عصائر كافيهات in المهندسين Cairo, Egypt

كافيهات

قهوة المعلم: مكان ظريف في المهندسين لكن للأسف الحلو ما يكملش
اصدرت في: 06/12/2015

أماكن كثير بـ نسمع عنها وبعد كده بـ نقرر نروحها، لكن وضعنا كان مختلف مع "قهوة المعلم" في المهندسين اللي اكتشفناه بالصدفة وإحنا بـ نتمشى في المهندسين، ولفت انتباهنا شكل الحروف العربية فيه، علشان نكتشف بعد كده أنها بتاعة أحمد يونس مذيع البرنامج المشهور "ع القهوة". ديكور المكان حلو جدًا ما بين الحوائط اللي مرسوم عليها حروف عربية، والمنيو اللي أول صفحتين منه خشب عليها نفس التصميم، والألوان المبهجة، والمكان مقسم لجزء خارجي صغير حوالي أربع ترابيزات ومكان داخلي كبير، المنيو كان متنوع جدًا ما بين مقبلات ووجبات عادية وسلاطات ووجبات خاصة بالأطفال كمان. أول ما دخلنا المكان لاحظنا وجود الشيشة في المكان من جوه، وده خلانا نغير مكاننا أكثر من مرة، خاصة أنهم مش محددين أماكن لغير المدخنين، ودي حاجة ضايقتنا جدًا، إحنا كنا حرفيًا مردومين دخان، كل شوية كده تيجي سحابة من الشيشة المجاورة تخنقنا وتمشي، خاصة أن الأماكن اللي بره كانت مليانة، وطبعًا فيه تدخين برضه. المهم حاولنا نتكيف وطلبنا في البداية عصير صن شاين رمان (21 جنيه) وعصير بلو ماونتن بنفس السعر، وبيتزا بأنواع جبنة مختلفة بـ 43 جنيه، وتشيكن كوردون بلو مع مكرونة بـ 59 جنيه، وفي الآخر طلبنا مولتن كيك بالأيس كريم (26 جنيه). قابلتنا مشكلة عظيمة هناك هو أن عدد الجرسونات قليل، وأن فيه منهم حد بـ تقول له على حاجة، يجيبها بعد فترة طويلة أو احتمال ما يجيبهاش خالص، ولما تطلب من جرسون ثاني غيره، يجيبها لك ويعاملك بدبلوماسية، أو زي ما الشعب المصري بـ يقول بـ ياكل الزبون بالذوق، الأكل جاء لنا بعد حوالي ساعة إلا ربع، ولما سألنا عن العصائر قبلها قالوا لنا أنهم هـ يقدموها مع الأكل بالرغم من أننا ما طلبناش ده، ولما الأكل جاء وسألنا عنها، جاءت لنا بعد حوالي 10 دقائق من تقديم الأكل، وده طبعًا مش شغل محترف إطلاقًا. البيتزا الحقيقة كانت أجمل حاجة أكلناها، كانت سخنة وطعمها مميز وغنية بالمكونات والبهارات، لكن التشيكن كوردون بلو كان كويس بس مش أحسن واحد ذوقناه، كذلك المكرونة اللي جنبه، العصائر كانت كويسة جدًا، وأخيرًا المولتن كيك كان فريش وطعمه حلو جدًا، بغض النظر أننا قعدنا نصف ساعة لحد ما عرفنا نوصل للمنيو من ثاني، وأخذوا وقت زيادة في أنهم يجيبوا لنا الشيك، وكان فيه غلط، صلحوه لما طلبنا منهم ده. بشكل عام "قهوة المعلم" برغم أنه مكان تابع لشخصية معروفة إلا أنه محتاج اهتمام أكثر لمستوى الخدمة فيه، هو مكان ظريف لمجموعة صحاب مدخنين، مش هـ يركزوا في الأخطاء المهنية اللي ضايقتنا، زي بطء الخدمة وعدم احتراف الأكلات، ده لو هـ نعتبره كافيه مش مطعم، قعدة حلوة وعصائر وأكل خفيف، نقدر نقول عليه مكان كويس بس للمدخنين فقط، لأن غير المدخنين هـ يتخنقوا.

...

أرجيله: كافيه متخفي في أدغال المهندسين
اصدرت في: 24/12/2014

تكلمنا كثير عن سيل كافيهات الشيشة اللي فتحت فجأة وانتشرت في شوارع المهندسين الكثيرة؛ لاحظنا أن معظم الكافيهات هناك بـ تعتمد على جو كراسي القهوة الملونة وتيمة الشعبي المودرن اللي هـ تلاقيها في تقريبًا كل الأماكن اللي فاتحة في الزمالك. بعكس الكافيهات دي صادفنا أرجيله - Arguileh في المهندسين. ديكور أرجيله بالنسبة للأماكن الثانية في المنطقة زي –كراكيب مثلًا- يعتبر متواضع جدًا: مبدئيًا، الشارع اللي هو فيه أصلًا مظلم بالليل، وخصوصًا أن فيه ميدان، أو بمعنى أدق جنينة لو دخلتها ممكن ما تخرجش منها سليم لأنك ببساطة مش هـ تشوف حاجة! وبالتالي في الجو المرعب ده الكافيه نفسه معالمه الخارجية مطموسة بدرجات البني المختلفة المستخدمة في الواجهة الخارجية وفرش الأوت دوور. ده غير أن للوهلة الأولى ممكن ما تعرفش تقرأ اسم المكان لأن لا الواجهة الرئيسية، ولا حروف اسم المكان المعدنية مسلط عليها إضاءة –كل اللي بـ يدل على المكان بشكل واضح هي لافتة جانبية صغيرة مضيئة مكتوب عليها الاسم. بقية الواجهة عبارة عن زجاج خارج منها إضاءة الجزء الداخلي، واللي فرشه ما يختلفش عن فرش الأوت دوور: كراسي من الخشب الداكن بشلتة على القاعدة وترابيزات خشبية من نفس اللون. أما الحوائط فلونها بيج فاتح؛ وفي محاولة يائسة من أصحاب المكان أنهم يواكبوا عصر الديكورات المبتكرة، أضافوا على الحائط اللي جانب الباب سبورة مكتوب عليها بالطباشير الملون مشروبات المكان وما شابه. قعدنا في الأوت دوور اللي ترابيزاته ممتدة بطول الرصيف؛ قائمة الأكل غير قائمة المشروبات، والاثنين مافيهمش اختراعات. وبما أن المكان اسمه أرجيله طلبنا شيشة بالكنتالوب، والبطيخ والدرّاق -الخوخ الفاخر (22 جنيه للواحدة). الكنتالوب طعمها كان سيء واضطرينا أننا نغيرها لأن نسبة الجلسرين في الحجر كانت عالية. أما البطيخ والدرَاق كانوا ممتازين، بالذات الثانية اللي كانت نكهتنها مميزة. من حيث صيانة الشيشة وتغيير الولعة، الموضوع كان مش لطيف لأننا كنا كل فترة بـ ننادي جرسون الشيشة علشان يغيَر الولعة بعكس أماكن ثانية كثيرة المتابعة بـ تبقى دورية من غير ما نطلبها. من قائمة الطعام طلبنا بيتزا أرجيله (55 جنيه) المكونة من سجق، ببيروني، طماطم وزيتون. طعمها كان أحسن مما توقعنا، الجبنة كثيرة وكذلك المكونات ولكن كان ناقصها أي نوع من الأعشاب أو التتبيل بالإضافة إلى أن سعرها غير مناسب لحجمها الصغير. من المشروبات جربنا المعتاد لأننا لاحظنا أن مافيش أي مشروب مختلف ما جربناهوش في مكان ثاني؛ طلبنا كابتشينو (16 جنيه)، لاتيه (17 جنيه)، عصير ليمون (18 جنيه) وسموزي فراولة (25 جنيه). الكابتشينو كشكل خارجي ممتاز: الرغوة كثيفة، والكوب حجمه كافي ومناسب لأصحاب المزاج، ولكن عيبه أن القهوة مرّة لدرجة أننا استخدمنا كمية سكر أكثر من المعتاد لموازنة الطعم. اللاتيه كان مضبوط، وبما أن كمية اللبن أزيد، ما حسيناش بمرارة القهوة زي في الكابتشينو. عصير الليمون كان بارد وكميته وفيرة، ولكن ما قدرناش نعتبره مضبوط لأنه كان لاذع نوعًا ما. سموزي الفراولة جاء لنا بعد عذاب، كنا طلبنا الأول من قائمة الكوكتيلات بينا كولادا، اختفى الجرسون حوالي نصف ساعة، بعدها اكتشف أن مافيش جوز هند وبالتالي نطلب حاجة ثانية. السموزي كان طعمه رائع، العصير كان فريش وطعمه مضبوط، إلا أن كمية الثلج المجروش كانت قليلة جدًا لدرجة أن بعد ثواني كان السموزي أغلبيته مياه. كميته كانت كبيرة لدرجة أننا كلنا اشتركنا فيه. الخدمة نوعًا ما بطيئة، بالرغم من الكافيه ما كانش زحمة؛ التأخير في أنهم يقولوا لنا أن مافيش كوكتيل البينا كولادا كان مزعج بالنسبة لنا. الحاجة الوحيدة اللي ممكن تبقى مفيدة بالنسبة لناس كثير بـ تحب تذاكر خارج البيت أن أرجيله في وسط الأسبوع بـ يبقى فاضي جدًا بالذات في الجزء الداخلي للمكان.

...

مزار لاونج: كافيه جديد في المهندسين
اصدرت في: 09/11/2014

فيه فترة –من حوالي 10 سنين كده- كانت المهندسين هي المكان الموجود فيه كل الكافيهات الجديدة، وكان طبيعي جدًا أنك تروح يوم الخميس كافيه زي Lipstick أو فرح كافيه، وغيرهم. بالتدريج بدأت الأماكن دي تختفي، وفي المقابل أصبحت كل الكافيهات الجديدة مكانها الزمالك. ولكن مؤخرًا بدأنا نلاحظ أن الكافيهات عددها زاد في المهندسين، آخرهم "مزار لاونج – Mazar Lounge". بعكس كافيهات الزمالك اللي معظمها ضيق، مساحة مزار كبيرة لأنه مكوَن من دورين، وكل دور لوحده واسع، ديكوراته بسيطة جدًا: الحوائط باللون الأبيض، موزع عليها مجموعة من اللوحات المودرن، وشاشات الـ LCD، أما أماكن الجلوس فهي عبارة عن ترابيزات سطحها من الزجاج الملون، وكنب من الجلد الأبيض يتسع لشخصين أو كراسي معدنية لونها رمادي، أجمل حاجة أن القعدات منفصلة وبينها مساحات كبيرة، وبالتالي مش هـ تزعجك الزحمة مهما كانت الأعداد كبيرة. بعد ما اختارنا قعدتنا، قدم لنا الجرسون منيو متهالكة جدًا مكتوب عليها Pre Menu، وبما أنهم فاتحين من شهرين فهمنا أن المنيو دي من أيام الـ Soft Opening، وخصوصًا أن منيو الشيشة عبارة عن ورقة مطبوعة بالأبيض والأسود وملصقة على آخر ظهر المنيو. المهم، اختارنا باستا بفواكة البحر (49.50 جنيه)، بيتزا بالطماطم المجففة (54.50 جنيه) كبداية. التقديم كان ممتاز وكمية الأكل وفيرة؛ المأكولات البحرية في الباستا كانت كثيرة: عجبنا منها بلح البحر واللي كانت تتبيلته وتسويته ممتازين، أما الجمبري فكان للأسف مطاطي وغير طازج بالمرة بالرغم من أن حجمه كان كبير نسبيًا، الباستا نفسها كانت ممتازة التسوية إلا أن عيبها الوحيد والقاتل كان الصوص؛ نسبة بهارات السمك فيه كانت قوية جدًا وبالتالي قضيت على النكهة الطبيعية لفواكة البحر اللي كانت لوحدها كافية. تحمسنا للبيتزا لأنها مخبوزة في فرن حجري، والمفروض أن طريقة الخبز دي ميزة هـ تضيف لها نكهة خاصة وقرمشة. الميزة انقلبت للعنة لأن العجينة ما كانتش مستوية في الوسط بالرغم من رُفع سُمكها. ده غير أننا ما قدرناش نحدد فين الطماطم المجففة بالضبط، كل اللي لاقيناه كان صوص طماطم معلب بطعمه المر، طماطم شيري وأنصاف زيتون هنا وهناك... صحيح الجبنة وفيرة، بس على الأقل تيجي البيتزا زي ما مكتوبة في المنيو... بلاش دي كمان، يقدموها مستوية طيب! قررنا ننسى التجربتين المؤسفتين بشيشة بنكهة الكيوي (21 جنيه)، كابتشينو مثلج بالكراميل (25.50 جنيه) وعصير برتقال (15 جنيه) وأخيرًا مشروب شوكولاتة غامقة بالكريمة (18.50 جنيه). مزار من الأماكن القليلة جدًا اللي لاحظنا فيها أن الجرسون المخصص للشيشة عارف هو بـ يعمل إيه؛ بالرغم من أنه كان جرسون الشيشة الوحيد في الدور اللي كنا قاعدين فيه، إلا أنه كان بـ يغير الولعة من وقت لآخر من نفسه، بعكس أماكن ثانية تتحط الشيشة جنبك وتقعد تدوّر ساعتين على الجرسون علشان يضبطها لك. الكابتشينو المثلج كان رائع، بالرغم من أن طعم الكراميل كان طاغ على نكهة القهوة، إلا أننا ما ننكرش أن المشروب كان ممتاز، خصوصًا قوامه اللي كان خفيف وكريمي في نفس الوقت. عصير البرتقال كان ممتاز، طازج ومسكر في الوقت نفسه، مشروب الشوكولاتة الساخن كان أعظم حاجة ذقناها في حياتنا: قوامه وطعمه كان مضبوط جدًا. توقعنا أن الكريمة هـ تكون السميكة المخفوقة، واللي عادة بـ تكون باردة لدرجة أنها بـ تبّرد المشروب بعد دقائق من تقديمه، إلا أنها كانت خفيفة جدًا أشبه بالرغوة فخففت من تركيز الشوكولاتة ووازنت الطعم ككل. بغض النظر عن الأكل؛ مزار يعتبر فعلًا أنسب مكان تقعد تشرب فيه شيشة ومشروب لطيف مع أصحابك، وعلى عكس أماكن ثانية كثير شبيهة سواء في المهندسين أو الزمالك هـ تقعد براحتك من غير زحمة وهـ تستمتع بخدمة ممتازة.

...

في الخمسينة كافيه: مكان للمة حلوة فى المهندسين
اصدرت في: 04/11/2014

الخروجات أنواع، ممكن تكون خروجة رومانسية مع زوج أو حبيب، أو تكون خروجة عائلية مع الأسرة أو خروجة روشة مع الأصحاب، وكل خروجة بـ يبقى لها نوع معين من الأماكن اللى يتناسب مع طبيعة الأشخاص المتجمعين، وإحنا لما حبينا نخرج مع أصحابنا عملنا بحث عن كافيهات في المهندسين ولقينا كوفى شوب اسمه "في الخمسينة" فـ قررنا نجرب ونروح. "في الخمسينة" كافيه يشبه اسمه كثير، يعنى كنا حاسين أننا تقريبًا في قهوة بلدى بس طبعًا مش في الدوشة ومش في الشارع، لكن فى ديكور الكافيه وشكل الكراسى، وبالرغم أنه يشبه كثير القهوة البلدى لكن فيه خصوصية محفوظة للزبائن، يعنى مثلاً فيه مساحات كافية بين كل طاولة وده الطبيعى علشان كل شخص يتكلم براحته بدون ما يكون مضطر يخفض صوته أكثر من اللازم علشان ما حدش يسمعه. وبما أنه كافيه فيه حاجات كثير بلدى فطبعًا فيه شيشة بكل أنواعها، وكمان فيه Wi-Fi، المنيو مش مشروبات بس، فيه كمان ساندويتشات والأسعار تعتبر لطيفة جدًا ما تختلفش تقريبًا عن أسعار المقاهى البلدى، إحنا شربنا عصير مانجو طبيعى (8 جنيه) وشربنا شاى (5 جنيه) و عصير موز باللبن (8 جنيه)، الخدمة كانت جيدة، الساندويتشات ما جربنهاش وفى المنيو أصنافها مش كثير،فيه بانيه فرنساوى (12 جنيه) وبطاطس فرنساوى (8 جنيه) وساندويتشات جبنة بأنواعها بأسعار مناسبة. فيه خدمة توصيل للمنازل حتى للشيشة يعنى ممكن للسكان اللى قريبين من الكافيه أو في إطار المهندسين يطلبوا الشيشة دليفرى للبيت ودى ميزة للناس اللى مش بـ تحب الزحمة أو اللى بـ تنزل الكافيهات مخصوص علشانها. المكان مناسب لخروجات الأصدقاء أو المجموعات الكبيرة ومناسب كمان لمشاهدة مباريات الكرة، لكن ربما ما يكونش لطيف بالنسبة للأسر أو الأشخاص اللى محتاجين هدوء، ومن الحاجات اللى ضايقتنا أن مافيش مكان مخصص للشيشة، لأننا ما كناش حابين ريحتها وما كانش فيه مكان فاضى بعيد عنها، بس من الحاجات الكويسة أن فيه مكان مناسب نقدر نركن فيه العربية أمام الكافيه، وبما أن الكافيه دائمًا بـ يكون زحمة فمن الأفضل أننا نتصل قبل ما نروح وممكن نحجز مكان بالتليفون. بالنسبة للوصول للكافيه هو سهل لسكان المهندسين أو العجوزة لكن لو هـ تيجى من مكان بعيد هـ تواجه الزحام خصوصًا فى الوقت من 3 العصر حتى 6 مساءً لأن ده بـ يكون وقت خروج الموظفين وشارع جامعة الدول بـ يكون زحمة جدًا في الوقت ده.

...

كراكيب: شيشة وأكثر في المهندسين
اصدرت في: 23/08/2014

"عاوزين مكان ظريف بـ يقدم شيشة... فين؟" السؤال ده بـ يُطرح علينا كثير، والرد المعتاد بـ يكون "الزمالك". ولكن بعد اكتشافنا لـ كراكيب في المهندسين، إجابتنا ممكن تتغير. صحيح الزمالك لها جمالها اللي بـ تضيفه على أي مكان فيها، إلا أن موقع كراكيب على الناصية في شارع ميدان عمان الهادئ يشجعك أنك تقعد براحتك حتى لو في الأوت دوور، خصوصًا أنه مغطى ببرجولا خشبية، فأنت برضه مش قاعد في الشارع. بالرغم من أننا تعبنا من الديكور الشعبي الكليشيهي، واللي انتشر في كل مطاعم وكافيهات الأيام دي، إلا أن كراكيب تفادى الموتيفات المعتادة عن طريق إضافة ورق حائط مودرن، لونه رمادي وعليه مجموعة من الرسومات البيضاء المبسطة. الجو العام للمكان ظريف، العيب الوحيد فيه هو العيب الأزلي: مزيج الموسيقى العالية مع الشاشة الـ LCD –اللي ما حدش بـ يتفرج عليها- وأصوات الناس اللي بـ تحاول تسمع بعض، ولكن يحسب للقائمين على المكان أنهم كانوا بـ يحاولوا أنهم يوازنوا ما بين مزيج الأصوات دي كل فترة. طبعًا واضح جدًا أن كل الأماكن حاليًا بـ تحاول أنها تخفف الأحمال بعدم تشغيل التكييف لأن الحرارة في المكان كانت كل فترة بـ تزيد، ناهيك عن أن النور قطع مرتين، ولكن كانوا عاملين حسابهم بمولد كهربائي. ندخل بقى في الجد، طلبنا باستا أرابياتا (36 جنيه) من أجمل المرات اللي أكلناها، تتبيلة الصوص المكون من البصل والريحان والطماطم كانت متوازنة وكميته كصوص بالنسبة لكمية الباستا كانت مضبوطة. جربنا بيتزا بالببيروني (45 جنيه) العجينة الرفيعة كانت هشة وطازجة، وكذلك المكونات اللي عليها، صحيح الببيروني كميته ودرجة قرمشته كانت محدودة. إلا أننا استمتعنا بالبيتزا ككل. طبق التشيكن سويت آند ساور (62 جنيه) كان ممتاز سواء في الصوص وقوامه أو جودة المكونات، إلا أن الأطباق الجانبية (الأرز الأبيض والبطاطس المهروسة) كانت غير مميزة بالمرة، وبلا أي ابتكار. بعد الوليمة دي، طلبنا كوكتيل صودا Romantic Breeze، وميلك شيك بالنوتيلا (29 جنيه)، غالبًا الأول فُقد في ظروف غامضة خصوصًا أن الجرسون ظهرت عليه علامات الحيرة لما طلبناه، وجاء لنا سموذي الفواكة (20 جنيه) كبديل؛ الكوكتيل كان منعش جدًا وفريش، طعم التفاح، والأناناس والخوخ كان الأوضح، عيبه الوحيد كان قطع قشر الخوخ الموجودة فيه بكثرة... أما النوتيلا شيك فكان كريمي وخفيف في الوقت نفسه، صحيح ممكن يكون مسكر زيادة عن اللزوم، بس ده لازم نتوقعه من أي حاجة فيها نوتيلا. بالنسبة للشيشة طلبنا شيشة فاخر بنكهة الخوخ (28 جنيه)، الشيشة أول ما جاءت –بعد 15 دقيقة تأخير- حسينا أن الحجر كان "ملسوع" نتيجة أن الفحم كان كثير وكبير، المسئول عن الشيشة لاحظ الخطأ بنفسه، وبالفعل أصلحه. وده الحقيقة أعطانا الأمل في كراكيب كمكان مناسب للشيشة. المكان حتى الآن مميز، والعيوب اللي ممكن نكون أخذنا بالنا منها ممكن تكون طارئة ومتغيرة من يوم للثاني، ولكن العيب الرهيب اللي ما ينفعش أنه يكون موجود هو أن يبقى فيه سوء تفاهم بين الجرسونات، وده اللي ظهر لنا بوضوح لأن مع خطأ زي تأخير الشيشة؛ كل جرسون كان بـ يبرر الخطأ بـأنه يلوم زميله... وللأسف حتى لو الخلافات موجودة، مش من الاحترافية أننا نشعر بها كرواد للمكان، لأن المكان خسارة أنه يبقى فيه عيب قاتل زي ده.

...

بورتا دورو: أكل إيطالي معقول في المهندسين
اصدرت في: 23/04/2014

المطبخ الإيطالي عامًة من المطابخ اللي بـ يفضلها المصريين، وبالرغم من تعدد المطاعم والكافيهات اللي بـ تقدم أكلات إيطالية في أنحاء القاهرة، إلا أن قليل منها اللي فعلًا بـ يقدمها على أصولها، وبما أننا في رحلة بحث مستمرة عن الأجود والأشهى، قررنا نجرب "بورتا دورو - Porta d'oro" لعل وعسى. بالرغم من زحمة شارع سليمان أباظة، إلا أن واجهة المطعم الخشبية، بالزرع الأخضر (هو صحيح صناعي، بس قائم بمهمته الجمالية) تحسسك بالهدوء النفسي، المطعم من الداخل إضاءته خافتة وغالب على ديكوراته الخشب، العيب الوحيد هو كمية اللوحات الرخيصة المنتشرة على حوائط المكان فصلتنا عن الأجواء الإيطالية الدافئة وحسستنا أننا قاعدين في محل بيع أدوات مطبخ، توزيع الترابيزات مناسب لحد كبير لمساحة المكان، ولازم نضيف أن المطعم مافيهوش أوت دوور. المطعم بـ يبدأ في استقبال الزبائن متأخر نسبيًا، العاملين في المحل بـ يرصوا الكراسي والترابيزات بعد الساعة أربعة. وبالتالي نفهم من كده أن المطعم ما بـ يقدمش وجبات إفطار، المهم، استقبلنا جرسون لطيف وقعدنا أول شيء لفت انتباهنا هي الموسيقى الإيطالية، واللي صوتها كان عالي جدًا لدرجة أن الزبائن كانوا بـ يزعقوا علشان يسمعوا بعض، و هـ نسيب لك فرصة تتخيل فيها النتيجة لوحدك! المنيو كبير جدًا وفيه كل ما تتخيل: شوربة، باستا، ريزوتو، لحوم وفراخ وأكيد بيتزا. بدأنا بشوربة كريمة بالفراخ (15.95 جنيه) بالرغم من أن قوامها كان أخف من المعتاد، إلا أنها كانت لذيذة ومعمولة بمرقة فراخ (وفيها قطع فراخ معدودة على الأصابع بس طعمها حلو). شوربة الطماطم (15.95 جنيه) كانت ممتازة من حيث القوام، ولكن الطعم كان في مجمله متوسط... ذُقنا أحلى من كده. جربنا ريزوتو فواكه البحر (49.95 جنيه)، للأسف ده كان أسوأ حاجة طلبناها... أو بمعنى أصح هو أسوأ ريزوتو ذُقناه في حياتنا. ولو دخلنا في التفاصيل هـ نقول الآتي: الريزوتو بالنسبة لهم عبارة عن أرز نيء مضاف إليه مرقة. أما عن فواكه البحر فحدث ولا حرج، غير طازجة بالمرة لدرجة أننا كنا بـ نتجنبها علشان ما نفضلش نمضغ فيها لآخر اليوم. أول طبق رئيسي طلبناه كان ستيك بصوص الجبنة الريكفورد (74.95 جنيه)، الستيك كان ظريف ومطهي زي ما طلبناه بالضبط. الصوص كان أكثر من رائع؛ الكريمة هدأت من لذوعة الجبنة وحافظت على نكهتها في الوقت نفسه. الطبق الرئيسي الثاني كان كوردون بلو (64.95 جنيه): صدور الفراخ كانت طرية وحجمها كبير، لكن للأسف حشوة الجبنة كانت قليلة جدًا لدرجة أنها بعد ما ساحت ما تبقاش منها غير الزيوت اللي فيها، وبالتالي زيّتت الفراخ. الأطباق الجانبية كانت عبارة عن فرينش فرايز، والسوتيه كان ينقصه تتبيل بالرغم من جودة طهيه. بعد كمية الأكل الرهيبة اللي قُدمت لنا، كنا متخوفين من طلب الحلو، إلا أن حجم التراميسو (20 جنيه) مقارنة بالأطباق الرئيسية صغير جدًا، التراميسو كان أجمل حاجة ذقناها في الليلة: كريمة جبن المسكربوني خفيفة، والبسكويت شارب القهوة من غير وجود مرارة، عيبها الوحيد أن حجمها كان صغير، تكفي شخص واحد (وبالعافية كمان). كان لازم نحبس، فطلبنا عصير برتقال (11.95 جنيه) كان فريش ومنعش جدًا، ولكن الليمون بالنعناع (9.95 جنيه) كان أطعم وألذ. بصراحة، الأسعار تستاهل أكل أحسن من كده، لأنها أغلى من مطاعم كثير بـ تقدم الأطباق دي بجودة أحسن وبسعر أرخص. الخدمة ممتازة والمكان نظيف مافيش كلام. ممكن تجربه مع مجموعة من أصحابك، وما ننصحش به في عشاء رومانسي، إلا لو هـ تكتفوا بالقعدة وأنتم ساكتين.

...

ذا ماستر شيف: أطباق عالمية بنَفَس ست بيت شاطرة فى المهندسين
اصدرت في: 15/04/2014

بالرغم من شهرة شارع سليمان أباظة بالمهندسين، إلا أن عادة بـ تكون الشوارع المتفرعة منه لغز كبير ومُحير بالنسبة لناس كثير. كل المطاعم اللي في الشوارع دي بـ تعتمد على الدعاية الورقية المُعلقة على أعمدة النور في الشوارع الرئيسية. "ذا ماستر شيف – The Master Chef" كان الاستثناء الوحيد، عرفناه بالصدفة لأننا كنا بـ نمشي في الشارع اللي هو فيه كنوع من كسر الملل. المطعم واجهته بسيطة بشكل جميل، بياض ناصع وواجهة زجاجية، تطلع له بسلالم جانبها حوض نباتات. غالبًا فيه أوت دوور، عبارة عن مساحة ضيقة بالكاد تتسع لترابيزة، إلا أنها كانت خالية تمامًا. الديكور الداخلي بنفس اللون الأبيض، بالإضافة للونين الأسود والأحمر اللي موجودين في الترابيزات الزجاجية، واللي كراسيها لما تتجمع حولها تكوّن مربع (وبمناسبة الكراسي، هي مش مريحة بالمرة ومش هـ يفرق معاها وزنك أو طولك... هـ تتعبك، هـ تتعبك). دخلنا المطعم، خالي تمامًا من أي حياة ماعدا سيدة في الخمسينات -اكتشفنا بعد كده أنها صاحبة المكان– تبادلت معانا من تحت نظارتها نظرات معناها: "هو الناس فين؟" فهمت نظرة الاندهاش فقامت دخلت وراء الكاونتر تنادي على شخص دلت ملابسه على أنه الشيف. قدم لنا منيو مليء بالأصناف لجميع الوجبات من إفطار: سندويتشات فول وطعمية (2.50 جنيه) والكريب بأنواعه (15 جنيه) وحتى السلاطات (20 جنيه). الشيف واضح أنه مش معتاد على وجود زبائن لأنه ما فهمش طلباتنا من أول مرة، لازم نشاور له على الصنف في المنيو. المنيو مكتوب فيها اسأل عن طبق اليوم، لما سألنا الشيف اندهش لوهلة بعد كده رد: "اللي موجود في المنيو هـ نقدمه"، يعني من الآخر وفّر على نفسك، واطلب اللي موجود وأنت ساكت! المهم، طلبنا عصير مانجو (10 جنيه)، وزي ما بـ يقولوا "أول القصيدة كُفر"، العصير كان واضح جدًا أنه مُعلب. جربنا من الأطباق الرئيسية فراخ سويت أند ساور (35 جنيه) وفيليه بصوص الفلفل الأسود (45 جنيه)، ومن الشوربة طلبنا شوربة الكريمة بالفراخ (12 جنيه). الحقيقة أن انطباعنا الأول مش ظريف، وعلى أساسه توقعنا جودة الأكل. ولكن الشوربة كانت هائلة، عارف لما يطلق على الأكل جملة "معمول بحب"، الفراخ والمشروم موجودين بوفرة، والكريمة مخملية كده وناعمة... يا مُسهل. الفراخ كانت رائعة، صحيح كمية البصل عليها كانت كبيرة، إلا أن الصوص مضبوط ومغطي كل القطع، البطاطس المحمرة كانت بيتي بشكل جميل وطازجة وكذلك الخضار السوتيه بتتبيلته المميزة اللي لا هو مهري ولا هو مقرمش كأنه نيء. الفيليه لحمُه كنوعية ممتاز، وكدرجة طهي جيد (بالرغم أن الشيف ما سألناش عن درجة طهيه) إلا أن تتبيلته كانت قوية، طغت على طعمه، وعلى صوص الفلفل الأسود طعم القرفة (لدرجة أن الطبق كان حراق). جربنا باستا بالصوص الأبيض وكانت أكثر من رائعة: كريمي والصوص بتاعها فيه نكهة خفيفة من الريحان: منعشة فعلًا (طبعًا ما تتوقعش أن الشيف يسألك عن نوع المكرونة، وأحمد ربنا أنه بـ يسألك عن نوع الصوص). قائمة الحلويات مملة جدًا وتفتقر الابتكار: جيلي (10 جنيه)، وكريم كراميل (12 جنيه) وما شابه. صاحبة المكان اقترحت علينا نجرب حلو جديد اسمه ماستر كيك (15 جنيه): طبقة من الكريم كراميل فوق كيكة إسفنجية بالشوكولاته، واللي من الآخر اسمها الحركي في مصر: قدرة قادر... ليه بـ يسموها كده؟ تفاصيل معقدة في عملية الطهي: كل المكونات بـ تتحط مع بعضها وتدخل الفرن تنفصل لوحدها لتكون الطبقتين المذكورين أعلاه. كانت حلوة ومكوناتها طازجة بس مسكرة بزيادة بعد أكل كميته كبيرة نسبيًا. التجربة فريدة من نوعها، المعاملة مش عدائية بس تحتاج جهد أكثر من كده. الأطباق مش مبتكرة، إلا أن التنفيذ أقل وصف له أنه رائع كأن ست بيت شاطرة هي اللي طابخة، والمكونات طازجة والشيف بـ يشتغل أول ما تطلب، ده غير النظافة.. يستحق الزيارة.

...

بون بيني: مطعم وكافيه محتاج تجديد في المهندسين
اصدرت في: 31/10/2013

دائمًا وإحنا متجهين لمسجد مصطفى محمود نلاقيه على اليمين في شارع سليمان أباظة ويشدنا ونقعد نردد اسمه "بون بيني – Bon Bini" خاصة أنك تحس أنه أقرب للبونبوني، وكمان تميزه فى تماثيل عازفى الجاز والترومبيت اللى موجودين أعلى مدخل المطعم وتعدد الألوان. قررنا ندخله أخيرًا.. المكان مكون من دورين، أول ما تدخل هـ تلاقى قعدة فى الهواء الطلق بـ تطل على الشارع والعربيات بـ تعدي من جنبها، المنطقة الداخلية فى الدور الأول فيها قعدات بأشكال ومناطق وحتى مستويات مختلفة، مافيش واحدة شبه الثانية، الدور العلوي مش بـ يكون مفتوح دائمًا، وقت زيارتنا كانت الساعة 6:30 وكانوا لسه فاتحين الدور اللى فوق اللى قعدنا فيه، وبرضه فيه منطقة مفتوحة بـ تطل على الشارع بمنظر لطيف من فوق، ومكان للجلوس بالداخل، المكان فيه تماثيل عازفى الجاز الضخمة فى كل مكان وفى الدور العلوي على الحائط محطوط بوسترات وأفيشات لأفلام هوليوودية قديمة وحديثة نوعًا ما لكنها باهتة وألوانها رايحة، بشكل عام من الوصف الديكور حلو جدًا لكنه للأسف محتاج عناية، الكنب لونه باهت وقديم وبعضهم فيه طفيات سجائر أو مهترئ. الجرسون اللى كان معانا كان فاهم شغله كويس، وفاهم المنيو وكان بـ يساعدنا، المنيو زيها زى أى مكان، وفيها قسم للشيشة، نزل لنا زجاجة مياة صغيرة (9.95 جنيه)، وشوربة طماطم (17.95 جنيه)، من قسم البيتزا اختارنا فيرونا بيتزا (48.95 جنيه) ودي مكونة من فراخ وروزبيف وزيتون وطماطم عليها جبن موتزاريلا، وعامة تحمسنا لاختيارها لما عرفنا أن عندهم شيف مخصوص للبيتزا، ومن اللحوم طلبنا فيليه شيف (74.95 جنيه) وده فيليه محشو بالمشروم والروزبيف وعليه صوص بالزبدة من فوق ومعاها طلبين جانبيين اختارنا سوتيه وبطاطس مهروسة، البيبسي كان بـ (11.95 جنيه) ومن المقبلات اختارنا فرايد تكساس (18.95 جنيه) وهي عبارة عن بطاطس محمرة صوابع عليها لحم مفروم وصوص جبن الشيدر. الشوربة جاءت لنا أول حاجة مع الفرايد تكساس، الاثنين كانوا سخنين جدًا وقعدنا فترة عقبال ما بردنا الشوربة علشان نعرف نشربها، بـ ينزل معاها عيش محمص مكعبات وعليها صوص كريمة من فوق، كانت حلوة أوى والكمية لطيفة جدًا، الفرايد تكساس كانت برضه حلوة أوى وخفيفة رغم أن كان عليها جبنة. جاءت لنا البيتزا والفيليه بعد شوية، كمية الاثنين كانت كثيرة أوى لدرجة أخذنا باقى البيتزا تيك أواى، تنفع لفردين، الفيليه بالصوص كان وهمي بمعنى الكلمة، التسوية مضبوطة وطعم الصوص فى الفم كان حكاية، السوتيه والبطاطس المهروسة لا يقلوا جودة، والبيتزا كان سمكها حلو والطعم مع المكونات جامد، وجبة مشبعة بزيادة وممتعة. لأن بطننا كانت على آخرها أخذنا التحلية معانا تيك أواى، عندهم حاجة اسمها كريب فروت كولد (19.95 جنيه) عبارة عن كريب فيه فاكهة وعليه صوص نوتيلا من فوق، الفواكة كانت تفاح وموز والكريب مش ملفوف كالعادة، محطوط فى طبق دائرى والفواكة من فوقه كأنها زي فطيرة التفاح، طعمها كان خفيف وحلو والفاكهة كانت طازجة. "بون بيني" بـ يضيفوا خدمة وضريبة، فى رأينا المكان حلو جدًا من ناحية الأكل، لكن المطعم محتاج تضبيط واهتمام فى الديكورات وفرش الكنب، علشان خسارة نبوظ الطبخة على حبة ملح، نتمنى أنهم يهتموا به علشان العين بـ تشوف وتختار المكان قبل ما البطن بـ تأكل!

...

زيي لاونج: كافيه لذيذ في المهندسين
اصدرت في: 22/04/2013

في طريقنا بعد الشغل زهقانين وبـ ندور على حاجة جديدة نعملها قولنا نسيب العربية ونجرب نتمشى شوية علشان نهرب من المرور وربنا يستر وما يطلعش علينا بلطجية، وإحنا بـ نتمشى في شارع عبد الحميد لطفي خلف مسجد مصطفى محمود لمحنا كافية اسمه "زيي لاونج - Zee Lounge" باليافطة المميزة اللي أنوارها بنفسجي وحرف Z باللون الأحمر، قولنا نجرب ونشوف إذا كان الشكل الخارجي الجامد ده بنفس المستوى من الداخل ولا كلام في الفانكوش. طلعنا سلم صغير وشوفنا الكافيه من جوه اللي عبارة عن صالة واسعة قوي وترابيزات ولاونجات على اليمين والشمال وفي المنتصف المطبخ عبارة عن بار كبير عليه ديكور مطبخ لطيف، أما الديكور العام فهو بسيط ومهدئ للأعصاب مع مزيكا وأغاني شغالة ما تقدروش تميزوها إلا إذا كنتم مركزين قوي، كنا فاكرين أن فيه مكان لغير المدخنين لكن طلع أن كله واحد، بالرغم من وجود مدخنين إلا أن الدخان ما كانش مضايقنا قوي وده بسبب وجود مسافة كافيه بين كل ترابيزة والثانية علشان تضمن لكم الراحة والخصوصية. بصينا في المنيو اللي كانت معقولة وشاملة الساندويتشات اللي بـ تترواح أسعارها بين (34: 38 جنيه) وأطباق السلاطة والمقبلات والبيتزا والمأكولات البحرية أسعارها بـ تبدأ من أول 20 جنيه، بالإضافة للمشروبات اللي بـ تضم الكوكتيلات والمشروبات الساخنة والباردة بس ما لاقيناش قسم الشيشة في المنيو وسألنا الجرسون اللي كان ودود قوي على الشيش الموجودة عندهم، اختارنا من المشروبات سموزي أناناس (22 جنيه) وكيك شوكوليت لافا (32 جنيه) مع شيشة كريز (20 جنيه) ولاي بلاستيك (5 جنيه). الطلبات تقدروا تقولوا تأخرت شوية صغيرين، الشيشة كانت أول طلب يصل وكانت مضبوطة والفحم مضبوط واللي بـ يغير الفحم مركز قوي وبـ يغيره بانتظام، وصل السموزي اللي كان فريش ومثلج وطعمه كان كويس أما الشوكليت لافا كيك انتظرناها حوالي ساعة ولما سألنا عن سبب التأخير الجرسون قال لنا أنها بـ تتعمل! ولما وصلت بألف سلامة عرفنا ليه انتظرناها ساعة، أقل ما يُقال عن الكيك أنها أسطورية، عبارة عن كيك شوكولاتة على شكل جبل بركان وفي القلب شوكولاتة صافية زي اللافا وعليهم شوية قليلين من صوص الكراميل ورشة بودرة كاكاو مع بولة أيس كريم فانيليا، بالفعل كنا بـ نأكل صوابعنا وراها بالرغم أنها كانت ساخنة والأيس كريم ما كانش مميز قوي زي أي أيس كريم فانيليا. خلصنا الشوكوليت لافا والبركان بدأ في الشغل وعلشان نهدي شوية طلبنا كوكتيل (22 جنيه) وده عبارة عن عصير جوافة وفراولة ومانجو على بعض لكن مش مخلوطين، قعدنا كثير في زيي لاونج وكنا مبسوطين والكلام أخذنا زي ما بـ نقول. كافيه ومطعم زيي لاونج فعلًا مكان يستحق الزيارة وبـ نرشحه لكم لو عاوزين تقضوا وقت لطيف وتستمتعوا بشوكولاتة لذيذة، الحاجة الوحيدة أن وقت زيارتنا فيه ساندويتشات كثيرة غير متوفرة، لو أنتم مش مدخنين يُفضل تكونوا بالقرب من أماكن التهوية لأن مع زيادة المدخنين بـ يتحول المكان لسحابة دخان وخصوصًا أن الشفاطات وقت ما كنا هناك ما كانتش شغالة.

...

تريو: كافيه ومطعم هاديء بمستوى عادي فى المهندسين
اصدرت في: 13/02/2013

بعد أول يمين من مطعم "لا بيترا – La Pietra" هـ تلاقى مطعم وكافيه "تريو – Trio" بلوجو أصفر كبير واضح، لكن لأن المكان موجود بالداخل شوية فى الشارع فمش سهل أنك تلقطه بعينك وأنت سايق أو ماشي فى شارع الحجاز بالمهندسين.أول ما وصلنا ودخلنا من المدخل اللى عبارة عن طوب بـ يتخلله زرع أخضر استقبلنا واحد سنه كبير ومش لابس اليونيفورم اللى لابسه باقى الجرسونات لدرجة أننا افتكرناه فى البداية من رواد المكان، المكان عبارة عن دورين، الدور اللى فوق مثبت بأعمدة خرسانية ومساحته أصغر شوية من اللى تحت وبالتالى شكله كأنه بلكونة بـ تبص على المنظر من فوق، لما سألناهم على إمكانية الجلوس فى الدور العلوي عرفنا أنه مش بـ يفتح قبل الساعة 6 مساءً لأن الناس ما بـ تجيش قبل الوقت ده!المهم اختارنا مكان فى الدور اللى تحت، أحلى حاجة أن سقف المكان معمول مشمع شفاف وبالتالى ضوء الشمس بـ يتخلله بس للأسف محتاج يتنظف لأن فيه حاجات مخليه الرؤية له مش مريحة وده بسبب أن باقى المبنى عمارة، الكنب لونه بيج والمكان عامة بـ يسوده الديكور الخشبي والسقف بتاعه عالى، المنيو مش قيمة خالص، عبارة عن ورق أبيض مطبوع وفقير معمول بسلك زي الكراسات أم سلك بتاعة المدرسة، وداخلها منيو ثانية بتاعة الكريب والوافل معمول عليها لوجو "تريو" ومطعم "داتشيز - Dutchess" اللى يبدو أنهم بـ يستعينوا به فى الحلويات، إلى جانب أن المكان بـ يقدم شيشة.المنيو عادية فى أقسامها وشكلها قفلنا شوية، اختارنا طلبات تقليدية زي شوربة طماطم بالكريمة (16 جنيه)، وجريلد فيليه بصوص الليمون (68 جنيه) يتعمل Well done، الجرسون اللى كان معانا كان لطيف، بس كان فيه مشكلة أننا كنا قاعدين فى الركن وبالتالى علشان تلفت انتباه أحد وتنادي عليه كانت بـ تستغرق وقت، الشوربة جاءت لنا الأول سخنة والكمية كبيرة طعمها لطيف لكنها كانت عادية جدًا مافيهاش أى مذاق مخصوص ينسب للمكان، كانت محتاجة بهارات أو نكهة مخصوصة، بعد شوية جاء لنا الفيليه المشوي بصوص الليمون ومعاه بطاطس بيوريه عليها صوص Gravy وخضار سوتيه (لك اختيارين جانبيين)، الفيليه كان تسويته مضبوطة بصوص الليمون والسوتيه كان كميته كبيرة وطعمه حلو، البيوريه كمان كان لطيف وما كانش ينفع من غير صوص الجريفى.فى قائمة المشروبات اللى كانت اختياراتها مافيهاش أى اختراعات غير فى أنواع السموزي طلبنا سموزي ليمون بالنعناع (Lemon Mint Smoothie) (21 جنيه) كانت منعشة جدًا بالثلج المجروش ومزازة الليمون اللى ما ضايقتناش، مشروب مضبوط جدًا.نيجي بقى لقائمة الوافل والكريب من "داتشيز" اللى كانت ملخبطانا شوية وما فهمناش إزاي نضيف مكونات الوافل من صوص أو فاكهة أو قطع شوكولاتة، لحد ما استعاننا بالجرسون وعرفنا أنك بـ تختار الأول عاوز كريب ولا وافل (سهلة دي) وبعدين تختار نوع الصوص اللى عاوزه عليها وبعدين أى إضافة زيادة مع الصوص هـ يضاف 7 جنيه، المنيو كان محتاج تنسيق أكثر من كده لأن كلمة "اضف 7 جنيه" دي كانت فى آخر الصفحة مش واضحة. المهم أخذنا وافل بصوص الـ Kinder (25 جنيه) مع إضافة بولة آيس كريم فانيليا (7 جنيه)، الوافل كانت أحسن خاتمة لزيارتنا، العجينة مضبوطة وصوص الكيندر طلع حلو مع الآيس كريم اللى دائمًا بـ يلعب دور تخفيف دسم الصوص اللى بـ نضيفه.الطلب بتاعك بـ يضاف عليه 12% خدمة و10% ضريبة، وممكن تزوروا صفحتهم على الفيسبوك علشان تتعرفوا أكثر على المكان واللى بـ يقدمه، بعد ما عدت الساعة 7 (مش 6 مساءً) قدرنا نطلع فوق نتفرج على الدور العلوي قبل ما نمشي واللى بـ يتسم بهدوء أكبر من اللى تحت وكمان دورات المياه فيها. المكان لطيف لكن محتاج اعتناء بالتفاصيل أكثر علشان يقدر ينافس، والمنافسة فى عالم المطاعم والكافيهات شرسة.. العبرة للى يقدر عليها.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن