ملابس حريمي تسوق in Cairo, Egypt

تسوق

خطوة: تي شيرتات مميزة وأسعار معقولة تجي لك لحد البيت
اصدرت في: 01/04/2016

من أكثر من سنة انتشرت موضة التي شيرت والسويت شريت، اللي مكتوب عليها بالعربي كلمة معبرة عن هويتنا وعن أفكارنا، منها المبهج ومنها اللي يديك أمل، وفي الأغلب بـ يكونوا شباب لسه بـ يبدأوا طريقهم. وخطوة بدأت كصفحة على الفيسبوك. وتصميماتهم بدأت تنتشر بشكل كبير وسط الناس. عندهم تصميمات مختلفة وأسعارهم معقولة تقريبًا 200 جنيه لأغلب الموديلات. المميز في تصميماتهم أنك ممكن تلاقي نفس الموديل للولاد والبنات، وطبعًا بـ يبقى فيه تصميمات خاصة لكل نوع على حدى. فيه تصميمات كثيرة عجبتنا منها "وتقع وتقوم" اللي كان مكتوبة مع رسمة شخصيات كارتون inside out لـ Happy و Sad وطبعًا كان متوفر منهم كل الألوان، كمانن تقدر تتطلب سويت شيرت سادة أو بتصميمات اللي تناسب الولاد والبنات زي "يا حاسدين الناس" اللي مكتوبة بخط عربي مميز أو "عمر البحر ما شال هم سفينة" اللي الديزاين بتاعه معمول مع شكل سفينة. لكن أكثر اثنين عجبونا كانت سويت شيريت بينك مكتوب عليه "خليك مبسوط" ووواحدة ثانية لونها أزرق مكتوب عليه "الحلم نور"، حاولنا نطلب من الصفحة بس الرد كان بطيء جدًا فـ كلمنا النمرة واللي ساعدتنا أكثر على تحديد مقاسنا برغم أننا كنا بـ نحاول نعرفه من صورة بالمقاسات هم كانوا حاطينها على صفحتهم إلا أن الكلام مع حد متخصص أفضل. وبعد حوالي 3 أيام وصلت حاجتنا سليمة، صحيح الطول مش طويل قوي زي ما كنا متخيلين بس مناسب والخامة نضيفة جدًا وبـ تدفي قوي. تجرتنا معاهم كانت مميزة وأكيد مش هـ تكون الأخيرة، لأنهم ناس تستحق التشجيع والاحترام.

...

بوز: كارديجان طويلة بألوان مختلفة وأسعار مناسبة في المعادي
اصدرت في: 01/03/2016

مش أي مكان في جراند مول المعادي بـ نلاقي عنده الحاجات اللي بـ تناسب ذوقنا، واللي في الأغلب بـ تكون حاجات طويلة تناسب المحجبات، سواء كانت كارديجان أو بلوزات طويلة أو حتى سويت شيرت، وكل ده كان موجود في بوز – Pause. دي مش أول مرة ندخل المحل لأننا بـ نروح له كثير أول لما نكون بـ ندور على حاجة حلوة بسعر معقول، خاصة أنه على طول بيستورد الحاجات بتاعته من تركيا ودول ثانية، وأغلب الحاجات عنده بتبقى من 200 لـ 300 جنيه، مافيش مبالغة في الأسعار يعنى، بس أكثر حاجة أسعدتنا في زيارتنا الأخيرة هي كانت الكارديجان، كان فيه حوالي 2 ستاند كبار عليهم مجموعة متنوعة من الكارديجان سعر الواحد فيهم 265 جنيه، وفيه منهم السادة خالص أو اللي عليه زخرفة، عجبنا واحد بكابيشو وعليه زخرفة بني مربعات، وواحد ثاني طويل وخامته ثقيلة مخطط عريض، ولونه أبيض في بني غامق، وستايل ثاني مختلف أنه كله يبقى لون واحد ونقط بدوائر كبيرة بيضاء، وكان فيه منه لون واحد اللي هو البيج، ده غير الكارديجان الصوف السادة اللي بـ يدفي جدًا وفيه منه أبيض سادة وبيج ودرجة ما بين البني والبرتقالي. برضه كان عنده مجوعة حلوة أوي من البنطلونات الجينز السكيني والأستريت فاتح وغامق ومقطع وأسود، فيه منها كل المقاسات، والواحد فيه بحوالي 250 جنيه، أما أكثر حاجة عجبتنا كان تخفيض على الجاكيتات الكات الـ Forure بـ (125 جنيه) والجلد (150 جنيه) وطبعًا المعروف عن أسعار الحاجات دي أنها بـ 300 وبـ 400 جنيه. كان فيه مجموعة جاكيتات جلد كبيرة سواء ببادج على الأيد لونها مختلف أو عادية تبدأ أسعارها من 350 جنيه، غير السويت شيريتات والبلوزات الطويلة اللي كان فيه منها كثير سادة أو مخططة، عجبنا منها واحدة سادة خالص بيج بحوالي 250 جنيه وطولها لحد الركبة. بوز بـ يستورد دائمًا حاجته من بره مصر، أغلب الحاجة، ودائمًا بيبهجنا بموديلاته وأسعاره، جربوا تعدوا عليه.

...

ميس توتي: لبس شتوي وفساتين سواريه في مكان واحد في المعادي
اصدرت في: 07/12/2015

كثير من البنات بـ يحبوا فكرة أنهم يلفوا على أكثر من محل بعد كده يختاروا هم هـ يشتروا إيه، والحقيقة أننا مش بـ نتبع الأسلوب ده قوي لو مقتنعين 100 % من اللي شوفناه وطلع علينا حلو، لكن ميس توتي – Miss Tutti هـ يوفر عليكم حيرة كبيرة بالتنوع اللي لاقيناه عندهم. مبدأيًا الأسعار هناك معقولة جدًا في كل حاجة، ممكن بس ما يبقاش فيه تعدد كثير في أنواع الفساتين السواريه، لكن التنوع في باقي الحاجات من بنطلونات جينز وسويت شيرت وجاكيتات خفيفة، كل الحاجات الأساسية موجودة، إحنا عجبنا هناك التنوع والأسعار، لفت انتباهنا بنطلون جينز خامته طرية جدًا مش زي الجينز العادي، ولونه ما بين الأزرق الغامق واللبني (150 جنيه)، وكان فيه منه كل المقاسات ودرجات الجينز المختلفة. عجبنا بلوفر مرسوم عليه دوائر ومثلثات بشكل هندسي فيه صفوف وكان فيه كل درجات البني والبيج، وكان بحوالي (220 جنيه)، وكان فيه منه اللون الأسود واللون الأزرق، كمان كان فيه بلوزة خفيفة طويلة لحد الركبة مدرجة بكل الألوان أصفر وبني وبرتقالي وأزرق وأبيض (175 جنيه)، برضه كان فيه مجموعة جاكيتات خفيفة لحد ما بعد الركبة، وكان مرسوم عليها شكل هندسي شبه السمبوكسة (245 جنيه)، وكان فيه منه كل الألوان البيج والأزرق والبرتقالي، ومعاه بلوزة طويلة خفيفة برضه لحد الركبة (145 جنيه). آخر حاجة عجبتنا كان جاكيت طويل قوي قبل الكعب بشوية ولونه بيج في بني غامق (225 جنيه) وكان مرسوم عليه بطريقة حلوة مثلثات صغيرة وخطوط بني، وبعدين فراغ كبير فيه سمبوكسة باللون البني برضه. "ميس توتي" مكان لطيف أنك تشتري منه أكثر من حاجة، بس أكيد مش كل الحاجات اللي أنت محتاجاها.

...

ميكسي: ملابس مختلفة عن ماركات المولات في الزمالك
اصدرت في: 09/11/2015

كثير كنا بـ نتكلم عن أن الزمالك محلات الملابس فيها تتعد على الصوابع بعكس المطاعم ومحلات الحلويات؛ إلا أن بدأت تنتشر البوتيكات اللي بـ تبيع ملابس مستوردة بعيدًا عن الماركات المنتشرة في مولات مصر، من ضمن المحلات دي ميكسي – Mexy في الزمالك. المحل المكوَن من دورين مساحته ما تخرجش بره حيز 2.5×2.5 متر، وبالتالي التشكيلة الموزعة على حوالي أربع ريونات (شماعات) محتاجة صبر وتدقيق وأنت بـ تتفرجي عليهم، وبما أننا قربنا على الشتاء، فالتشكيلة الجديدة سيطر عليها الـSweatshirts والبلوفرات الخفيفة، واللي بصراحة ما ننكرش أنها كانت السبب الرئيسي أننا ندخل نلقي نظرة على المحل. مجموعة البلوفرات الخفيفة شكلها مبهج بألوانها اللي تنوعت ما بين اللون الوردي والأزرق الفاتح؛ إلا أن اللي عجبنا فيهم هو مجموعة الرسومات الموجودة عليها بشكل مكرر؛ واحد منهم عليه رسمة موتوسيكل عجبنا فيه أن ألوانها هي كمان مبهجة ومتماشية بشكل عام مع التصميم الكلي للقطعة، المجموعة دي أسعارها 250 و280 جنيه. وبما أن الكيمونو كان موضة الصيفين اللي فاتوا، فطبيعي أنه يكمل معانا في الشتاء؛ ميكسي كان عارض منهم مجموعة شتوية خامتها من الصوف الثقيل وعليها نقوش هندسية (300 جنيه). بالرغم من أن خامتها مناسبة إلى حد كبير للشتاء اللي بـ نشوفه في مصر، إلا أن ما عجبناش ألوانها اللي غلب عليها ألوان صريحة زي الأخضر والأحمر مع اللون الأسود، ده غير أن ثقل الخامة ما حسيناهوش لايق على الشراشيب الرفيعة الموجودة في أطراف الكيمونو –واللي لو كانت من نفس خامة الكيمونو كانت ممكن تخلي المنظر أحسن شوية. مجموعة الصيف كان عليها خصومات؛ من ضمنها مجموعة من البنطلونات الـ Harem المنقوشين، سعرها بعد الخصم (100 جنيه). الدور العلوي كان فيه عدد من فساتين كوكتيل، والإكسسوارت والأحذية؛ لاحظنا أن الإكسسوارات والأحذية تشبه لحد كبير المجموعات الموجودة في بقية البوتيكات الموجودة في القاهرة منهم حذاء بدون رباط لونه فضي لامع ماركة Chiara Ferragni، على كل فردة عين سعره (750 جنيه). بالرغم من أننا عندنا قناعة تامة أن أحيانًا أسعار المعروضات في البوتيكات بـ يبقى مبالغ فيها حبتين، إلا أن الميزة الكبيرة اللي بـ تقدمها محلات زي ميكسي أن المعروضات بـ تختلف اختلاف كبير عن ملابس المحلات المشهورة والمنتشرة في مولات القاهرة.

...

كيكي ريكي: أسعار غالية وفساتين غير مبهجة في وسط البلد
اصدرت في: 25/10/2015

أي بنت لما تعرف أن فيه مناسبة قريب هـ تحتاج أنها تلبس فيها لبس سواريه، بـ تشيل هم المكان اللي هـ تشتري منه اللبس المناسب، خاصة أنه للأسف في مصر بقى من الصعب جدًا أنك تلاقي حاجة مناسبة ومش غالية في نفس الوقت، خاصة أن أغلب الموجود في السوق المصري بـ يبقى ذوقه غريب وسعره مبالغ فيه وده للأسف اللي شوفناه في كيكي ريكي – Kiki Riki. أول معرفتنا بكيكي ريكي كان من زمان جدًا وفي فرع مدينة نصر، اللي ساعات كنا ممكن نلاقي عنده حاجة مناسبة، لكن أول ما دخلنا فرع وسط البلد تفاجأنا أن فيه موديلات كثيرة شبه بعض ومش ذوقنا، وبرغم أنه فيه مقاسات كبيرة لكثير من الموديلات إلا أن خامتها مش حلوة، وتقريبًا نفس الستايل على عكس الموجود في فرع مدينة نصر اللي فيه موديلات كثيرة، يمكن لأن مساحة مدينة نصر أكبر. المهم لفت نظرنا فستان كت دانتيل أسود في أخضر من فوق لحد أول البطن ونازل شيفون منفوش أخضر، وسعره حوالي 1400 جنيه، وفيه منه جميع الألوان. كمان كان فيه فستان أزرق سماوي شيفون كت سادة خالص ضيق من فوق ونازل واسع، تقريبًا بنفس السعر. واللي كان غالب على تصميم الفساتين هناك اللون الذهبي اللامع والتصميم بقماشة بطبقة لامعة، وكان فيه فساتين كلها مشغولة بطبقة من الترتر اللامع نازل لتحت، وفساتين بكم طويل فيها رسم دانتيل خفيف من فوق، وأسعارهم ما بين 1000 لـ 1800 جنيه. غير الفساتين القصيرة فوق الركبة اللي بـ تبقى مناسبة أكثر ليوم الحنة، عجبنا منهم فستان ذهبي من فوق لحد أول البطن، ونازل شيفون أوف وايت لحد الركبة وكان بـ 600 جنيه، وكان فيه فساتين ثانية منها برضه القماش اللي بـ يلمع من فوق لحد أول البطن بس ألوان مختلفة، أو بـ يبقى دانتيل كله وكت لحد الركبة، وفيه منه كل الألوان، وأسعاره من 400 لـ 800 جنيه. كان نفسنا نلاقي موديلات تعجبنا أكثر نتمنى المرة الجاية يكونوا نقلوا كمية أكبر من الموديلات من فرع مدينة نصر لوسط البلد، ولو أننا نعتقد أنهم مختارين موديلات ذوقها يتناسب مع ذوق المنطقة.

...

إم بي ثري: محل ملابس داخلية في الزمالك
اصدرت في: 19/09/2015

عادة بـ يبقى صعب علينا ككتاب مقالات نقدية عن أماكن التسوق أننا ندخل المحل، نفضل نقلب في المعروضات ونسأل عن أدق تفاصيلها بجانب السؤال البديهي "بكام ده لو سمحت؟" علشان بعدها نقول "شكرًا" ببساطة ونلف ونخرج ولا كأن أي حاجة حصلت... ده في المحلات العادية، فما بالكم شعورنا وإحنا داخلين محل ملابس داخلية لمجرد العلم بالشيء؟ بما أن الشغل شغل، استجمعنا شجاعتنا وقررنا ندخل محل إم بي ثري – MB3 للملابس الداخلية في الزمالك، وبالرغم من أن المحل بـ يضم ملابس حريمي ورجالي وأطفال، إلا أن المحل مافيهوش غير رجل واحد لكل المهام، وده ممكن يسبب نوع من الحرج لبعض الزبائن من الستات. بدأنا بالقسم الحريمي، والمواجه للباب؛ أول مجموعة صادفناها كانت فانلات قطن بجميع الأشكال والألوان، خامتها ثقيلة نوعًا ما كملابس داخلية في الجو ده، كل موديل نازل منه أبيض، وألوان ومنقوش، سعر الفانلة بدون أكمام للألوان والمنقوش (37 جنيه)، أما الأبيض فسعرها (35 جنيه) وهو سعر ما فرقش كثير عن أسعار أماكن ثانية، مع نفس المجموعة معروض Leggings، الأبيض (55 جنيه) والألوان والمنقوش (60 جنيه)، إم بي ثري عندهم مجموعة كبيرة من الملابس الداخلية التحتية الحريمي المنقوشة (20 جنيه). قسم الأطفال هو الأصغر في المحل، وغلبت عليه الملابس الداخلية الولادي، واللي تميزت برسومات لشخصيات كارتونية وخصوصًا على البوكسرات اللي سعرها (13 جنيه). غالبَا إم بي ثري اهتمامه الأكبر منصب على الملابس الداخلية الرجالي، واللي كان متوفر منها كمية كبيرة، ما عرفناش نسأل لكم على سعر البوكسرات لأن القائم على الخدمة في المكان استنكر سؤالنا عن سعر الفانلات الداخلية -البيضاء بدون أكمام (37 جنيه) للأبيض و(40 جنيه) للألوان- واللي قعد يكرر لنا جملة "دي رجالي يا فندم"، أومال لو كنا اشترينا بوكسر كان هـ يعمل إيه؟ الحقيقة أن المعروضات موديلاتها ما استهويتناش، واللي معظم نقشاتها غريبة على ذوقنا، إلا أن أكثر حاجة عجبتنا كانت مجموعة الفوط والبشاكير اللي عارضينها، واللي ألوانها بـ تتميز بأنها مبهجة، الفوط أحجامها بـ تختلف: البشكير (70 جنيه)، الفوطة المتوسطة (50 جنيه)، فوط اليد لها حجمين: المربع (10 جنيه) والمستطيلة (15 جنيه). أما البُرنس فسعر الواحد (300 جنيه). قبل ما نخرج من المحل، أخذنا كتالوج مجاني فيه جميع المنتجات اللي المحل بـ يعرضها، وعلى ظهره اكتشفنا أن إم بي ثري عنده فروع كثيرة جدًا في القاهرة والمحافظات، ومش بس كده ده كمان له فرعين في السودان، عامة مبروك عليهم النجاح، بس يا رب ما يتحفوناش بحملات دعاية تليفزيونية مبتذلة زي شركات ثانية.

...

ديكسيت: ماركة الملابس الحريمي العالمية في الزمالك
اصدرت في: 31/08/2015

بالرغم من أن الزمالك بدأ ينتشر فيها محلات للملابس، إلا أن عددها عمره ما هـ يتفوق على عدد المطاعم ومحلات الحلويات الموجودة تقريبًا في كل شارع هناك، من ضمن محلات الملابس الموجودة في الزمالك هي ديكسيت – Dixit في اليمامة سنتر. بعكس الفرع اللي كان موجود في شارع محيي الدين أبو العز، المحل الموجود في الدور الأرضي ديكوراته بسيطة جدًا، أو تكاد معدومة... مجرد مجموعة من الشماعات والأرفف اللي بـ تؤدي غرض عرض المنتجات وكان بها؛ وفيما عدا ذلك كل حاجة ثانية لونها أبيض بياض ناصع من أول الحوائط حتى الأرضيات، بالرغم من أن فيه معروضات كثيرة كان عليها تخفيض وقت زيارتنا، إلا أن واجهة المحل ما عليهاش أي حاجة توضح ده. أول مجموعة صادفتنا كانت بنطلونات Jeggings -وهي عبارة عن بنطلونات leggings بس جينز- لونها أسود وسعرها (135 جنيه)، وبنطلونات leggings قماش، حسينا أنها ثقيلة نوعًا ما على الصيف متوفر منها اللون الرمادي (225 جنيه). مجموعة الصيف كانت أكثرها فساتين قصيرة مطاطية باللون الأسود، من كثر ما هم شبه بعضهم ما علقش معنا منهم غير واحد بسيط بنصف كم وديكولتيه مستدير، أسعار الفساتين بـ تتراوح مابين 225 – 350 جنيه حسب الموديل. المحل مقسم لمستويين: الدور الثاني كان فيه مجموعة من الجينزات الفاتحة اللي قصتها مستقيمة (225 جنيه)، ومعها مجموعة كبيرة من البلوزات المنقوشة بالورود قصاتهم مختلفة... اللي بأزرار وتشبه لحد كبير للقمصان واللي بفتحة رقبة مستديرة وكمها يصل لحد المرفق أسعارهم (350 جنيه)؛ بالرغم من أننا بـ نحب أي حاجة منقوشة، إلا أننا حسينا أن قماشتهم خشنة وثقيلة ده غير أن النقوشات المطبوعة تفاصيلها كثيرة ومتعبة للعين. بعكسهم كان فيه بلوزة قطن بيضاء بأكمام، الجزء الأمامي منها كان منقط بالأسود (135 جنيه)، حسينا أن قماشتها الخفيفة مناسبة للصيف والحر اللي إحنا فيه ده، بالرغم من أننا ما حسيناش أن فيه قطعة مميزة في المحل تخلينا نطلع المحفظة بقلب جامد ونصرف، إلا أن شدنا كارديان طويل وبكُم لونه أبيض وعليه نقشة زهور باللون البنفسجي، تصميمه بسيط وتفاصيل النقشة حلّته أكثر. حتى الآن مش عارفين سر اختيار ديكسيت لموقعه الميت في اليمامة سنتر، وحتى موقعه الأول في محيي الدين أبو العز كان بعيد تمامًا عن أي منافسة لأنه كان المحل الوحيد في المنطقة، ممكن يكون الاختيار ده نابع من أن موديلاته وجودة ملابسه ممكن ما تقدرش تصمد أمام طوفان الماركات الثانية الأكثر شبابية... وده في حد ذاته ذكاء منهم.

...

زفير: كل حاجة بـ تتكلم عربي في محل الزمالك الشهير
اصدرت في: 23/08/2015

نعتقد أننا مررنا بمرحلة زمنية كانت أي حاجة لها علاقة بلغتنا أو ثقافتنا كانت بـ تعتبر غير مرغوب فيها، ووصلنا لأن كل حاجة في حياتنا من أول أكلنا، موسيقتنا وحتى لبسنا لازم يكونوا على الطابع الغربي، بعدها ظهرت مرحلة الاعتزاز بالتراث وكل ما هو شرقي عامة، ومصري على الأخص؛ زفير - Zafir في الزمالك من أول المحلات اللي ساعدت على انتشار الموجة دي بقوة وبشكل مختلف. مش عارفين بالضبط مرحلة الاعتزاز بثقافتنا بدأت إمتى وإزاي، يمكن بانتشار المراكز الثقافية المختلفة اللي أتاحت الفرصة لعدد كبير من فرق الأندرجراوند المصري أنها تظهر، مع انتشار المكتبات اللي معها انتعش سوق الكتب العربي والمصري، وبالتالي أصبح فيه ثقافة محلية معاصرة، بعدما كان فيه فجوة كبيرة بين واقع الشباب وأي حاجة لها علاقة بثقافتنا. بعيدًا عن تحليلنا الشخصي للموقف، "زفير" وظف الثقافة المحلية بشكل أقل جدية وقدر أنه يكوّن شعبية كبيرة عند الشباب بمجموعة تي شيرتات مختلفة تيماتها تنوعت ما بين استخدام الكلمات والخطوط العربية، والنوستالجيا وتوظيف رسومات مجموعة من الفنانين الشباب، بعد مرور سنين من أول زيارة لنا لزفير، لاحظنا تطور في المنتجات المعروضة، واللي ما بقيتش مقتصرة على التي شيرتات بس. على شمالك أول ما تدخل ستاند خاص بمجموعة من سيديهات موسيقى الأندرجراوند، لفت نظرنا منهم سي دي بـ يجمع عدد كبير من الأصوات النسائية المشهورة (35 جنيه). جنبهم مجموعة من الأرفف مرصوص عليها مجلات (35 جنيه) بتصميمات أنجح تي شيرتاتهم زي "سلاح التلميذ"، وهو عبارة عن صورة غلاف الكتاب المشهور ولكن مع الفرق أن الشخصيتين ماسكين أسلحة فعليًا. معروض كمان مجموعة من حاملي الأكواب المصنوعة من الكروشيه بألوان مبهجة (15 جنيه الواحدة)، وDream Catchers وهي عبارة عن معلقات مصنوعة بالخيوط، بـ تقول الأسطورة عند سكان أمريكا الشمالية الأصليين أنها بـ تجلب الأحلام السعيدة وتبعد الكوابيس، وأسعارهم بـ تتفاوت حسب الحجم (متوسطة 55 جنيه). الجديد أن زفير عارض مجموعة من المايوهات الحريمي، لو قطعة واحدة (100 جنيه) لو قطعتين (110 جنيه)، عامة هم مافيهومش تفاصيل كثيرة واعتمادهم الكلي على ألوانهم ونقشة القماش، ينفعوا في زنقة وسعرهم ممتاز بالنسبة للمحلات الثانية. بجانب الكاشير معروض إكسسوارات لـ Eman Designs اللي بـ تتميز بطابعها الشعبي، لفت نظرنا أنها مصنوعة بدقة وشكلها النهائي ممتاز وأسعارهم بـ تبدأ من 65 جنيه وبـ توصل لـ 200 جنيه. الدور الثاني فيه مجموعة التي شيرتات المشهورة (160 جنيه)، عجبنا منها واحدة لونها رمادي عليها رسوم فرعونية، لاحظنا أن عددهم قليل بالنسبة لزمان، ده غير أن معظمهم حجمه كبير والتصميمات مش كثيرة، زفير بـ يعرضوا ماركة الملابس المصرية ألاجا - Allaga، واللي برضه مستوحاة من التراث المصري، القطع مش كثيرة عجبنا منهم فستان قصير بدون أكمام لونه بني (400 جنيه). من ضمن الحاجات اللي زفير بـ يعرضها هي مجموعة من الخداديات اللي مصنوعة من أقمشة طابعها عتيق (زي اللي كنا بـ نلاقيها في بيت جدودنا)، ومنها حجمين الصغير (45 جنيه) والأكبر (65 جنيه). لو قعدنا نتكلم عن المنتجات المعروضة في زفير مش هـ يخلص المقال، لازم تروحوا تشوفوه لمجرد أنكم تأخذوا فكرة عن المكان، وحتى لو أنتم رحتوا هناك قبل كده، ننصحكم أنكم تعملوا زيارة ثانية لأنكم بكم المعروضات دي محتاجين كذا زيارة وراء بعض.

...

سكارف هوم: محل إيشاربات وإكسسوارت وشنط في المهندسين
اصدرت في: 09/08/2015

بالرغم من أن عدد كبير من المحلات متخصصة في بيع الإيشاربات ومستلزمات الحجاب، إلا أن فعليًا مافيش غير ماركتين لبيع الإيشاربات، واحدة منهم هي سكارف هوم – Scarf Home بمعنى أن كل المنتجات المعروضة مصنعة في مصنع تابعة للمحل. مبدأيًا، الإيشاربات مقسمة حسب نوع القماش وشكل الإيشارب، وبالرغم من أن طريقة العرض مرتبة ومريحة للعين، إلا أنها بالنسبة لنا كانت غير عملية، حوائط العرض مقسمة لجزئبن: تحت إيشاربات مرصوصة حسب الألوان في أدراج واجهتها زجاجية، وفوق حوالي 4 إيشاربات معروضة تقدري تشوفي الخامة والنقشة، اعتراضنا الوحيد أن فيه موديلات نازل منها ألوان مختلفة، معروض منها لون واحد والباقي في الأدراج مش سهل توصلي له بدون مساعدة القائمين على خدمة البيع. سكارف هوم إيشارباته أذواقها متفاوتة بدرجة مذهلة... يا إما حلو جدًا، يا إما ما يتلبسش، وطبعًا الأسعار بـ تختلف حسب الخامة وكونه منقوش أو سادة، يعني المجموعة القطن السادة كان فيه منهم واحد بني سادة قماشته ثقيلة وناعمة (90 جنيه). من نفس الخامة ولكن أخف كان فيه مجموعة مقلمة أبيض في أسود ونصف الإيشارب الثاني لون Solid، وده كان أرخص إيشارب لاقيناه هناك (55 جنيه). أما الساتان المنقوش سواء مربع أو مستطيل ومنقوش فأسعارهم بـ تتراوح بين 240 لـ 380 جنيه، وده رقم كبير بالنسبة لقطعة مهمة لأي واحدة محجبة. سكارف هوم فيه مجموعة كبيرة من الشنط، موديلاتها ممتازة وكذلك شكلها النهائي. عجبنا منها شنطة بحر خوص ذراعها من الجلد، ومكونة من ثلاثة ألوان برتقالي، أصفر وأزرق (350 جنيه). ومن شنط السهرة عجبتنا واحدة Clutch صلبة لونها أزرق ومزينة بمجموعة من القطع المعدنية المحفور عليها (350 جنيه)، لفت نظرنا شنطة بـ Trolley من الجلد، معها شنطة ثانية في حجم شنط الماكياج بسعر (920 جنيه)، الشنطة من وجهة نظرنا كانت غير عملية بالمرة، لأنها تندرج تحت شنط السفر ولكن حجمها بالكاد يكفي طقم واحد (ده على اعتبار أنها للسفريات القصيرة جدًا) وخصوصًا أن الستات تفاصيل ملابسهم كثيرة ومعقدة؛ ده غير أن سعر الشنطة يعادل ضعف سعر شنطة بضعف الحجم في محلات الماركات المتخصصة في بيع شنط السفر. آخر حاجة شفناها في جولتنا كانت مجموعة من الإكسسوارات، من العقود عجبنا واحد مصنوع من الخيوط الملونة، مكون من 5 أدوار في بعض منهم حلقات معدنية نازل منهم قطع بلاستيك ملونة (100 جنيه). من الخواتم عجبنا واحد ضخم لونه ذهبي عليه رسومات هندسية ملونة (90 جنيه)، وواحد تفاصيله أخف بكثير بنفس اللون عليه وردة لونها وردي (60 جنيه). مجموعة الإكسسوارات مش كثيرة ولكن منوعة وتناسب أي ذوق. إجمالًا، نعتقد أن أي واحدة محجبة تتمنى أنها تلبس إيشاربات مختلفة ما تلاقيش حد ثاني لابسها، ولكن بالنسبة لقطعة حيوية جدًا زي الإيشارب الموضوع لازم يكون متوازن من حيث السعر والجودة، لأنه في النهاية –وإن جاز التشبيه- الإيشاربات عاملة بالضبط زي الملابس الداخلية، ما ينفعش تشتري واحد غالي وقماشته حلوة وتعيشي عليه باقي الأسبوع؛ ما ننكرش أن موضوع الأسعار نسبي، ولكن حتى الإيشاربات اللي سعرها معقول في سكارف هوم موديلاتها جماليًا أقل من محلات الإيشاربات العادية، روحيه لو عاوزة تشتري قطعة مميزة وعندك استعداد أنك تضحي بالسعر.

...

Prude and Style: أحلى فساتين محجبات بألوان الصيف وأسعار حكاية في مصر الجديدة
اصدرت في: 30/07/2015

بالنسبة لنا كبنات محجبة بـ نقع في حيرة كبيرة لما نيجي نشتري أي حاجة، يا ترى هل هي ضيقة ولا واسعة، طب شكلها حلو ولا مكبرة سننا، وأهم حاجة طبعًا المقاس، علشان بدل ما نفرح بالحاجة وإحنا شايفينها في أيدنا ونروح نقيسها نلاقيها مش مناسبة علينا، بس نيجي لتحقيق المعادلة الصعبة أنك تختاري لبس حلو وألوانه متناسقة وشيك وفي نفس الوقت وواسع وحطوا 100 خط على واسع دي، ودي معادلة ثلاثية لو تعرفوا البنات بـ تتعب قد إيه علشان توصل لها، هـ يصعبوا عليكم. ولازم نعترف برضه أننا من نوع الناس اللي لما بـ يشوفوا حاجات كثيرة معروضة ذوقها وحش بـ يكتئبوا وممكن الموضوع يتطور ويقلب بحالة غضب غير مبررة، حتى لو مقررين أننا مش هـ نشتري حاجة، بس مجرد فكرة أن فيه ناس ممكن تعمل كده في نفسها وتلبس ألوان بـ تضايق العين ويناقض الجمال العام، ده شيء حقيقي بـ يسرق البهجة مننا، والحمد لله ربنا ريحنا من الموضوع ده لما بدأت تطلع صفحات اللبس للمحجبات على الفيسبوك، واللي عملها بنات في أوائل العشريينات من عمرهم بعد ما تعبوا من كثر اللف على المحلات وما لقوش اللي يناسب حجابهم، فـ قرروا يفَصلوا بنفسهم، وسنة وراء سنة كبرت الفكرة وبقى عندهم محل في مصر الجديدة، ما شاء لله وناس بـ تساعدهم فيه كمان. الحقيقة أن أول حاجة جذبتنا لصفحة Prude and Style على الفيسبوك أنهم بـ ينزلوا حاجات جديدة على طول، ودائمًا ذوقها بـ يبقى حلو جدًا فعلًا، وأسعارهم مش غالية خالص. عجبنا كذا فستان وفرحنا أن عندهم الخيارين أنك تطلبي أونلاين أو أنك تروحي تختاري اللي يعجبك وتقيسيه الأول قبل ما تشتريه، وطبعًا اختارنا النوع الثاني لأننا مش من هواه الاختيار عمياني، خاصة أن مش كل الموديلات اللي بـ تعجبنا ممكن تطلع حلوة علينا. المهم رحنا لهم، المكان سهل جدًا ما يتوهش، وأول ما دخلنا لقينا المكان زحمة جدًا بطريقة غير طبيعية، قبل العيد بقى والكل بـ يستعد للبس العيد، المكان كبير ما شاء الله أكبر مما كنا نتخيل، وفيه كل أنواع اللبس اللي يخطر على بالك من أول الطرح لحد الجاكيتات سواء الخفيفة أو العادية. فـ قررنا أننا نختار كل الحاجات اللي عجبتنا ونقيسها مرة واحدة توفيرًا للوقت والمجهود، خاصة كمان أن مكان القياس كان زحمة جدًا. كان فيه فساتين هناك بلا مبالغة لكل الأذواق لو بـ تحبي الفساتين السادة خالص وتظبطي معاها كارديجان وطرحة هـ تلاقي فساتين بحوالي 200 جنيه، كمان فيه فساتين بكم طويل مزخرفة زخارف أقرب للثقافة الهندية شوية وفيه منها كل الألوان الواحد بـ 250 جنيه، عجبنا فستان منهم لونه الأساسي بيج وفيه خطوط مزخرفة لونها أحمر وأخضر وأزرق، شكلهم كان حلو جدًا مع بعض. كمان كان فيه مجموعة فساتين، تحسوها فساتين البحر من ألوانها وأشكالها، كان فيه منهم فستان أبيض بحمالات أزرق من النصف ومرسوم عليه نخلة صغيرة، ينفع للبلاج وبـ 200 جنيه. بس اللي عجبنا أكثر كان فستان أزرق مخطط بالطول بكل درجات اللون الأزرق برضه بحمالات وفيه كشكشة بسيطة من النصف علشان تعطيكي وسع، وكان بنفس السعر. هـ تلاقوا هناك برضه فساتين مخططة بالعرض كثير منها الألوان المبهجة واللي بـ تجذب العين، ومنها الغامقة والهادئة على حسب ذوقك، وأغلب الفساتين بحوالي 200 جنيه، لو أكثر هـ تبقى حاجة بسيطة. وكان فيه فساتين سوداء منقطة نقط صغيرة ونصف كم أو كات، وفيها حزام عند الوسط، برضه كان بسيطة وحلوة قوي، وسعر الواحد منهم حوالي 210 جنيه. هم كمان عندهم فساتين خاصة للمناسبات وجيبات كمان، عجبنا فستان بكم طويل لونه روز فاتح قوي، وفيه دانتيل أبيض على شكل فيه من الرقبة لحد الوسط، و فيه منه كل الألوان، وكان بـ 250 جنيه تقريبًا. أما بالنسبة للجيبات فكان أغلب اللي ينفع للمناسبات قماشته ستان أو شيفون، وفيه منهم كل الألوان وسعر الواحدة بـ يبدأ من 150 جنيه، وكان فيه قطن كمان، لكن أكثر نوع من الجيبات عجبنا، كان اللي عليه زخرفة مبهجة سواء ورد أو مجرد ألوان بزخرفة متنوعة، وسعر الواحدة منهم كان بحوالي 200 جنيه، وفيه بأقل. أجمل حاجة بقى أن فيه كل أنواع الكارديجان اللي تتخيلوها، سواء الطويلة جدًا، أو القصيرة، وكان فيه قمصان سادة كمان، ده غير الكيمونو والجاكيتات العادية اللي تنفع للجامعة أو للشغل، وكان فيه منها المنقط أو اللي عليه قلوب، وكانت فكرة مختلفة منهم الإضافة دي على الجاكيتات الرسمية. الحقيقة اتبسطنا جدًا بـ تجربتنا هناك، برغم الزحمة قدرنا نختار حاجات كويسة، يا ريت تلحقوا أنتم كمان قبل الحاجات الحلوة ما تخلص، وكل سنة وأنتم طيبين.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن