ملابس رجالي تسوق in الزمالك Cairo, Egypt

تسوق

داندي: ملابس كاجوال رجالي وإكسسوارات في الزمالك
اصدرت في: 14/05/2012

رغم أنه مش مشهور قوي بين محلات الملابس الكاجوال الرجالي، إلا أن فروعه المنتشرة في أحياء القاهرة والمحافظات بـ تؤكد أنه ناجح وله زبائنه المخلصين، خصوصًا مع استمراره حوالي 15 سنة وهو محافظ على مستوى معين من جودة الخامات والموديلات والأسعار المغرية، وده لأن منتجات «داندي» كلها من المصنع الخاص بهم، وكل التصميمات كمان لمصممين مصريين، يعني نقدر نقول على «داندي» فخر الصناعة المصرية بجد. له فروع في مصر الجديدة ووسط البلد والمعادي والزمالك وفي مدن ثانية زي طنطا والإسكندرية، في زيارتنا دي لفرع الزمالك الأصغر حجمًا بين باقي الفروع، كنا مش متأكدين إذا كان المحل ده تابع لباقي السلسلة ولا مجرد تشابه أسماء، لكن تأكدنا لما دخلنا المحل ولقينا الموديلات اللي إحنا متعودين نشوفها في باقي الفروع. «داندي» مشهور بالملابس الشبابية البسيطة في تصميمها واللي غالبًا مصنوعة من القطن، التي شيرتات البولو هي أيقونة المحل، بموديلات وقصات مختلفة ودائمًا هـ تلاقي عنده كل الألوان، أسعار البولو شيرت بـ تبدأ من 80 جنيه لحد 120 جنيه، وأوقات التخفيضات بـ توصل لـ 50 أو 60 جنيه، ميزة قصات البولو شيرت عند «داندي» أنه بـ يناسب كل الأحجام وممكن يداري عيوب الجسم لأن نسبة البوليستر اللي في الخامات بـ تخلي للتي شيرت شكل ثابت ومش بـ يتغير بتغير شكل الجسم. التصميمات هـ تلاقيها دائمًا شبه الموجودة في كل بيوت الموضة العالمية، لكن بطابع خاص بالمحل ومن غير أي إضافات مالهاش لازمة. نفس الكلام على القمصان سواء بأكمام طويلة أو نصف كم، أسعارها من 120 لـ 140 جنيه، قليل لما هـ تلاقي قميص سادة، كل التصميمات هناك كاروهات بأحجام مختلفة أو مقلمة، لكن شيك وتمشي كاجوال أو كلاسيك. الجينز بألوانه الأساسية كلها موجود، بس مش هـ تلاقي الـ Slim اللي على الموضة موجود إلا باللون الأزرق الغامق فقط، أغلب البنطلونات هناك بقصات تقليدية (Straight) ومن غير أي شغل من الأمام أو الخلف (Used) وده شيء كويس لأن ساعات بـ ندور على الموديلات العادية وبـ نبقى مش عارفين نجيبها منين. أسعار الجينز من 140 لـ 180 جنيه، وهـ تلاقيها من ماركة Dandy أو Jeep من مصنعهم الخاص. فيه كمان بنطلونات جبردين كلاسيك بالألوان الفاتحة زي البيج والكريمي والرصاصي، مريحة وعملية جدًا لو هـ تجيبها للشغل اللي بـ يتطلب ملابس شبه رسمية. فيه جوارب وملابس داخلية للرجال (10 جنيه) وبعض الإكسسوارات زي الأحزمة وعدد محدود جدًا من الأحذية بأسعار 285 جنيه أو أكثر، وكالعادة إحنا مش بـ نرشح لحد أنه يشتري أحذية إلا من محل متخصص في الأحذية. فيه كمان مايوه شورت بموديلات شبه الموجودة في «Quicksilver» وكلها Free Size أو مقاس واحد وسعر الواحد 59 جنيه. «داندي» عندهم مشكلة في التعامل مع الزبائن، في تجربة شخصية للناقد كاتب المقال فى زيارة سابقة للى بـ نكتب عنها، حاول يرجع جينز كان ظهر فيه عيوب صناعة، لكن بعد أسبوعين من المماطلة وعدم الإفادة يأس تمامًا وتخلص من الجينز بعد ما راح الفرع الرئيسي في وسط البلد وقال لهم قد إيه هو مستاء من تجربته مع خدمة العملاء. مش لازم تكون دي القاعدة في التعامل بس وجب التنويه. غير كده التعامل داخل المحل في الشراء والاستبدال والقياس بـ يبقى جيد جدًا، وخبرة البائعين كبيرة وهـ يساعدوك بقلب.

...

سيكو: ملابس رجالي بأسعار منافسة في الزمالك
اصدرت في: 14/10/2011

«سيكو - Sicko» موجود في شارع بهجت علي أمام شارع إسماعيل محمد، اسمه غريب شوية وهو لسه فاتح قريب في نفس مكان «أند كومباني – And Company». رغم أن المحل كبير ومكون من دورين، لكن المعروضات مش كثير وبعضها مُكرر في العرض لكن بشكل مختلف؛ زي القميص الـ «زارا» البنفسجي اللي شفناه في 4 أماكن مختلفة وكل مرة نفتكره حاجة جديدة عينينا لسه واقعة عليها في المحل. أسعار القمصان بـ تبقى ما بين 150 لـ 250 جنيه، وموجود قمصان «زارا» السادة الأصلية، ومن أحسن الحاجات في التشكيلة القميص الكاروهات الأبيض في أزرق. وتأكدنا من موظفين المحل أنهم من مخزون كذا سنة فاتت. وفيه من ضمن التشكيلة قمصان من ماركة All Saints الأغلى شوية من الباقيين، وفيه مجموعة من الماركات غير المعروفة أو غير المشهورة والغريبة أنها بـ تتباع بنفس الأسعار الغالية؛ يمكن علشان نفس الستايل أو بنفس الجودة. من ضمن المعروضات اللي لفتت نظرنا مجموعة البولو شيرت من ««Tommy Hilfiger بسعر 150 جنيه، رغم أن سعر نفس التي- شيرت بنفس التصميم 600 جنيه في توكيل «تومي»! ومش هـ نبالغ لو قلنا أنه هو الأصلي بكل تفاصيله أو على الأقل مافيش أي حاجة تفرقه عن الأصلي. فيه مجموعة من التي شيرتات المشجرة والمزركشة وكلها بـ 150 جنيه. وفيه مجموعة من تي شيرتات سوبرمان اللي مالية الدنيا دلوقتي بألوان مختلفة. البنطلونات هنا من 180 لـ 230 جنيه، الجينز الأزرق الغامق خطير، والجينز الأسود الباهت كان كويس، الاثنين كانوا slim fit والاثنين ماركة «زارا». وفيه شوية معروضات من « «H&M لكن ضيقة قوي أكثر من أي موديل ثاني، لكن السمة المميزة للجينز عمومًا هناك هي الجودة اللي هـ تحسها من ملمس النسيج نفسه وسُمكه وقوته. ولو جبت بنطلون وطلع ضيق قوي ممكن تلبسه في البيت طول اليوم وتقعد تتنطط به وتقعد كثير لحد ما يوسع ويبقى تمام. في الدور العلوي الأحذية كثيرة ومتنوعة، موديلات الفو-سود من «زارا» الحاضرة بقوة في معروضات «سيكو»، فيه منها برباط ومن غير رباط بألوان البني والبيج. عجبنا موديل من الـ faux suede شبه الموجود في «بول أند بير» بالضبط دلوقتي وكان سعرها 360 جنيه. مشكلة المحل طبعًا في المقاسات، آخر مقاس ممكن تلاقيه هو 36 في الجينز، وده لأن المعروضات بقالها أكثر من سنة زي ما قلنا.

...

فوستك: ملابس بسيطة ورخيصة في الزمالك
اصدرت في: 01/08/2011

بـ تدور على تقليد طبق الأصل ومش غالي لماركات ملابسك الكاجوال المفضلة؟ روح لـ «فوستك» الموجود من زمان في شارع محمد منصور في الزمالك. أهم ميزة أن أسعاره على قد الجيب، وبـ يعرض ملابس رجالي وحريمي وأطفال كاجوال بسيطة للاستخدام اليومي، وفيه تشكيلة من التي شيرتات بأكمام طويلة ونصف كم وبنطلونات وجينزات، وبيجامات وملابس خروج ثانية بألوان كثيرة وخامات جيدة وطبعات ظريفة. المكان مثالي لشراء الملابس الأساسية اللي لا يخلو منها دولاب! وعنده تقليد ممتاز لماركات زي Bebe وExpress وTommy Hilfiger وCalvin Klein وLacoste وغيرها. فيه 3 أماكن بروفات للملابس فيهم مرايا، وستائر القياس مالية المكان، وفيه مجموعة قليلة من البنات موجودين للمساعدة، بس مش هـ يحاولوا يعرضوا خدماتهم إلا لو أنت طلبت منهم. التي شيرتات والبنطلونات مرصوصة من الأرض للسقف، خلي معاك فلوس كثير وطاقة لـ اللف والتدوير وأي مزيكا في ودانك علشان ما تزهقش، وخليك متأكد أنك هـ تلاقي دائمًا معروضات لُقطة. ممكن ببساطة تقضي ساعة بس بـ تدور في المعروضات لحد ما تلاقي حاجة مناسبة لك، ومعظم قطع الملابس معمولة من القطن الناعم بنسب متفاوتة، والاهتمام هنا مش بالخامة قد ما هو بالشكل، يعني القطعة ممكن تعيش معاك موسم أو اثنين بالكثير، بس مش مشكلة بما أن أعلى سعر قطعة في المحل مش هـ يعدي 150 جنيه. ملابس الأطفال والبيبي أسعارها بـ تتراوح من 18 لـ 50 جنيه، وأسعار التوب الحريمي من 40 لـ 100 جنيه، وأي بنطلونات حريمي أو جينز بـ تكون ما بين 100 وآخرها 150 جنيه. واتفاجئنا لما لقينا عند «فوستك» بنطلونات رمادي كلاسيك تنفع للمكتب اللي شبه الأصلي منها في Express ولها نفس القصات، ودي كانت بـ 130 جنيه بس! وكانت من أحسن الحاجات اللي شفناها في المحل، لُقطة من الحاجات اللي لازم تقلب المحل علشان تلاقيها، وفيه منها كمان رجالي بأسعار ما بين 80 لـ 150 جنيه. الفلوس اللي هـ تدفعها هـ تأخذ قصادها بضاعة، الكم هنا أهم من الكيف، وما تتوقعش أنك تلاقي أشيك حاجة هنا، الأساسيات وبس.

...

موباكو: التي شيرت الـپولو المصري
اصدرت في: 24/07/2011

بلوجو الجمل الشهير بدأت سلسة محلات «موباكو - Mobaco » من 35 سنة بكام عامل قليلين والنهارده عندهم أكثر من 30 فرع في جميع أنحاء الجمهورية. مصانع «موباكو» عندها خطوط إنتاج ملابس من القطن المصري الفاخر٬ الكاشمير٬ الحرير والصوف الإنجليزي. وفي مدخل المحل هـ تلاقي كمان علامة «نيو مان – New Man» ودي ماركة عالمية فرنسية بـ توزعها محلات «موباكو»، الفرع اللي إحنا زرناه هو فرع الزمالك الموجود في فندق الـ«ماريوت - Marriot». الفرع صغير لكن عنده من البضاعة ما يكفي أن الواحد يلاقي حاجة تعجبه ويشتريها، وفيه من المنتجات ما هو أرخص من العادي وفيه ما هو أغلى. الرخيص عنده البنطلونات الكتان الكلاسيك بـ170 جنيه٬ والتي شيرتات الپولو التقليدية بـ100 جنيه٬ أما الضيقة منها بـ 120 جنيه. لغاية هنا معقول٬ الغالي بقى في المحل هو الحاجات اللي بـ توصل لـ 290 فيما طالع٬ وده بالنسبة للبدل اللي بـ تبدأ من 350 جنيه والقمصان الحرير اللي بـ تبدأ أسعارها من 300 جنيه٬ السعر في حد ذاته مش مشكلة٬ المشكلة أن الستايل بتاع المنتجات الغالية دي تقليدي بزيادة ومش على الموضة أبدًا٬ وبالرغم من أن فيه بعض الألوان بـ تلفت الانتباه إلا أن القطعة في الآخر ما بـ تبقاش حلوة برضه. «موباكو» عنده كمان شورتات وبناطيل لممارسة الرياضة٬ لكن القصات والأشكال كانت وحشة فـ ما اهتميناش نعرف السعر أصلاً. لكننا لقينا بُرنيطة بحر بيضاء جميلة جدًا بـ90 جنيه عجبتنا قوي. فيه قسم للأطفال بجانب القسم الحريمي لكن القسم الرجالي له الأولوية في المكان٬ وفيه مجموعة كبيرة من القمصان بألوان وتصميمات كثيرة وبنطلونات كاكي. الأسعار في «موباكو» رائعة بالنسبة لجودة المنتجات لو هـ تخليك في الأساسيات فقط. ومع ذلك الجودة تعتبر يا دوب معقولة لو قارناها بالماركات العالمية المتخصصة في التي – شيرت الپولو زي «لاكوست - Lacoste» و«رالف لورن – Ralph Lauren». لكن كونك هـ تدفع أقل من ربع اللي كنت هـ تدفعه في واحد من المحلات دي يخلي «موباكو» بديل محلي رائع ونسبيًا رخيص٬ ده غير أن الخدمة الهادئة والمضيافة حاجة رائعة في المحل.

...

زفير: تي - شيرت مصري أصلي
اصدرت في: 24/04/2011

فتح سنة 2006 وهو مبني على فكرة إستخدام أي حاجة ليها علاقة بالثقافة والبيئة المصرية في رسومات وعلامات علي تي - شيرتات. «زفير» بـ تسوَّق نفسها على إنها وسيلة الشباب المصري للتعبير عن نفسه، ومكان يعرض فيه المصممين والفنانين الهواة أفكارهم وتصميماتهم. المحل فيه تي - شيرتات مكتوب عليها بالعامية المصرية الجريئة وممكن يكون مكتوب مثل شعبي أو حكمة أو أقول مأثورة أو كتابة بـ خط اليد أو لافتات طرق أو الكلام اللي بـ يتكتب على العربيات النقل والميكروباصات وأي حاجة تانية بـ تعكس ثقافتنا الشعبية المصرية. المحل في الزمالك دور واحد ومكان العرض صغير جداً معروض فيه تي- شيرتات رجالي وحريمي وأطفال على أرفف وفيه منهم متعلق على شماعات، المقاسات الكبيرة أسعارها 130 جنيه للتي - شيرت والأطفال بـ70 جنيه. التصميمات متنوعة وعارضة فترات زمنية مختلفة زي صور أم كلثوم وكلمة "مصر" مكتوبة بالعربي على غير العادة ودي حاجة مميزة وفريدة و«زفير» أول من ابتدوا يعملوها، ومجموعة عليها شعارات السلام والخير وكله مكتوب بالعربي، ومن أشهر التصميمات رسم لشعار كتاب "سلاح التلميذ" والولد والبنت ماسكين بنادق ومسدسات، وشعار "الشبشب أبو صباع" موجود على لبس كتير قوي في «زفير» لدرجة إنه بقى يستخدم كـ لوجو على التي- شيرت، حاجات زي دي طبعاً ما يتحكيش عليها إنما لازم تتشاف عشان تفهم الجانب الفكاهي في الموضوع. و تأكيداً على مصرية الموضوع ككل، المحل بـ يستخدم شعار 100% مصري والمنتجات 100% قطن مصري. التي – شيرتات بـ تيجي بألوان كتير وكل المصممين اللي عاملين الرسومات واللوجوهات مصريين. المعروضات مقصود بيها إنها تخلق نوع جديد من أفكار الأزياء اللي يكون ليها علاقة بالمكان اللي إنت فيه وإنك تبقى ماشي عكس التيار ومش لابس حاجة مكتوب عليها بالإنجليزي و إنت مش مركز إيه المكتوب أو معناه إيه! والجروب الخاص بالمحل على الفيسبوك بـ يأكد ده ومستخدم شعار "ببساطة تي- شيرتات بـ تتكلم معانا عنِّنا". إحنا معجبين بحيويتهم وروحهم وإستمتاعهم بالمشروع اللي بـ يعملوه، بس 130 جنيه على تي- شيرت واحد وممكن يكون التصميم مش ظريف أو دمه مش خفيف زي ما المفروض يكون - فيه تصميمات مش بـ تنجح خالص بـالمناسبة – يبقى غالي شوية خاصة إن مفيش فرق في الأسعار بين تصميم والتاني، كله سعر واحد. التشكيلة نفسها مش كبيرة قوي وممكن تبقى عايز تشتري بس عشان عجباك الفكرة وحابب تدعمها إنما مش عشان روعة المنتج نفسه. وعشان مانكونش ظالمين المكان على الآخر الموظف اللي في المحل قالنا أن المجموعة المعروضة من حاجات السنة اللي فاتت وإن في الأسابيع اللي جاية هـ ينزل معروضات الموسم الجديد اللي بـ نتمنى تكون مغرية أكتر.

...

أورنج سكوير: بِدَل رجالي جاهزة وتفصيل في الزمالك
اصدرت في: 05/04/2011

قريب من منطقة الكافيهات المشهورة بتاعة فندق أم كلثوم في الزمالك، وبالتحديد في الشارع اللي ورا أبو الفدا اللي إسمه «إبن النبيه» وعلى ناصية الشارع تقريباً هـ تلاقي «أورنج سكوير- Orange Square». محل بِدَل رجالي متخصص في التفصيل والتَكسيدو.صعب انك ما تاخدش بالك من اليافطة البرتقالي الواضحة. في الفاترينة المحل عارض بِدَل عادية وبِدَل تكاد تكون سخيفة. هـ تنزل كام سلمة كده عشان توصل للمحل. الديكور شيك، ألوانه دافية، لكن الإضاءة غريبة. المحل مصمم عشان يوحي إنه واسع وده بفضل إن في حيطة كاملة عبارة عن مراية ضخمة، مع إنه في الواقع مساحته أصغر من المعتاد، بس دي مش حاجة غريبة على الزمالك. وبما إن في حيطة كاملة عليها مراية، باقي الحيطان طبيعي متغطية بالكامل بالملابس. البِدَل، قمصان وغيره كانت مرصوصة بشكل منظم ومتناسق، بحيث مافيش حاجة تبان احسن من اللي جنبها. في الوسط في طرابيزة عالية سطحها مراية، فوقيها وتحتيها ملابس معروضة، صحيح مش أحسن طريقة للعرض بس لايقة مع ديكور المحل.أورنج سكوير بـ يعرض مجموعة من البِدَل الفخمة جداً بـ تبتدي أسعارها من ٣٢٠٠ جنيه وكرافتات بـ تبتدي من ١٠٠ جنيه وانت طالع، تشكيلة صغيرة من البالطوهات بـ تبتدي من ٣٠٠٠ جنيه واحزمة جلد بـ٦٠٠ جنيه وفي عدد قليل من الجزم متبعتر في المكان . في كمان تشكيلة ملابس كلاسيك شبابي شيك: البِدَل الـ«سليم فيت» الضيقة والكرافتات الرفيعة بكل الالوان تقريباً. الخدمة هايلة في المحل، صحيح أول ما تدخل مش هـ تلاقي حد بس هـ يجي مسؤول بيع يساعدك بحماس وترحيب في ثوان من أوضة التفصيل اللي جوة المحل.كل اللبس عليه تيكيت مكتوب عليه «أورنج سكوير»، ماركة مش معروفة ولو دورت على جوجل هـ تلاقي معلومات بسيطة عنها. ولما تسأل مسؤول بيع هناك هما بـ يجيبوا الِبِدَل بتاعتهم منين هـ يكون الرد مشوش ايطاليا، إنجلترا – مش واضح! مع ذلك في مصادر تانية بـ تقول ان الخامات مستوردة بس تصنيع البِدَلة بـ يتم في مصر.الحاجة اللي بـ تميز المحل هي البِدَل التفصيل اللي الترزي بـ ياخد فيها مقاسك بالظبط وبـ تختار انت نوع القماش سواء انجليزي أو إيطالي (إيطالي احسن طبعاً). وبـ تطلع في منتهى الروعة. ممكن تروح في أي وقت وتدخل الأوضة اللي جوة بتاعة التفصيل على طول. البِدَلة بـ تاخد من ١٠ لـ١٥ يوم عشان تـ تفصل، انما الحاجات الجاهزة يوم واحد وبتـ تظبط على المقاس، الترزي هناك كمان ممكن يحطلك اي حليات أو زينة للبِدَل زي الساتان وممكن يفصلك تكسيدو كامل من الأول للآخر.ارخص من «ارماني» بس اغلى من «بي تي ام»، يعني تقدر تقول اسعاره في الوسط المرتفع يعني من الاخر لو عايز تصرف شوية على بِدَلة من غير ما تبوظ الميزانية .. يبقى المحل ده عشانك .

...

مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن