة زي تعقيد ثم إذبهلال، ثم آه يا قلبي.. ولو أنتم من مرضى القولون العصبي ما تأكلوش الحلويات اللي بالشوكولاتة عنده، كلوا الأنواع الثانية حلوة وجميلة ومش ثقيلةوإلا إحنا مش مسؤلين عن اللي هـ يحصل. بدأنا بميني كيك كيت كات، تلك القطعة غير الصغيرة بالمرة، كانت عبارة عن كيك كيت كات كأنك بـ تأكل شوكولاتة كيت كات بس سايحة ومعها كيك بدل البسكويت، وما نخبيش عليكم كانت ثقيلة جدًا، يعني محبي الشوكولاتة الدسمة هـ يزقططوا، لكن الغلابة اللي عندهم قولون عصبي زينا، تكفيهم شوكة للتذوق. أما بقى خفة وجمال وحلاوة الطعم، اللي مع أول قضمة منها، تحس أنك رحت على جزيرة هادئة مليانة فانيليا وفراولة، وبـ تطير مع الكيك السبونج كده، هي ميني كيك ريد فيلفت Red Velvet، من بره أيسينج فانيليا لونه أبيض بياض الثلج (زي سنو وايت كده)، ومن جوه كيك أحمر جدًا -مش ريد فلفيتبقى- وبين طبقتين من الكيك موس فانيلا يحولك من كائن حزين لكائن مُتَمزج، باختلاط المكونات دي كلها في شوكة واحدة.. تشعر بالانسجام والتوازن.. جربوا بنفسكم وقولوا لنا، فيه هناك ميني كيك لكل أنواع الشوكولاتة اللي تحبوها، سنيكرز وتويكس ومارس ومالتيزر، وسعر الواحدة (22 جنيه) بس برغم حجمها الكبير. أما عن الكب كيك فإحنا فضلنا واقفين محتارين فترة طويلة جدًا، مش عارفين نختار إيه ولا إيه.. عارفين إحساس على بابا وهو في المغارة "ذهب.. ياقوت.. ألماظ.. أحمدك يا رب"، هو ده كان إحساسنا بالضبط وسط الأنواع المختلفة للكب كيك، ما بين فانيليا وشوكولاتة بأنواعها وكراميل وكوكيز.. فـ تبقى واقف محتار فعًلا،لحد ما ربنا هدانا لأول اختيار: كب كيك الكريمة بروليه Crème Brule، الحقيقة أن شكلها أغرانا جدًا جدًا بطبقة الكريمة البني اللي فوق، بس للأسف كانت مقلب، لأنك أول ما بـ تحط الشوكة تكتشف أنها ناشفة جدًا لأن اللي فوق ده مارينج ناشف، قلنا مش مشكلة نأكله مع الكيك بس للأسف ثاني الكيك ماكانش طازة، وكان بـ يتفرفت زيادة عن اللزوم، يعني تأكلها بالشوكة تفرفت، تعضها عضة مفترسة أنت شخصيًا هـ تتفرفت معاها، مش هي بس. وثاني تجربة لنا كانت كب كيك بالشوكولاتة والكراميل، وإحنا هنا بـ نقول لك احترس.. احترس الكب كيك فيه سم قاتل.. لا تأكل الكب كيك إلا وأنت مستعد لدماغ السكر والهيبرة، لأن تلك الشوكولاتة الثقيلة جدًا هـ تنزل معدتك وتعمل لك انقلاب داخلي،فلو عندك أي مرض يتأثر بالانقلاب ده، غض البصر بسرعة ولف وارجع ثاني، اختار أي حاجة ثانية خفيفة، كمان عجينة الكب كيك دي زي أغلب الكب كيك اللي شوفناهم وشاورنا لهم كده من بعيد،"مع السلامة يا حلوين.. معانا ربنا"، لأن شكلهم كان مغري جدًا، بس كمان هـ يموتونا من جمالهم يعني مش كده، علشان الشوكولاتة فيهم بـ تتكلم وتقول لك:"مش هـ تلاقي في حلاوتي مثيل.. لو تقدر.. جربني!"،والوصف ده بـ ينطبق على كب كيك فريرو روشيه، وتويكس وزبدة الفول السودانى ومالتيزر وكيتكات وإم أند إمز. حاجة كده على رأي يوسف بك وهبي:"أيتها السماء أمطري علينا ماء حتى نغتسل من آثام الشوكولاتة القاتلة.. ياللهول!" وأسعار الكب كيك بـ تتراوح من (12لحد 15 جنيه) ولو عاوز تزود مكونات ابقى اطلب براحتك طلبك الخاص. لأن الجميل في محل "ديفور" كمان، أنه بـ يعمل لك التورتة على حسب الشكل اللي أنت عاوزه، في أي مناسبة تحتاجها، وبـ يقدم أشكال مغرية جدًا الحقيقة، ولو تحب ممكن يبقى معاها كب كيك كمان، وكله بثمنه يا مون شيرىMon Chere. آخر حاجة بقى جربناها بس كان ينطبق عليها مثل "ماتنخدعش بالمظاهر" هي الـ Macaron اللي هو عبارة عن طبقتين من المارنج وجواهم صوص بالنكهة اللي تفضلها، كان فيه 3 ألوان وجربناهم كلهم (روز وأزرق وموف) أحلى واحدة كانت الزرقاء، بس الحقيقة أنه ما كانش طازة للأسف وكان كأنه مالوش طعم.. تحس أنك بـ تأكل سكر والسلام. وواحدة الـMacaron (5 جنيه). أخيرًا سيدي الفاضل، متأخر قوي أننا نقول لو أنت بـ تعمل ريجيم ما تقرأش المقال، بس ممكن نقول لك حوٌش رغبتك في التهام الشوكولاتة دلوقت لليوم الفري، أما الفرد الطبيعي العادي اللي بـ يحب الحاجات دي ومش بـ تفرق معاه، نصيحة لوجه الله ابقى ادخل على صفحتهم على الفيسبوك، واختار عاوز تأكل إيه علشان ما تحتارش زينا هناك.

...

وافل ميكر: مش كل محلات الحلو تأكل عندها حادق فى المهندسين
اصدرت في: 03/09/2014

في الفترة الأخيرة كثرت قوي محلات الوافل في القاهرة، وده ناتج عن حب الشعب المصري لها جدًا، وبـ تتنافس المحلات في الجودة والتجديد في الأنواع والأصناف اللي بـ تأكلها مع الوافل. جذبنا جدًا في محل "وافل ميكر-Waffle Maker" أن فيه وافل بس حادق بالبرجر أو السوسيس أو الفراخ اللي تختاره، فـ قررنا نكتشفه. أول ما وصلنا هناك لقينا المكان صغير جدًا، المكان جوه فيه ترابيزتين بس صغيرين، والترابيزات اللي بره المكان مش جاهزة، ولطبيعة الحياة في مصر أم الدنيا، مافيش 5 دقائق النور قطع.. وطبعًا انتظرنا لحد ما النور جه وقعدنا بره في القعدة الخارجية، وإن كان ده عطل الطلبات اللي إحنا طلبناها، إلا أنه ما يغفرش الأخطاء العظيمة اللي شوفناها في المحل. إحنا طلبنا وافل كلاسيك برجر (35 جنيه)، عبارة عن بطاطس وHome made برجر، أول ما شوفناه كان شكله حلو،الوافل كان مدور على حجم البرجر بالضبط مع البطاطس وصوص الباربكيو، لكن الحلو ما كملش، للأسف البطاطس كانت مليانة زيت وناشفة جدًا، والبرجر جودته كانت سيئة جدًا، اللحمة مش متبلة كويس، وكأنك بـ تأكل لحمة مفرومة طعمها مش حلو جوه الوافل. والطلب الثاني كان وافل فراخ بانيه بالجبنة (23 جنيه)، الوافل كان مقسوم نصفين والفراخ البانيه والجبنة والخسبداخله،الفراخ مقرمشة من بره وطرية من جوه، المشكلة الوحيدة أن قطع الفراخ كانت رفيعة قوي ومليانة زيت برضه، لو كانوا استخدموا شرائح أكثر سمكًا طمعها كان هـ يبقى أحلى. كمان حجم الساندويتشات ما يتناسبش خالص مع الأسعار لأنها صغيرة جدًا، والخدمة كانت تحت المستوى المطلوب لدرجة أن كل شوية كنا نقوم بنفسنا علشان نستعجل الأكل أو ندفع الحساب، لأن نادرًا لما تلاقي الجرسون خرج بره المكان، ده لو كان فيه جرسون أصلًا. الحاجة الوحيدة اللي كان طعمها حلو جدًا الوافل الحلو باعتبار أن ده أساس وموطن قوة المحل، اختارنا وافل كرنفال (35 جنيه) المكون من طبقتين وافل وأربع إضافات مع إضافة الصوص الأساسي. الشكل العام كان حلو بالذات مع صوص النوتيلا كصوص أساسي بين طبقتين الوافل ومن فوق على الثانية نوتيلا وعليها أناناس وكوكيز ومارشمليو وكيت كات، الحقيقة أنه كان حلو جدًا وسخن، بس تأكله لوحده هـ يشبعك تمامًا وما تجربش الوافل الحادق خالص. إحنا جربنا كمان الـShacks اللي بـ يقدمها، وبرغم أنها متنوعة بأنواع شوكولاتة بـ نحبها جدًا، إلا أننا خاب أملنا لأنها كانت مُقدمة تقريبًا سخنة، نسبة البرودة اللي فيها أقل من كوباية المياه الساقعة وده المفروض يبقى مثلج أو على الأقل ساقع جدًا. طلبنا سنيكرز شيك (18 جنيه)، وكان طعمه معقول جزء منه فيه قطع الشوكولاتة بـ تأكلها وأنت بـ تشرب العصير، وتويكس شيك (نفس السعر) اللي كان خفيف وطعمه لذيذ، وأوريو شيك (نفس السعر) وده اللي كان كارثة لأنهم تقريبًا ماحطوش معاه لبن فطعمه كان عامل كأنك بـ تأكل أوريو ذائب في مياه، وأحسن حاجة شربناها كانت توبليرون شيك (20 جنيه) لأنها كانت شوكولاتة بيضاء، فكانت أخف حاجة نشربها ونحس فيها بطعم، بس طبعًا علشان المشروبات ماكانتش ساقعة تقريبًا تذوقناها بس. برغم أن المحل فيه اختيارات متعددة، إلا أن سوء الإدارة لو ما اتظبتش هـ يؤدي لمشكلة كبيرة، المحل كان عليه إقبال من بعد الساعة 6 طبعًا للوافل الحلوة و Chocolate Fountain اللي بـ يقدمها برضه بنكهات كل الشوكولاتة المعروفة. نتمنى أنهم يحسنوا الأخطاء دي، ولو عاوزين تشوفوا المنيو بتاعهم كامل، ادخلوا على صفحتهم في الفيسبوك.

...

غراند كنافة على الفحم: بُعد جديد للكنافة في شارع سوريا
اصدرت في: 18/08/2014

من فترة قصيرة، وفي جولة من جولاتنا المعتادة في شارع سوريا، لاقينا واجهة محل كبيرة مكتوب عليها غراند كنافة على الفحم. وبما أننا ضعاف أمام أي حلويات شرقية -وأولها الكنافة- وأي حاجة مشوية، تأكدنا أن أكيد الكنافة المشوية هـ تكون بمثابة لقاء العمالقة. أولًا، لازم نعترف لك بحاجة: مش معنى أن مهمتنا هي البحث عن كل ما هو جديد وغريب في القاهرة، أننا نكون حافظين خريطتها. بالعكس، أوقات كثير بـ نعتمد على "حس القبطان" الداخلي... يعني بـ نوصل للمكان عادة بالمعلومات اللي عندنا وبالشبه، مش عيب فينا، بس شوارع القاهرة بـ تتغير تفاصيلها وعلاماتها المميزة في يوم وليلة... وده بالذات اللي حصل معنا. واجهة المحل الرمادية الكبيرة كان من فترة عليها شعار المطعم، واللى تقدر تميّزه حتى وأنت في عربيتك. فوجئنا وقت زيارتنا أن الشعار ده اختفى وما بقاش إلا واجهة مهملة. للوهلة الأولى اعتقدنا أن فرصتنا في تذوق الكنافة راحت، بس لما اقتربنا اكتشفنا أن المحل شغّال عادي جدًا. ويبقى اختفاء الشعار لغز غامض... المطعم أمامه ترابيزتين، وننصحك أنك تأخذ طلبك تيك أواي لأن شارع سوريا مشهور بكم الشحاذين اللي ممكن يشاركوك وجبتك حتى ولو بمجرد الفرجة. تجربتنا الأولى كانت مع أصغر حجم من الكنافة الخشنة بالجبنة (20 جنيه). الكنافة بـ تبقى كاملة التجهيز في طبق معدني ومحفوظة في الثلاجة، أول ما بـ تطلبها بـ يتم وضعها لمدة عشرين دقيقة على الشواية. بالرغم من أنه يعتبر وقت طويل بالنسبة لنا علشان نأكل طبق كنافة، إلا أن الانتظار كان في محله: كنافة ساخنة، مقرمشة وذهبية، مغلفة طبقة سميكة من الجبن الحلو... مافيش أحلى من كده؛ الجبن سميك وسايح ولا كأنك بـ تأكل بيتزا! وأجمل ما في حشوة الجبن أنها مش دهنية بشكل مبالغ فيه.. رائعة. طلبنا بعدها نابلسية إكسترا بالقشطة والفستق، الحجم الصغير (15 جنيه)، وهي مُقسمة لأربع طبقات، طبقتين من الكنافة المفرومة لدرجة أن قوامها كان أشبه بعجينة البسبوسة، بينهم طبقة قشطة وطبقة ثانية من عجينة الفستق. النابلسية ما كانتش بجودة الكنافة المشوية، إلا أننا ما نقدرش ننكر أننا استمتعنا بطعم الفستق والشربات اللي غلب عليه نكهة ماء الورد. طلبنا الأخير كان الهريسة بالكاجو واللوز (10 جنيه)، واللي للأسف الشديد كانت بلا طعم نهائيًا... غالبًا اعتمدوا على المكسرات لإضافة النكهة. ونجحوا في الموضوع ده، لأن الهريسة كانت مُشبعة بنكهة تحميص المكسرات اللي عليها. التجربة كانت ممتعة جدًا، وأكيد هـ تتكرر ثاني. ما فضلش غير أننا نقول أن القائمين على الخدمة تميزوا بسرعة الأداء وجديته. وبالرغم من نظافة المكان والخدمة، إلا أن شكل التغليف النهائي يفتقر الكثير من الجاذبية.

...

بول: الخباز الفرنسى المحبوب فى القاهرة يفتتح أحدث فروعه فى المهندسين
اصدرت في: 03/06/2013

الحكاية بدأت مع مشروع مخبز عائلى سنة 1889، وبعدها تحول بول لمخبز متكامل ومطعم، وفتح فروعه الفرنسية الأصيلة فى كل أنحاء القاهرة. ومن فترة قريبة، فتحوا – غالباً أجمل فروعهم – فى شارع جزيرة العرب، علشان يجذب المتسوقين الراقيين من شارع لبنان القريب منه. الواجهة الأبيض فى أسود بـ تضفي على المكان شكل أنيق، والشباك الكبير المعروض فيه المخبوزات بـ يغرى الزبائن مع مجموعة من الأنوار LED على المدخل وعلى باب بدرفتين. عجبنا فكرة أن "بول" قدر ينشر رقيه وأناقته لغاية الرصيف، مع أعمدة الإضاءة المعروفه عنهم، وأصص الزرع وتليفزيون على جانب من الأجناب. نكمل لداخل المكان مع الديكور العتيق بشكله الأنيق؛ ترابيزات وكراسى خشب لامعة، أرضية بألوان خفيفة مع الأسود والأبيض بـ تنقلك جو كافيهات باريس الجذابة. موظفين الانتظار لطاف ومهذبين ، ودائماً بـ يستجيبوا للسيدات الأول – لدرجة أنه جاب كرسى للشنطة – وفى نفس الوقت جاهزين أنهم يقدموا اقتراحاتهم من المنيو. بعد ما استقرينا فى مكاننا، قدموا لنا سلة مليانة قطع خبز بنى وأبيض طعمها طازجة ولذيذة، مع olive tapenade، عبارة عن طبق زبدة وزيت زيتون وخل بلسمي. المنيو عبارة عن مجموعة من أطباق أسمائها نفسها لذيذة، والمدهش فى الموضوع هى عناوينها باللغة الفرنسية. من بين أصناف الشوربة وفواتح الشهية، طلبنا شوربة l'oignon traditionelle – شوربة بصل يعنى – (25جنيه) علشان نجربها. الجميل في الشوربة، أنها بـ تتقدم وسط عيش بنى متقطع على شكل وعاء، بدل الطبق التقليدى. اكتشفنا للأسف أن أطراف العيش كانت محروقة شوية، وده أثر على طعم الشوربة اللذيذة. عدينا على كل الأصناف الفخمة من الستيك، والسمك، والسلطات، والساندويتشات والكريب الحادق، وقررنا نختار طبق poulet roti aux amandes بسعر 89 جنيه و Gratin de macaroni au poulet fsuv بسعر 65 جنيه. نتكلم عربى شوية؟ poulet كان وصفه صدور فراخ مشوية باللوز، محشية جبن كوممبير، أما gratin فطلع طبق مكرونة بالجبن والكارى، مع قطع بروكلى وفراخ. الأطباق شكلها كان مش كبير، مع أن الأسعار غالية، بس بعد شوية كنا بـ نعانى علشان نخلصهم. طعم اللوز كان قليل فى قطع الفراخ الطرية، بس يمكن السبب هو طعم الكوممبير القوى. الخضروات كانت مطبوخة كويس، والجزر كان مقرمش شوية هو والفاصوليا الخضراء، ومعاها كمية من البطاطس المهروسة. طبق الباستا كمان كان مستوي بطريقة ممتازة، مع طعم خفيف من المسطردة على صوص الكاري والجبن. الصنف الجانبى المكون من السلطة كان طازج، مقرمش ومرشوش عليها خل مع زيت زيتون. بالنسبة للمشروبات، عندك اختيارات متنوعة تختار منها؛ الشاي والقهوة (13جنيه- 15جنيه)، صودا (13جنيه)، مشروبات مثلجة (16جنيه- 22جنيه)، عصائر فريش (19جنيه- 25جنيه) وكوكتيلات بول المميزة (24جنيه- 29جنيه). طلبنا واحد بنانا بيريز banana berries- خليط من عصير الفراولة، والتوت، والعنب الأحمر، موز والتفاح طازج- وأبل كوولر (24جنيه)، عبارة عن عصير تفاح، فراولة وبرتقال. الاثنين كان طعمهم لذيذ وطازج ومرضي جداً، ويمكن البنانا بيريز أحلى شوية من ناحية النكهة. بول كمان معروف أنه أجمد مكان ترتاح فيه مع كوب من الشاى وقطعة الكيك. وراء الكاونتر اللامع معروض تشكيلة متنوعة من الكيكات اللذيذة، والمعجنات، وحلويات الماكارون وحلويات ثانية، وكمان موجودين فى المنيو. بعيداً عن الحلويات اللى فيها شوكولاتة، طلبنا واحدة ليمون تارت بطعمها اللاذع والمسكر فى نفس الوقت، واسمها فى المنيو 'tartelette citron' بسعر 24 جنيه، واحنا أكيد لازم نوصي بيها بدون تردد. لو كنت عايز أكلة أو حلويات راقية، مترفة ومضمونة، بـ ننصحك تروح فوراً على بول. وجبة سعيدة!

...

زيي لاونج: كافيه لذيذ في المهندسين
اصدرت في: 22/04/2013

في طريقنا بعد الشغل زهقانين وبـ ندور على حاجة جديدة نعملها قولنا نسيب العربية ونجرب نتمشى شوية علشان نهرب من المرور وربنا يستر وما يطلعش علينا بلطجية، وإحنا بـ نتمشى في شارع عبد الحميد لطفي خلف مسجد مصطفى محمود لمحنا كافية اسمه "زيي لاونج - Zee Lounge" باليافطة المميزة اللي أنوارها بنفسجي وحرف Z باللون الأحمر، قولنا نجرب ونشوف إذا كان الشكل الخارجي الجامد ده بنفس المستوى من الداخل ولا كلام في الفانكوش. طلعنا سلم صغير وشوفنا الكافيه من جوه اللي عبارة عن صالة واسعة قوي وترابيزات ولاونجات على اليمين والشمال وفي المنتصف المطبخ عبارة عن بار كبير عليه ديكور مطبخ لطيف، أما الديكور العام فهو بسيط ومهدئ للأعصاب مع مزيكا وأغاني شغالة ما تقدروش تميزوها إلا إذا كنتم مركزين قوي، كنا فاكرين أن فيه مكان لغير المدخنين لكن طلع أن كله واحد، بالرغم من وجود مدخنين إلا أن الدخان ما كانش مضايقنا قوي وده بسبب وجود مسافة كافيه بين كل ترابيزة والثانية علشان تضمن لكم الراحة والخصوصية. بصينا في المنيو اللي كانت معقولة وشاملة الساندويتشات اللي بـ تترواح أسعارها بين (34: 38 جنيه) وأطباق السلاطة والمقبلات والبيتزا والمأكولات البحرية أسعارها بـ تبدأ من أول 20 جنيه، بالإضافة للمشروبات اللي بـ تضم الكوكتيلات والمشروبات الساخنة والباردة بس ما لاقيناش قسم الشيشة في المنيو وسألنا الجرسون اللي كان ودود قوي على الشيش الموجودة عندهم، اختارنا من المشروبات سموزي أناناس (22 جنيه) وكيك شوكوليت لافا (32 جنيه) مع شيشة كريز (20 جنيه) ولاي بلاستيك (5 جنيه). الطلبات تقدروا تقولوا تأخرت شوية صغيرين، الشيشة كانت أول طلب يصل وكانت مضبوطة والفحم مضبوط واللي بـ يغير الفحم مركز قوي وبـ يغيره بانتظام، وصل السموزي اللي كان فريش ومثلج وطعمه كان كويس أما الشوكليت لافا كيك انتظرناها حوالي ساعة ولما سألنا عن سبب التأخير الجرسون قال لنا أنها بـ تتعمل! ولما وصلت بألف سلامة عرفنا ليه انتظرناها ساعة، أقل ما يُقال عن الكيك أنها أسطورية، عبارة عن كيك شوكولاتة على شكل جبل بركان وفي القلب شوكولاتة صافية زي اللافا وعليهم شوية قليلين من صوص الكراميل ورشة بودرة كاكاو مع بولة أيس كريم فانيليا، بالفعل كنا بـ نأكل صوابعنا وراها بالرغم أنها كانت ساخنة والأيس كريم ما كانش مميز قوي زي أي أيس كريم فانيليا. خلصنا الشوكوليت لافا والبركان بدأ في الشغل وعلشان نهدي شوية طلبنا كوكتيل (22 جنيه) وده عبارة عن عصير جوافة وفراولة ومانجو على بعض لكن مش مخلوطين، قعدنا كثير في زيي لاونج وكنا مبسوطين والكلام أخذنا زي ما بـ نقول. كافيه ومطعم زيي لاونج فعلًا مكان يستحق الزيارة وبـ نرشحه لكم لو عاوزين تقضوا وقت لطيف وتستمتعوا بشوكولاتة لذيذة، الحاجة الوحيدة أن وقت زيارتنا فيه ساندويتشات كثيرة غير متوفرة، لو أنتم مش مدخنين يُفضل تكونوا بالقرب من أماكن التهوية لأن مع زيادة المدخنين بـ يتحول المكان لسحابة دخان وخصوصًا أن الشفاطات وقت ما كنا هناك ما كانتش شغالة.

...

تريو: كافيه ومطعم هاديء بمستوى عادي فى المهندسين
اصدرت في: 13/02/2013

بعد أول يمين من مطعم "لا بيترا – La Pietra" هـ تلاقى مطعم وكافيه "تريو – Trio" بلوجو أصفر كبير واضح، لكن لأن المكان موجود بالداخل شوية فى الشارع فمش سهل أنك تلقطه بعينك وأنت سايق أو ماشي فى شارع الحجاز بالمهندسين.أول ما وصلنا ودخلنا من المدخل اللى عبارة عن طوب بـ يتخلله زرع أخضر استقبلنا واحد سنه كبير ومش لابس اليونيفورم اللى لابسه باقى الجرسونات لدرجة أننا افتكرناه فى البداية من رواد المكان، المكان عبارة عن دورين، الدور اللى فوق مثبت بأعمدة خرسانية ومساحته أصغر شوية من اللى تحت وبالتالى شكله كأنه بلكونة بـ تبص على المنظر من فوق، لما سألناهم على إمكانية الجلوس فى الدور العلوي عرفنا أنه مش بـ يفتح قبل الساعة 6 مساءً لأن الناس ما بـ تجيش قبل الوقت ده!المهم اختارنا مكان فى الدور اللى تحت، أحلى حاجة أن سقف المكان معمول مشمع شفاف وبالتالى ضوء الشمس بـ يتخلله بس للأسف محتاج يتنظف لأن فيه حاجات مخليه الرؤية له مش مريحة وده بسبب أن باقى المبنى عمارة، الكنب لونه بيج والمكان عامة بـ يسوده الديكور الخشبي والسقف بتاعه عالى، المنيو مش قيمة خالص، عبارة عن ورق أبيض مطبوع وفقير معمول بسلك زي الكراسات أم سلك بتاعة المدرسة، وداخلها منيو ثانية بتاعة الكريب والوافل معمول عليها لوجو "تريو" ومطعم "داتشيز - Dutchess" اللى يبدو أنهم بـ يستعينوا به فى الحلويات، إلى جانب أن المكان بـ يقدم شيشة.المنيو عادية فى أقسامها وشكلها قفلنا شوية، اختارنا طلبات تقليدية زي شوربة طماطم بالكريمة (16 جنيه)، وجريلد فيليه بصوص الليمون (68 جنيه) يتعمل Well done، الجرسون اللى كان معانا كان لطيف، بس كان فيه مشكلة أننا كنا قاعدين فى الركن وبالتالى علشان تلفت انتباه أحد وتنادي عليه كانت بـ تستغرق وقت، الشوربة جاءت لنا الأول سخنة والكمية كبيرة طعمها لطيف لكنها كانت عادية جدًا مافيهاش أى مذاق مخصوص ينسب للمكان، كانت محتاجة بهارات أو نكهة مخصوصة، بعد شوية جاء لنا الفيليه المشوي بصوص الليمون ومعاه بطاطس بيوريه عليها صوص Gravy وخضار سوتيه (لك اختيارين جانبيين)، الفيليه كان تسويته مضبوطة بصوص الليمون والسوتيه كان كميته كبيرة وطعمه حلو، البيوريه كمان كان لطيف وما كانش ينفع من غير صوص الجريفى.فى قائمة المشروبات اللى كانت اختياراتها مافيهاش أى اختراعات غير فى أنواع السموزي طلبنا سموزي ليمون بالنعناع (Lemon Mint Smoothie) (21 جنيه) كانت منعشة جدًا بالثلج المجروش ومزازة الليمون اللى ما ضايقتناش، مشروب مضبوط جدًا.نيجي بقى لقائمة الوافل والكريب من "داتشيز" اللى كانت ملخبطانا شوية وما فهمناش إزاي نضيف مكونات الوافل من صوص أو فاكهة أو قطع شوكولاتة، لحد ما استعاننا بالجرسون وعرفنا أنك بـ تختار الأول عاوز كريب ولا وافل (سهلة دي) وبعدين تختار نوع الصوص اللى عاوزه عليها وبعدين أى إضافة زيادة مع الصوص هـ يضاف 7 جنيه، المنيو كان محتاج تنسيق أكثر من كده لأن كلمة "اضف 7 جنيه" دي كانت فى آخر الصفحة مش واضحة. المهم أخذنا وافل بصوص الـ Kinder (25 جنيه) مع إضافة بولة آيس كريم فانيليا (7 جنيه)، الوافل كانت أحسن خاتمة لزيارتنا، العجينة مضبوطة وصوص الكيندر طلع حلو مع الآيس كريم اللى دائمًا بـ يلعب دور تخفيف دسم الصوص اللى بـ نضيفه.الطلب بتاعك بـ يضاف عليه 12% خدمة و10% ضريبة، وممكن تزوروا صفحتهم على الفيسبوك علشان تتعرفوا أكثر على المكان واللى بـ يقدمه، بعد ما عدت الساعة 7 (مش 6 مساءً) قدرنا نطلع فوق نتفرج على الدور العلوي قبل ما نمشي واللى بـ يتسم بهدوء أكبر من اللى تحت وكمان دورات المياه فيها. المكان لطيف لكن محتاج اعتناء بالتفاصيل أكثر علشان يقدر ينافس، والمنافسة فى عالم المطاعم والكافيهات شرسة.. العبرة للى يقدر عليها.

...

شوجر راش: وافل وكريب وبان كيكس فى المهندسين
اصدرت في: 06/01/2013

إحنا من عشاق الوافل.. ومن الأماكن اللي كنا بـ نتردد عليها "تريتس" اللى فى الزمالك علشان نستمتع بالحلوى اللذيذة دي واللى ما يقدرش ناس كثير يقدموها بشكل جيد لكن للأسف اكتشفنا أنه قفل وهـ يفتح مكانه محل ثاني قريب، ده غير "وافل هاوس" اللى فى مصر الجديدة بعيد عننا، تضايقنا جدًا وأصابنا الإحباط لكن الشعور ده ما قعدش كثير لأننا عملنا شوية أبحاث على الإنترنت على الأماكن فى نطاق المهندسين أو الزمالك ولقينا مكان متخصص فى الكريب والبان كيكس والوافل اسمه "شوجر راش – Sugar Rush" قلنا نجربه. فى ميدان عمان الهادئ جدًا هـ تلاقيه واضح باللوجو الأزرق المضئ، عمره من 2011، فيه مكانين للجلوس بالخارج هـ تلاقى ترابيزات وكراسي فضية، وفيه فى الداخل، المكان جوه أكثر من رائع رغم أنه مش واسع قوي لكن الجرافيتي اللى مرسوم على الحوائط معمول بحرفية جامدة، بجد اللى عمله فنان، على شكل طيور لعبة Angry Birds هـ تشدك أنك تتصور معاها، المكان فيه كمان إنترنت Wi-Fi وشاشات كانت مشغلة MTV وقت زيارتنا. الولد اللى كان بـ يأخذ طلباتنا لطيف جدًا وذوق، حتى أن فيه حاجة ضاعت مننا قعد يساعدنا علشان نلاقيها، المنيو مقسمة لكذا قسم: الإفطار والبان كيك والوافل والكريب (حادق وحلو) والفوندو (بالجبنة وبالشوكولاتة)، سعر الوافل سادة بـ 15 جنيه، ولو هـ تحط صوص بـ 5 جنيه والفواكة بـ 5 جنيه، أما الآيس كريم (Haagen Dazs) بـ 18 جنيه. فيه كمان الـ i-panckaes ودي عبارة عن بان كيك إما بصوص الشوكولاتة البيضاء أو النوتيلا، الولد وعدنا أن الطلب هـ يأخذ ربع ساعة لكنه للأسف تأخر كثير قوي عن كده لأن البان كيكس بـ تأخذ وقت، لكن لما جاءت لنا كان شكلها شهي جدًا وفتحت نفسنا، الوافل عليها فراولة وتفاح وموز (الفواكة المتاحة وقتها) وآيس كريم فيه قطع فراولة وصوص الشوكولاتة، العجين ممتاز والفاكهة فريش استمتعنا به، البان كيكس كانت طرية لكن اختيارنا للشوكولاتة البيضاء ما كانش كويس ونفضل أنها تكون غامقة أفضل. من قسم الكريب قلنا نكسر كل السكريات دي ونجرب الحادق، فيه نوع اسمه بيتزا فوليا Pizza Folia وهى عبارة عن زيتون وحبوب ذرة وفلفل أخضر وصوص البيتزا والموتزاريلا مع التركي أو السلامي، للأسف الكريب كان محبط لأن محتوياته كانت غير متماسكة مع بعضها والكريب نفسه رفيع قوي فما قدرش يستحمل كل الحشو اللى داخله، وما حسيناش بأي طعم للجبنة فيها، كان طعمها أقل من العادي. "شوجر راش" عندهم خدمة توصيل طلبات، وكمان عندهم مشروبات باردة وساخنة ممكن تختار منها، الحقيقة المكان لطيف والخدمة كمان، لكن الأسعار مقارنة بأماكن ثانية أكثر شوية.. عزاءنا الوحيد أنها نيمت عصافير بطننا اللى بـ تصرخ محتاجة وافل، وممكن يكون Option لما نحب نأكله ثاني.. لكن ده ما يمنعش أننا هـ نفضل ندور على أماكن ثانية.

...

رويال بيكري: محل مخبوزات وحلويات بدون روح فى المهندسين
اصدرت في: 13/05/2012

من وإحنا صغيرين بـ نعدي من جانبه وإحنا فى شارع محيي الدين أبو العز وكان بـ يشدنا بشكله الخارجي الخشبي والتاندة الملونة وكمان باسمه الملكى «رويال بيكري – Royal Bakery»، حسينا أن المكان من الداخل مش طبيعي، لكن للأسف أحلام اليقظة مش لازم تتحول لحقيقة، وعنينا اللى كانت مش بـ تتشال من على المحل بقت باصة أمامها وهى ماشية فى الشارع. أول ما دخلنا وكلنا حماس للتجربة، صُدمنا من ديكور المكان، الديكور عادي جدًا، ثلاجات عرض فى كل مكان، زحمة وفيه مكان صغير قوي للناس تقعد تأكل هناك، ما كانش فيه حد قاعد وقت زيارتنا لكن الموضوع ما يفتحش النفس، زاد عليه أن الراجل اللى استقبلنا وسألناه على المخبوزات كان ملامحه جامدة ومش نفسه طويل معانا. المكان بـ يقدم تشكيلة كبيرة من البيتي فور (رويال بـ 75 جنيه واللوكس بـ 55 جنيه) والبسكويت والجاتوهات (من 7 إلى 14 جنيه للقطعة) والكيك (28 جنيه) والشوكولاتة (الكيلو من 75 لحد 120 جنيه والمستورد بـ 170 جنيه) والعيش بأنواع وأحجام مختلفة وكمان المشروبات الساخنة والباردة ونواشف زي الباتون سالية والساليزون والمنين. المخبوزات كانت عبارة عن كرواسون سادة (5 جنيه)، وبالجبنة الرومي (5.5 جنيه)، وبالسوسيس (6 جنيه)، ومافيش الأنواع الثانية اللى بعد كده اكتشفنا أنها فى المنيو، شكل المخبوزات ما كانش مغري قوي خاصة أننا عاوزين نفطر، وباقى الاختيارات اللى أمامنا كلها مسكرة وتحلية. بعد ما اختارنا نأخذ إيه مضطرين، أخذنا نصف كيلو بسكويت مشكل كان فيه بالكوكيز وقطع الكورن فليكس والمكسرات وغيرها (الكيلو بـ 55 جنيه) الخبيز عامة كويس بس العادي مافيش حاجة علقت معانا فيه ماعدا الكوكيز اللى بالشوكولاتة، كانت طرية والشوكولاتة كانت حلوة جدًا، وسألنا على المنيو لقينا المفاجأة أنهم بـ يعملوا ساندويتشات! على الرغم من أنهم بـ يفتحوا الساعة 7 الصبح ودى حاجة هائلة لكن الساندويتشات ما كانتش متاحة على أرفف العرض والراجل جابها لنا من السبت من وراء ثلاجة العرض. طبعًا على الفور غيرنا رأينا واختيارنا وأخذنا من عندهم ساندويتش رويال بالتركي المدخن والروست بيف (13 جنيه للواحد) وكمان عندهم اختراع حلو أوي وهو باكيت الميني ساندويتش (12 جنيه) فيه ساندويتشات كيزر صغيرة كل واحد فيه حشو مختلف: تونة، روست بيف، تركي مدخن، جبنة شيدر ونوعين جبنة ثانيين مع جزر وفلفل أخضر وزيتون. الساندويتشات بصفة عامة شكلها جذاب وحلو أكثر من المخبوزات وطعمها لما ذقناه كان حلو جدًا مافيش كلام عليه. كلهم فى نوع عيش فرنساوي. زيارتنا اتختمت بلخبطة فى الحساب، بعد ما دفعنا الفلوس وكنا هـ نمشي طلع فيه لخبطة ودفعنا فلوس زيادة، هى حاجة ممكن تحصل فى أى مكان بس الاستقبال مع جو المكان قفلنا منه واتضايقنا. نعتقد دي آخر مرة ممكن نزور المكان علشان نجيب أفطار لنا، "رويال بيكري" محتاج تضبيط فى حاجات كثير علشان ينافس أماكن كثيرة بـ تقدم نفس الخدمة وأفضل كمان.

...

جوتيه: تورتات حلوة بس مالهاش طعم فى المهندسين
اصدرت في: 22/04/2012

آخر مرة زرنا فيها «جوتيه - Gouthé» علشان نتعشى فى المطعم ما قدرناش ما نلاحظش الرفوف اللى مليانة كوكيز، ومخبوزات وفطائر محلاة، ولأننا فى كايرو 360 بـ نحب السكريات قررنا نزور المكان المرة دي علشان نجرب الحلويات. للأسف المرة دي تشكيلة المخبوزات والكيك كانت مش كبيرة قوي، اتضايقنا شوية بس ده ما منعناش أننا نطلب تشكيلة من المتاح وقتها، كان فيه فطيرة شكلها حلو قوي اسمها Feuttine pie فكرنا نطلبها ولقينا كمان Praline walnut pie وتشيز كيك، لكن انطلاقًا من مبدأ "أفضل شيء ما قل ودل" اكتفينا وطلبنا قطعة جاتوه صغيرة، فى حالة لو عاوز تشتري تورتة الأسعار هناك بـ تتراوح بين 135 لحد 150 جنيه وتكفى لحد 8 أشخاص، وأحلى حاجة عندهم أن كل قطع الجاتوه متوفر منها مينى جاتوه بنفس الشكل، وسعر الكيلو منه بـ 110 جنيه. من ناحية الشكل كل التورتات حلوة وجذابة، مثلاً تارت الليمون (9 جنيه للقطعة) التورتة الكاملة منه هـ تلاقى فيها كرات من الليمون محطوطين على كمية من البودينج، لكن للأسف الرؤية مش زي التذوق، الشكل حلو لكن لما ذقناها كان الوضع مختلف، كرات الليمون دي أى نعم كان شكلها زيه لكن كمان طعمها كان ليمون جدًا، وقعنا على روحنا من الضحك، هى إزاى كده؟ التارت كان حمضى ولاذع والبودينج ما كانش مسكر قوي علشان يعوض طعم الليمون. تورتة الفراولة بالأناناس (13 جنيه القطعة) برضه كان شكلها حلو قوي لكن طعمها فيه مشكلة، توقعنا لأنها بالفواكة تكون خفيفة لكن برضه الموس اللى فيه كان طعمه لذيذ. جربنا كمان إكلير الشوكولاتة (9 جنيه للقطعة)، جاء لنا محشي موس شوكولاتة أى نعم كان طعمه بايت شوية لكن الحشو الغنى عوضنا عن ده. آخر قطعة ذقناها وخيبت أملنا كانت قطعة بالشوكولاتة البيضاء والتوت (13 جنيه القطعة)، نسبة الشوكولاتة البيضاء كانت مش متوازنة مع التوت كانت محتاجة توت أكثر وشوكولاتة أقل. على الرغم من أن الحلويات فى "جوتيه" شكلها جميل لكن النكهات كانت مخيبة للأمل وكان اقتراح أننا نجرب الحوادق هناك أكيد كان هـ تكون أفضل.

...

وافل بييز: وافل حلوة وسريعة في المهندسين
اصدرت في: 01/03/2012

الاختراع ده هـ يجننا.. بجد، وطبعًا هـ يفسدنا في نفس الوقت، كل ما بـ نشوف أي مكان بـ يقدم حلوى الوافلز ما بـ نترددش لحظة أننا ندخله ونجرب الأصناف الموجودة عنده، الموضوع عندنا وصل إلى حد الإدمان لدرجة أنه تفوق على حلويات ثانية كانت مفضلة عندنا بقالها زمن. وده بالفعل اللي حصل بعد زيارتنا لمطعم ولاونج «أويا - Oya» اللي خلف مسجد مصطفى محمود، وإحنا ماشيين في أمان الله راجعين بيتنا ظهرت فجأة إضاءة صفراء قوية بحروف كبيرة عليها اسم «وافل بييز – Waffle Bees»، نطينا من الفرحة وبعدها نطينا داخل المحل. أول ما بـ تدخل زي طبيعة أي محل وافل: ما بـ يكونش مساحته كبيرة، فيه كام ترابيزة عاليين وكام كرسي، بار كبير عليه المحتويات وجهاز صناعة العجينة، والكاشير وثلاجة العصائر والمياه، طبعًا الأماكن متشابهة لكن الفاصل هنا جودة صناعة الوافل اللي بـ تفرق مكان عن الثاني. المنيو صغيرة فيها 6 أصناف: "وافل بيزك" (15 جنيه) ودي بـ تضيف عليها الإضافات المعروفة لأي وافل زي الشوكولاتة أو الكراميل أو القرفة أو الكريمة المخفوقة .. إلخ، و"وافل توبينج" (20 جنيه) ودي ممكن تضيف عليها فاكهة أو قطع شوكولاتة صغيرة أو مارشميلو أو بوريو أو سنيكرز .. إلخ، و"وافل بالآيس كريم" (20 جنيه) وبـ تختار صنف من 5 أو 6 من آيس كريم موفنبيك الموجود في الثلاجة عندهم، و"وافل بالآيس كريم والتوبينج" (25 جنيه)، وأخيرًا بولة أيس كريم موفنبيك فقط (10 جنيه)، والعصائر والمشروبات اللي بـ يتراوح سعرها من 5 إلى 15 جنيه وزجاجة المياه بـ 3 جنيه. الخدمة سريعة وجيدة، ممكن تقول للولد اللي بـ يحضر الوافل أنت محتاج كام واحدة علشان يجهزهم عقبال ما تختار أنت حابب تأخذ إيه، العجين طعمه حلو ومش ملسوع والإضافات كلها فريش خاصة الفاكهة، وممكن تحدد كمية الصوص كمان له للي مش بـ يحبه كثير، كله بـ يتحضر أمامك وبـ تقعد على الترابيزات العالية وفيه مناديل لزوم إنقاذ اللغوصة اللي بـ تحصل في أى محل وافل، الآيس كريم رائع وكله بـ يحطه لك في الوافل وبـ يقفلها زي الساندويتش، وفي الآخر بعد ما بـ تخلص بـ تدفع الحساب، ونصيحتنا لك اختار صوص الدارك تشوكولت بدل النوتيلا لأنه بـ يكون أخف. "وافل بييز" من الاختيارات المضمونة لما نفسك تهفك على الحلوى الجهنمية دي، الأسعار معقولة والجودة تمام .. وأهم حاجة الخدمة سريعة. لو عاوز تعرف عنهم أكثر زور صفحتهم على الفيسبوك.

...

شاهد المزيد
مواضيع خاصة

النهارده في القاهرة: سهرة ميكس مع كل ألوان الفن

رغم البرد اللي مخلي كل الناس عايزة تفضل متدفية في السرير، بس برضه أجندتنا مابتخلاش من الحفلات اللي هتخليك تصحصح وتفرفش، علشان تخرج تقضي ليلة سعيدة بعد الشغل. تعالوا