دليل موسيقى القاهرة - أحدث المقالات عن المطربين والنجوم العرب

مزيكا

إقرا الخبر: مسار إجباري
اصدرت في: 22/04/2013

في نقلة جديدة لفريق "مسار إجباري" اللي انطلق من الإسكندرية سنة 2005، صدر له مؤخرًا ألبوم "إقرا الخبر" كأول خطوة للخروج من وسط الـunderground ودخول سوق الكاسيت. نقدر نعتبر أن الألبوم مافيهوش جديد! وده لأن الـ9 أغنيات أعمال قديمة قدمها الفريق في حفلاته على مدار 3 سنين منهم أغنية لها ريمكس في نهاية الألبوم، وحتى تراك الموسيقى يعتبر مقطع من تراك مدته 7 دقائق قدمه الفريق من حوالي 6 شهور. لكنك إذا كنت مش متابع فرق الـ underground وحفلات مسار إجباري، فهـ يكون بالنسبة لك الألبوم جديد، خاصة وأن موضوعات الأغاني متفقة جدًا مع واقعنا ومع الحالة النفسية لكثير مننا. "ما تخافشي" أولى أغنيات الألبوم، رغم كلامها الإيجابي واللي مليان تحفيز على مواجهة الخوف والشدة، إلا أن اللحن البطيء زَوّد جرعة الشجن، ويمكن اللي خلق توازن في الأغنية توزيع مزيكا الروك الصاخب بعض الشيء، واللي بـ يميز فريق مسار إجباري في أعماله. الكلمات تأليف دعاء عبد الوهاب، واللحن لعضو الفريق هاني الدقاق اللي لحن كل أغنيات الألبوم، وتوزيع الألبوم كله من صنع الفريق. وعلى إيقاع "الرومبا" غنى مسار إجباري "الليل" بكلمات حمدي زيدان وتوزيع مكرر مافيهوش جديد.. ورغم قصر كلام الأغنية إلا أنه يعتبر استكمال لهدف الأغنية السابقة وهو السعي وراء الأمل دائمًا. في الأغنية الثالثة، بـ نشعر بتغيير حالة الألبوم بمزيكا أكثر صخبًا وكلام مشابه لأسلوب المونولوج، وبـ ينتقد الفريق أزمة المرور وسواقة الميكروباصات، بالإضافة لسوء الإدارة وفشل التخطيط. الأغنية من تأليف آمار مصطفى، والتوزيع أفضل بكثير من التجربتين السابقتين وفيه تنويع ودقة في استخدام الآلات والمؤثرات. وبـ يواصل الفريق صعوده في "حاوي"، أغنية درامية يمكن تكون متوافقة مع حالة الكثير من المصريين اليومين دول، خاصة في ظل حالة اللامبالاة اللي خلقتها الأزمة الاقتصادية والسياسية، ورغم أن دخلة الألبوم كانت دعوة للأمل، إلا أننا هـ نسمع كلمات يائسة ومستسلمة للظروف مهما كانت.. الكلمات الجيدة من تأليف محمد جمعة، والتوزيع البسيط متوافق جدًا مع حالة الأغنية. "أدِف" أغنية تعتبر نصيحة مقبولة من الفريق، لأن معظمنا محتاج يخرج من رتابة الحياة ويأدف بعيد عن روتين ظروف المعيشة والأعمال.. كلام بلال حسني بسيط وفيه صدق لدرجة أنك ممكن تقول: "أيوه أنا عاوز أعمل زي ما بـ يقول كده". اللحن عادي باستثناء السنيو الصاخب، وعلى نفس مستوى السنيو كان التوزيع اللي برزت فيه أوتار الإلكتريك جيتار والساكسفون بشكل مؤثر. أما المقطع الموسيقي الوحيد بالألبوم موجود باسم "شتا" في أول التراك بـ نسمع صوت صفوت الشريف أمين عام الحزب الوطني سابقًا، ومش مفهوم إيه الغرض الفني من وجود مؤثر صوت صفوت الشريف في تراك موسيقي خالي من النصوص! "إجباري المسار" عودة للكلام اليائس ويبدو وكأنه يتناقض مع كلام الأغنية الأولى في الألبوم واللي كانت بـ تدعو لمواجهة صعوبات الحياة، إلا أننا هنا بـ نسمع كلمات من نوع "كنت متفاءل، كل يوم أحلام تروح، وخانني الطموح". الكلام العادي لمحمد السيد، أما اللحن فهو يبدو غير مستقر بسبب الصعود والهبوط اللي ممكن يخرجنا من حالة الأغنية أصلًا.. والمزيكا في بعض الأوقات كانت مغطية على الكلام يمكن ده بسبب سيطرة الإلكتريك جيتار. "أنا موجود" أغنية ثورية رافضة للسكوت والاستسلام للظلم وبـ تقول كلماتها: "أنا موجود صوتي أقوى من البَرود". الكلام التقليدي جدًا لآمار مصطفى، وبـ يشاركها نفس المستوى لحن هاني الدقاق.. أما التوزيع فهو أفضل حالًا يمكن بسبب بساطته والاعتماد على الجيتار فقط في المذهب. "إقرا الخبر" أغنية الهيد، وتعتبر خاتمة جيدة لأول ألبوم لفريق مسار إجباري، كلماتها الناقدة هى أبرز ما في الأغنية، وبـ تحكي عن رحلة الشاب المصري في البحث عن وظيفة لائقة واللي بـ ينتهي به الحال في الآخر للسفر علشان "يأخذ دكتوراة في غسل الصحون". الكلام المختلف لآمار مصطفى، واللحن كمان له دور كبير في خروج الأغنية بشكل جيد وممتع.. وبـ يشاركهم نفس المستوى التوزيع المناسب جدًا لحالة الأغنية ورتمها السريع.

...

كايروكي: وأنا مع نفسي قاعد
اصدرت في: 25/06/2012

جميل..أول حاجة لازم نبدأ بها هي اتجاه كايروكي للاحترافية بشكل هائل وملحوظ عن كل مرة قبل كده. ألبوم جديد بعنوان «وأنا مع نفسي قاعد» استناه كثير من جمهور كايروكي، وفعلًا نقدر نقول أنهم صبروا ونالوا. الألبوم مليان مفاجآت على كذا مستوى سواء للمستمع العادي أو للمستمع اللي شاغل باله بالتفاصيل الفنية الدقيقة لفرقة بدأت مشوارها كـ Underground band واتنقلت للاحترافية. يبدأ الالبوم باغنية "الملك" هادئة بطابع متفائل و دافئ بتوزيع Folk وكلمات جميلة عن واحد شايف أنه ملك عظيم لأنه حواليه ناس بـ يحبهم و ماء وهواء وبنت جميله بـ تحبه، كلمات بسيطة ومعبرة بـ توصل لقلب المستمع ببساطة ساعد فيها لحن و توزيع جميل. بعدها "كل يوم" بـ تفكرنا شوية باغنية "افرد جناحك" بنفس الروح المتفائلة. الايقاع السريع الساخن واللازمة الموسيقية المميزة، وهنا بـ يبان رهان كايروكي الذكي على تكرارهم للتوليفة اللي نجحت فى جذب كم كبير من جمهورهم، وأنهم عملوا ده بحرفية وتطوير بارع علشان الموضوع مايكونش مجرد امتداد وتكرار، و ده باين فى نقط زي إنتاج فني وموسيقي أكثر احترافية ونفس الكلام فى أغنية "بكرة الشمس تطلع" اللي فيها نفس الروح مع إضافة جزء فيه إيقاع المارش اللي دائمًا له تأثير حلو وحماسي خصوصا لو مع لازمة تعلّق وتوزيع محترم. "وأنا مع نفسي قاعد" أغنيه هادئة و حالمة بموود يشبه أغاني فريق Camel خصوصًا فى التوزيع والأصوات المستخدمة فى الأغنية ونفس الكلام في أغنية "تايه" مع استخدامهم لوتريات فى الأغنية خلقت فى الأغنية عمق مؤثر بشكل غير مباشر، التجديد بـ ييجي فى أغنية "لو كان عندي جيتار" اللي مكتوبة وبـ تتغني بالفصحى مع الاحتفاظ بنفس الموود فى التلحين والتوزيع، التجربة فى حد ذاتها تحترم كمحاولة التجديد انما ممكن تختلف بين القبول أو عدمه عند المستمعين. "صوتي" أغنية وطنية بثوب جديد مختلف عن المديح المباشر فى البلد، اغنية على لسان واحد بـ يعبر عن صوته و إرادته اللي بـ يحاول يحافظ عليها فى بلده وسط ناس بـ تحاول تسكته وتضللَه. كايروكي يوم بعد الثاني بـ يتمسكوا أكثر بكذا نقطة بـ تخلق منهم Rock Band حقيقي، زي تركيزهم على موود الأغاني بتاعهم بتوزيعات بين الـHard Rock و الـAlternative وبُعدهم عن محاولات دمج أغانيهم بموود الموسيقى الشرقي من حيث الإيقاع و المقامات، وده خلاهم أكثر تحديدًا وانتماء للـ Rock، وتركيزهم على حاجة كمان وهي اختيارهم للاصوات اللي ساهم بدور كبير جدًا فى خروج جودة ممتازة وأصلية، وده مهم جدا لأن مزيكا كايروكي بسيطة وبعيدة عن التعقيد فبالتالي محتاجة جودة عالية لتكميل الصورة المطلوبة، و يمكن دة ظهر بقوة فى أغاني زي "بسأل عليكي" و"لكن احساسي مش كفاية" اللي فيها Solos و Licks جيتار فى منتهى الجودة والبساطة. بعد تكميل صورة الـRock Band العربي بنجاح من منظور كايروكي، كدة المتوقع أو المنتظر منهم فى الألبوم اللي جاي تقديم رؤية جديدة للجمهور و بكده يكونوا مكملين على الطريق الصح.

...

Click To start: أول ألبوم لفريق الروك سيمبلكستي
اصدرت في: 29/09/2011

ألبوم "Click to Start" هو أول اصدار لفرقة SimpleXity المكونة من أربعة أفراد بـ يلعبوا Progressive Rock، بدأوا فى 2007 ويعتبروا من الفرق القليلة اللي أنتجت ألبوم بتمويل ذاتي من غير شركة إنتاج إلا أنه مطروح للبيع في كذا مكان فى السوق. SimpleXity نجحوا أنهم يعملوا ألبوم ممتع ومليء بأفكار وتفاصيل موسيقية كثيرة كعادة الموسيقى الـProgressive مع أنه مكون من 5 تراكات فقط وده عدد قليل نسبيًا ويمكن يرجع ده لارتفاع تكلفة التسجيل وأن الألبوم مُسجل بتمويل ذاتي زى ما قلنا، أول تراك بعنوان A Lone wolf's dying willفيه توليفة Progressiveواضحة بتغيير الموازين الموسيقية وكمان دمجها بمقامات شرقية فى أجزاء معينة بشكل ظريف، بعدها ثاني تراكThin Air بـ يدخل وكأنه تكملة للتراك الأول، أول جزء منه لعب مزيكا لمدة دقيقتين تقريبًا كان واضح فيهم فعلاً تمكن أفراد الفرقة من نوع الموسيقى بتاعهم اللي يعتبر نسبيًا مش سهل ولا معتاد أنه يتلعب فى مصر! Diaries from Turah تراك بـ يحكي عن مبارك وتسلطه هو أسرته فى الحكم وسقوطهم على يد الثوار، روح الأغنية قوية ومساعد في كده توزيع هايل بين الآلات وأداء عمر الديب فى الغناء بلحن يشد ويعلق فى الأذن بسرعة، بعد كده Tranquil illusions ودي موسيقى مُقسمة لعب منفردSolos على الـ Lead guitar و الـBass . آخر تراك هو Luminosity دخلة الموسيقى ناعمة بـ يجي بعدهاGroove مميز مع الغناء وكذاRiff ثقيل، وعمومًا الشيء المميز فى الألبوم كله هو إبداع عمر الديب فى التلحين ولعبه للـSolo على الجيتار، ده غير نبرة صوته المميزة اللي عرف يوظفها صح جدًا فى أغانيه، و ده كان بمساعدةGroove هايل بين "علي حسب النبي" على الدرامز و"نور أيمن" على الباص اللي كمان ملأ جزء كبير بلعبهMelodies بطريقة بارعة أدت الغرض وكان غير مبالغ فيها، كمان "أحمد عادل" على الـ Keyboard اختار أصوات مناسبة جدًا للحالة بتاعة اللعب بشكل كمل الصورة. نقدر نقول أن أي حد سمّيع روك هـ يحب الألبوم ده لأنه فعلاً تجربة غنية وجاءت من ناس مُخلصة للنوع ده من المزيكا ولهم مستقبل لو كملوا بنفس الروح. جودة التسجيل ممكن تبان أنها غير جيدة، ممكن المستمع العادي ما يلاحظش إلا أنها بالمقارنة بأي حاجة من شركة إنتاج عالمية هـ تبان. موقع الفرقة: www.simplexityband.com الألبوم متوفر في: Bikya Book Cafe - Nasr City Tone Zone Music Stores - Dokki Ganoub Studio - Nasr City Flex Music Stores - Maadi Loud Studio - Alexandria

...

مشروع ليلى: الحل رومانسي
اصدرت في: 31/07/2011

ألبوم خفيف جدًا لمشروع ليلى بعنوان «الحل رومانسي»، وده لأنه بـ يتكون من 6 أغاني فقط، رغم كده الألبوم حقق إعجاب ملحوظ عند كثير من الناس، ويعتبر ده ثاني ألبوم لهم بعد ألبوم حمل اسم الفريق نفسه "مشروع ليلى" فى 2010 وحقق نجاح ونسبة استماع ومشاهدة عالية جدًا على اليوتيوب. بـ يبدأ الألبوم بمقدمة بصوت حامد مغني الفرقة الأساسي من غير أي آلات مصاحبة وكأنه بـ يعرف المستمع بالفرقة بما أنه له صوت مميز ويُحدد بسهولة، بعدها بـ تدمج فيها أغنية «يا حبيبي» ودي تعتبر باقي المقدمة وفيها توليفة مشروع ليلى المميزة وهي توزيعاتهم الروك مع "الكمان" مع لزمة مميزة تعلّق في الأذن. بعدها أغنية «أني منيح» خفيفة ومتوزعة على الجيتار والكمان وإيقاعات خفيفة وده ساعد فى توصيل كلمات الأغنية الحزينة عن واحد كان نفسه يغير العالم وبعد فشله قرر باستسلام أنه يقول أني منيح! «أم الجاكيت» أغنية كلماتها من نوع غير مألوف للمستمع بـ يكلم فيها البنت جارته أم جاكيت وكاسكيت وشعر آلا جارسون لدرجة أنه لما بـ يشوفها بـ يفتكرها ولد، وبس كده! ممكن ده يخلي المستمع مستغرب ويسأل "طيب وبعدين يعني؟" لكن عمومًا دي حاجة مميزة فى أغاني مشروع ليلى أن الكلمات بـ تكون غير مباشرة أو بـ توصف حالة مش أكثر، ونفس الكلام فى أغنية «وجيه» ودي من الأغاني المميزة بـ توزيع قوي ومميز. آخر أغنية وهي «الحل رومانسي» ودي بـ تجسد شخصية الفريق بقوة بالتوزيع وتصاعد الأغنية الموسيقي والكلمات غير المعتادة. رغم أن الألبوم كان ممكن يكون فيه أغاني أكثر خصوصًا أن إنتاج الفريق يسمح، إلا أن الألبوم يستحق أنه يتسمع لأنه بـ يقدم المزيد من شخصية فرقة مشروع ليلى المميزة من ناحية التوزيع الموسيقي اللي بـ يتألق فيه الإيقاع مع الباص أو الـ"Groove" ولزمات الجيتار والكمان مع مصاحبة الكيبورد وكمان الكلمات، وأغلبها تأليف حامد سنّو مغني الفريق وحتى الإخراج الفني للأسطوانة.

...

حمزة نمرة: إنسان
اصدرت في: 18/07/2011

تألُق ملحوظ واهتمام كبير بـ يصاحب الألبوم الثاني للفنان حمزة نمرة بعنوان «إنسان»، وده أول البوم لحمزة مع شركة الإنتاج الإنجليزية أوايكينج Awakening المشهورة بإنتاجها لأغاني إسلامية لفنانين زي سامي يوسف وماهر زين. حمزة نمرة فنان صاحب ذوق راقي وإحساس فني عالي وعلشان كده بـ نلاقي فى الألبوم 16 أغنيه بـ يكوّنوا حالة جديدة وغير معتادة للمستمع بتنوع الموسيقي ونوع الأغاني و كلماتها غير التقليدية بالمرة، وطبعًا ساعد فى ده الإنتاج الاحترافي للألبوم في عدة جوانب بشكل سخي جدًا خلّى العمل ككل فى النهاية أكثر من رائع! حالة الألبوم تجسدت بشكل واضح فى نوع الكلمات لأنها كانت توليفة من المعاني القيمة والأحاسيس الدافئة، رغم أن ما كانش فيه أغاني عاطفية زي باقي المغنيين ما بـ يعملوا، ويمكن ده ساعد فى نجاح وتميز الألبوم، أن اغلب الأغاني تناولت قضايا إنسانية واجتماعية بأشكال متنوعة بين الفكاهة والحزن والموضوعية. حمزة بدأ بـ«إنسان» أغنية الألبوم و تعتبر من أقوى الأغاني بأداء وإحساس حمزة فى الغناء، أغنية «الميدان» أو "ارفع راسك أنت مصري" -زي ما اشتهرت- أغنية هـ يحسها أي حد يسمعها لأنها بـ تحكي عن أصالة المصري الجدع بوقفته في الميدان واللجان الشعبية، هـ تحس أن الأغنية دي بـ تتغنى لك أنت تحديدًا، أما أغنية «التغريبة 2» على لسان واحد اضطرته ظروف أكل العيش للسفر وبـ يحكي عن آلام فرقته لمصر لكن بـ يصبر نفسه بأنه أكيد راجع في يوم، إحساس حمزة فى الغناء رهيب! ومؤثر لدرجة تخلي المستمع يحس أن هو شخصيًا متغرب. رغم أن أغاني كثير اتعملت عن الوحدة الوطنية فى مصر بين المسلمين والأقباط إلا أن أغنية «ابن الوطن» كانت مختلفة بأنها تناولت الموضوع بصراحة وألم فى نفس الوقت عن الفرقة الحاصلة اليومين دول مع وجود أمل لتخطي الأزمة المفتعلة بين الطائفتين. «بلدي يا بلدي» من الأغاني الظريفة فى الألبوم، وهي تعتبر لحن ولزمة فلكلورية إلا أنها اتغنت بكلمات جديدة بـ تحكي عن مناطق مختلفة في مصر بصفاتها الجميلة، أما أغنية «يا هناه» فـ انتقدت سلبيات تعليم المدارس في مصر بشكل ساخر وفكاهي مع لزمة حلوة قوي في جملة "يا هناه يا هناه.. اللي يتعلم عندنا". كلمات أغنية «الوشوش» عبرت برشاقة وخفة دم عن ظاهرة النفاق والخداع المنتشر فى المجتمع بأشكال وصور مختلفة. الجميل والواضح أن حمزة فعلاً مصدق ومؤمن بالكلمات في أغانيه، وده بـ يساعد فى توصيل إحساس ومعنى الأغنية لقلب المستمع. تنوع التوزيع الموسيقي للألبوم بين أكثر من نوع موسيقي؛ شرقي وغربي، وده كان من أكثر الحاجات الملفتة فى الألبوم أنه قدم أنواع مختلفة من الموسيقي بكذا توزيع يعجب أغلب المستمعين، إلا أن العامل المشترك هو وجود الوتريات الشرقية عمومًا والاعتماد على مقامات تركية في الموسيقى، وده راجع لأن فريق توزيع وتسجيل الألبوم أغلبه من تركيا وده كان واضح جدًا فى توزيعات لأغاني زي «إنسان» و«يا هناه»، غير كده بـ نلاقي توزيعات روك فى أغاني زي «الميدان» و«اوعدوني» و«صوت» بأداء تصاعدي وإحساس هائل يخلي المستمع يحس معاني الأغنية من خلال الموسيقى. أغنية «حاصر حصارك» نقدر نصنفها روك لكنها كانت Electronic شوية ودي وضحت أفكار حمزة الغنية فى التوزيع والألحان، نفس الفكرة فى أغنية «دوري» بتوزيعها المميز القريب من ستايل الـ Acid Jazz. ومن الأغاني الجذابة كانت أغنية «هنسى» لأن توزيعها القريب من أغاني الـDisco أو الـFunk بـ يكون محبب على الأذن خصوصًا مع كلماتها المتفائلة، وطبعًا هـ نلاقي الأغاني المصرية الخالصة بـ توزيعات بين الصعيدي والنوبي زي «التغريبة 2» و«ابن الوطن»، و«يا مهون» أغنية لها إحساس مصري عالي جدًا يخلي المستمع يتصور أنها أصلاً أغنية قديمة من كثرة أصالتها. موهبة حمزة نمرة واختياره لأغانيه أعطى فرصة جيدة لشركة الإنتاج أنها تخرج عمل فني راقي يستاهل أنه يعجب الناس من أول الإنتاج الموسيقى للألبوم لغاية الإخراج الفني لمحتويات وغلاف الأسطوانة.

...

كايروكي: مطلوب زعيم
اصدرت في: 13/07/2011

بعد مشوار طويل في عالم موسيقى الـ Undergroundبدأ سنة 2003، فريق كايروكي بـ يطرح ألبومه الأول «مطلوب زعيم» في 2011، كايروكي بـ يلعبوا روك وبـ يغنوا بالعربي وميزتهم أنهم مركزين على كونهم بـ يلعبوا روك بس، من غير ما يدمجوه بأنواع موسيقى ثانية باستثناء وجود نغمات وآلات شرقي في بعض الأغاني. الألبوم فيه 8 أغاني بس رغم أن إنتاج كايروكي أكثر من كده بكثير، سواء تسجيل ستوديو أو كليبات، لكن أكيد ده راجع لتفاصيل فى الكواليس. بـ يبدأ الألبوم بأغنية «يعدي الصيف» الهادئة وكلامها حزين شوية وكان ممكن يكون أحسن لو كان ترتيبها مختلف في الألبوم علشان الموود بتاعها، غير كده التأليف والتوزيع جيدين جدًا. بـ تيجي بعدها أغنية «صوت الحرية» الغنية عن التعريف، وده راجع لظهورها وانتشارها بسرعة صاروخية أيام الثورة علشان كذا سبب أهمهم معاني كلماتها اللي دخلت قلب كل مصري فى ظروف إصدار الأغنية، وإحساس أمير عيد مغني الفريق وهاني عادل من فريق «وسط البلد» فى الغناء، وكمان ساعد فى ده اللحن والتوزيع الرائعين، الفرق الوحيد أن فى النسخة دي من الأغنية أمير عيد بـ يغنيها لوحده من غير هاني عادل. بعدها أغنية الألبوم «مطلوب زعيم» بـ تبدأ بخطاب التنحي بصوت عمر سليمان! وعلى نغمات خفيفة بالجيتار بـ تبدأ كلماتها فى صيغة إعلان عن وظيفة خالية لرئيس للبلد أو "زعيم" حسب مواصفات الناس عايزينها، وبـ تختصر بأنه يكون "دكر" زي ما نهاية الأغنية بـ تقول، كلمات الأغنية معبرة جدًا رغم بساطتها وتوزيع الأغنية فضل ماشي تصاعدي مع دخول إيقاع مارش عسكري زوَّد من روح الوطنية فى الأغنية بشكل جميل جدًا. رابع أغنية «حلمي أنا» بـ تيجي بإصدار مختلف فى التوزيع عن نسخة ثانية انتشرت على اليوتيوب من حوالي سنتين، أغنية مؤثرة بأداء وإحساس أمير عيد. بعدها على النغمات الشرقية -بنفس روح الروك- أغنية «مصراوي» بهدف إيقاظ روح المصري وثقافته وتاريخه، وكانت توزيعاتها لطيفة. «الواد بتاع المزيكا» أغنية دمها خفيف على لسان واحد بـ يحكي عن نفسه والمزيكا بتاعته وخبرات شافها في حياته رغم سنه الصغير، الجميل فى الأغنية أنها بلوز روك مش بس بالتوزيع الموسيقي لأ وكمان طابع كلمات بـ يكون فى صورة حكاية دمها خفيف أو مؤثرة أو حزينة. أغنية «غريب في بلاد غريبة» كلماتها وتوزيعها جيدين، لكن الملفت فيها أن لزمة الأغنية الأساسية تشبه لزمة أغنية «Making love out of nothing at all» لفريق Air Supply بشكل ملحوظ، طبعًا ممكن تكون مجرد صدفة بس بـ تكون بايخة لو حد عارف الأغنية الأصلية وبـ يفقد الأغنية الجديدة حلاوتها. آخر أغنية فى الألبوم هى «افرد جناحك» وتعتبر من أقوى أغاني الألبوم ولها طابع عالمي بدخلتها ونقلاتها وكلماتها المتفائلة وتوزيعها الرائع، فعلاً برافو كايروكي على إنتاج أغنية زي دي. الألبوم كله ألحان وكلمات كايروكي ماعدا أغنية مطلوب زعيم كلمات صفوت الألفي، أما أجمل حاجة فى الألبوم أن كايروكي أضافوا وغيروا فى التوزيعات برشاقة للأحسن من غير ما يضيعوا هوية وشخصية الفريق وبكده يكونوا تجنبوا أزمة شهيرة بـ تحصل لفرق الـ Underground وهي وجود فرق كبير وملحوظ بين نسخة اللايف Live ونسخة الاستوديو وقت التسجيل، والألبوم برعاية كوكاكولا.

...

سعاد ماسي: وحورية
اصدرت في: 08/05/2011

بعد غياب 5 سنين عن إصدار البومات، بـ ترجع «سعاد ماسي» بحالة جميلة جداً فى ألبومها «وحورية». آخر ألبوم قبله كان «مسك الليل» في 2005، ألبوم رائع بس مختلف كتير عن الألبوم الأخير. و بسرعة للي مايعرفش سعاد ماسي هي مغنية جزائرية بـ تلحن اغانيها بنفسها على الجيتار قدمت 3 ألبومات قبل كده بأنواع موسيقى متنوعة بين الروك والأفريكان والراي والشرقي و أول البوم قدمته كان «راوي» فى 2001. «وحورية» يعتبر حالة فنية مكونة من 12 أغنية، أغانيه فيها تشابه واضح جدا، يخلي المستمع مايفرقش كتير بين كذا أغنية بسبب التوزيع الثابت فى الاغاني اللي عبارة عن جيتار أكوستك و كونتراباص وإيقاعات خفيفة جداً، لكن الغريب فعلاً إن رغم التشابه الواضح بين الأغاني إلا ان وانت بـ تسمع صعب تحس بملل او تكرار! وكأن سعاد راهنت على وصول إحساسها المبهر فى الآداء اللي كمان كسر حاجز اللغة الفرنسية في بعض الأغاني واللهجة الجزائرية اللي من الصعب فهمها. الإبداع كان باين فى الأغاني اللي وصَّلت فيها إحساسها بصوتها الدافي زي Nacera" " و" Tout Ce Que Jaime " و"خبر كان" و"سميرة مسكينة" اللي بـ تحكي فيها عن "سميرة" اللي عايشة حياة قاسية زي سندريلا، كل دي أغاني إعتمدت فيهم على احساسها وألحانها الناعمة على الجيتار الكلاسيك بمنتهى البساطة، و اللي برضه ساعد فيها توزيعات فى منتهى الذكاء بين ايقاعات خفيفة وكونتراباص اللي كان من المُلفت استخدامه فى اغلب الاغاني بدل الباص جيتار المعتاد. اغنية " "Une Lettre A_ Si H Med ليها ستايل الـ Country الأمريكي بالجيتار الأكوستك و إيقاع الدرامز السريع والجميل فيها لزمة العود اللي تعلق فى الودن زي طريقة الغُنا كمان. و على سبيل التنويع بـ نلاقي أغنيتين بلوز فى الألبوم، أول واحدة Enta Ouzahrek اللي بـ تغنيها باللهجة الجزائرية بآداء البلوز الامريكي مع خلفية من الهارمونيكا، خليط ناجح قدرت سعاد تعمله بشكل جذاب وممتع. تاني اغنية بلوز فى الالبوم Stop pissing me off" "هي اللي تستحق الوقفة عندها لكذا سبب؛ الاول إنها مستخدم فيها آلة واحدة بس وهي الكونتراباص وطبعا ده غير معتاد لأن الكونتراباص آلة مصاحبة للإيقاع مش آلة عزف منفرد، تاني حاجة أن الاغنية فيها شبه كبير بينها و بين اغنية Love me two times" " لفريق « The Doors ». ممكن تكون محاولة لسعاد ماسي لتقديم نفس الأغنية بأسلوبها الخاص، وممكن طبعاً يكون توارد افكار وتشابه غير مقصود مش أكتر. بس فى النهاية الاغنية دمها خفيف و مُلفت انها باللهجة الجزائري مع وجود غنا فى الخلفيه بيردد كلمة (Stop..Pissing me off) بشكل ظريف. "Un Sourire" فيها الطابع الدافي بتاع الألبوم بنفس التوزيعات الناعمة زايد عليه بس صوت الأكورديون الفرنسي المميز اللي كان ملائم قوي للموود. و لأن بداية سعاد ماسي مع الموسيقى كانت روك فبـ نلاقى أغنية " Kin Kohun Alik Ebaida " اللى تتصنف كلاسيك روك صريح، وتوزيعها بجميع آلات الروك التقليدي ويمكن دي الأغنية الوحيدة اللي اتلعب فيها بإلكتريك جيتار وباص جيتار فى الألبوم كله، الأغنية باللهجة الجزائرية والإنجليزية. شارك سعاد ماسي فى الألبوم 2 فنانين، الأول Francis Cabrel المغني الفرنسي فى أغنية "Tout Reste a Faire" اللي كانت مميزة بلحنها مع الايقاع السريع و لعب العود، وتاني مشاركة للأنجليزي Paul Welle فى أغنية Let me be in peace" ". تنوع بين الفرنسية واللهجة الجزائرية والإنجليزية بس زي ما قولنا سعاد ماسي بتقدر باحساسها توصل كل المعاني فى غناها حتى لو لغتها غريبة على اللي بـ يسمع وده اللي خلاها تعجب كتير جدا من الناس هنا وفى العالم كله أكترمن أي فنان جزائري تاني، مع كامل إحترامنا للشاب خالد طبعاً. و مش لازم برضه ننسى دور الموسيقيين اللي معاها اللي ابدعوا فى توزيعاتهم وإختيار أصوات آلاتهم ونجحوا فكرة الألبوم اللي مايل لموود الأكوستك أو الـ ( Unplugged ).

...

هيثم نبيل: مين زيِّنا
اصدرت في: 24/04/2011

ألبوم جديد للمطرب «هيثم نبيل»، إتأجل طرحه أكتر من مرة عشان أحداث الثورة وإحتراماً لأرواح الشهداء، رغم أنه فيه أغنيتين وطنيتين منهم أغنية الألبوم «مين زيِّنا». الألبوم 6 أغاني بس، يعني نقدر نقول عليه "ميني ألبوم"، وقدم فيه «هيثم نبيل» مزيكا راقية جداً مع كلمات غير مألوفة وعرف يبرز شخصيته الفنية و"التيمة" اللي ممكن تعرفه بيها بعد كدة. و للي مش فاكر اسم «هيثم نبيل» بـ نفكره أنه عمل أغنية كسرت الدنيا من كذا سنة وكان ليها فيديو كليب وهي أغنية «يا فراق» وكان طالع في الوقت اللي كان طالع فيه المطرب «هيثم سعيد» صاحب أغنية «هما مالهم بينا ياليل» وكان فيه شوية لخبطة بينهم، مين سعيد ومين نبيل! بداية الألبوم هي أغنية «مين زيِّنا» بإيقاع بوب هادي وموسيقى ناعمة، بس لخبطتنا جداً ومافهيمناش هي وطنية ولا عاطفية ولا من ده على ده عشان كلمات أول كوبليه ماينفعش تكون غير عاطفية وأنه بـ يغنيها لحبيبته، وبعد كده في آخر كوراس بـ يقول "بالحب تعيش بلادنا مايفرقش ما بينا دين"، وعشان يوضح اللبس اللي حاصل ده قال «هيثم» في آخر الأغنية ما معناه ان "الحب مش للحبيبة وبس، إنما للبلد والناس والمكان اللي انت فيه" طيب ليه اللخبطة دي؟ «بلكونة» أغنية مش عادية، روك & رول كما أُنزل، توزيع متميز بآلات الجيتار والباص جيتار وأورجن السبعينيات الشهير والدرامز، وجملة لحنية بسيطة بصوت «هيثم»، والكلمات جديدة تماماً على الأغنية العاطفية المصرية، وكتير بـ نلاقي أغاني مختلفة بس التنفيذ بـ يبقى مش كويس، إنما "بلكونة" «هيثم» وقصة بنت جيرانه طلعت تحفة فنية، وصوت هيثم فيها حلو ولايق على الستايل ده. «إحساس قديم» أغنية مبهمة شوية بسبب كلماتها، مش واضح المغزى أو يمكن اللحن ماقدرش يعمل المقاطع اللازمة لفهم المعنى المقصود، بس التوزيع أبرز صوت هيثم جداً اللي واضح انه متأثر بالكلمات بشكل شخصي وغناها بـ"إحساس قديم" قوي يحسب له. أغنية «بحبها» هي نفسها أغنية «مين زيِّنا» بس من غير الجزء الوطني اللي في الأخر، وبدل الكوبليه الأخير فيه صولو ظريف بآلة الأبوا. جايز دي معمولة للي مش وطنيين مثلاً أو عشان تتسمع لوحدها بعد ما موجة الوطنية تهدى؟ مش عارفين. «هوصل» أغنية كويسة في فكرتها بس اللحن للأسف شبه 100 أغنية قبل كدة والتوزيع ماقدرش يعالج المشكلة دي بالذات مع إيقاع الروك المصمت، وحتى الجزء اللي كان ممكن يكون فيه صولو جيتار إليكتريك يحيي الأغنية شوية، هيثم لعب الصولو بطريقة الـ "تيرارارا" بصوته، وده لسبب مش مفهوم، بس عجبنا أداء «هيثم» فيها عموماً عشان إحساسه القوي بالتجربة الإنسانية في الكلمات. اللي سمع أغنية «شعبنا قامت قيامته» اللي غناها «هيثم» بعد أحداث مبارة الجزائر هـ يفتكرها لما يسمع آخر أغاني الألبوم «مصركل زمان زمانها» من ألحان «هيثم» برضه واللي الكورس بتاعهم تقريباً متطابق في اللحن مع إختلاف الكلمات، وده إقتباس ذاتي، ويمكن هو عمل كده عشان الأغنية الأولى ماخدتش حقها في العرض والإنتشار لأنها كانت شبه ممنوعة لأسباب سياسية. اللحن قوي جداً والجملة اللحنية للكوراس فيها عَظَمة وهـ تحرك مشاعرك الوطنية، والتوزيع خدم اللحن بصوت الباص العالي والملعوب بحرفنة، مع السقفة الجماعية أثناء غناء الكورال، فعلاً كنا محتاجين أغنية وطنية "متعوب فيها" شوية وسط كل الحاجات العجيبة اللي سمعناها اليومين دول. كل الأغاني كلمات الشعراء «أسامة محرز» و«جلال إسماعيل» وألحان «هيثم نبيل» وتوزيع «أحمد الموجي». الألبوم فعلاً رائع، صحيح فيه شوية ملاحظات بس فيه حاجة جديدة هـ تخليك عايز تسمعه كل شوية، يمكن عشان صوت «هيثم المميز»، أو عشان الكلمات، بس إحنا بـ نرشحه كواحد من أهم ألبومات 2011، والأيام الجاية هـ تثبت ده.

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن