مأكولات سريعة مطاعم in الزمالك Cairo, Egypt

مطاعم

لوجوز: وجبات سريعة مختلفة في الزمالك
اصدرت في: 13/11/2014

أوقات الواحد بـ يبقى نفسه في وجبة سريعة ولكن مختلفة عن اللي معتاد يطلبها وهو زهقان في المكتب، أو في البيت لما ما يبقاش عايز يبذل أي مجهود غير أنه يأكل. "لوجوز – Lujo's" في الزمالك بـ يقدم لك أكلات مطاعم الوجبات السريعة مجمعة في منيو واحد؛ ومش بس كده، ده بـ يقدمها بشكل مختلف. بما أن المطعم في الزمالك، توقعنا أن مساحته تكون ضيقة؛ وفعلًا ظننا كان في محله. الجزء الداخلي للوجوز عبارة عن كاونتر متخفي في صورة بار بمجموعة كراسي عالية ملونة، ما ننصحش أنك تقعد على البار لأنك هـ تبقى قاعد وجهًا لوجه مع الكاشير، أما الجزء الخارجي فهو عبارة عن ترابيزة خشب بكرسيين برضه ما ننصحش أنك تقعد عليها إلا لو بـ تحب تأكل على أنغام موسيقى الورش –فيه ورشة جانب المحل- أو بـ تحب القطط لدرجة أنك تشاركهم وجبتك. بعد نظرة سريعة في المنيو، قررنا اختيار الآتي: Wasabi Shrimp Tempura بـ (38 جنيه)، وبيتزا مشروم ترافل (44 جنيه)، وكطبق جانبي اختارنا أصابع كوسة مقلية (10 جنيه) مع صوص المايو بستو كغموس (6 جنيه). قُدم لنا الأكل بعد فترة مش قليلة على ألواح خشبية شبه ألواح التقطيع، أما الكوسة المقلية فكانت في جردل معدني بسيط زي طريقة التقديم المعتادة في معظم المحلات دلوقت. اختيارنا الأول عبارة عن خبز التورتيا فيه جمبري مقلي (مغطى بطبقة مقرمشة من الدقيق والبيض ونشا الذرة) بصوص التمبورا، مع خيار مخلل بالسمسم وكُرات، والمفروض أن فيه واسابي ولكن للأسف ما حسيناش بطعمه نهائي؛ الملاحظة الأخيرة دي كانت العيب الرئيسي للساندوتش الرائع، المكونات كلها متجانسة وأحلى حاجة أن المكونات كانت طازجة وبالتالي طراوة الكُرات والخيار أضافت نكهة للجمبري من غير ما تأثر على قرمشته. حجم الساندويتش كان صغير نسبيًا كعادة أي ساندويتش معمول من خبز التورتيا. بيتزا المشروم ترافل كانت مثالية؛ بداية من كونها معمولة بالطريقة الإيطالية التقليدية حتى المكونات المتناغمة. البيتزا مكوناتها كالآتي: زيت الترافل، وهو أفخم أنواع المشروم في العالم، مع مشروم عادي وأوراق الجرجير عليها رشة خل بلسمي. في الأول استغربنا حدة طعم زيت الترافل، إلا أنه كان نكهة جديدة لنوع بيتزا معتاد ممكن تلاقيه في أي مكان ثاني. طبقة العجينة الرقيقة كانت مثالية في التسوية، مقرمشة من الأطراف من غير ما تكون محروقة والمنتصف قرمشته مناسبة جدًا مع طراوة المكونات اللي موضوعة عليها زي الجبن، صوص الطماطم والمشروم؛ الأخير للأسف كانت كميته قليلة جدًا. أوراق الجرجير كانت طازجة ووازن حدة طعمها وجود الخل البلسمي. الكوسة المقلية كانت ممتازة؛ بالرغم من أن سهل جدًا طبق جانبي زي ده يبوظ لأن الكوسة نفسها كخضار سريعة التسوية، ولكنها كانت طازجة: مستوية مضبوط ومقرمشة، أما طبقة النشا الذرة والدقيق بالبيض كانت مناسبة وشهية. غموس البستو والمايونيز كان جديد بالنسبة لنا، مضبوط من حيث الطعم، ولكن نعترف أننا أساءنا الاختيار لأن في نظرنا طبق جانبي زي ده كان محتاج غموس أخف من حيث القوام والمكونات. آخر اختياراتنا للحلو كانت كوكيز بطعم زبدة الفول السوداني (9 جنيه)، للأسف دي كانت الأسوأ من حيث الشكل والمضمون؛ حجمها صغير ورطبة جدًا، نكهة زبدة الفول السوداني كانت خفيفة جدًا وما قدرتش تعوض عن ردائة الحلو ككل. لوجوز مناسب جدًا لطلبات التيك أواي والمنزل، خصوصًا لو عدد الناس اللي معك كبير. صحيح ممكن يكون فيه أسعار أحسن في مطاعم وجبات سريعة كثير، إلا أن جودة الأكل مختلفة اختلاف عظيم هـ تحس به.

...

فليم أند جريل: شاورما أكثر في الزمالك
اصدرت في: 04/12/2013

الشاورما أكلة بسيطة من أشهر الأكلات في مصر، دائمًا لو الواحد يكون جعان أول حاجة بـ يفكر فيها هي الشاورما، وكل شوية فيه محلات شاورما بـ تفتح أكثر وأكثر. مطعم "فليم أند جريل" فتح في شارع البرازيل المشهور في الزمالك مكان "نولا كب كيك" القديم، شكل المكان بسيط وقديم شوية، فيه مكان للقعدة مكون من ترابيزات عالية وكراسي زي أي محل شاورما عادي والقعدات مش كثيرة. المنيو مكتوب على البورد اللي وراء الراجل بتاع الكاشير وفيها أكلات متنوعة كثير لدرجة تخليك مش عارف تطلب إيه في الأول، المقبلات كان فيها بطاطس (7 جنيه)، كبيبة (16 جنيه)، وسمبوسة بالجبنة الكيري (12 جنيه)، وكان فيه ساندويتشات مثلاً زي كفتة (25- 30 جنيه)، شيش طاووق (18- 26 جنيه)، تيكا تشيكن (19- 27 جنيه)، وشاورما فراخ (9 – 19 جنيه)، وكثير من الساندويتشات دي موجودة كأطباق رئيسية بـ تُقدم مع الأرز والخضار. عندهم كمان سلاطات زي التشيكن سيزر (30 جنيه)، سلاطة عادية "بلدي" (10 جنيه)، تبولة (16 جنيه)، سلاطة طحينة (4 جنيه)، ثومية (6 جنيه) وبابا غنوج (5 جنيه). قررنا نطلب ساندويتش شاورما لحمة وسط (16 جنيه) وساندويتش جريل تشيكن فيليه وسط (20 جنيه) وطبق تيكا تشيكن (47 جنيه) وواحدة سلاطة عادية "بلدي" وثومية وبطاطس فرايز وجينا نسأل عن الحلو اللي كان موجود يومها بس للأسف ما كانش فيه. الأكل وصل بسرعة، وجاء لنا في أطباق من غير صينية ودي حاجة غريبة على مكان للأكلات السريعة، شاورما اللحمة كانت معمولة كويس بس كان فيها توابل أعشاب كثير، ساندويتش التشيكن جريل كان طعمه لذيذ جدًا وكان مُقدم مع صلصة لونها بمبي، طبق التشيكن تكا كان مكون من فراخ متبلة حلو أوي مع أرز وخضار مع أننا لقينا قطعة عظم في الفراخ بس ده ما منعناش من الاستمتاع بالطبق. البابا غنوج كان طعمه هائل ونكهته قوية، الثومية كانت حلوة بالرغم من أن الكمية كانت صغيرة بالنسبة لسعرها، السلاطة العادية "البلدي" ما كناش مبسوطين منها أوي، الفرايز كان طعمها هائل كان لونه ذهبي وبـ يقرمش والملح بتاعه مضبوط. الأكل في "فليم أند جريل" كان متوسط والمكان كان مريح وبسيط، وفي مجال الشاورما المطعم مافيهوش جديد عن اللى موجود في السوق. 

...

كازيرا: كوفى شوب حكاية في الزمالك
اصدرت في: 25/11/2013

مطعم وكوفى شوب "كازيرا - Casera" بالزمالك مش مجرد مطعم أو كوفى شوب عادى، أولاً لأنه قريب جدًا من ساقية عبد المنعم الصاوى وبالتالى أكثر رواده من المثقفين والفنانين، بس اللى مش عادى بقى أن أصحابه واللى بـ يعملوا فيه مثقفين ومبدعين فى مجالهم. العنوان سهل، لو هـ تروح من وسط البلد ممكن تركب أى مواصلة رايحة الزمالك أو جامعة الدول ولو من الجيزة ممكن تركب أى مواصلة للكيت كات وتعدى الكوبرى، ولو هـ تروح بعربية ما تقلقش لأن فيه مكان ممكن تركن فيه، هو عند أول ناصية يمين على نفس صف الساقية. "كازيرا" مش كبير قوى عبارة عن طابقين بـ يفصلهم يا دوب 5 درجات سلم تقريبًا، إضاءة المكان دائمًا هادئة، المعاملة من أكثر الحاجات اللى بـ تميز المكان وهـ تخليك ترجع له مرة ثانية، ده طبعًا غير الأكل اللى هما مبدعين فيه جدًا وبـ يُقدم بشكل شيك، الأسعار لا تقارن أبدًا بالمطاعم المجاورة له فى الزمالك مع أن جودة الأكل والمشروبات عالية جدًا. إحنا دائمًا لما كنا بـ نروح كنا متعودين نطلب مشروبات بس وكانت بـ تقدم بشكل هائل جدًا، يعنى القهوة مثلًا كانت مضبوطة تمام والوش مش بـ يروح بعد شفطتين، البُن كمان واضح أنه نوع فاخر وحسب الطلب محوج أو سادة (5 جنيه)، والهوت شوكلت حلو جدًا وحجمه كبير قوى ينفع نشربه وإحنا بـ نحكى حكاوى كثير (10 جنيه) وده يعتبر سعر هائل جدًا مع جودته العالية. العصائر هنا فريش 100% وطبيعية و"شعبان" بـ يعملها بضمير جدًا والشوب كبير وقطع الفاكهة كثيرة، عصير المانجو (12 جنيه) وعصير الفراولة (10 جنيه). الأكل بقى فيه إبداعات خاصة، لأن الشيف "حمادة" لازم يضع لمسته فى أى أكل بـ يقدمه حتى لو كان ساندويتش، إحنا من عادتنا مش بـ نحب نأكل الحواوشي بره البيت لكن سمعنا من أصحابنا أنهم بـ يقدموه مختلف، فى الأول استغربنا هـ يكون مختلف إزاى يعنى، لما جاء لنا الأوردر كان مختلف فعلاً فى شكل تقديمه لأنه كان مقطع ومقدم بشكل لطيف وكانت رائحته حلوة مش فيه دهون كثير وكانت اللحمة متبلة تتبيلة طعمها مختلف وفيها شرائح زيتون أسود وعلى الوجه مسطردة وكاتشب وأهم حاجة أن اللحمة طازة وبـ ينزل معاه بطاطس (12 جنيه) وغير كده شبعنا جدًا. البانيه كمان عندهم مميز لما أصحابنا طلبوه كان متبل بخلطة مقرمشة ودى خلطة خاصة بهم وأحيانًا بـ يكون مقدم مع شرائح الجبنة حسب ما نحب، والساندويتش حجمه كبير لكن بصراحة كان كبير بزيادة شوية، وده من إبداعات الشيف "محمود" (14 جنيه الحجم الكبير والمتوسط 10 جنيه) وفيه إمكانية إضافة باكيت بطاطس حجم متوسط (3 جنيه) أو إضافة جبنة (3 جنيه) أو مياه غازية (6 جنيه). ومن أهم الحاجات اللى بـ تميز المكان الألفة بين رواد الكوفى شوب والعاملين فيه والابتسامة و الاهتمام برأينا فى الأكل، أحجام الأكل هنا كبيرة يعنى لما هـ تطلب ساندويتش أكيد هـ تشبع. "كازيرا" مكان مناسب جدًا لو حابب تعزم أصحابك أو أسرتك على الغذاء وخصوصًا أن أسعاره فى المتناول، والطابق الثانى مناسب للأسر أو الجروبات.

...

سيمبلى بوتيتوز: جنة الكربوهيدرات فى الزمالك
اصدرت في: 09/10/2013

"سيمبلى بوتيتوز - Simply Potatoes" إضافة جديدة للمشهد الحالي من مطاعم القاهرة بوفرة من الاختيارات طالما طبعًا لها علاقة بالبطاطس. فى ركن من أركان شارع البرازيل فى الزمالك، المحل مساحته صغيرة لكن فى الوقت نفسه يزينه أثاث شيك أبيض من كراسي صغيرة جنب بعض أمام طاولة، مع سلالم شكلها ظريف ألوانها مشرقة. المنيو الموجودة وراء كاونتر الطلبات عبارة عن مثال حى للتصميم المتقن من حيث الوضوح والاستخدام المناسب للألوان وده فى الحقيقة قليل فى القاهرة. نصحنا موظف من الموظفين وقت زيارتنا نطلب إيه من بين الاختيارات المدهشة. وجهونا نطلب من منيو البطاطس المشوية مع تشيلى كون كارن chilli con carne بسعر 28 جنيه، تشيز برجر (30 جنيه)، ساور كريم أند بيكون ميكس sour cream and bacon mix بسعر 26 جنيه وحتى البافالو وينجز (28 جنيه). وبعيدًا عن أطباق المطعم الجاهزة تقدر تخترع طبقك على مزاجك. قبل وصول البطاطس استمتعنا بطلب من بطاطس مقرمشة بيتى (15 جنيه)، وكانت مقرمشة، رفيعة، عليها تتبيلة مميزة من البهارات الآسيوية ومعاها صوص غنى من الهريسة. صحيح الطعم روعة، لكن الصوص كان محشور فى وعاء بلاستيك صغير كان صعب معاه نغمس قطع البطاطس الكبيرة. مطبخ سيمبلى بوتيتوز سريع بشكل مبهر، وقبل ما نخلص على نصيبنا من البطاطس المقرمشة، البطاطس المشوية كانت بـ تطلع أبخرتها وسط علب الكرتون. رغم أن صوص الباربيكيو كان مسكر شويتين وطعمه يشبه الكاتشب، البافالو وينجز والبطاطس أثبتوا أنهم مزيج ممتاز. التشيلي كورن كارن خليط رائع من اللحم المفروم، والقشطة الحامضية، أعشاب وصوص توباسكو، لكن الكريمة مع البيكون مستواهم كان متوسط نظرًا إلى أن البيكون ينقصه النكهة القوية. الصدارة فى الحقيقة كانت للتشيز برجر. البطاطس الطرية محشية خمس قطع برجر صغيرين، عليها رشة من القشطة الحامضية وإضافة لذيذة من "صوص مخصوص". اللحم كان له نكهة مدخنة شديدة وقوامه مع البطاطس كان لطيف. من بين تشكيلة حلوياتهم كان صعب نقاوم البطاطا sweet potato بالنوتيلا، البندق وآيس كريم من هاجين داز (57 جنيه). البطاطا ساخنة مع طبقة سميكة من النوتيلا وبولة الآيس كريم الفانيليا اللى ذابت فورًا كانوا مختلفين بشكل لذيذ. "سيمبلى بوتيتوز" بـ يقدم تنوع مميز من البطاطس؛ لكن اعرف أن مع الأحجام الصغيرة الموضوع هـ يبقى مكلف.

...

جوردو بوريتو: تيكس- ميكس ملخبط فى الزمالك
اصدرت في: 18/07/2013

دائمًا وأبدًا مع كل افتتاح مطعم جديد فى القاهرة نلاقى نفسنا وسط اختيار صعب. طيب نزور المطعم على طول ونبقى أول حد يعمل تقرير عنه؟ ولا نستنى عليه لما يقف على رجله ويوصل لمستوى أداءه الحقيقى؟ هو مش الأماكن دى بـ يكون أفضل أداء لها فى بداياتها؟ مش أول أيام شغله هى أحسن وقت يظهر فيها تميزه؟ طب إيه النظام بعد كام شهر؟ المستوى هـ يتحسن؟ فى حالة مطعم بـ يقدم تيكس ميكس زى "جوردو برويتو - Gordo Burrito" فى الزمالك، الإجابة هى لأ؛ واضح تمامًا أن المستوى مش بـ يتحسن. من السهل تفهم سبب الضجة اللى حصلت وقت افتتاحه؛ فن روش بـ يملأ الحوائط، جماجم خشبية مسلية عند كاونتر الطلبات، وجماجم لبقر ألوانها مشرقة على حائط ثانى، يمكن المكان صغير، بس ما ننكرش أنه ممتع. كده وصلنا لنهاية الجزء الكويس. من وجهة نظرنا أن ثلاثة موظفين شغالين على الكاونتر مش ضرورى. واحد يأخذ الطلبات، وواحد يحضر الأكل والثالث بـ يستلم الفلوس، رغم أن الأول يقدر يقوم بالوظيفة كاملة لوحده. عملية الطلب نفسها كانت معقدة شوية، يا إما كلامنا ما كانش مسموع أو تركيزهم كان مشتت. حاجات كثيرة مش موجودة، زى قطع الفراخ أو صلصة فيردى بس الأخير استبدلوه بصلصة الشطة الخضراء (توباسكو) بعد شوية مشاورات بينهم. قعدنا على واحدة من ترابيزتين قصيرين تبع المكان والأكل وصل بسرعة. أول حاجة وصلت كانت التاكو وكان بـ يُقدم فى حاجة تشبه حامل العيش التوست. وعلشان كان بـ يسرب بسرعة شوية، احتاجنا نطلب طبق. التاكو نفسه كان كافى، بـ يُقدم مع فراخ مشوية (29 جنيه)، صوص حادق (3.50 جنيه)، جواكيمولى (6.50 جنيه)، مع صوص التاكو وخس؛ نقدر نقول أن طعم النكهات كان موجود بس التوازن بينهم لأ. صحيح الفراخ كانت طعمة، كميتها كانت قليلة على الآخر وبالتالى أثر على التاكو عمومًا. عيش التورتيا كمان ما كانش كويس برضه؛ رقيق شوية فى أجزاء وناشف فى أجزاء ثانية. البوريتو باللحم المفروم (29 جنيه) ما كانش أحسن بأى حال من الأحوال. مكون من لحم مفروم، وأرز، وصوص حادق، وجبنة (4.50 جنيه) مع صوص تشيبوتل –وكمان خس رغم أننا ما طلبناش– والنتيجة النهائية كانت أرز أكثر فى البوريتو ومافيش أى أثر للحم. أحسن طبق من بين الثلاثة كان التيشز كاساديا (26 جنيه)، بس الجبن السائح فى التورتيا مش حوار يعنى! قُدم بدون أى صوص أو إضافات، وعلشان كده عملنا إضافة زيادة (3.50 جنيه). عمومًا، الموضوع كان ملخبط على الآخر؛ التاكو قُدم من غير طبق، وحتى لما طلبنا أدوات نأكل بها، كل الموجود كان شوك بلاستيكية، وأضف على كده أن مافيش حمام، وبكده مافيش طريقة تغسل بها إيدك بعد ما تخلص أكل. مع الأسعار الغالية واللى مش متماشية مع جودة الأكل، والخدمة بمستواها الضعيف، نفتكر أن جوردو بوريتو للأسف كثف كل جهوده على الشكل ونسى الأكل نفسه.

...

جريزلى: واحد من أفضل الـ American Diners فى الزمالك
اصدرت في: 26/06/2013

الحقيقة إحنا بـ نحب "جريزلى - Grizzly".. من ساعة ما روحناه فى يوم عيد ميلاد أحد أصدقائنا وحصل حاجة أشبه بـ "الحب من أول نظرة".. المكان مع الخدمة ومستوى الأكل باقة متكاملة تخلى أى واحد يستمتع بالقعدة هناك. "جريزلى" موجود فى مكان معروف فى الزمالك اسمه "Club 33" بـ يضم العديد من المطاعم زي Lino's وCoffeeShop Compnay وThe Medley وغيرها كثير، أول ما تدخل هـ تلاقيه أقصى اليمين وبـ تنزل له كام سلمة وبـ يطل على النيل، فبـ تستمتع بجو نقى ومنظر طبيعي مع الصحبة اللى معاك. رحناه وقت كان زحمة فيه –كعادته- والجرسونات كانوا خلية نحل، على الرغم أن مش عادته لكن الخدمة فى اليوم ده كان فيها ضغط على الجرسونات وكانوا ساعات بـ ينسوا طلبات لو طلبنا منهم كذا حاجة، لكن نلتمس لهم العذر. زيارة واحدة لصفحة جريزلى على الفيسبوك كافية أنها تخلى لعابك يسيل، بدأنا قعدتنا بطبق اسمه Sizzling Chicken (54.99 جنيه)، ومن الستيك طلبناSmother Steak (79.99 جنيه)، ولأن كان عددنا كبير كمان قلنا نجرب Pizza BBQ Chicken (34.99 جنيه)، الفراخ والستيك كانوا أكثر من رائعين، حتى كمية الستيك كانت أكبر بكثير من الفراخ، وكل طبق لك اختيارين جانبيين من كذا اختيار زي البطاطس البيوريه أو المحمرة أو الكورن أو الأرز أو الخضار السوتيه أو الباستا.. إلخ، البيتزا حجمها كبير لكن ما عجبتش أصدقائنا زي اللحوم والفراخ، يمكن ده لأنهم American Diner مش إيطالى، لكن كانت لطيفة. فى الحلويات جربنا الكريب بالموز (6.99 جنيه) وصوص النوتيلا (21.99 جنيه) كانت لطيفة ومبظبظة شوكولاتة وبالتالى هـ تحتاج تشرب بعدها مياه كثير (6.99 جنيه للحجم الكبير)، ومن المشروبات ممكن تختار الطلب التقليدي كوكا أو دايت كوكا (9.99 جنيه) أو دابل أسبريسو (14.99 جنيه) أو من السموزي Arizona Smoothie (23.99 جنيه)، أو ممكن تجرب حاجة جديدة زي الليمون بالبطيخ، بس بعد كده تفاجئنا أنهم حسبوا فى الآخر الليمون لوحده (9.99 جنيه) وصوص البطيخ لوحده (7.99 جنيه) وده غالبًا ميكس هما عاملينه مش موجود فى المنيو، كل المشروبات كانت منعشة وخاصة الليمون بالبطيخ، مزيج ناجح وفاجئنا جدًا بإحساسه المنعش. بـ يضاف على الحساب بتاعك 12% خدمة، وممكن تقيم عيد ميلاد أو مناسبة أحد من أصدقائك هناك، ويفضل تحجز لأن المكان دائمًا زحمة حتى فى أيام الأسبوع العادية، والأكيد من ده كله أنك هـ تتبسط بكل شيء هناك فى واحد من أفضل أماكن الـ Amercian Diners فى القاهرة كلها مش الزمالك بس.

...

عجينة: فطير حلو وحادق بجودة حلوة في الزمالك
اصدرت في: 05/06/2013

الفطير بأنواعه سواء كان حادق أو حلو أو مشلتت أو أي نوع ثاني له عندنا معزة خاصة بسبب طعمه الجميل واللذيذ مع حشوته الرائعة، محلات الفطير في مصر عمومًا وفي القاهرة خاصة لها شكل معين وأسلوب ورائحة تقدر تجيبك من آخر الشارع زي ما بـ يقولوا، محل الفطير اللي هـ نكلمكم عنه النهارده شكله مش زي شكل محلات الفطير العادية ولا رائحة نفاذة تقدر تجيبك من آخر الشارع، إنما له شكل مميز وجديد على القاهريين اللي بـ يبحثوا عن كل جديد، المحل اللي هـ نكلمكم عنه اسمه "عجينة". من حوالي أسبوعين لفت نظرنا على الفيسبوك إعلان لمطعم جديد فتح في الزمالك اسمه "عجينة"، على طول دخلنا على صفحة المطعم وتفرجنا على الصور الموجودة العادية اللي بـ تعبر عن أي فطاطري وكانت منهم صورة المنيو الظريفة والصغيرة، لكن إحنا في كايرو 360 ما تعودناش أننا نحكم بالعين لازم كمان نتذوق علشان نقول رأينا بموضوعية، توجهنا لشارع شجرة الدر في الزمالك في رقم 32 بجانب محل عم حواوشي وكافيه الحارة هـ تلاقوا محل صغير قوي بداخله فرنين كبار ورخامتين لعمايل الفطير ومن الخارج الكاشير وديكور حديث ولوجو بحروف عربية وإنجليزية متداخلة بـ يكونوا كلمة "عجينة". قبل ما نروح كنا شوفنا المنيو على الفيسبوك لكن قولنا نلقي نظرة كمان مرة علشان نشوف هـ نأخذ إيه، اللي كان بـ يأخذ مننا الطلب تقريبًا وقت ما روحنا كان فيه حاجة مضايقاه لأنه ما كانش متعاون خالص وكنا بـ نسأله عن صنف من الأصناف واحد ثاني كان هـ يوضحه لنا لكن هو قاطعه وقال لنا: "مش موجودة دي" وبرضه كنا بـ نسأل عن فطيرة النوتيلا بنفس الوجه والأسلوب اللي مالوش طعم قال: "أنت عاوزها بمارشميللو ولا نوتيلا بس؟"، طلبنا من المنيو الظريفة والكاشير اللي مش ظريف فطيرة سجق (27 جنيه) وفطيرة Mixed Cheese 22 جنيه) وفطيرة نوتيلا (30 جنيه)، انتظار حوالي 10 دقائق وتفاجآنا بشخص ظريف قوي وابتسامة نسيتنا الشخصية الأولى بأن "الطلب خلص" السرعة حلوة مافيش كلام بس أهم حاجة ما تكونش كروتة. الفطير كان سخن قوي وانتظرناه علشان يبرد شوية، فطيرة السجق كانت رائعة حجمها معقول وجودة العجين نفسه كويسة طازجة لكن رقيقة شوية والسجق كان طعمه يجنن فيه تتبيلة حلوة وكميته مناسبة ومعقولة بالنسبة لسُمك الفطير، أما فطيرة الجبنة دي كانت خطيرة بكل المقاييس نفس جودة العجينة ورقتها مع تشكيلة من أنواع الجبن ما بين جبن شيدر وموتزاريلا وجبن رومي وكمان جبن كريمة مع قطع من الزيتون، خلصنا السجق والجبنة وخلاص كنا حاسين أننا شبعنا مع أن حجم الفطير مش كبير كفاية، دخلنا على فطيرة النوتيلا اللي كانت أصغر من اللي فاتوا مع أنها أغلى، الفطيرة كانت معقولة محشية نوتيلا بس مش كثير والفطير عليه من فوق كمية من النوتيلا علشان تزود الطعم شوية لكن ما كانتش مبهرة. الفطير في "عجينة" حلو وجودته كويسة لكن بسبب وجوده في الزمالك الأسعار بـ تكون مبالغ فيها شوية، لكن استمتعنا بطعم الفطير ونتمنى أنهم يحافظوا على مستواه المميز ده ويكون الكاشير مش متضايق وهو شغال.

...

أسماك الجمهورية: عربة تقليدية لبيع الأسماك فى الزمالك
اصدرت في: 12/07/2012

ساعات كثير كل اللى عاوزه فى القاهرة بـ يبقى أكلة سريعة ورخيصة. ونظرًا لأن الزمالك بالفعل فيها نقص فى عدد عربيات الفول والطعمية التقليدية، فالمكان ده بديل لطيف لو كنت مستعجل ومحتاج حاجة بسيطة تشبعك. فى شارع 26 يوليو بين شارع شجرة الدر وشارع صالح أيوب، «الجمهورية» يعتبر مكان أساسى فى الزمالك وموجود هناك من سنين طويلة. مافيش أى حاجة مبهرة نقدر نوصف بها المكان، هو عبارة عن فتحة صغيرة فى الحائط أمامها عربية السمك مباشرة. هـ تلاقى مكتوب عليها "فيش كارت"، خليك مركّز علشان تعرف توصل لها. من المنظر العام، المطبخ كان مصدي شوية، بس شكله كان نظيف ومترتب كويس. المنيو كانت مليانة حاجات، سواء المطبوعة، أو منيو التيك أواي والمعلقة على الأبواب. سواء كنت هـ تقعد أو هـ تأخذ أكلك معاك، هما كام دقيقة ويكون أكلك وصل. مافيش تضييع وقت ودى كانت حاجة كويسة جدًا. هـ تلاقى ترابيزة صغيرة وكراسى على الرصيف لو حابب تقعد وتستمتع بوجبتك هناك. بالنسبة للمقبلات هـ تلاقى أنواع من الشوربة والسلاطات. الشوربة من ضمنها الجندوفلى أسعاره بين 15: 18 جنيه. السلاطات من 1: 10 جنيه زى باذنجان مخلل، وسبيط، وسلاطة خضراء تقليدية فيها خس، وطماطم وبصل. لو بـ تدور على كميات أكل أكبر أو وجبة لأكثر من فرد، الجمهورية بـ يقدم وجبات من 15: 30 جنيه) وأسماك بالكيلو من 40: 85جنيه. الوجبات بـ تُقدم مع أرز، ومخلل، وسلاطة واختيارك من السمك، فى حين أن كيلو سمك الفيليه المشوى سعره معقول (40 جنيه). رغم كده، الساندويتشات هـ تفضل برضه هى الأسهل والأكثر شعبية، تقدر تختار بين العيش البلدى أو الفرنساوى مع سمك (مقلى أو مشوى، كاليمارى، جمبرى، فيليه وأنواع ثانية مش معروفة قوى). الأحجام الموجودة هى الوسط والكبير. ساندويتش جمبرى وسط فى عيش بلدى بـ 7 جنيه بـ يتكون من جمبرى مقلى عليه طحينة. كمان استمتعنا بساندويتش سمك فيليه فى عيش فرنساوى له نكهة مميزة، مع جرعة الليمون والطحينة عليه خلت الطعم حلو جدًا. رغم أن الجمهورية عنده خدمة توصيل، لكن أنك تستمع بساندويتشك فى المكان غالبًا بـ يبقى أحلى، والشباب اللطيف الموجود على الكاونتر هـ يشجعوك تعمل كده.

...

على بابا دونر كباب: شاورمة تركي سريعة ع الواقف فى الزمالك
اصدرت في: 31/05/2012

جننونا على تويتر وصفحتهم على الفيسبوك، كل شوية نلاقى Post بـ يقول "ترقبوا".. "قربنا نفتح".. "انتظروا الدونر التركي".. وينشروا صور مغرية للدونر خلت لعابنا يسيل من قبل المكان ما يفتح، وإحنا نسأل وغيرنا كمان يسأل، طيب هو فين فى الزمالك؟... تشويق.. تشويق.. وأخيرًا فتح. موجود فى شارع طه حسين مجاور لمحل المخبوزات «مانش & بيجل - Munch & Bagel»، أول مرة نجرب الشاورما التركي كانت لما سافرنا ألمانيا لأن الأتراك هناك منتشرين جدًا ومافيش مكان ما تلاقيش لهم فيه عربية أو مطعم صغير بـ يعمل ساندويتشات أو أكلات سريعة، وكمان من فترة كايرو ما كانش فيها أى محلات مأكولات تركية، لكن دلوقت كل فترة بـ نسمع عن مكان جديد، وده كان دافع أننا نتحمس ونروح نجربه. المكان صغير جدًا ومافيش ترابيزات تقعد عليها، ساندويتشك بـ يتحضر أمامك وبـ تأخذه وتمشي أو تأكله أمام المحل ع الواقف زي ما ناس كثير كانت بـ تعمل هناك. فيه واجهة زجاج بـ تفصلك عن الناس داخل المطبخ والكاشير، الزجاج نظيف وقريب جدًا لدرجة أن واحد من أصحابنا دماغه خبطت فيه بس ربنا ستر الحمد لله، الاختيارات مش كثيرة، المنيو فيها 4 حاجات بس، يا إما بـ تختار ما بين ساندويتش دوروم دونر Durum Doner (16 جنيه) وده بـ يتعمل فى عيش رفيع ملفوف زي العيش الصاج وداخله بـ يحط لك المكونات من خس، طماطم، الصوص اللى بـ تختاره، وبصل، شطة (لو حابب).. إلخ، فى حين أن الباربار دونر Barbar (19 جنيه) عبارة عن ساندويتش زي ربع رغيف من العيش السميك وفيه نفس الاختيارات من المكونات اللى بـ تختارها من أمامك. لو حابب تأخذ الساندويتش كومبو معاه بطاطس وبيبسي بـ تزود 10 جنيه، والبيبسي فقط بـ 6 جنيه والبطاطس المحمرة بـ 9 جنيه وبـ يعطوها لك فى كوب كبير. الساندويتشات طعمها حلو وطعم اللحم كان رائع ومِستوي كويس بس الحاجة الوحيدة اللى استوقفتنا أن الإضافات بـ تكون كلها من فوق سواء خضار أو صوص وبالتالى لما بـ نأكل بـ نخلصهم قبل ما نوصل للحم نفسه أكننا بـ نأكل ساندويتش لحم سادة، رأينا أن يتحط المكونات ميكس مع بعض مش طبقات علشان نحس بالطعم ممزوج مع بعض مش منفصل زي ما حصل معانا، بس ده ما يمنعش أننا استمتعنا به. البطاطس المحمرة حلوة وسمكها كان كويس، كانت مقرمشة وبره وطرية من جوه، ما نقدرش نقول عليها حاجة، تمام. الناس هناك لطاف والخدمة سريعة، لما كنا هناك سألنا على نوع صوص كنا قرأنا عنه فى صفحة الفيسبوك "صوص التتذيكي" لأن له فوائد غذائية فـ لقينا حد من طاقم العمل -غالبًا صاحب المكان- بـ يسألنا إحنا عرفنا المكان إزاي، وده مؤشر كويس أنهم متابعين مدى تأثير الدعايا بتاعتهم، برافو. المكان لطيف، لسه فى البداية بس إحنا مستبشرين لهم أنهم هـ يكونوا أفضل كمان.

...

توب دوجز: أحلى هوت دوج موجود في الزمالك
اصدرت في: 26/04/2012

بقى له أسابيع بـ يغرينا بصور الهوت دوج على الفيس بوك وتوتير، ومسابقات علشان يتعرف على معلوماتنا عن الهوت دوج، آخيراً فتح «توب دوجز – Top Dawgs» بعد ما انتظرناه كثير. موجود في شارع زحمة جداً في الزمالك هو شارع ابن نبيه، ما بين «كافيه بين& تي ليف» و«كرامبز» توب دوجز أول محل متخصص في هوت دوج في القاهرة، سهل جداً أنك تعرف المحل في الشارع علشان علامته الحمراء الواضحة وألوانه الرمادي الداخلية. هو من الداخل بسيط جداً فيه مكان للطلبات ومكان وقوف، «توب دوجز» من أحلى الأمكان اللي ظهرت في القاهرة مؤخرًا. السوسيس مختلف في وصفته وطريقة صنعه، ولأنه مصنوع من فريق توب دوجز خصيصاً للمحل فصعب أنك تلاقيه في أي مكان تاني للبيع. العيش مصنوع خصيصاً في مطعم مولينو، هو 100% منتجاته أورجانيك أو عضوية ومن غير أي مواد حافظة، هو صابح جداً وبـ يستخدم بس في نفس اليوم المصنوع في. أنواع الهوت دوج هناك كثيرة جداً وجوعتنا جداً، فيه أنواع غير تقيليدية زي "مركيز دوج" وده عبارة عن سوسيس من اللحم الضاني مع الهريسة والمسطردة وبصل متحمر بـ 38 جنيه، و"براتورست دوج" وده سويس من لحم العجل ومخلل ملفوف ومسطردة صفراء. كان فيه أنواع تانية زي نيويورك هوت دوج، شيكاغو دوج وباربيكيو بيكون دوج. ممكن كمان تختار ما بين عيش الباجت أو عيش السوفت بريد للساندويتش. إحنا في الأخر قررنا نطلب توب هوت دوج الأوريجينال بـ 23 جنيه وأضفنا عليه جبنة شيدر بـ 2.50 جنيه ودوج جبنة تشيلي بـ 28 جنيه والبلو تشيز دوج بـ 29 جنيه. كلهم حجمهم كبير، وكلهم بـ يقدموا في باسكت وطعمهم رائع زي شكلهم بضبط. الأوريجنال هوت دوج كان معه كاتشب، مسطردة وبصل. الجبنة المضافة كان اختيار موفق، كل المكونات مع بعض كانت رائعة وطعمها لذيذ. التشيلي هوت دوج كان حلو جداً، طعم التشيلي كان مغرق السويس مع قطع الهاليبينو ومغطى بالجبنة كان رائع. أطلب من العامل أنه يسيح الجبنة كويس. البلو تشيز اختيار بديل للهوت دوج الكلاسيك بس كانت حلو جداً. ممكن تطلبه مع الخس والجبنة في عيش باجيت هـ يكون إختيار خفيف وحلو للغذاء. البطاطس المحمرة كانت طبق جانبي مع الساندويتش، كانت محمرة كويس ومقرمشة تعتبر من أحلى البطاطس إللي أكلنها في القاهرة، ورغم أننا شبعنا بس أكلنا البطاطس كلها. لو حابب تعمل الهوت دوج بتاعك، المنيو بـ تقدم مكونات وإضافات مختلفة وكثيرة. الكاتشب، المسطردة، المايونيز، الباربيكيو صوص كل دي إضافات مجانية، بس كل ما تختار إضافات مختلفة بـ تدفع عليها. أول مرحلة من الإضافات زي صور كريم التوباسكو، الفلفل الحار المكسيكي والمخلل بـ 2.5 جينه للواحد، أما المرحلة الثانية للإضافات بـ 4.5 جنيه للبيف بيكون، البلو تشيز والفجل. الحقيقة أن مافيش حاجة ماعجبتناش في «توب دوجز»، السوسيس كان طعمه تحفة، العيش أورجانيك والإضافات كثيرة ومختلفة والبطاطس المحمرة رائعة.

...

شاهد المزيد
مواضيع خاصة

النهارده في القاهرة: مزيكا من كل شكل ولون

بعد بداية ساخنة جدًا لفعاليات الأسبوع ده رجعت القاهرة تاني تلاعبنا على الهادي، لكن لازالت وفية للتنوع والاختلاف والتميز. نبتدي جولتنا في فعاليات النهارده من المسرح