القاهرة الجديدة مطاعم in Cairo, Egypt

مطاعم

أروما لاونج: أكل إيطالي متنوع من اللي قلبك يحبه في القاهرة الجديدة
اصدرت في: 21/08/2016

نادرًا لما نروح مكان ويكون الغالب عليه أنه كافيه ويطلع أكله حلو، وده اللي حصل لنا في زيارتنا لأروما لاونج – Aroma Lounge في بوينت 90 في التجمع الخامس. المكان كبير جدًا وفيه قاعدة خارجية للي عاوز يدخن وداخلية في التكييف. قعدنا جوه في الدور الثاني، وطلبنا المنيو اللي كان متنوع جدًا مش بس أكلات إيطالية، لا ده كمان فيه برجر وساندويتشات وشوربة جنب المشروبات اللذيذة والبيتزا والمكرونة. طلبنا بيتزا مارجريتا (40 جنيه) ومكرونة سي فوود فيتوتشيني (80 جنيه) وكابتشينو (18 جنيه) وعصير ليمون (17 جنيه) وموهيتو (25 جنيه). الحقيقة أننا كنا مستعجلين ولأول مرة الأكل يجي بسرعة، الأكل وصل في ربع ساعة تقريبًا ودي تعتبر معجزة. البيتزا كانت رفيعة زي ما بنحبها بالضبط ومقرمشة والتوابل عليها رائعة، من كتر جمالها ما كناش عاوزينها تخلص. أما المركونة فبرضه كانت تحفة فنية، غنية بالمكونات البحرية من كاليماري وجمبري وبلح البحر، والصوص كان مضبوط لا تقيل قوي ولا خفيف كأنه شوربة، الحقيقة الأداء كان محترف جدًا ولا يعلى عليه، وفعلًا حسينا أن القائمين على المكان مهتمين بكل تفصيلة فيه. الموهيتو كان متوازن ومنعش جدًا، والكابتشينو كان مضبوط، أما عصير الليمون فلازم نتكلم عنه شوية، لأنه مش أي حد بيعرف يعمله مضبوط كده ومتوازن زي ما اتقدم لنا، العصير كان مسكر وفريش وعليه رغوة ومعاه نعناع، كأنهم بيودعونا بيه قبل ما نمشي بتحية لطيفة. كان نفسنا نجرب الحلو بس لأسف الأنواع اللي كنا عاوزين نطلبها ماكنتش موجودة في وقت زيارتنا ماكنش فيه إلا بروانيز وتشيز كيك، وإحنا كنا عاوزين نجرب حاجة مختلفة. زيارتنا لأروما لاونج كانت مبهجة لأقصة درجة وأكيد مش هتكون أخر مرة.

...

بوليفارد: أكلة محبطة في مول بوينت 90
اصدرت في: 18/08/2016

المطاعم عندها ميزة هايلة وهي إنها بتقدر تخلي زوارها يحسوا أنهم في مكان مختلف عن طريق الديكور والأجواء، وطبعًا نوعية الأكل. "بوليفارد - Boulevard" في بوينت 90 مول استوحى ديكوراته من فيلمThe Great Gatsby ، وقدر يقدم اللمسة المميزة للقرن العشرين – وتحديدًا فترة الأربعينات – اللي هتلاحظها من الخشب اللي داخل في كل حاجة من الفرش للحوائط. المكان هناك فعلًا مريح وفيه نوع من الأناقة. الأكل عند بوليفارد معظمه من المطبخ الأوروبي، يعني باستا وبيتزا من إيطاليا، فيل شنيتزل Veal Schnitzel من ألمانيا، وأكلات ثانية مناسبة لكل الأذواق. نبدأ مع المقبلات اللي طلبنا منها بعد جولة في المنيو الضخمة طبق تكس ميكس فرايز (40 جنيه) ومعاه طبق تريو بلاتر (61 جنيه)، وصحيح المطعم كان تقريبًا فاضي يومها – يمكن كان في ترابيزة أو اثنين مشغولين – لكن برضه الأطباق وصلت متأخر. البطاطس وصلت على طاسة ساخنة، وعليها لحمة مفرومة وجبنة وفوقهم شرائح هالبينو. المشكلة إن البطاطس واضح إنها من نوع ردئ – رغم إنهم كاتبين في المنيو إنها بطاطس بيتي– وكانت رفيعة جدًا ومالهاش طعم. أما اللحم المفروم فكان طعمه غريب شوية، وعليه جبنة بيكورينو وموتزاريلا طعمهم حلو مع بعض، بس مش ماشي مع باقي مكونات الطبق. نروح للتريو بلاتر المكون من موتزاريلا رولز وتشيكن ستربس وفيش فينجرز ومعاهم ثلاثة أنواع صوص، مارينارا وهوني مسطرد و1000 أيلاند. الستربس كانت في حجم الناجتس، وتتبيلتها هايلة وكمان مقرمشة من بره وطرية من جوه، ونقدر نقول بكل ثقة إنها أحلى حاجة في الطبق. رغم إن الموتزاريلا رولز كانت متماسكة، بس طعمها كان غريب شوية وواضح إنها مش طازة أما الفيش فينجرز فكانت مقرمشة بس المشكلة إنها كانت مملحة جدًا ومستواها يعتبر قليل جدًا بالمقارنة مع باقي مكونات الطبق. نروح للأطباق الرئيسية، واللي اخترنا منها طبق بوليفارد المخصوص فيل شنيتزل (112 جنيه) مع طبق بيف مع صوص ميكس تشيز (121 جنيه) وبرجر جبنة (51 جنيه)، وبلّعنا الأكل بسموزي بطيخ (28 جنيه) ومانجو (30 جنيه) ومعاهم عصير اسمه شد انتباهنا وهو ستروبيري أجو جو Strawberry Ago Go (30 جنيه). نبدأ مع البيف والجبنة اللي معاهم طلب أرز أبيض وبطاطس محمرة. الأرز كان مستوي كويس، بس مافيش أي طعم أو بهارات وكمان شكل التقديم نفسه مش لطيف. أما البيف فكان عظمة، طعمه جميل وعمل شغل ممتاز مع صوص الجبن اللذيذ. الفيل شنيتزل كان عبارة عن قطعة لحم كبيرة مع صوص ليمون وشوية بطاطس محمرة. في الطبق ده بتقدر تختار الصنف الجانبي، بس المشكلة إننا اخترنا البطاطس اللي طلعت زي التكس ميكس – من غير أي بهارات أو طعم مميز – وكمان الشنيتزل نفسه كان مزيّت فطبيعي إنه يكون ثقيل وطعمه مش ماشي مع صوص الليمون، وبكده يكون الطبق الثاني برضه مش على المستوى. وصلنا أخيرًا للتشيز برجر؛ العيش كان طازة بس أكبر بكثير من قطعة البرجر نفسها، وطعم اللحم كان أقرب سجق شرقي وعليه جبنة شيدر سائحة بسبب التوابل الزيادة، وبكده نقدر نقول إن الأطباق كلها مش على المستوى. ننسى الأكل ونطلع على المشروبات، سموزي البطيخ كان لذيذ بس خفيف بالمقارنة مع سموزي المانجو الهايل وقوامه المميز. أما الستروبيري أجو جو فكان كوكتيل من الفراولة والموز، لكن المشكلة كانت كمية اللبن الزيادة وطعم الموز الطاغي على باقي مكونات العصير. قولنا جايز حاجة حلوة تقدر تنسينا اللي حصل، فطلبنا راسبيري وايت شوكو كوكي دوف Raspberry-white choco cookie dough (46 جنيه) وهو عبارة عن طبق كوكي محشية شوكولاتة ساخنة وعليها بولة آيس كريم فانيليا مع قطع شوكولاتة بيضاء وعصير توت أحمر. الكوكي نفسها كانت طرية ومليانة شوكولاتة، وطبعًا سحر الآيس كريم عمل شغل عالي مع طعم التوت الحامضي. طبق حلو هايل استمتعنا بكل قطعة منه وقدر ينقذ اليوم بعد مجموعة أكلات محبطة. تجربتنا في بوليفارد كانت متواضعة مافيش كلام رغم إن عندهم مميزات تخليهم من الأماكن المهمة زي فكرة المكان والمنيو الهايلة والأجواء المريحة. المشكلة الأكبر كانت في تنفيذ الأكل ومافيش تفاهم بين الجرسونات اللي أصلًا مش مركزين في شغلهم، والكلام ده بيدق جرس خطر للمكان.

...

توسكاني باستا جريل: أجواء لطيفة وأكل لذيذ محتاج شوية تعديلات في باتيو القاهرة الجديدة
اصدرت في: 07/08/2016

شوفنا في آخر خمس سنين موضة جديدة وهي افتتاح مجمعات مخصوصة للأكل غيرت من مفهوم المطاعم والكافيهات في القاهرة. من أجدد الأماكن دي "باتيو" الموجود في القاهرة الجديدة، واللي زورنا فيه المطعم الجديد المتخصص في الباستا والمشاوي وهو "توسكاني –Tuscany ". توسكاني في الدور الثاني يتميز بأجواء إيطالية ريفية، مع زجاج المكان الملون والبرجولات والأنوار المتعلقة على ارتفاع بسيط. ده كان تلخيص سريع لمنطقة الإن دور، نروح للآوت دور وأجواء الريف الأيطالي الجميلة، خصوصًا الحوائط المعمولة بالحجر وكمان الكراسي والترابيزات خشبية. وصلنا لترابيزتنا، ووصلت معانا سلة عيش معاها زيت زيتون وجبنة. العيش كان ثلاثة ألوان – بيج وبرتقالي وأخضر – ومقرمش وعمل شغل عالي مع الجبنة، وبكده تكون بداية أكلتنا مبشرة جدًا. بعد طلعة استكشافية في المنيو، قررنا نفتتح أكلتنا بطبق مقبلات سبايسي بوتاتو سكيليت Spicy Potato Skillet (45 جنيه)، وبالنسبة للأطباق الرئيسية استقرينا على سموكد تركي تشيكن Smoked Turkey Chicken (70 جنيه) وتريبل صوص ستيك Triple Sauce Steak (120 جنيه)، ومعاهم إيطاليان صودا بالبطيخ (23 جنيه) وميلك شيك فراولة (20 جنيه). بعد ربع ساعة وصل طبق المقبلات في طاسة سخنة ورائحة التوابل والأعشاب الجميلة الخارجة منه تخليك تجوع أكثر. الطبق عبارة عن مكعبات بطاطس مشوية عليها لحم مفروم وفوقهم طبقة جبنة، ونحب كمان نوجه رسالة شكر للتوابل الرائعة اللي عملت طعم ممتاز مع باقي مكونات الطبق. الطاسة كانت سخنة على الآخر، وده عمل طعم مدخن هايل للحم المفروم، وطبعًا كل ده خدّم على طعم الجبنة السبايسي القوي. نروح للأطباق الرئيسية، طبق الفراخ بالرومي المدخن وصل ومعاه بطاطس محمرة مع فتوتشيني باستا وصوص جبنة شيدر. قطعتين صدور فراخ مقلية ومحشية رومي وجبن شيدر، وعليهم شوية جبنة كمان، وللأسف طعم الجبنة كان مسيطرة على الأكل ما عدا الفراخ نفسها وعمل طعم مش لطيف للرومي. أما الفتوتشيني باستا فكانت مستوية كويس وغرقانة جبنة شيدر سايحة وعليها جبنة مبشورة عملوا طعم هايل للباستا، بس الملاحظة إنها كانت ثقيلة شوية. البطاطس المحمرة كانت كويسة، بس مفيش أي إضافة مختلفة للطبق. الستيك المشوي صح الصح كان عبارة عن أربع قطع ستيك مستويين well-done وكل قطعة فيهم عليها صوص من جبن الجورجونزولا والفلفل والباربيكيو والمشروم. جبن الجورجونزولا عمل طعم مميز ورائحة رائعة لقطعة البيف، أما صوص الفلفل فميزته أنه سبايسي وقوي وطبعًا كان هايل مع البيف. ندخل على صوص الباربيكيو اللي أضاف طعم لاذع جميل للبيف، وصوص المشروم كان طعمه اللذيذ. أما الأرز اللي مع الطبق فمافيش فيه تتبيلة تقريبًا وكان ناشف شوية. الإيطاليان صودا مع شوية بطيخ وكريمة كان منعش وماشي مع الأطباق، ونفس الكلام بالنسبة للميلك شيك فراولة وطعم الفراولة اللي بيفضل موجود بعد كل شفطة. وصلنا أخيرًا لمرحلة الحلو، واللي كانت بيتزا نوتيلا وبندق (60 جنيه)، ودي عبارة عن بيتزا حجم وسط عجينتها رفيعة وعليها نوتيلا وشوية بندق مطحون وجوز هند مبشور وسكر بودرة. صحيح شكل البيتزا مغري جدًا، بس العجينة كانت صعبة المضغ، وصعب حتى نقطعها بالسكينة. نقدر نقول أن زيارتنا لتوسكاني بشكل عام كانت لطيفة. يمكن في حاجات مش على المستوى –خصوصًا النوتيلا بيتزا– بس الجو في المطعم مريح جدًا وأكيد الأطباق فيها حاجة حلوة. هل توسكاني بيقدم حاجة جديدة؟ بصراحة لا، بس عنده الإمكانيات اللي تخليه من الأماكن المفضلة لناس كثير.

...

بليز: بوينت 90 القاهرة الجديدة يرحب بسلسلة المطاعم المعروفة
اصدرت في: 26/07/2016

مولات وراء مولات بتفتح في القاهرة الجديدة، وطبعًا عدد كبير من سلاسل المطاعم الشهيرة بتفتح فروع جديدة لها في المنطقة المهمة من أرض مصر، ومنهم مطعم " بليز- Blaze". سلسلة بليز حاليًا بتتكون من فرعين، واحد في النزهة والثاني في المهندسين، ودلوقتي فرعهم الجديد موجود في قلب القاهرة الجديدة وتحديدًا في مول بوينت 90 قصاد البوابة الرئيسية للجامعة الأمريكية. صحيح من النظرة الأولي هتشوف المكان صغير جدًا، يعني منطقة الـ إن دور تقريبًا مش موجودة، بس المهم إن المطعم بيحتل مساحة كبيرة آوت دوور تتميز بأجواء هادئة، وكنب وكراسي تحس معاهم بأجواء اللاونج المريحة. دخلنا على المفيد على طول، ومن قسم المقبلات طلبنا بافالو وينجز مخلية (40 جنيه) وتكساس تشيلي فرايز (45 جنيه)، أجنحة الفراخ اللي بيتقدم معاها صوص بلو تشيز كانت غرقانة في صوص البافالو اللاذع بنكهتها السبايسي المعقولة، والتركيبة ده عملت شغل عالي مع صوص البلو تشيز. أما الفراخ نفسها فشربت الصوص تمام وبالتالي كانت طرية وعصارية. نروح للتكساس تشيلي فرايز المكونة من جبنة سايحة ولحم مفروم فوق البطاطس المحمرة، وكلهم محطوطين في طاسة ساخنة. كان واضح إن نكهة الجبنة مسيطرة على الطعم وأخفت أي وجود للحم المفروم وكمان البطاطس كانت مزيتة شوية. أما بالنسبة للأطباق الرئيسية فطلبنا كوردون بلو (69 جنيه) وفاهيتا تريو (79 جنيه)؛ الطبق الأول كان هايل، قطعتين صدور فراخ مقلية كبار محشيين تركي مدخن وجبنة مع صوص مشروم، المهم إن الطبقة المقلية كانت لذيذة والفراخ من جوه طرية وحلوة. طعم الجبنة بصراحة كان رهيب وطبعًا صوص المشروم عمل تركيبة ممتازة، ونقدر نقول إن الطبق بشكل عام كان ممتاز. الأرز اللي مع الطبق رغم تتبيلته الكويسة ماكانش ماشي مع الطماطم والجبنة المبشورة اللي عليه، أصل الفكرة إن طعم الجبن الشيدر الأحمر القوي ولذعة الطماطم طغوا على طعم الأرز، فاضطرينا إننا نشيلهم علشان نقدر نستمتع بطعمه. الفاهيتا وصلت على طاسة ساخنة طالع منها البخار، وكانت عبارة عن شرائح مشوية من البيف والفراخ والجمبري مرصوصين فوق فلفل أخضر وبصل أضافوا كثير لطعم ورائحة الطبق. الطبق كمان بيتقدم معاه أرز مكسيكي وساور كريم وبيكو دي جالو وجبنة شيدر وعيش تورتيا علشان تقدر تعيش تجربة التيكس ميكس على أصولها. مافيش شك إن الطبق بيقدم نفس النكهة المكسيكية المميزة، وطعم البيف والفراخ والجمبري المملحين نوعًا ما عمل طعم قوي للطبق، خصوصًا لما تضيف الأرز المكسيسكي الأحمر السبايسي بطعمه اللذيذ. جربنا كمان أثنين ميلك شيك تشيز كيك أوريو وفراولة (29 جنيه للواحد). الميلك شيك وصل في برطمانات زجاج، وبصراحة شكلهم كان يفتح النفس. الأوريو ميلك شيك كان لذيذ وقوامه سميك، والكريمة المخفوقة اللي عليه كان فيها حبيبات – من قطع الأوريو – عملت طعم هايل. أما الميلك شيك تشيز كيك فراولة فتقدر تميز طعم الفراولة بعد ما تخلص – ودي حاجة مش وحشة أكيد – وفي نفس الوقت له نفس القوام السميك وطعمه منعش. خلصت أكلتنا مع فرينش توست بانانا (32 جنيه) وده عبارة عن قطعتين توست وبينهم قطع موز ونوتيلا وكراميل، وعليهم بولتين آيس كريم فانيليا. تخيلوا معايا التوست المقرمش وجواه المكونات الملخبطة دي وطعمهم الرائع؛ فعلًا من أطباق الحلو المتوازنة واللذيذة. نقدر نقول أن بليز يجمع بين طاقم موظفين هايلين وأجواء لطيفة وكمان أكل ممتاز، ويعتبر من الإضافات المهمة لأسطول مطاعم القاهرة الجديدة اللي شعبيتها بتزيد يوم بعد يوم.

...

فيرسال: أطباق لذيذة وكميات كبيرة في القاهرة الجديدة
اصدرت في: 19/07/2016

هوية وشكل المكان عليهم عامل كبير في نجاح أو فشل أي مطعم. فيرسال المفروض أنه بيقدم أكل متخصص، رغم أنهم بيستخدموا مصطلحات زي "أمريكاني و"محلي" لوصف الأكل الموجود في المنيو، وبالتالي نقدر نقول إن فيرسال ماعندوش هوية واضحة زي أغلب المطاعم، لكن ده مايمنعش إن المكان يتميز بإمكانيات مبشرة. فيرسال موجود في مجمع المطاعم الجديد باتيو في القاهرة الجديدة، وبيتكون من دورين غير التراس الخارجي. اللون الأبيض مسيطر على شكل المكان، والأجواء هناك مريحة جدًا وفيها لمسات كلاسيكية هايلة. عمومًا إحنا هنا علشان الأكل. منيو فيرسال متنوعة وتشمل حاجات كثيرة من البرجر ودجاج ماسالا لغاية السبايسي ريجاتوني والفوندو، فنقدر نصنفها تحت بند منيوهات المطابخ "العالمية". بدأنا مع سويس تشيز فوندو Swiss Cheese Fondue (74 جنيه) وهو عبارة عن وعاء فوندو صغير مليان جبنة سويسري سائحة ومعاه ثلاث أطباق صغيرين فيهم ويدجز ومشروم سوتيه وقطع عيش فينو. الجبنة كانت كويسة بس خفيفة شوية، وده كان واضح في قوامها وطعمها. أما المشروم فكان معمول باحترافية وفيه طعم حادق رائع عمل شغل عالي مع نكهة الجبنة اللاذعة، وأخيرًا الويدجز كانت مسك الختام مع الجبنة. بعدها دخلنا على طبقين مميزين في المكان واللي وصلوا بعد المقبلات بحوالي ربع ساعة. الأول كان كونتري تشيكن (74 جنيه) ومعاه إضافة باستا (10 جنيه)، والثاني فيليه فيرسال، والأثنين كميتهم كبيرة. نتكلم عن الكونتري تشيكن المكون من قطعتين صدور فراخ مقليين وغرقانين في صوص أبيض – الصوص المشهور في مطابخ أمريكا الجنوبية – وعليهم طبقة مقلية مسكت نفسها وإحنا بنقطع الفراخ، وكمان مستويين كويس من جوه مع تتبيلتهم الممتازة، أما الصوص فأضاف كثير لطعم الأكل. الباستا كمان كانت غرقانة في صوص أبيض حادق، وطعمها لذيذ ومستوية كويس. نروح للطبق الثاني وقطعتين البيف فيليه المستخبيين تحت كومة من الأضافات – صوص أبيض بالبارميزان وقطع بيكون وشرائح طماطم شيري – اللي عملوا شكل تقديم مش لطيف للطبق. قطع الفيليه الرفيعة كانت مستوية كويس، وواضح أن اللحم من قطعية ممتازة وجودتها عالية، والإضافات كمان عملت نكهة مميزة للحم، خصوصًا البيكون اللي أضاف نكهة مدخنة مميزة للطبق مع طعم الطماطم اللاذع. الفيليه بيتقدم معاه أرز بسمتي أبيض تتبيلته عال العال، أما البطاطس المهروسة فكانت متكتلة شوية، بس طعمها عمومًا كان معقول وعليها مرقة لذيذة. بلّعنا الأكل ببوب مارلي (28 جنيه) مع روت بير فلوت Root Beer Float (32 جنيه). بوب مارلي المنعش كان خليط بين المانجو والفراولة والعسل وبولة آيس كريم فانيليا، والفانيليا طغت على باقي مكونات الكوكتيل وعملت طعم مسكّر بزيادة. أما الروت بير فطلع كولا عليها شوية نعناع، وبولة الآيس كريم فانيليا عملت شكل جميل للكوكتيل، بس يا جماعة كلام في سركم: الروت بير فلوت مختلف خالص عن اللي شربناه. خلصت زيارتنا مع التشيز كيك اللي نصحونا نجربها، مع اختيارنا من الفراولة أو التوت أو صوص النوتيلا. التشيز كيك في فيرسال بتتقدم من "كريم جرام Krem Gram" وبتكون عبارة عن طبقات التشيز كيك اللذيذة في برطمانات، وبصراحة كانت من أحلى التشيز كيك اللي جربناها من فترة طويلة. التشيز كيك كانت خفيفة وغنية بالكريمة اللذيذة وكمان كمية السكر فيها مضبوطة والبسكويت في الطبقة التحتانية كان هايل. وصلنا لنهاية كلامنا عن فيرسال، واللي صحيح المنيو عنده لخبطتنا شوية، لكن مفيش شك إن الأكل كان ممتاز وطعمه لذيذ. اللي عايزين نعرفه: فين التخصص في الموضوع؟ ممكن نجاوب ونقول الأكل اللذيذ والكميات الكبيرة وكمان الأجواء المريحة. المهم إنهم يحافظوا على مستوى المكان لأطول وقت ممكن.

...

أوليفز: إفطار لبناني معتبر في كايرو فيستيفال سيتي ‏
اصدرت في: 21/06/2016

كايرو فيستيفال سيتي يعتبر من أجدد وأكبر المولات الموجودة على خريطة القاهرة؛ وبالتالي لو أنت من عشاق الشوبينج زي حالتنا هتبقى عارف قد إيه اللف فيه متعة. حتى وإحنا صايمين ما قدرناش أننا ناخد "جولة سريعة" بين المحلات واللي طولت حبتين لدرجة أننا لاقينا داخلين على وقت الفطار، فقررنا أننا نكمل اليوم في المول ولو كنا محظوظين نفطر في مطعم من المطاعم اللي موجودة هناك. طبعًا أنك تدخل مطعم في وقت الفطار من غير حجز مسبق –وخصوصًا لو يوم خميس كمان- هي فكرة شبه فدائية؛ لازم تبقى متصل وحاجز من قبلها بوقت كافي. مع ذلك دخلنا أوليفز - Olives وقلنا نجرب حظنا، لاقينا أن المنطقة الخارجية كلها محجوزة، وأن الأماكن الوحيدة المتاحة موجودة داخل المحل. ننصحكم أنكم ما تعتمدوش على الحظ زيّنا، تقدروا تتصلوا بأوليفز وتحدد الأطباق الرئيسية اللي هتختارها، واللي موجودة ضمن قائمة رمضانية Set Menu (132.85 جنيه) مكونة من عصير، شوربة وطبق فطائر، مزات ساخنة وباردة، ده غير الطبق الرئيسي وطبق الحلو. بما أننا ما كناش حاجزين، تخيلنا أن الأكل ممكن يتأخر شوية عن بقية الترابيزات المحجوزة من الأول، وخصوصًا أن المطعم فجأة بقى مليان على آخره. بعكس توقعاتنا؛ الخدمة كانت أكثر من ممتازة وكل الترابيزات نزل لهم شوربة اليوم –شوربة لسان عصفور- واختيارك من 3 عصاير (كركديه – قمر الدين – مانجو). الشوربة كانت بداية حلوة بعد يوم صيام، والكركديه كان ساقع ومضبوط. مع الشوربة نزل لنا طبق لحم بعجين، مع مجموعة المقبلات الساخنة زي الكبة وسمبوسك الجبنة. بالرغم من أن كل طبق فيه ثلاث قطع بالعدد، إلا أن حجمهم كبير ومثالي للأكيلة اللي مش خايفة بطنها تتملي قبل الطبق الرئيسي ما ينزل. طعم اللحم بعجين كان متوازن ما بين قرمشة الأطراف وطرواة الجزء اللي عليه اللحم. الكبة كانت تتبيلتها ممتازة، ولكن السمبوسك كانت أحسن المزات اللي نزلت لنا، لونها ذهبي ومقرمشة أما الحشوة فهي طرية وطعمها حلو من غير ما تكون دهنية. من المزات الباردة نزل لنا ورق عنب وسلطة فتوش. بالرغم من أن سلطة الفتوش كانت حلوة؛ العيش فيها محمص والخضروات فيها فريش، إلا أن ورق العنب كان بلا منازع أسوأ حاجة ذقناها في تجربتنا، من أول تتبيلة الأرز وتسويته لحد كمية زيت الزيتون الكثيرة اللي مرشوشة على الطبق، واللي للأسف خلت طعمها دهني جدًا. طبقنا الرئيسي كان بيف إيمنسيه –وهو عبارة عن شرائح لحم بصوص المشروم- في أوليفز الأطباق الرئيسية بينزل معاها طبقين جانبيين وهما بطاطس محمرة ورز أبيض. بالرغم من أن صوص المشروم كان طعمه هائل، إلا أن اللحمة للأسف كانت بتشد. أما الأطباق الجانبية فما عندناش أي اعتراض عليهم، ولكن كان نفسنا واحد منهم يكون خضار سوتيه. الحلو كان عبارة عن طبق رز بلبن بالآيس كريم، واللي يعتبر بجد أحسن حاجة في تجربتنا كلها؛ الرز كان مستوي ووفير، أما اللبن نفسه فسكره مضبوط وكريمي، حتى آيس كريم الفانيليا كان طعمه أكثر من رائع، ونفس الحكاية مع طبقة الفستق المحمص الكثيفة اللي كانت مرشوشة على الطبق ككل. أوليفز بيقدم تجربة هائلة لكل الناس اللي بتحب الأكل اللبناني؛ تنوع الأطباق عندهم في الـ Set Menu مناسب في رأينا لكل الأذواق، ده غير أن كمية الأكل وجودتها ممتازة ومناسبة لسعرها. وفوق كل ده مستوى الخدمة أكثر من رائع.

...

مطعم ولاونج ذا موود: فرع جديد للمطعم المميز هايل لكن مع ملاحظات بسيطة
اصدرت في: 24/05/2016

ذا موود كان من أوائل المطاعم الفخمة اللي تفتح في القاهرة الجديدة وتحديدًا وراء فندق لاند مارك، وقدم لجمهوره أكل مميز مع الاستمتاع بمكانه الرائع على حمام السباحة. دلوقتي ذا موود غير مكانه وراح وراء كنيسة البازيليك في هليوبوليس، وهناك هتشوف قعدة آوت دوور بألوان ساحرة وحواليها زرع وخضرة يفتحوا النفس مع مراوح بترش رزاز مياه علشان حر القاهرة الجميل، أما المطعم نفسه فأجواءه هادئة وإضاءته خافتة، مع كنب مريح وشاشة تليفزيون كبيرة، والكلام ده هيكون مناسب جدًا للمجموعات الكبيرة. بعد رحلة استكشافية في المنيو حسينا بتوهان شوية بسبب تنوع الأصناف، أصل ذا موود بيقدم كل حاجة من مشويات لسمك لأطباق باستا وبيتزا وكمان ساندويتشات، وحتى الفتة هتلاقيها هناك. قررنا نفتح نفسنا بشوية سبموسك جبنة (31.99 جنيه)، وبالنسبة للأطباق الرئيسية قررنا نجرب التشيكن كاري (69.99 جنيه) و"موود سي فوود" (110.99 جنيه) معاهم بطاطس محمرة وخضار سوتيه. ننقل لكم اللي حصل سريعًا من قلب الحدث، خمس قطع سمبوسك محشيين جبنة لا هي ساخنة ولا باردة. للأسف طعم الجبنة في السمبوسك كان سيء وواضح أنهم سخنوها قبل كده، وبعد كل ده كمان توصل مش ساخنة؛ طب ده كلام؟! بعدها بشوية وصلت الأطباق الرئسية وواضح عليها إنها مليانة بكميات أكل كويسة. الفراخ بالكاري كانت عبارة عن قطع فراخ طرية صغيرة غرقانة صوص الكاري التايلاندي الأخضر المميز، وهو ريحان مع صوص تايلاندي أخضر حار، والحقيقة أن طعمها كان خرافي، خصوصًا مع نكهة ثوم خفيفة والصوص اللذيذ مع الطعم السبايسي الخطير. نطلع على "موود سي فوود" اللي كان على نفس المستوى من الجمال والحلاوة. توليفة الفيليه المقلي الخفيف مع الكاليماري والجمبري وعليهم صوص أبيض ممتاز والتوابل اللذيذة عملوا شغل عالي، وكمان ما ينفعش ننسى الدور المهم للشبت الطازة. الطبق ده يعتبر من أطباق المطعم المخصوصة، وبصراحة صعب تقول له كفاية أنا شبعت. أما منيو الحلو ففيها حلويات شامية لذيذة منها غزل بيروت (31.99 جنيه) مع أطباق تقليدية زي المولتن كيك بالآيس كريم (37.99 جنيه)، لكن إحنا دماغنا راحت لحاجة مختلفة وهي بطاطا حلوة بالآيس كريم (30.99 جنيه). البطاطا خرجت ساخنة مولعة من الفرن وعليها بولة آيس كريم ومرشوش عليهم صوص كراميل لذيذ ومكسرات، والحقيقة أن التركيبة بين الساخن والبارد كانت عبقرية، ودي فعلًا كانت نهاية ممتازة لأكلتنا في ذا موود. بعدها طلبنا شيشتين واحدة كيوي والثانية مانجو (46 جنيه) كانوا مضبوطين زي الكتاب ما بيقول، لكن حجر المعسل كان محروق، وطبعًا الأسعار كانت غالية شوية. على العموم، تجرتنا مع ذا موود كانت هايلة، لكن عليها شوية ملاحظات. المهم أن الأجواء اللطيفة والموظفين الهايلين والأطباق الرئيسية اللذيذة كانوا ممتازين، وكافيين إنهم يرجعونا في زيارة ثانية قريب.

...

ذا لورد أوف ذا وينجز: فرع جديد لأخصائي الوينجز يخطف الأضواء في كايرو فيستفال سيتي
اصدرت في: 22/05/2016

لما نتكلم عن الأكلات السريعة السهلة، الوينجز بتيجي في المرتبة الأولى بصفتها أكلة لذيذة بتجمع الناس حواليها. وصحيح النوع ده من الأكل وخصوصًا الوينجز بتلاقيه في البارات وممكن في بعض مطاعم الفاست فوود تحت بند الأطباق الجانبية، هنكلمكم النهارده عن " لورد أوف ذا وينجز Lord of the Wings" باعتباره واحد من المطاعم القليلة المتخصصة في الوينجز. المكان: ممر من ممرات كايرو فيستيفال سيتي الواصلة للفود كورت، أما ديكور أحدث فروع لورد أو ذا وينجز مستوحى من ستايل المصانع مع حوائط من قوالب الطوب وترابيزات خشب وفتحات تكييف وأسلاك سميكة ماشية بطول الحيطة، بالإضافة لشاشات بتعرض ماتشات كورة أو منيو المطعم. وصلنا ترابيزتنا، استلمنا المنيو، شوفنا المنيو. المنيو فيها حاجات ثانية غير الوينجز منها برجر وستيك. البداية كانت مع كاناديان بوتين فرايز Canadian Poutine fries (41 جنيه) مع سوبر دوبر ناتشوز (49 جنيه) وبيكون زيادة (14 جنيه) علشان يعمل طعم مميز للأكل، أما الأطباق الرئيسية فطلبنا جارليك بارميزان وينجز المخلية (49 جنيه/6 قطع)، وأمريكان برجر (53 جنيه) وتاندرولين ستيك (145 جنيه). بعد نصف ساعة، وصلت الفرايز وبعدها بدأت طلباتنا توصل طبق وراء الثاني. البوتين فرايز بتتقدم في طبق كبير وعليها جبن سائح ومرقة، ومفيش كلام أن طعمها كان لذيذ وماسكة نفسها –بس كانت غرقانة بزيادة في الصلصة والجبنة– والجبنة كانت إضافة هايلة لطعم الطبق. المشكلة الوحيدة كانت في المرقة بطعمها المتواضع ومافيش أي إضافة عملتها للطبق. كان لازم نرجع السوبر دوبر ناتشوز للمطبخ علشان البيكون ماكانش له أثر في الطبق، وبعد شوية رجع لنا بكمية متوازنة من البيكون والجبنة، وهو أصلًا بيتقدم مع ساور كريم وصلصة وجواكامولي. صحيح الناتشوز كانت مقرمشة بس مافيش طعم مميز، واللي أنقذوا الموقف كانوا الجبن السائح والصوص. الوينجز كانت لذيذة جدًا، عبارة عن 6 قطع متوسطة من الفراخ المقلية مخلية ومتغطية بصوص بافالو، وعليهم صوص جارليك بارميزان وبيتقدم جنبهم صوص بلو تشيز وشوية شرائح جزر وخيار. الفراخ كانت طرية ولذيذة، والطعم اللاذع لصوص الجارليك بارميزان كانت واضحة مع كل قضمة. من أحلى الحاجات في الوينجز إزاي صوص الجارليك بارميزان كان ماشي مع صوص البافالو، وهنا بنشوف مدى اهتمامهم بتركيبة ونكهة الطبق. خلاصة الكلام، الوينجز كانت طبق اليوم بدون منازع. نسيب الوينجز ونروح للأمريكان برجر المكون من قطعة برجر آنجوس عليها خس وبصل ومخلل وأمريكان تشيز وصوص مخصوص، ومعاهم كمية بطاطس كبيرة. الملاحظة هنا أن البرجر كان صعب المضغ ومافيش أي طعم مميز، أما العيش فكان سيئ، بصراحة تحس أنهم كانوا مستعجلين لما حضروا الساندويتش. أما البطاطس فكانت هايلة وتتبيلتها ممتازة كأنك بتاكلها في البيت. التاندرولين ستيك كان عبارة عن قطعتين من الستيك ومعاهم شوية خضار سوتيه وبطاطس مهروسة. المفروض إننا طلبنا الستيكwell-done ، بس اللي وصلنا كان medium-well، وصحيح الطعم كان شغال، بس مش ده طلبنا يا جماعة! السوتيه كان معقول لكن البطاطس المهروسة كانت معمولة باستعجال وطعمها سيئ وكمان متكتلة. هضمنا بشوية Peanut Butter Shake (25 جنيه) كان منعش ومسكّر جدًا – يمكن مسكّر زيادة عن اللزوم – وقوامه كان سميك وفيه صوص كراميل لذيذ. يمكن حسينا أنهم عملوا أطباق باستعجال شوية فطلعت سيئة، بس لو هنحكم على الوينجز فأكيد لورد أوف ذا وينجز ممتاز من ناحية الجودة والطعم.

...

فطيرة: أشهى فطائر ممكن تأكلها في حياتك في التجمع الخامس
اصدرت في: 25/04/2016

كثير بيبقى نفسنا في حاجة خفيفة تصبيرة في الشغل، تسد جوعنا ويكون طعمها حلو، وكنا بنحب نطلب "فطيرة" فرع الزمالك، وطبعًا أول ما عرفنا أنهم فتحوا فرع جديد في التجمع الخامس كنا متحمسين جدًا نروح ونتأكد إذا كان الفرع الجديد بنفس جودة فرع الزمالك والشيخ زايد. المكان معقول مش كبير ومش صغير، فيه حوالي 6 ترابيزات في الـ out door وترابيزتين بس جوه في الـ In door، أول ما مسكنا المنيو أحتارنا ما بين الأصناف اللذيذة واللي بنحبها كلها ما بين اللحوم والدجاج والمأكولات البحرية، وأنواع الفطيرة نفسها عادية ولا بالسمن البلدي، رول ولا وسط ولا كبير. بس بما أننا كنا جربنا أنواع قبل كده زي فطيرة رول الجبنة بالزعتر (26 جنيه)، اللي أنقذتنا قبل كده أكثر من مرة في المكتب، لأنها خفيفة وهشة وجميلة، وطبعًا فطيرة جبن المشكل (43 جنيه حجم وسط) اللي لما بتأكلها سخنة بتسرح مع كل نوع جبنة وتعيش في ملكوتك الخاص. فطلبنا كبداية فطيرة رول smoked salmon بـ 42 جنيه، وفطيرة سجق حجم وسط (42 جنيه) وفطيرة بيتزا chicken barbeque بـ 52 جنيه، وأخيرًا ختمنا بالحلو فطيرة رول تفاح بالقرفة (34 جنيه)، وعصير ليمون نعناع (15 جنيه). بعد حوالي نصف ساعة الأكل كله جيه إلا الحلو طبعًا، وبدأنا بأكثر حاجة كنا متشوقين لها فطيرة الـ Smoked salmon لأن مش أي حد يقدر يضبط التركيبة دي، يعنى لو السالمون مش طازة شكرًا كده باظت، أو لو نوع الجبنة مش ظابط معها. بس الحقيقة إحنا اتفاجئنا وكان نفسنا يكون حجم الرول أكبر من كده لأننا كنا مش عارفين نبطل أكل منه، مع كل قطعة من الرول كنا بنطير للسما السابعة ونرجع تاني الأرض لما بتخلص، فحقيقي ما كناش عاوزين نرجع لكوكب الأرض تاني خاصة أننا من عشاق السالمون. بعد كده جربنا فطيرة بيتزا بالـ chicken barbeque ودي كانت تاني أكثر حاجة عجبتنا، الفطرية كانت خفيفة والدجاج معمول مضبوط جدًا لدرجة أننا اتخضينا من جماله لأن من الصعب أن محل فطير يعرف يضبط تسوية الدجاج فما تكونش ناشفة أو مش مستوية، لكن دي كانت طريقة وJuicy وتأكل صوابعك وراها، طبعًا فطيرة السجق حدث ولا حرج كانت في نفس المستوى المبهر، وبينا وبينكم إحنا مش بنحب السجق أصلًا، بس فعلًا كان طعمه حلو وبيتي والبهارات فيه كانت خفيفة، إحنا ما كناش لا قادرين نروح ولا نكمل اللي طلبناه. فطبعًا لما الحلو جيه، كنا بنبص له وإحنا بنحاول ناخد فترة راحة ونقاومه، بس هو كان شكله مغري جدًا وهو مرشوش عليه سكر بودرة من فوق وسخن، كنا لازم نجربه وهو سخن يا جماعة يعني نسيبه يبرد حتى ما يصحش! والحقيقة أنها كانت خطوة كويسة جدًا لأن التفاح كان سخن مع رشة قرفة خفيفة، كانت قفلة معقولة جدًا. نصيحة أخوية لازم تبقى بتشرب حاجة جنب الأكل الجامد ده، وإحنا كان حظنا حلو جدًا أننا طلبنا ليمون نعناع، فبالرغم أن مش كل الأماكن بتعرف تضبط سكر الليمون بالذات وكمية النعناع، وإحنا بحكم عملنا بقينا أشخاص متطلبة جدًا للأسف لدرجة الإزعاج، إلا أن الليمون بالنعناع بلا مبالغة كان تحفة وسكره مضبوط، كان نفسنا يكون متوفر عندهم عصائر تانية علشان نجربها، بس ماكنتش لسه وصلتلهم للأسف، يمكن بيشوقونا لزيارتنا الجاية. العيب الوحيد أن الجرسون كان جوه في المكان الـ indoor فعقبال ما كان بيشوفنا ويجي كنا بنلعب لعبة الإشارات، يا ترى شافنا وإحنا بننده له ولا لأ، بس غير كده الأكل تحفة وخفيف وطازة، وأكيد مش هتكون زيارتنا الأخيرة.

...

كريف: فرع جديد وأصناف مختلفة في القاهرة الجديدة
اصدرت في: 18/04/2016

معانا مكان جديد هايل بيضم مجموعة من أجمد وأحلى المطاعم في القاهرة – ومنها تمارا وموري سوشي وقهوة وغيرهم - وهو "ووتر واي-Waterway" اللي قدر يلفت انتباه أكيلة القاهرة ويقدم تجمع هايل لكل واحد مش عارف يأكل فين النهارده. زيارتنا لـ"كريف - Crave" كانت علشان نعرف إيه الجديد عندهم خصوصًا أن المنيو أصلًا مليانة مالذ وطاب. كريف مقسوم لمنطقتين، واحدة آوت دوور عاملة زي قعدات النوادي، وتعتبر ممتازة لقعدة الصبح مع فنجان القهوة أو فطار خفيف مع أصحابك، ومنطقة إن دوور هادئة فيها أثاث تحفة بألوانه الرمادي والأزرق، وزرع متعلق على السقف ومنظر الجرسونات الرائع وهم بيخلطوا الكوكتيلات عند البار؛ فعلًا الأجواء هناك روعة الروعة. المنيو دخل عليها أصناف جديدة ممتازة، لكن في الأول طلبنا عصير فيمتوجيتو Vimtojito (29 جنيه) وستروبيري سينسيشن Strawberry Sensatio (30 جنيه)، وبعدها اتفرجنا على الأصناف الجديدة في المنيو براحتنا. الفيمتوجيتو شد انتباه كل الناس بشكله المميز، خصوصًا إن عليه غزل بنات بنكهة التوت. الجميل في الكوكتيل ده نكهة الموهيتو المسكرة واللاذعة في نفس الوقت، مع الليمون والـ 7up ومشروب فيمتو بطعم التوت والنعناع المنعش. نطلع من الفيمتو على عصير الفراولة المخلوطة مع التوت أحمر، ونقدر نقول أن الستروبيري سينسيشن كان اختيار موفق خصوصًا مع إضافة فلفل أسود وصوص سبايسي عملوا نكهة حراقة تحفة. أصعب حاجة في الدنيا إننا نروح كريف وما نطلبش معشوقنا الأول وهو طبق الكنافة بالجمبري (55 جنيه) بس طالما إحنا هنا مخصوص عشان نجرب الجديد، فقررنا نطلب جريلد شريمب جواكامولي سالاد (60 جنيه). طعم السلاطة كان متوازن وعليها جمبري تتبيلته هايلة، مع خلطة من الخضروات الطازجة وطعم الذرة والطماطم الشيري الجميل، وطبعًا كله كوم والأنانس والدريسينج اللاذع كوم، واللي قدروا يعملوا تركيبة هايلة مع الجمبري. يمكن طعم الجواكامولي مش واضح في الأكل، بس السلاطة كانت هايلة مافيش كلام وبداية هايلة لوجبتنا. في وجود عدد كبير من الأصناف الجديدة، زي هيرب أند فريك تشيكن (70 جنيه) وشيري صويا تونا (99 جنيه)، قررنا نبسّط الموضوع ونطلب بنّا فرايد تشيكن (53 جنيه) وستيك أند مشروم باستا (55 جنيه). نبدأ مع البنا فرايد تشيكن، الباستا كانت مستوية صح وصوص الطماطم بالريحان كان طازة، وجايز الطبق كان محتاج شوية بهارات مع رشة بارميزان على الوش. قطع الفراخ المقلية المحشية جبنة ومشروم كانت طرية ومليانة جبنة، لكن المشروم قلل من جمال نكهة الجبنة. الطبقة المقلية على الفراخ طعمها كان روعة بس مقدرتش تتماسك حوالين على الفراخ. أما المشروم أند ستيك باستا فكان توليفة من باستا فتوتشيني المستوية صح الصح وعليها صوص بلسمي غني بالكريمة، وبكده نكون اتعرفنا على الصوص بتاعنا المفضل للأبد وهو الخل البلسمي الرائع مع الكريمة الطازة اللي عملوا سيمفونية من الطعم الحلو واللاذع. صحيح الستيك كان ملسوع شوية، بس كان عنصر مهم في الطبق مع المشروم المشوي. المنيو كمان فيها حلويات جديدة منها جار كيك ديو وشوكليت تشيب لافا كيك – وإحنا قررنا نجرب كوفي توفي كرامبل (39 جنيه). الطبق كان عبارة عن كيك من بسكويتLotos وعليها بولة آيس كريم فانيليا لذيذة، ومغطاة بطبقة كروكانت شبه التوفي عملت طعم هايل، وكل ده معاه صوص قهوة في كأس صغير بتصبه عليها. خليني أقول لكم ببساطة أن الطبق ده هيحقق أحلام كل عشاق القهوة. صحيح كان نفسنا نشوف نفس الابتكار الموجود في الحلو مع المقبلات والأطباق الرئيسية، لكن أكيد الأصناف الجديدة في المنيو والخدمة الممتازة مع أجواء وفخامة فرع ووتر واي الجديد هيبهروك، ويحافظوا على مكانة كريف الكبيرة في قلوبنا كواحد من أحلى المطاعم في القاهرة.

...

شاهد المزيد
مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول